PETUS THAWJ TSAB NTAWV

1 Ntawm no yog Petus uas yog Yexus Khetos ib tug tub txib. Kuv sau tsab ntawv no rau cov ntseeg uas tawg ua sab ua sua mus nyob ua qhua rau koog Phauthias, Kalatias, Khapedaukias, Axias thiab Npithinias. Nej yog cov uas raug xaiv tseg 2 raws li Vajtswv uas yog peb Leej Txiv twb npaj tseg lawm. Nws lub hwj huam twb ua rau nej dawb huv xwv nej thiaj mloog lus, thiab twb muab Yexus Khetos cov ntshav nchos rau nej lawm.

Thov Vajtswv foom koob hmoov nplua mias rau nej ntxiv kom nej haj yam nyob sib haum xeeb.

3 Thov qhuas Vajtswv uas yog peb tus Tswv Yexus Khetos Leej Txiv. Twb yog Vajtswv muaj lub siab hlub* peb kawg nkaus li, nws thiaj pub peb yug dua tshiab kom peb muaj ib txoj kev vam uas cog ruaj cog khov vim Yexus Khetos twb sawv hauv qhov tuag rov los lawm. 4 Thiab kom peb tau txais tej qub txeeg qub teg uas tsis txawj lwj, tsis muaj ib qho phem li, thiab tsis txawj ploj mus. Vajtswv khaws tej no tseg rau saum ntuj ceeb tsheej tos nej. 5 Twb yog nej muaj kev ntseeg, Vajtswv lub hwj chim yuav tsom kwm nej mus txog hnub cawm dim. Thaum txog lub sij hawm kawg mam qhia tshwm tias txoj kev cawm dim ntawd zoo li cas. 6 Twb yog vim li no nej thiaj zoo siab xyiv fab kawg li, txawm tias nej yuav raug ntau yam kev sim siab ua rau nej nyuaj siab ntxhov plawv ib nyuag ntu. 7 Nej txoj kev ntseeg uas raug sim li no muaj nqis dua tej kub uas txawj puas tsuaj rau thaum muab hluav taws hlawv. Tiam sis nej txoj kev ntseeg yuav ua rau Vajtswv qhuas thiab pub koob meej rau nej kom nej tau ntsej tau muag thaum Yexus Khetos tshwm los. 8 Txawm nej tsis tau pom Khetos los, nej yeej hlub nws. Txawm nej tsis pom nws tam sim no los, nej muaj kev ntseeg* rau nws thiab xyiv fab heev tsis pom qab piav, thiab muaj kev zoo siab kawg nkaus li, 9 rau qhov nej yeej paub tias vim nej muaj kev ntseeg nej yuav tau kev cawm dim.

10 Cov cev Vajtswv lus thiaj ua tib zoo taug qab thiab tshawb nrhiav txog txoj kev cawm dim no. Lawv tau cev lus txog txoj kev hlub uas Vajtswv yuav pub dawb rau nej. 11 Vajtswv lub hwj huam pab lawv nkag siab tias Khetos yuav raug txom nyem li cas thiab yuav tau koob meej li cas. Twb yog li ntawd lawv thiaj tshawb nrhiav tsis tseg tias yuav muaj li cas rau Khetos, thiab thaum twg mam muaj li ntawd. 12 Vajtswv ua rau lawv pom tias tej uas lawv tshaj tawm tsis yog hais rau lawv, tiam sis yog hais rau nej ntag. Tej uas lawv tau tshaj tawm ntawd twb yog tej uas luag tshaj tawm rau nej, vim muaj lub hwj huam uas Vajtswv pub saum ntuj los. Txawm cov tub txib saum ntuj los kuj xav paub txog tej no thiab.

