SAU RAU COV EFEXAUS

1 Ntawm no yog Povlauj uas yog Yexus Khetos* ib tug tub txib raws li Vajtswv pom zoo. Kuv sau tsab ntawv no tuaj rau cov dawb huv* hauv Efexaus uas muab siab npuab Yexus Khetos* thiab nrog nws koom ib lub siab.

2 Thov kom Vajtswv uas yog peb Leej Txiv thiab tus Tswv Yexus Khetos foom koob hmoov nplua mias rau nej thiab nrog nej sib raug zoo.

3 Cia li qhuas Vajtswv uas yog peb tus Tswv Yexus Khetos Leej Txiv, rau qhov saum ntuj ceeb tsheej nws twb pub lub hwj huam foom koob hmoov nplua mias rau peb cov uas nrog Khetos koom ib lub siab lawm. 4 Vajtswv twb xaiv peb puag thaum ntuj tsim teb raug* los nrog Khetos koom ib lub siab, kom peb txawj sib hlub thiab dawb huv, tsis muaj chaw thuam rau ntawm Vajtswv. 5 Vajtswv twb npaj tseg ua ntej tias nws yuav saws peb los ua nws cov tub vim muaj Yexus Khetos. Qhov ntawd haum Vajtswv siab thiab raws li nws pom zoo. 6 Sawv daws thiaj li qhuas txog Vajtswv txoj kev hlub nplua mias rau peb vim muaj nws tus tub uas nws hlub. 7 Twb yog muaj tus tub ntawd cov ntshav los txhiv peb dim, Vajtswv thiaj zam tau peb lub txim. Vajtswv yeej muaj kev hlub nplua mias rau peb tiag!

8 Nws pub kev hlub nplua mias dawb dawb li no rau peb, kom peb muaj tswv yim thiab thoob tsib to nrog rau txhua fab. 9 Nws thiaj pub peb paub tej uas nws twb xav tseg uas tau muab npog cia lawd. Twb yog haum nws siab, nws thiaj npaj ib lub ntsiab tseg tias, 10 nws yuav tsa ib txoj kev coj noj coj ua los saib xyuas ib puas tsav yam, thaum lub caij uas nws teem tseg yuav tiav mas nws yuav coj ib puas tsav yam saum ntuj thiab hauv ntiaj teb los koom nrog Khetos. Nws yog tus 11 uas peb nrog koom ib lub siab, thiab Vajtswv xaiv peb los nrog nws txais qub txeeg qub teg. Vajtswv twb npaj tseg ua ntej li no rau peb raws li nws lub ntsiab. Nws yog tus ua tau txhua yam hauj lwm tiav raws li nws pom zoo. 12 Peb cov uas xub tau los ntseeg Khetos thiaj ua rau sawv daws qhuas Vajtswv kom nws tau koob meej. 13 Thaum nej tau hnov txoj lus tseeb uas yog txoj xov zoo txog kev cawm dim, nej mam li tso siab rau Khetos. Thaum nej ntseeg lawd, Vajtswv thiaj pub lub hwj huam dawb huv uas nws cog tseg, nias cim rau nej vim yog muaj Khetos. 14 Qhov no ua puav pheej tseg tias peb yuav txais qub txeeg qub teg. Vajtswv ua li no kom txhiv tau nws cov tib neeg dim, sawv daws thiaj qhuas ntxhias nws kom nws tau koob meej.

