Tsis Txhob Ntaus Huab Ntaus Cua
1. Ib Khaulee 9:26 pab peb mus tshaj tawm txoj xov zoo li cas?
1 Tus tubtxib Povlauj sau tias: “Kuv tsis yog lam dhia tsis muaj hom phiaj, kuv tsis yog ntaus nrig yam li tus uas ntaus cua xwb.” (1Khl. 9:26) Nyob hauv nqe no, Povlauj sau txog qhov uas nws ntsia ntsoov nws lub hom phiaj ua Vajtswv tes haujlwm. Lub hauv paus ntsiab lus ntawm nqe no kuj pab tau peb rau lwm seem thiab, uas yog mus tshaj tawm txoj xov zoo. Peb yuav tsum siv peb lub dag lub zog kom muaj nuj nqes, peb thiaj tsis yog ntaus cua xwb. Peb yuav ua li cas, thiaj ua tau li no?
2. Thaum peb mus tshaj tawm txoj xov zoo, peb yuav xyaum Povlauj thiab cov Khixatia thaum ub li cas?
2 Mus Rau Tej Chaw Yuav Ntsib Tibneeg: Povlauj thiab cov Khixatia thaum ub mus tshaj tawm txoj xov zoo rau tej chaw uas yuav ntsib tibneeg. (Ttx. 5:42; 16:13; 17:17) Yog tias tibneeg kheev nyob tsev thaum yav tsaus ntuj, tej zaum zoo rau peb mus tshaj tawm rau lub caij ntawd thiaj ntsib lawv. Kuj zoo rau peb mus tshaj tawm tom tej chaw tos npav (bus) lossis chaw tos tsheb nqaj, vim muaj neeg mus mus los los, thaum lawv mus ua haujlwm thiab rov los tsev, puas yog? Tsis tas li ntawd xwb, tibneeg mus kav kiab kav khw rau lub caij twg? Yog tias peb mus qhia tom tej kev rau lub caij ntawd, yuav ntsib tibneeg dua.
3. Peb yuav qhia Vajlugkub li cas xwv thiaj tsis yog ntaus cua?
3 Ua Tib Zoo Npaj Thiaj Qhia Txhua: Peb yuav qhia Vajlugkub li cas xwv thiaj tsis yog ntaus cua? Yog tias peb coj ib pab neeg coob coob mus qhia rau ib koog twg, yuav tau siv sijhawm ntev los npaj, tej zaum kuj tsis txaus rau sawvdaws qhia thiab. Yog li ntawd, zoo rau peb muab faib ua tej pab tsawg zog, es mam li mus qhia. Thaum peb qhia rau tej koog uas nyob tom ntug zos, zoo rau peb coj tej pab tsawg tsawg mus. Ua li ntawd, thiaj qhia txhua koog ntawd, thiab kuj yuav txaus rau sawvdaws qhia. Tej zaum zoo rau koj thov kom cov kwvtij muab koog uas nyob ze koj lub tsev rau koj qhia, thiaj tsis tas yuav mus deb deb.
4. Thaum peb mus tshaj tawm, peb yuav xyaum cov neeg ntaus ntses li cas?
4 Yexus muab cov uas tshaj tawm txoj xov zoo piv rau cov neeg ntaus ntses. (Mk. 1:17) Tus neeg mus ntaus ntses tsis yog lam mus ua si xwb, tiamsis nws lub hom phiaj yog mus ntaus kom tau ntses. Yog li ntawd, cov neeg txawj ntaus ntses mus rau ntu dej uas muaj ntses laim. Thaum lawv pom tias muaj ntses, lawv yeej tsis lam laug caij. Lawv yeej paub siv lawv lub dag lub zog kom muaj nuj nqes. Thov kom peb sawvdaws kub siab lug tshaj tawm ib yam li ntawd.—Hnpl. 6:11.