SAU RAU COV HENPLAIS

1 Puag thaum ub, muaj ntau zaus uas Vajtswv tau txib cov cev lus qhia peb tej yawg koob. Vajtswv siv ntau txoj kev los tshoov kom lawv qhia. 2 Nyob rau tiam uas yuav xaus no, nws ho txib nws tus Tub los qhia peb. Vajtswv tsa nws los saws ib puas tsav yam ua qub txeeg qub teg, thiab tau siv nws los tsim ib puas tsav yam nyob saum ntuj thiab hauv ntiaj teb no.* 3 Tus Tub no ci rau peb pom Vajtswv lub hwj chim ci ntsa iab thiab nws muaj tus yam ntxwv zoo ib yam nkaus li Vajtswv ntag. Nws siv Vajtswv tej lus muaj hwj chim los tuav ib puas tsav yam cia. Tom qab nws ntxuav peb tej kev txhaum tas, nws mus zaum ntawm Vajtswv tus muaj hwj chim siab kawg nkaus sab xis. 4 Yog li ntawd, tus Tub no thiaj zoo dua cov tub txib saum ntuj rau qhov nws tau lub npe* uas zoo tshaj lawv txhua tus.

5 Rau qhov Vajtswv yeej tsis tau hais rau ib tug tub txib saum ntuj twg tias, “Koj yog kuv tus tub thiab hnub no kuv yog koj txiv lawm,” los sis, “Kuv yuav ua nws txiv, thiab nws yuav ua kuv tus tub.” 6 Tiam sis thaum Vajtswv rov txib nws tus Tub Hlob los rau hauv lub ntiaj teb, nws hais tias, “Cia Vajtswv cov tub txib saum ntuj txhua tus hawm nws.”*

7 Nws* kuj hais txog cov tub txib saum ntuj li no tias, “Nws* tsim nws cov tub txib saum ntuj zoo li nthwv cua uas muaj zog heev,* thiab nws cov tub qhe* zoo li nplaim taws.” 8 Tiam sis hais txog nws tus Tub, nws ho hais tias, “Vajtswv yog koj lub rooj vaj ntxwv mus ib txhiab ib txhis,* thiab koj tus cwj vaj ntxwv yog tus cwj uas kav ncaj ncees. 9 Koj nyiam kev ncaj ncees thiab koj ntxub kev lim hiam. Twb yog vim li ntawd, Vajtswv uas yog koj tus Vajtswv, thiaj muab roj ywg rau koj, xaiv koj cia, ua rau koj xyiv fab tshaj koj cov kwv luag.” 10 Vajtswv Txoj Lus kuj hais tias, “Tus Tswv’e, thaum chiv keeb koj yog tus pua lub plag ntiaj teb, thiab koj ob txhais tes rhawv tsim lub ntuj. 11 Tej no yuav txawj puas tsuaj tiam sis koj yuav nyob ruaj khov mus li. Tej no zoo ib yam li lub tsho uas yuav txawj khaub 12 mas koj yuav muab lub ntuj lub teb kauv cia ib yam li kauv lub tsho ntev, thiab muab tej ntawd hloov ib yam li hloov tej tsoos tsho. Tiam sis koj tseem nyob li qub, thiab ib xyoos tas ib xyoos tuaj koj yuav nyob mus tsis muaj hnub kawg.”

13 Tiam sis Vajtswv yeej tsis tau hais rau cov tub txib saum ntuj ib tug twg tias, “Los zaum ntawm kuv sab xis mus txog thaum kuv muab koj cov yeeb ncuab ua lub tog rau koj tiag taw.” 14 Tag nrho cov tub txib saum ntuj* yeej ua Vajtswv tes hauj lwm thiab Vajtswv yeej txib lawv mus pab cov uas yuav dim los sad?

2 Twb yog vim li ntawd peb yuav tsum muab tej uas peb twb kawm los lawd, coj los ua tib zoo xav heev dua li yav tas los, xwv peb thiaj tsis yuam kev thiab txav deb zuj zus ntawm qhov tseeb. 2 Tej lus* uas Vajtswv kom cov tub txib saum ntuj qhia twb muaj tseeb lawm tiag, thiab txhua tus uas ua txhaum cai thiab tsis mloog lus twb raug txim li tsim nyog lawm. 3 Yog li ntawd, yog peb tsis quav ntsej txoj kev cawm dim zoo kawg nkaus no, peb tseem yuav dim tau thiab lod? Peb tus Tswv yog tus xub qhia txoj kev cawm dim no thiab cov uas tau hnov nws qhia twb lees tias muaj tseeb li nws hais tiag. 4 Vajtswv kuj nrog ua tim khawv tias muaj li lawv hais tiag. Nws thiaj pub lawv ua tej txuj ci tseem ceeb uas neeg xav tsis thoob,* ua ntau yam txuj ci loj kawg nkaus, thiab pub lub hwj huam dawb huv raws li nws pom zoo.

5 Rau qhov Vajtswv tsis tau tsa cov tub txib saum ntuj kav lub ntiaj teb* peb tab tom tham txog uas tseem yuav los. 6 Tiam sis tau muaj ib tug ua tim khawv hais tias, “Neeg yog leej twg es koj yuav nco txog nws, thiab neeg tus tub yog leej twg es koj ho saib xyuas nws? 7 Koj muab nws txo ib nyuag qis zog cov tub txib saum ntuj. Koj pub hwj chim ci ntsa iab thiab lub koob meej los ua lub kaus mom rau nws ntoo, thiab tsa nws los saib xyuas tej uas koj txhais tes tsim tseg. 8 Koj muab ib puas tsav yam tso rau hauv nws qab xib taws.” Thaum Vajtswv ua li no mas tsis tshuav ib yam uas nws yuav tsis kav li. Tiam sis peb tseem tsis tau pom nws kav ib puas tsav yam tam sim no. 9 Txawm li ntawd los, peb yeej pom Yexus tus uas Vajtswv tau muab txo ib nyuag qis zog cov tub txib saum ntuj, tau txais hwj chim ci ntsa iab thiab koob meej ua lub kaus mom ntoo, vim nws raug kev txom nyem thiab raug tua. Twb yog Vajtswv muaj kev hlub nplua mias, Yexus thiaj raug kev ploj kev tuag this txhua tus.

10 Ib puas tsav yam yog tsim los qhuas Vajtswv thiab twb yog muaj Vajtswv thiaj muaj tej ntawd. Yog li, tsim nyog nws cia tus Thawj* raug kev txom nyem kom tus ntawd thiaj zoo kawg nkaus rau txhua fab, xwv nws cov tub* thiaj tau koob meej. Vajtswv txib tus Thawj ntawd cawm lawv dim. 11 Yexus thiab cov uas nws ntxuav dawb huv lawd puav leej koom tib leeg txiv. Twb yog vim li ntawd, Yexus thiaj tsis txaj muag hu lawv ua nws cov kwv tij, 12 thiab nws hais tias, “Kuv yuav tshaj koj lub npe rau kuv cov kwv tij. Thiab kuv yuav hu nkauj qhuas koj hauv lub koom txoos.” 13 Nws kuj hais tias, “Kuv yuav tso siab plhuav rau Vajtswv.” Thiab nws hais ntxiv tias, “Kuv nrog cov me nyuam yaus uas Vajtswv Yehauvas* pub rau kuv nyob ntawm no.”

14 Yog li ntawd, vim cov “me nyuam yaus” no muaj roj muaj ntshav, nws thiaj yug los muaj roj muaj ntshav ib yam li lawv. Thaum nws tuag nws thiaj rhuav tau Dab Ntxwg Nyoog tus uas ua rau neeg raug kev ploj kev tuag. 15 Nws thiaj tso tau cov uas ib txwm poob cev qhev vim lawv ntshai kev ploj kev tuag kom dim plaws. 16 Rau qhov tsis yog nws pab cov tub txib saum ntuj tiam sis yog nws pab Anplahas xeeb ntxwv. 17 Yog li ntawd, nws yuav tsum yug los ua neeg thiab raug txhua yam li nws cov kwv tij, thaum nws ua Vajtswv tes hauj lwm nws thiaj paub hlub* neeg thiab ua tau ib tug tuam pov thawj hlob uas ncaj ncees. Nws thiaj pub tau nws txoj sia los daws neeg lub txim, kom lawv rov tau nrog Vajtswv sib haum xeeb. 18 Vim nws twb raug sim thiab raug kev txom nyem lawm, nws thiaj paub pab cov uas raug sim thiab.

3 Twb yog li ntawd, cov kwv tij dawb huv uas muaj feem mus saum ntuj, nej yuav tsum xav ntsoov txog Yexus, nws yog tus tub txib thiab tus tuam pov thawj hlob uas peb lees yuav. 2 Nws yeej npuab siab nraim rau Vajtswv tus uas tsa nws ua hauj lwm, ib yam li Mauxes npuab siab nraim rau Vajtswv thaum nws ua hauj lwm rau Vajtswv cuab neeg.* 3 Yeej tsim nyog nws* tau koob meej dua Mauxes rau qhov tus kws ua lub tsev yeej tau koob meej dua lub tsev. 4 Peb yeej paub tias, txhua txhua lub tsev yuav tsum muaj ib tug tsim, tiam sis tus uas tsim ib puas tsav yam yog Vajtswv. 5 Mauxes yeej yog ib tug tub qhe ncaj ncees hauv Vajtswv cuab neeg.* Nws tes hauj lwm ua pov thawj txog tej uas tseem yuav tshwm sim tom hauv ntej. 6 Tiam sis Khetos yog leej tub ncaj ncees uas ua tus saib xyuas Vajtswv cuab neeg.* Peb yog Vajtswv cuab neeg* ntag, yog peb ua siab tawv qhawv qhia thiab tuav rawv txoj kev cia siab uas peb khav tau mus txog thaum kawg.

