THAWJ TSAB NTAWV RAU TIMAUTES

1 Ntawm no yog Povlauj. Kuv yog Yexus Khetos* ib tug tub txib. Vajtswv uas yog peb tus Cawm Seej, thiab Yexus Khetos* uas peb cia siab rau, tsa kuv ua tes hauj lwm no. 2 Tsab ntawv no yog sau rau Timautes. Koj zoo ib yam li kuv tus tub ntag, koj nrog kuv ua tus Tswv tes hauj lwm.

Thov kom Vajtswv uas yog peb Leej Txiv thiab Yexus Khetos* uas yog peb tus Tswv, foom koob hmoov nplua mias* rau koj, hlub* koj, thiab nrog koj sib raug zoo.

3 Thaum kuv yuav mus rau Maxedaunias, kuv twb hais kom koj nyob twj ywm hauv Efexaus. Tam sim no los, kuv rov hais dua kom koj nyob twj ywm hauv Efexaus es koj thiaj ntuas tau ib txhia kom tsis txhob qhia tej zaj uas txawv tej peb qhia, 4 tsis txhob quav ntsej tej dab neeg thiab tej caj ces. Tej ntawd tsis muaj qab hau dab tsi li, tsuas ua rau neeg yim huab nug txog tej yam uas nkim sij hawm xwb. Tej ntawd tsis muaj feem nrog tej uas Vajtswv pub los txhawb peb txoj kev ntseeg li. 5 Qhov uas kuv sam hwm li no yog kom sawv daws muaj lub siab dawb paug sib hlub, muaj lub siab ncaj ncees* hlub luag, thiab muaj kev ntseeg tuaj hauv nruab siab los hlub lwm tus. 6 Ib txhia tsis kam coj li no, lawv thiaj hais tej zaj uas tsis muaj hauv paus hauv ntsis. 7 Lawv xav ua xib hwb qhia kev cai kawg, tiam sis lawv twb tsis nkag siab tej uas lawv qhia thiab tej uas lawv tseev kom sawv daws ua ntawd.

8 Peb paub tias txoj Kev Cai* yeej zoo, tiam sis yuav tsum coj kom raug cai. 9 Thiab yuav tsum nco ntsoov tias txoj kev cai tsis yog tsa los tswj cov ncaj ncees, tiam sis yog tsa los tswj cov tsis coj cai, cov tsis mloog lus, cov tsis hwm Vajtswv, cov ua txhaum, cov tsis muab siab npuab leej twg, cov tsis nyiam yam uas dawb huv, cov tua niam tua txiv, cov tua neeg, 10 cov ua plees ua yi,* cov txiv neej deev txiv neej, cov tub sab nyiag neeg, cov neeg dag, cov ua tim khawv cuav, thiab ib puas tsav yam uas ntxeev zaj lus qhia uas pab tau peb.* 11 Zaj ntawd qhia raws li txoj xov zoo ci ntsa iab uas Vajtswv tus muaj kev zoo siab tau muab cob rau kuv tshaj tawm.

12 Kuv nco txiaj ntsig heev rau Yexus Khetos* uas yog peb tus Tswv uas pub dag pub zog rau kuv. Nws tso siab rau kuv, nws thiaj muab ib teg hauj lwm cob rau kuv ua. 13 Txawm tias yav tas los kuv tuam mom Vajtswv, tsim txom luag, ua saib tsis taus lwm tus los, nws tseem xam pom kuv thiab. Nws hlub* kuv rau qhov kuv tsis paub tej uas kuv tau ua ntawd, thiab twb yog kuv tsis tau muaj kev ntseeg tiag tiag. 14 Tus Tswv foom koob hmoov nplua mias rau kuv tiag tiag li. Kuv thiaj muab siab rau ntseeg thiab muaj kev hlub vim kuv ua Yexus Khetos* ib tug thwj tim. 15 Yexus Khetos* los hauv lub qab ntuj no yog los cawm tib neeg txhaum. Peb tso siab tau rau tej lus no, thiab yeej tsim nyog sawv daws lees yuav txhua lo. Kuv tus no, yog tus muaj txim loj dua tej tib si. 16 Txawm kuv muaj txim loj dua tej tib si los, kuv tseem tau txais kev khuv leej kom sawv daws pom tias Yexus Khetos* muaj lub siab ntev npaum li cas. Khetos muab kuv ua qauv rau cov uas tso siab plhuav rau nws, kom lawv tau txoj sia ib txhis tsis kawg.