15 Twb yog vim li ntawd txij thaum kuv hnov tias nej ntseeg tus Tswv Yexus thiab hlub cov dawb huv npaum li cas, 16 kuv thiaj ua Vajtswv tsaug tsis tseg tsis tu tias muaj nej. Kuv niaj hnub thov Vajtswv rau nej 17 kom Vajtswv uas yog peb tus Tswv Yexus Khetos Leej Txiv, tus muaj hwj chim ci ntsa iab, pub tswv yim rau nej thiab pab nej nkag siab tej uas nws qhia tshwm, xwv nej thiaj paub qhov tseeb txog nws. 18 Nws tau qhib nej lub siab kom nej pom tseeb tias nws hu nej los muaj chaw cia siab li cas, thiab kom nej pom tias nws yuav foom koob hmoov nplua mias rau cov dawb huv ua qub txeeg qub teg ci ntsa iab, 19 thiab Vajtswv yuav pub nws lub hwj chim loj kawg nkaus rau peb cov uas ntseeg. Lub hwj chim no loj kawg li tiag, rau qhov twb ua hauj lwm 20 rau thaum Vajtswv tsa Khetos sawv hauv qhov tuag rov qab los thiab cia nws zaum ntawm Vajtswv sab xis saum ntuj ceeb tsheej. 21 Vajtswv tsa nws nyob siab tshaj txhua lub tseem fwv, txhua lub hwj chim, txhua tus ua nom ua tswv, thiab txhua lub koob lub npe siab, tsis hais tiam* no los yog tiam tom ntej. 22 Vajtswv kuj muab ib puas tsav yam rau Khetos kav, thiab tsa nws ua lub taub hau saib xyuas txhua yam hauv lub koom txoos. 23 Lub koom txoos zoo ib yam li nws lub cev uas puv nkaus txhua yam txog nws mas nws ua rau ib puas tsav yam muaj txhij txhua.

2 Tsis tas li ntawd, yav tas los nej zoo li cov neeg uas tuag lawd vim nej hla kev cai thiab ua txhaum, tiam sis Vajtswv twb ua rau nej ciaj lawm. 2 Thaum ntawd nej coj raws li cov neeg uas nyob hauv lub qab ntuj* thiab nej yoog tus uas kav lub qab ntuj no. Nws tswj tus cwj pwm uas nyob puag ncig peb ib yam li tej cua. Tus cwj pwm ntawd tab tom tshoov cov neeg tsis mloog lus. 3 Thaum peb tseem nrog lawv, peb kuj ua lub neej raws li lub cev nqaij daim tawv ntshaw. Peb ua ywj siab raws li lub cev ntshaw thiab raws li lub siab xav tau. Txij thaum yug poob nthav los, peb zoo li tej me nyuam uas tsim nyog raug txim li luag tej xwb. 4 Tiam sis Vajtswv yog tus muaj lub siab khuv leej tshaj plaws, thiab nws hlub peb kawg nkaus li, 5 nws thiaj ua rau peb nrog Khetos ciaj sia, txawm tias peb zoo li cov neeg uas tuag lawm. (Twb yog nws muaj kev hlub nplua mias thiaj cawm tau nej dim xwb.) 6 Tsis tas li ntawd, Vajtswv tsa peb ciaj sawv nrog Khetos mus zaum ua ke saum ntuj ceeb tsheej, mus koom nrog Yexus Khetos.* 7 Xwv tej caij nyoog* tom ntej, nws thiaj qhia tau nws txoj kev hlub nplua mias rau peb cov uas nrog Yexus Khetos* koom ib lub siab, vim nws yog tus muaj lub siab dawb siab dav.

8 Twb yog Vajtswv muaj kev hlub nplua mias li no, thiab nej muaj kev ntseeg thiaj cawm tau nej dim. Tsis yog nej tes hauj lwm cawm tau nej dim, tiam sis yog Vajtswv pub dawb rau nej xwb. 9 Vim tsis yog nej tes hauj lwm cawm tau nej ces nej thiaj tsis muaj chaw khav hlo li. 10 Peb yog Vajtswv ob txhais tes puab. Nws tsim peb los nrog Yexus Khetos* koom ib lub siab kom peb ua tej hauj lwm zoo uas Vajtswv twb npaj tseg ua ntej rau peb ua lawm.

