PETUS TSAB NTAWV OB

1 Ntawm no yog Ximoos Petus uas yog Yexus Khetos ib tug tub qhe thiab ib tug tub txib. Kuv sau tsab ntawv no rau nej cov uas los paub qhov tseeb uas muaj nqis heev ib yam li peb paub thiab. Peb los paub tej no twb yog muaj Vajtswv tus uas ncaj ncees thiab muaj Yexus Khetos uas yog peb tus Cawm Seej.

2 Thov Vajtswv yim huab foom koob hmoov nplua mias rau nej, thiab pub nej nyob sib haum xeeb vim nej paub qhov tseeb txog Vajtswv thiab txog peb tus Tswv Yexus. 3 Vajtswv lub hwj chim twb pub* txhua yam rau peb kom peb tau txoj sia thiab muab siab npuab Vajtswv. Peb tau tej no vim peb los paub qhov tseeb txog Vajtswv, tus uas hu peb los vim nws muaj koob meej ci ntsa iab thiab ncaj ncees. 4 Nws thiaj pub* tej lus cog tseg uas muaj nqis thiab zoo kawg nkaus rau peb. Vim muaj tej lus cog tseg ntawd, peb thiaj muaj tau lub cev uas zoo li Vajtswv lub rau qhov peb twb dim tej kev liam sim uas muaj hauv lub qab ntuj no, vim neeg ntshaw ua txhaum.

5 Twb yog vim li ntawd, nej yuav tsum muaj kev ntseeg. Tiam sis ntxiv rau kev ntseeg nej yuav tsum ua ncaj ncees kom kawg nej lub dag lub zog. Thaum ua tau ncaj ncees lawd, nej yuav tsum rau siab ntso kawm kom nej paub qhov tseeb ntxiv. 6 Thaum nej paub qhov tseeb lawd, nej yuav tsum siv zog tswj nej tus kheej. Thaum nej tswj tau nej tus kheej lawd, nej yuav tsum ua siab ntev thev tiag. Thaum nej muaj lub siab thev taus lawd, nej yuav tsum muab siab npuab Vajtswv tiag. 7 Thaum nej muab siab npuab Vajtswv lawd, nej yuav tsum xyaum tiag kom txawj sib hlub li kwv tij. Thaum nej txawj sib hlub li kwv tij lawd, nej yuav tsum xyaum tiag kom nej hlub taus txhua leej txhua tus. 8 Yog nej ua tau li no tib si kom phwj yaws nej lub siab ces nej yuav coj tau raws li qhov tseeb uas nej tau kawm txog peb tus Tswv Yexus Khetos, thiab yuav tiv thaiv tau nej kom nej txhob ua neeg tub nkeeg los sis tsis xav ua hauj lwm.

9 Yog leej twg tu ncua tej no ces zoo li nws dig muag lawm, rau qhov nws qe muag kom txhob pom qhov kaj, thiab nws twb tsis nco qab qhov uas Vajtswv zam tej kev txhaum nws tau ua thaum ub lawm. 10 Yog li ntawd, cov kwv tij, rau siab ntso peem tiag nej thiaj nyob ruaj nrog cov uas Vajtswv tau xaiv thiab hu lawd. Yog nej rau siab ntso ua li no, nej yeej yuav tsis tso kev ntseeg tseg li. 11 Yog nej ua li no ces nej yuav tau txais koob hmoov nplua mias uas yog tau nkag mus rau hauv peb tus Tswv thiab tus Cawm Seej Yexus Khetos lub Nceeg Vaj* uas yuav nyob mus ib txhis.

12 Yog li ntawd, txawm tias nej twb paub zoo txog tej no thiab nyob ruaj rau qhov tseeb uas nej tau kawm lawm los, kuv tseem yuav qhia tas zog kom nej nco ntsoov tej no ntxiv. 13 Thaum kuv tseem muaj lub cev ntaj ntsug* no, yeej tsim nyog kuv qhia kom nej nco ntsoov tej no. 14 Kuv paub tias tshuav tsis ntev xwb, kuv yuav tso lub cev ntaj ntsug* no tseg, ib yam li peb tus Tswv Yexus Khetos twb qhia meej rau kuv lawm. 15 Kuv yuav qhia nej kom kawg kuv lub dag lub zog, xwv thaum kuv ncaim nej mus lawd, nej thiaj yuav nco tau tej no.

