SAU RAU COV KAULAUXIS

1 Ntawm no yog Povlauj uas Vajtswv pom zoo hu los ua Yexus Khetos* ib tug tub txib, thiab peb tus kwv tij Timautes. 2 Tsab ntawv no yog sau rau nej cov uas Vajtswv xaiv tseg* uas yog cov kwv tij ncaj ncees nrog Khetos koom ib lub siab hauv Kaulauxis.

Thov kom Vajtswv uas yog peb Leej Txiv foom koob hmoov nplua mias rau nej thiab nrog nej sib raug zoo.

3 Thaum peb thov Vajtswv rau nej, peb niaj hnub ua Vajtswv uas yog Tswv Yexus Khetos Leej Txiv tsaug 4 rau qhov peb hnov tias nej muaj kev ntseeg rau Yexus Khetos* thiab hlub cov uas Vajtswv xaiv tseg* kawg nkaus li. 5 Tos nej ua tau li ntawd los, nej muaj chaw vam tias Vajtswv npaj koob hmoov saum ntuj ceeb tsheej rau nej lawm. Nej muaj chaw vam li no vim nej twb hnov txoj xov zoo txog qhov tseeb 6 uas tau nrov ncha tuaj txog nej. Txoj xov zoo twb tawg paj txi txiv thiab nrov ncha thoob ntiaj teb lawm. Txoj xov zoo kuj nrov ncha hauv nej li ntawd, txij hnub uas nej hnov thiab paub tseeb tias txoj kev hlub uas Vajtswv pub dawb yog li cas tiag. 7 Epafas uas yog ib tug tub qhe li peb, yog tus qhia tej ntawd rau nej. Nws yog Khetos ib tug tub qhe ncaj ncees sawv peb chaw ua hauj lwm. 8 Nws kuj qhia peb tias Vajtswv lub hwj huam ua rau nej txawj sib hlub heev.

9 Vim li no, txij hnub uas peb hnov txog nej peb thiaj thov Vajtswv tsis tseg tsis tu pab kom nej muaj tswv yim, thiab kom Vajtswv lub hwj huam pab nej nkag siab, nej thiaj paub qhov tseeb txog yam uas Vajtswv pom zoo. 10 Nej thiaj ua tau lub neej uas phim cov teev tiam Vajtswv Yehauvas,* thiab ua tau txhua yam haum nws siab. Nej lub neej thiaj tawg paj txi txiv ua tau txhua yam hauj lwm zoo, thiab yuav yim huab paub qhov tseeb txog Vajtswv. 11 Thov kom Vajtswv lub hwj chim ci ntsa iab pub nej muaj zog loj zog nchav, xwv nej thiaj ua taus siab ntev thiab muaj kev xyiv fab thev dhau txhua yam. 12 Thiab ua Leej Txiv tsaug vim nws pub nej muaj feem txais qub txeeg qub teg nrog cov uas xaiv tseg* nyob hauv qhov kaj.

13 Nws cawm peb dim ntawm qhov tsaus ntuj uas tswj kav peb, thiab coj peb los rau hauv lub nceeg vaj* uas nws tus Tub uas nws hlub kav lawm. 14 Twb yog muaj tus Tub ntawd txhiv peb dim, Vajtswv thiaj zam tau peb lub txim. 15 Khetos muaj tus yam ntxwv zoo ib yam li Vajtswv tus uas peb qhov muag tsis pom. Nws yog thawj tug uas Vajtswv tsim ua ntej ib puas tsav yam tib si. 16 Rau qhov Vajtswv txib kom nws tsim ib puas tsav yam saum ntuj thiab hauv ntiaj teb no, tsis hais yam uas qhov muag pom, yam uas qhov muag tsis pom, cov muaj meej mom, cov ua tswv, cov thawj coj,* thiab cov uas muaj hwj chim kav. Vajtswv txib nws tsim ib puas tsav yam mas tej ntawd yog nws li. 17 Tsis tas li ntawd, Khetos yog tus xub nyob ua ntej txhua tsav txhua yam. Vajtswv mam li kom nws tsim ib puas tsav yam los. 18 Nws yog lub taub hau rau lub cev uas yog lub koom txoos. Nws yog lub hauv paus, yog thawj tug sawv hauv qhov tuag rov los kom nws thiaj tau ua thawj tug ntawm ib puas tsav yam. 19 Rau qhov Vajtswv yeej pom zoo kom nws muaj ib puas tsav yam txhij txhua. 20 Twb yog muaj Khetos cov ntshav saum tus ncej ntoo,* Vajtswv thiaj coj tau ib puas tsav yam saum ntuj ceeb tsheej thiab hauv ntiaj teb no los nrog nws sib raug zoo.