17 Thov kom tus Vaj Ntxwv uas kav mus ib txhis, tus uas tsis txawj puas tsuaj puas ntsoog, tus uas neeg qhov muag tsis pom, nws tib leeg thiaj yog Vajtswv, thov kom nws tau koob meej ci ntsa iab mus ib txhiab ib txhis. Amees.*

18 Kuv tus me tub Timautes’e, kuv muab tej lus sam hwm no cob rau koj, kom thiaj muaj raws li tej lus faj lem uas tau hais txog koj. Thov kom tej lus no pab koj ntaus ntsuj rog ncaj ncees nawb. 19 Thiab pab koj tuav rawv kev ntseeg, thiab muaj lub siab uas tsis muaj chaw thuam li. Muaj ib txhia twb muab tej no xyeeb tseg lawm, lawv txoj kev ntseeg thiaj zoo ib yam li lub nkoj uas tawg tas. 20 Himenias thiab Alexadaws yog ob tug uas tau ua li no ntag. Kuv thiaj muab nkawd cob rau Xatas.* Nkawd raug ntuas li no kom nkawd thiaj paub tias tsis txhob tuam mom Vajtswv.

2 Ua ntej no kuv xav txhawb kom sawv daws thov Vajtswv rau txhua hom neeg, tsis hais taij thov Vajtswv thiab thov kom Vajtswv pab lawv mas sawv daws yuav tau ua Vajtswv tsaug. 2 Thov Vajtswv rau tej vaj ntxwv thiab rau tej nom tswv, xwv peb thiaj nyob kaj siab lug tsis txhawj dab tsi, kom txhua yam uas peb ua thiaj qhia tias peb muab siab npuab Vajtswv thiab ua yam twg los ua tiag tiag. 3 Qhov no yeej zoo thiab haum Vajtswv uas yog peb tus Cawm Seej lub siab. 4 Vajtswv xav kom txhua hom neeg tau kev cawm dim thiab kom lawv los paub qhov tseeb tiag tiag. 5 Tsuas muaj tib tug Vajtswv xwb, thiab muaj tib tug nyob nruab nrab ntawm Vajtswv thiab tib neeg, tus txiv neej ntawd yog Yexus Khetos.* 6 Nws pub nws txoj sia los ua tus nqi txhiv kom txwm nkaus, thiaj txhiv tau txhua tus.* Thaum txog lub caij lub nyoog, tib neeg yuav ua tim khawv txog qhov no. 7 Twb yog yuav tsum ua tim khawv li no, Vajtswv thiaj tsa kuv ua ib tug tshaj tawm thiab ua ib tug tub txib. Kuv yog tus qhia kom lwm haiv neeg los ntseeg thiab paub qhov tseeb. Kuv yeej tsis dag, kuv hais tseeb xwb.

8 Yog li ntawd, txhua zaus uas nej sib txoos ua ke, kuv xav kom cov txiv neej thov Vajtswv. Cia li muab siab npuab Vajtswv es tsa tes thov, tsis txhob chim thiab tsis txhob sib cav sib ceg. 9 Tsis tas li ntawd, cov poj niam yuav tsum hnav tej tsoos uas raug ntsej raug muag uas qhia tias lawv saib taus lwm leej lwm tus, thiab yog neeg thoob tsib to nrog. Tsis yog ntxias plaub hau, coj kub coj hlaws qwj thiab hnav tsuj hnav npuag* kim kim. 10 Tiam sis cov poj niam yuav tsum ua hauj lwm zoo thiaj tsim nyog rau tus poj niam uas muab siab npuab Vajtswv.

