TSAB NTAWV OB SAU RAU TIMAUTES

1 Ntawm no yog Povlauj. Kuv raug tsa los ua Yexus Khetos* ib tug tub txib raws li Vajtswv pom zoo thiab raws li lo lus cog tseg uas yuav tau txoj sia vim muaj Yexus Khetos.* 2 Timautes kuv sau tsab ntawv no tuaj rau koj. Kuv hlub koj ib yam li kuv tus tub ntag.

Thov kom Vajtswv uas yog peb Leej Txiv thiab kom peb tus Tswv Yexus Khetos* foom koob hmoov nplua mias* rau koj, hlub* koj, thiab nrog koj sib raug zoo.

3 Kuv nco Vajtswv txiaj ntsig, nws yog tus uas kuv muaj lub siab dawb paug teev tiam, ib yam li kuv tej yawg koob tau ua lawd. Kuv thiaj nco ntsoov taij thov Vajtswv nruab hnub hmo ntuj pab koj. 4 Kuv xav txog thaum koj quaj quaj mas ua rau kuv xav xav rov pom koj thiaj zoo kuv lub siab. 5 Kuv nco ntsoov tias koj muaj kev ntseeg hauv nruab siab tuaj tiag tiag. Twb yog koj niam tais Lau-is thiab koj niam Yunis nkawd xub muaj kev ntseeg li no mas kuv paub tias koj yeej tuav rawv kev ntseeg ib yam li ntawd.

6 Twb yog li ntawd, koj yuav tsum nco ntsoov ua raws li yam uas Vajtswv tau pub rau koj thaum kuv tsa tes npuab koj. Rau siab ntso ua kom yam ntawd cig lam lug tuaj. 7 Rau qhov tsis yog Vajtswv pub lub siab tais caus rau peb, tiam sis nws pub peb muaj lub siab tawv qhawv,* muaj kev hlub, thiab thoob tsib to nrog. 8 Yog li ntawd, tsis txhob txaj muag ua tim khawv txog tus Tswv, thiab tsis txhob txaj muag txog kuv. Qhov uas kuv tab tom raug kaw twb yog vim kuv ua nws ib tug tub qhe. Tiam sis koj yuav tsum yeem raug kev txom nyem rau txoj xov zoo es vam khom Vajtswv lub hwj chim. 9 Vajtswv cawm peb dim thiab hu peb los ua cov dawb huv vim qhov ntawd raws li nws lub ntsiab thiab vim nws muaj kev hlub nplua mias, tsis yog vim peb tes hauj lwm zoo. Vajtswv pub txoj kev hlub no dawb dawb rau peb puag thaum ub los vim yog muaj Yexus Khetos.* 10 Nim no txoj kev hlub ntawd tshwm rau sawv daws pom tseeb lawm, rau qhov peb tus Cawm Seej uas yog Yexus Khetos* twb tshwm los lawm. Nws twb rhuav tshem txoj kev tuag, thiab ua qhov kaj ci hauv txoj xov zoo tuaj kom peb thiaj tau txoj sia, thiab tau lub cev uas tsis txawj lwj. 11 Kuv raug tsa los ua ib tug tshaj tawm, los ua ib tug tub txib, thiab los ua ib tug xib hwb qhia txoj xov zoo no.

12 Twb yog vim li no kuv thiaj raug txom nyem ntsuav, tiam sis kuv tsis txaj muag li. Kuv yeej paub tus uas kuv ntseeg, thiab kuv tso siab tias nws yeej yuav tsom kwm ib puas tsav yam uas kuv twb muab tso rau nws lawd mas nws yuav ua li ntawd mus txog hnub uas teem tseg. 13 Koj cia li tuav rawv tej lus qhia uas pab tau peb* uas kuv twb muab ua qauv qhia koj lawm, thiab rau siab tuav kev ntseeg thiab muaj kev hlub vim koj nrog Yexus Khetos* koom ib lub siab. 14 Cia lub hwj huam dawb huv pab koj tuav rawv yam muaj nqis uas tau muab cob rau koj lawd. Lub hwj huam ntawd yeej nrog* peb.