21 Yav tas los nej nyob deb Vajtswv thiab nrog nws ua yeeb ncuab rau qhov nej lub siab xav ntsoov rau tej hauj lwm phem xwb. 22 Tiam sis Vajtswv coj tau nej los nrog Nws sib raug zoo, vim Khetos tso nws cev nqaij daim tawv tseg tuag theej nej, kom nej dawb huv, tsis muaj ib qho txhaum, thiab tsis muaj chaw thuam rau thaum muab nej pub rau Vajtswv. 23 Tiam sis nej yuav tsum tuav rawv kev ntseeg, ib yam li lub tsev uas txhos ruaj khov rau saum lub plag tsev. Txhob cia ib yam dab tsi ua rau nej tso txoj kev vam uas nej tau hnov ntawm txoj xov zoo tseg. Txoj xov ntawd twb muab tshaj tawm thoob qab ntuj khwb lawm. Kuv uas yog Povlauj, raug tsa ua tus qhia txoj xov zoo no ntag.

24 Nim no kuv zoo siab raug kev txom nyem los pab nej. Kuv tab tom raug kev txom nyem li Khetos tiam sis twb tsis tau txaus rau lub koom txoos uas yog Khetos lub cev. 25 Kuv tau ua ib tug tub txib los pab lub koom txoos no rau qhov Vajtswv muab tes hauj lwm no rau kuv tuav. Kuv thiaj kub siab lug tshaj tawm Vajtswv txoj lus txhua qhov kom pab tau nej. 26 Kuv tshaj tawm txog yam uas Vajtswv tau muab npog cia ntau txheej ntau tiam los lawm. Nim no Vajtswv ho muab qhia tshwm rau cov uas xaiv tseg* paub. 27 Vajtswv zoo siab hlo qhia cov dawb huv* txog tej koob hmoov ci ntsa iab uas tau muab npog cia. Nim no nws kuj muab qhia rau lwm haiv neeg paub lawm thiab. Yam uas muab npog cia yog qhov uas Khetos nrog nej koom ib lub siab, nej thiaj muaj chaw vam nrog nws tau koob meej ci ntsa iab. 28 Peb tab tom tshaj tawm txog nws. Peb qhuab ntuas sawv daws, thiab siv txhua yam tswv yim los qhia sawv daws. Ua li no thiaj pab tau txhua tus nrog Khetos koom ib lub siab, ua neeg paub tab rau thaum muab lawv pub rau Vajtswv. 29 Twb yog vim li no kuv thiaj rau siab ntso ua hauj lwm. Kuv siv tag nrho lub dag lub zog uas nws pub rau kuv ntag.

2 Kuv xav kom nej paub tias kuv siv zog npaum li cas los ua hauj lwm pab nej thiab pab cov uas nyob hauv Laudixias, thiab pab cov uas tsis tau pom kuv tim ntsej tim muag. 2 Kuv ua li no kom lawv thiaj tau kev nplig siab, thiab kom lawv sawv daws koom ib lub siab txawj sib hlub. Lawv thiaj tau txais koob hmoov nplua mias vim lawv nkag siab qhov tseeb thiab ntseeg ruaj rau qhov ntawd, thiab lawv paub qhov tseeb txog yam uas Vajtswv tau muab npog cia lawd uas yog Khetos ntag. 3 Twb yog muaj Khetos, peb thiaj nrhiav tau tag nrho Vajtswv lub txhab tswv yim thiab kev txawj ntse uas tau muab zais cia lawm. 4 Kuv hais li no kom nej tsis txhob qaug rau luag tej tswv yim haub ntxias. 5 Txawm kuv tsis nrog nej nyob los kuv lub siab yeej nrog nraim nej. Kuv zoo siab hnov tias nej ua txhua yam muaj chaw txawb chaw rau, thiab nej tuav rawv kev ntseeg rau tus Khetos.

6 Nej twb lees yuav tus Tswv Yexus Khetos* lawm. Yog li ntawd, cia li ua lub neej qhia tias nej nrog nws koom ib lub siab. 7 Nej twb kawm lawm tias, nej txoj kev ntseeg yuav tsum zoo ib yam li tsob ntoo uas tej cag ntsia av tob tob, cog ruaj khov rau Khetos. Thiab nej yuav tsum niaj hnub ua Vajtswv tsaug tsis tseg tsis tu.

