YAKAUNPAUS TSAB NTAWV

1 Ntawm no yog Yakaunpaus uas yog Vajtswv thiab tus Tswv Yexus Khetos ib tug tub qhe. Kuv sau tsab ntawv no rau 12 xeem uas tawg ua sab ua sua mus nyob txhua qhov.

Thov kom nej sawv daws noj qab nyob zoo!

2 Kuv cov kwv tij’e, thaum nej raug kev sim siab ntau yam, cia li zoo siab xyiv fab 3 rau qhov nej twb paub lawm tias yog nej txoj kev ntseeg raug sim li no, nej thiaj ua taus siab ntev thev. 4 Tiam sis nej yuav tsum ua siab ntev thev tiag vim qhov no yuav cob qhia nej kom nej ua tau zoo kawg nkaus rau txhua fab, tsis muaj chaw thuam, thiab tsis tu ncua ib yam dab tsi li.

5 Yog nej leej twg tsis muaj tswv yim, yeej meem thov Vajtswv mas nws yuav pub tswv yim rau nej, rau qhov Vajtswv yog tus pub nplua mias rau txhua tus tsis khuv xim, thiab nws yeej tsis rhuav leej twg ntsej muag* li. 6 Tiam sis nej yuav tsum muaj kev ntseeg thov Vajtswv tsis tseg, tsis txhob ua xyem xyav. Tus ua xyem xyav zoo li tej nthwv dej hiav txwv uas cua ntsawj ntas mus ntas los xwb. 7 Tus ntawd tsis txhob vam tias Vajtswv Yehauvas* yuav pub ib yam dab tsi rau nws li. 8 Nws pheej ua ob lub siab, txawm nws ua txoj twg los ua tsis tsheej.

9 Tiam sis tus kwv tij uas txom nyem cia li zoo siab rau qhov Vajtswv twb tsa nws lub neej lawm. 10 Thiab tus nplua nuj cia li zoo siab uas nws raug muab txo qes, vim nws yuav txawj dua mus yam li tej paj uas tawg hauv tej nra liaj. 11 Lub hnub tawm tuaj ziab tej paj ntawd txawj ntsws txawj zeeg tsis zoo nkauj li cas ces tus nplua nuj yuav txawj dua mus thaum nws tab tom ua nws tes hauj lwm ntxhov hnyo thiab.

12 Tus uas ua tiag thev tej kev sim siab yuav zoo siab, rau qhov thaum Vajtswv txaus siab rau nws lawd, nws yuav tau txais txoj sia ua lub kaus mom ntoo. Vajtswv Yehauvas* twb cog lus tias nws yuav pub txoj sia rau cov uas hlub nws mus li. 13 Thaum nej raug sim, tsis txhob hais tias, “Yog Vajtswv sim* kuv.” Tsis muaj leej twg yuav sim tau kom Vajtswv ua lim hiam, thiab nws yeej tsis sim kom leej twg ua lim hiam. 14 Twb yog tej uas peb lub siab ntshaw rub peb mus ua phem thiab ua rooj ntxiab rov cuab peb xwb. 15 Thaum txoj kev ntshaw ua phem xeeb rau hauv nruab siab lawm ces yuav yug tau kev txhaum. Thaum tus neeg mus ua txhaum lawd ces nws yuav raug kev ploj kev tuag.

16 Cov kwv tij uas kuv hlub’e, tsis txhob xav yuam kev. 17 Txhua yam uas zoo thiab txhua yam khoom pub uas zoo kawg nkaus, yog los saum ntuj los thiab yog peb Leej Txiv tus uas tsim qhov kaj ci ntsa iab* ua tus pub rau peb. Nws yeej tsis hloov thiab tsis txawv txav li tej duab ntxoov ntxoo. 18 Vajtswv pom zoo pub nws txoj lus tseeb rau peb kom peb thiaj tau los ua nws cov me nyuam, thiab tau ua thawj phaum qoob ntawm noob neej.*

19 Cov kwv tij uas kuv hlub’e, nco ntsoov ua li no, peb txhua tus yuav tsum maj mloog, tsis txhob maj hais, thiab tsis txhob npau taws sai 20 rau qhov thaum neeg npau taws pab tsis tau kom lawv ua ncaj ncees raws li Vajtswv lub siab nyiam. 21 Yog li ntawd, cia li muab txhua yam qias vuab tsuab thiab txhua yam kev phem uas loj me tib si tso pov tseg. Cia li txo hwj chim, Vajtswv thiaj muab tau nws txoj lus cawm siav cog rau hauv nej lub siab.

