SAU RAU TITUS

1 Kuv yog Povlauj uas yog Vajtswv ib tug tub qhe thiab yog Yexus Khetos ib tug tub txib. Kuv tes hauj lwm yeej raws li tej uas Vajtswv cov xaiv tseg ntseeg thiab raws li qhov tseeb uas peb tau kawm mas qhov tseeb ntawd qhia kom muab siab npuab Vajtswv. 2 Tej no yeej cog ruaj rau txoj kev cia siab tias Vajtswv yuav pub txoj sia ib txhis tsis kawg rau tib neeg. Nws yog tus Vajtswv uas tsis txawj dag, nws tau cog lus li no ntev los lawm. 3 Thaum txog nws lub sij hawm, nws thiaj ua rau nws txoj lus nrov ncha mus rau ib tsoom neeg. Tus Cawm Seej uas yog peb tus Vajtswv tau sam hwm kom kuv ua tes hauj lwm tshaj tawm no ntag. 4 Kuv sau tsab ntawv no rau Titus. Koj zoo ib yam li kuv tus tub ntag, thiab koj nrog kuv koom tib txoj kev ntseeg.

Thov kom Vajtswv uas yog peb Leej Txiv thiab kom peb tus Tswv Yexus Khetos* uas yog peb tus Cawm Seej foom koob hmoov nplua mias* rau koj thiab nrog koj sib raug zoo.

5 Kuv tso koj nyob hauv lub pov txwv Khetes koj thiaj kho tau tej yam uas nkhaus kom ncaj, thiab tsa ib co txwj laus rau hauv txhua lub nroog, zoo li kuv tau qhia rau koj no tias, 6 ib tug txwj laus yuav tsum tsis muaj chaw thuam, tsuas muaj ib tug poj niam xwb, nws tej me nyuam yuav tsum yog cov uas ntseeg thiab tsis muaj lus thuam tias yog neeg tsis tsim txiaj* los sis neeg tawv ncauj. 7 Rau qhov tus tub qhe uas Vajtswv tsa los saib xyuas lub koom txoos yuav tsum zoo li no, nws tsis muaj chaw thuam, tsis ua ywj siab, tsis chim sai, tsis quav dej quav cawv, tsis ua nruj ua tsiv, thiab tsis ua siab hlob huas rau nws tus kheej xwb. 8 Tiam sis nws nyiam qhua, nyiam txoj kev zoo, thoob tsib to nrog, ncaj ncees, muab siab npuab Vajtswv, tswj tau nws tus kheej, 9 nws txawj siv tswv yim qhia raws nkaus li txoj lus tseeb, nws thiaj paub muab zaj uas pab tau peb* los qhia txhawb luag thiab paub ntuas tus uas cov nyom zaj ntawd.

10 Rau qhov muaj coob tus uas ntxeev siab, hais tej lus khav ntxhias uas tsis muaj hauv paus hauv ntsis, thiab dag ntxias lwm tus, cov no feem coob yog cov uas hais kom ua kev cai txiav.* 11 Yuav tsum kaw kiag lawv lub qhov ncauj rau qhov lawv qhia tej yam uas tsis tsim nyog qhia mas twb haub ntxias tau tej yim neeg tso kev ntseeg tseg tag nrho lawm. Lawv qhia li ntawd vim lawv huas rau lawv tus kheej xwb. 12 Lawv cov ntawd, ib tug xib hwb twb hais li no tias, “Cov neeg Khetes ib txwm yeej hais lus dag, thiab nyaum li tej tsiaj qus mas xav nyob dawb xwb, noj loj haus loj heev.”