16 Tsis yog peb muab tej dab neeg uas luag txawj txawj xev los qhia nej txog peb tus Tswv Yexus Khetos lub hwj chim thiab txog qhov uas nws yuav rov los, tiam sis peb lub qhov muag yeej tau pom kiag nws lub hwj chim ci ntsa iab. 17 Rau qhov Vajtswv uas yog Leej Txiv tau pub meej mom thiab koob meej rau nws. Tau muaj li ntawd thaum tus uas pub koob meej ci ntsa iab hais rau nws tias, “Tus no yog kuv tus Tub. Kuv hlub nws heev. Nws ua haum kuv siab.” 18 Thaum peb tseem nrog nws nyob saum lub roob dawb huv peb hnov kiag tej lus no hais saum ntuj tuaj ntag.

19 Yog li ntawd, tej no ua rau peb yim huab ntseeg tej lus uas cov cev Vajtswv lus tau qhia. Tsim nyog nej cuab pob ntseg mloog tej lus ntawd, rau qhov tej lus ntawd zoo li lub teeb ci hauv nej lub siab uas tsaus ntuj nti mus txog thaum yuav kaj ntug es lub hnub qub kaj ntug tawm tuaj. 20 Nej yeej paub lawm tias, tej uas cov cev Vajtswv lus qhia hauv Vajtswv Txoj Lus, tsis yog neeg lub tswv yim. 21 Vim tsis yog neeg cev tej lus ntawd raws li lawv siab xav, tiam sis neeg tsuas qhia raws li Vajtswv lub hwj huam dawb huv tshoov xwb.

2 Tiam sis Vajtswv haiv neeg thaum ub twb muaj cov uas ua txuj cev Vajtswv lus ces nim no kuj yuav muaj cov uas qhia cuav nyob hauv nej thiab. Lawv yuav ua twj ywm tshum kom sawv daws tawg ua pab ua pawg, thiab tseem yuav ntxeev siab rau tus* uas txhiv lawv mas kev puas tsuaj yuav los raug lawv sai sai. 2 Tsis tas li ntawd, coob tus yuav xyaum ua vuab tsuab tsis paub txaj muag* ib yam li lawv. Vim lawv coj li no thiaj ua rau tib neeg thuam qhov tseeb. 3 Tsis tas li ntawd, vim lawv siab hlob, lawv yuav siv tej lus cuav los haub ntxias nej kom lawv tau zoo. Tiam sis Vajtswv twb txiav txim rau lawv puag thaum ub los lawm, hnub ntawd yeej tsis ncua tos. Lawv yeej yuav raug puas tsuaj xwb xwb li.*

4 Vajtswv yeej tsis laug caij los rau txim rau cov tub txib saum ntuj uas tau ua txhaum, tiam sis nws muab lawv pov rhees rau hauv lub qhov taub Tautalas* thiab muab saw hlau khi lawv cia nyob tsaus ntuj nti mus txog hnub rau txim* rau lawv. 5 Thiab Vajtswv yeej tsis laug caij los rau txim rau qab ntuj neeg* uas nyob txheej thaum ub. Tiam neeg ntawd tsis hwm Vajtswv, nws thiaj tso dej los nyab lub qab ntuj. Tiam sis nws tseg Nau-as tus uas tshaj tawm txoj kev ncaj ncees, thiab tseg xya leej uas nrog Nau-as txoj sia. 6 Nws kuj rau txim rau lub nroog Xaudoos thiab Kaumaulas, muab hlawv ciaj tshauv tag nrho. Tej no ua qauv rau cov uas tsis hwm Vajtswv tom hauv ntej ntag. 7 Thaum ntawd Vajtswv cawm Lauj tus uas ncaj ncees. Lauj niaj hnub ntxhov siab rau cov neeg uas tsis coj cai thiab ua vuab tsuab tsis paub txaj muag* li. 8 Lauj yog ib tug neeg ncaj ncees, ib hnub dhau ib hnub nws nyob xyaw cov neeg tsis coj cai. Nws pom lawv tej kev phem thiab hnov tej lus phem uas lawv hais mas ua rau nws ntxhov siab kawg li. 9 Yog li ntawd, Vajtswv Yehauvas* yeej paub cawm cov uas muab siab npuab nws dim kev sim siab. Tiam sis nws yuav muab cov uas tsis ncaj ncees hom tseg mus txog hnub txiav txim es muab lawv rhuav tshem mus, 10 tshwj xeeb yog cov uas nrhiav kev los txw lwm tus ua nkauj ua nraug kom puas tsuas lawv lub cev, thiab tuam mom cov saib xyuas.

