TSAB NTAWV OB SAU RAU COV KAULEETHAUS

1 Ntawm no yog Povlauj uas Vajtswv pom zoo hu los ua Yexus Khetos* ib tug tub txib, thiab peb tus kwv tij Timautes. Tsab ntawv no yog sau rau Vajtswv lub koom txoos hauv Kauleethaus thiab tag nrho cov ntseeg* uas nyob hauv lub xeev Akhayas.*

2 Thov kom Vajtswv uas yog peb Leej Txiv thiab thov kom tus Tswv Yexus Khetos foom koob hmoov nplua mias rau nej thiab nrog nej sib raug zoo.

3 Cia li qhuas peb tus Tswv Yexus Khetos tus Vajtswv uas yog nws Leej Txiv. Nws yog Leej Txiv uas muaj kev khuv leej thiab yog Vajtswv tus uas nplig tau txhua yam kev nyuaj siab. 4 Txawm peb ntsib kev txom nyem li cas los nws yeej nplig peb. Vajtswv nplig peb siab li cas ces peb yuav paub mus nplig lwm tus thaum lawv ntsib kev txom nyem tsis hais yam twg los xij. 5 Vim peb raws Khetos qab, peb raug kev txom nyem ntau yam. Thiab vim muaj Khetos peb kuj tau txais kev nplig siab nplua mias ntawm nws. 6 Yog peb raug kev txom nyem kuj yog peb raug kom nplig tau nej siab thiab cawm tau nej dim. Thiab yog nplig tau peb siab ces kuj yuav nplig tau nej siab ib yam nkaus. Qhov ntawd yuav pab nej tiv taus tej kev txom nyem uas kuj raug peb ib yam thiab. 7 Peb tso siab plhuav rau nej. Peb yeej paub tias nej nrog peb raug kev txom nyem li cas ces nej kuj yuav tau kev nplig siab ib yam li ntawd thiab.

8 Cov kwv tij, peb xav kom nej paub txog tej kev txom nyem uas peb tau raug hauv lub xeev Axias. Thaum ntawd mas peb txom nyem ti txha nkaus, yuav luag thev tsis taus. Peb yeej xav tias ntshe kawg tuag xwb. 9 Thaum ntawd cuag li peb raug teem txim tuag ntag. Twb yog muaj li ntawd peb thiaj paub tso siab rau Vajtswv tus uas tsa tau cov tuag sawv rov los, tsis yog tso siab rau peb tus kheej. 10 Thaum ntawd Vajtswv yog tus cawm peb dim ntawm txoj kev tuag mas nws yeej yuav rov cawm peb dua. Peb thiaj li vam ntsoov tias yav tom hauv ntej no los nws tseem yuav cawm peb qees. 11 Yuav pab tau peb yog tias nej taij thov Vajtswv tsis tseg rau peb. Yog muaj coob tus thov Vajtswv li no ces Vajtswv yuav teb raws li nej thov. Thaum ntawd sawv daws yuav ua Vajtswv tsaug vim peb tau kev pab.

12 Peb yeej khav tau li no thiab peb lub siab yeej ua tim khawv tias peb coj dawb huv thiab muaj lub siab dawb paug ua txhua yam raws li Vajtswv pom zoo. Peb tsis vam khom neeg lub tswv yim, tiam sis peb vam khom txoj kev hlub uas Vajtswv pub dawb.* Peb coj li no nrog lub qab ntuj neeg, thiab yim huab coj li no nrog nej. 13 Peb tsuas sau txog tej uas nej twb paub zoo thiab nkag siab lawm xwb. Vam tias nej yuav haj yam nkag siab hauv paus nto ntsis. 14 Ib yam li nej ib txhia twb nkag siab lawm tias tsim nyog nej khav txog peb mas thaum txog peb tus Tswv Yexus hnub peb yuav khav txog nej thiab.

15 Vim kuv tso siab li no, kuv thiaj npaj tias kuv yuav rov tuaj xyuas nej zaum ob, kom nej rov xyiv fab dua ib zaug ntxiv.* 16 Kuv twb npaj tias kuv yuav tuaj xyuas nej thaum kuv yuav mus rau Maxedaunias thiab thaum kuv rov Maxedaunias los, kuv yuav rov los rau ntawm nej es nej mam xa kuv mus rau Yudias. 17 Thaum kuv npaj tej no, tsis yog kuv lam tau lam npaj los sad? Thiab tsis yog kuv lam ua ywj siab es ua txuj hais tias “kuv yuav tuaj” tiam sis ho hloov siab tsis tuaj lawm. 18 Nej tso siab tau rau Vajtswv li cas ces nej kuj tso siab tau rau tej uas peb hais no thiab. Yeej tsis yog peb lam hais ib yam es mus ua lwm yam. 19 Rau qhov Vajtswv Leej Tub Yexus Khetos uas kuv, Xivanas, thiab Timautes tau tshaj tawm rau nej lawd, tsis lam hais ib yam es mus ua lwm yam. Tiam sis txhua yam uas nws lees ua nws yeej yuav ua raws li ntawd. 20 Txawm Vajtswv tej lus cog tseg ntau npaum li cas los, puav leej muaj tiav tib si vim yog muaj Yexus. Yog li ntawd, peb thiaj tuav nws lub npe hais tias “Amees”* thov Vajtswv kom Nws thiaj tau koob meej. 21 Vajtswv yog tus uas ua kom nej thiab peb nyob ruaj hauv Khetos. Nws yog tus uas xaiv peb tseg. 22 Nws kuj nias hom thawj rau peb thiab pub nws lub hwj huam kav peb lub siab ua puav pheej qhia tias yuav muaj dab tsi tom hauv ntej.

