Cia Li Hais Nej Tej Lus Kom . . . Qab Ntsev
1. Tej lus qab ntsev yog tej lus zoo li cas?
1 “Cia li hais nej tej lus muaj kev hlub thiab qab ntsev, xwv nej thiaj paub tias tsim nyog teb txhua tus li cas.” (Khx. 4:6) Thaum peb hais lus qab ntsev, yog thaum peb ua tib zoo xaiv tej lus peb hais kom tsis txhob siab lwm leej lwm tus. Yog li ntawd, tseem ceeb heev rau peb ua tib zoo hais lus thaum peb mus ua Yehauvas tes num.
2. Ua li cas Yexus ho pab tau ib tug pojniam Xamali los paub Yehauvas?
2 Yexus Tus Qauv: Thaum Yexus los so ntawm lub qhov dej, nws nrog ib tug pojniam Xamali uas tuaj nqa dej tham. Tus pojniam hais ob peb zaug rau Yexus txog qhov uas cov Yudai thiab cov Xamali sib ntxub. Tus pojniam kuj hais tias cov Xamali yog Yakhauj xeeb ntxwv, tiamsis cov Yudai ho hais tias lawv yog lwm haivneeg xeeb ntxwv. Txawm tus pojniam hais li ntawd los Yexus tsis xav phem dabtsi nws tsuas xav qhov zoo xwb. Thaum kawg, Yexus thiaj pab tau tus pojniam ntawd thiab cov neeg uas nyob hauv nws lub moos los paub Yehauvas.—Yh. 4:7-15, 39.
3. Thaum peb mus qhia Vajlugkub, peb yuav tau xyaum Yexus li cas?
3 Thaum peb mus qhia Vajlugkub, peb yuav tsum nco ntsoov tias peb lub hom phiaj yog mus “piav txoj xov zoo” xwb. (Loos 10:15) Peb yuav tsum siv tej nqe Vajlugkub uas raug tus tswv tsev siab thiaj yuav pab tau nws xav nrog peb tham, tsis txhob tham txog tej uas yuav ua rau nws xav tias peb mus tawm tsam nws txojkev ntseeg. Yog nws hais tau tej yam uas tsis muaj tseeb los, peb tsis txhob nrog nws sib cav. Tiamsis peb yuav tau xav seb nws cov lus puas muaj tej lo uas peb muab tig tau los qhia qhov tseeb rau nws. Tej zaum thaum peb nyeem ib nqes Vajlugkub twg, peb kuj hais tau li no: “Koj puas tau xav dua ib zaug tias yuav muaj tau li no?”
4. Yog tus tswv tsev cem peb, peb yuav tsum ua li cas?
4 Yog tus tswv tsev cem peb lossis xav nrog peb sib cav, peb yuav ua li cas? Peb yuav tsum ua siab ntev es hais tej lus zoo rau nws xwb. (2Tmt. 2:24, 25) Yog tus tswv tsev tsis nyiam txoj xov peb qhia txog lub Nceeg Vaj los, zoo rau peb cia li mus rau lwm qhov.—Mth. 7:6; 10:11-14.
5. Vim ib tug muam ua zoo teb thaum kawg zoo li cas?
5 Lo Lus Zoo Pab Tau Lwm Tus: Muaj ib tug muam tau mus qhia Vajlugkub rau ib tug pojniam uas nyob ze nws tsev. Tus pojniam npau taws heev thiab cem lus phem phem rau tus muam ntawd, tiamsis tus muam ua tib zoo hais rau nws tias: “Thov zam txim vim kuv tsis paub tias koj tsis nyiam. Kuv mus lawm. Nyob zoo koj os.” Ob lub lim tiam tom qab, tus pojniam thiaj tuaj ntawm tus muam tsev tuaj thov txim rau tej lus uas tus pojniam tau hais rau nws. Zaum no tus pojniam kuj xav paub seb ua ntej ntawd tus muam muaj lus dabtsi yuav hais rau nws. Qhov no qhia tias lo lus zoo yeej pab tau lwm tus tiag!—P.L. 15:1; 25:15.
6. Thaum mus tshaj tawm txoj xov zoo, vim li cas tseem ceeb rau peb hais tej lus qab ntsev?
6 Thaum mus tshaj tawm txoj xov zoo, cia li hais tej lus qab ntsev. Txawm tus tswv tsev tsis xav mloog peb los, tej zaum peb lo lus zoo yuav ua rau nws xav mloog lwm zaus Yehauvas cov Timkhawv mus txog ntawm nws tsev.