7 Yog li ntawd, lub hwj huam dawb huv tshoov* kom sau li no, “Hnub no yog nej mloog tej uas kuv hais, 8 nej tsis txhob tawv ncauj li thaum nej cov yawg koob tau ua rau kuv npau taws heev, thiab thaum lawv sim kuv hauv teb chaws moj sab qhua. 9 Txawm tias nej cov yawg koob twb pom kuv txhais tes pab lawv hauv moj sab qhua tau 40 lub xyoos los, lawv tseem twm kuv thiab sim kuv qees. 10 Twb yog vim li ntawd kuv thiaj dhuav tiam neeg no thiab hais tias, ‘Lawv ib txwm ua ywj siab, thiab lawv tsis paub kuv lub siab li.’ 11 Kuv thiaj cog lus npau taws vog tias, ‘Lawv yuav tsis tau nrog kuv so.’”

12 Cov kwv tij’e, nej yuav tsum ceev faj nyob tsam nej ho txhob txwm tso Vajtswv tus uas muaj sia zees nyob tseg, thiab xeeb lub siab phem uas tsis muaj kev ntseeg. 13 Tiam sis ib leeg txhawb ib leeg txhua txhua hnub thaum tseem hu tau tias yog “Hnub no,” xwv nej thiaj tsis muaj ib tug twg raug kev txhaum lub hwj chim ntxias mus ua neeg tawv ncauj. 14 Rau qhov peb tsuas muaj feem koom nrog Khetos yog tias peb tuav txoj kev cia siab uas peb muaj thaum peb xub los ntseeg, ruaj khov mus txog thaum kawg. 15 Vajtswv txoj lus twb hais tias, “Hnub no yog nej mloog tej uas kuv hais ces tsis txhob tawv ncauj li thaum nej cov yawg koob tau ua rau kuv npau taws heev.”

16 Leej twg yog cov uas hnov Vajtswv qhia tiam sis lawv tseem ua rau nws npau taws heev thiab? Twb yog cov uas nrog Mauxes tawm hauv Iyiv teb chaws los ntag. 17 Tsis tas li ntawd, Vajtswv dhuav leej twg tau 40 lub xyoos? Twb yog cov uas ua txhaum thiab tuag rau hauv teb chaws moj sab qhua ntag. 18 Thiab leej twg yog cov uas Vajtswv cog lus hais tias yuav tsis tau nrog nws so? Twb yog cov uas tsis mloog nws lus ntag. 19 Yog li ntawd, peb pom tias lawv tsis tau nrog Vajtswv so, twb yog lawv tsis muaj kev ntseeg ntag.

4 Tseem muaj lo lus cog tseg tias peb yuav tau nrog Vajtswv so, yog li ntawd, cia peb sawv daws ceev faj tsam peb tu ncua qho yam es ho tsis tau nrog nws so. 2 Twb muaj neeg muab txoj xov zoo tshaj tawm rau peb, ib yam li tau muab tshaj tawm rau lawv lawm. Tiam sis txoj xov uas lawv hnov tsis muaj qab hau rau lawv vim lawv tsis muaj kev ntseeg li cov uas mloog lus. 3 Vajtswv twb hais li no txog peb cov yawg koob tias, “Kuv cog lus npau taws vog tias, ‘Lawv yeej yuav tsis tau nrog kuv so.’” Txawm Vajtswv twb ua hauj lwm tiav thiab so txij thaum ntuj tsim teb raug lawm los, nws tseem hais li ntawd. Yog li ntawd, peb cov uas muaj kev ntseeg yeej yuav tau nrog nws so. 4 Tau muaj ib nqes uas Vajtswv hais li no txog hnub 7 tias, “Thiab hnub 7, Vajtswv so txhua yam hauj lwm uas nws tau ua.” 5 Thiab nws ho hais dua hauv lwm nqe tias, “Lawv yuav tsis tau nrog kuv so.”

6 Yog li ntawd, ib txhia tseem yuav tau nrog Vajtswv so, tiam sis cov uas xub hnov txoj xov zoo tsis tau nrog nws so vim lawv tsis mloog lus. 7 Puag tom qab no hauv Daviv zaj nkauj, Vajtswv thiaj teem dua ib hnub cia, hu ua “Hnub no.” Nws hais ib yam li tau hais tas los no tias, “Hnub no yog nej mloog kuv lus ces tsis txhob tawv ncauj.” 8 Yog tias Yausuas twb coj haiv neeg Ixayees mus txog qhov chaw uas tau nrog Vajtswv so lawm ces tom qab no Vajtswv yeej yuav tsis hais dua txog lwm hnub ntxiv. 9 Yog li ntawd, yeej tseem muaj ib hnub so zoo li hnub Xanpataus rau Vajtswv cov tib neeg. 10 Tus uas tau nrog Vajtswv so kuj yuav tau so nws tes hauj lwm, ib yam li Vajtswv tau so nws tes hauj lwm.

11 Yog li ntawd, cia peb peem tiag kom peb tau nrog Vajtswv so, peb thiaj tsis muaj ib tug mus xyaum lawv tus qauv tsis mloog lus. 12 Rau qhov Vajtswv txoj lus ciaj sia, thiab muaj hwj chim kawg li, ntse dua rab ntaj ob sab ntse thiab nkaug mus txog nruab siab nruab plaw thiaj qhia tau tias tus neeg sab hauv txawv tus sab nraud li cas, nkaug mus txog tej pob qej txha thiab tej hlwb txha, thiab tshuaj tau tej uas neeg xav thiab paub tej uas neeg lub siab ntshaw. 13 Tsis muaj ib yam dab tsi uas yuav nraim tau ntawm Vajtswv, tiam sis ib puas tsav yam yeej nyob cuab tha lug rau tus uas yuav txiav txim rau peb tes hauj lwm.

14 Vim peb muaj ib tug tuam pov thawj hlob zoo tshaj cov tib si uas twb mus txog kiag saum ntuj ceeb tsheej lawm, tus ntawd yog Vajtswv tus Tub Yexus, mas cia peb tau hau ntsoov tshaj tawm peb txoj kev ntseeg txog nws. 15 Tsis yog peb muaj ib tug tuam pov thawj hlob uas tsis paub tias peb txawj qaug zog, tiam sis peb tus tuam pov thawj hlob twb raug sim txhua fab ib yam li peb thiab, tsuas yog nws tsis muaj kev txhaum xwb. 16 Yog li ntawd, cia peb mus cuag Vajtswv lub rooj zaum thiab tsis txhob ntshai thov nws rau qhov nws yog tus muaj kev hlub nplua mias. Peb thiaj pom tias nws khuv leej peb thiab muaj kev hlub nplua mias xav pab peb raws caij raws nyoog.

5 Txhua tus txiv neej uas raug tsa los ua tus tuam pov thawj hlob, yog los saib xyuas Vajtswv tes hauj lwm pab cov tib neeg. Nws thiaj ua tus muab khoom pub thiab khoom fij daws neeg lub txim. 2 Nws ua tau lub siab mos siab muag pab cov uas ua txhaum vim lawv tsis paub dab tsi, rau qhov nws paub tias nws kuj txawj ua txhaum* thiab. 3 Twb yog li ntawd nws thiaj yuav tsum muab khoom fij daws nws lub txim, ib yam li nws muab daws cov tib neeg thiab.

4 Tsis muaj ib tug twg yuav rov tsa nws tus kheej ua tus tuam pov thawj hlob, tsuas yog Vajtswv thiaj tsa tau nws ua xwb, ib yam li Vajtswv tau tsa Aloos ntag. 5 Ib yam li ntawd, Khetos tsis yog tus tsav meej mom rau nws tus kheej ua tus tuam pov thawj hlob, tiam sis Vajtswv yog tus tsav meej mom rau nws. Vajtswv twb hais rau Khetos tias, “Koj yog kuv tus tub mas hnub no kuv ua koj txiv lawm.” 6 Nws kuj hais hauv lwm nqe tias, “Koj yuav ua pov thawj ib yam li Mekhixedes* thiab yuav ua pov thawj mus ib txhis.”

7 Thaum Khetos tseem nyob hauv ntiaj teb no, nws thov thiab kuj taij thov Vajtswv,* tsa suab hlo quaj kua muag si laim. Nws thov Vajtswv tus uas cawm tau nws dim txoj kev tuag mas Vajtswv txaus siab mloog nws tej lus thov rau qhov nws paub ntshai Vajtswv. 8 Txawm nws yog Vajtswv tus tub los, twb yog nws tiv kev txom nyem nws thiaj paub mloog lus.* 9 Tom qab nws mloog lus rau txhua fab lawd,* nws thiaj ua tus pab kom txhua tus uas mloog nws lus tau kev cawm dim mus ib txhis. 10 Nws ua tau li no rau qhov Vajtswv twb tsa nws ua tus tuam pov thawj hlob ib yam li Mekhixedes lawm.

11 Muaj ntau yam uas peb yuav qhia txog Khetos rau nej, tiam sis ceeb laj piav vim nej tsis mob siab kawm.* 12 Nim no twb tsim nyog nej ua taus xib hwb qhia lwm tus lawm, tiam sis nej tseem cheem tsum ib tug muab Vajtswv tej lus qhia tom hauv paus tuaj rau nej dua. Nej zoo li tus uas yuav tsum rov noj mis es noj tsis taus mov tawv. 13 Rau qhov txhua tus uas noj mis tseem yog me nyuam mos, nws tsis tau paub Vajtswv txoj lus ncaj ncees. 14 Tsuas yog cov uas hlob tiav* lawd thiaj noj taus mov tawv. Vim lawv niaj hnub xyaum ua neeg thoob tsib, lawv thiaj paub cais qhov zoo qhov phem.