22 Tiam sis nej yuav tsum nqes tes ua li Vajtswv txoj lus qhia, tsis yog mloog xwb es rov dag nej tus kheej. 23 Yog leej twg tsuas mloog xwb, tiam sis nws tsis nqes tes ua raws li Vajtswv txoj lus qhia ces nws zoo ib yam li tus neeg uas saib nws lub ntsej muag hauv daim tsom iav. 24 Thaum nws tsom nws tus kheej tas, nws mus rau lwm qhov, nws twb tsis nco tias nws zoo li cas lawm. 25 Tiam sis tus uas ua tib zoo kawm txoj kev cai zoo kawg nkaus uas tso peb nyob ywj pheej, thiab nws coj raws li txoj kev cai ntawd mus li, tsis yog nws kawm tas es tsis nco qab tas. Tiam sis nws yeej nqes tes ua raws li nws tau kawm mas nws yuav txaus siab rau nws tes hauj lwm.

26 Yog leej twg xav tias nws yeej pe hawm Vajtswv tiam sis nws tsis tswj nrees nws tus nplaig ces twb yog nws rov dag nws tus kheej* xwb. Nws txoj kev pe hawm tsis muaj qab hau li. 27 Vajtswv uas yog peb Leej Txiv suav tias txoj kev pe hawm dawb huv uas tsis puas tsuas ib qho li yog kom peb saib xyuas tej me nyuam ntsuag thiab tej poj ntsuam uas raug kev txom nyem, thiab tsis txhob cia lub qab ntuj ua puas tsuas peb ib qho li.

2 Kuv cov kwv tij, puas yog nej muaj kev ntseeg rau peb tus Tswv Yexus Khetos uas muaj hwj chim ci ntsa iab, tiam sis haj tseem xaiv ntsej xaiv muag? 2 Yog tias muaj ob tug neeg tuaj hauv nej txoj kev sib txoos, ib tug coj tej nplhaib kub thiab hnav tsuj hnav npuag* ci nplas, hos ib tug txom nyem thiab hnav khaub hlab hnyo, 3 nej puas yuav muab tus uas hnav tsuj hnav npuag* saib hlob thiab hais tias, “Los zaum ntawm qhov chaw siab,” tiam sis ho hais rau tus txom nyem tias, “Koj sawv twj ywm ntawm kod,” los sis, “Los zaum ntawm kuv ko taw”?* 4 Yog tias nej ua li ntawd ces twb yog nej xaiv ntsej xaiv muag, thiab coj li tej neeg uas txiav txim tsis ncaj.

5 Cov kwv tij uas kuv hlub’e, thov mloog kuv hais. Vajtswv twb xaiv cov pluag hauv lub qab ntuj no los ua cov nplua nuj vim lawv muaj kev ntseeg heev, thiab kom lawv tau txais lub Nceeg Vaj* ua qub txeeg qub teg, rau qhov Vajtswv twb cog lus tias nws yuav muab pub rau cov uas hlub nws. 6 Tiam sis nej ho saib tsis taus cov pluag. Cov nplua nuj twb yog cov tsim txom nej thiab cab nej mus hauv tej tsev tu plaub los sad? 7 Lawv twb yog cov uas tuam mom lub npe zoo uas nej ris los sad? 8 Vajtswv txoj lus hais tias, “Koj yuav tsum hlub kwv tij zej zog ib yam li koj hlub koj tus kheej.” Yog nej twb coj tau Vaj Ntxwv nqe kev cai tseem ceeb no lawd ces nej yeej ua tau zoo heev. 9 Tiam sis yog nej tseem xaiv ntsej xaiv muag qees ces twb yog nej ua txhaum thiab txoj kev cai kuj suav tias nej ua txhaum lawm.