11 Nco ntsoov tias, nej yog lwm haiv neeg yug. Yav tas los, cov uas neeg muab ua kev cai txiav* thiaj muab nej hu ua cov uas tsis ua kev cai txiav. 12 Thaum ntawd nej tsis tau paub tus Khetos thiab tsis muaj feem nrog haiv neeg Ixayees. Nej tsis muaj feem koom tej lus uas Vajtswv cog tseg. Hauv lub qab ntuj no, nej tsis muaj chaw vam thiab tsis paub Vajtswv kiag li. 13 Nim no nej nrog Yexus Khetos* koom ib lub siab lawm. Nej cov uas yav tas los nyob deb heev ntawm Vajtswv thiaj tau txav los ze rau Nws, vim muaj Khetos cov ntshav. 14 Khetos yog tus uas pab kom peb nyob sib haum xeeb. Nws coj tau ob pab neeg los koom ua ib pab, thiab rhuav sab phab ntsa uas kem ob tog. 15 Twb yog nws muab nws lub cev nqaij tawv los fij thiaj rhuav tau tej lus nkaw thiab lus sam hwm hauv Mauxes Txoj Kev Cai uas ua rau ob tog ua yeeb ncuab. Ob pab neeg thiaj tau nrog nws koom ib lub siab, ua ib haiv neeg tshiab,* kom muaj kev sib haum xeeb. 16 Nws thiaj coj tau ob pab no los cuag Vajtswv vim nws tuag saum tus ncej ntoo,* kom ob pab thiaj los koom ua ib haiv neeg.* Muaj tau li no vim nws lub cev twb rhuav tau yam uas ua rau ob tog ua yeeb ncuab lawm. 17 Nws tau los tshaj tawm txoj xov zoo txog kev sib haum xeeb rau nej cov uas nyob deb Vajtswv thiab rau peb cov uas nyob ze Vajtswv. 18 Twb yog muaj Khetos, peb ob pab neeg thiaj tau kev mus cuag Leej Txiv vim peb sawv daws tau txais tib lub hwj huam dawb huv.

19 Yog li ntawd, nej tsis yog qhua thiab tsis yog lwm haiv neeg lawm. Tiam sis nej tau ua pej xeem nrog cov dawb huv thiab nej muaj feem hauv Vajtswv cuab neeg lawm. 20 Nej zoo li cov pob zeb uas Vajtswv tau muab teeb rau saum lub plag tsev uas yog cov tub txib thiab cov cev Vajtswv lus. Tiam sis Yexus Khetos* yog lub pob zeb uas teeb rau saum kaum tsev. 21 Yuav tsum ua lub tsev kom txhua yam sib dhos ua ke thiaj haum Khetos thiab kom tiav ua ib lub tuam tsev dawb huv rau Vajtswv Yehauvas.* 22 Yog li ntawd, vim nej nrog Khetos koom ib lub siab, Vajtswv muab nej thiab lwm pab los sib dhos ua ib lub tsev rau nws nyob, rau qhov nws lub hwj huam nyob qhov ntawd.

3 Vim li no, kuv yog Povlauj, tus uas raug kaw rau qhov kuv ntseeg Yexus Khetos* thiab yog tus pab nej cov uas yog lwm haiv neeg. 2 Nyaj nej twb hnov txog tes hauj lwm uas Vajtswv muab cob rau kuv ua los pab kom nej tau txais txoj kev hlub uas Vajtswv pub dawb. 3 Twb yog Vajtswv qhia tshwm rau kuv paub txog yam uas nws tau muab npog cia lawd. Kuv twb sau me ntsis txog tej no rau nej lawm. 4 Yog li ntawd, thaum nej nyeem tsab ntawv no nej yuav paub tias kuv yeej nkag siab txog yam uas tau muab npog cia txog tus Khetos lawm. 5 Vim ntau tiam dhau los, Vajtswv tsis tau qhia meej txog yam uas nws muab npog cia lawd rau neeg paub. Tiam sis nim no nws siv nws lub hwj huam qhia meej rau cov tub txib thiab cov cev Vajtswv lus uas dawb huv paub lawm. 6 Yam uas muab npog cia ntawd yog li no, lwm haiv neeg yuav los ntseeg txoj xov zoo thiab tau nrog Yexus Khetos* koom ib lub siab. Lawv yuav nrog peb txais qub txeeg qub teg, koom tib lub cev, thiab koom tib lo lus cog tseg. 7 Twb yog Vajtswv muaj kev hlub nplua mias, kuv thiaj tau los ua ib tug tub qhe rau yam uas Vajtswv muab npog cia. Vajtswv pub tes hauj lwm no dawb dawb rau kuv thaum nws pub nws lub hwj chim rau kuv.