11 Cia cov poj niam ua twj ywm kawm es txo hwj chim hlo.* 12 Kuv tsis pub cov poj niam qhia los sis tsab hwj chim siab dua cov txiv neej, tiam sis nws yuav tsum nyob twj ywm. 13 Rau qhov Vajtswv xub tsim Adas, mam tsim Evas. 14 Thiab Adas tsis yog tus uas raug dag ntxias, tiam sis tus poj niam yog tus uas qaug kiag rau tej lus dag ntxias, nws thiaj ua txhaum lawm. 15 Tiam sis yog poj niam yug me nyuam ces yuav tiv thaiv tau nws, yog nws tuav kev ntseeg, muaj kev hlub, coj dawb huv thiab ua neeg thoob tsib to nrog mus li.

3 Tej uas kuv yuav hais no yeej tso siab tau. Yog ib tug txiv neej muaj lub siab xav ua tes hauj lwm saib xyuas,* yeej yog nws ntshaw ib teg hauj lwm zoo heev. 2 Tus uas saib xyuas yuav tsum yog ib tug neeg uas tsis muaj chaw thuam, muaj ib tug poj niam xwb, ua txhua yam hauj sim, ua neeg thoob tsib, ua neeg paub cai, nyiam qhua, txawj qhuab qhia, 3 tsis qaug dej qaug cawv, tsis ua nruj ua tsiv, tiam sis txawj zam rau luag, tsis nyiam sib cav sib ceg, tsis ntshaw nyiaj txiag, 4 nws kav tau nws lub cuab lub yig zoo, thiab nws tej me nyuam yuav tsum mloog lus thiab ua neeg tsheej haj. 5 (Yog ib tug txiv neej twb saib xyuas tsis tau nws lub cuab lub yig, nws yuav ua li cas saib xyuas tau Vajtswv lub koom txoos?) 6 Tsis txhob tsa ib tug txiv neej uas ntseeg tshiab los ua tus saib xyuas tsam nws ho khav theeb ces nws yuav raug txim ib yam li Ntxwg Nyoog. 7 Tsis tas li ntawd, nws yuav tsum tau lub npe zoo tab meeg cov tsis ntseeg thiab, nws thiaj tsis raug luag thuam* thiab mag Ntxwg Nyoog rooj ntxiab.

8 Cov tub leg num los yuav tsum tsheej haj, tsis txhob ntxeev lus,* nws tsuas haus cawv txiv hmab kom hauj sim, thiab txhob ua siab hlob huas rau nws tus kheej xwb. 9 Nws yuav tsum muaj lub siab dawb paug tuav rawv txoj kev ntseeg uas Vajtswv muab npog cia.

10 Cia li sim lawv ua ntej seb puas tsim nyog tuav tes hauj lwm no, mam li cia lawv ua cov tub leg num, thiaj tsis muaj chaw thuam.

11 Cov poj niam los yuav tsum ua neeg tsheej haj, txhob hais lus dag xyav luag moo, ua txhua yam kom hauj sim, thiab muab siab npuab Vajtswv rau txhua yam uas nws ua.

12 Cov tub leg num yuav tsum muaj ib tug poj niam xwb, thiab txawj saib xyuas lawv tej me tub me nyuam thiab lub cuab lub yig zoo. 13 Cov txiv neej uas leg num zoo rau lub koom txoos yuav tau lub npe zoo, lawv thiaj tsis txaj muag qhia hlo lawv txoj kev ntseeg txog Yexus Khetos* rau lwm tus.

14 Kuv vam tias tsis ntev no kuv yuav tau tuaj pom koj, tiam sis kuv sau tej no tuaj rau koj 15 nyob tsam ho muaj chaw khuam cheem kuv lawm, xwv koj thiaj paub tias tsim nyog koj coj li cas hauv Vajtswv cuab neeg. Cuab neeg no yog Vajtswv tus muaj sia zees nyob lub koom txoos uas zoo li tus ncej txheem qhov tseeb. 16 Txoj kev npuab siab rau Vajtswv uas tau muab npog cia yeej tseem ceeb kawg nkaus li. ‘Nws* tshwm los muaj roj muaj ntshav, tiam sis thaum nws muaj lub cev tsis muaj roj muaj ntshav, Vajtswv suav tias nws ncaj ncees. Nws tshwm rau cov tub txib saum ntuj, thiab luag tshaj tawm nws zaj rau lwm haiv neeg. Neeg qab ntuj thiaj los ntseeg nws. Vajtswv coj nws mus saum ntuj tau txais lub hwj chim ci ntsa iab lawm.’

