SAU RAU COV KALATIAS

1 Ntawm no yog Povlauj. Kuv tes hauj lwm ua tub txib tsis yog neeg li thiab kuj tsis yog tib neeg tsa kuv ua. Tiam sis yog Yexus Khetos, thiab yog Vajtswv uas yog peb Leej Txiv tus uas tsa Khetos sawv hauv qhov tuag rov los, tau tsa kuv ua ntag. 2 Kuv thiab cov kwv tij ntawm no puav leej xa lus noj qab nyob zoo tuaj rau cov koom txoos hauv Kalatias.

3 Thov kom Vajtswv uas yog peb Leej Txiv thiab tus Tswv Yexus Khetos foom koob hmoov nplua mias* rau nej thiab pub nej nyob kaj siab lug. 4 Nws pub nws txoj sia los daws peb lub txim kom peb dim plaws lub sim ceeb* phem no. Tej no muaj raws li Vajtswv uas yog peb Leej Txiv lub siab nyiam. 5 Thov kom Vajtswv tau koob meej mus ib txhiab ib txhis tsis kawg. Amees.*

6 Vim muaj txoj kev hlub uas Khetos pub dawb, Vajtswv thiaj hu nej los. Tiam sis kuv yeej tsis xav tias ua cas nej yuav tso Vajtswv tseg sai ua luaj, mus caum lwm txoj xov cuag li yog txoj xov zoo. 7 Yeej tsis muaj dua lwm txoj xov zoo, tiam sis muaj ib txhia xav tsim teeb meem rau nej thiab xav ntxeev txoj xov zoo txog tus Khetos. 8 Yog peb los sis ib tug tub txib saum ntuj yuav tshaj tawm dua ib txoj xov uas txawv txoj xov zoo peb tau qhia rau nej, cia tus ntawd raug foom. 9 Kuv twb hais rau nej lawm, nim no kuv yuav rov hais dua tias, yog leej twg yuav tshaj tawm ib txoj xov zoo txawv txoj uas nej twb ntseeg lawd, cia tus ntawd raug foom.

10 Puas yog kuv xav ua kom haum neeg siab los yog ua haum Vajtswv siab? Yog kuv yuav ua kom haum neeg siab ces kuv kuj tsis yog Khetos tus tub qhe. 11 Cov kwv tij, kuv xav kom nej paub tias txoj xov zoo kuv tau tshaj tawm rau nej tsis yog neeg lub tswv yim. 12 Txoj xov ntawd tsis yog tib neeg qhia rau kuv thiab tsis yog kuv kawm ntawm tib neeg los. Tiam sis yog Yexus Khetos qhia tshwm rau kuv ntag.

13 Nej yeej hnov txog kuv lub neej thaum kuv tseem coj Yudais kev cai. Thaum ntawd kuv tsim txom Vajtswv lub koom txoos hnyav kawg li kom puas tsuaj mus. 14 Vim kuv muaj lub siab kub lug coj kuv cov yawg koob tej kev cai, kuv thiaj kawm tau zoo tshaj cov Yudais uas nrog kuv ib phaum. 15 Vajtswv cia kuv tawm hauv kuv niam lub plab los.* Nws muaj kev hlub nplua mias rau kuv, nws thiaj hu kuv. Nws pom zoo 16 txib kuv mus qhia txog nws tus Tub, kom kuv thiaj tau tshaj tawm txoj xov zoo txog tus Tub ntawd rau lwm haiv neeg. Thaum ntawd kuv tsis maj mus sab laj rau ib tug twg. 17 Kuv kuj tsis mus rau hauv Yeluxalees mus cuag cov uas xub ua tub txib lawd. Tiam sis kuv cia li mus rau teb chaws Alanpias, kuv mam rov los rau Damaxakas.

18 Tau peb lub xyoos tom qab ntawd, kuv mam mus rau Yeluxalees mus xyuas Khefas.* Kuv nrog nws nyob tau 15 hnub. 19 Tiam sis kuv tsis pom lwm cov tub txib, tsuas pom tus Tswv tus kwv Yakaunpaus xwb. 20 Tej uas kuv tab tom sau tuaj rau nej no muaj tseeb, Vajtswv yeej paub tias kuv tsis dag.