15 Koj yeej paub tias cov txiv neej hauv lub xeev Axias twb tso kuv tseg tib si lawm. Fikelas thiab Haw-mokenes kuj tso kuv tseg lawm thiab. 16 Thov kom tus Tswv* hlub* Aunexifaulas tsev neeg rau qhov nws tau txhawb kuv lub zog ntau zaus thiab nws yeej tsis txaj muag qhov uas kuv raug saw hlau khi. 17 Thaum nws tuaj txog hauv Loos, nws kub siab lug nrhiav mus txog thaum nws nrhiav tau kuv. 18 Thov kom tus Tswv Yehauvas* hlub* nws thaum txog hnub uas teem tseg. Koj yeej paub zoo txog txhua yam hauj lwm uas nws tau ua los pab kuv hauv Efexaus lawm.

2 Yog li ntawd, kuv tus tub, koj yuav tsum thov Vajtswv pub dag pub zog rau koj, vim Yexus Khetos* yog tus muaj kev hlub nplua mias. 2 Tej uas kuv tau qhia rau koj lawd, twb muaj coob tus ua tim khawv pom lawm thiab. Cia li muab tej no qhia rau cov txiv neej uas koj tso siab tau, xwv lawv thiaj paub txaus thiab txawj qhia lwm leej lwm tus. 3 Koj yog Yexus Khetos* ib tug tub rog ncaj ncees, cia li yeem tiv kev txom nyem. 4 Tsis muaj ib tug tub rog yuav mus txuam nrog kev lag kev luam li laj mej pej xeem. Tiam sis nws tsuas xav ua kom haum tus thawj rog* siab xwb. 5 Thiab yog leej twg yuav mus nrog luag sib tw, tiam sis nws tsis ua raws li txoj kev cai sib tw ces nws yuav tsis tau paj tshab.* 6 Tus uas siv zog ntsos ua liaj ua teb yeej tsim nyog nws xub tau noj tej qoob uas nws sau. 7 Koj yuav tsum xav ntsoov txog tej uas kuv qhia rau koj no. Tus Tswv yeej yuav pab koj nkag siab txhua yam.

8 Nco ntsoov tias Yexus Khetos twb raug tsa sawv hauv qhov tuag rov los lawm, thiab nws yog Daviv tus xeeb ntxwv. Txoj xov zoo uas kuv tshaj tawm yeej qhia li ntawd. 9 Twb yog kuv tshaj tawm txoj xov zoo kuv thiaj tab tom raug tsim txom thiab raug kaw zoo ib yam li tus tub sab. Txawm saw hlau khi tau kuv lawm los, yeej khi tsis tau Vajtswv txoj lus li. 10 Twb yog vim li ntawd, kuv thiaj tiv txhua yam kev tsim txom rau cov xaiv tseg, kom lawv thiaj tau kev cawm dim los ntawm Yexus Khetos* thiab tau lub koob meej ci ntsa iab uas nyob mus ib txhis. 11 Peb tso siab tau rau cov lus uas hais no, Yog peb tuag ua ke ces peb kuj yuav ciaj ua ke, 12 yog peb ua tiag tiv ces peb kuj yuav tau ua vaj ntxwv kav ua ke, yog peb tsis lees nws ces nws kuj yuav tsis lees peb, 13 txawm peb tsis ua raws li peb twb hais tseg lawm los, Vajtswv yeej yuav ua raws li nws tau hais tseg, vim nws yuam tsis tau nws tus kheej kom ua li ntawd.