13 Yog li ntawd, cia li cuab zog ntsos ua hauj lwm thiab xyuam xim kawg nkaus. Nej yuav tsum vam ntsoov txoj kev hlub* uas thaum Yexus Khetos tshwm los Vajtswv yuav pub nplua mias rau nej. 14 Nej zoo li cov me nyuam uas mloog lus heev, tseg tsis txhob cia tej uas nej lub siab ntshaw thaum nej tsis tau paub Vajtswv, rov los coj nej kev dua. 15 Tiam sis nej yuav tsum ua neeg dawb huv ib yam li tus Dawb Huv uas tau hu nej los. 16 Vajtswv Txoj Lus twb hais tias, “Nej yuav tsum ua neeg dawb huv rau qhov kuv dawb huv.”

17 Yog tias nej hu thov Leej Txiv, tus uas tsis xaiv ntsej xaiv muag thiab txiav txim rau tib neeg raws li lawv tes hauj lwm ces lub sij hawm uas nej tab tom ua qhua nyob, nej yuav tsum paub ntshai nws. 18 Nej twb paub lawm tias tsis yog tej nyiaj tej kub thiab tej yam uas txawj lwj thiaj tso tau nej dim lub neej tsis muaj hauv paus hauv ntsis uas nej cov yawg koob tseg rau nej. 19 Tiam sis twb yog Khetos cov ntshav uas muaj nqis heev tso nej dim, zoo li tus me nyuam yaj cov ntshav uas tsis muaj ib qho phem tsuas li. 20 Vajtswv twb xaiv nws ua ntej thaum ntuj tsim teb raug* los lawm, tiam sis thaum lub sij hawm yuav xaus nws mam li tshwm los pab nej. 21 Twb yog muaj nws nej thiaj ntseeg Vajtswv, tus uas tsa nws sawv hauv qhov tuag rov los thiab pub hwj chim ci ntsa iab rau nws xwv nej txoj kev ntseeg thiab txoj kev vam thiaj cog ruaj rau Vajtswv.

22 Twb yog nej mloog lus raws li qhov tseeb thiab muaj siab dawb paug sib hlub ib yam li tej kwv tij tiag, thiaj ntxuav tau nej dawb huv. Yog li ntawd, cia li rub lub siab kom ntev sib hlub tawm hauv nruab siab tuaj. 23 Rau qhov nej twb yug dua tshiab lawm. Tsis yog vim muaj yam uas txawj lwj, tiam sis yog muaj Vajtswv lub hwj huam* uas tsis txawj lwj thiab muaj Vajtswv tus uas muaj txoj sia nyob mus ib txhis txoj lus. 24 Vajtswv txoj lus twb hais tias, “Txhua tus zoo li tej nroj tsuag, lawv tej meej mom zoo li tej paj nroj tawg hauv nra liaj. Thaum tej nroj tsuag tuag ces tej paj nroj yuav zeeg mus, 25 tiam sis Vajtswv Yehauvas* tej lus yuav kav mus ib txhis.” Raws li nqe no, “tej lus” uas Vajtswv hais yog txoj xov zoo uas tau muab tshaj tawm rau nej ntag.

2 Cia li tshem txhua yam kev phem, kev dag ntxias, kev siab nkhaus,* kev khib xeeb, thiab kev xyav luag moo tawm hauv nej mus. 2 Nej yuav tsum nqhis Vajtswv txoj lus ib yam li tej me nyuam mos liab nqhis mis, nej thiaj hlob taus thiab tau kev cawm dim. Vajtswv txoj lus zoo li tej kua mis dawb huv ntag. 3 Thaum nej pom* lawm tias tus Tswv yog tus muaj lub siab zoo ces nej yuav ua tau li ntawd.

