Tej Yam Uas Cov Kws Tshawb Fawb Tseem Tsis Tau Paub
Cov kws tshawb fawb twb kawm txog txhua yam uas lawv pom hauv lub qab ntuj khwb no lawm. Tiamsis tseem muaj ntau yam uas lawv tsis tau paub lawv thiaj tsis paub qhia peb.
Tej neeg tshawb txuj puas paub tias lub qab ntuj khwb no tshwm los li cas? Lawv yeej tsis paub. Ib txhia hais tias tsuas yog cov uas kawm txog lub qab ntuj khwb xwb thiaj qhia tau rau peb tias lub qab ntuj khwb pib li cas los. Tiamsis ib tug xibhwb uas kawm txog lub qab ntuj khwb hu ua Maxelaum Nkexaws (Marcelo Gleiser) uas tsis ntseeg Vajtswv tseem hais li no thiab: “Peb yeej tsis pom qab piav tias lub qab ntuj khwb pib qhov twg los.”
Tsis tas li ntawd xwb ib phau ntawv uas qhia txog kev kawm txujci kuj sau tias: “Yeej tsis muaj leejtwg paub tias lub ntiajteb no twb pib thaum twg los lawm, vim tibneeg nrhiav tsis tau tej pob zeb lossis pob txha tsiaj txheej thaum ub uas yuav qhia tau rau peb.” Tej uas cov neeg tshawb txuj hais no qhia tias lawv yeej tsis paub xyov lub qab ntuj khwb pib li cas tiag.
Txawm li ntawd los koj yeej xav paub tias, ‘Yog txhua yam hauv ntiajteb raug tsim los ces leejtwg yog tus uas tsim?’ Tsis tag li ntawd koj kuj xav paub ntxiv tias: ‘Yog tus kws tsim muaj tswvyim thiab hlub peb, vim li cas nws thiaj cia tibneeg raug kev txom nyem? Ua cas nws cia tibneeg muaj ntau txojkev ntseeg ua luaj? Thiab ua cas nws ho cia cov uas teev tiam nws ua ntau yam kev phem kev qias?’
Tej neeg tshawb txuj yeej qhia tsis tau rau peb txog tej yam no. Txawm li los txhob tag kev cia siab. Phau Vajlugkub twb pab tau coob leej ntau tus paub txog tej no lawm.
Yog koj xav paub tias ua cas ib co kws tshawb txuj ho los kawm Vajlugkub thiab ntseeg tias muaj tus Tswv Tsim lawm, mus rau jw.org/hmn thiab nrhiav ntu uas hais tias Txojsia Rhawv Li Cas Los. Yuav muaj ib co yeeb yaj kiab uas koj saib tau.