13 Yeej muaj tseeb li nws tau hais tiag. Twb yog li ntawd, koj yuav tsum ntuas lawv kom hnyav, xwv lawv thiaj muaj kev ntseeg ruaj nreeg. 14 Lawv thiaj tsis quav ntsej cov Yudais tej dab neeg cuav, thiab tsis mloog tej lus sam hwm uas cov neeg tso qhov tseeb tseg tau hais. 15 Txhua yam yeej dawb huv rau cov neeg dawb huv. Tiam sis tsis muaj ib yam yuav dawb huv rau cov neeg uas qias thiab tsis muaj kev ntseeg, vim lawv tej kev xav thiab lawv lub siab yeej qias tsis huv. 16 Lawv lees tab meeg sawv daws tias lawv paub Vajtswv, tiam sis lawv tes hauj lwm twb qhia tias lawv tsis lees yuav Vajtswv li. Rau qhov lawv yog neeg ntxim ntxub thiab tsis mloog lus. Yeej tsis tsim nyog siv lawv los ua ib txog hauj lwm zoo li.

2 Tiam sis koj mas koj yuav tsum rau siab ntso qhia raws nkaus li zaj lus qhia uas pab tau peb.* 2 Cov txiv neej laus ua dab tsi los yuav tsum ua kom hauj sim, ua neeg tsheej haj, thoob tsib to nrog, nws yuav tsum muaj kev ntseeg ruaj nreeg, muaj kev hlub tiag tiag, thiab muaj lub siab ntev thev taus. 3 Cov poj niam laus los yuav tsum ua lub neej qhia tias lawv hwm Vajtswv, tsis xyav luag moo, tsis quav dej quav cawv. Tiam sis cov poj niam laus yuav tsum qhia tej yam zoo, 4 xwv thiaj cob qhia tau cov poj niam hluas kom hlub lawv tej txiv thiab hlub lawv tej me nyuam, 5 paub ua neeg thoob tsib to nrog,* dawb huv, nquag tu vaj tu tsev, coj zoo, zwm* rau lawv tus txiv, xwv thiaj tsis muaj chaw thuam Vajtswv txoj lus.

6 Ib yam li ntawd, koj yuav tsum txhawb tiag kom cov txiv neej hluas ua neeg thoob tsib 7 thiab ua txhua yam hauj lwm zoo thiaj ua tau tus qauv zoo rau luag xyaum. Cia li ua neeg paub tab qhia yam uas dawb huv* 8 es siv tej lus uas pab tau peb* uas luag thuam tsis tau. Ua li no, cov uas tawm tsam peb thiaj txaj muag, thiab lawv yuav tsis muaj cuab kav hais ib los phem txog peb li. 9 Cov qhev yuav tsum zwm rau lawv tus tswv txhua lub sij hawm es ua haum nws siab, tsis txhob cam thawj, 10 tsis txhob nyiag tus tswv tug, tiam sis coj zoo tus tswv thiaj tso siab tas nrho rau lawv. Txhua yam uas lawv ua thiaj qhuas txog tej uas peb tus Cawm Seej uas yog Vajtswv tau qhia tseg.

11 Vajtswv twb muab txoj kev hlub uas nws pub dawb qhia tshwm rau sawv daws pom lawm mas cawm tau txhua hom neeg dim. 12 Txoj kev hlub ntawd qhia kom peb muab tej yam uas tsis raws li Vajtswv lub siab nyiam, thiab tej kev phem uas lub qab ntuj no ntshaw tso pov tseg es ua neeg thoob tsib to nrog, ua ncaj ua ncees, thiab muab siab npuab Vajtswv tiag nyob hauv lub sim ceeb* no. 13 Thiab peb yuav tos ntsoov hnub uas muaj tiav raws li peb txoj kev cia siab uas zoo kawg nkaus, thiab hnub uas peb tus Vajtswv loj kawg nkaus, thiab hnub uas peb tus Cawm Seej Yexus Khetos tshwm los muaj hwj chim ci ntsa iab. 14 Khetos tau pub nws txoj sia los tso peb dim lub neej tsis coj cai, kom ntxuav tau peb ua ib haiv neeg dawb huv uas tshwj xeeb heev los ua nws teej nws tug, kom peb muaj lub siab kub lug ua txhua yam hauj lwm zoo.

15 Yeej meem qhia li no es txhawb thiab ntuas sawv daws, lub hwj chim no twb muab cob rau koj lawm. Tsis txhob cia leej twg saib tsis taus koj.