21 Tom qab ntawd kuv sawv kev mus rau cheeb tsam Xilias thiab Xilixias. 22 Tiam sis cov koom txoos hauv Yudias uas nrog Khetos koom siab tsis tau paub kuv. 23 Lawv tsuas hnov luag hais tias, “Tus yawg uas tsim txom peb yav tas los thiab rhuav kom cov koom txoos* puas tsuaj, ho tshaj tawm txoj xov zoo lawm.” 24 Thaum lawv paub txog kuv, lawv qhuas Vajtswv heev.

2 Tom qab 14 lub xyoos, kuv rov qab nrog Npananpas mus rau Yeluxalees. Kuv kuj coj Titus nrog kuv thiab. 2 Tos kuv mus los, twb yog vim tej uas tus Tswv qhia tshwm rau kuv pom. Kuv mus qhia cov kwv tij paub tias kuv tau tshaj tawm txoj xov zoo rau lwm haiv neeg li cas. Kuv tsuas qhia twj ywm rau cov kwv tij tseem ceeb hauv lub koom txoos xwb, rau qhov kuv xav paub tias tes hauj lwm uas kuv tab tom ua thiab twb ua los lawd puas muaj qab hau tiag. 3 Txawm Titus yog neeg Kilis thiab nws nrog kuv mus los, tsis muaj leej twg hais kom nws ua kev cai txiav.* 4 Tos muaj tej teeb meem no los, twb yog muaj cov kwv tij cuav nkag twj ywm los soj lub koom txoos. Lawv xav rhuav txoj kev ywj pheej uas peb muaj vim peb nrog Yexus Khetos* koom ib lub siab, thiab xav yuam peb rov mus ua txoj Kev Cai qhev. 5 Tiam sis peb yeej tsis kam mloog lawv hais kiag li, xwv nej thiaj tuav rawv qhov tseeb uas yog txoj xov zoo.

6 Tiam sis cov kwv tij uas sawv daws hwm ntawd (txawm lawv muaj tsim npaum li cas los xij, tsis ua li cas rau kuv, rau qhov Vajtswv tsis xaiv leej twg ntsej muag) lawv kuj tsis tau hais kom kuv hloov ib yam twg li. 7 Lawv pom tias tus Tswv muab txoj xov zoo cob rau kuv coj mus qhia rau cov uas tsis tau ua kev cai txiav, ib yam li nws tau muab cob rau Petus coj mus qhia rau cov uas twb ua kev cai txiav lawd. 8 (Rau qhov tus uas tsav hwj chim rau Petus ua tub txib mus pab cov ua kev cai txiav kuj tsav hwj chim rau kuv mus pab lwm haiv neeg thiab.) 9 Lawv kuj pom Vajtswv txoj kev hlub nplua mias rau kuv thiab. Yog li ntawd, Yakaunpaus, Khefas,* thiab Yauhas uas zoo li cov ncej txheem lub koom txoos, thiaj tuav Npananpas wb tes qhia tias peb yeej koom siab ua hauj lwm. Lawv kom wb mus qhia lwm haiv neeg es lawv mam qhia cov uas ua kev cai txiav. 10 Lawv tsuas hais kom wb nco ntsoov cov txom nyem. Kuv thiaj kub siab lug ua raws li lawv hais ntawd.

11 Tiam sis thaum Khefas* tuaj rau ntawm Athi-aus, kuv phua cai kiag rau nws vim sawv daws yeej paub tias nws ua tsis yog lawm. 12 Thaum cov neeg nrog Yakaunpaus tsis tau tuaj txog, Khefas* twb nrog lwm haiv neeg noj mov ua ke. Tiam sis thaum lawv tuaj txog, nws txawm mus nyob ib cag tsis nrog lwm haiv neeg koom tsum lawm, vim nws ntshai cov uas hais kom ua kev cai txiav. 13 Tag nrho cov Yudais cia li ua txuj coj li Petus. Txawm Npananpas los cia li ua txuj coj li lawv lawm thiab. 14 Tiam sis thaum kuv pom tias lawv tsis coj raws li qhov tseeb uas yog txoj xov zoo, kuv hais rau Khefas* tab meeg sawv daws tias, “Koj yog neeg Yudais tiam sis koj tsis coj li neeg Yudais lawm, koj coj li lwm haiv neeg los sad? Ua cas koj tseem yuav ua kom lwm haiv neeg los coj li cov Yudais thiab?”