6 Yog li ntawd, peb twb kawm dhau lub hauv paus txog Khetos lawm. Cia peb peem tiag mus lawm yav tom hauv ntej kom peb hlob tiav. Tsis yog peb yuav rov mus pua lub plag tsev dua es rov kawm tom hauv paus tuaj tias yuav tsum hloov dua siab tshiab es tso tej hauj lwm tsis muaj qab hau* tseg. Thiab rov kawm tias yuav tsum muaj kev ntseeg rau Vajtswv, 2 kawm txog tej kev cai raus dej, kawm txog qhov uas tsa tes npuab lwm tus, kawm tias cov tuag yuav ciaj sawv rov los, thiab kawm txog Vajtswv tej lus txiav txim uas nyob mus ib txhis. 3 Yog Vajtswv pom zoo ces peb yeej yuav peem tiag mus kom hlob tiav li no.

4 Muaj ib txhia twb txais yuav qhov kaj, lawv twb txais yam uas pub dawb saum ntuj los, thiab tau txais lub hwj huam dawb huv lawm. 5 Lawv twb txais Vajtswv txoj lus uas zoo kawg nkaus lawm, thiab twb pom tej koob hmoov* uas tseem yuav muaj rau lub sim ceeb* tom hauv ntej lawm, 6 los lawv tseem tso qhov no tseg lawm thiab. Tsis muaj leej twg yuav rub tau cov ntawd kom rov los hloov dua siab tshiab ib zaug li, vim yog lawv rov muab Vajtswv tus Tub ntsia dua rau saum tus ncej ntoo,* thiab rhuav nws ntsej muag tab meeg ib tsoom sawv daws. 7 Tib neeg zoo ib yam li thaj av. Thaum thaj av nqus dej nag thawm niaj thawm xyoo yeej yuav ua rau tej qoob loo tawg paj txi txiv rau cov neeg ua liaj ua teb noj. Twb yog Vajtswv foom koob hmoov rau thaj av no ntag. 8 Tiam sis yog thaj av ntawd tuaj nroj tuaj pos xwb ces yuav muab thaj av ntawd tso tseg. Tsis ntev xwb Vajtswv yuav foom phem rau thaj av ntawd thiab thaum kawg muab hlawv pov tseg.

9 Tiam sis cov kwv tij uas peb hlub, txawm peb hais li no los peb yeej ntseeg tias nej coj tau zoo dua lawv cov ntawd, vim nej ua tej uas yuav cawm tau nej dim. 10 Rau qhov Vajtswv yog tus ncaj ncees,* nws yeej nco ntsoov tes hauj lwm uas nej tau ua, thiab qhov uas nej saib nws lub npe muaj nqis, nej thiaj zoo siab hlo pab cov uas dawb huv thiab tseem niaj hnub pab qees. 11 Tiam sis peb xav kom nej txhua tus nquag plias ib yam li thaum xub pib, xwv nej txoj kev cia siab thiaj cog ruaj khov mus txog thaum kawg. 12 Nej thiaj tsis ua neeg tub nkeeg tiam sis xyaum cov uas tau txais tej lus cog tseg vim lawv muaj kev ntseeg thiab ua lub siab ntev.

13 Thaum Vajtswv cog lus rau Anplahas, nws rov tuav nws lub npe cog lus rau qhov tsis muaj ib tug twg uas loj dua nws lawm. 14 Nws cog lus tias, “Kuv yeej yuav foom koom hmoov rau koj thiab yeej yuav pub koj muaj xeeb leej xeeb ntxwv huam vam coob heev.” 15 Thaum Anplahas ua siab ntev tos, nws thiaj tau tej uas Vajtswv cog tseg no. 16 Thaum neeg cog lus mas lawv yeej tuav ib tug uas muaj hwj chim loj dua lawv lub npe los cog lus. Qhov ntawd ua puav pheej tias tej lus cog tseg ntawd muaj tseeb tiag, thiaj tsis muaj leej twg cam tau li. 17 Ib yam li ntawd, Vajtswv xav kom cov uas yuav txais tej lus cog tseg haj yam paub tseeb tias nws lub ntsiab yeej tsis hloov li, nws thiaj tuav nws lub npe cog lus ua puav pheej tias yuav muaj li ntawd tiag. 18 Qhov uas Vajtswv cog lus thiab tuav nws lub npe ua puav pheej yuav tsis txawj hloov li mas Vajtswv tsis txawj dag. Ob yam no ua rau peb cov uas khiav los nkaum hauv Vajtswv, tso siab plhuav tias peb yuav tsum tuav rawv txoj kev vam uas nws tau pub rau peb lawm. 19 Peb txoj kev vam no yeej zoo li lub thauj nres nkoj uas tuav peb* ruaj khov tsis txav li. Txoj kev vam no coj peb hla dhau daim ntaub thaiv uas quas ob chav. 20 Yexus twb npaj kev rau peb, nws ua peb ntej hla dhau plaws mus lawm. Thiab nws twb ua tus tuam pov thawj hlob ib yam li Mekhixedes thiab yuav ua pov thawj mus ib txhis.

7 Tus Mekhixedes no yog tus vaj ntxwv kav lub nroog Xalees thiab yog Vajtswv tus loj dua ntais tus pov thawj. Nws tuaj ntsib Anplahas rau thaum Anplahas mus tua yeej cov vaj ntxwv rov qab los thiab nws foom koob hmoov rau Anplahas. 2 Yog li ntawd, Anplahas thiaj faib ib feem kaum ntawm txhua yam uas txeeb tau los pub rau nws. Mekhixedes lub npe txhais tias, “Tus Vaj Ntxwv Ncaj Ncees.” Nws kuj ua vaj ntxwv kav lub nroog Xalees, yog li, nws yog “Tus Vaj Ntxwv Txhawb Kev Sib Haum Xeeb.” 3 Tsis muaj leej twg paub nws niam nws txiv, paub nws caj nws ces, thiab paub nws hnub yug hnub tuag. Nws thiaj zoo ib yam li Vajtswv tus Tub thiab ua pov thawj mus ib txhiab ib txhis.

4 Tus yawg no muaj meej mom siab kawg li, peb yawg koob Anplahas thiaj zoo siab hlo muab qhov zoo tshaj uas txeeb tau los, ib feem kaum, faib rau nws. 5 Raws li txoj Kev Cai, Levis caj ces uas tuav hauj lwm ua pov thawj, muaj cai sau ib feem kaum ntawm Vajtswv cov tib neeg uas yog lawv cov kwv tij, txawm tias cov kwv tij ntawd yog Anplahas xeeb ntxwv thiab. 6 Tiam sis tus yawg no twb tsis yog Levis caj ces, los nws ho txais ib feem kaum ntawm Anplahas mus. Nws tseem foom koob hmoov rau Anplahas tus uas Vajtswv cog lus rau thiab. 7 Tus uas foom koob hmoov yeej muaj hwj chim siab dua tus uas txais koob hmoov, tsis muaj leej twg yuav cam tau qhov no. 8 Tsis tas li ntawd, cov Levis sau ib feem kaum tiam sis lawv yog neeg txawj ploj txawj tuag, hos tus yawg tod sau ib feem kaum tiam sis Vajtswv Txoj Lus ua tim khawv tias nws tseem ciaj sia nyob.* 9 Thiab peb kuj hais tau ntxiv tias, Anplahas them ib feem kaum lawm ces cuag li Levis tus uas sau ib feem kaum, twb them lawm thiab, 10 rau qhov thaum Levis yawg koob Anplahas ntsib Mekhixedes, nws tseem nyob hauv Anplahas tej roj ntsha.

11 Txoj Kev Cai uas cov Ixayees coj muaj kab ke kom tsa xeem Levis los ua pov thawj. Yog xeem Levis cov pov thawj pab tau kom neeg zoo kawg nkaus tsis muaj txim tiag, puas tsim nyog tsa dua ib tug pov thawj zoo li Mekhixedes? Tus pov thawj uas zoo li Aloos kuj zoo txaus lawd? 12 Yog twb hloov txoj kab ke ua pov thawj lawm ces yuav tsum hloov txoj Kev Cai thiab. 13 Vim tus uas peb hais txog no, los ntawm lwm xeem uas tsis muaj feem ua hauj lwm ntawm lub thaj. 14 Peb yeej paub tseeb tias peb tus Tswv Yexus yog Yudas caj ces, thiab Mauxes yeej tsis tau hais tias xeem Yudas yuav muaj tus ua pov thawj li.

15 Peb haj yam pom tseeb li no vim muaj dua ib tug pov thawj uas zoo li Mekhixedes lawm. 16 Nws tau ua pov thawj vim nws muaj lub hwj chim uas tau txoj sia tsis txawj puas tsuaj, tsis yog vim nws los ntawm caj ces uas txoj Kev Cai sam hwm tseg. 17 Twb muaj lus ua tim khawv txog nws tias, “Koj yuav ua pov thawj ib yam li Mekhixedes thiab ua pov thawj mus ib txhis.”

