Koj Puas Paub?
Cov tuag saum ncej ntoo yam li Yexus, cov neeg Loos puas tso cai muab lawv lub cev tuag coj mus log?
MUAJ coob leej ntau tus yeej paub txog zaj uas muab Yexus ntsia rau saum tus ncej ntoo thiab ob tug tub sab dai rau ob sab. (Mathais 27:35-38) Nyob hauv phau Vajlugkub sau hais tias muab Yexus lub cev npaj ua ntej mam li muab tso rau hauv lub qhov ntxa. (Malakaus 15:42-46) Muaj ib txhia tib neeg xav hais tias qhov no sau tsis yog lawm.
Cov neeg soj ntsuas Vajlugkub tau hais tias yog ib tug twg raug ntsia rau saum ntoo, nws yuav tsis muaj ib lub chaw faus. Cov tib neeg ntawd ntseeg hais tias cov raug txim tuag yam li ntawd, lawv log txawv. Muaj ib tug tub sau ntawv npe hu ua Eliyaum Xenpaws (Ariel Sabar). Nws sau nyob rau hauv ib phau ntawv tshawb fawb thiab qhia vim li cas cov soj ntsuas Vajlugkub thiaj hais li ntawd. Nws hais tias: “Qhov uas cov Loos muab ib tug neeg ntsia rau saum ntoo yog los mus tsim txom tej neeg phem thiab lim hiam tshaj plaws. Ib txhia neeg txawj ntse thiaj xav hais tias cov neeg Loos yeej tsis lam muab ib tug neeg phem coj los ua zoo log.” Cov neeg Loos xav rhuav tej neeg phem no ntsej muag, lawv thiaj tseg cov neeg phem ntawd lub cev tuag dai rau saum ntoo rau tej tsiaj qus tau dua noj. Tom qab tej tsiaj qus noj tag, seem qhov twg lawv mam muab coj mus faus.
Cov neeg mus khawb txog tej khoom qub qub mus tshawb pom ib co neeg Yudais uas tau muab tua ib yam li Yexus. Nyob rau xyoo 1968, lawv txawm mus khawb tau ib tug txiv neej tuag rau tib lub caij uas Yexus tiam, tej pob txha. Lawv mus tshawb tau tus txiv neej ntawd cov pob txha ntawm cov neeg Yudais tej qhov ntxa uas nyob ze lub nroog Yeluxalees. Lub cev tuag ntawd muab ntim rau hauv ib lub thawv. Nyob hauv lub thawv ntawd, muaj tus txiv neej tus txha luj taws thiab. Muaj ib tug ntsia hlau ntev yuav luag ib dos (11.5 centimeter [4.5 in.]) ntsia tus pob txha luj taws rau ib daim txiag ntoo. Eliyaum hais tias: “Tus pob txha luj taws no yog ib tug txiv neej npe hu ua Yehaukhanas (Yehochanan) tus pob txha. Thaum tshawb tau tus txiv neej no tej pob txha los nthuav tawm qhia rau sawv daws paub lawm ces sawv daws txawm tseg ntua tsis sib cav txog zaj uas sau tias tau muab Yexus coj mus log hauv lub qhov. Yehaukhanas tus pob txha luj taws no qhia tau tias nyob rau Yexus lub caij, cov neeg Loos tso cai rau cov Yudais muab cov neeg uas raug ntsia rau saum tus ncej ntoo coj mus log.”
Thaum lawv tshawb tau Yehaukhanas tus pob txha luj taws, tus yuav xav li cas los muaj txog qhov uas muab Yexus ntsia rau saum tus ncej ntoo. Txawm tib neeg paub tsis tseeb txog qhov ntsia rau saum ntoo los tam sim no sawv daws yeej paub tseeb lawm tias tom qab cov neeg phem ntsia rau saum ntoo tuag lawm ces luag kuj muab cov cev tuag ib txhia coj mus log. Yog li ntawd, qhov uas sau rau hauv phau Vajlugkub tias muab Yexus lub cev tuag coj mus tso rau hauv lub qhov ntxa yeej muaj tseeb tiag thiab muaj puav pheej qhia tseg.
Qhov tseem ceeb tshaj yog Yehauvas tau faj lem tseg lawm tias yuav muab Yexus lub cev coj mus faus rau hauv tus txiv neej nplua nuj lub qhov ntxa. Yeej tsis muaj leej twg yuav los mus txwv tau Vajtswv tej lus kom tsis txhob tshwm sim.—Yaxayas 53:9; 55:11.