8 Nej yuav tsum ceev faj, txhob cia luag siv tej tswv yim txawj ntse thiab tej lus dag tsis muaj qab hau uas raws li neeg tej kev cai los rub tau nej yuam kev.* Tej ntawd tsuas qhia raws li lub qab ntuj no tej txuj ci xwb, tsis raws li Khetos qhia. 9 Rau qhov Khetos yog tus coj tau raws li Vajtswv tus yam ntxwv txhij txhua. 10 Twb yog muaj Khetos, nej thiaj muaj txhij txhua. Nws yog txhua roog nom tswv uas muaj hwj chim kav lub taub hau. 11 Qhov uas nej nrog nws sib raug zoo, twb yog nej ua kev cai txiav* lawm. Tsis yog xuas tes txiav tiam sis yog nej muab nej cev nqaij daim tawv uas muaj txim tso pov tseg lawm. Cov uas caum Khetos qab yuav tsum ua kev cai txiav li no. 12 Thaum nej ua kev cai raus dej li Khetos, twb yog muab nej faus nrog nws lawm. Thaum nej nrog nws sib raug zoo, nej kuj nrog nws sawv hauv qhov tuag rov los, vim nej ntseeg tej uas Vajtswv lub hwj chim tau ua. Vajtswv yog tus tsa Khetos sawv hauv qhov tuag rov los.

13 Tsis tas li ntawd, txawm nej zoo ib yam li tej neeg uas tuag lawm vim nej ua txhaum thiab nej tsis tau ua kev cai txiav los, Vajtswv tseem tsa nej ciaj sawv rov los kom tau nrog Khetos koom ib lub siab. Nws thiaj zoo siab hlo zam tag nrho peb tej kev txhaum. 14 Thiab nws muab tag nrho txoj Kev Cai uas neeg xuas tes sau uas niaj hnub nkaug peb rhuav pov tseg. Nws twb muab txoj kev cai ntawd ntsia rau saum tus ncej ntoo* lawm. 15 Twb yog muaj li ntawd, nws thiaj kov yeej tej tseem fwv thiab cov uas muaj hwj chim kav. Nws muab lawv ntes khi, cab los muaj yeej ntxhias tab meeg sawv daws.

16 Yog li ntawd, tsis txhob pub leej twg thuam tias ua cas nej tsis caiv kev noj kev haus los sis thuam tias nej tsis ua koob tsheej, tsis ua kev cai hli xiab, thiab tsis caiv hnub Xanpataus. 17 Tej ntawd tsuas ua piv txwv* txog tej uas yuav muaj los tom hauv ntej xwb, tiam sis qhov tiag yog Khetos ntag. 18 Ceev faj cov neeg uas ua txuj txo hwj chim thiab teev cov tub txib saum ntuj, vim lawv yuav ua rau nej plam nej qhov paj tshab. Cov ntawd tsuas khav txog tej uas lawv qhov muag pom, thiab vim lawv xav raws li lawv cev nqaij daim tawv, lawv khav qhuav xwb. 19 Lawv tsis txhawb lub taub hau.* Lub taub hau twb yug tag nrho lub cev, thiab ua rau tej pob qij txha thiab tej leeg rub lub cev los ua hauj lwm sib dhos ua ke, lub cev thiaj kheev hlob vim yog muaj Vajtswv.

20 Yog nej twb nrog Khetos tuag ua ke es tsis coj raws li lub qab ntuj no tej txuj ci, ua cas nej tseem ua neej zoo li nej muaj feem nrog lub qab ntuj no? Thiab nej tseem coj lawv tej kev cai uas hais tias, 21 “Txhob tuav, txhob saj, thiab txhob kov.” 22 Tej kev cai no yog hais txog tej yam uas txawj ploj mus tom qab neeg muab siv lawd. Tej kev cai thiab tej kab ke no tsuas yog neeg qhia xwb. 23 Tej kev cai thiab tej kab ke no ntxim li yog tswv yim zoo, tiam sis yog neeg tsa rau lawv coj xwb. Lawv ua txuj txo hwj chim thiab rov tsim txom lawv lub cev. Tiam sis tej kev cai no pab tsis tau neeg tawm tsam tej uas neeg cev nqaij daim tawv ntshaw.

3 Yog Vajtswv twb tsa nej sawv nrog Khetos lawm ces kav tsij nrhiav yam uas nyob saum ntuj. Qhov ntawd yog qhov chaw uas Khetos zaum ntawm Vajtswv sab xis. 2 Cia li xav ntsoov rau yam uas nyob saum ntuj, tsis yog yam uas nyob hauv ntiaj teb no. 3 Nej zoo li cov uas tuag lawd mas tau muab nej txoj sia zais nrog Khetos tus uas nrog Vajtswv koom ib lub siab. 4 Thaum Khetos uas yog tus pub txoj sia* tshwm los ces nej kuj yuav tshwm nrog nws los tau koob meej ci ntsa iab thiab.

