THAWJ TSAB NTAWV RAU COV THEXALAUNIKAS

1 Ntawm no yog Povlauj. Xivanas* thiab Timautes nkawd kuj nrog kuv nyob no thiab. Tsab ntawv no yog sau rau lub koom txoos hauv Thexalaunikas uas nrog Vajtswv tus uas yog Leej Txiv thiab nrog tus Tswv Yexus Khetos koom ib lub siab.

Thov kom Vajtswv foom koob hmoov nplua mias* rau nej thiab nrog nej sib raug zoo.

2 Thaum peb thov Vajtswv pab nej mas peb yeej nco ntsoov ua Vajtswv tsaug tias muaj nej. 3 Peb yeej nco ntsoov tes hauj lwm uas nej ua tab meeg peb tus Vajtswv uas yog Leej Txiv, vim nej muaj kev ntseeg thiab muaj kev hlub. Nej ua siab ntev tiv kev txom nyem vim nej cia siab ntsoov rau peb tus Tswv Yexus Khetos. 4 Cov kwv tij uas Vajtswv hlub’e, peb yeej paub tias Vajtswv xaiv nej cia lawm. 5 Txoj xov zoo uas peb tshaj tawm rau nej tsis yog lam hais qhuav xwb, tiam sis muaj kuab kawg li. Lub hwj huam dawb huv nrog nraim peb, thiab peb muaj kev ntseeg ruaj rau tej uas peb qhia. Nej yeej paub lawm tias thaum peb nrog nej, peb coj li cas. 6 Nej thiaj xyaum tau peb thiab xyaum tau tus Tswv. Txawm tias nej raug kev tsim txom hnyav heev los, nej lees yuav Vajtswv txoj lus thiab muaj txoj kev xyiv fab uas lub hwj huam dawb huv pub. 7 Nej ua tau tus qauv zoo rau txhua tus ntseeg hauv lub xeev Maxedaunias thiab hauv lub xeev Akhayas xyaum.

8 Twb yog muaj nej, Vajtswv Yehauvas* txoj lus thiaj nrov ncha mus thoob Maxedaunias thiab Akhayas. Tib neeg nyob txhua qhov twb hnov txog nej txoj kev ntseeg rau Vajtswv lawm, twb tsis tas peb yuav hais rau leej twg li. 9 Txawm peb mus txog twg los luag yeej hais txog thaum peb ntsib nej thawj zaug es nej tso nej tej dab tej mlom tseg los cuag Vajtswv. Nej thiaj los ua Vajtswv tus uas muaj sia zees nyob tiag cov tub qhe 10 mas nej tos ntsoov Vajtswv tus Tub uas yuav los saum ntuj ceeb tsheej los. Vajtswv twb tsa nws tus Tub Yexus sawv hauv qhov tuag rov los lawm mas tus Tub ntawd yuav cawm peb dim txoj kev txiav txim* uas tseem yuav los.

2 Cov kwv tij, nej yeej paub tias thaum peb tuaj saib nej, yeej tsis nkim peb lub zog li. 2 Nej twb hnov lawm tias thaum wb tuaj hauv Filipis, wb raug tsim txom thiab luag saib tsis taus wb kiag li. Txawm wb raug tawm tsam li ntawd los, Vajtswv yeej pab wb ua siab tawv qhawv qhia Vajtswv txoj xov zoo rau nej. 3 Qhov uas peb txhawb nej, tsis yog peb xav yuam kev, tsis yog peb muaj nplooj siab xav phem, thiab kuj tsis yog peb xav dag ntxias nej. 4 Vajtswv yeej pom zoo rau peb tshaj tawm txoj xov zoo. Yog li ntawd, tsis yog peb qhia kom haum neeg siab tiam sis peb qhia kom haum Vajtswv siab. Vajtswv yog tus tshuaj peb lub siab.