14 Qhia kom lawv nco ntsoov tej lus no, ceeb toom lawv tab meeg Vajtswv kom tsis txhob sib cav sib ceg txog tej nyuag lus uas sawv daws hais. Qhov ntawd tsis muaj qab hau kiag li, tsuas txo tau cov uas mloog lub zog xwb. 15 Cia li ua txhua yam kom Vajtswv txaus siab rau koj. Siv zog ua hauj lwm koj thiaj tsis txaj muag thiab qhia kom meej raws nkaus li Vajtswv txoj lus tseeb. 16 Tsis txhob mloog tej lus tsis muaj hauv paus hauv ntsis uas hla yam uas dawb huv. Tej lus ntawd tsuas coj neeg kev mus ua tej yam uas yim huab saib tsis taus Vajtswv 17 mas lawv tej lus yuav huam zoo ib yam li lub qhov txhab uas lwj thiab qawj zuj zus xwb. Himenias thiab Filetas nkawd kuj yog ob tug uas tau ua li ntawd ntag. 18 Nkawd yuam kev deb heev ntawm qhov tseeb rau qhov nkawd qhia tias tib neeg twb sawv hauv qhov tuag rov los lawm mas nkawd ua rau qee leej tso kev ntseeg tseg. 19 Txawm li ntawd los, Vajtswv yog tus pua lub plag tsev uas tseem nyob ruaj khov thiab muaj cov lus txaug* cia hais tias, “Vajtswv Yehauvas* paub cov uas yog nws ntiag tug,” thiab, “Cia txhua tus uas tuav Vajtswv Yehauvas* lub npe hu, tso yam uas tsis ncaj ncees tseg.”

20 Hauv ib lub tsev loj loj, tsis yog muaj tej tais nyiaj tais kub xwb, tiam sis kuj muaj tej tais ntoo tais av. Ib txhia yog siv rau yam uas tseem ceeb,* ib txhia yog siv rau yam uas tsis tseem ceeb.* 21 Yog leej twg txav deb ntawm cov uas zoo li tej twj taig siv rau yam tsis tseem ceeb ces nws yuav zoo ib yam li tej twj taig siv rau yam uas tseem ceeb. Nws yuav dawb huv, yuav muaj nqis rau tus tswv tsev, thiab yuav npaj txhij los ua txhua yam hauj lwm zoo. 22 Yog li ntawd, cia li khiav deb ntawm lub siab ntshaw uas cov hluas ib txwm muaj. Nrhiav nrhw kev ncaj ncees, kev ntseeg, kev hlub, thiab kev sib haum xeeb. Ua li no nrog cov uas muaj lub siab dawb paug thov tus Tswv.

23 Tsis tas li ntawd, tsis txhob sib cam txog tej zaj tsis muaj hauv paus hauv ntsis, tej ntawd tsuas ua rau neeg sib cav sib ceg xwb. 24 Rau qhov tus Tswv tus tub qhe yeej tsis nrog luag sib cav sib ceg. Tiam sis nws mam xav mam hais rau txhua leej txhua tus, txawj qhuab qhia, thaum luag ua txhaum rau nws los nws tswj tau nws lub siab, 25 thiab nws muaj lub siab mos siab muag ntuas cov uas pheej cov nyom. Tej zaum Vajtswv yuav pab cov ntawd hloov dua siab tshiab kom lawv los paub qhov tseeb. 26 Thaum ntawd lawv yuav thim xav thiab dim plaws Ntxwg Nyoog lub voj hluas. Lawv yuav ras dheev tias Ntxwg Nyoog twb ntes tau lawv ciaj mus ua nws tes hauj lwm lawm.

3 Kuv xav kom koj paub tias, nyob rau tiam kawg yuav haj yam muaj kev kub ntxhov. 2 Tib neeg yuav xam pom lawv tus kheej xwb, ntshaw nyiaj txiag, khav theeb, muab hlob, tuam mom luag, tsis mloog niam mloog txiv lus, tsis ris luag txiaj ntsig, tsis muab siab npuab leej twg, 3 tsis txawj sib hlub, tsis yuav leej twg hais, hais lus iab hiam luag, tswj tsis tau tus kheej, ua nruj ua tsiv, tsis nyiam qhov zoo, 4 ntxeev siab rau luag, ua neeg cam thawj, tsab ua loj, nyiam kev lom zem heev dua nyiam Vajtswv, 5 lawv ua txuj muab siab npuab Vajtswv, tiam sis lawv tsis coj raws li Vajtswv hais. Cia li txav deb ntawm cov neeg ntawd. 6 Lawv cov ntawd, yuav muaj tej tug txiv neej txeem los rau hauv lub cuab lub yig, thiab haub ntxias cov poj niam tsis muaj tswv yim uas ris lub txim hnyav, thiab huas ntshis tej uas lawv lub siab ntshaw. 7 Txawm cov poj niam no kawm tas zaj tas zog los lawv tsis paub qhov tseeb li.