10 Yog leej twg lees coj txhua nqe hauv txoj Kev Cai, tiam sis nws ho hla ib nqes ces twb yog nws hla txhua nqe tib si lawm thiab. 11 Vajtswv sam hwm tias, “Tsis txhob deev luag poj luag txiv.”* Nws kuj sam hwm tias, “Tsis txhob tua neeg.” Yog nej tsis kam deev luag poj luag txiv,* tiam sis nej ho mus tua neeg ces twb yog nej hla txoj kev cai lawm. 12 Tej lus uas nej hais thiab tej yam uas nej ua yuav tsum raws li txoj kev cai uas tso neeg nyob ywj pheej, rau qhov Vajtswv yuav txiav txim rau nej raws li txoj kev cai ntawd. 13 Yog leej twg tsis hlub* luag ces thaum Vajtswv txiav txim los Nws yuav tsis hlub* tus ntawd thiab. Lub siab hlub* luag yuav kov yeej lub uas txiav txim rau luag.

14 Kuv cov kwv tij’e, yog leej twg hais tias nws muaj kev ntseeg tiam sis nws tes hauj lwm tsis qhia raws li ntawd ces puas muaj qab hau? Nws ntseeg li ntawd xwb, puas yuav cawm tau nws dim? 15 Yog ib tug kwv tij nkauj muam twg tsis muaj txaus noj txaus hnav 16 es nej hais rau nws tias, “Mus zoo koj, thov kom koj muaj txaus noj txaus hnav,” tiam sis nej ho tsis muab ib yam dab tsi pab nws ces tej uas nej hais puas muaj qab hau? 17 Tib yam li ntawd, txoj kev ntseeg uas tsis ua hauj lwm, yog txoj kev ntseeg uas tuag lawm.

18 Tej zaum ib tug yuav hais tias, “Koj yog tus muaj kev ntseeg tiam sis kuv yog tus ua hauj lwm. Sim qhia kuv seb koj txoj kev ntseeg uas tsis ua hauj lwm ho zoo li cas es kuv mam qhia kuv txoj kev ntseeg uas ua hauj lwm rau koj.” 19 Nej ntseeg tias muaj tib tug Vajtswv xwb no lod? Nej ntseeg li ntawd zoo heev. Txawm yog dab los, dab twb ntseeg tias muaj Vajtswv thiab, mas ua rau lawv ntshai tshee hnyo. 20 Tus neeg tsis muaj siab muaj ntsws’e, koj tsis paub lod? Txoj kev ntseeg uas tsis ua hauj lwm tsis muaj qab hau dab tsi li. 21 Twb yog peb yawg koob Anplahas tes hauj lwm es Vajtswv thiaj suav tias nws ncaj ncees. Rau qhov Anplahas yeem muab nws tus tub Ixaj fij rau saum lub thaj. 22 Anplahas txoj kev ntseeg thiab nws tes hauj lwm mus ua ke, thiab tes hauj lwm ntawd qhia tau tias nws muaj kev ntseeg tiag tiag. 23 Thiab tau muaj tiav raws li Vajtswv Txoj Lus hais tias, “Anplahas muaj kev ntseeg rau Vajtswv Yehauvas,* txoj kev ntseeg ntawd ua rau nws ncaj ncees.” Nws thiaj tau lub npe hu ua Vajtswv Yehauvas* tus kwv luag.*

24 Yog li ntawd, tsis yog kev ntseeg xwb yuav ua rau ib tug neeg ncaj ncees, tiam sis Vajtswv yeej saib nws tes hauj lwm thiab. 25 Ib yam li ntawd, Vajtswv suav tias tus niam ntiav Lahaj ncaj ncees vim nws tes hauj lwm. Lahaj zoo siab tos txais ob tug neeg soj teb chaws thiab qhia lwm txoj kev rau nkawd tawm mus. 26 Yog li ntawd, lub cev uas tsis muaj txoj pa* tuag li cas ces txoj kev ntseeg uas tsis ua hauj lwm kuj tuag ib yam li ntawd.

3 Kuv cov kwv tij’e, tsis yog nej txhua tus yuav ua tau cov uas qhia hauv lub koom txoos, rau qhov cov uas qhia yuav tau ris lub txim hnyav dua lwm cov. 2 Peb txhua tus ua yuam kev ntau zaus. Yog leej twg tsis tau hais lus yuam kev li ces nws kuj yog tus zoo kawg nkaus, thiab nws tswj tau nws lub cev txhua nrho. 3 Yog peb muab xauv los sam nees qhov ncauj ces peb yuav tswj tau nees mloog peb lus. 4 Thiab xav txog tej nkoj txwg. Txawm tej nkoj ntawd loj heev thiab muaj cua ntsawj hlob kawg li kom lub nkoj mus taus los, yeej muaj ib tug duav hlais dej me me los tswj lub nkoj mas tus tsav nkoj muab tus duav tig li cas ces tswj tau lub nkoj mus li ntawd.

