Cov Ntaub Ntawv Uas Muab Kaw Ua Suab Hloov Tau Ib Tug Lub Neej

Muaj ib tug Timkhawv nyob hauv lub povtxwv Barbados kawm Vajlugkub nrog ib tug tub hluas. Tus tub hluas ntawd muaj ib tug tijlaug uas yog ib tug neeg tsav nkoj hauv hiavtxwv. Tus tijlaug tsav nkoj mus ntau qhov chaw thiab pom ntau yam phem txog tej kev ntseeg. Qhov no ua rau nws tsis paub yuav ntseeg txoj twg. Vim li no, nws thiaj thuam nws tus kwv thaum tus kwv kawm Vajlugkub nrog Yehauvas Cov Timkhawv. Tus tijlaug tsis ntseeg Vajtswv, tiamsis nws kuj txais ib co ntaub ntawv Vajlugkub mus nyeem thiab txais phau Vajlugkub uas muab kaw ua suab mus mloog. Thiab nws kuj nqa mus mloog thaum nws rov tsav nkoj mus deb heev. Thaum nws mus txog rau tebchaws Australia, nws twb muab cov ntaub ntawv nyeem tas thiab kuj muab phau Vajlugkub uas kaw ua suab mloog tas huvsi lawm thiab. Nws tseem xav nyeem thiab xav mloog ntxiv. Yog li ntawd, thaum nws pom ib tug Timkhawv uas nyob Australia tuaj txog ntawm nws lub nkoj, nws thiaj zoo siab hlo txais dua ib co ntaub ntawv Vajlugkub mus nyeem ntxiv.

Tus tijlaug tsav nkoj mus tau ntau lub hlis mam rov los txog lub povtxwv Barbados, zaum no nws tsis yog tus qub neeg lawm. Nws txiav tsis haus luam yeeb thiab tsis haus maj, tsis twv txiaj yuam pov thiab tsis haus dej haus cawv, thiab nws kuj tseg tsis coj lub neej tsis huv lawm. Tsis ntev xwb nws txawm ua kevcai raus dej. Dabtsi thiaj pab tau nws hloov? Nws teb tias: “Twb yog kuv mloog phau Vajlugkub uas muab kaw ua suab es thiaj pab tau kuv paub qhov tseeb hauv phau Vajlugkub.”