Koj Puas Paub?
Tsev Sablaj Nyob Thawj 100 Xyoo: Daim duab no ua piv txwv txog cov tsev sablaj txheej thaud. Daim duab no muab kos muaj ntsis zoo li lub tsev sablaj txheej thaud uas cov neeg tshawb fawb nrhiav tau hauv lub nroog Kalas (Gamla), lub tsev no nyob li 6 mais kev (10 kilumev) ntawm Hiavtxwv Kalilais
Vim li cas cov Yudai thiaj ua tej tsev sablaj?
LUB “tsev sablaj” yog qhov chaw tuaj sib txoos los yog tuaj koom ua ke. Yeej phim muab hu ua “tsev sablaj” vim cov Yudai sib txoos thiab pe hawm Vajtswv hauv tej tsev ntawd ib tiam dhau ib tiam tau ntau pua xyoo. Cov Nqe Lus Henplais hais tsis txog tej “tsev sablaj” no, tiamsis raws li Khixatia Cov Nqe Lus Kili, nyob rau thawj 100 xyoo twb muaj tej “tsev sablaj” no ntau lub lawm.
Cov neeg tshawb fawb feem coob ntseeg tias pib muaj cov tsev sablaj no rau thaum cov Yudai raug kuav mus ua cev qhev tim Npanpiloo. Ib phau ntawv tshawb fawb (Encyclopaedia Judaica) hais tias: “Cov uas poob cev qhev tsis muaj Tuam Tsev pe hawm Vajtswv, lawv nyob txawv tebchaws, thiab muaj kev nyuaj siab ntau yam. Yog li ntawd lawv thiaj sib txoos ua ke, tej zaum yog hnub Xanpatau los nyeem Vajtswv Txojlus.” Thaum cov Yudai dim cev qhev lawv thiaj ua tej tsev sablaj los sib txoos, thov Vajtswv ua ke thiab nyeem nws Txojlus.
Nyob rau thawj 100 xyoo tej tsev sablaj ntawd tseem ceeb heev rau cov Yudai nyob koog Meditelene, sab Midaus Ij (Middle East), thiab hauv tebchaws Yixayee. Ib tug yawg tshawb fawb (Lee Levine, The Hebrew University of Jerusalem) thiaj hais tias: “Hauv tej tsev sablaj no, lawv tuaj kawm ntawv, tuaj ua noj, tuaj tu plaub ntug, tuaj tso nyiaj, thiab tuaj sablaj txog kev nom kev tswv lossis kev coj noj coj ua.” Nws hais ntxiv tias: “Qhov tseem ceeb tshaj, lawv tuaj pe hawm Vajtswv.” Twb yog vim li ntawd Yexus thiaj kheev mus rau hauv tej tsev sablaj. (Malakau 1:21; 6:2; Luka 4:16) Thaum Yexus mus, nws qhuab ntuas, cob qhia, thiab txhawb cov uas tuaj sib txoos rau hauv. Tom qab tsim tsa lub koom txoos Khixatia, Povlauj kuj tau mus rau tej tsev sablaj ntawd mus tshaj tawm rau cov uas tuaj sib txoos hauv. Vim cov uas nyiam Vajtswv kheev tuaj rau hauv tej tsev sablaj ntawd, thaum Povlauj mus txog ib lub nroog twg nws thiaj xub mus rau hauv tej tsev sablaj ntawd.—Tubtxib Tes Haujlwm 17:1, 2; 18:4.