15 Peb cov uas yug los ua neeg Yudais, peb tsis thooj li lwm haiv neeg uas muaj txim. 16 Peb paub tias tus uas ntseeg Yexus Khetos thiaj yog tus uas Vajtswv suav tias ncaj ncees, tsis yog tus uas coj raws li txoj Kev Cai. Yog li ntawd, peb thiaj ntseeg Yexus Khetos.* Vajtswv thiaj suav tias peb yog neeg ncaj ncees vim peb ntseeg Khetos, tsis yog vim peb coj raws li kev cai. Rau qhov tsis muaj ib tug twg uas coj raws li txoj Kev Cai es Vajtswv yuav suav tias ncaj ncees. 17 Yog peb ntseeg Khetos kom Vajtswv suav tias peb ncaj ncees tiam sis luag ho suav tias peb muaj txim, puas yog Khetos coj peb mus ua txhaum? Yeej tsis yog li ntawd! 18 Yog tej uas kuv muab rhuav lawd, kuv ho muab kho dua ces twb yog kuv ua txhaum txoj Kev Cai ntag. 19 Vim kuv coj txoj Kev Cai, kuv thiaj zoo li tus neeg uas tuag lawm,* kom kuv ciaj sia rau Vajtswv. 20 Kuv raug ntsia saum tus ncej ntoo* nrog Khetos. Kuv lub neej tsis yog kuv lub lawm, tiam sis kuv ua lub neej koom ib lub siab nrog Khetos.* Kuv lub neej tam sim no, kuv coj raws li kuv ntseeg Vajtswv tus Tub. Nws hlub kuv thiab muab nws txoj sia txhiv kuv. 21 Kuv tsis lam muab txoj kev hlub uas Vajtswv pub dawb xyeeb tseg. Rau qhov yog txoj Kev Cai twb ua rau neeg ncaj ncees lawm ces Khetos kuj los tuag dawb dawb xwb.

3 Cov Kalatias’e, cas nej yuav tsis muaj tswv yim li! Leej twg ntxias tau nej yuam kev lawd? Peb twb qhia meej rau nej lawm tias Yexus Khetos raug ntsia saum tus ncej ntoo* los sad? 2 Kuv xav nug nej ib los tias, nej coj txoj Kev Cai es nej thiaj tau txais lub hwj huam lod? Los yog vim nej ntseeg txoj xov zoo? 3 Ua cas nej tsis muaj tswv yim li? Thaum xub pib, nej cia lub hwj huam dawb huv coj nej kev, tiam sis thaum xaus, nej ho cia neeg txhaum coj nej kev lod? 4 Nej tiv kev txom nyem qhuav xwb lod? Yeej tsis yog li ntawd sad? 5 Yog li ntawd, tus uas qhib kev rau nej tau txais lub hwj huam thiab ua tej txuj ci tseem ceeb rau nej pom, puas yog nws ua li ntawd vim nej coj txoj Kev Cai, los yog vim nej ntseeg txoj xov zoo? 6 Ib yam li Anplahas “muaj kev ntseeg rau Vajtswv Yehauvas,* txoj kev ntseeg ntawd ua rau nws ncaj ncees.”

7 Nej yeej paub tseeb tias cov uas muaj kev ntseeg thiaj yog Anplahas tub ki. 8 Vajtswv twb hais ua ntej hauv nws Txoj Lus tias nws yuav suav lwm haiv neeg ncaj ncees vim lawv muaj kev ntseeg. Nws twb qhia txoj xov zoo no rau Anplahas ua ntej lawm tias, “Txhua haiv neeg yuav tau txais koob hmoov vim muaj koj.” 9 Yog li ntawd, cov uas muaj kev ntseeg tau txais koob hmoov ib yam li Anplahas, tus uas muaj kev ntseeg.