8 Txawm kuv yog tus qis tshaj cov dawb huv tib si los, Vajtswv qhia nws txoj kev hlub nplua mias rau kuv. Twb yog li no, kuv thiaj tau tshaj tawm rau lwm haiv neeg paub txog tej koob hmoov* uas Khetos tau pub nplua mias suav tsis txheeb li. 9 Kuv thiaj pab tau sawv daws pom tias Vajtswv yuav coj thiab saib xyuas kom yam uas nws muab npog cia lawd muaj tiav. Vajtswv tus uas tsim ib puas tsav yam tau muab yam no npog cia ib tiam dhau ib tiam los lawm. 10 Vajtswv ua li ntawd, nim no lub koom txoos thiaj ua rau tej tseem fwv thiab cov muaj hwj chim kav* saum ntuj ceeb tsheej pom tias, Vajtswv yog tus muaj tswv yim txhua fab. 11 Qhov no muaj raws li Vajtswv lub ntsiab uas ib txwm muaj thaum ub los lawd. Nws kom tus Khetos uas yog peb tus Tswv Yexus ua rau tej ntawd muaj tiav. 12 Twb yog muaj Khetos, peb thiaj tsis ntshai tshaj tawm thiab peb muaj cuab kav thov Vajtswv tso siab plhuav vim peb ntseeg Khetos. 13 Yog li ntawd, kuv thov kom nej tsis txhob qaug zog vim kuv raug kev txom nyem rau nej. Tej kuv raug no tsuas ua rau nej tau koob meej xwb.

14 Twb yog vim li no, kuv thiaj txhos caug ntua thov Leej Txiv. 15 Vim muaj nws, thiaj muaj txhua cuab neeg saum ntuj thiab hauv ntiaj teb no.* 16 Kuv thov Vajtswv tus muaj hwj chim ci ntsa iab, kom nws lub hwj huam pub dag pub zog rau nej muaj lub siab tuab siab tawv. 17 Thiab thov kom Khetos nyob rawv hauv nej lub siab nrog kev hlub, vim nej muaj kev ntseeg. Thov kom nej zoo ib yam li tsob ntoo uas tej cag ntsia av tob tob thiab zoo li lub tsev uas cog ruaj saum lub plag tsev. 18 Nej thiab tag nrho cov dawb huv thiaj paub txhij paub txhua tias qhov tseeb dav npaum li cas, ntev npaum li cas, siab npaum li cas, thiab tob npaum li cas diam. 19 Thiab kuv thov kom nej paub Khetos txoj kev hlub uas zoo tshaj kev txawj kev ntse, nej thiaj coj tau Vajtswv tus yam ntxwv txhua nrho.

20 Vajtswv yog tus muaj cuab kav siv lub hwj chim uas nws pub rau peb los ua ntau tshaj li tej uas peb thov thiab tej uas peb xav lawm. 21 Tsim nyog lub koom txoos thiab Yexus Khetos* ua rau Vajtswv tau koob meej, ib tiam dhau ib tiam mus ib txhiab ib txhis li. Amees.*

4 Kuv no yog tus uas raug kaw vim kuv ntseeg tus Tswv mas kuv thov nej coj zoo kom tsim nyog qhov uas Vajtswv tau hu nej los. 2 Cia li txo hwj chim thiab muaj lub siab mos siab muag tiag tiag, rub lub siab ntev, sib hlub sib zam,* 3 yeej meem txhawb kom sawv daws koom ib lub siab raws li hwj huam dawb huv coj, kev sib haum xeeb thiaj rub tau nej los ua ib pab ib pawg. 4 Tsuas muaj tib lub cev thiab tib lub hwj huam dawb huv xwb, ib yam li Vajtswv hu nej los muaj tib txoj kev vam nkaus xwb. 5 Muaj tib tug Tswv, tib txoj kev ntseeg, thiab tib txoj kev cai raus dej. 6 Muaj tib tug Vajtswv uas yog sawv daws Leej Txiv. Nws kav sawv daws, txib tau sawv daws, thiab pub hwj chim ua hauj lwm rau sawv daws.