18 Yog li ntawd, thiaj tsim nyog tso tej kev cai qub tseg vim tej kev cai ntawd tsis muaj hwj chim thiab pab tsis tau peb lawm. 19 Tos hais li ntawd los, txoj Kev Cai pab tsis tau kom zoo kawg nkaus. Tiam sis txoj kev vam zoo dua uas Vajtswv pub yeej pab tau, thiab pab kom peb tau nrog Vajtswv sib raug zoo. 20 Tsis tas li ntawd, Yexus raug tsa ua pov thawj vim Vajtswv tuav Vajtswv lub npe cog lus ua puav pheej tias yuav muaj li ntawd. 21 (Yeej muaj ib txhia raug tsa ua pov thawj, los Vajtswv tsis tuav nws lub npe cog lus ua puav pheej rau lawv. Tiam sis Yexus tau ua pov thawj rau qhov Vajtswv yeej tuav Vajtswv lub npe cog lus ua puav pheej tias, “Kuv yog Vajtswv Yehauvas,* kuv twb cog lus lawm mas kuv yeej tsis hloov siab, ‘Koj yuav tau ua pov thawj mus ib txhis.’”) 22 Twb yog vim li ntawd, Vajtswv thiaj muab Yexus los ua kiag qhov puav pheej tias muaj ib lo lus cog tseg zoo dua uas yuav tsum muaj tiav. 23 Tsis tas li ntawd, ib tiam dhau ib tiam, Aloos caj ces muaj coob tus ua pov thawj vim lawv txawj ploj txawj tuag thiaj ua tsis tau pov thawj mus li. 24 Tiam sis Yexus muaj txoj sia nyob mus ib txhis, tes hauj lwm ua pov thawj thiaj tsis poob mus rau lwm tus. 25 Yexus thiaj cawm tau cov uas tuav nws lub npe mus cuag Vajtswv tiag tiag, rau qhov nws muaj txoj sia nyob mus li, nws thiaj thov tau Vajtswv pab lawv.

26 Tsim nyog peb muaj tus tuam pov thawj hlob uas muab siab npuab Vajtswv, dawb huv,* tsis muaj ib qho phem li, tsis zoo li cov neeg txhaum,* thiab nyob siab tshaj ntuj ceeb tsheej.* 27 Yexus tsis zoo li tej tuam pov thawj hlob. Tsis tas nws yuav niaj hnub tua tsiaj daws nws lub txim ua ntej mam li daws cov tib neeg lub txim. Tiam sis nws tsuas muab nws tus kheej los xyeem tib zaug xwb ces twb pab tau tib neeg mus ib txhis lawm. 28 Txoj Kev Cai sam hwm kom tsa cov neeg uas txawj ploj txawj tuag los ua tus tuam pov thawj hlob. Tiam sis tom qab txoj Kev Cai, Vajtswv tuav nws lub npe cog lus ua puav pheej tias nws yuav tsa nws tus Tub los ua tus tuam pov thawj hlob mas tus Tub ntawd twb ua tau txhua yam zoo kawg nkaus raws li Vajtswv pom zoo mus ib txhis lawm.

8 Nov yog lub ntsiab tseem ceeb uas peb tab tom tham tias, tus no yog peb tus tuam pov thawj hlob ntag. Nws twb zaum ntawm Vajtswv tus muaj hwj chim siab kawg nkaus lub rooj zaum sab xis uas nyob saum ntuj ceeb tsheej lawm. 2 Nws yog tus tub qhe* ua hauj lwm ntawm Chav Dawb Huv Kawg Nkaus hauv lub tseem tsev ntaub. Lub tsev ntaub no tsis yog neeg tsa tiam sis yog Vajtswv Yehauvas* ua tus tsa. 3 Txhua tus tuam pov thawj hlob yog tsa los muab khoom pub thiab muab khoom fij rau Vajtswv. Yog li ntawd, yeej tsim nyog tus tuam pov thawj hlob no muab khoom los pub thiab. 4 Yog tias nws nyob hauv ntiaj teb, nws yuav tsis ua pov thawj, rau qhov twb muaj cov ua pov thawj muab khoom pub raws li txoj Kev Cai rau Vajtswv lawm. 5 Cov pov thawj no ua ib teg hauj lwm dawb huv uas tsuas ua piv txwv thiab ua duab txog tej uas nyob saum ntuj ceeb tsheej xwb. Ib yam li thaum Mauxes tseem yuav ua lub tsev ntaub, Vajtswv sam hwm tias, “Cia li ua txhua yam raws li tus qauv uas kuv twb qhia rau koj saum roob lawm.” 6 Tiam sis nim no Yexus twb ua ib teg hauj lwm zoo tshaj lawm, rau qhov nws yog tus nyob nruab nrab ntawm ib lo lus cog tseg uas zoo dua txoj qub. Lo lus cog tseg ntawd yog tsa raws li kev cai, thiab muaj tej lus cog tseg uas zoo dua los txheem.

7 Yog thawj lo lus cog tseg twb zoo txaus lawm ces tsis tas yuav muaj dua lwm lo lus cog tseg lawd. 8 Tiam sis Vajtswv yeej pom tias cov tib neeg zoo tsis txaus. Vim li ntawd “Vajtswv Yehauvas* hais tias, ‘Tshuav tsis ntev xwb kuv yuav nrog cov Ixayees thiab cov Yudas sib cog lus tshiab. 9 Lo lus cog tseg no yuav txawv lo lus cog tseg uas kuv hais rau lawv cov yawg koob hnub uas kuv tuav lawv tes coj lawv tawm hauv teb chaws Iyiv mus, rau qhov lawv tsis khaws kuv lo lus cog tseg, kuv thiaj tsis quav ntsej lawv lawm.’ Vajtswv Yehauvas* yog tus hais tej lus ntawd.

10 “Vajtswv Yehauvas* hais tias, ‘Nov yog lo lus cog tseg uas kuv yuav hais rau cov Ixayees tom qab lub sij hawm ntawd. Kuv yuav ua kom lawv cim tau kuv tej kev cai thiab muab sau rau hauv lawv nruab siab nruab plaw. Kuv yuav yog lawv tus Vajtswv thiab lawv yuav ua kuv haiv neeg.

11 “‘Thaum ntawd lawv yuav tsis tas qhia ib tsoom pej xeem thiab lawv tej kwv tij neej tsa hais tias, “Koj yuav tsum kawm txog Vajtswv Yehauvas!”* Rau qhov lawv txhua tus yuav paub kuv, tsis hais tus hlob tus yau tib si. 12 Kuv yuav zam txim* rau lawv tej kev txhaum, thiab kuv yuav tsis nco txog lawv lub txim hlo li lawm.’”

13 Thaum Vajtswv hais tias nov yog “ib lo lus cog tseg tshiab,” ces twb yog nws hais tias lo lus cog tseg nram ntej qub lawm. Yam uas qub lawd, khaub hlab zuj zus, tsis ntev xwb yuav ploj mus.

9 Lo lus cog tseg qub muaj tej kab ke uas cov tib neeg yuav tsum coj rau thaum lawv pe hawm Vajtswv, thiab muaj lub tsev ntaub* nyob hauv ntiaj teb no. 2 Lawv tsa lub tsev ntaub muaj ob chav. Thawj chav muaj tus ncej txawb teeb, lub rooj, thiab cov ncuav uas fij rau Vajtswv lawm.* Chav no hu ua Chav Dawb Huv. 3 Muaj dua ib daim ntaub kem chav sab tod, chav ntawd hu ua Chav Dawb Huv Kawg Nkaus. 4 Hauv chav no muaj lub yias kub hlawv hmoov tshuaj tsw qab, thiab muaj lub phij xab sib cog lus uas vuam kub thoob plaws. Hauv lub phij xab muaj ib lub hub kub me me uas ntim manas, muaj Aloos tus pas nrig uas nthaw cos paj, thiab ob daim txiag zeb uas txaug Vajtswv tej kev cai.* 5 Muaj ob tug khelunpees* vuam kub uas ci ntsa iab nthuav tis roos lub hau phij xab uas ntxuav kev txhaum. Tiam sis tam sim no tsis yog lub caij yuav tham txhij tham txhua txog tej no.

6 Thaum lawv ua tiav lub tsev ntaub li no lawd, cov pov thawj niaj hnub nkag mus ua Vajtswv tes hauj lwm hauv thawj chav. 7 Tiam sis tus tuam pov thawj hlob tib leeg thiaj mus tau rau hauv chav ob, ib xyoos tsuas muaj ib hnub uas nws mus tau xwb. Hnub ntawd nws yuav tsum nqa ntshav mus fij rau hauv los ntxuav nws tej kev txhaum thiab ntxuav cov pej xeem tej kev txhaum uas tsis yog lawv txhob txwm ua. 8 Yog li ntawd, lub hwj huam dawb huv yeej qhia meej tias, thaum tseem muaj lub tsev ntaub ces tsis tau muaj tus coj lawv kev mus rau hauv Chav Dawb Huv Kawg Nkaus. 9 Lub tsev ntaub ua piv txwv txog lub caij tam sim no. Raws li txoj kab ke no mas yuav tsum muab khoom pub thiab khoom fij rau Vajtswv. Tiam sis tej no ntxuav tsis tau kom cov tib neeg uas ua Vajtswv tes hauj lwm, muaj lub siab dawb paug tsis nkaug lawv li lawm. 10 Tej kab ke no tsuas hais txog tej kev noj kev haus, thiab tej kev cai ntxuav xwb. Tej kab ke no yog tej uas cov tib neeg yuav tsum ua ntawm sab nqaij tawv thiaj li raws kev raws cai. Lawv tsuas coj tej kab ke no mus txog lub sij hawm uas teem cia los kho kom ib puas tsav yam ncaj xwb.