4 Thaum nej los cuag tus Tswv mas nws zoo li lub pob zeb ciaj sia uas neeg muab xyeeb tseg, tiam sis Vajtswv twb xaiv nws thiab saib nws muaj nqis kawg li. 5 Nej kuj zoo li tej pob zeb ciaj sia uas muab los teeb ua ib lub tsev raws li lub hwj huam dawb huv coj, nej thiaj ua tau ib pab pov thawj dawb huv uas muab khoom fij raws li lub hwj huam coj. Vajtswv txaus siab rau tej khoom fij ntawd twb yog muaj Yexus Khetos. 6 Vajtswv Txoj Lus twb hais tias, “Kuv yuav muab lub pob zeb uas kuv xaiv tseg los teeb rau hauv Xi-oos mas yog lub pob zeb muaj nqis uas teeb rau ntawm kaum tsev uas txheem lub tsev. Cov uas tso siab* rau lub pob zeb ntawd yeej yuav tsis poob ntsej muag li.”

7 Yog li ntawd, nws muaj nqis heev rau nej cov uas ntseeg. Tiam sis hais txog cov uas tsis ntseeg mas yuav muaj raws li Vajtswv txoj lus hais tias, “Lub pob zeb uas cov kws ua tsev muab xyeeb tseg, twb muab teeb rau saum kaum tsev uas siab tshaj lawm.” 8 Thiab muaj dua lwm nqe hais tias, “Lub pob zeb yuav ua rau luag dawm thiab yog phab tsua ua rau luag ntog.” Lawv dawm ntog vim lawv tsis mloog Vajtswv Txoj Lus. Twb muaj lus qhia tias lawv yuav raug li ntawd. 9 Tiam sis nej yog “cov neeg uas raug xaiv tseg, yog cov pov thawj uas yuav ua vaj ntxwv, yog ib haiv neeg dawb huv, thiab yog ib haiv neeg uas tshwj cia rau Vajtswv, mas nej yuav tsum tshaj tawm rau ib tsoom neeg paub tes hauj lwm zoo” ntawm tus uas hu nej tawm hauv qhov tsaus ntuj los nyob hauv nws qhov kaj uas zoo kawg nkaus. 10 Rau qhov yav tas los nej tsis yog ib haiv neeg, tiam sis nim no nej yog Vajtswv haiv neeg lawm. Yav tas los Vajtswv tsis hlub* nej, tiam sis nim no nej yog cov uas nws hlub* lawm.

11 Cov kwv tij uas kuv hlub’e, nej tsuas zoo li lwm haiv neeg ua qhua nyob txawv teb chaws xwb, thov tsis txhob qaug rau tej uas nej cev nqaij daim tawv ntshaw hlo li. Tej uas nej lub siab ntshaw tab tom nrog nej ua rog ntag. 12 Nej yuav tsum ua lub neej zoo tab meeg lwm haiv neeg. Thaum luag liam tias nej ua txhaum, los lawv yuav pom nej tes hauj lwm zoo mas hnub Vajtswv los tshuaj xyuas, lawv yuav qhuas Nws.

13 Vim muaj tus Tswv, nej cia li zwm rau txhua tus uas neeg tsa* los tswj teb kav chaw, tsis hais tej vaj ntxwv vim lawv siab dua nej, 14 los sis tej tswv xeev uas vaj ntxwv tsa los rau txim rau cov neeg ua phem thiab qhuas cov neeg ua zoo. 15 Vajtswv yeej pom zoo tias yog nej coj zoo ces yuav ua rau cov neeg tsis xav tom ntej tom qab uas nyiam hais tej lus tsis muaj qab hau, kaw kiag lawv lub qhov ncauj. 16 Nej twb muaj kev ywj pheej lawm, tiam sis tsis txhob xav tias vim nej muaj kev ywj pheej ces nej muaj cai ua txhaum ywj siab, tiam sis nej yuav tsum ua lub neej qhia tias nej yog Vajtswv cov tub qhe. 17 Cia li hwm txhua hom neeg, thiab hlub ib tsoom kwv tij sawv daws. Nej yuav tsum paub ntshai Vajtswv thiab hwm huab tais.

