Zaj 9—Xyaum Qhia Kom Tus Kawm Vajlugkub Loj Hlob
Pab Cov Uas Kawm Vajlugkub Kom Txawj Qhia Txhua Lub Caij
1 Thaum Anru thiab Fili nkawd paub tias Yexus yog tus Mexiyas, nkawd txawm pib qhia rau lwm tus. (Yh. 1:40-45) Niaj hnub no los kuj tib yam li ntawd thiab, thaum cov uas kawm Vajlugkub pib muaj kev ntseeg rau tej uas peb qhia lawv, lawv kuj xav qhia rau lwm tus thiab. (2Khl. 4:13) Yog li, peb yuav pab lawv li cas lawv thiaj txawj qhia Vajlugkub txhua lub caij?
2 Koj cia li nug tus uas kawm Vajlugkub seb nws puas tau muab tej uas nws kawm qhia rau lwm tus. Kom nws nug nws cov phoojywg thiab cov txheeb ze seb puas muaj tej tug uas xav nrog neb kawm Vajlugkub. Nug seb cov neeg nws nrog ua haujlwm ua ke, nrog kawm ntawv ua ke, los yog cov tibneeg uas nws paub puas muaj tej tug uas kuj xav kawm Vajlugkub thiab. Yog muaj cov uas xav kawm, txhawb kom nws pib qhia Vajlugkub rau lawv. Zoo rau koj qhia nws seb thaum twg thiaj tsim nyog rau nws qhia Vajlugkub thiab pab kom nws saib taus lwm tus thaum nws qhia Vajtswv Yehauvas thiab Yehauvas lub ntsiab rau lawv.—Khx. 4:6; 2Tmt. 2:24, 25.
3 Muab Tej Lawv Ntseeg Qhia Rau Lwm Tus: Tseem ceeb heev rau koj pab kom cov uas kawm Vajlugkub siv phau Vajlugkub thaum lawv qhia tej uas lawv ntseeg rau lwm tus. Ib qho uas yuav pab tau tus uas kawm paub siv phau Vajlugkub mas yog thaum neb kawm txog tej lub ntsiab, koj yuav tau nug nws li no: “Koj yuav siv phau Vajlugkub los piav qhov no li cas es koj tsev neeg thiaj paub tias yog qhov tseeb?” los yog “Koj yuav siv nqe Vajlugkub twg los pab koj tus phoojywg pom tias qhov no yog qhov tseeb?” Mloog seb nws teb li cas xwv koj thiaj pab tau nws txawj siv phau Vajlugkub. (2Tmt. 2:15) Yog koj ua li no, koj yuav pab tau tus uas kawm paub qhia Vajlugkub txhua lub caij thiab thaum uas nws ua tau ib tug tshaj tawm, nws thiaj paub mus qhia Vajlugkub nrog lub koom txoos.
4 Zoo rau peb pab cov uas kawm Vajlugkub npaj rau thaum uas lawv raug kev tawm tsam. (Mth. 10:36; Lk. 8:13; 2Tmt. 3:12) Thiab thaum lwm tus nug txog los yog tham txog Yehauvas cov Timkhawv, lawv thiaj paub teb. Yog li ntawd, phau ntawv Leejtwg Thiaj Ua Li Yehauvas Siab Nyiam? yuav pab kom cov uas kawm Vajlugkub “npaj txhij txhua lub sijhawm” uas yuav tau piav rau txhua tus. (1Pt. 3:15) Thiab phau ntawv no muaj tej ntsiab lus uas pab tau cov los ntseeg tshiab teb tau tej lus uas lawv cov phoojywg thiab lawv tsev neeg yuav nug txog lawv txoj kev ntseeg thiab tej uas lawv ua.