5 Yog li ntawd, cia li muab tej uas nej lub cev ntshaw* rhuav* pov tseg. Tej ntawd yog kev plees kev yi,* kev phem kev qias, kev ntshaw ua nkauj ua nraug uas tswj nrees lub siab, nyiam ua phem, thiab ua siab hlob uas npaum nkaus li teev mlom. 6 Twb yog vim tej no, Vajtswv thiaj yuav rau txim* rau lawv ntag. 7 Yav tas los, nej twb coj lub neej zoo li no lawm thiab. 8 Tiam sis nim no nej yuav tsum muab tag nrho tej no tshem tawm hauv nej mus. Tshem tawm kev npau taws, kev chim, kev ua phem, kev xyav luag moo, thiab kev hais lus phem lus qias. 9 Ib leeg tsis txhob dag ib leeg. Muab lub siab qub* thiab tej uas nej ib txwm ua hle tseg ib yam li hle tej tsoos tsho 10 es muab lub siab tshiab* uas Vajtswv pub los coj.* Qhov tseeb txog Vajtswv yuav pab nej kho lub siab ntawd kom haj yam zoo li Vajtswv lub 11 mas nej yuav tsis suav tias tus no yog Kilis, tus no yog Yudais, tus no ua kev cai txiav,* tus no tsis ua, tus no yog lwm haiv neeg, tus no yog neeg qus,* tus no ua qhev, tus no tsis ua. Tiam sis Khetos yuav muaj feem nrog txhua yam thiab txhua yam yuav nrog nws koom ua ke.

12 Nej twb yog cov uas Vajtswv xaiv tseg, cov dawb huv uas nws hlub. Nej yuav tsum muab lub siab hmov tshua uas khuv leej luag, lub siab ua zoo, lub siab txo hwj chim, lub siab mos siab muag, thiab lub siab ntev los coj.* 13 Cia li ua siab ntev uv, ib leeg zoo siab hlo zam ib leeg, txawm lwm tus ua tau siab yus lawm los xij. Vajtswv Yehauvas* twb zoo siab hlo zam nej ces nej yuav tsum zoo siab hlo sib zam ib yam li ntawd. 14 Tsis tas li ntawd, nej yuav tsum sib hlub* rau qhov kev hlub yuav ua rau nej koom tau ib lub siab tiag tiag.

15 Tsis tas li ntawd, cia Khetos txoj kev siab tus kav nej lub siab, rau qhov Vajtswv hu nej los koom ib lub cev kom nej muaj txoj kev siab tus ntawd. Thiab cia nej tes hauj lwm qhia tias nej ris txiaj ntsig. 16 Cia Khetos txoj lus* puv npo nej lub siab kom nej muaj tswv yim. Ib leeg rau siab qhia thiab txhawb ib leeg los ntawm tej nkauj dawb huv, tej nkauj qhuas Vajtswv, thiab tej nkauj pe hawm uas nej hu los ua Vajtswv tsaug. Cia li hu nkauj tawm hauv nruab siab tuaj rau Vajtswv Yehauvas.* 17 Txawm nej ua yam twg thiab yuav hais dab tsi los xij, tuav tus Tswv Yexus lub npe ua txhua yam, thiab tuav lub npe ntawd ua Vajtswv uas yog Leej Txiv tsaug.

18 Cov poj niam, nej yuav tsum zwm* rau nej tus txiv thiaj tsim nyog qhov uas nej ntseeg tus Tswv. 19 Cov txiv, cia li hlub nej tus poj niam, tsis txhob ua nruj ua tsiv rau nws. 20 Cov me nyuam, cia li mloog nej niam nej txiv lus txhua yam, ua li no thiaj haum tus Tswv siab. 21 Cov uas yog txiv, tsis txhob zes nej tej me nyuam, tsam lawv chim siab.* 22 Nej cov uas ua tub qhe, cia li mloog nej tus tswv lus. Tsis yog nej mloog thaum nws pom kom nws qhuas xwb, tiam sis mloog hauv nruab siab tuaj vim nej paub ntshai Vajtswv Yehauvas.* 23 Txawm nej ua yam twg los xij, ua kawg nej lub siab lub ntsws ib yam li nej ua rau Vajtswv Yehauvas,* tsis yog ua rau neeg. 24 Nej yeej paub tias Vajtswv Yehauvas* yog tus pub koob hmoov ua qub txeeg qub teg rau nej. Cia li ua qhev rau Khetos uas yog nej tus tuam Tswv. 25 Tus uas ua tsis ncaj yeej yuav tau ris nws lub txim. Thaum Vajtswv txiav txim, nws tsis xaiv leej twg ntsej muag li.