18 Nej cov uas yog tub qhe yuav tsum mloog nej tus tswv lus thiab paub ntshai nws kom tsim nyog. Tsis yog zwm rau tus tswv zoo uas muaj lub siab zam xeeb xwb, tiam sis yuav tau zwm rau tus tswv uas nruj tsiv tib si. 19 Yog leej twg tsis tau ua txhaum es nws raug tsim txom thiab tiv kev txom nyem rau qhov nws mloog Vajtswv lus ces tus ntawd yeej ua haum Vajtswv siab. 20 Tiam sis yog leej twg ua txhaum es raug luag ntaus, puas tsim nyog qhuas qhov uas nws tiv kev txom nyem? Tus uas tiv kev txom nyem vim nws ua zoo thiaj ua haum Vajtswv siab xwb.

21 Twb yog Vajtswv hu nej los raug kev txom nyem li no ntag, rau qhov Khetos twb raug kev txom nyem this nej lawm mas nws tseg tus qauv rau nej ua tib zoo xyaum. 22 Nws yeej tsis tau ua txhaum thiab tsis tau hais lus dag li. 23 Thaum nws raug luag thuam los nws tsis thuam lawv. Thaum luag tsim txom nws los nws tsis foom lawv, tiam sis nws muab nws tus kheej cob rau tus uas txiav txim ncaj ncees. 24 Nws ris peb lub txim thaum nws lub cev raug ntsia saum tus ncej ntoo* kom peb thiaj tuag rau peb tej kev txhaum, thiab ciaj los ua neeg ncaj ncees. Thiab “nws tej qhov txhab kho tau nej zoo lawm.” 25 Nej zoo li pab yaj uas yuam kev lawd, tiam sis nim no nej tig rov los cuag tus tswv yug yaj uas tsom kwm* nej txoj sia.

3 Ib yam li ntawd, nej cov poj niam yuav tsum zwm rau nej tej txiv. Yog nej tus txiv tsis mloog Vajtswv Txoj Lus los, tej zaum nej cov poj niam tes hauj lwm zoo yuav rub tau nej tej txiv los ntseeg, tsis tas yuav hais ib lo li. 2 Lawv yuav ntseeg vim lawv pom kiag nej coj lub neej dawb huv thiab hwm lawv tiag tiag. 3 Tsis txhob tu lub cev sab nraud kom zoo nkauj xwb, xws li ntxias plaub hau, coj nyiaj coj kub thiab hnav tej tsoos kim kim. 4 Tiam sis cia li tu tus neeg sab hauv kom zoo nkauj. Muab tej tsoos uas tsis txawj lwj tsis txawj puas los hnav uas yog muaj lub siab tiaj tus, thiab lub siab mos siab muag. Vajtswv pom tias tej no muaj nqis heev. 5 Cov poj niam dawb huv txheej thaum ub uas tso siab rau Vajtswv yeej tu lawv tus kheej li ntawd, thiab zwm rau lawv tej txiv. 6 Xalas mloog Anplahas lus ib yam li ntawd ntag, thiab nws hu Anplahas ua tus tswv. Zaum no nej los ua Xalas cov ntxhais* lawm mas nej yuav tsum ua zoo thiab tsis txhob ntshai ib yam dab tsi.

7 Ib yam li ntawd, nej cov ua txiv, thaum nej ua nej lub neej, nej yuav tsum paub nej tus poj niam lub siab. Nej yuav tsum saib taus lawv ib yam li tej twj taig muaj nqis uas yuav txawj tawg thiab tsis muaj zog li nej. Vim lawv yuav muaj feem nrog nej txais txoj sia uas Vajtswv pub dawb los ua qub txeeg qub teg. Yog nej tsis ua li no ces Vajtswv yuav tsis kam mloog nej tej lus thov.

8 Thaum kawg no, nej sawv daws yuav tsum koom ib lub siab, ib leeg mob siab ib leeg, sib hlub li kwv tij, khuv leej luag lwm tus, thiab txo hwj chim. 9 Tsis txhob ua phem pauj phem thiab tsis txhob thuam pauj luag. Tiam sis cia li foom koob hmoov rau tus ua phem thiab thuam yus. Vajtswv hu nej los coj li no ntag, kom nej thiaj tau koob hmoov.

