Tej Haujlwm Nej Ua Yeej Tsis Tag Dawb Tag Do
1 Cov lus no txhawb zog kawg li! Tej haujlwm uas nej ua rau Yehauvas yeej tsis tag dawb tag do. (1Khl. 15:58) Tiamsis tibneeg tej haujlwm tsis zoo li ntawd. Lawv siv zog khwv tas hnub tas hmo kom lawv ua lub neej xws luag lossis muaj txiag nplua nuj. Lawv rau siab ntso kawm ntaub kawm ntawv siab kom lub neej zoo tshaj luag. Tiamsis vim neeg “tsis paub yuav muaj xwm dabtsi rau tagkis,” thaum kawg ib txhia nrhiav tsis tau lub neej uas lawv ntshaw. Vim li ntawd, tej haujlwm uas lawv siv zog khwv tsuas tag dawb tag do, “zoo ib yam li caum cua xwb.” (L.Tsy. 1:14, TMZ; Yknp. 4:14, 15) Yog li ntawd, tseem ceeb heev rau peb kub siab ua txoj haujlwm uas yuav tsis tag dawb tag do rau qhov txoj haujlwm ntawd muaj nqes tamsim no thiab mus ib txhis.
2 Txoj Haujlwm Uas Muaj Nqes Dua: Txoj haujlwm tshaj tawm txoj xov zoo txog Vajtswv lub Nceeg Vaj yog txoj uas tseem ceeb tshaj plaws hauv ntiajteb no. Txoj haujlwm no yog txoj uas yuav tsum tau tshaj txawm tibneeg yuav mloog thiab tsis mloog los xij. Peb xav kom peb hais tau li Povlauj hais: “kuv yuav tsis ris nej sawvdaws tej ntshav lawm, rau qhov kuv tsis tseg qhov uas hais txhua yam uas Vajtswv xav tseg lawd rau nej mloog.”—Ttx. 20:26, 27.
3 Thaum tibneeg cuab pob ntseg mloog thiab ua raws li txoj xov uas peb qhia txog lub Nceeg Vaj, peb yeej zoo siab kawg li! Muaj ib tug ntxhais hluas uas nws tus phauj tau tuag lawm. Nws xav paub seb nws tus phauj mus dua twg lawm, puas yog mus saum ntuj lossis mus hauv ntuj tawg lawd? Yog li ntawd, nws thiaj li thov Vajtswv pab. Nws thiaj siv Yehauvas lub npe thov li nws tus niam laus tau qhia rau nws lawd. Tsis ntev xwb nws txawm pib kawm Vajlugkub thiab mus koom cov kev sib txoos. Nws tau hloov nws lub neej thiab txiav kev phoojywg nrog cov neeg loj leeb. Nws thum luam yeeb, thum tshuaj, thiab tseg tsis ua tub sab lawm. Nws tau lees tias: “Vim kuv hlub Yehauvas kuv thiaj tso tau lub neej phem no tseg. Vim Yehauvas txojkev khuvleej uas loj kawg kuv thiaj muaj kev cia siab tias yuav tau txojsia ib txhis.” Tus ntxhais hluas no tseg tsis ua lub neej mus caum tej uas tag dawb tag do ntxiv lawm.
4 Thaum koj mus qhia txoj xov zoo, txawm tibneeg tsis mloog los koj yeej ua tau ib yam zoo heev. Tibneeg yeej paub tias Yehauvas cov Timkawv twb mus xyuas lawv lawm. Thiab kuj qhia tau tias koj npuab siab, koj ntseeg, thiab koj hlub Yehauvas. Yog li ntawd, tej haujlwm uas koj ua rau tus Tswv yeej tsis tag dawb tag do ib zaug li!