LUB NEEJ KHIXATIA
Koom Tes Tshaj Tawm Rau Tej Koog Uas Muaj Ntau Haiv Neeg
Thaum tibneeg hnov txoj xov zoo txog lub Nceeg Vaj ua lawv yam lus, yeej raug lawv siab dua. Hnub Pheethekhoxate xyoo 33, Yehauvas thiaj ua kom cov Yudai uas nyob lwm lub tebchaws tuaj mloog txoj xov zoo ua lawv yam lus, txawm lawv paub lus Henplais lossis lus Kili lawm. (Ttx. 2:5, 8) Niaj hnub nimno, cov koom txoos uas hais lwm yam lus kuj tshaj tawm rau tej koog uas twb muaj lwm lub koom txoos tshaj lawm thiab. Yog li ntawd, cov koom txoos no yuav sib koom tes li cas thiaj tsis muaj ob peb pab mus qhia tib lub tsev, ua rau tus tswv tsev meem txom?
Sablaj Ua Ke (P.L. 15:22): Cov kwvtij uas saib xyuas kev qhia Vajlugkub yuav tau sablaj ua ke seb yuav mus tshaj tawm txoj xov zoo li cas. Tej zaum cov koom txoos uas hais lwm yam lus tsis xav kom peb mus rau tej tsev uas hais lawv yam lus vim lawv koog tsawg zog lawm. Tiamsis yog tias tej koom txoos ntawd koog dav heev, tej zaum lawv xav kom peb pab qhia rau lawv paub thaum muaj ib tug nyiam. (od-E 93 ¶37) Lossis tej zaum lawv xav kom peb lub koom txoos pab nrhiav cov neeg uas hais lawv yam lus thiab muab chaw nyob rau lawv. (km 7/12 5, lub ntsiab me) Nco ntsoov tias tej zaum txhua tus hauv lub tsev ntawd tsis hais ib yam lus. Thaum mus tshaj tawm los yuav tsum coj raws li tej kevcai uas tau rhawv los tiv thaiv lwm tus lub npe thiab qhov chaw nyob.
Sib Koom Tes (Efx. 4:16): Coj raws li tej uas tus saib xyuas kev qhia Vajlugkub tau hais. Puas yog koj tabtom qhia Vajlugkub rau ib tug uas tsis tshua paub koj lub koom txoos yam lus? Tej zaum nws yuav loj hlob ntawm sab kev ntseeg dua yog tias nws kawm Vajlugkub nrog ib tug hauv lub koom txoos lossis pawg uas hais nws yam lus.
Npaj Ua Ntej (P.L. 15:28; 16:1): Yog koj ntsib ib tug uas hais lwm yam lus, siv lub sijhawm ntawd los qhia txoj xov zoo rau nws. Xav seb hauv koj koog koj yuav ntsib haiv neeg twg ces theej tawm phau Vajlugkub thiab cov yeeb yaj kiab rau hauv koj lub twj ntawm tes ua yam lus ntawd. Koj kuj theej tawm lub twj JW Language es xyaum ob peb lo lus nrog lawv tham thiab.