10 Rau qhov Vajtswv txoj lus hais tias, “Tus uas txaus siab rau nws lub neej thiab xav tau lub neej zoo yuav tsum tswj nws tus nplaig txhob hais lus phem, thiab tswj nws lub qhov ncauj txhob hais lus dag. 11 Cia tus ntawd tso kev phem tseg thiab ua qhov zoo. Cia nws nrhiav nrhw kev sib haum xeeb thiab muab ceev cia mus li.* 12 Rau qhov Vajtswv Yehauvas* lub qhov muag saib ntsoov tus ncaj ncees thiab nws lub pob ntseg mloog ntsoov lawv tej lus taij thov. Tiam sis Vajtswv Yehauvas* tawm tsam cov uas ua phem.”

13 Yog nej kub siab lug ua yam zoo leej twg yuav ua phem rau nej? 14 Yog nej ua tes hauj lwm ncaj ncees es nej ho raug tsim txom, los nej yuav zoo siab. Tiam sis tsis txhob ntshai tej uas lwm tus ntshai, thiab tsis txhob ntxhov siab. 15 Nej lub siab yuav tsum lees paub tias Khetos yog tus Tswv uas dawb huv. Thaum muaj neeg thom nej tias vim li cas nej ho muaj kev cia siab, nej yuav tsum npaj txhij zog los teb lawv txhua tus. Tiam sis cia li ua lub siab mos siab muag teb thiab hwm lawv.

16 Nej yuav tsum coj zoo nej lub siab thiaj tsis nkaug nej. Yog nej ua li ntawd ces txawm luag yuav thuam nej li cas los, lawv yuav poob ntsej muag rau qhov nej raws Khetos qab ua tes hauj lwm zoo. 17 Yog Vajtswv cia nej raug tsim txom vim nej ua zoo ces kuj zoo dua li nej raug tsim txom vim nej ua phem. 18 Rau qhov Khetos tuag tib zaug xwb tshem tau kev txhaum lawm. Tus ncaj ncees tuag this cov tsis ncaj ncees, xwv thiaj coj tau nej mus cuag Vajtswv. Lawv tua tau nws lub cev muaj roj muaj ntshav, tiam sis Vajtswv tsa nws sawv rov los muaj lub cev uas tsis muaj roj muaj ntshav. 19 Thaum ntawd nws thiaj mus tshaj tawm tej lus txiav txim rau cov tub txib saum ntuj uas raug kaw. 20 Cov tub txib saum ntuj no yog cov uas tsis mloog lus thaum Vajtswv tseem ua siab ntev tos nyob rau Nau-as tiam. Thaum ntawd Nau-as tseem txua lub nkoj mas tsuas muaj yim leej uas nkag rau hauv lub nkoj dim dej nyab xwb.

21 Qhov ntawd piv txog kev cai raus dej ntag. Nej ua kev cai raus dej thiaj cawm tau nej dim vim Yexus Khetos sawv hauv qhov tuag rov los lawm. (Tsis yog ntxuav tej uas puas tsuas nej cev nqaij daim tawv, tiam sis yog nej thov kom Vajtswv ntxuav nej lub siab dawb huv.) 22 Khetos twb mus saum ntuj ceeb tsheej mus zaum ntawm Vajtswv sab xis lawm mas Vajtswv pub nws kav cov tub txib saum ntuj, thiab cov uas muaj hwj chim tib si.