4 Vajtswv lub hwj huam qhia tseeb lawm tias, yav tom ntej yuav muaj ib txhia tso kev ntseeg tseg mus mloog tej lus dag uas hais tias yog Vajtswv tshoov, thiab mloog dab tej lus qhia. 2 Tej lus dag ntawd yog cov neeg siab nkhaus* qhia ntag. Lawv lub siab uas paub qhov zoo qhov phem loog tas ib yam li xuas hlau hlawv. 3 Lawv txwv tsis pub sib yuav ua txij ua nkawm thiab sam hwm tias yuav tsum caiv tej yam zaub mov. Tiam sis cov uas muaj kev ntseeg thiab paub qhov tseeb yeej nkag siab tias tej zaub mov ntawd yog Vajtswv tsim los rau neeg noj ces ua Vajtswv tsaug xwb. 4 Txhua yam uas Vajtswv tsim yeej zoo, tsis tas caiv yog tias ua Vajtswv tsaug mam li noj. 5 Vajtswv txoj lus thiab tej lus thov Vajtswv twb ua rau tej zaub mov ntawd dawb huv lawm.

6 Yog koj qhuab qhia cov kwv tij li no ces koj yuav yog Yexus Khetos* ib tug tub qhe uas zoo heev. Koj cia tej lus uas peb ntseeg* thiab tej lus qhia zoo kawg nkaus uas koj ib txwm yoog los lawd yug koj lub siab. 7 Tsis txhob mloog tej dab neeg uas thuam Vajtswv, zoo li tej zaj uas cov pog laus qhia. Tiam sis koj yuav tsum xyaum tiag es muaj lub hom phiaj kom npuab siab hlo rau Vajtswv. 8 Yog koj xyaum kom lub cev muaj zog npho, tsuas pab tau koj me ntsis xwb. Tiam sis yog koj muab siab npuab Vajtswv tiag ces yuav pab tau txhua yam rau qhov koj yuav tau txais tej koob hmoov uas Vajtswv cog tseg hauv koj lub neej tam sim no, thiab lub neej tom hauv ntej. 9 Tej lus hais tas los no yeej tso siab tau thiab tsim nyog peb ntseeg txhua lo. 10 Twb yog vim li no peb thiaj siv zog ua hauj lwm thiab khwv kawg li, rau qhov peb yeej vam ntsoov Vajtswv tus uas muaj sia zees nyob. Nws yog txhua hom neeg tus Cawm Seej, tshwj xeeb tshaj yog cov uas muab siab npuab Vajtswv.

11 Cia li rau siab ntso qhia tej lus sam hwm no. 12 Tsis txhob cia leej twg saib tsis taus qhov uas koj tseem hluas. Tiam sis cia tej uas koj hais, koj tes hauj lwm, koj txoj kev hlub, koj txoj kev ntseeg, thiab qhov uas koj ua neeg dawb huv, ua qauv zoo rau cov uas muab siab npuab Vajtswv xyaum. 13 Mus txog thaum kuv tuaj, cia li rau siab ntso nyeem ntawv rau sawv daws mloog, txhawb lwm tus lub zog, thiab qhia lwm tus. 14 Nco ntsoov tsis txhob tso tseg yam uas Vajtswv tau pub rau koj los ntawm zaj lus faj lem uas hais txog koj, thaum cov txwj laus tsa tes npuab koj. 15 Cia li muab tej no xav txhij xav txhua, kom thawm koj lub siab lub ntsws thiab txhua yam uas koj ua, sawv daws thiaj pom tseeb tias koj paub tab lawm tiag. 16 Ua tib zoo ntsuam xyuas koj tus kheej thiab tej uas koj qhia nawb. Xyaum tej no kam tiag, yog koj ua li no koj yuav cawm tau koj tus kheej thiab cawm tau cov uas mloog koj qhia.