Cov ntawd muaj lub siab tawv heev thiab nyiam ua ywj siab, lawv thuam cov uas tau koob meej* tsis ntshai li. 11 Txawm cov tub txib saum ntuj muaj zog loj zog nchav thiab muaj hwj chim tshaj los, lawv twb tsis nkaug thiab thuam cov ntawd vim lawv hwm Vajtswv Yehauvas.* 12 Tiam sis cov neeg ntawd zoo li tej tsiaj tsis txawj xav uas tsuas ua li lawv ib txwm paub, thiab yug los rau luag ntes tua xwb. Lawv thiaj thuam tej uas lawv twb tsis paub txog li. Tej kev phem uas lawv ua yuav rov qab ua rau lawv puas tsuaj xwb, 13 vim lawv ua rau lwm tus raug kev txom nyem ces kev txom nyem yuav yog lawv li nqi zog ntag.

Txawm nruab hnub nrig los lawv nyiam noj tsau haus qaug, vuag kev lom zem xauv npo. Lawv yog yam uas tsuas qias lub koom txoos ntag. Thaum lawv nrog nej noj haus ua ke, lawv hais lus dag los haub ntxias nej mas lom zem kawg nkaus rau lawv. 14 Lawv lub qhov muag nrhiav nrhw kev deev luag poj luag txiv,* lawv tso tsis tau tej kev txhaum tseg, thiab xav haub ntxias cov neeg uas lub siab tsis ruaj khov. Lawv xyaum ua neeg siab hlob thiab yog cov me nyuam uas Vajtswv twb foom tsis zoo lawm. 15 Lawv tso txoj kev ncaj ncees tseg, lawv thiaj yuam kev lawm. Lawv taug txoj kev uas Npe-aus tus tub Npala-as taug. Npala-as yog tus yeem mus ua txhaum vim nws ntshaw nyiaj txiag dhau. 16 Tiam sis thaum kawg nws raug txim vim nws ua txhaum kev cai. Ib tug nees luav uas yeej tsis txawj hais lus txawm muaj neeg lub suab hais lus cheem tus cev lus Npala-as kom txhob mus ua ib tug niag vwm ntsuav.

17 Lawv cov ntawd zoo li tej qhov dej uas qhuav tas, thiab zoo li tauv huab uas cua daj cua dub muab nplawm mus rau lwm qhov lawm. Vajtswv thiaj hom qhov chaw tsaus nti dub nciab rau lawv. 18 Lawv hais lus khav ntxhias tiam sis tsis muaj hauv paus hauv ntsis. Lawv haub ntxias cov uas nyuam qhuav tso kev txhaum tseg, kom rov xib mus ua raws li cev nqaij daim tawv ntshaw, thiab mus ua tej kev phem vuab tsuab tsis paub txaj muag* li. 19 Lawv cog lus tias cov uas caum lawv yuav tau nyob ywj pheej, tiam sis lawv twb ua kev puas tsuaj qhev lawm. Rau qhov yog leej twg* tswj tau yus lawd ces yus yog nws tus qhev ntag. 20 Yog leej twg kawm paub qhov tseeb txog peb tus Tswv Yexus Khetos uas yog tus Cawm Seej, thiab lawv dim plaws lub qab ntuj no tej kev phem kev qias, tiam sis lawv ho rov mus koom tej kev phem ntawd thiab cia tej ntawd tswj tau lawv ces lawv tseem yuav txom nyem tshaj thaum xub thawj thiab. 21 Yog lawv tsis tau kawm paub tseeb txog txoj kev ncaj ncees, tseem zoo dua li qhov uas lawv paub tseeb tiam sis ho muab txoj kev cai uas Vajtswv qhia rau lawv tso tseg. 22 Tej uas lawv ua ntawd muaj tseeb raws li lo paj lug no hais tias, “Dev rov mus noj dev cov ntuav, thiab tus npua uas muab ntxuav huv lawm rov mus da pas av.”

3 Cov kwv tij uas kuv hlub’e, tsab ntawv no yog tsab ob uas kuv sau tuaj rau nej. Ib yam li kuv tau sau hauv thawj tsab, kuv xav kom nej ras dheev thiab feeb meej, kom nej nco ntsoov tej uas nej twb kawm lawd. 2 Nej thiaj nco ntsoov tej uas cov cev Vajtswv lus dawb huv twb hais tseg ua ntej lawm. Thiab nco ntsoov tej lus sam hwm uas tus Tswv uas yog peb tus Cawm Seej kom cov tub txib muab qhia rau nej. 3 Nej yeej paub zoo lawm tias, tiam kawg yuav muaj neeg thuam qhov zoo thiab yuav ua phem raws li lawv lub siab ntshaw. 4 Lawv yuav thuam tias, “Nws twb cog lus tias nws yuav rov los es nws nyob twg? Txij thaum peb tej yawg koob tuag tas los, ua cas ib puas tsav yam tseem nyob li qub? Txij thaum tsim ntuj tsim teb los, tsis pom muaj ib yam dab tsi txawv txav li.”