5 Zoo ib yam li ntawd, tus nplaig yog ib yam me heev ntawm neeg lub cev xwb, tiam sis tus nplaig khav loj heev. Zoo ib yam li qhov nyuag nplaim taws me me xwb los muaj peev xwm zes tej hav zoov nuj txeeg kub hnyiab tag nrho. 6 Tus nplaig zoo li hluav taws ntag. Ntawm neeg lub cev, tus nplaig puv nkaus tej kev lim hiam uas muaj peev xwm ua puas tsuas lub cev tag nrho. Tus nplaig zoo li tej hluav taws hauv Kehenas* uas hlawv ib tug neeg lub neej puas tsuaj tas. 7 Neeg cob tau txhua yam tsiaj qus, tej tsiaj txawj nkag* txawj ya, thiab tej ntses hauv hiav txwv, mas neeg yeej ib txwm cob tsiaj kom seej li no los lawm. 8 Tiam sis tsis muaj leej twg yuav cob tau tus nplaig. Tus nplaig qus heev thiab txawj ua rau neeg raug mob, thiab puv nkaus tej taug lom neeg tuag. 9 Peb siv tus nplaig los qhuas peb Leej Txiv uas yog Vajtswv Yehauvas,* tiam sis peb ho siv tus nplaig los tsawm foom tib neeg, txawm tias Vajtswv tsim neeg “muaj yam ntxwv zoo li Vajtswv.” 10 Tej lus foom koob hmoov thiab tej lus foom phem tawm hauv tib lub qhov ncauj los.

Kuv cov kwv tij’e, ua li no yeej tsis ncaj kiag li. 11 Dej qab zib thiab dej iab puas txhawv hauv tib lub qhov dej los? 12 Kuv cov kwv tij’e, tsob txiv cev puas txi tau txiv aulib thiab tsob txiv hmab puas txi tau txiv cev? Thiab lub qhov dej ntsev yeej txhawv tsis tau dej ntshiab li los sad?

13 Nej cov leej twg muaj tswv yim thiab thoob tsib to nrog? Cia tus ntawd ua qauv zoo thiab muaj lub siab mos siab muag ua txhua yam, thiaj qhia tias nws muaj tswv yim. 14 Tiam sis yog nej leej twg muaj lub siab khib xeeb thiab pheej cov nyom luag* ces tsis txhob khav txog nej lub tswv yim, khav li ntawd yog dag xwb. 15 Lub tswv yim ntawd tsis yog los saum ntuj los tiam sis yog ntiaj teb li, coj li tej tsiaj txhu, thiab yog dab li tswv yim xwb. 16 Qhov twg muaj kev sib khib thiab sib cov nyom* ces yeej yuav muaj kev kub ntxhov thiab txhua yam phem qias.

17 Tiam sis lub tswv yim los saum ntuj los xub pab kom peb ua neeg dawb huv, mam li pab kom peb muaj kev sib haum xeeb, txawj zam rau luag, npaj txhij mloog lus, muaj lub siab puv npo kev khuv leej, ua tej hauj lwm zoo, tsis xaiv ntsej muag, thiab tsis ua siab nkhaus. 18 Tsis tas li ntawd, cov uas kho kom muaj kev sib haum xeeb zoo li tus uas tseb noob rau daim teb uas tiaj tus, thaum kawg lawv thiaj sau tau kev ncaj ncees.

4 Yog tim li cas es nej yuav sib cav sib ceg thiab ua rog heev ua luaj? Twb yog tej uas nej cev nqaij daim tawv ntshaw rov tawm tsam nej los sad? 2 Vim li ntawd, nej lub siab ntshaw los nej tsis tau. Nej ntxub ntxaug* luag thiab ntshaw luag tug los nej muab tsis tau los yuav. Nej sib cav sib ceg thiab ua rog tas li. Nej tsis tau vim nej tsis thov Vajtswv pub rau nej. 3 Txawm nej thov los nws tsis pub rau nej vim nej lub siab phem, thiab xav tau raws li nej cev nqaij daim tawv ntshaw xwb.