5 Tsis txhob hais lus nchav nchav* rau ib tug txiv neej laus. Tiam sis ua tib zoo hais nws ib yam li hais rau koj txiv thiab hais cov txiv neej uas tseem hluas ib yam li hais rau koj cov kwv tij. 2 Hais cov poj niam laus ib yam li hais rau koj niam, thiab ua lub siab dawb paug hais cov poj niam uas tseem hluas ib yam li hais rau koj tej nkauj muam.

3 Saib taus cov poj ntsuam uas tsis muaj leej twg pab kiag li.* 4 Tiam sis yog ib tug poj ntsuam muaj me tub me nyuam, muaj xeeb leej xeeb ntxwv, cia lawv muab siab npuab Vajtswv es tig los pab lawv tsev neeg ua ntej. Lawv yuav tsum pauj niam txiv, pog yawg txiaj ntsig li tsim nyog. Ua li ntawd thiaj haum Vajtswv siab. 5 Tus poj ntsuam tsis muaj chaw vam khom tiag uas ua ntsuag kwv ntsuag tij, ntsuag tub ntsuag kiv, yeej vam ntsoov Vajtswv thiab niaj hnub niaj hmo taij thov Vajtswv pab. 6 Tiam sis tus poj ntsuam uas tau hau ntsoov huas yam uas nws lub siab ntshaw* xwb, txawm nws tseem ciaj los zoo li nws twb tuag lawm. 7 Yog li ntawd, rau siab cob qhia tej no kom sawv daws thiaj tsis muaj chaw thuam. 8 Yog leej twg tsis saib xyuas nws tsev neeg, tshwj xeeb yog cov uas nrog nws nyob ua ib tse ces twb yog nws tsis lees yuav txoj kev ntseeg lawm. Nws tseem phem tshaj tus uas tsis tau ntseeg lawm thiab.

9 Yuav tsum muab tus poj ntsuam rau npe kom tau kev pab yog tias nws hnub nyoog tshaj 60 xyoo, yav tas los nws ua ncaj rau nws tus txiv,* 10 sawv daws qhuas tias nws ua hauj lwm zoo, nws tu tau nws cov me nyuam coj zoo, nws nyiam tos txais qhua, nws tau ntxuav cov dawb huv* ko taw,* nws tau pab cov txom nyem, thiab nws yeej muab siab rau ua txhua yam hauj lwm zoo.

11 Tiam sis tsis txhob muab cov poj ntsuam uas tseem hluas rau npe, rau qhov thaum lawv ntshaw txiv ces yuav cheem lawv tes hauj lwm rau Khetos, thiab lawv yuav xav nrhiav dua txij nkawm. 12 Thaum ntawd ces yog lawv ua txhaum vim lawv rhuav tej lus uas lawv xub cog tseg. 13 Tsis tas li ntawd, tej zaum lawv yuav xyaum ua neeg tub nkeeg mus cuav zos ib lub tsev rau ib lub. Tsis yog nyob dawb xwb, tiam sis tseem mus taug xaiv thiab tab kaum luag lwm tus, thiab tham txog tej yam uas tsis tsim nyog tham. 14 Yog li ntawd, kuv xav kom cov poj ntsuam uas tseem hluas rov qab nrhiav neej, muaj me tub me nyuam, thiab tu lub cuab lub yig, xwv yeeb ncuab thiaj tsis muaj chaw thuam lawv. 15 Ib txhia poj ntsuam twb raug ntxias mus caum Xatas lawm. 16 Yog cov poj niam uas ntseeg ho muaj tej txheeb ze uas yog ib tug poj ntsuam, cia li nqis tes pab nws, xwv thiaj tsis poob rau lub koom txoos. Yog ua li no, lub koom txoos thiaj tau kev los saib xyuas cov poj ntsuam uas tsis muaj leej twg pab kiag li.