5 Tiam sis lawv txhob txwm tsis quav ntsej qhov uas puag thaum ub muaj lub ntuj lub teb mas Vajtswv nkaw lus kom daim av tawm hauv dej los, thiab ua rau cov dej nyob puag ncig daim av. 6 Twb yog muaj li ntawd, Vajtswv thiaj ua kom dej dag nyab tag nrho lub ntiaj teb ua rau tiam neeg ntawd puas tsuaj tas. 7 Vajtswv kuj nkaw lus tias lub ntuj lub teb uas muaj tam sim no twb muab hom tseg rau hluav taws hlawv lawm. Yuav tseg lub ntuj lub ntiaj teb mus txog hnub txiav txim mas tej neeg tsis hwm Vajtswv yuav raug kev puas tsuaj.

8 Cov uas kuv hlub’e, nco ntsoov li no, ib hnub rau Vajtswv Yehauvas* ntev li ib txhiab xyoo, thiab ib txhiab xyoo ntev li ib hnub. 9 Vajtswv Yehauvas* yeej tsis qeeb siab es yuav laug caij tsis ua raws li nws cog lus tseg li ib txhia tau xav. Twb yog nws ua siab ntev rau nej vim nws tsis xav kom ib tug twg raug kev puas tsuaj, tiam sis nws xav kom txhua tus hloov dua siab tshiab. 10 Vajtswv Yehauvas* hnub yuav los li tub sab tuaj. Thaum ntawd yuav muaj suab nrov qeeg nkaws mas lub ntuj yuav ploj ntais. Yuav kub tej yam uas nyob hauv lub qab ntuj no yaj tag, thiab lub ntiaj teb thiab qab ntuj neeg tes hauj lwm yuav muab nthuav tawm los raug kev puas tsuaj.

11 Vim tej no yuav ploj mus, cia li tshuaj nej tus kheej seb nej yuav tsum coj li cas. Yeej tsim nyog nej ua lub neej dawb huv thiab ua tes hauj lwm uas qhia tias nej muab siab npuab Vajtswv. 12 Thiab nej yuav tsum tos ntsoov Vajtswv Yehauvas* hnub, yam li hnub ntawd los twb yuav txog. Hnub ntawd hluav taws yuav kub lub ntuj thiab hlawv tej yam hauv lub qab ntuj no yaj tas. 13 Tiam sis raws li nws tau cog lus tseg lawd, yuav muaj lub ntuj tshiab thiab lub ntiaj teb tshiab uas peb tos ntsoov mas yuav muaj kev ncaj ncees nyob rau hauv xwb.

14 Yog li ntawd, cov kwv tij uas kuv hlub’e, thaum nej tab tom tos tej no, cia li peem kam tiag xwv thaum kawg Vajtswv thiaj suav tias nej dawb huv, tsis muaj ib yam dab tsi tsuas qias nej, thiab nej nrog nws sib raug zoo. 15 Tsis tas li ntawd, nco ntsoov tias twb yog peb tus Tswv* ua siab ntev thiaj cawm tau nej dim. Povlauj uas yog tus kwv tij peb hlub tshua, twb sau tej no tuaj rau nej lawm. Nws sau raws li lub tswv yim uas Vajtswv pub. 16 Nws yeej sau txog tej no rau hauv txhua tsab ntawv lawm. Muaj qho yam uas nws sau tsis yooj yim nkag siab. Cov neeg uas tsis paub dab tsi, thiab muaj lub siab ywj fab ywj fwj thiaj muab nws tej lus ntxeev, ib yam li lawv tau ntxeev lwm zaj hauv Vajtswv Txoj Lus, tiam sis thaum kawg tej no yuav ua rau lawv raug kev puas tsuaj.

17 Yog li ntawd, cov kwv tij uas kuv hlub’e, vim nej twb kawm ua ntej txog tej no lawm, cia li ceev faj kom nej txhob raug ntxias mus ua yuam kev li cov neeg tsis coj cai, thiab tsam ua rau nej sawv tsis khov li qub lawm. 18 Tiam sis rau siab ntso kawm kom nej haj yam paub zoo txog peb tus Tswv Yexus Khetos uas yog tus Cawm Seej, thiab paub txoj kev hlub uas nws pub nplua mias rau peb. Thov kom nws tau koob meej tam sim no thiab mus ib txhis. Amees.*