10 Txhua tus uas vam khom txoj Kev Cai yuav raug foom. Rau qhov twb muaj lus sau cia tias, “Txhua leej txhua tus uas tsis coj raws li txhua nqe Kev Cai yuav raug foom tsis zoo.” 11 Tsis tas li ntawd, peb paub tseeb tias Vajtswv tsis suav tus uas coj txoj Kev Cai ua neeg ncaj ncees, rau qhov “tus ncaj ncees yuav tau txoj sia vim nws muaj kev ntseeg.” 12 Txoj Kev Cai yeej tsis hais txog kev ntseeg. Rau qhov “tus uas coj raws li txoj Kev Cai yuav tau txoj sia.” 13 Khetos twb them tus nqe tso peb dim tej lus foom ntawm txoj Kev Cai lawm. Nws ua tus raug foom nyob peb chaw, rau qhov muaj lus sau cia tias, “Txhua tus uas dai saum tus ncej ntoo* raug foom lawm.” 14 Yuav tsum muaj li no xwv txoj koob hmoov uas pub rau Anplahas thiaj ntws mus rau lwm haiv neeg vim muaj Yexus Khetos.* Vim peb ntseeg, peb thiaj tau txais lub hwj huam uas Vajtswv cog tseg.

15 Cov kwv tij, kuv yuav muab ua piv txwv li no, thaum muaj ob leeg sib cog lus hais haum lawd, txawm yog tib neeg cog lus xwb los, lwm tus yeej rhuav tsis tau los sis ntxiv tsis tau li. 16 Cov lus cog tseg yog hais rau Anplahas thiab nws tus xeeb ntxwv. Tsis tau hais tias, “rau koj cov xeeb ntxwv” uas yog coob tus. Tsuas hais tias, “rau koj tus xeeb ntxwv” uas yog tib tug xwb. Tus ntawd yog Khetos. 17 Tsis tas li ntawd, kuv xav hais ntxiv tias twb tau 430 xyoo tom qab ntawd, Vajtswv mam rhawv txoj Kev Cai rau nws haiv neeg coj. Tiam sis txoj Kev Cai ntawd rhuav tsis tau lo lus cog tseg uas Vajtswv xub hais rau Anplahas kom tsis muaj qab hau. 18 Yog Vajtswv pub qub txeeg qub teg vim neeg ua raws li txoj Kev Cai ces kuj tsis yog nws pub raws li tej lus cog tseg. Tiam sis Vajtswv pub qub txeeg qub teg rau Anplahas raws li nws tau cog tseg.

19 Yog li ntawd, ua li cas ho rhawv txoj Kev Cai? Twb yog rhawv los kom pom tias muaj kev txhaum, mus txog thaum tus xeeb ntxwv uas Vajtswv hais lo lus cog tseg rau los txog. Vajtswv muab txoj Kev Cai rau cov tub txib saum ntuj cev rau ib tug uas nyob nruab nrab ntawm Vajtswv thiab tib neeg. 20 Yog muaj ib tug cog lus xwb ces tsis tas muaj tus nyob nruab nrab. Twb yog Vajtswv ua li ntawd, rau qhov nws tib leeg yog tus cog lus xwb. 21 Ua li, puas yog txoj Kev Cai cov nyom Vajtswv tej lus cog tseg? Yeej tsis yog! Rau qhov yog ho muaj ib txoj kev cai uas pub tau txoj sia ces kuj coj txoj kev cai ntawd kom ua tau neeg ncaj ncees. 22 Tiam sis Vajtswv Txoj Lus muab txhua tus cob rau kev txhaum khi. Ua li no, cov uas muaj kev ntseeg* thiaj tau saws tej koob hmoov uas twb muab cog tseg rau cov ntseeg Yexus Khetos.