17 Cia li hwm cov txwj laus uas tuav hauj lwm zoo saib xyuas lub koom txoos. Tsim nyog hwm lawv ob npaug, tshwj xeeb yog cov uas siv zog qhia Vajtswv txoj lus thiab cob qhia sawv daws. 18 Vajtswv Txoj Lus twb hais tias, “Thaum nyuj tab tom tsuj mog* hauv tshav ntaus qoob, tsis txhob muab tawb looj nyuj qhov ncauj,” thiab, “Tsim nyog tus ua hauj lwm tau nqi zog.” 19 Yog leej twg liam txim rau ib tug txwj laus tiam sis tsis muaj ob los sis peb leeg ua tim khawv ces tsis txhob ntseeg. 20 Cia li ntuas tus uas pheej ua txhaum tab meeg sawv daws kom lwm tus thiaj paub ntshai. 21 Kuv sam hwm li no rau koj tab meeg Vajtswv, Yexus Khetos,* thiab cov tub txib saum ntuj uas Vajtswv xaiv cia, kom koj coj raws li tej uas kuv qhia koj no. Tsis txhob xaiv leej twg ntsej muag los sis npuab leej twg qab tshob.*

22 Tsis txhob maj tsa ib tug txiv neej twg los tuav hauj lwm,* tsis txhob koom nrog luag tej kev txhaum, thiab yuav tsum ua neeg dawb huv.

23 Tsis txhob haus dej nkaus xwb. Koj yuav tsum haus me ntsis cawv txiv hmab kom pab tau koj lub plab thiab pab tau qhov uas koj pheej mob ntsuj ntsuav.

24 Ib txhia tej kev txhaum mas sawv daws yeej paub txog ces lawv raug txim tam sid. Tiam sis ib txhia tej kev txhaum lwm hnub mam muab nthuav tawm. 25 Ib yam li ntawd, muaj tej hauj lwm zoo uas sawv daws yeej paub txog, tiam sis kuj muaj tej hauj lwm zoo uas lwm hnub mam muab nthuav tawm, zais tsis tau li.

6 Cov ua qhev yuav tsum xam pom tias tsim nyog hwm lawv tus tswv tiag tiag, xwv thiaj tsis muaj leej twg thuam Vajtswv lub npe thiab nws tej lus qhia. 2 Tsis tas li ntawd, cov qhev uas lawv tus tswv yog ib tug ntseeg, lawv tsis txhob ua saib tsis taus nws vim nws yog ib tug kwv tij. Tiam sis yim huab zoo siab ua hauj lwm, rau qhov tus uas lawv ua qhev rau ntawd yog ib tug ntseeg uas sawv daws hlub tshua.

Rau siab ntso qhia thiab txhawb kom sawv daws coj raws li no. 3 Yog leej twg qhia txawv zaj no, los sis tsis pom zoo raws li zaj uas pab tau peb* uas peb tus Tswv Yexus Khetos qhia, thiab tsis pom zoo raws li tej lus qhia kom muab siab npuab Vajtswv 4 ces twb yog tus ntawd khav theeb thiab tsis nkag siab ib yam dab tsi li. Nws tsuas xav zes kom muaj kev sib cav sib ceg, thiab nyiam sib cam txog tej lo lus tsis muaj hauv paus hauv ntsis. Tiam sis tej ntawd ua rau neeg sib khib, sib faib ua pab ua pawg, xyav luag moo, thiab xav phem txog lwm tus. 5 Thiab kuj ua rau tej neeg uas tsis muaj lub siab dawb huv thiab tsis paub qhov tseeb lawd, sib cav tas zog txog tej nyuag yam uas tsis tseem ceeb. Lawv xav tias yuav tsum muab siab npuab Vajtswv kom lawv thiaj tau zoo. 6 Thaum peb muab siab npuab Vajtswv yeej tau zoo heev tiag, tiam sis yuav tsum yog peb txaus siab rau tej uas peb muaj. 7 Thaum yug peb, peb yeej tsis nqa dab tsi los mas thaum peb nruam sim los peb yeej nqa tsis tau dab tsi mus. 8 Yog li ntawd, yog peb muaj noj muaj hnav ces peb cia li txaus siab rau tej ntawd.

