Yehauvas Pom Kuv Zoo Li Cas Xwb?
1. Phau Vajlugkub zoo li daim iav li cas?
1 Ib hnub koj saib iav pes tsawg zaus? Ib hnub peb yeej saib ntau zaus seb puas muaj tej yam tsis zoo uas yuav tau kho. Phau Vajlugkub los kuj zoo li daim iav thiab. Yog peb nyeem phau Vajlugkub, peb yuav pom tej nyob hauv peb lub siab uas peb yuav tau kho kom haum Yehauvas siab. (1Xmy. 16:7; Yknp. 1:22-24) Vajtswv Txojlus paub “tshuaj saib tej uas neeg xav thiab tej uas nyob hauv neeg lub siab.” (Hnpl. 4:12) Yog li ntawd, peb yuav tau nyeem phau Vajlugkub txhua hnub thiab ua tib zoo xav txog tej ntawd. Yog peb ua li ntawd, yuav pab tau peb hloov kom peb txawj mus qhia Vajlugkub.—Nt.Nk. 1:1-3.
2. Phau Vajlugkub pab tau peb li cas?
2 Muab Phau Vajlugkub Ua Daim Iav: Cov uas teev tiam Yehauvas txheej thaum ub pab tau peb pom tias Yehauvas nyiam tej yeeb yam twg. Piv txwv, Davi kub siab lug txhawb Vajtswv lub npe. (1Xmy. 17:45, 46) Yaxaya muaj siab tawv tshaj tawm rau cov tibneeg uas tawv ncauj heev. (Yxy. 6:8, 9) Vim Yexus hlub Yehauvas heev, nws thiaj xam pom tias Vajtswv tes haujlwm tsis yog ib lub nra hnyav, tiamsis yog ib tes uas ua laj siab thiab txaus siab heev. (Yh. 4:34) Cov Khixatia nyob thawj 100 xyoo tso siab plhuav rau Yehauvas, kub siab lug tshaj tawm, thiab rau siab ntso ua Vajtswv tes haujlwm tsis tseg. (Ttx. 5:41, 42; 2Khl. 4:1; 2Tmt. 4:17) Yog peb ua zoo xav txog cov qauv no, yuav pab tau peb txawj ua Vajtswv tes haujlwm ntxiv.
3. Vim li cas peb yuav tau kho peb tus kheej?
3 Hloov Tej Uas Tsis Zoo: Yog peb saib iav pom tej yam tsis zoo, tiamsis peb tsis kho ces tsis tsim nyog saib li. Peb yuav tau thov Yehauvas pab kom peb pom tej uas peb yuav tau kho thiab kuj thov kom Yehauvas pab peb kho tej ntawd. (Nt.Nk. 139:23, 24; Lk. 11:13) Vim lub sijhawm uas teem cia twb los ze zuj zus lawm thiab tseem tshuav coob leej uas tsis paub Yehauvas, peb yuav tau kho peb tus kheej xwv thiaj pab tau peb thiab cov peb qhia kom dim.—1Khl. 7:29; 1Tmt. 4:16.
4. Tus uas tshuaj saib Vajtswv Txojlus thiab xyaum raws li ntawd yog tus neeg zoo li cas?
4 Qhov uas tseem ceeb rau Yehauvas yog tus neeg sab hauv tsis yog tus neeg sab nraud. (1Pt. 3:3, 4) Tus uas tshuaj saib Vajtswv Txojlus thiab xyaum raws li ntawd yog tus neeg zoo li cas? Tus ntawd yog tus uas “nyob ruaj hauv txoj kevcai ntawd tsis yog mloog xwb es tsis nco qab lawm tiamsis yog tus uas xyaum raws nraim, tus ntawd yuav tau txojkev kaj siab lug hauv txhua yam uas nws ua.” (Yknp. 1:25) Tseeb tiag, peb yeej yuav kaj siab thiab txawj ua Vajtswv tes haujlwm heev yog “peb zoo li daim iav uas tsom tus Tswv lub hwjchim ci ntsa iab.”—2Khl. 3:18.