23 Tiam sis ua ntej txoj kev ntseeg tshwm los, peb raug txoj Kev Cai tswj kav thiab muab khi cia. Peb tos ntsoov hnub uas txoj kev ntseeg tshwm los. 24 Yog li ntawd, txoj Kev Cai tsuas kav peb mus txog thaum Khetos los xwb, Vajtswv thiaj suav tau tias peb ncaj ncees vim peb muaj kev ntseeg. 25 Tiam sis nim no txoj kev ntseeg twb los txog lawm, txoj Kev Cai thiaj tsis tswj kav peb lawm.

26 Nej sawv daws puav leej yog Vajtswv cov me nyuam vim nej ntseeg Yexus Khetos.* 27 Rau qhov nej cov uas ua kev cai raus dej los nrog Khetos koom ib lub siab twb yoog tau Khetos* lawm. 28 Nej txhua tus puav leej koom nrog Yexus Khetos* lawm, tsis hais tus neeg Yudais los sis neeg Kilis, tus ua qhev los sis tus tsis ua qhev, thiab tsis hais poj niam txiv neej. 29 Tsis tas li ntawd, yog nej twb ua Khetos li tub qhe lawm, nej thiaj yog Anplahas tus xeeb ntxwv, thiab yuav saws tej uas tau cog tseg rau nws.

4 Kuv hais rau nej tias, thaum tus uas saws qub txeeg qub teg tseem yau, txawm nws yog tus tswv kav txhua yam ntawd los nws tsuas zoo li tus qhev xwb. 2 Tej tub qhe thiab lwm tus yuav saib xyuas nws thiab nws tej cuab tam mus txog hnub uas nws txiv teem tseg. 3 Ib yam li ntawd, thaum peb tseem yog me nyuam yaus, peb kuj ua qhev rau qab ntuj neeg vim peb coj raws li lawv tej txuj ci. 4 Tiam sis thaum txog lub sij hawm uas teem tseg, Vajtswv txib nws Leej Tub los yug rau ib tug poj niam thiab yug los coj txoj Kev Cai. 5 Tau muaj li no kom nws thiaj txhiv tau cov uas coj txoj Kev Cai, thiab kom thiaj saws tau peb los ua Vajtswv cov tub ki.

6 Rau qhov nej yog Vajtswv cov tub lawm, Vajtswv thiaj muab lub hwj huam uas nws tau pub rau nws Leej Tub, tso hauv peb lub siab. Lub hwj huam ua rau peb quaj thov tias: “Anpas,* Txiv!” 7 Yog li ntawd, nej tsis yog tub qhe lawm, nej yog Vajtswv tub ki. Yog nej tau ua tub ki lawm tiag ces Vajtswv yuav pub nej txais qub txeeg qub teg thiab.

8 Thaum nej tsis tau paub Vajtswv, nej ua tej dab tej mlom qhev. 9 Tiam sis nim no nej los paub Vajtswv lawm. Qhov tseeb, twb yog Vajtswv paub nej lawm, ua cas nej tseem xav tig rov qab mus ua qhev dua rau lub qab ntuj no tej txuj ci uas tsis muaj qab hau thiab tsis muaj nqis hlo li? 10 Nej coj nruj kawg thiab suav hnub suav hli suav niaj suav xyoo los ua kev cai. 11 Kuv ntshai nyob tsam kuv khwv khwv rau nej los nkim kuv lub zog xwb.

12 Cov kwv tij’e, kuv thov kom nej xyaum li kuv, rau qhov yav tas los kuv zoo li nej thiab. Nej tsis tau ua txhaum kuv. 13 Nej yeej paub tias thawj zaug kuv tshaj tawm txoj xov zoo rau nej, twb yog vim kuv mob es kuv so hauv nej. 14 Kuv mob li ntawd tsis yooj yim rau nej los, nej tsis ntxub kuv thiab tsis qias kuv.* Nej tseem tos txais kuv ib yam li Vajtswv ib tug tub txib saum ntuj, thiab ib yam li Yexus Khetos* ntag. 15 Thaum ntawd nej zoo siab kawg li sad, ua li cas rau nej lawd? Kuv paub tias thaum ntawd, yog nej kaus tau nej ob lub qhov muag rau kuv mas nej yeej muab hlo rau kuv. 16 Puas yog kuv hais tseeb rau nej es kuv ho ua yeeb ncuab rau nej lawd? 17 Lawv cov ntawd nrhiav nrhw kev ntxias kom nej tuaj lawv tog, tiam sis tsis yog kom nej tau zoo. Twb yog lawv xav kom nej nrug deb ntawm kuv xwb, nej thiaj mob siab caum lawv. 18 Kuv cov me nyuam, yog leej twg mob siab nej kom nej tau zoo ces yim huab zoo. Tiam sis tsis txhob lam ua zoo li ntawd rau thaum kuv tuaj nrog nej xwb. 19 Kuv yuav rov mob ib yam li leej niam mob plab yug me nyuam mus txog thaum nej yoog tau li Khetos. 20 Kheev lam kuv tau nrog nej ua ke ces kuv yuav ua tib zoo hais nej, rau qhov kuv tsis paub xyov ua li cas rau nej lawm.

