Cov Txivneej Uas Sau Txog Yexus

Koj puas pom cov txivneej hauv daim duab no?— Cov txivneej ntawd yog Mathai, Malakau, Luka, Yauhas, Petus, Yakaunpau, Yuda, thiab Povlauj. Lawv nyob rau lub sijhawm uas Yexus nyob, thiab lawv yog cov uas sau txog Yexus. Cia peb mus kawm ntxiv txog lawv.

Muaj 3 tug yog cov tubtxib uas niaj hnub nrog Yexus mus qhia Vajtswv Txojlus. Koj puas paub 3 tug no yog leejtwg?— Peb tug no yog Mathai, Yauhas, thiab Petus. Mathai thiab Yauhas yog ob tug uas paub Yexus zoo heev. Yog li ntawd, nkawd ib leeg thiaj sau tau ib phau ntawv txog Yexus lub neej. Yauhas kuj sau tau ib phau uas hu ua Qhia Tshwm thiab 3 tsab ntawv uas hu ua 1 Yauhas, 2 Yauhas, thiab 3 Yauhas. Petus kuj sau tau 2 tsab ntawv uas nyob hauv phau Vajlugkub thiab. Ob tsab ntawv ntawd hu ua 1 Petus thiab 2 Petus. Nyob rau tsab 2, Petus sau txog lub sijhawm uas Yehauvas hais lus saum ntuj tuaj. Yehauvas hais li no txog Yexus: ‘Tus no yog kuv tus tub uas kuv hlub. Kuv zoo siab rau nws heev.’

Muaj dua 2 tug txivneej uas nyob hauv daim duab no kuj sau txog Yexus thiab. Ib tug yog Malakau. Tej zaum hmo uas Yexus raug ntes, Malakau kuj nyob rau ntawd pom thiab. Hos ib tug yog Luka. Luka yog ib tug kws tshuaj. Tej zaum tom qab Yexus tuag lawm, nws mam li los ua Yexus ib tug thwjtim.

Muaj 2 tug txivneej hauv daim duab no yog Yexus 2 tug kwv. Koj puas paub nkawd hu li cas?— Nkawd hu ua Yakaunpau thiab Yuda. Thaum Yexus tsis tau tuag, nkawd tsis kam ntseeg nws. Nkawd tseem xav tias Yexus vwm lawm xwb. Tom qab Yexus tuag lawm, nkawd mam li ntseeg thiab los ua Yexus 2 tug thwjtim.

Hauv daim duab no tseem tshuav ib tug txivneej uas sau phau Vajlugkub thiab. Tus ntawd yog Povlauj. Povlauj lub npe ua ntej nws los ua Yexus ib tug thwjtim yog hu ua Xolau. Nws tsis nyiam Yexus cov thwjtim. Yog li ntawd, nws thiaj ua phem heev rau lawv. Koj puas paub vim li cas Povlauj thiaj los ua Yexus ib tug thwjtim lawm?— Muaj ib hnub thaum Povlauj tabtom taug kev mus rau pem Damaxaka, nws hnov ib tug hu saum ntuj tuaj rau nws. Tus ntawd yog Yexus! Yexus thiaj nug Povlauj tias: ‘Ua li cas koj ua phem rau kuv cov thwjtim?’ Tom qab ntawd, Povlauj thiaj tsis ua phem lawm thiab nws thiaj los ua Yexus ib tug thwjtim. Povlauj sau tau 14 phau ntawv hauv phau Vajlugkub. Cov ntawv Povlauj sau yog phau Loos mus txog phau Henplais.

Zoo rau peb nyeem phau Vajlugkub txhua txhua hnub, puas yog?— Yog peb ua li ntawd, peb yuav paub Yexus zoo. Koj puas xav kom koj paub Yexus zoo ntxiv?—