7 Vajtswv twb foom koob hmoov nplua mias rau peb txhua tus raws li Khetos pom zoo pub dawb rau peb lawm. 8 Vajtswv Txoj Lus twb hais tias, “Thaum nws mus puag saum qhov chaw siab, nws ntes tau ib co txiv neej nrog nws mus, thiab nws muab lawv ua khoom pub rau lub koom txoos.” 9 Qhov uas nws mus puag saud yog li cas? Twb yog nws nqis mus puag hauv nruab a uas yog lub ntiaj teb. 10 Tus uas nqis mus rau puag hauv kuj yog tus uas nce mus siab tshaj ntuj ceeb tsheej* lawm, nws thiaj ua tau kom txhua yam muaj tiav huv tib si.

11 Nws pub ib txhia ua tub txib, ib txhia ua cov cev Vajtswv lus, ib txhia ua cov tshaj tawm, ib txhia ua cov tswv yug yaj, thiab ib txhia ua xib hwb qhia. 12 Nws ua li ntawd thiaj muaj cov uas pab cob qhia cov dawb huv. Lawv pab leg num thiab txhawb lub koom txoos uas zoo li Khetos lub cev. 13 Lawv yuav pab peb muaj kev ntseeg ib yam thiab paub qhov tseeb txog Vajtswv Leej Tub ib yam. Thaum ntawd peb thiaj hlob tiav ib yam li tus neeg laus, thiab paub tab txaus nkaus ib yam li Khetos. 14 Peb thiaj tsis ua li tej me nyuam yaus uas qaug quav rau cov neeg dag uas haub ntxias luag yuam kev. Peb thiaj tsis zoo li lub nkoj uas cua ntsawj ntas mus ntas los es ntsawj txog twg ces mus txog ntawd. 15 Tiam sis peb tsuas hais qhov tseeb xwb. Cia kev hlub pab kom peb hlob tiav los ua neeg paub tab es zwm rau peb lub taub hau uas yog Khetos. 16 Peb zoo li ib lub cev. Twb yog muaj Khetos, thiaj muaj tej pob qij txha, nyias ua nyias feem kom tag nrho lub cev thiaj sib dhos sib koom ua hauj lwm. Yog txhua feem ua hauj lwm zoo, lub cev thiaj kheev hlob, sib hlub sib pab.

17 Yog li ntawd, kuv ua tim khawv tab meeg tus Tswv tias, nej tsis txhob coj li lwm haiv neeg coj lawm. Lawv xav tej zaj uas tsis muaj qab hau thiab ua raws li ntawd xwb. 18 Lawv lub siab* tsaus ntuj nti thiab lawv nyob deb txoj sia uas Vajtswv pub, vim lawv txhob txwm tsis xav paub Vajtswv thiab lawv lub siab loog tag lawm. 19 Twb yog lawv tsis hnov mob qhov twg li lawm, lawv thiaj yeem ua kiag tej yam vuab tsuab tsis paub txaj muag li. Lawv xyaum ua txhua yam kev phem kev qias tsis paub dhuav li.

20 Tiam sis nej twb kawm tias tus Khetos tsis coj li no. 21 Yexus qhia qhov tseeb. Yog nej twb hnov nws qhia, los sis kawm ntawm nws ces nej yeej paub zoo txog tej no. 22 Nej twb kawm tias kom muab lub siab qub* uas nej ib txwm coj tso pov tseg. Lub siab qub ntawd tsuas muaj phem zuj zus thiab qaug rau tej uas neeg lub siab ntshaw xwb. 23 Nej yuav tsum niaj hnub xyaum tiag, nej thiaj coj tau tus cwj pwm tshiab. 24 Thiab muab lub siab tshiab* los hnav ib yam li tej tsoos tshiab. Vajtswv tsim lub siab tshiab ntawd raws li nws pom zoo kom nej thiaj ua tau neeg ncaj ncees thiab mloog Vajtswv lus kawg siab kawg ntsws.