21 Nej cov uas xav coj txoj Kev Cai, qhia kuv seb, nej puas paub txoj Kev Cai qhia li cas? 22 Tau muaj lus sau tias Anplahas muaj ob tug tub. Ib tug yog tus ntxhais qhev yug. Ib tug yog tus poj niam tsis ua qhev yug. 23 Tus tub uas tus ntxhais qhev yug, yog yug li neeg ib txwm yug.* Tiam sis tus tub uas tus poj niam tsis ua qhev yug, yog yug raws li lo lus cog tseg. 24 Tau muab tej no los ua ib zaj yeeb yam ua piv txwv. Ob tug poj niam no piv txog ob lo lus cog tseg. Hankas yog lo lus cog tseg ntawm lub Roob Xinais, nws yug me nyuam los poob cev qhev. 25 Hankas txhais tias Xinais uas yog ib lub roob hauv teb chaws Alanpias. Nws piv txog Yeluxalees uas muaj nyob tam sim no, vim lub nroog thiab cov pej xeem nyob hauv* poob cev qhev. 26 Tiam sis Yeluxalees uas nyob siab tsis ua qhev thiab nws yog peb niam.

27 Rau qhov muaj lus sau tias, “Tus poj niam mooj* uas tsis muaj me nyuam, cia li zoo siab. Tus poj niam uas tsis tau mob dua plab yug me nyuam, cia li qw zoo siab xyiv fab hlo. Rau qhov tus poj niam mooj tej me nyuam coob tshaj tus poj niam uas muaj txiv.” 28 Cov kwv tij, nim no nej yog cov me nyuam uas yug los raws li lo lus cog tseg, ib yam li Ixaj. 29 Txawm yog tam sim no los kuj zoo ib yam li thaum ub thiab. Tus tub uas yug raws li neeg ib txwm yug* pib tsim txom tus tub uas yug raws li lub hwj huam. 30 Tiam sis Vajtswv txoj lus hais li cas? Hais tias, “Cia li ntiab tus ntxhais qhev thiab nws tus tub khiav tawm mus. Rau qhov tus ntxhais qhev tus tub yuav tsis tau saws qub txeeg qub teg nrog tus poj niam tsis ua qhev tus tub.” 31 Yog li ntawd, cov kwv tij, peb tsis yog tus ntxhais qhev cov me nyuam. Tiam sis peb yog tus poj niam tsis ua qhev cov me nyuam.

5 Rau qhov Khetos twb tso peb dim cev qhev lawm. Yog li ntawd, cia li tuav kev ntseeg ruaj nreeg, tsis txhob thim rov mus ua qhev lawm.

2 Kuv yog Povlauj, kuv qhia rau nej tias yog nej ua kev cai txiav,* tej uas Khetos ua yuav pab tsis tau nej li nawb. 3 Kuv hais hlo rau txhua tus txiv neej uas ua kev cai txiav tias, tus ua kev cai txiav yuav tsum coj raws li txoj Kev Cai txhua nqe. 4 Nej cov uas xav tias txoj Kev Cai ua rau nej ncaj ncees lawd, nej twb ncaim Khetos mus lawm. Nej twb poob ntawm nws txoj kev hlub nplua mias lawm. 5 Tiam sis peb mas, peb vam ntsoov tias lub hwj huam thiab peb txoj kev ntseeg ua rau Vajtswv suav tias peb ncaj ncees. 6 Rau qhov txhua tus uas koom nrog Yexus Khetos,* txawm nws ua kev cai txiav thiab tsis ua los tsis tseem ceeb. Qhov tseem ceeb yog nws muaj kev ntseeg es muaj lub siab hlub luag.