3 Yeej meem qhia kom lawv nco ntsoov zwm* rau tej nom tswv thiab tej thawj coj es mloog lawv lus, npaj txhij zog ua txhua yam hauj lwm zoo, 2 tsis txhob rhuav leej twg ntsej muag, tsis txhob cam thawj, tiam sis muaj lub siab zam xeeb, thiab ua lub siab mos siab muag tiag tiag rau txhua tus. 3 Rau qhov yav tas los peb kuj tsis muaj tswv yim kiag li, tsis mloog lus, raug ntxias yuam kev, ua qhev rau ntau yam uas lub siab ntshaw thiab ntau yam kev lom zem, ua kev phem, khib xeeb luag, ua vuab tsuab, thiab ib leeg ntxub ib leeg.

4 Tiam sis Vajtswv uas yog peb tus Cawm Seej twb ua rau sawv daws pom nws lub siab zoo thiab nws txoj kev hlub rau noob neej lawm. 5 (Nws cawm peb dim tsis yog vim peb ua ncaj ua ncees tiam sis yog vim nws muaj lub siab khuv leej.) Nws cawm peb dim vim nws muab peb ntxuav dawb huv peb thiaj ciaj sia, thiab nws lub hwj huam dawb huv ua rau peb ua ib tug neeg tshiab. 6 Nws muab lub hwj huam no pub nplua mias rau peb vim muaj Yexus Khetos uas yog peb tus Cawm Seej. 7 Nws ua li ntawd kom peb tau saws qub txeeg qub teg raws li nws tau cog lus tias peb yuav tau txoj sia ib txhis tsis kawg. Twb yog nws muaj kev hlub nplua mias, nws thiaj suav tias peb ncaj ncees.

8 Peb yeej tso siab tau rau tej lus no. Kuv xav kom koj muab tej no qhia meej meej rau sawv daws, kom cov uas ntseeg Vajtswv thiaj tau hau ntsoov ua tej hauj lwm zoo. Tej no yeej zoo kawg nkaus thiab pab tau txhua tus.

9 Tsis txhob nrog leej twg sib cav sib ceg txog tej yam tsis muaj hauv paus hauv ntsis, thiab taug tej caj ces, thiab tsis txhob sib cam txog txoj Kev Cai, rau qhov tej no tsis muaj qab hau dab tsi thiab pab tsis tau leej twg li. 10 Yog leej twg pheej txhawb kom tawg ua pab ua pawg es koj twb ntuas nws ob zaug lawm los nws tsis tso tseg ces tsis txhob nrog nws ua ke lawm. 11 Tus neeg uas coj li ntawd twb yuam kev deb ntawm txoj kev tseeb, thiab twb yog nws ua txhaum mas nws rov lob txim rau nws tus kheej xwb.

12 Thaum kuv txib Athemas los sis Thikikas tuaj txog koj lawm ces cia li maj nroos nrhiav kev tuaj saib kuv hauv lub nroog Nikhaupolis. Kuv yuav so hauv lub nroog ntawd kom dhau lub caij ntuj no. 13 Thov npaj txhua yam rau Xenas tus uas paub Mauxes Txoj Kev Cai zoo heev, thiab rau Apaulaus kom nkawd muaj txhij, nkawd thiaj tsis tu ncua ib yam dab tsi rau thaum nkawd sawv kev mus. 14 Peb cov kwv tij los yuav tau xyaum ua tej hauj lwm zoo li ntawd tas zog, xwv lawv thiaj txawj pab luag rau thaum muaj tej yam ti tes ti taw. Lawv xyaum li no lawv thiaj txawj ua hauj lwm.

15 Cov kwv tij uas nrog kuv nyob ntawm no puav leej xa lus noj qab nyob zoo tuaj rau koj. Thov xa xov rau peb cov kwv tij ntseeg uas hlub peb.

Thov kom Vajtswv foom koob hmoov nplua mias rau nej txhua tus.