25 Yog li ntawd, nej twb tso tseg tsis hais lus dag lawm. Ib leeg cia li hais lus tseeb rau ib leeg mus li, vim peb koom tib lub cev. 26 Yus yeej txawj chim, tiam sis tsis txhob ua txhaum. Tsis txhob chim tas hnub.* 27 Tsis txhob cia Ntxwg Nyoog tau kev ntxias nej. 28 Cia tus uas nyiag luag li tsis txhob nyiag lawm. Nws yuav tsum khwv es siv nws ob txhais tes los ua tej hauj lwm zoo, nws thiaj muaj pub rau tus uas cheem tsum. 29 Tsis txhob cia ib lo lus phem tawm hauv nej lub qhov ncauj los. Tiam sis hais tej lus zoo uas txhawb zog xwb thiaj pab tau cov uas mloog. 30 Tsis txhob ua rau Vajtswv tu siab es cheem nws lub hwj huam dawb huv.* Rau qhov Vajtswv twb muab lub hwj huam ntawd nias hom thawj rau nej mus txog hnub uas tso nej dim vim muaj tus nqi txhiv.

31 Cia li muab txhua yam kev cib nyeej,* kev chim, kev npau taws, kev sib nthe, kev xyav luag moo thiab txhua yam uas mob luag siab* tshem tawm hauv nej mus. 32 Tiam sis nej ib leeg yuav tsum ua zoo rau ib leeg, ib leeg hmov tshua ib leeg, ib leeg zoo siab hlo zam ib leeg lub txim, ib yam li Vajtswv zoo siab hlo zam nej lub txim vim yog muaj Khetos.

5 Yog li ntawd, cia li xyaum Vajtswv ib yam li tej me nyuam uas nws hlub. 2 Cia li sib hlub ib yam li Khetos hlub peb,* nws thiaj muab nws tus kheej rau peb,* zoo li qhov khoom fij uas tsw qab ntxiag rau Vajtswv.

3 Tsis txhob ua plees ua yi,* ua ib yam kev phem kev qias twg, thiab ua neeg siab hlob, txawm yog tham txog xwb los twb tsis tsim nyog, thiaj phim cov neeg dawb huv. 4 Tsis hais ua tej yam rhuav ntsej muag, hais lus ua dog ua dig los sis hais tej lus phem lus qias, tej no pab tsis tau leej twg. Tiam sis ua Vajtswv tsaug zoo dua. 5 Nej twb pom thiab paub zoo txog tej no lawm tias, tus neeg ua plees ua yi,* tus ua tej yam qias tsis huv, thiab tus ua siab hlob uas zoo li tus neeg teev mlom, tus ntawd yeej yuav tsis tau txais Vajtswv thiab Khetos txoj kev kav.*

6 Tsis txhob pub leej twg hais tej lus uas tsis muaj hauv paus hauv ntsis ntxias tau nej. Twb yog vim tej uas hais tas los no, Vajtswv yuav rau txim rau cov neeg tsis mloog lus. 7 Yog li ntawd, tsis txhob koom nrog lawv hlo li. 8 Yav tas los nej nyob tsaus ntuj nti tiam sis nim no nej nyob hauv qhov kaj lawm, vim nej koom nrog tus Tswv. Cia li ua lub neej yam li tej me nyuam uas nyob hauv qhov kaj. 9 Qhov kaj pab kom peb tau txhua yam zoo, yam uas ncaj ncees thiab yam uas tseeb. 10 Tshuaj ntshis tej uas yus ua seb puas haum tus Tswv siab. 11 Cia li tso tseg tsis txhob koom nrog qhov tsaus ntuj tes hauj lwm uas tsis muaj nqis. Tiam sis muab tes hauj lwm ntawd nthuav tawm rau sawv daws pom. 12 Vim tej uas lawv ua nraim nkoos ntawd, txawm hais txog xwb los txaj muag kawg li. 13 Qhov kaj ci tuaj rau tej uas tau muab nthuav tawm, tej ntawd thiaj cig lam lug rau sawv daws pom tseeb tias zoo li cas tiag. 14 Vajtswv Txoj Lus thiaj hais tias, “Tus uas tsaug zog, cia li tsim dheev thiab sawv tsees hauv qhov tuag rov los mas Khetos yuav ci tuaj rau koj.”