7 Nej twb taug rawv* txoj kev tseeb los sad? Leej twg ho tav nej kev tsis pub nej ua raws li qhov tseeb lawd? 8 Leej twg yaum kom nej ua li no? Tsis yog Vajtswv tus uas hu nej los. 9 Ib nyuag qhov keeb* xwb yeej ua rau ib phaj hmoov su tag nrho. 10 Kuv yeej tso siab tias nej cov uas nrog tus Tswv koom ib lub siab yuav xav ib yam li kuv hais no. Tiam sis tus uas pheej tsim teeb meem rau nej, txawm nws yog leej twg los nws yeej yuav raug txim. 11 Cov kwv tij, yog kuv qhia kom ua kev cai txiav ces yeej tsis muaj leej twg tsim txom kuv li, puas yog? Qhov uas kuv qhia tias Yexus tuag saum tus ncej ntoo* kuj tsis txhaum leej twg lawm thiab. 12 Kuv xav kom cov txiv neej uas pheej tshum nej ntawd, cia li muab lawv tus kheej sam kiag.*

13 Cov kwv tij, Vajtswv twb hu nej los nyob ywj pheej lawm. Tsuas yog nej txhob ua ywj siab raws li cev nqaij daim tawv ntshaw xwb. Tiam sis cia li sib hlub es ib leeg txaus siab hlo tiam* ib leeg. 14 Rau qhov tag nrho txoj Kev Cai txhua nqe los xaus rau nqe uas hais tias, “Hlub kwv tij zej zog ib yam li koj hlub koj tus kheej.” 15 Tiam sis yog nej ib tug pheej ntxo ib tug thiab ib tug tom ib tug, ceev faj tsam nej ib tug yuav ua rau ib tug puas tsuaj.

16 Tiam sis kuv hais rau nej tias, kav tsij cia lub hwj huam coj nej kev mas nej thiaj tsis ua raws li cev nqaij daim tawv ntshaw. 17 Rau qhov cev nqaij daim tawv tawm tsam lub hwj huam, thiab lub hwj huam tawm tsam cev nqaij daim tawv. Ob yam no yeej sib tawm tsam kom nej thiaj tsis mus vuag tej uas nej pheej xav ua. 18 Tsis tas li ntawd xwb, yog nej cia lub hwj huam coj nej kev ces txoj Kev Cai tsis kav nej lawm.

19 Sawv daws yeej paub tias cov uas ua raws li cev nqaij daim tawv ntshaw coj li cas. Lawv ua plees ua yi,* ua phem ua qias, ua vuab tsuab tsis paub txaj muag,* 20 teev dab teev mlom, ua neeb ua yaig, ua yeeb ncuab, sib cav sib ceg, sib khib, sib chim, hais tsis sib haum, sib cais, tawg ua pab ua pawg, 21 ntshaw luag tug, qaug dej qaug cawv, ua nqaj ua nqug thiab lwm yam uas zoo li tej no. Kuv ceeb toom nej txog tej no ib yam li kuv ceeb toom nej yav thaud. Cov uas coj li no yuav tsis tau txais Vajtswv lub Nceeg Vaj.*

22 Tiam sis cov uas ua raws li lub hwj huam coj muaj lub siab hlub, kev xyiv fab, lub siab tus, lub siab ntev, lub siab zoo, ua neeg zoo, muaj kev ntseeg, 23 hais lus mos lus muag, paub tswj lawv tus kheej. Yeej tsis muaj ib txoj cai twg txwv tej no. 24 Tsis tas li ntawd, cov uas yog Yexus Khetos* li twb muab tej uas cev nqaij daim tawv ntshaw thiab xav tau, ntsia rau saum tus ncej ntoo* lawm.