11 Tiam sis thaum Khetos los ua tus tuam pov thawj hlob, peb twb tau txais koob hmoov nplua mias lawm. Thaum nws ua tus tuam pov thawj hlob nws nkag rau hauv lub tsev ntaub zoo tshaj thiab zoo kawg nkaus uas tsis yog neeg txhais tes ua, thiab tsis nyob hauv ntiaj teb no. 12 Thaum nws nkag rau hauv Chav Dawb Huv Kawg Nkaus, tsis yog nws nqa ntshav tshis, ntshav thav nyuj mus fij, tiam sis nws nqa nws cov ntshav kiag. Nws ua li no tib zaug xwb, cawm tau peb dim mus ib txhis lawm. 13 Yog tias tej ntshav tshis, ntshav heev nyuj, thiab tej tshauv xyuas nyuj* uas muab nphoo rau cov neeg qias twb ntxuav tau lawv cev nqaij daim tawv dawb huv lawm ces 14 Khetos cov ntshav haj yam ntxuav tau kom peb dawb huv. Nws ua raws li lub hwj huam dawb huv uas nyob mus ib txhis coj, nws thiaj muab nws lub cev uas tsis muaj ib qho txhaum li fij rau Vajtswv. Nws cov ntshav ntxuav tau kom peb muaj lub siab dawb huv tsis nkaug peb vim peb tso tej hauj lwm tsis muaj qab hau tseg lawm. Peb thiaj ua tau Vajtswv tus muaj sia zees nyob tes hauj lwm.

15 Twb yog vim li ntawd nws thiaj yog tus nyob nruab nrab hauv lo lus cog tseg tshiab. Nws ua li ntawd, Vajtswv thiaj cog lus rau cov uas raug xaiv tias lawv yuav tau txais qub txeeg qub teg mus ib txhis. Muaj tau li no vim nws twb tuag lawm, thiaj muaj tus nqi txhiv los them tej kev txhaum uas lawv tau ua thaum lawv tseem coj raws li lo lus cog tseg qub. 16 Thaum neeg nrog Vajtswv sib cog lus mas yuav tsum muaj nqaij ntuag ntshav nrog. 17 Yuav tsum muaj ib tug tuag li no ua lub cim nias rau lo lus cog tseg. Yog tsis muaj nqaij ntuag ntshav nrog ces lo lus cog tseg yuav siv tsis tau. 18 Thawj lo lus cog tseg los kuj yuav tsum muaj nqaij ntuag ntshav nrog nias cim rau thiaj siv tau. 19 Thaum Mauxes qhia txhua lo hauv txoj Kev Cai rau ib tsoom neeg tas, nws txawm muab ntshav thav nyuj thiab ntshav tshis los tov dej. Nws mam li muab cov ntaub plaub yaj liab liab* los khi ib re nroj* los tub cov ntshav thiab muab nchos rau kauj ntawv thiab rau cov tib neeg tag nrho. 20 Thiab nws hais tias, “Nov yog cov ntshav nias cim rau lo lus cog tseg uas Vajtswv sam hwm kom nej coj.” 21 Nws kuj muab cov ntshav nchos rau lub tsev ntaub thiab rau tej twj taig uas siv los pe hawm Vajtswv. 22 Raws li txoj Kev Cai, ntshav ntxuav yuav luag tau txhua yam thiab yog tsis muaj nqaij ntuag ntshav nrog, Vajtswv yuav zam tsis tau neeg lub txim.

23 Yog li ntawd, yuav tsum ua li no es muab ntshav tsiaj los ntxuav yam uas ua piv txwv txog tej yam nyob saum ntuj. Tiam sis yuav tsum muab yam uas zoo dua ntawd los fij, thiaj ntxuav tau yam uas nyob saum ntuj. 24 Rau qhov tsis yog Khetos nkag rau hauv Chav Dawb Huv Kawg Nkaus uas tib neeg txhais tes ua. Chav ntawd tsuas piv txwv txog yam uas nyob saum ntuj xwb. Zaum no nws nkag kiag mus rau saum ntuj ceeb tsheej, nws thiaj sawv tau rau ntawm Vajtswv thiab thov Vajtswv pab peb. 25 Tsis yog nws yuav tsum muab nws tus kheej los fij tas zog, zoo li tej tuam pov thawj hlob uas niaj xyoo nkag rau hauv Chav Dawb Huv Kawg Nkaus mus fij tej ntshav tsiaj.* 26 Yog tias muaj li ntawd ces txij thaum ntuj tsim teb raug los, nws kuj raug txom nyem ib xyoos tas ib xyoos tuaj li. Tiam sis nws tsuas los tib zaug xwb rau thaum lub sim ceeb* no yuav xaus, los muab nws tus kheej fij kiag kom daws tau neeg lub txim mus li. 27 Txhua tus yuav tsum tuag ib zaug ces tom qab ntawd mam li raug txiav txim. 28 Ib yam li ntawd, tus Khetos yuav tsum raug fij ib zaug los ris coob leej ntau tus lub txim. Zaum ob uas nws yuav rov los mas yuav tsis yog los daws txim lawm. Tsuas yog cov uas tos ntsoov nws los cawm lawv dim thiaj yuav pom nws xwb.

10 Yog li ntawd, txoj Kev Cai tsuas yog tej yam zoo uas tseem yuav los tus duab xwb, tsis yog yam ntawd tiag tiag. Yog li ntawd, cov neeg uas tuaj cuag Vajtswv uas coj khoom tuaj fij ib xyoos tas ib xyoos tuaj, yeej ua tsis tau kom lawv zoo kawg nkaus ib zaug li. 2 Yog tias tej khoom fij ntawd ntxuav tau kom lawv zoo kawg nkaus ces lawv lub siab yuav tsis niaj hnub nkaug lawv, thiab lawv kuj yuav tsis nqa khoom tuaj fij ntxiv lawd. 3 Tiam sis tej uas lawv fij ib xyoos tas ib xyoos tuaj tsuas ua rau lawv nco ntsoov tias lawv muaj txim xwb, 4 rau qhov tej ntshav nyuj ntshav tshis yeej tshem tsis tau neeg tej kev txhaum mus li.

5 Yog li ntawd, thaum nws los hauv qab ntuj no, nws hais rau Vajtswv tias, “‘Koj tsis xav tau tej khoom fij thiab khoom pub, koj thiaj npaj ib lub cev rau kuv. 6 Koj tsis txaus siab rau tej tsiaj uas hlawv kheej fij, thiab tej khoom fij uas daws txim.’ 7 Ces kuv* hais tias, ‘Au Vajtswv, kuv nyob ntawm no, (twb muaj lus sau cia hauv koj Txoj Lus* txog kuv lawm) kuv yuav ua raws li koj lub siab nyiam.’” 8 Nws xub hais tias, “Koj tsis xav tau thiab koj tsis pom zoo tej uas neeg coj tuaj fij, tuaj pub, coj tuaj hlawv kheej, thiab fij daws txim.” Neeg yeej muab tej ntawd fij raws li txoj Kev Cai qhia. 9 Tom qab ntawd nws mam li hais tias, “Kuv nyob ntawm no, kuv yuav ua raws li koj lub siab nyiam.” Yog li, nws rhuav tej kab ke uas nws xub hais ntawd, kom thiaj tsa tau tej kab ke uas nws hais txog tom qab. 10 Vim muaj raws li Vajtswv “lub siab nyiam” li no thiaj ntxuav tau peb dawb huv lawm rau qhov Yexus Khetos tau muab nws lub cev fij tib zaug xwb kuj zoo txaus mus ib txhis li.

11 Tsis tas li ntawd, txhua tus pov thawj nyias niaj hnub ua nyias tes hauj lwm rau Vajtswv, thiab muab khoom fij tas mus li, los tej ntawd yeej tshem tsis tau neeg tej kev txhaum tib si mus. 12 Tiam sis Khetos tsuas fij tib zaug xwb, tshem tau kev txhaum mus ib txhis ces nws mus zaum ntawm Vajtswv sab xis. 13 Txij thaum ntawd los, nws nyob tos mus txog hnub uas Vajtswv muab nws cov yeeb ncuab ua lub tog rau nws tiag taw. 14 Yog li ntawd, qhov uas nws fij tib zaug ntawd ua rau cov uas twb muab ntxuav dawb huv lawd zoo kawg nkaus mus ib txhis. 15 Lub hwj huam dawb huv kuj ua tim khawv rau peb tias yeej muaj li no tiag thiab hais tias, 16 “Vajtswv Yehauvas* hais tias, ‘Tom qab ntawd, kuv yuav nrog lawv sib cog lus li no. Kuv yuav ua kom lawv cim tau kuv tej kev cai thiab muab sau rau hauv lawv nruab siab nruab plaw.’” 17 Thaum hais li ntawd tas, ho ua tim khawv ntxiv tias, “Kuv yuav tsis nco txog lawv tej kev txhaum thiab tej kev phem uas lawv tau ua hlo li lawm.” 18 Yog Vajtswv twb zam txim rau tej kev txhaum zoo li no ces tsis tas yuav muab khoom fij daws txim lawm.

19 Yog li ntawd, cov kwv tij, vim muaj Yexus cov ntshav peb thiaj tsis ntshai nkag mus rau hauv Chav Dawb Huv Kawg Nkaus. 20 Yexus twb xub mus dhau daim ntaub thaiv lawm, thiaj qhib ib txoj kev tshiab rau peb los tau txoj sia. Daim ntaub piv txog nws cev nqaij daim tawv ntag. 21 Thiab vim peb muaj ib tug pov thawj zoo tshaj plaws los saib xyuas Vajtswv cuab neeg, 22 cia peb muaj lub siab dawb paug thiab muaj kev ntseeg ruaj khov mus cuag Vajtswv. Vim twb muab ntshav* nchos ntxuav peb lub siab dawb huv thiaj tsis nkaug peb lawm, thiab twb muab tej dej ntshiab ntxuav peb lub cev lawm. 23 Cia peb tau hau ntsoov tshaj tawm peb txoj kev vam rau ib tsoom neeg, tsis txhob ua xyem xyav rau qhov tus uas cog lus rau peb li no yeej yuav ua raws li nws tau hais tseg. 24 Peb ib leeg yuav tsum mob siab ib leeg tiag tiag, thiaj txhawb tau kom sawv daws haj yam txawj sib hlub, thiab ua tej hauj lwm zoo. 25 Tsis txhob tso tseg qhov uas tuaj sib txoos ua ke li ib txhia pheej ua, tiam sis ib leeg cia li txhawb ib leeg lub zog. Cia peb yim huab ua li no rau qhov peb yeej pom tias Vajtswv hnub los ze lawm.

