Qhia Tias Koj Muaj Kev Hlub Rau Vajtswv

Yuav kom ceev tau ib tug phoojywg, koj yuav tau nrog nws tham pem. Koj mloog nws hais, thiab nws mloog koj hais. Koj kuj hais tej yam zoo txog koj tus phoojywg rau lwm tus. Thaum koj ua phoojywg nrog Vajtswv los koj ua zoo li ntawd thiab. Xav saib phau Vajlugkub hais li cas txog qhov no:

Thov Yehauvas tsis tu ncua. “Thov Vajtswv tsis tseg tsis tu li.”​—Loos 12:12.

Nyeem Vajtswv Txojlus, phau Vajlugkub. “Vajtswv txojlus txhua nqe yog tawm hauv Vajtswv lub qhov ncauj los thiab siv tau qhuab qhia, qhuab ntuas, qhia tus uas txhaum rov ua zoo, thiab cob qhia ua ncaj ua ncees.”​—2 Timaute 3:16.

Qhia lwm tus txog Vajtswv. “Nej cia li mus coj txhua haiv neeg los ua kuv li thwjtim, . . . thiab qhia kom lawv tuav rawv txhua yam uas kuv tau qhia rau nej lawd.”​—Mathai 28:19, 20.

Txav ze rau Vajtswv cov phoojywg. “Tus uas nrog nraim tus txawj ntse nws kuj yuav txawj ntse.”​—Paj Lug 13:20.

Tuaj txoos ua ke hauv lub Tsev Nceeg Vaj. “Peb cia li ua tib zoo saib yuav ua li cas ib leeg thiaj txhawb tau ib leeg lub zog kom sib hlub thiab ua haujlwm zoo, . . . ib leeg yuav tsum txhawb ib leeg lub siab.”​—Henplais 10:24, 25.

Pab txhawb txoj haujlwm tshaj tawm txog lub Nceeg Vaj. “Txhua tus nyias yuav tsum muab raws li nyias twb xav tseg hauv lub siab lawm, tsis yog yuav khuvxim lossis raug yuam muab, rau qhov Vajtswv hlub tus uas xyiv fab muab.”​—2 Khaulee 9:7.