5 Nej yeej paub tias peb tsis lam qhuas nej los sis ua ncauj qab zib nplaig qab ntse ntxias nej. Vajtswv yeej ua tim khawv pom. 6 Thiab peb tsis ntshaw koob meej ntawm nej los sis ntawm lwm tus. Peb uas yog Khetos cov tub txib yeej muaj cai thov kom nej yug peb, los peb tsis xav ua nra hnyav rau nej. 7 Tiam sis thaum peb nrog nej nyob, peb ua siab mos siab muag tu nej ib yam li leej niam ua siab ntev hlub thiab tu* nws cov me nyuam. 8 Peb yeej hlub nej kawg li, peb thiaj npaj siab tias tsis yog peb yuav qhia Vajtswv txoj xov zoo rau nej xwb, tiam sis peb siv tag nrho peb lub neej los pab nej tsis khuv xim li.

9 Cov kwv tij, nej yeej nco txog qhov uas peb khwv iab khwv daw. Thaum peb tuaj tshaj tawm Vajtswv txoj xov zoo rau nej, peb khwv nruab hnub hmo ntuj los yug peb, thiaj tsis ua nra hnyav rau nej leej twg li. 10 Nej yeej ua tau tim khawv nrog Vajtswv tias peb ua neeg dawb huv, thiab ua ncaj ua ncees rau nej cov ntseeg, tsis muaj chaw thuam li. 11 Nej yeej paub tias peb txhawb thiab nplig nej tas zog thiab pheej hais nej tsis tseg, ib yam li leej txiv hais nws tej me nyuam. 12 Tos peb ua li no los twb yog peb xav kom nej ua lub neej uas haum Vajtswv siab. Vajtswv yog tus hu nej los txais nws txoj kev kav* thiab nws lub koob meej ci ntsa iab.

13 Twb yog li ntawd peb thiaj ua Vajtswv tsaug tsis tseg tsis tu. Rau qhov thaum nej hnov peb qhia Vajtswv txoj lus, nej yeej ntseeg tias txoj lus ntawd yog Vajtswv li, tsis yog neeg li, vim yeej muaj tseeb li ntawd tiag. Txoj lus ntawd tab tom ua hauj lwm rau hauv nej cov uas ntseeg lub siab. 14 Cov kwv tij, nej kuj xyaum ib yam li cov koom txoos hauv Yudias uas nrog Yexus Khetos* koom ib lub siab. Nej raug nej haiv neeg tsim txom ib yam li lawv raug cov Yudais tsim txom thiab. 15 Cov Yudais ntawd yog cov uas tua cov cev Vajtswv lus mas lawv tseem tua tus Tswv Yexus thiab. Nim no lawv ho tsim txom peb. Tej uas lawv ua ntawd yeej tsis haum Vajtswv siab kiag li, kuj pab tsis tau ib tsoom neeg li thiab, 16 vim cov Yudais txwv tsis pub peb qhia lwm haiv neeg kom lawv dim. Cov Yudais ua li no, lawv tsuas lob txim ntxiv rau lawv xwb. Zaum no Vajtswv yeej yuav rau txim rau lawv ntag.

17 Cov kwv tij, thaum peb ncaim nej ib nyuag ntu (tsuas ncaim lub cev xwb, tsis ncaim lub siab), vim peb nco nej heev, peb thiaj nrhiav nrhw kev kom rov tau pom nej tim ntsej tim muag. 18 Twb yog li ntawd peb thiaj xav rov tuaj pom nej dua. Kuv tus kheej kiag, twb nrhiav kev tuaj ob zaug lawm, tiam sis Xatas tav kuv kev. 19 Thaum tus Tswv Yexus rov los,* peb yuav muaj kev cia siab li cas? Cov uas yuav ua rau peb xyiv fab thiab zoo tam li lub kaus mom kub uas peb muaj chaw khav, yog leej twg? Twb yog nej ntag. 20 Nej yog peb qhov chaw khav thiab yog peb txoj kev xyiv fab ntag.