8 Yanes thiab Yanpes nkawd tawm tsam Mauxes li cas ces cov no kuj tawm tsam qhov tseeb ib yam li ntawd. Cov txiv neej no tej siab tej ntsws lwj tas lawm mas Vajtswv yeej tsis txaus siab rau lawv vim lawv tsis coj raws li qhov tseeb. 9 Txawm li cas los lawv tsuas ua tau txog txij no xwb, vim lawv lub tswv yim ruam yuav raug nthuav tawm rau sawv daws pom, ib yam li tau muaj rau Yanes thiab Yanpes nkawd. 10 Tiam sis koj coj raws nkaus li tej uas kuv qhia, thiab xyaum raws li kuv lub neej, kuv lub hom phiaj, kuv txoj kev ntseeg, kuv lub siab ntev, kuv txoj kev hlub, thiab qhov uas kuv tiv kev txom nyem. 11 Koj yeej paub tias kuv tau raug kev tsim txom thiab kev txom nyem li cas, xws li hauv Athi-aus, Ikhaunias, thiab Lixathas. Kuv tiv tag nrho tej kev tsim txom no mas tus Tswv yeej cawm kuv txhua zaus. 12 Txhua tus uas xav muab siab npuab Vajtswv es raws Yexus Khetos* qab kuj yuav raug tsim txom ib yam nkaus. 13 Tiam sis cov neeg lim hiam, thiab cov neeg txawj dag tsuas yuav muaj phem zuj zus ntxiv xwb. Lawv yuav dag ntxias lwm tus, thiab lwm tus kuj yuav dag ntxias lawv.

14 Tiam sis koj yuav tsum rau siab ntso coj raws li tej uas koj twb kawm thiab raws li tej uas luag yaum koj los ntseeg. Koj yeej paub zoo tias leej twg qhia tej no rau koj. 15 Thaum koj tseem mos liab twb muaj tus qhia Vajtswv Txoj Lus rau koj lawm, koj thiaj muaj tswv yim tau kev cawm dim vim yog muaj kev ntseeg rau Yexus Khetos.* 16 Vajtswv Txoj Lus txhua nqe yog Vajtswv tshoov neeg sau thiab zoo siv los qhia qhov tseeb, ntuas tus ua txhaum, qhia tus ua yuam kev, thiab qhuab ntuas kom ua ncaj ua ncees, 17 kom Vajtswv tus tub qhe thiaj paub txaus thiab muaj txhij muaj txhua los ua txhua yam hauj lwm zoo.

4 Kuv sam hwm li no rau koj tab meeg Vajtswv thiab Yexus Khetos* tus uas yuav txiav txim rau cov ciaj thiab cov tuag, rau thaum nws tshwm nrog nws lub Nceeg Vaj* los. 2 Cia li tshaj tawm Vajtswv txoj lus, rau siab ntso tshaj rau thaum lub caij nyoog zoo thiab lub caij nyoog phem tib si. Cia li ntuas, ceeb toom, thiab txhawb sawv daws. Thaum koj ua li no, rub lub siab ntev thiab siv tswv yim los qhia. 3 Rau qhov yav tom ntej yuav muaj ib lub sij hawm uas tib neeg tsis kam mloog zaj uas pab tau peb* lawm. Tiam sis lawv yuav ua raws li lawv lub siab ntshaw thiab mus caum tej xib hwb uas qhia tej zaj lawv xav mloog xwb. 4 Lawv tsis kam mloog qhov tseeb tiam sis lawv ho cuab pob ntseg mloog tej dab neeg cuav. 5 Tiam sis ntawm koj mas, koj yuav tsum xyuam xim* rau txhua yam, ua tiag tiv kev txom nyem, rau siab ntso tshaj tawm, thiab ua Vajtswv tes hauj lwm kom tiav log.