4 Nej cov uas ua tswv, cia li ua ncaj ncees rau nej cov qhev, txhob xaiv ntsej muag. Nco ntsoov tias nej kuj muaj ib tug Tswv uas nyob saum ntuj ceeb tsheej thiab.

2 Cia li rau siab ntso thov Vajtswv tsis tseg es ceev faj zov tos thiab ua Vajtswv tsaug. 3 Nej yuav tau thov Vajtswv pab peb thiab, kom nws qhib kev rau nws txoj lus, peb thiaj tau tshaj tawm txog yam uas tau muab npog cia txog tus Khetos lawm. Kuv tab tom raug kaw vim qhov no ntag. 4 Thov Vajtswv pab kuv tshaj tawm zaj no kom meej es thiaj tsim nyog.

5 Thaum nej nrog cov neeg sab nraum lub koom txoos ua ke nej yuav tau siv tswv yim. Cia li siv nej lub sij hawm kom muaj nqis.* 6 Ua tib zoo hais lus luag thiaj xav mloog, ib yam li tej zaub mov uas qab ntsev luag thiaj xav noj. Yog nej ua li no ces nej yuav paub teb txhua tus.

7 Tus kwv tij Thikikas uas kuv hlub tshua yog ib tug tub txib ncaj ncees uas nrog peb ua tus Tswv tes hauj lwm. Nws mam qhia nej tias kuv nyob li cas lawm. 8 Kuv txib nws tuaj xyuas nej, xwv nej thiaj paub tias peb nyob li cas, thiab kom nws nplig tau nej lub siab. 9 Nws coj tus kwv tij Auneximas uas kuv hlub tshua nrog nws tuaj thiab. Auneximas twb nyob hauv nej tuaj ntag. Nkawd yuav qhia txhua yam uas peb ua tim no rau nej paub.

10 Alithakhas tus uas nrog kuv raug kaw xa xov tuaj rau nej. Thiab Malakaus uas yog Npananpas tus kwv tij, xa xov tuaj rau nej. (Malakaus yog tus uas peb kom nej tos txais, yog nws tuaj xyuas nej.) 11 Yexus uas hu ua Yuxitas kuj xa xov tuaj rau nej thiab. Lawv cov no yog neeg Yudais.* Tsuas yog lawv thiaj nrog kuv ua hauj lwm txhawb nqa Vajtswv txoj kev kav* xwb. Lawv yog cov uas nplig thiab txhawb kuv lub zog heev. 12 Epafas uas yog Yexus Khetos* ib tug tub qhe uas nyob hauv nej tuaj, kuj xa xov rau nej thiab. Nws siv zog thov Vajtswv pab nej tsis tseg kom nej sawv ruaj khov ua neeg paub tab, thiab tuav rawv txoj kev ntseeg rau txhua yam uas Vajtswv pom zoo. 13 Kuv ua tau tim khawv tias nws yeej khwv heev los pab nej thiab pab cov uas nyob hauv lub nroog Laudixias thiab cov uas nyob hauv lub nroog Hailapolis.

14 Lukas uas yog tus kws kho mob uas kuv hlub tshua kuj xa xov tuaj rau nej, thiab Demas los kuj xa xov tuaj rau nej ib yam nkaus. 15 Thov xa lus noj qab nyob zoo rau cov kwv tij hauv Laudixias thiab rau tus muam Nifas thiab lub koom txoos uas tuaj sib txoos hauv nws tsev. 16 Thaum nej nyeem tsab ntawv no rau nej lub koom txoos lawm, thov xa mus rau lub koom txoos hauv Laudixias nyeem thiab. Nej mam li nyeem tsab ntawv uas kuv xa rau Laudixias lawm thiab. 17 Thiab thov hais rau Akhipus tias, “Tau hau ntsoov ua tes hauj lwm uas koj twb lees ua rau tus Tswv lawd, hauj lwm thiaj tiav.”

18 Tsab xov no yog kuv uas yog Povlauj txhais tes sau ntag. Thov nco ntsoov txog tej saw hlau uas khi kuv mog. Thov Vajtswv foom koob hmoov nplua mias rau nej.