3 Peb xav hnov nej xov kawg li, tos tsis taus li lawm. Peb thiaj pom zoo nyob twj ywm hauv Athees 2 es txib peb tus kwv tij Timautes tuaj saib nej. Timautes yog Vajtswv ib tug tub qhe tshaj tawm txoj xov zoo txog tus Khetos. Nws mam li txhawb kom nej sawv khov kho thiab nplig nej lub siab kom nej yim huab muaj kev ntseeg, 3 xwv tej kev txom nyem no thiaj tsis ua rau ib tug twg qaug zog. Nej yeej paub lawm tias peb txhua tus yuav tsum raug tsim txom li no, tsis muaj ib tug zam dhau li. 4 Thaum peb tseem nrog nej nyob peb twb qhia nej ua ntej tias peb yuav raug tsim txom. Nim no nej pom lawm tias tau muaj li ntawd tiag. 5 Twb yog li ntawd, kuv xav hnov nej moo heev, tos tsis taus li, kuv thiaj txib neeg tuaj taug qab seb nej kev ntseeg zoo li cas lawm. Kuv txhawj tsam Ntxwg Nyoog* ntxias tau nej ces tej uas peb siv zog khwv los txhawb nej ho tas dawb tas do xwb.

6 Tiam sis Timautes twb tuaj saib nej thiab rov los txog peb lawm. Nws qhia peb tias nej tuav rawv kev ntseeg thiab txawj sib hlub heev. Nej tseem nco ntsuj ntsoov txog peb thiab tos tsis taus xav pom peb, ib yam li peb xav pom nej. 7 Cov kwv tij’e, twb yog vim li ntawd, txawm peb tu ncua thiab raug kev txom nyem npaum li cas los, thaum peb hnov nej moo thiab hnov tias nej tuav kev ntseeg ruaj nreeg mas txhawb tau peb lub zog heev. 8 Qhov uas nej tuav kev ntseeg ruaj khov rau tus Tswv ua rau peb muaj zog npho tuaj. 9 Twb yog muaj nej peb thiaj zoo siab xyiv fab ua luaj rau ntawm Vajtswv. Peb yuav pauj Vajtswv txiaj ntsig li cas thiaj tsim nyog? 10 Peb niaj hnub niaj hmo taij thov Vajtswv tsis tseg tsis tu kom peb tau pom nej tim ntsej tim muag, thiab tau tsav kev ntseeg rau yam uas nej tu ncua.

11 Nim no thov kom Vajtswv uas yog peb Leej Txiv, thiab thov kom peb tus Tswv Yexus qhib kev rau peb tuaj pom nej. 12 Tsis tas li ntawd, thov tus Tswv pab kom nej yim huab txawj sib hlub thiab hlub luag lwm tus ib yam li peb hlub nej. 13 Ua li no, nws yuav txhawb nej lub siab kom nyob ruaj khov thiab dawb huv, tsis muaj chaw thuam tab meeg Vajtswv uas yog peb Leej Txiv, rau thaum peb tus Tswv Yexus rov los* nrog nws cov xaiv tseg.*

4 Cov kwv tij, peb twb qhia nej lawm tias nej yuav tsum ua lub neej zoo li cas thiaj haum Vajtswv siab mas nej yeej ua li ntawd lawm tiag. Nim no peb tuav Tswv Yexus lub npe thov thiab txhawb kom nej rau siab ntso ua li no mus ntxiv. 2 Nej yeej paub zoo txog tej lus sam hwm uas peb tuav Tswv Yexus lub npe qhia rau nej lawd.

