Muab Lub Nceeg Vaj Tso Ua Ntej
1. Vim li cas ho nyuaj rau peb muab lub Nceeg Vaj tso ua ntej?
1 Peb yuav tau muab lub Nceeg Vaj tso ua ntej hauv peb lub neej. Tiamsis lub sijhawm poob haujlwm lossis muaj lwm yam teeb meem los raug peb, yeej tsis yoojyim rau peb ua li ntawd. Yog li, thaum muaj kev nyuaj siab, peb yuav ua li cas thiaj muab tau lub Nceeg Vaj tso ua ntej hauv peb lub neej? Yog peb nrhiav tau ib txoj haujlwm uas yuav ua rau peb mus koom tsis tau tej kev sib txoos lossis mus qhia tsis tau Vajlugkub, peb yuav ua li cas? Lub sijhawm zoo li ntawd, peb puas yuav muab lub Nceeg Vaj tso tuaj tom qab?
2. Tej yam twg yuav sim peb txojkev ntseeg?
2 Yuav Tsum Muaj Kev Ntseeg Ruaj Khov: Thaum muaj tej yam zoo li ntawd los sim peb txojkev ntseeg, peb yuav tsum nco ntsoov Yehauvas tej lus cog tseg thiab ruaj siab rau Yexus cov lus tias Vajtswv yuav pab peb yog peb nrhiav nws lub Nceeg Vaj ua ntej. (Nt.Nk. 37:25; Mth. 6:31-34) Yog peb tsis ceev faj, lub ntiajteb yuav rub tau peb lub siab, ces lub Nceeg Vaj yuav tsis yog yam uas tseem ceeb tshaj rau peb lub neej. Vim ib txhia xav muaj koob nto npe rau lawv txoj haujlwm lossis xav tuav txoj haujlwm uas them nyiaj zoo, lawv thiaj muab tej ntawd saib ua yam tseem ceeb tshaj rau lawv lub neej. Tiamsis, peb yuav tau xyaum Povlauj tus qauv es saib seb yam twg yog yam uas muaj nqes tshaj rau peb lub neej.—Flp. 3:7, 8.
3. Muaj ib tug tshaj tawm tau txiav txim siab ua dabtsi?
3 Yuav Tsum Tau Hloov: Muaj ib tug tshaj tawm tau hais tias: “Kuv kub siab ua luam heev, rau qhov lag luam yog yam uas kuv nyiam tshaj plaws li. Kuv xav tias txawm kuv siv sijhawm ntau heev rau kuv qhov lag luam los, kuv tseem teev tiam tau Yehauvas thiab.” Tiamsis nws mam tig los pom tias yog nws siv zog tiag, nws yuav hajyam ua tau ntau yam rau Yehauvas. Tsis ntev tom qab ntawd, nws thiaj muab nws qhov lag luam tso tseg. Thaum nws muab nws lub sijhawm tag nrho mus ua Yehauvas tes num, nws thiaj hais tias: “Kuv xav zaum no Yehauvas pom tias kuv muab kuv lub neej los ua yam uas tsim nyog ua uas haum nws siab lawm.”
4. Povlauj tus qauv pab tau coob leej li cas?
4 Coob leej ntau tus tau muab tej haujlwm uas them nyiaj zoo tso tseg, thiab hloov lawv lub neej kom yoojyim, xwv lawv thiaj ua tau haujlwm puv ntoob rau Yehauvas. Cov tub hluas uas yog txwj laus thiab tub leg num uas tau mus txoj Kev Kawm Vajlugkub Rau Cov Kwvtij tau hloov lawv lub neej li ntawd. Vim lawv tau hloov li no, lawv thiaj tau tuav tej haujlwm uas zoo heev. Lawv xyaum raws li Povlauj tus qauv, lawv thiaj txaus siab hlo rau tej uas lawv muaj.—1Khl. 11:1; 1Tmt. 6:6-8; Hnpl. 13:5.
5. Peb tso siab tau rau Yehauvas li cas, thiab vim li cas qhov no ho tseem ceeb?
5 Vim peb ua lub neej yoojyim li Yehauvas tau hais, ntiajteb neeg thiaj thuam peb. Tiamsis qhov tseem ceeb, tsuav peb tau Yehauvas tej koob hmoov xwb. (1Khl. 1:26-31) Peb zoo siab heev uas Yehauvas pom zoo peb ua nws tes haujlwm, thiab Yehauvas tseem yuav pab peb ua tes haujlwm ntawd kom tiav. Tes haujlwm tshaj tawm txog lub Nceeg Vaj uas peb ua tamsim no, tsuas yog ib vuag xwb, yuav tsis muaj dua ib zaug ntxiv lawm. Yog li ntawd, tamsim no yog lub caij zoo rau peb muab lub Nceeg Vaj tso ua ntej hauv peb lub neej.