Qhia Koj Cov Menyuam Kom Paub Qhuas Yehauvas
1. Cov menyuam puas paub qhuas Yehauvas?
1 Ntawv Nkauj 148:12, 13 txhawb kom tej metub mentxhais “qhuas [Yehauvas] lub npe.” Phau Vajlugkub hais txog ntau tus menyuam uas tau qhuas Yehauvas. Xws li, Xamuyee yog ib tug metub uas tau ua haujlwm rau Yehauvas thaum nws tseem yau. (1Xmy. 2:18) Muaj “ib tug mentxhais” qhia rau Na-amas tus pojniam tias tus uas cev Yehauvas lus rau cov Yixayee yuav kho tau Na-amas tej mob lig mob ruas. (2Vntx. 5:1-3) Thaum Yexus mus rau hauv lub tuam tsev thiab ua tau ntau yam txuj ci, kuj muaj “cov menyuam yaus” qhuas tias “Hauxana rau Davi tus tub.” (Mth. 21:15) Yog li, cov niam txiv yuav qhia lawv tej menyuam li cas kom paub qhuas Yehauvas?
2. Vim li cas ho tseem ceeb rau cov niam txiv tso qauv zoo rau lawv tej menyuam xyaum?
2 Ua Qauv Qhia: Yehauvas tau sam hwm rau cov txiv tsev Yixayee tias ua ntej lawv yuav cog tau qhov tseeb rau hauv lawv cov menyuam nruab siab, lawv yuav tsum hlub thiab khaws Yehauvas tej lus rau hauv lawv nruab siab tso. (Kc. 6:5-9) Yog koj pheej piav txog Vajtswv tes haujlwm rau koj cov menyuam mloog thiab coj lawv nrog koj mus qhia Vajlugkub txhua lub lim tiam, ces lawv yuav saib Vajtswv txoj haujlwm tseem ceeb thiab yuav zoo siab xyiv fab ua Vajtswv tes num.
3. Ib tug muam xyaum tau nws niam nws txiv tus qauv li cas?
3 Muaj ib tug muam hais zoo siab hlo tias: “Thaum kuv tseem yau, peb tsev neeg mus qhia Vajlugkub txhua lub lim tiam. Kuv pom kuv niam kuv txiv nkawd xyiv fab kawg thaum peb mus qhia Vajlugkub. Yog li ntawd, peb cov menyuam thiaj li nyiam mus qhia Vajlugkub heev.” Tus muam no tau ua ib tug tshaj tawm uas tsis tau raus dej thaum nws muaj 7 xyoo thiab nws twb ua ib tug tho kev tau 33 xyoos lawm.
4. Koj yuav qhia li cas koj cov menyuam txojkev ntseeg thiaj yuav loj hlob?
4 Qhia Menyuam Lawv Thiaj Loj Hlob: Coj koj cov menyuam nrog koj mus qhia Vajlugkub. Cia lawv khob qhov rooj, muab ib daim ntawv tseb cev rau tus tswv tsev, lossis cia lawv nyeem ib nqes Vajlugkub rau tus tswv tsev mloog. Yog koj ua li no, yuav pab tau koj cov menyuam nyiam mus qhia Vajlugkub thiab lawv yuav tsis ntshai mus tshaj tawm txog lub Nceeg Vaj. Thaum lawv loj hlob tuaj, lawv yuav hajyam xav mus ua Vajtswv tes num. Yog li ntawd, pab koj cov menyuam kom loj hlob thiab muaj hom phiaj ntawm sab kev ntseeg.
5. Ib tug menyuam yuav tsum paub npaum li cas mam ua tau ib tug tshaj tawm uas tsis tau raus dej?
5 Thaum twg koj cov menyuam xav ua ib tug tshaj tawm uas tsis tau raus dej lossis koj pom tias tsim nyog ua tau lawm, mus nrog cov txwj laus tham tamsid. Thaum lawv ua ib tug tshaj tawm, lawv thiaj yuav pom tias lawv kuj muaj feem ua tes haujlwm qhuas Yehauvas thiab. Nco ntsoov tias cov menyuam tsis tas yuav paub Vajlugkub npaum li cov laus uas twb ua kevcai raus dej lawm mam ua tau ib tug tshaj tawm. Yog li ntawd, koj tus menyuam puas tau paub txog tej yam uas tseem ceeb hauv phau Vajlugkub? Nws puas yoog tau tej kevcai hauv phau Vajlugkub? Nws puas xav ua Yehauvas ib tug timkhawv mus qhia Vajlugkub tiag? Yog nws xav, cia cov txwj laus mam ua cov txiav txim seb koj tus menyuam puas tsim nyog ua tau ib tug tshaj tawm uas tsis tau raus dej.—Mus nyeem phau Organized to Do Jehovah’s Will, sab 79-82.
6. Vim li cas tsim nyog rau ob niam txiv cob nkawd cov menyuam?
6 Yuav tau siv tswvyim thiaj qhia tau ib tug menyuam los qhuas Yehauvas. Thaum cov niam txiv cob tau lawv cov menyuam loj hlob los teev tiam Yehauvas, yuav ua rau lawv zoo siab tshaj plaws li. Thiab Yehauvas yuav zoo siab heev thaum cov menyuam qhuas txog nws tes haujlwm zoo kawg nkaus.