4 Khetos cev nqaij daim tawv twb raug tsim txom, yog li, nej yuav tsum npaj kom muaj tib lub siab xav li Khetos xav. Rau qhov tus uas cev nqaij daim tawv raug tsim txom, yog tus uas tso kev txhaum tseg. 2 Nws thiaj siv tau lub sij hawm uas nws tseem tshuav ua neej nyob, los ua raws li Vajtswv lub siab nyiam, tsis yog ua raws li neeg lub siab ntshaw lawm. 3 Rau qhov yav tas los nej twb siv sij hawm txaus los coj li lwm haiv neeg lawm. Nej ua vuab tsuab tsis paub txaj muag li,* muaj lub siab ntshaw ua phem ua qias, qaug dej qaug cawv, ua nqaj ua nqug, noj tsau haus qaug, thiab teev dab teev mlom ntxim ntxub kawg li. 4 Nim no lawv tsis pom qab xav tias xyov ua li cas nej ho tsis kam nrog lawv do tej kev phem kev qias vuab tsuab li qub lawm, lawv thiaj thuam nej. 5 Tiam sis lawv yuav tau piav lawv tes hauj lwm rau tus Khetos uas twb npaj txhij los txiav txim rau cov ciaj thiab cov tuag. 6 Twb yog vim li no, thiaj muab txoj xov zoo tshaj tawm rau cov uas tuag* lawm thiab. Txawm lawv raug txiav txim raws li neeg lub qhov muag pom los, Vajtswv yuav suav tias lawv ciaj sia yog lawv ua raws li lub hwj huam coj.

7 Tiam sis lub sij hawm uas ib puas tsav yam yuav xaus twb los ze lawm. Yog li ntawd, cia li ua neeg thoob tsib, feeb meej thiab nquag thov Vajtswv. 8 Tiam sis qhov uas tseem ceeb dua ntais yog nej ib leeg yuav tsum rub lub siab los hlub ib leeg tiag tiag, rau qhov kev hlub npog tau ntau yam kev txhaum. 9 Ib leeg yuav tsum zoo siab hlo tos txais ib leeg, tsis txhob yws li. 10 Vajtswv pub nej nyias muaj nyias lub peev xwm. Cia li siv nej lub peev xwm los ua hauj lwm pab lwm tus. Vim nej yog cov tub qhe zoo heev uas pab qhia Vajtswv txoj kev hlub nplua mias rau ntau txoj ke. 11 Yog leej twg txawj tham lus, cia nws tham raws li Vajtswv tej lus. Yog leej twg yuav nqes tes pab lwm tus cia nws vam khom Vajtswv lub dag lub zog. Nws ua li no Vajtswv thiaj tau koob meej txhua lub sij hawm vim muaj Yexus Khetos. Thov cia Vajtswv tau koob meej thiab hwj chim mus ib txhiab ib txhis li. Amees.*

12 Cov kwv tij uas kuv hlub’e, thaum nej raug tej kev sim siab loj, tsis txhob poob siab cuag li muaj tej yam txawv txawv los raug nej. 13 Tiam sis nej raug tsim txom li Khetos npaum li cas ces nej cia li zoo siab npaum li ntawd. Nej thiaj zoo siab xyiv fab kawg nkaus rau hnub uas nws lub hwj chim ci ntsa iab tshwm los. 14 Yog nej raug thuam vim nej tuav Khetos lub npe, nej cia li zoo siab rau qhov lub hwj huam uas ci ntsa iab twb nrog nraim nej lawm, yog Vajtswv lub hwj huam ntag.

15 Tiam sis thov kom nej tsis txhob raug tsim txom vim tua neeg, ua tub sab, ua lim hiam, los sis thab plaub tab kaum luag lwm tus. 16 Yog nej ho raug tsim txom vim nej yog ib tug Khixatias* ces tsis txhob txaj muag, tiam sis kav tsij ris lub npe no los ua txhua yam kom Vajtswv tau koob meej. 17 Rau qhov twb txog lub sij hawm teem tseg los txiav txim rau Vajtswv cuab neeg lawm. Yog Vajtswv twb taug peb zaj ua ntej ces xyov tseem yuav zoo li cas rau cov uas tsis mloog Vajtswv txoj xov zoo thiab? 18 Vajtswv txoj lus twb hais tias, “Yog tsis yooj yim cawm tus ncaj ncees ces yuav ua li cas cawm tau tus tsis ntseeg Vajtswv thiab tus uas ua txhaum?” 19 Yog li ntawd, nej cov uas raug tsim txom vim nej ua raws li Vajtswv lub siab nyiam, cia li rau siab ntso ua qhov zoo qhov yog es muab nej txoj sia cog rau tus Tswv Tsim ncaj ncees.

