Tej Lus Nug Uas Peb Muaj

◼ Thaum mus qhia Vajlugkub lossis mus tej kev sib txoos, puas zoo rau peb muab Yehauvas lub npe los hloov Yawmsaub thaum uas nyeem Vajlugkub?

Tsis muaj neeg paub tseeb tias Yawmsaub yog leejtwg tiag. Tej zaum Yawmsaub yog ib tug timtswv lossis ib tug saub uas Hmoob piav hauv tej dab neeg xwb. Raws li Hmoob paub, Yawmsaub tsis muaj tej cwj pwm uas zoo thooj li tus tseem Vajtswv Yehauvas. Yog li ntawd, Yawmsaub tsis yog Yehauvas.

Niaj hnub no thaum mus qhia Vajlugkub, txawm peb siv lub npe Yawmsaub los cov Hmoob yeej tsis xav li cas. Vim li no, thaum peb nyeem tej nqe Vajlugkub uas muaj lub npe Yawmsaub, yog peb tsis xav hloov los nyob ntawm peb. Tiamsis yog peb ho xav muab hloov rau lub npe Yehauvas lossis “tus Tswv” los nyob ntawm peb thiab tus uas nrog peb tham Vajlugkub ntawd xwb. (1Khl. 10:32, 33) Yog peb paub tias peb muab Yawmsaub nyeem ua Yehauvas es yuav ua rau tus tswv tsev npau taws lossis xav yuam kev, zoo rau peb cia li nyeem raws nraim li hauv phau Vajlugkub. Yog muaj sijhawm, peb kuj piav rau cov zoo li ntawd paub tias, lus Henplais Vajtswv lub npe yog hu ua Yehauvas, tsis yog hu ua Yawmsaub.—1Pt. 3:15, mus saib phau Vajlugkub Qhia sab 225.

Peb yog Yehauvas cov Timkhawv. Yog li ntawd, tseem ceeb heev rau peb hwm thiab siv Yehauvas lub npe. (Loos 10:13) Peb tsis siv lub npe Yawmsaub rau hauv peb tej ntaub ntawv, peb tsuas siv rau thaum peb piav tias Yawmsaub tsis yog Yehauvas xwb. Yog li ntawd, thaum peb nyeem phau Vajlugkub Hmoob tom tej kev sib txoos, yog peb xav muab Yehauvas los hloov Yawmsaub los yeej tau.

Peb siv tau zaj no ua lub hauv paus ntsiab lus rau thaum peb nyeem phau Vajlugkub Hmoob. Yog li ntawd, thaum peb nyeem txog tej lo lus uas zoo li “ntoo khaub lig”, “Vaj Ntsuj Plig”, “ntuj tawg”, thiab lwm lo lus uas tsis tseeb, peb xav muab hloov nyeem raws li qhov tseeb los kuj tau thiab.