Daim Ntawv Caw Tshwj Xeeb
1. Thaum twg peb mam li mus caw tibneeg tuaj koom cov rooj sib txoos rau xyoo 2014?
1 Yog koj yuav ua ib rooj mov loj rau koj cov phoojywg lossis cov txheeb ze tuaj noj uas yuav tau siv dag siv zog thiab nyiaj txiag ntau heev los npaj, koj yeej yuav kub siab heev mus caw lawv tuaj. Cov rooj sib txoos loj thiab cov rooj sib txoos rau ntau tebchaws rau xyoo 2014 los kuj zoo tib yam li ntawd thiab, rau qhov lub koom haum tau siv dag siv zog thiab nyiaj txiag ntau heev los npaj. Peb lub lim tiam ua ntej lub rooj sib txoos, peb yuav muaj txoj koob hmoov mus caw tibneeg tuaj koom nrog peb. Yog li ntawd, yuav ua li cas es peb thiaj kub siab lug mus caw tibneeg tuaj koom?
2. Peb yuav ua li cas es peb thiaj kub siab lug mus caw tibneeg tuaj koom?
2 Yog peb ua tib zoo xav txog tej uas peb yuav mus hnov tom cov rooj sib txoos uas Yehauvas tau npaj los pab peb, ces peb yuav kub siab lug mus caw tibneeg tuaj koom. (Yxy. 65:13, 14) Peb yuav tsum nco ntsoov tias txhua xyoo peb mus caw tibneeg kuj muaj cov uas tuaj koom peb thiab. Txawm tibneeg yuav tuaj thiab tsis tuaj los, nco ntsoov tias tes haujlwm uas peb mus caw tibneeg yuav qhuas tau Yehauvas thiab yuav pab tau lawv pom tias nws yog ib tug Vajtswv uas muaj lub siab dawb siab zoo.—Nt.Nk. 145:3, 7; QTsh. 22:17.
3. Peb yuav mus tseb daim ntawv caw li cas?
3 Cov txwj laus yuav tsum txiav txim seb lub koom txoos yuav tseb cov ntawv caw li cas thiaj tseb thoob txhua koog. Tsis tas li ntawd xwb, lawv yuav tsum txiav txim seb puas yuav muab cov ntawv caw tso rau cov uas tsis nyob tsev thiab seb puas yuav coj mus tseb rau thaum mus qhia Vajlugkub rau tom tej kev, tej kiab tej khw, thiab tej chaw uas muaj neeg dhau mus mus los los. Thaum mus caw tibneeg rau Hnub 6 thiab Hnub 7, yog zoo tso peb yuav tau tso phau The Watchtower thiab Awake! rau tus tswv tsev thiab. Yog thawj Hnub 6 poob rau lub caij peb mus tseb daim ntawv caw, peb yuav tsis mus pib kawm Vajlugkub nrog tibneeg, tiamsis peb yuav mus tseb daim ntawv caw rau lawv xwb. Tom qab 3 lub lim tiam uas peb mus caw tibneeg tas lawm, peb yuav zoo siab tias peb kub siab heev mus caw tibneeg coob li coob tau tuaj koom lub rooj sib txoos uas Yehauvas tau npaj tseg.