15 Yog li ntawd, nej yuav tsum ceev faj, ua tib zoo ua nej lub neej. Tsis txhob coj li cov neeg tsis muaj tswv yim tiam sis coj li cov neeg muaj tswv yim. 16 Siv nej lub sij hawm kom muaj nuj nqis, rau qhov lub caij no phem kawg li. 17 Yog li ntawd, txhob coj li cov neeg tsis txawj xav, tiam sis ua tib zoo nrhiav kom nkag siab tias yam twg raws li Vajtswv Yehauvas* lub siab nyiam. 18 Tsis tas li ntawd, txhob haus cawv txiv hmab kom qaug, vim cov neeg qaug cawv tsis tsheej haj. Tiam sis cia Vajtswv lub hwj huam puv npo hauv nej. 19 Cia li hu nkauj sib txhawb zog ua ke, qhuas Vajtswv, thiab hu tej nkauj pe hawm. Hu nkauj rau Vajtswv Yehauvas* hauv nruab siab tuaj. 20 Cia peb tuav tus Tswv Yexus Khetos lub npe ua Vajtswv uas yog Leej Txiv tsaug tsis tseg tsis tu rau txhua yam uas nws pub.

21 Ib leeg cia li zwm* rau ib leeg vim peb hwm Khetos.* 22 Cia tus poj niam zwm rau nws tus txiv ib yam li nws zwm rau tus Tswv, 23 rau qhov tus txiv yog tus poj niam lub taub hau, ib yam li Khetos yog lub koom txoos lub taub hau. Lub koom txoos zoo li Khetos lub cev thiab Khetos yog tus cawm lub koom txoos. 24 Lub koom txoos zwm rau tus Khetos li cas ces tus poj niam yuav tsum zwm rau nws tus txiv txhua yam li ntawd. 25 Nej cov uas yog txiv yuav tsum hlub nej tus poj niam ib yam li tus Khetos hlub lub koom txoos thiab yeem pub nws txoj sia rau lawv. 26 Nws ua li no, ib yam li nws muab Vajtswv Txoj Lus uas zoo li cov dej los ntxuav lub koom txoos kom dawb huv. 27 Nws ua li no, lub koom txoos thiaj zoo kawg nkaus rau nws tus kheej, tsis ceb tsis txoom tsis puas qhov twg, tiam sis dawb huv tsis tsuas ib yam dab tsi li.

28 Ib yam li ntawd, tus txiv yuav tsum hlub nws tus poj niam cuag li nws hlub nws lub cev. Tus txiv uas hlub nws tus poj niam yeej hlub nws tus kheej. 29 Tsis muaj ib tug txiv neej twg yuav ntxub nws lub cev, nws tsuas tu ntshis thiab nrhiav zaub nrhiav mov los yug nws lub cev xwb. Khetos saib xyuas lub koom txoos ib yam li ntawd, 30 rau qhov peb puav leej koom nws lub cev. 31 “Vim li ntawd tus txiv yuav tsum tso nws niam nws txiv tseg, thiab nrog nraim nws tus poj niam mas nkawd yuav koom ua ib lub cev.” 32 Tej uas Vajtswv muab npog cia no tseem ceeb kawg li. Qhov no twb yog kuv hais txog Khetos thiab lub koom txoos ntag. 33 Tiam sis nej cov txiv nyias yuav tsum hlub nyias tus poj niam ib yam li nyias hlub nyias tus kheej. Thiab cov poj niam los nyias yuav tsum hwm nyias tus txiv tiag tiag.

6 Cov me nyuam’e, nej yuav tsum mloog niam txiv lus thiaj haum tus Tswv siab, ua li no thiaj yog cai. 2 “Hwm koj niam koj txiv.” Nov yog thawj lo lus sam hwm uas muaj lus cog tseg li no, 3 “Yog nej mloog ces nej yuav tau lub neej zoo thiab yuav muaj sia nyob ntev hauv lub ntiaj teb no.” 4 Nej cov uas yog txiv, txhob zes nej tej me nyuam tiam sis cia li tu lawv raws li Vajtswv Yehauvas* tej lus qhuab ntuas thiab lub tswv yim.