5 Kuv yog ib tug uas nrog nej ua txwj laus thiab ua tim khawv pom Khetos raug tsim txom, thiab kuv yuav tau txais lub koob meej uas tseem yuav muab pub rau peb tom hauv ntej. Yog li ntawd, kuv thov nej cov uas ua txwj laus li no, 2 Cia li saib xyuas Vajtswv cov yaj uas nws tau muab cob rau nej lawd. Ua tib zoo saib xyuas lawv, tsis yog yuam nej lub siab ua. Tiam sis zoo siab hlo tu lawv tab meeg Vajtswv. Tsis yog nej muaj lub siab hlob xav tau noj tau haus, tiam sis nej yeej muaj lub siab kub lug ua. 3 Thiab tsis yog nej yuav tswj kav* cov uas Vajtswv tso rau nej saib xyuas, tiam sis nej yuav tsum ua qauv zoo rau pab yaj xyaum. 4 Thaum tus thawj tswv yug yaj tshwm los ces nej yuav tau txais lub kaus mom ci ntsa iab uas tsis txawj puas.

5 Ib yam li ntawd, nej cov tub hluas cia li zwm rau cov txwj laus.* Tiam sis nej txhua tus yuav tsum txo hwj chim* ib leeg zwm rau ib leeg, rau qhov Vajtswv tawm tsam cov uas khav theeb, thiab nws yuav foom koob hmoov nplua mias rau cov uas txo hwj chim.

6 Yog li ntawd, cia li txo hwj chim es cia Vajtswv txhais tes hwj nej, xwv thaum txog lub sij hawm uas nws pom zoo, nws thiaj tsav meej mom rau nej. 7 Cia li muab txhua yam kev txhawj xeeb tso plhuav rau nws, rau qhov nws mob siab nej. 8 Cia li feeb meej thiab ceev faj zov tos! Nej tus yeeb ncuab uas yog Ntxwg Nyoog, niaj hnub mus mus los los zoo li tus tsov ntxhuav nyooj laws nrhiav tsiaj tom noj.* 9 Tiam sis cia li tuav kev ntseeg ruaj khov tawm tsam nws, vim nej yeej paub tias nej tsoom kwv tij thoob qab ntuj tab tom raug kev txom nyem ib yam nkaus thiab. 10 Thaum nej txom nyem ib nyuag ntu lawm ces Vajtswv tus uas muaj kev hlub nplua mias uas tau hu nej los txais lub koob meej nyob mus ib txhis vim muaj Khetos, yuav ua tus cob qhia nej kom tiav. Nws yuav hwj nej kom nej muaj lub siab tawv qhawv, muaj zog npho, thiab sawv ruaj khov. 11 Thov kom nws muaj hwj chim mus ib txhis li. Amees.

12 Kuv hais kom tus kwv tij Xivanas uas muab siab npuab Vajtswv, pab sau ob peb lo lus no tuaj txhawb nej lub zog. Tsab ntawv no ua tim khawv tias Vajtswv yeej tau pub kev hlub nplua mias rau nej tiag tiag. Cia li tuav rawv yam uas Vajtswv pub rau nej. 13 Tus poj niam* uas nyob hauv Npanpiloos uas raug xaiv tseg ib yam li nej, xa lus noj qab nyob zoo tuaj rau nej. Thiab Malakaus uas tam li kuv tus tub xa lus noj qab nyob zoo tuaj rau nej. 14 Nej ib leeg cia li zoo siab hlo tos txais ib leeg* los qhia tias nej sib hlub.

Thov kom nej txhua tus uas nrog Khetos koom ib lub siab tau nyob kaj siab lug.