Xyaum Cov Uas Cev Vajtswv Lus Tus Qauv—Hanpaku
1. (1) Hanpaku nug Yehauvas li cas? (2) Peb yuav xyaum Hanpaku li cas?
1 Muaj ib zaug Hanpaku nug Yehauvas tias: “Ua cas koj yuav cia kuv pom tej uas ua tsis ncaj thiab ntsia ntsoov tej kev ceeblaj?” (Hnpk. 1:3; 2Tmt. 3:1, 13) Lub qab ntuj no tsuas phem zuj zus lawm xwb, tej zaum yuav muaj tej lub caij uas peb yuav xav li Hanpaku thiab. Tiamsis txawm Hanpaku pom tej kev phem muaj nyob puag ncig nws los, nws yeej tsis cia tej ntawd txo tau nws txojkev ntseeg lossis ua rau nws qaug zog cev Vajtswv lus. Yog peb ua tib zoo kawm thiab xav txog Hanpaku tus qauv, yuav pab tau peb txojkev ntseeg kom peb thiaj thev taus mus txog Yehauvas hnub txiav txim.—2Pt. 3:7.
2. Kev ntseeg yuav pab peb coj lub neej zoo li cas?
2 Muaj Kev Ntseeg: Hanpaku tsis cia tej kev phem uas nyob puag ncig nws ua rau nws ntxhov siab. Nws nrhiav kev los txhawb nws txojkev sib raug zoo nrog Yehauvas thiab kub siab ua Yehauvas tes haujlwm. (Hnpk. 2:1) Yehauvas txhawb Hanpaku tias Nws tej lus yeej yuav muaj tiav raws sijhawm, thiab “tus uas ncaj ncees yuav muaj txojsia nyob vim nws ntseeg Vajtswv.” (Hnpk. 2:2-4) Niaj hnub no, peb yuav tsum paub tseeb tias hnub kawg yeej yuav los xwb xwb li, tsis yog pheej txhawj tas zog tias hnub kawg yuav los thaum twg xwb. Kev ntseeg yuav pab kom peb ceev faj zov tos thiab yuav pab kom peb muab Vajtswv tes haujlwm tso ua ntej hauv peb lub neej.—Hnpl. 10:38, 39.
3. Vim li cas peb yuav tsum xyiv fab rau Yehauvas?
3 Xyiv Fab Rau Yehauvas: Thaum Kau hauv Makau sawv tawm tsam Yehauvas cov tibneeg, peb txojkev ntseeg yuav raug sim. (Exkh. 38:2, 10-12) Peb yuav raug sim li cas? Yuav muaj kev kub ntxhov, thiab tej zaum yuav tsis muaj txaus noj txaus haus thiab yuav poob vaj poob tsev. Thaum ntawd, tibneeg yuav nyob txom nyem ntsuav. Thaum muaj li no, peb yuav coj li cas? Peb yuav tsum xyiv fab rau Yehauvas ib yam li Hanpaku. Hanpaku paub zoo tias kev txom nyem yuav los raug nws, txawm li ntawd los, nws yeej xyiv fab ua Yehauvas tes haujlwm. (Hnpk. 3:16-19) Yog peb coj li Hanpaku, peb yuav thev dhau tej kev sim siab uas yuav los tom ntej no.—Nhm. 8:10; Hnpl. 12:2.
4. Peb muaj kev xyiv fab li cas tamsim no thiab rau yav tom hauv ntej?
4 Niaj hnub no Yehauvas qhia peb txog ntau yam xwv peb thiaj paub ua neej. Tom qab Yehauvas cawm peb dim nws hnub txiav txim, nws yuav hajyam qhia kom peb paub coj lub neej raws li nws siab nyiam. (Hnpk. 2:14) Cov uas Yehauvas tsa ciaj sawv rov los, los kuj yuav kawm ntau yam txog nws thiab. Yog li ntawd, cia peb nrhiav kev tamsim no los tshaj tawm txog Yehauvas thiab nws tej haujlwm zoo!—Nt.Nk. 34:1; 71:17.