5 Nej cov uas ua qhev, cia li mloog nej tus tswv lus, paub ntshai paub hwm nws hauv nruab siab, ib yam li nej ua rau Khetos. 6 Tsis yog nej mloog thaum luag pom kom luag qhuas xwb. Tiam sis nej mloog rau qhov nej yog Khetos cov qhev mas nej ua raws li Vajtswv lub siab nyiam kawg nej lub siab lub ntsws. 7 Nej yuav tsum zoo siab hlo ua qhev ib yam li nej ua rau Vajtswv Yehauvas,* tsis yog ua rau neeg. 8 Nej twb paub lawm tias, thaum nej ua zoo, Vajtswv Yehauvas* yuav pub nqi zog rau nej, txawm nej ua qhev los tsis ua. 9 Tsis tas li ntawd xwb, nej cov uas ua tswv yuav tsum coj ib yam li no rau cov qhev thiab, txhob ua nruj ua tsiv rau lawv. Nco ntsoov tias nej puav leej koom tib tug Tswv uas nyob saum ntuj ceeb tsheej mas tus ntawd tsis xaiv leej twg ntsej muag li.

10 Thaum kawg no, thov kom tus Tswv uas muaj zog loj zog nchav pub hwj chim rau nej. 11 Cia li muab tag nrho Vajtswv tej cuab yeej los hnav, nej thiaj sawv khov kho tawm tsam yeej Ntxwg Nyoog tej tswv yim dag. 12 Peb tab tom sib qhau ntag, tsis yog sib ntswg nrog tej uas muaj roj muaj ntshav, tiam sis yog peb tawm tsam tej tseem fwv, tej uas muaj hwj chim, thiab cov uas kav lub qab ntuj tsaus nti no. Cov no yog cov dab lim hiam saum nruab ntug ntag. 13 Yog li ntawd, cia li muab tag nrho Vajtswv tej cuab yeej los hnav. Thaum yeeb ncuab tawm tsam nej rau hnub uas phem, nej thiaj yuav kov yeej. Tom qab nej npaj txhij txhua lawd, nej yuav sawv khov kho.

14 Yog li ntawd, cia li sawv khov kho es muab qhov tseeb los sia ntawm duav, thiab muab kev ncaj ncees los ua daim phiaj hlau thaiv hauv siab. 15 Cia li npaj txhij rau txhais khau uas tshaj tawm txoj xov zoo txog kev sib haum xeeb. 16 Tsis tas li ntawd xwb, cia li muab kev ntseeg los ua daim hlau thaiv. Yog nej ua li ntawd ces nej yuav tua tau tej xub hluav taws uas Xatas* tua tuaj. 17 Cia li muab kev cawm dim los ua kaus mom hlau ntoo, thiab muab Vajtswv Txoj Lus ua rab ntaj uas lub hwj huam dawb huv pub. 18 Cia Vajtswv lub hwj huam coj nej txhua lub sij hawm uas nej thov Vajtswv, tsis hais yuav thov rau seem twg thiab yuav taij thov Vajtswv li cas los xij. Yuav kom nej ua tau li ntawd, nej yuav tsum ceev faj zov tos, niaj hnub taij thov Vajtswv pab cov dawb huv txhua tus. 19 Thiab nej yuav tsum thov Vajtswv pab kuv nrhiav tau tej lus uas tsim nyog hais, xwv kuv thiaj ua taus siab tawv qhia txog yam uas Vajtswv tau muab npog cia ntawm txoj xov zoo. 20 Kuv yog tus sawv cev rau txoj xov zoo ntawd, txawm kuv tab tom raug saw hlau khi li no. Thov Vajtswv pab kuv ua taus siab tawv tshaj tawm txog tej no kom tsim nyog.

21 Kuv yuav txib peb tus kwv tij Thikikas uas peb hlub tuaj saib nej. Nws yog ib tug tub qhe uas yeej muab siab npuab tus Tswv. Nws yuav qhia nej txhua yam kom nej paub tias kuv nyob li cas thiab ua dab tsi lawm. 22 Kuv tab tom txib nws tuaj ua tes hauj lwm no, kom nej thiaj paub tias peb nyob li cas thiab kom nws nplig tau nej siab.

23 Thov kom peb Leej Txiv uas yog Vajtswv, thiab kom Tswv Yexus Khetos pub cov kwv tij sawv daws nyob sib haum xeeb, txawj sib hlub, thiab muaj kev ntseeg. 24 Thov kom Vajtswv foom koob hmoov nplua mias rau txhua tus uas muaj lub siab dawb paug hlub peb tus Tswv Yexus Khetos.