LO LUS NUG 7
Yog Luag Yaum Kom Ua Nkauj Ua Nraug Ne?
KOJ YUAV UA LI CAS XWB?
Xav txog qhov no: Koob thiab Huab sib paub tau 2 lub hlis xwb tiamsis nkawd hais lus sib haum npaum li ib txwm sib paub. Nkawd ntaus thiab tham xov tooj tsis paub dhuav li. Ib tug hais tsis tau xaus, tus tod twb txais nkaus lawm, cuag li nkawd thooj siab koom ntsws. Tiamsis nimno tsis yog Koob xav tham pem lawm xwb.
Tau 2 lub hlis no, nkawd tsuas tuav tes thiab sib hnia qho zaus xwb. Huab tsis tau xav tias yuav nrog Koob pw ua ke. Tiamsis tsis muaj leejtwg hais lus zoo npaum li Koob, nkawd yeej sib hlub tiag tiag li. Nws tsis xav kom Koob tso nws tseg.
Koj puas tau muaj hnub nyoog li Huab? Yog koj ne, koj yuav ua li cas xwb?
TOS IB PLIAG! UA ZOO XAV TSO!
Vajtswv tsuas cia cov txij nkawm pw ua niam txiv xwb. Yog yus tsis ua raws li txoj kevcai no ces zoo ib yam li yus muab lub tsho zoo zoo nkauj uas luag pub rau yus so pluas plav
Yog ib tug dhia saum ntoo es sim ya li tej noog, nws yeej yuav raug mob lossis txo tau nws txojsia. Yog leejtwg hla Vajtswv tej kevcai rau noob neej los zoo ib yam li ntawd thiab. Muaj ib nqes hais tias: “Tseg tsis txhob ua nkauj nraug.”—1 Thexalaunika 4:3.
Yog tsis coj raws li txoj kevcai no ne? Phau Vajlugkub hais tias: “Tus uas ua nkauj nraug kuj ua txhaum rau nws lub cev ntag.” (1 Khaulee 6:18) Vim li cas thiaj hais li no?
Tej neeg tshawb fawb pom tias cov hluas uas tau ua nkauj ua nraug, coob tus ntsib tej yam no:
KEV NYUAJ SIAB. Feem coob cov hluas uas tsis tau sib yuav tiamsis twb pw ua ke lawd, hais tias lawv xav txog lig kawg.
TSIS MUAJ KEV NTSEEG SIAB. Tom qab nkawd pw ua ke tas, nkawd mam xav txog tias: ‘Nws twb nrog pes tsawg leej pw ua ke lawm?’
PUAS SIAB PUAS NTSWS. Tej ntxhais hluas tsis xav nrog ib tug uas xav tau lawv lub cev xwb, lawv xav nrog ib tug uas yuav tiv thaiv lawv. Coob tus tub hluas pom tias tom qab nws nrog ib tug ntxhais pw ua ke tas, nws cia li tsis nyiam tus ntxhais ntawd lawm.
Qhov tseem ceeb: Yog koj mus ua nkauj nraug ces twb yog koj muab ib yam uas zoo kawg nkaus xuam pov tseg. (Loos 1:24) Koj lub cev tsim txiaj kawg nkaus li, tsis txhob lam muab rau ib tug twg siv!
Ua siab tawv, qhia kiag tias koj yeej yuav ‘tsis ua nkauj ua nraug.’ (1 Thexalaunika 4:3) Muaj ib hnub yog koj nrhiav tau txij nkawm, koj yeej yuav tau puag nws pw xwb. Koj yuav tso siab plhuav rau tus uas koj hlub. Yog ua li ntawd, koj thiaj tsis raug tej kev nyuaj siab, puas siab puas ntsws li cov uas tau ua nkauj ua nraug.—Paj Lug 7:22, 23; 1 Khaulee 7:3.
KOJ XAV LI CAS?
Tus uas ntxias kom koj lub siab lub cev puas tas, puas yog tus hlub koj tiag?
Tus uas ntxias kom koj muab txojkev sib raug zoo nrog Vajtswv tso tseg, puas yog tus hlub koj tiag?—Henplais 13:4.