4 Nej cov uas tsis muab siab npuab Vajtswv,* nej tsis paub tias yog nej nrog lub qab ntuj ntaus phooj ywg ces twb yog nej nrog Vajtswv ua yeeb ncuab no lod? Yog leej twg xav nrog lub qab ntuj ntaus phooj ywg ces nws yeej yuav ua Vajtswv tus yeeb ncuab ntag. 5 Vajtswv Txoj Lus hais tias, “Vim peb kheev muaj lub siab khib, peb thiaj ntshaw ntau tsav ntau yam ua luaj.” Nej xav tias Vajtswv Txoj Lus lam qhia li no xwb lod? 6 Tiam sis zoo siab uas txoj kev hlub Vajtswv pub nplua mias tseem muaj hwj chim loj dua lub siab khib xeeb ntawd. Vajtswv Txoj Lus thiaj hais tias, “Vajtswv yuav tawm tsam cov uas khav theeb, tiam sis nws yuav pub kev hlub nplua mias rau cov uas txo hwj chim.”

7 Yog li ntawd, cia li zwm kiag rau Vajtswv es tawm tsam Ntxwg Nyoog, nws thiaj khiav ntawm nej mus. 8 Nej cia li txav ze Vajtswv mas nws yuav txav ze nej. Cov niag neeg txhaum, cia li ntxuav nej txhais tes kom huv. Nej cov uas ua ob lub siab, cia li ntxuav nej lub siab kom dawb huv. 9 Nej cia li nyuaj siab quaj ntsuag, ntxhov siab ntxhov plawv. Cia nej lub suab luag hloov ua lub suab quaj, thiab nej txoj kev xyiv fab ntxeev ua kev tu siab. 10 Nej cia li txo hwj chim zwm rau Vajtswv Yehauvas* mas nws yuav tsav hwj chim rau nej.

11 Cov kwv tij, cia li tseg, ib leeg tsis txhob hais lus nkaug ib leeg. Yog leej twg nkaug nws tus kwv tij, los sis txiav txim rau nws tus kwv tij ces twb yog nws hais lus saib tsis taus thiab thuam txoj kev cai ntag. Yog koj thuam txoj kev cai ces koj tsis yog tus coj txoj kev cai tiam sis koj nyob tus txiav txim chaw lawm. 12 Tsuas muaj tib tug ua Tus Rhawv Kev Cai thiab ua Tus Txiav Txim xwb. Nws yog tus muaj peev xwm cawm neeg dim thiab muab neeg rhuav tshem. Tiam sis koj ho yog leej twg es koj yuav txiav txim rau koj tus kwv tij zej zog?

13 Nej ib txhia hais tias, “Hnub no los sis tag kis peb yuav sawv kev mus rau lub nroog tod mas peb yuav nyob ib xyoos qhov ntawd, ua lag ua luam kom tau tshaj thawj.”* 14 Nej cov kod, nej twb tsis paub tias tag kis nej txoj sia yuav zoo li cas. Nej zoo ib yam li tej huab uas tsuas nyob ib pliag xwb txawm siv yaj tas lawm. 15 Tsim nyog nej hais tias, “Yog Vajtswv Yehauvas* pom zoo ces peb yuav muaj txoj sia nyob mus ua yam ub yam no.” 16 Tiam sis nej muab hlob thiab khav ntxhias txog nej tus kheej xwb. Nej khav li ntawd phem kawg li. 17 Yog leej twg paub ua qhov yog tiam sis nws tsis kam cev tes ua ces twb yog nws ua txhaum ntag.