26 Yog leej twg twb los paub meej txog qhov tseeb lawm, los tseem pheej txhob txwm mus ua txhaum ces yeej tsis muaj ib yam dab tsi uas yuav muab fij los daws tau tus ntawd lub txim lawm. 27 Nws tsuas ntshai tshee hnyo tos txoj kev txiav txim, thiab tos Vajtswv txoj kev npau taws uas kub cuag li hluav taws hlawv thiab yuav rhuav tshem cov uas tawm tsam Vajtswv. 28 Yog leej twg hla Mauxes Txoj Kev Cai es muaj ob los peb tug ua tim khawv pom ces yuav tsum muab tus ntawd tua pov tseg tsis khuv xim* li. 29 Tiam sis yog leej twg tsuj nthi Vajtswv tus Tub, saib cov ntshav uas nias cim rau lo lus cog tseg uas twb ntxuav nws dawb huv tsis tseem ceeb, thiab ua saib tsis taus lub hwj huam dawb huv uas qhia Vajtswv txoj kev hlub nplua mias ces tsim nyog tus ntawd yim huab raug txim loj tshaj ntawd. 30 Rau qhov peb yeej paub tus uas hais tias, “Kuv mam li pauj tej uas lawv ua phem.” Thiab muaj lus sau cia tias, “Vajtswv Yehauvas* yuav txiav txim rau nws cov tib neeg.” 31 Thaum Vajtswv tus uas muaj sia zees nyob rau txim rau ib tug twg mas yeej txaus ntshai kawg li.

32 Nej yuav tsum nco ntsoov yav nram ntej, thaum nej los nyob hauv qhov kaj, nej raug kev txom nyem ntau yam los nej yeej ua siab ntev tiv. 33 Muaj qee zaus uas nej raug luag thuam thiab raug luag tsim txom tab meeg sawv daws, thiab muaj qee zaus nej tau pab thiab nrog lwm tus raug kev txom nyem ua ke. 34 Rau qhov nej mob siab cov uas raug kaw hauv tsev loj cuj, thiab txawm luag lws nej tej qhov txhia chaw lawm los nej tseem zoo siab, vim nej paub tias nej tau yam qub txeeg qub teg uas zoo tshaj, thiab yam ntawd yuav nyob mus ib txhis.

35 Yog li ntawd, cia li ua siab tawv qhawv qhia, xwv nej thiaj tau nqi zog puv ntoob. 36 Nej yuav tsum ua siab ntev nyiaj, xwv thaum nej ua tau raws li Vajtswv lub siab nyiam lawd, nej thiaj tau txais yam uas nws cog lus tseg. 37 Rau qhov Vajtswv Txoj Lus hais tias, “tshuav tsis ntev xwb” mas “tus* uas yuav los yeej yuav los tiag, tsis laug caij li.” 38 Vajtswv Txoj Lus kuj hais tias, “Kuv tus tub qhe ncaj ncees yuav tau txoj sia vim nws muaj kev ntseeg” tiam sis “yog nws thim rov qab kuv* yuav tsis txaus siab rau nws.” 39 Zaum no peb tsis yog cov uas yuav thim rov qab mus raug kev puas tsuaj, tiam sis peb yog cov uas muaj kev ntseeg kom cawm tau peb txoj sia.

11 Yog koj muaj kev ntseeg ces koj yeej tso siab plhuav tias tej uas koj vam ntsoov yuav muaj tiag. Thiab koj ruaj siab tias txawm koj lub qhov muag tsis tau pom los, yeej muaj pov thawj tias yam uas koj ntseeg muaj tseeb tiag. 2 Vim cov neeg txheej thaum ub muaj kev ntseeg li no, thiaj muaj puav pheej qhia tias Vajtswv txaus siab rau lawv.

3 Peb muaj kev ntseeg peb thiaj nkag siab tias Vajtswv yog tus tsa ib tiam tas ib tiam* tuaj kom muaj chaw txawb chaw rau raws li nws sam hwm. Yog li, tej uas peb qhov muag pom yeej tshwm los ntawm tej uas peb qhov muag tsis pom.

4 Anpees muaj kev ntseeg nws thiaj muab yam uas zoo tshaj Khayees li fij rau Vajtswv. Twb yog Anpees muaj kev ntseeg li ntawd, Vajtswv thiaj txais yuav Anpees qhov khoom pub los qhia tias Anpees ncaj ncees. Txawm Anpees tuag lawm los, nws txoj kev ntseeg tseem qhia peb qees.

5 Enauj muaj kev ntseeg, nws thiaj tsis tuag txom nyem ntsuav. Vajtswv coj nws mus lawm, thiaj nrhiav tsis pom nws nyob qhov twg. Ua ntej Vajtswv coj nws mus, Vajtswv qhia rau nws tias nws yeej ua haum Vajtswv siab. 6 Tsis tas li ntawd xwb, yog leej twg tsis muaj kev ntseeg, nws yeej ua tsis tau haum Vajtswv siab li. Tus uas los cuag Vajtswv yuav tsum ntseeg tias muaj Vajtswv tiag, thiab ntseeg tias Vajtswv yuav pub nqi zog rau tus uas mob siab nrhiav nws tiag.

7 Kev ntseeg pab tau Nau-as txua lub nkoj thiaj cawm tau nws tsev neeg dim. Vajtswv qhia Nau-as txog tej yam uas nws qhov muag tsis tau pom los nws paub ntshai Vajtswv nws thiaj ua raws li Vajtswv hais. Nws txoj kev ntseeg qhia tias yeej tsim nyog muab lub qab ntuj rhuav tshem, thiab vim nws ntseeg thiaj suav tau tias nws ncaj ncees.

8 Anplahas muaj kev ntseeg, thaum Vajtswv hu nws tawm mus rau thaj chaw uas Vajtswv yuav pub rau nws ua qub txeeg qub teg, nws ua raws nkaus li Vajtswv hais. Txawm nws tsis paub tias nws yuav mus rau qhov twg, los nws yeej zoo siab hlo mus. 9 Nws muaj kev ntseeg, nws thiaj yeem mus ua qhua nyob tsev ntaub hauv lub teb chaws uas Vajtswv cog tseg. Ixaj thiab Yakhauj nyob tsev ntaub li ntawd thiab mas nkawd kuj nrog Anplahas saws qub txeeg qub teg raws li tib lo lus cog tseg. 10 Rau qhov Anplahas tseem tos lub nroog uas tsa rau saum tej plag tsev uas cog ruaj khov tiag tiag, yog lub nroog uas Vajtswv npaj tus qauv thiab yog tus tsim tsa kiag.

11 Xalas muaj kev ntseeg nws thiaj xeeb taus tub* txawm tias nws twb laus dhau lub caij muaj tub muaj ki lawm. Xalas ntseeg tias Vajtswv yog tus cog lus mas nws yog tus uas tso siab tau. 12 Vim li ntawd, tus txiv neej uas zoo li tsis muaj sia lawm los tseem muaj taus tub ki coob npaum li tej hnub qub saum nruab ntug, thiab suav tsis txheeb li tej xuab zeb ntawm ntug hiav txwv.

13 Txawm cov neeg no tsis tau pom tej lus cog tseg muaj tiav los, lawv tuav kev ntseeg ruaj nreeg mus txog hnub tuag. Lawv yeej pom deb deb tias tej lus cog tseg ntawd yuav tsum muaj tiav. Lawv thiaj tos ntsoov tej lus ntawd thiab lees tab meeg rau ib tsoom neeg tias lawv tsuas ua qhua nyob ib nyuag ntu hauv lub teb chaws xwb. 14 Cov uas hais li no ua pov thawj tias lawv yeej mob siab nrhiav ib qho chaw los ua lawv teej lawv tug. 15 Tiam sis yog lawv pheej xav ntsoov rau lub teb chaws uas lawv muab tso tseg lawd ces lawv yeej yuav nrhiav tau kev thim rov qab. 16 Nim no lawv xav nrhiav ib qho chaw zoo dua uas yog ntuj ceeb tsheej li. Yog li ntawd, Vajtswv tsis txaj muag lees yuav lawv, thiab nws yeej xav kom lawv hu nws ua Vajtswv rau qhov nws twb npaj ib lub nroog rau lawv lawm.

17 Anplahas muaj kev ntseeg. Nws zoo siab hlo txais yuav Vajtswv lo lus cog tseg tias, “Koj li xeeb ntxwv yuav los ntawm Ixaj caj ces.” 18 Tiam sis thaum Vajtswv sim Anplahas, nws yeem muab Ixaj fij rau Vajtswv tsis yig li. Anplahas twb npaj txhij muab nws tib leeg tub fij kiag rau Vajtswv lawm. 19 Anplahas paub tias Vajtswv yeej yuav tsa tau nws tus tub sawv hauv qhov tuag rov qab los, cuag li Vajtswv twb tso nws tus tub dim kiag lub qhov tuag rov los lawm ntag, thiaj muab zaj no los ua piv txwv.

