Tshaj Tawm Qhov Tseeb Txog Yexus
1 Muaj cov Khixatia uas yog lwm pab yaj los pab cov xaiv tseg ua timkhawv txog Yexus. (QTsh. 12:17) Txoj haujlwm ua timkhawv no yog ib txog tseem ceeb heev, vim txojkev cawm dim tsuas yog los ntawm Yexus los xwb.—Yh. 17:3; Ttx. 4:12.
2 ‘Yog Txojkev, Qhov Tseeb, Thiab Txojsia’: Yexus tau hais tias, “Kuv yog txojkev ntawd, yog qhov tseeb thiab yog txojsia. Tsis muaj leejtwg mus cuag tau leej Txiv tsuas yog mus ntawm kuv mus xwb.” (Yh. 14:6) Raws li Yexus cov lus no, nws tib leeg xwb thiaj yog “txojkev” uas peb mus cuag tau Vajtswv thiab nrog tau Vajtswv sib raug zoo. (Yh. 15:16) Yexus yog “qhov tseeb” vim txhua lo lus faj lem thiab txhua yam uas ua duab txog Yexus hauv cov nqe lus Henplais, puavleej muaj tiav rau nws huvsi. (Yh. 1:17; Khx. 2:16, 17) Cov lus faj lem no qhia kom sawvdaws paub zoo txog tes haujlwm Yexus tau ua kom Vajtswv lub ntsiab muaj tiav. (QTsh. 19:10) Tsis tas li ntawd xwb, Yexus kuj yog “txojsia” thiab. Yuav kom tau txais txoj koob hmoov uas yog txojsia ib txhis tsis kawg no, txhua tus yuav tsum muaj kev ntseeg rau tus nqe txhiv.—Yh. 3:16, 36; Hnpl. 2:9.
3 Ua Vajntxwv Kav Thiab Ua Lub Taubhau: Tibneeg yuav tsum paub tias Yehauvas twb muab lub hwjchim kav cob rau nws tus Tub lawm. Vajtswv twb tsa Yexus ua Vajntxwv kav Vajtswv lub Nceeg Vaj lawm. Yog li ntawd, tsim nyog ‘ib tsoom neeg mloog nws hais.’ (Ch.K. 49:10) Tsis tas li ntawd xwb, Yehauvas twb tsa Yexus ua lub taubhau kav lub koom txoos Khixatia lawm. (Efx. 1:22, 23) Peb yuav tsum qhia kom tibneeg nkag siab tias Yexus yog tus coj lub koom txoos thiab nws tau tsa “tus qhev ncaj thiab ntse” los faib zaub mov rau sawvdaws noj “raws sijhawm.”—Mth. 24:45-47.
4 Tus Pov Thawj Hlob Uas Muaj Lub Siab Khuvleej: Thaum Yexus los ua neeg nyob hauv ntiajteb no, nws pom tias tibneeg txom nyem siab npaum li cas. Twb yog vim li ntawd, “nws thiaj pab tau cov uas raug kev sim siab thiab.” (Hnpl. 2:17, 18) Peb yog tibneeg txhaum xwb, tiamsis phau Vajlugkub qhia tias Yexus hlub tshua thiab khuvleej peb tibneeg. Nws paub tej uas peb tu ncua thiab thov kom Vajtswv pab peb! Tej no yeej ua rau peb zoo siab kawg nkaus li. (Loos 8:34) Twb yog muaj Yexus tuag txhiv peb sawvdaws, thiab muaj nws sawv ua Pov Thawj Hlob, peb thiaj ua tau “siab tuab” tsis ntshai mus cuag Yehauvas. Peb paub tias nws yeej yuav pab peb raws li tej uas “peb cheem tsum.”—Hnpl. 4:15, 16.
5 Peb vam thiab cia siab tias peb tes haujlwm yuav txhawb tau tibneeg los paub qhov tseeb txog Yexus, thiab kom lawv muaj lub siab mloog Yexus lus, los nrog peb koom ua tes haujlwm uas nws tau pub rau peb.—Yh. 14:15, 21.