5 Nej cov uas nplua nuj, cuab pob ntseg mloog, cia li tsa suab hlo quaj nyiav vim kev txom nyem tab tom yuav los raug nej. 2 Nej tej cuab txhiaj cuab tam muaj nqis lwj tas lawm, thiab nej tej khaub ncaws kab twb muab xwv* puas tas lawm. 3 Nej tej nyiaj tej kub xeb tas lawm, tej xeb ntawd yuav ua tim khawv tias nej muaj txim thiab yuav noj nej cev nqaij daim tawv. Tej uas nej muab khaws cia tsuas yog hluav taws hlawv rau hnub kawg xwb. 4 Nej tsis them cov tub zog uas nej ntiav los sau nej tej qoob loo mas lawv niaj hnub quaj thov Vajtswv pab. Vajtswv Yehauvas* yog tus coj cov tub txib saum ntuj, nws twb hnov lawv lub suab quaj lawm. 5 Nej ua neej nyob noj seem noj so phum lam ntsuav hauv lub ntiaj teb no. Twb yog nej pub* kom nej rog thiaj zoo muab nej tua li hnub uas luag tua tsiaj. 6 Nej twb rau txim thiab tua tus ncaj ncees* lawm. Nws* thiaj tawm tsam nej ntag.

7 Cov kwv tij’e, cia li ua siab ntev mus txog thaum peb tus Tswv rov los. Zoo li tus neeg ua liaj ua teb uas tos ntsoov lub caij uas tej qoob hlob mas nws ua siab ntev tos nag ntuj tshiab thiab nag ntuj tsaug. 8 Nej yuav tau rub lub siab ntev, ua siab loj thiab sawv ruaj nreeg rau qhov twb yuav txog lub sij hawm uas peb tus Tswv rov los.

9 Cov kwv tij’e, nej ib leeg tsis txhob yws yws ib leeg, nej thiaj tsis raug txim. Tus Txiav Txim twb sawv ntawm nej qhov rooj lawm. 10 Cov kwv tij, cia li xyaum tus qauv uas cov cev Vajtswv lus tseg rau nej. Lawv rub lub siab ntev tiv ntau yam kev txom nyem vim lawv ris lub npe Yehauvas* mus qhia sawv daws. 11 Cov uas ua siab ntev tiv kev txom nyem yog cov uas zoo siab. Nej twb hnov tias Yauj ua siab ntev tiv kev txom nyem, thiab nej twb pom tias Vajtswv Yehauvas* foom koob hmoov li cas rau nws. Vajtswv Yehauvas* yeej yog tus uas muaj lub siab hlub tshua thiab khuv leej kawg nkaus.

12 Yog li ntawd, kuv cov kwv tij’e, tseg tsis txhob twv ntuj twv teb thiab tus ub tus no lub npe los cog lus. Tiam sis nej hais tias nej yuav ua yam twg ces cia li ua xwb. Yog nej hais tias nej tsis ua ces txhob ua li, nej thiaj tsis raug txim.

13 Yog nej cov leej twg raug kev txom nyem, cia tus ntawd thov Vajtswv tsis tseg. Yog leej twg nyob kaj siab lug, cia tus ntawd hu nkauj qhuas Vajtswv. 14 Yog nej cov leej twg muaj mob, cia tus ntawd hu cov txwj laus hauv lub koom txoos tuaj thov Vajtswv pab nws. Cov txwj laus yuav tuav Vajtswv Yehauvas* lub npe muab roj pleev tus ntawd. 15 Vim cov txwj laus muaj kev ntseeg thov Vajtswv mas tus uas muaj mob* yuav zoo, thiab Vajtswv Yehauvas* yuav pub dag pub zog rau nws. Yog tus ntawd tau ua txhaum li cas, los Vajtswv yuav zam nws lub txim.

16 Yog li ntawd, nej ib leeg cia li lees txim rau ib leeg, thiab ib leeg thov Vajtswv rau ib leeg thiaj yuav kho tau nej zoo. Tus neeg ncaj ncees tej lus taij thov Vajtswv mas muaj hwj chim heev. 17 Eliyas yog ib tug neeg zoo ib yam* li peb sawv daws thiab xwb, los thaum nws taij thov Vajtswv kom txhob tso nag los ces lub ntuj txawm qhuav tau peb xyoos thiab rau lub hlis. 18 Tom qab ntawd nws ho thov Vajtswv dua, lub ntuj thiaj rov los nag thiab lub teb chaws rov tuaj qoob loo.

19 Kuv cov kwv tij’e, yog muaj ib tug twg yuam kev ntawm qhov tseeb lawd es lwm tus ho pab rub nws rov qab los 20 ces tus uas rub tau tus neeg txhaum rov qab los yuav cawm tau tus ntawd dim kev ploj kev tuag, thiab Vajtswv yuav zam nws tej kev txhaum ntau kawg li.