25 Yog peb ua peb lub neej raws li lub hwj huam, cia peb kav tsij yoog raws li lub hwj huam coj. 26 Cia peb tsis txhob tsab ua loj, tsis txhob tshum kom muaj kev sib khib sib tw, thiab tsis txhob ntshaw luag ib yam dab tsi li.

6 Cov kwv tij, yog ib tug neeg tsis paub tiam sis nws pib yuam kev lawd, nej cov uas paub tab yuav tsum ua siab mos siab muag mus pab kom nws rov kho nws txoj kev xav. Tiam sis nej yuav tsum ceev faj tsam nej ho raug ntxias thiab. 2 Nej cia li sib pab ris nra, thiaj yog nej coj raws li Khetos txoj kev cai. 3 Yog leej twg pib xav tias nws tsim txiaj dua lwm tus ces twb yog nws rov dag nws tus kheej, rau qhov nws twb tsis tsim txiaj ua luaj twg. 4 Tiam sis txhua tus nyias yuav tsum tshuaj nyias tes hauj lwm. Thaum kawg nws thiaj txaus siab rau tej uas nws ua xwb, tsis yog vim muab nws tus kheej piv rau lwm tus. 5 Rau qhov nyias yuav tau ua nyias tes hauj lwm.*

6 Tsis tas li ntawd, tus uas kawm Vajtswv txoj lus, cia nws muab txhua yam zoo faib rau tus uas qhia nws.

7 Tsis txhob xav yuam kev, peb yeej dag tsis tau Vajtswv. Leej twg tseb yam twg, nws yuav sau yam ntawd. 8 Rau qhov tus uas tseb raws li nws cev nqaij daim tawv ntshaw yuav tau sau kev ploj kev tuag.* Tiam sis yog nws tseb raws li lub hwj huam coj, nws yuav tau sau txoj sia ib txhis tsis kawg los ntawm lub hwj huam. 9 Cia li ua txhua yam hauj lwm zoo, tsis txhob tso tseg. Yog peb peem tiag, thaum txog caij peb yeej yuav tau sau. 10 Yog li ntawd, thaum zoo sij hawm, cia peb ua zoo los pab txhua tus, tiam sis peb yim huab pab peb cov kwv tij nkauj muam uas ntseeg.

11 Kuv yog tus sau kiag tsab ntawv no hlaws hlo* tuaj rau nej saib.

12 Cov uas xav kom luag qhuas, pheej yaum nej ua kev cai txiav.* Tiam sis twb yog lawv tsis xav raug tsim txom vim lawv raws Khetos* qab xwb. 13 Txawm cov uas ua kev cai txiav ntawd los, lawv twb tsis coj txoj Kev Cai thiab. Tiam sis lawv xav kom nej ua kev cai txiav es lawv thiaj muaj chaw khav txog nej xwb. 14 Tiam sis kuv yuav tsis khav li lawv. Kuv tsuas khav txog peb tus Tswv Yexus Khetos uas raug ntsia saum tus ncej ntoo* xwb. Kuv suav tias vim muaj Khetos, lub qab ntuj no twb raug txim tuag* lawm. Tiam sis lub qab ntuj suav tias vim muaj Khetos, kuv yog tus uas raug txim tuag. 15 Txawm yuav ua kev cai txiav thiab tsis ua los tsis muaj qab hau. Tiam sis yam muaj qab hau yog yam uas raug tsim dua tshiab. 16 Thov kom txhua tus uas coj raws li txoj kab ke no tau nyob kaj siab lug, nov yog haiv neeg Ixayees uas Vajtswv saws los ua nws tug. Thov Vajtswv khuv leej lawv!

17 Txij no mus, thov kom txhob muaj leej twg tsim teeb meem rau kuv, rau qhov kuv lub cev ua caws pliav twb qhia tias kuv yog Yexus ib tug tub qhe lawm.

18 Cov kwv tij’e, thov tus Tswv Yexus Khetos foom koob hmoov nplua mias rau nej kom nej haj yam txawj sib hlub sib pab. Amees.*