9 Tiam sis cov uas xav xav nplua nuj yuav qaug rau kev sim siab, thiab yuav ua yej ua ntxiab cuab lawv. Tej yam tsis muaj qab hau* uas lawv lub siab ntshaw yuav ua rau lawv raug mob thiab coj lawv mus raug kev puas tsuaj puas ntsoog. 10 Tej kev phem lub hauv paus yog pib ntawm kev ntshaw nyiaj txiag ntag. Cov uas cia lawv lub siab mus ntshaw tej no, thiaj yuam kev deb heev thiab tso kev ntseeg tseg lawm. Lawv rov ua rau lawv tus kheej raug mob* txom nyem ntsuav.

11 Tiam sis koj uas yog Vajtswv tug neeg, cia li khiav deb ntawm tej no. Yeej meem ua neeg ncaj ncees, muab siab npuab Vajtswv, muaj kev ntseeg, muaj kev hlub, ua siab ntev thev, thiab muaj lub siab mos siab muag. 12 Cia li ntaus ntsuj rog ncaj ncees uas txhawb kev ntseeg. Tuav rawv txoj sia ib txhis tsis kawg uas Vajtswv hu koj los yuav. Koj twb ua tim khawv zoo txog qhov no tab meeg coob leej ntau tus lawm.

13 Kuv sam hwm koj tab meeg Vajtswv tus uas yug ib puas tsav yam txoj sia, thiab Yexus Khetos* tus uas ua tim khawv zoo tab meeg sawv daws ntawm Phauthi-as Philaj xub ntiag, tias 14 kom cia li ua raws li tej lus sam hwm no huv tib si. Tsis txhob pub ib yam dab tsi tsuas koj thiab tsis txhob pub leej twg muaj chaw thuam koj mus txog thaum peb tus Tswv Yexus Khetos ua nws lub hwj chim tshwm los. 15 Nws yog tus Huab Tais uas muaj kev zoo siab. Thaum txog caij txog nyoog, nws mam li ua nws lub hwj chim tshwm los. Nws yog tus Vaj Ntxwv uas kav txhua tus vaj ntxwv, thiab yog tus Tswv uas kav txhua tus tswv 16 mas nws tib leeg thiaj yog tus tsis txawj tuag. Nws nyob hauv qhov kaj uas tsis muaj leej twg txav tau ze. Tsis tau muaj leej twg pom nws thiab lawv qhov muag yeej pom tsis tau nws. Thov kom nws tau koob meej thiab hwj chim mus ib txhis. Amees.*

17 Cia li qhia cov muaj txiag nplua nuj hauv lub qab ntuj* no kom tsis txhob ua neeg khav theeb. Tsis txhob vam khom tej nyiaj txiag uas yuav txawj ploj mus. Tiam sis vam khom Vajtswv tus uas pub nplua mias rau peb thiab pub txhua yam kom peb txaus siab. 18 Qhia kom lawv xyaum ua neeg zoo es ua txhua yam hauj lwm zoo, thiab ua neeg siab dawb, zoo siab hlo pub rau luag. 19 Cia li khaws tej yam muaj nqis uas yog Vajtswv pub, thiaj ua tau lub chaw cog ruaj khov rau yav tom hauv ntej. Yog lawv ua li no, thiaj yog lawv tuav rawv txoj sia tiag tiag.

20 Timautes’e, ua tib zoo khaws yam uas Vajtswv tau muab cob rau koj lawd. Tsis txhob mus mloog tej lus qhia tsis muaj qab hau uas tawm tsam Vajtswv. Thiab tsis txhob mus mloog tej lus uas luag ua txuj qhuas tias yog kev txawj ntse tiam sis tsuas ntxeev qhov tseeb xwb. 21 Vim lawv khav tias lawv txawj ntse li no, lawv thiaj tso kev ntseeg tseg lawm.

Thov Vajtswv foom koob hmoov nplua mias rau koj.