YAUHAS TSAB NTAWV OB

1 Kuv yog ib tug laus neeg,* kuv sau ntawv tuaj rau tus muam* uas raug xaiv tseg thiab nws cov me nyuam uas kuv hlub tshua heev. Tsis yog kuv ib leeg xwb tiam sis tag nrho cov uas tau los paub qhov tseeb puav leej hlub nej thiab, 2 rau qhov peb muaj qhov tseeb nyob hauv peb lub siab mas qhov tseeb yuav nyob ruaj khov hauv peb mus ib txhis. 3 Vajtswv uas yog Leej Txiv thiab nws tus Tub Yexus Khetos, yuav hlub tshua peb thiab qhia qhov tseeb rau peb. Nkawd yuav foom koob hmoov nplua mias rau peb, khuv leej peb, thiab pub peb nyob sib haum xeeb.

4 Kuv zoo siab kawg li thaum kuv hnov tias koj cov me nyuam ib txhia tseem ua lub neej raws li qhov tseeb, ib yam li Leej Txiv twb sam hwm rau peb lawm. 5 Yog li ntawd, tus muam’e, nim no kuv xav qhia rau koj tias peb ib leeg yuav tsum hlub ib leeg. (Tsis yog kuv sau ib txoj kev cai tshiab, tiam sis yog txoj kev cai peb twb kawm thaum peb xub los ntseeg lawm.) 6 Kev hlub yog li no, peb yuav tsum ua lub neej raws li Vajtswv tej kev cai. Nov yog txoj kev cai uas peb xub kawm thaum peb los ntseeg mas peb ib leeg yuav tsum hlub ib leeg mus li. 7 Ceev faj vim muaj cov neeg dag ntxias twb tawm mus qhia hauv qab ntuj no lawm. Lawv yog cov uas tsis kam lees tias Yexus Khetos tau los yug ua neeg hauv lub ntiaj teb no. Lawv yog tus dag ntxias thiab tus tawm tsam Khetos* ntag.

8 Ceev faj nej thiaj tsis muab tej uas peb siv zog khwv tau los tso pov tseg. Yog nej ua li no nej thiaj tau txais nqi zog puv ntoob. 9 Txhua tus uas hla Khetos tej lus qhia, Vajtswv tsis nrog cov ntawd. Tiam sis tus uas tuav rawv Khetos tej lus qhia mas Leej Txiv thiab tus Tub nrog nraim tus ntawd. 10 Yog leej twg tuaj ntawm nej es nws tsis qhia raws li Khetos tej lus, tsis txhob tos txais nws los hauv tsev thiab tsis txhob hu nws li. 11 Yog leej twg hu tus ntawd ces nws kuj nrog tus ntawd koom ua tes hauj lwm phem.

12 Muaj ntau yam uas kuv xav qhia rau nej tiam sis kuv tsis xav muab sau rau nruab ntaw. Kuv vam tias kuv yuav tau tuaj saib nej thiab nrog nej tham tim ntsej tim muag, nej thiaj muaj kev xyiv fab txaus nkaus.

13 Koj tus viv ncaus uas raug xaiv tseg cov me nyuam kuj xa lus noj qab nyob zoo tuaj rau koj thiab.