3 Nej yuav tsum ua lub neej dawb huv thiab tsis txhob ua plees ua yi* es thiaj raws li Vajtswv lub siab nyiam. 4 Nej nyias yuav tsum paub tswj nyias lub cev kom dawb huv thiab kom haum Vajtswv siab.* 5 Tsis txhob ua li tej haiv neeg tsis paub Vajtswv uas cia kev nkauj kev nraug tswj nrees lawv mas lawv thiaj ua txhaum tsis paub dhuav li. 6 Nej tsis txhob ua dhau cai es ua txhaum nej tus kwv tij li no, rau qhov Vajtswv Yehauvas* yog tus uas yuav teem txim rau tej kev txhaum no tib si. Peb twb qhia tej no tshab tshab rau nej ua ntej lawm. 7 Vajtswv hu peb los ua neeg dawb huv, tsis yog hu los ua phem ua qias. 8 Yog li ntawd, tus uas hla tej lus no tsis yog hla neeg, tiam sis yog nws hla Vajtswv tus uas pub lub hwj huam dawb huv rau nej.

9 Tiam sis peb tsis tas sau ntawv tuaj txhawb kom nej sib hlub li ib cuab kwv tij, rau qhov Vajtswv twb qhia nej ib leeg txawj hlub ib leeg lawm. 10 Peb paub tias nej yeej hlub tag nrho cov kwv tij thoob Maxedaunias lawm. Tiam sis cov kwv tij’e, peb xav txhawb kom nej haj yam txawj sib hlub tshaj ntawd ntxiv thiab. 11 Nej yuav tsum xyaum ua neeg zoo, txhob ntau ncauj ntau lus, nyias ua nyias tes hauj lwm es txhob tab kaum luag, thiab siv yus ob txhais tes los ua hauj lwm, ib yam li peb twb qhia rau nej lawd. 12 Yog nej ua li no, ib tsoom neeg* thiaj pom tias nej coj tau zoo thiab tsis tos luag ib yam dab tsi li.

13 Tsis tas li ntawd, cov kwv tij, peb xav kom nej paub tseeb tias cov uas nruam sim zoo li cas lawm, nej thiaj tsis quaj ntsuag li cov uas tsis muaj chaw vam. 14 Peb twb ntseeg tias Yexus tuag thiab sawv rov qab los lawm. Yog li ntawd, Vajtswv yeej yuav tsa cov thwj tim uas tuag ncaj ncees rau Yexus sawv rov los thiab. 15 Peb thiaj muab Vajtswv Yehauvas* txoj lus qhia nej tias, peb cov uas muaj txoj sia nyob mus txog thaum tus Tswv rov los,* yeej yuav tsis sawv mus saum ntuj ua ntej cov uas xub tuag lawd. 16 Thaum ntawd tus Tswv yuav nqes saum ntuj los hu nrov nrov li tus thawj tub txib saum ntuj lub suab hu, thiab yuav hnov Vajtswv lub suab raj suab xyu nrov ces Khetos cov thwj tim uas xub tuag lawd yuav sawv rov los ua ntej. 17 Tom qab ntawd, peb cov uas tseem muaj txoj sia nyob mam li nrog huab nrog cua mus nrog lawv ua ke mas peb yuav mus cuag tus Tswv saum ib nta ntuj thiab peb yuav tau nrog tus Tswv nyob mus li. 18 Cia li muab tej lus no los nplig txhua tus siab.

5 Cov kwv tij, tsis tas kuv yuav sau tuaj qhia nej tias yuav muaj tej no rau lub caij lub nyoog twg. 2 Nej yeej paub tseeb lawm tias Vajtswv Yehauvas* hnub yuav los ib yam nkaus li tub sab tuaj hmo ntuj. 3 Thaum nej hnov luag hais tias, “Muaj kev thaj yeeb nyab xeeb lawm lauj!” ces lawv yuav raug kev puas tsuaj nthawv nthav, ib yam li tus poj niam mob plab nthawv nthav yuav yug me nyuam mas lawv yuav khiav tsis dim li. 4 Tiam sis, cov kwv tij, nej tsis yog cov uas nyob hauv qhov tsaus ntuj. Yog li, hnub ntawd yuav tsis ua rau nej poob siab li tej tub sab. 5 Nej yeej yog cov uas nyob rau qhov kaj thiab nyob nruab hnub, tsis yog cov uas nyob hmo ntuj thiab nyob hauv qhov tsaus ntuj.