20 Ixaj muaj kev ntseeg, nws thiaj foom koob hmoov rau Yakhauj thiab Exaus thiab qhia nkawd txog tej uas tseem yuav tshwm sim los.

21 Yakhauj muaj kev ntseeg, thaum nws yuav tu siav, nws thiaj foom koob hmoov rau Yauxej ob tug tub, thiab thaum nws pe hawm Vajtswv, nws txheem nws tus pas nrig.

22 Yauxej muaj kev ntseeg, thaum nws lub neej yuav dua, nws hais txog qhov uas cov Ixayees yuav khiav dim Iyiv teb chaws, thiab sam hwm kom lawv coj nws tej pob txha nrog lawv mus.*

23 Mauxes niam thiab txiv muaj kev ntseeg, thaum yug tau Mauxes nkawd thiaj muab nws zais tau peb lub hlis rau qhov nkawd pom tias nws ntxim hlub* heev. Nkawd tsis ntshai hla vaj ntxwv tej lus sam hwm kiag li. 24 Mauxes muaj kev ntseeg, thaum nws hlob lawd nws tsis kam luag hu nws ua Falaus tus ntxhais li tub. 25 Nws yeem nrog Vajtswv cov tib neeg raug quab yuam, nws suav tias qhov ntawd zoo dua li ua tej kev txhaum uas lom zem ib vuag xwb. 26 Nws ua li ntawd rau qhov nws suav tias nws ua tus Vajtswv xaiv tseg* es poob ntsej muag los, tseem zoo tshaj txhua yam muaj nqis hauv Iyiv teb chaws. Thiab Mauxes tos ntsoov tej nqi zog uas Vajtswv yuav them rau nws. 27 Mauxes muaj kev ntseeg, nws thiaj khiav tawm Iyiv teb chaws mus. Tsis yog nws ntshai vaj ntxwv npau taws rau nws, tiam sis nws ua tiag peem mus cuag li nws twb pom kiag Vajtswv tus uas neeg qhov muag tsis pom. 28 Mauxes muaj kev ntseeg nws thiaj ua Kev Cai Hla Dhau thiab muab cov ntshav los nplawm ob tug npuab rooj, Vajtswv tus tub txib saum ntuj thiaj tsis tua lawv cov tub hlob.

29 Cov Ixayees muaj kev ntseeg, lawv thiaj taug kev qhuav qhawv hla dej Hiav Txwv Liab mus. Tiam sis thaum cov Iyiv caum lawv qab, dej nphau nphwv los nyab lawv tuag tas.

30 Cov Ixayees muaj kev ntseeg, thaum lawv ncig lub nroog Yelikaus tau xya hnub, Yelikaus tej ntsa loog txawm pob rhe vau tas tib si. 31 Tus niam ntiav hu ua Lahaj muaj kev ntseeg, nws tos txais thiab ua zoo rau ob tug neeg soj teb chaws, nws thiaj tsis nrog cov neeg tsis mloog lus raug kev puas tsuaj.

32 Kuv tseem yuav hais txog leej twg thiab? Tsis muaj sij hawm txaus los hais txog Kide-oos, Npalas, Xaxoos, Yethas, Daviv, Xamuyees thiab lwm cov cev Vajtswv lus. 33 Lawv muaj kev ntseeg, lawv thiaj ntaus yeej tej vaj ntxwv, lawv txhawb kev ncaj ncees, lawv tau Vajtswv tej lus cog tseg, kaw tau tej tsov ntxhuav qhov ncauj, 34 tua tau tej hluav taws cig lam lug, dim hniav ntaj hniav riam, thaum lawv qaug zog zis lawv rov muaj zog npho, muaj lub siab tawv qhawv ntaus rog, thiab ua rau yeeb ncuab tej tub rog thim plhawv rov qab. 35 Muaj qee leej poj niam tau lawv cov neeg uas nruam sim lawd ciaj sawv rov los nrog lawv nyob. Thiab muaj qee leej txiv neej yeem raug tsim txom mus txog hnub tuag vim lawv tsis kam muab lawv txoj kev ntseeg pauv lawv txoj sia, kom Vajtswv thiaj tsa lawv sawv rov qab los tau lub neej zoo dua. 36 Tsis tas li ntawd, muaj dua lwm cov uas raug luag thuam, raug luag nplawm, thiab tseem muaj cov raug sab tshaj ntawd uas raug saw hlau khi, thiab raug kaw tsev loj cuj. 37 Lawv raug luag xuas pob zeb ntaus tuag, raug luag sim, raug kaw ua ob ya, tuag rau hniav ntaj hniav riam. Lawv hnav tawv yaj tawv tshis mus rau ub rau no mas tsis muaj txaus noj txaus siv, nyob txom nyem ntsuav, thiab raug luag tsim txom. 38 Cov neeg no zoo dhau lawm, lub qab ntuj twb tsis phim rau lawv nyob kiag li. Lawv mus nkaum hauv teb chaws moj sab qhua, saum tej khuab roob khuab ha, hauv tej qhov zeb qhov tsua, thiab khawb qhov av nyob.

39 Vajtswv yeej qhia rau cov neeg no tib si tias lawv ua haum nws siab vim lawv muaj kev ntseeg. Txawm li ntawd los, lawv tsis tau pom lo lus cog tseg muaj tiav. 40 Tau muaj li no rau qhov Vajtswv twb pom zoo ua ntej tias nws yuav pub yam uas zoo dua rau peb lawm, kom lawv cov no thiaj tsis tau lub neej zoo kawg nkaus ua ntej peb.

12 Yog li ntawd, vim peb muaj pab neeg coob coob no ua tim khawv nyob puag ncig peb zoo li ib tauv huab, cia peb muab txhua yam uas ua nra rau peb, thiab muab txoj kev txhaum uas yooj yim khi tau peb tso pov tseg. Peb tab tom sib tw dhia, cia li rub lub siab ntev dhia kam tiag, 2 thiab ntsia ntsoov Yexus uas yog tus Thawj uas coj peb txoj kev ntseeg, thiab tus ua rau peb txoj kev ntseeg cog ruaj cog khov. Yexus ua tau siab ntev nyiaj kev txom nyem saum tus ncej ntoo,* tsis txaj muag li, vim nws xav ntsoov txog txoj kev zoo siab xyiv fab uas nws tseem yuav muaj tom hauv ntej. Nim no nws twb nyob ntawm Vajtswv lub rooj zaum sab xis lawm. 3 Yog li ntawd, peb yuav tsum ua tib zoo xav txog tus uas twb tiv dhau tej lus iab hiam los lawm. Cov neeg txhaum uas iab hiam nws tsuas rov tsim kev kub ntxhov rau lawv xwb. Ua tib zoo xav txog nws, nej thiaj tsis qaug zog es tso tseg.

4 Nej nrog txoj kev txhaum ntawd sib ntswg, tiam sis nej twb tsis tau tawm tsam mus txog thaum nqaij ntuag ntshav nrog. 5 Thiab nej tsis nco qab ib yam dab tsi uas Vajtswv hais rau nej li. Nws twb hais nej tam li nws cov tub tias, “Kuv tub’e, tsis txhob ua saib tsis taus Vajtswv Yehauvas* tej lus qhuab ntuas, thiab thaum nws qhuab ntuas koj, tsis txhob tso tseg, 6 rau qhov Vajtswv Yehauvas* yeej hlub tus uas nws qhuab ntuas. Thiab nws yeej nplawm* tus uas nws coj los ua nws tub.”

7 Nej yuav tsum ua siab ntev thev vim qhov ntawd yog kev qhuab ntuas. Twb yog Vajtswv qhuab ntuas nej tam li nws cov tub ntag. Puas muaj ib leej txiv twg yuav tsis qhuab ntuas nws tus tub li? 8 Tiam sis yog nej sawv daws tsis tau raug qhuab ntuas li no ces nej tsis yog nws cov tub, nej kuj yog me nyuam tsaub xwb. 9 Tsis tas li ntawd, thaum yus txiv* qhuab ntuas yus mas yus twb hwm nws. Yog li ntawd, tsim nyog peb yim huab hwm thiab mloog peb Leej Txiv uas pub nws lub hwj huam coj peb lub neej, kom peb tau txoj sia. 10 Yus txiv qhuab ntuas yus ib nyuag ntu raws li nws pom zoo xwb, tiam sis peb Leej Txiv saum ntuj qhuab ntuas peb kom pab tau peb, xwv peb thiaj dawb huv li nws. 11 Thaum yus tab tom raug qhuab ntuas mas yeej tsis kaj siab li, tsuas tu siab xwb. Tiam sis tom qab ntawd, yog yus xyaum raws tej lus ntawd ces yus yuav nyob kaj siab lug, ua tau neeg ncaj ncees.

12 Yog li ntawd, cia li txhawb nej ob txhais npab uas tsaug leeg thiab nej ob lub hauv caug uas tshee na. 13 Cia li kho txoj kev kom ncaj rau nej taug, xwv tus ceg tawv thiaj tsis sav ceg tiam sis yuav txawj zoo. 14 Ua txhua yam kom nrog tau sawv daws nyob sib haum xeeb, thiab xyaum tiag kom ua tau lub neej dawb huv, rau qhov tus uas dawb huv thiaj yuav pom tus Tswv xwb. 15 Ceev faj tsam tej tug ho plam txoj kev hlub uas Vajtswv pub dawb thiab ho muaj tej tug hauv nej cov sawv los tsim teeb meem, ib yam li tus cag tshuaj lom neeg uas cia li nrhau cag tuaj lom* coob leej ntau tus. 16 Thiab ceev faj tsis txhob pub nej cov ib tug twg ua plees ua yi,* los sis tsis ris txiaj ntsig rau tej yam uas Vajtswv pub, zoo li Exaus tus uas muab nws feem ua tij pauv tib pluag mov noj xwb. 17 Nej yeej paub zoo tias tom qab ntawd, Exaus tseem ntshaw qhov koob hmoov, los muab tsis tau rau nws lawm. Txawm nws quaj kua muag si laim los nws txiv tsis kam muab, thim tsis tau li lawm.