6 Rau qhov kuv twb zoo ib yam li khob cawv uas muab hliv huv si rau saum lub thaj fij rau Vajtswv lawm, tshuav tsis ntev xwb kuv yeej yuav dua mus. 7 Kuv twb ntaus yeej ntsuj rog ncaj ncees lawm, kuv twb khiav mus txog tom kawg lawm, thiab kuv twb tuav kev ntseeg ruaj nreeg lawm. 8 Txij no mus, twb muab qhov paj tshab* uas pub rau cov ncaj ncees khaws tseg rau kuv lawm. Thaum txog hnub ntawd, tus Tswv uas txiav txim ncaj ncees yuav muab ua paj tshab pub rau kuv. Tsis yog pub rau kuv xwb, tiam sis yuav pub rau txhua tus uas tos ntsoov lub caij nws tshwm los.

9 Kav tsij tuaj saib kuv sai sai. 10 Demas twb tso kuv tseg vim nws ntshaw lub qab ntuj* no heev, nws thiaj mus rau Thexalaunikas lawm. Khexeem mus rau Kalatias hos Titus mus rau Damatias lawm. 11 Tsuas tshuav Lukas nrog kuv nyob xwb. Thov coj Malakaus nrog koj tuaj rau qhov nws yuav pab tau kuv ua Vajtswv tes hauj lwm heev. 12 Tiam sis kuv twb txib Thikikas mus rau Efexaus lawm. 13 Thaum koj tuaj, thov nqa lub tsho tiv no uas kuv muab tso tseg hauv Khapas tsev, hauv lub nroog Rhau-as tuaj. Thiab nqa cov kauj ntawv tuaj, tshwj xeeb cov kauj ntawv uas yog tawv tsiaj.

14 Alexadaws uas yog tus kws ntaus tooj liab, tau ua lim hiam kawg li rau kuv. Vajtswv Yehauvas* mam li ua pauj raws li nws tes hauj lwm. 15 Koj yuav tsum ceev faj nws thiab, rau qhov nws tawm tsam zaj uas peb qhia heev kawg nkaus li.

16 Thawj zaug kuv daws kuv zaj, tsis muaj leej twg tuaj pab kuv txheem li. Lawv puav leej tso kuv tseg tas. Txawm li ntawd los, thov Vajtswv zam txim rau lawv. 17 Tiam sis tus Tswv nrog nraim kuv thiab pub dag zog rau kuv, kom kuv ua tau tes hauj lwm tshaj tawm txoj xov zoo tiav log, xwv lwm haiv neeg thiaj li hnov, thiab nws cawm kuv dim tsov ntxhuav lub qhov ncauj. 18 Tus Tswv yuav cawm kuv dim txhua yam kev lim hiam, thiab tseg kuv rau nws lub Nceeg Vaj* saum ntuj ceeb tsheej. Thov kom nws tau koob meej mus ib txhiab ib txhis tsis kawg. Amees.*

19 Thov xa lus noj qab nyob zoo rau Paxilas thiab Akilas thiab rau Aunexifaulas tsev neeg.

20 Elatas tseem nyob hauv lub nroog Kauleethaus, tiam sis kuv tso Thaufimas tseg rau hauv lub nroog Milethas vim nws mob lawm. 21 Kav tsij tuaj saib kuv ua ntej lub caij ntuj no.

Yunpulas xa xov tuaj rau koj. Pudees, Lainas, Khaudias thiab cov kwv tij sawv daws kuj xa xov tuaj rau koj thiab.

22 Thov kom tus Tswv nrog nraim nej vim nej muaj tus cwj pwm zoo. Thiab thov kom nws foom koob hmoov nplua mias rau nej.