6 Yog li ntawd, tsis txhob tsaug zog li lwm cov, tiam sis cia li feeb meej thiab ceev faj zov tos. 7 Tsuas yog thaum hmo ntuj, neeg thiaj pw tsaug zog. Thiab tsuas yog thaum hmo ntuj, neeg thiaj haus cawv qaug xwb. 8 Tiam sis peb cov uas nyob nruab hnub, peb yuav tsum feeb meej es muab kev ntseeg thiab kev hlub los ua daim hlau thaiv hauv siab, thiab muab txoj kev vam tias peb yuav dim los ua lub kaus mom hlau ntoo. 9 Rau qhov tsis yog Vajtswv xaiv peb los raug kev puas tsuaj, tiam sis nws xav kom peb dim, vim muaj peb tus Tswv Yexus Khetos. 10 Twb yog nws tuag txhiv peb, txawm peb ciaj thiab tuag los peb yuav tau nrog nws nyob ua ke. 11 Yog li ntawd, nej ib leeg cia li txhawb ib leeg lub zog thiab ib leeg pab ib leeg, ib yam li tam sim no nej niaj hnub ua.

12 Cov kwv tij, peb thov kom nej hwm cov uas niaj hnub siv zog ua hauj lwm pab nej. Lawv pab saib xyuas nej raws li tus Tswv pom zoo thiab qhuab ntuas nej. 13 Nej yuav tsum yim huab hlub lawv thiab saib taus lawv vim lawv tes hauj lwm. Cia li txhawb kom sawv daws nyob sib haum xeeb. 14 Tsis tas li ntawd, peb txhawb kom nej cov kwv tij nkauj muam, cia li ntuas cov uas tsis mloog lus, hais lus mos lus muag nplig cov uas nyuaj siab, txhawb cov uas qaug zog, thiab ua siab ntev rau txhua tus. 15 Tsis txhob pub ib tug twg ua phem pauj phem, tiam sis ib leeg yuav tsum nrhiav kev ua zoo rau ib leeg thiab ua zoo rau txhua leej txhua tus.

16 Cia li niaj hnub zoo siab xyiv fab. 17 Thov Vajtswv tsis tseg tsis tu. 18 Ua Vajtswv tsaug rau txhua yam. Vajtswv xav kom Yexus Khetos* cov thwj tim coj li no. 19 Tsis txhob tav lub hwj huam dawb huv uas zoo li cub hluav taws ua rau nej kub siab lug ua hauj lwm. 20 Tsis txhob thuam tej lus uas Vajtswv tshoov kom neeg qhia. 21 Ua tib zoo tshuaj txhua yam seb yam twg zoo ces tuav rawv yam ntawd. 22 Txav deb ntawm txhua yam kev phem lim hiam.

23 Thov kom Vajtswv tus uas muaj kev sib haum xeeb pab nej ua neeg dawb huv. Thiab thov kom Vajtswv tsom kwm nej ib tsoom kwv tij, kom tus cwj pwm uas nej muaj thiab nej lub siab dawb huv kawg nkaus tsis muaj chaw thuam mus txog thaum peb tus Tswv Yexus Khetos rov los.* 24 Vajtswv tus uas hu nej los yog tus ncaj ncees mas nws yeej yuav pab kom nej ua tau li no.

25 Cov kwv tij’e, nco ntsoov thov Vajtswv pab peb.

26 Thov xa lus noj qab nyob zoo* rau cov kwv tij sawv daws.

27 Kuv tuav tus Tswv lub npe thov kom nej muab tsab ntawv no nyeem rau cov kwv tij sawv daws mloog.

28 Thov kom peb tus Tswv Yexus Khetos foom koob hmoov nplua mias rau nej.