Ib Txhia Hais Li No Txog Kev Thov Vajtswv
Malias (Maria) hais tias: “Thaum kuv thov Vajtswv, cuag li Vajtswv rub kuv txhais tes tawm plaws hauv qhov tsaus ntuj nti.”
La-us (Raúl) hais tias: “Thaum kuv tus pojniam mob kheeb xawm (cancer) tau 13 lub xyoos, kuv niaj hnub thov Vajtswv pab. Txawm kuv pojniam tso peb tseg lawm los, twb yog muaj Vajtswv pab, kuv thiaj nyob taus li no.”
Anaj (Arne) hais tias: “Kev thov yog ib txojke nrog Vajtswv sib txuas lus.”
Malias, La-us, Anaj, thiab coob leej ntau tus saib kev thov Vajtswv muaj nuj nqis heev. Thaum lawv thov Vajtswv, lawv pom tias Vajtswv yeej mloog ntsoov lawv tej lus thov. Lawv xav tib yam li tus uas sau nqi Vajlugkub no tias: “Peb tsis ntshai mus cuag Vajtswv, rau qhov peb paub tseeb hais tias yog peb thov tej uas raws li Vajtswv lub siab nyiam, Vajtswv yeej yuav mloog peb tej lus thov.”—1 Yauhas 5:14.
Hos muaj ib txhia tsis xav thov Vajtswv lawm, yam li tus txivneej hu ua Xatij (Steve). Nws hais tias: “Thaum kuv muaj 17 xyoo, kuv 3 tug phoojywg tau poob rau txojkev ploj kev tuag. Ib tug ua tsheb sib nraus, hos ob tug poob deg. Kuv thov thov Vajtswv hais tias vim li cas muaj tej xwm no los raug kuv cov phoojywg. Tiamsis ntuj teb ntsiag moo to, tsis hnov suab sab qhovtwg tuaj. Kuv thiaj li xav hais tias ua cas yuav nkim kuv lub dag lub zog thov ua luaj?” Tsis yog Xatij thiaj xav li no xwb, tiamsis muaj coob leej ntau tus xav tib yam nkaus, lawv thiaj tseg txojke thov Vajtswv lawm.
Muaj tej txhia xav tias lawv tsis tas yuav thov thov Vajtswv. Yog Vajtswv xav pab tiag tiag ces tsis tas yuav hais ib los, nws twb pab lawm. Nws twb yog Vajtswv, ua cas nws thiaj li yuav tsis paub tias peb txom nyem siab npaum li cas.
Hos muaj dua tej txhia xav hais tias Vajtswv laj laj mloog lawv cov lus thov, nws thiaj tsis teb lawv. Ntsev Nim (Jenny) hais tias: “Kuv saib kuv tus kheej tsis tsim nuj tus dabtsi. Thaud, kuv yog ib tug ntxhais tsis tsim txiaj ces Vajtswv yeej yuav tsis tig ntsej los mloog kuv li.”
Puas yog nej twb xav raws nkaus li cov hais no thiab? Yog nej xav no, phau Vajlugkub muaj ntau yam yuav qhia rau nej.a Phau ntawv no yuav piav txog:
Vajtswv puas mloog peb tej lus thov?
Vim li cas Vajtswv ho tsis teb txhua txojkev thov?
Nej yuav thov li cas Vajtswv thiaj hnov?
Kev thov pab nej lub neej li cas?
a Nej puas paub tias phau Vajlugkub ntu qub, muaj tshaj li 150 zaj lus thov? Txuas ntxiv ntawd, tseem sau tseg Yexus Khetos tej lus thov thiab.