Npaj Kom Tuaj Raws Sijhawm
1. Yehauvas tso tau tus qauv twg rau peb xyaum?
1 Yehauvas ua txhua yam raws sijhawm. Nws pab nws cov tibneeg thaum lawv cheem tsum kev pab. (Hnpl. 4:16) Thiab nws kuj npaj zaub npaj “mov rau lawv noj raws sijhawm.” (Mth. 24:45) Yog li ntawd, peb tso siab tias hnub uas Yehauvas npau taws Yehauvas yeej “yuav tsis sej cia ntev,” tiamsis hnub ntawd yeej yuav los raws sijhawm. (Hnpk. 2:3) Peb yuav tau xyaum Yehauvas es ua txhua yam kom raws sijhawm. (Nt.Nk. 70:5) Tiamsis vim peb zoo tsis tiav, yuav tsis yoojyim rau peb ua txhua yam raws sijhawm. Yog li ntawd, peb yuav tau ua li cas es peb thiaj ua tau txhua yam raws sijhawm?
2. Vim li cas thaum peb tuaj raws sijhawm ho ua rau Yehauvas tau koob meej?
2 Niaj hnub no txawm tibneeg tuaj tsis raws sijhawm los lawv tsis quav ntsej, rau qhov lawv tsuas xam pom lawv tus kheej xwb thiab tsis paub tswj lub siab. (2Tmt. 3:1-3) Yog li ntawd, thaum peb mus ua haujlwm, mus tej kev sib txoos, lossis mus lwm qhov uas peb teem caij lawm, peb yuav tau mus kom raws sijhawm. Thaum lwm tus pom peb tuaj raws sijhawm, lawv yuav hais zoo txog peb ces yuav ua rau Yehauvas tau koob meej. (1Pt. 2:12) Puas yog peb txeev mus ua haujlwm raws sijhawm, tiamsis ho mus lig rau tej kev sib txoos? Yog peb tuaj txog tej kev sib txoos ua ntej hu nkauj thiab thov Vajtswv, ces yog peb xyaum peb Leej Txiv Yehauvas tus qauv.—1Khl. 14:33, 40.
3. Vim li cas qhov uas peb tuaj raws sijhawm ho qhia tias peb xav txog lwm tus?
3 Yog peb tuaj tej kev sib txoos raws sijhawm, qhia tau tias peb xav txog lwm tus. (Flp. 2:3, 4) Rau qhov yog peb tuaj lig, ces peb yuav ua rau lwm tus tsis tau zoo mloog. Thiab yog peb tuaj lig tas zog, lwm tus yuav xav tias peb tsuas xav txog peb tus kheej xwb. Yog li ntawd, zoo rau peb tuaj raws sijhawm, xwv lwm tus thiaj cia siab thiab tso siab rau peb. Yog peb ua tau li no, cov uas nrog peb yuav nco peb txiaj ntsig.
4. Yog peb tuaj lig tas zog, peb yuav tau ua li cas?
4 Yog koj tuaj lig tas zog, ua zoo xav seb yog vim li cas koj thiaj tuaj lig? Zoo rau koj ua ib daim kom tswj xwv thiaj pab koj ua tau txhua yam tiav raws caij raws nyoog. (L.Tsy. 3:1; Flp. 1:10) Koj kuj thov Yehauvas pab kom koj tuaj tau raws sijhawm. (1Yh. 5:14) Yog koj tuaj tau raws sijhawm, ces yuav qhia tias koj hlub Yehauvas thiab hlub kwvtij zej zog, uas yog 2 txoj kevcai uas tseem ceeb dua ntais.—Mth. 22:37-39.