18 Nej tsis tau mus sawv ntawm ib lub roob uas nej ob txhais taw tsuj tau, zoo li cov Ixayees thaum ub. Lawv pom hluav taws cig lam lug, lub ntuj dub nciab, thiab cua daj cua dub tsaus nti. 19 Thiab lawv hnov suab raj suab xyu nrov doog diaj, thiab hnov lub suab hais saum ntuj tuaj mas ua rau cov tib neeg taij thov kom txhob hais lus rau lawv ntxiv lawm. 20 Cov tib neeg ntshai heev rau qhov lawv hnov Vajtswv sam hwm tias, “Txawm yog ib tug tsiaj twg mus tsuj lub taw roob xwb los, yuav tsum muab pob zeb ntaus kom tuag.” 21 Tej uas lawv pom yeej txaus ntshai kawg li, txawm Mauxes los kuj hais tias, “Kuv ntshai tshee hnyo.” 22 Tiam sis nej mas nej tau mus sawv ntawm lub Roob Xi-oos thiab ntawm Vajtswv tus muaj sia zees nyob lub nroog, yog lub nroog Yeluxalees saum ntuj ceeb tsheej. Nej kuj sawv ntawm ntau txhiab ntau vam tus tub txib saum ntuj 23 uas tuaj sib txoos ua ke, thiab sawv ntawm lub koom txoos uas cov tub hlob tuaj txoos ua ke, lawv twb muaj npe sau rau saum ntuj ceeb tsheej lawm. Tsis tas li ntawd, nej sawv ntawm Vajtswv tus uas Txiav Txim rau txhua tus, thiab ntawm cov ncaj ncees uas ua neej raws li lub hwj huam coj thiab twb zoo kawg nkaus lawd. 24 Thiab nej sawv ntawm Yexus tus uas nyob nruab nrab hauv lo lus cog tseg tshiab, thiab ntawm cov ntshav uas tau muab nchos rau peb uas zoo tshaj Anpees cov ntshav.

25 Ceev faj tsam nej ho tsis kam mloog tus uas hais lus tuaj rau nej. Yav tas los, thaum Vajtswv ceeb toom lub qab ntuj neeg cov uas tsis kam mloog twb tsis dim. Yog li ntawd, yog peb tsis kam mloog tus uas hais saum ntuj tuaj ces peb yim huab yuav tsis dim li! 26 Thaum ntawd nws lub suab ua rau lub ntiaj teb ua zog koog, tiam sis nim no nws cog lus tias, “Kuv yuav rov co lub ntiaj teb ua zog koog ib zaug ntxiv, tiam sis tsis yog lub ntiaj teb xwb, kuv yuav co lub ntuj ua zog koog thiab.” 27 Lo lus “ib zaug ntxiv” qhia tias Vajtswv yuav muab tej uas ua zog koog tshem tawm mus, tej ntawd tsis yog tej uas Vajtswv tsim. Nws ua li no xwv tej uas tsis ua zog thiaj nyob mus li. 28 Peb yuav tau txais txoj kev kav* uas tsis txawj ua zog los ua peb tug. Yog li ntawd, peb cia li txais yuav txoj kev hlub uas Vajtswv pub dawb, Vajtswv thiaj txaus siab rau peb tes hauj lwm dawb huv mas peb yuav hwm Vajtswv thiab qhuas nws thaum peb ua tes hauj lwm ntawd. 29 Rau qhov peb tus Vajtswv zoo ib yam li tej nplaim taws uas kub khee hlo.

13 Thov kom nej sib hlub li tej kwv tij mus li. 2 Nco ntsoov tos txais qhua, rau qhov ib txhia nyiam tos txais qhua lawv thiaj hu tau tej tub txib saum ntuj los hauv tsev, los lawv twb tsis paub. 3 Nej yuav tsum nco ntsoov cov uas raug kaw hauv tsev loj cuj, ib yam li nej nrog lawv raug thiab. Nco ntsoov cov uas raug tsim txom, ib yam li nej nrog lawv raug thiab.* 4 Sawv daws yuav tsum saib taus txoj kev txij nkawm, thiab tsis txhob ua qias puas tsuas lub chaw pw, rau qhov Vajtswv yuav txiav txim rau cov neeg uas ua plees ua yi* thiab cov uas deev luag poj luag txiv.* 5 Tsis txhob ua lub neej qaug rau nyiaj txiag, cia li txaus siab rau tej uas koj muaj lawm. Vajtswv twb cog lus tias, “Kuv yuav tsis ncaim koj thiab kuv yuav tsis tso koj tseg ib zaug li.” 6 Yog li, tsim nyog peb ua lub siab loj nteev hais tias, “Vajtswv Yehauvas* yog tus pab kuv mas kuv yeej tsis ntshai li. Neeg yuav ua tau li cas rau kuv?”

7 Nco ntsoov cov uas coj nej uas twb qhia Vajtswv txoj lus rau nej lawd. Ua tib zoo xav seb lawv tau ua lawv lub neej li cas es xyaum lawv txoj kev ntseeg.

8 Yexus Khetos yeej zoo ib yam li qub, tsis hais nag hmo, hnub no, thiab mus ib txhis.

9 Muaj ntau zaj lus qhia txawv txawv uas yuav txw tau nej yuam kev, tiam sis txhob qaug rau tej lus ntawd. Txoj kev hlub uas Vajtswv pub dawb thiaj txhawb tau nej lub siab, tsis yog tej kev cai uas qhia kom caiv zaub caiv mov. Cov uas mob siab coj tej kev cai ntawd, yeej pab tsis tau lawv tus kheej.

10 Peb muaj ib lub thaj, tiam sis cov uas ua hauj lwm ntawm lub tsev ntaub tsis muaj cai noj tej yam uas nyob saum lub thaj ntawd. 11 Rau qhov tus tuam pov thawj hlob muab tej tsiaj ntawd cov ntshav coj mus fij daws txim hauv Chav Dawb Huv Kawg Nkaus. Tiam sis tom qab ntawd lawv muab cov tsiaj ntawd lub cev coj mus hlawv sab nraum lub yeej. 12 Ib yam li ntawd, Yexus kuj raug tsim txom thiab raug tua rau sab nraum lub nroog, xwv nws cov ntshav thiaj yuav ntxuav tau neeg dawb huv. 13 Yog li ntawd, cia peb mus cuag nws sab nraum lub yeej, thiab yeem nrog nws poob ntsej muag. 14 Vim peb tsis muaj ib lub nroog ntawm no uas yuav nyob mus li, tiam sis peb tos ntsoov lub nroog uas tseem yuav los. 15 Cia peb tuav Yexus lub npe qhuas Vajtswv tsis tseg, ib yam li tej khoom fij, es cia peb lub qhov ncauj tshaj tawm Vajtswv lub npe rau ib tsoom neeg. 16 Tsis tas li ntawd, nco ntsoov ua zoo es muab tej uas nej muaj faib rau lwm tus. Thaum nej pub li ntawd zoo ib yam li tej khoom fij uas txaus Vajtswv siab heev.

17 Nej yuav tsum mloog cov uas coj nej thiab txo hwj chim zwm rau lawv, vim lawv yog cov uas saib xyuas nej mas Vajtswv yuav tshuaj lawv tes hauj lwm. Yog nej ua li no ces lawv yuav xyiv fab ua hauj lwm tsis dhuav li. Tiam sis yog nej tsis kam ua li no ces nej yuav ntxhov siab.

18 Cia li thov Vajtswv pab peb, rau qhov peb yeej ntseeg tias peb muaj lub siab dawb paug xav ua ncaj ua ncees rau txhua yam. 19 Tiam sis kuv xav kom nej yim huab thov Vajtswv pab kuv xwv kuv thiaj tau kev tuaj saib nej sai sai.

20 Vajtswv twb tsa peb tus Tswv Yexus uas yog tus tswv yug yaj zoo kawg nkaus sawv hauv qhov tuag rov qab los lawm. Thaum Yexus sawv rov los nws muaj cov ntshav uas nias cim rau lo lus cog tseg uas nyob mus ib txhis. Yog li ntawd, thov kom Vajtswv tus uas muaj kev sib haum xeeb 21 pub txhua yam zoo rau nej los ua nws tes hauj lwm. Twb yog muaj Yexus Khetos, Vajtswv thiaj pab kom peb ua tau tej hauj lwm uas nws pom zoo mas thov kom Vajtswv tau koob meej mus ib txhiab ib txhis tsis kawg. Amees.*

22 Cov kwv tij’e, thov nej ua siab ntev mloog tej lus txhawb zog no, rau qhov kuv tsuas sau ib tsab ntawv luv luv tuaj rau nej xwb. 23 Kuv xav qhia rau nej paub tias luag twb tso peb tus kwv Timautes lawm. Yog nws tuaj txog ntawm kuv sai ces wb yuav ua ke tuaj saib nej.

24 Thov xa lus noj qab nyob zoo rau cov uas coj nej thiab tag nrho cov uas dawb huv. Cov kwv tij uas nyob hauv Italis no kuj xa xov tuaj rau nej thiab.

25 Thov Vajtswv foom koob hmoov nplua mias rau nej sawv daws.