23 Vajtswv yeej ua tau tim khawv tias tos kuv tsis tuaj hauv Kauleethaus los, twb yog kuv tsis xav kom nej ntxhov siab. 24 Peb tsis yog cov uas kav nej txoj kev ntseeg. Tiam sis peb yog cov uas nrog nej koom tes ua hauj lwm kom nej thiaj muaj kev zoo siab xyiv fab. Twb yog vim nej muaj kev ntseeg nej thiaj sawv ruaj nreeg.

2 Kuv twb ua ib siab tias thaum kuv rov tuaj kuv yuav tsis ua rau nej ntxhov siab. 2 Yog kuv ua rau nej ntxhov siab ces leej twg ho yuav ua rau kuv kaj siab? Tsuas yog tus uas kuv ua rau nws ntxhov siab thiaj rov ua rau kuv kaj siab xwb. 3 Kuv thiaj sau tej lus ntawd tuaj xwv thaum kuv tuaj txog kuv thiaj tsis ntxhov siab rau nej. Yeej tsim nyog kuv zoo siab rau nej xwb. Kuv vam tias tej uas ua rau kuv xyiv fab kuj yuav ua rau nej xyiv fab ib yam thiab. 4 Thaum kuv sau ntawv tuaj rau nej ntawd mas ntxhov kuv siab heev thiab mob kuv siab tshaj plaws li, kuv lub kua muag si laim xwb. Tsis yog kuv xav ua rau nej ntxhov siab, tiam sis kuv xav kom nej paub tias kuv hlub nej npaum li cas tiag.

5 Yog leej twg ua rau nej ntxhov siab, tsis yog nws ua rau kuv xwb tiam sis yog ua rau nej sawv daws thiab. Tiam sis kuv tsis xav muab hais hnyav dhau. 6 Qhov uas cov kwv tij feem coob qhuab ntuas nws ntawd twb hnyav txaus lawm. 7 Nim no cia li zam nws lub txim es nplig nws, nyob tsam nws ho tu siab dhau thiab tag kev cia siab lawm. 8 Yog li ntawd, kuv thov nej cia li qhia kom nws paub tias nej tseem hlub tshua nws. 9 Qhov uas kuv tau sau li ntawd tuaj rau nej kuj yog kuv xav paub seb nej puas yuav mloog txhua yam uas kuv hais los tsis mloog. 10 Yog nej zam txim rau ib tug twg ces kuj yog kuv zam thiab. Yog kuv tau zam ib tug twg lub txim ces twb yog kuv ua los pab nej xwb. Kuv zam li ntawd tab meeg Khetos. 11 Peb yuav tsum sib zam, Xatas thiaj ntxias tsis tau peb, vim peb twb paub zoo txog nws lub tswv yim lawm.

12 Thaum kuv tuaj tshaj tawm txoj xov zoo hauv Rhau-as txog tus Khetos mas tus Tswv qhib rooj lug rau kuv ua nws tes hauj lwm. 13 Tiam sis kuv ntxhov siab kawg li vim nrhiav tsis tau kuv tus kwv tij Titus. Kuv thiaj hais rau cov kwv tij tias kuv yuav ncaim lawv mus ces kuv txawm mus rau Maxedaunias lawm.

14 Tiam sis ua Vajtswv tsaug uas nws ib txwm coj peb kev nrog Khetos, zoo ib yam li pab tub rog uas muaj yeej ntxhias rov los tsev. Nws txib peb mus tshaj tawm txog Nws rau txhua qhov, zoo ib yam li tej tshuaj tsw qab uas tsw qab ntxiag mus rau txhua qhov chaw. 15 Thaum peb tshaj tawm txog Khetos, peb zoo li tej tshuaj tsw qab rau Vajtswv mas cov uas yuav dim thiab cov uas yuav raug puas tsuaj puav leej hnov tus ntxhiab tsw qab ntawd. 16 Cov uas yuav raug puas tsuaj paub tias yog tus ntxhiab uas coj mus rau kev ploj kev tuag. Tiam sis cov uas yuav dim paub tias yog tus ntxhiab uas coj mus rau txoj sia. Leej twg thiaj tsim nyog ua tes hauj lwm no? 17 Yog peb ntag, vim peb tsis lam muab Vajtswv txoj lus muag noj muag haus li lwm leej lwm tus. Tiam sis peb muaj lub siab dawb paug qhia yam li Vajtswv txib peb mus. Peb nrog Khetos ua tes hauj lwm no tab meeg Vajtswv.

3 Puas yog nej tsis paub peb es peb yuav tsum sau ntawv tuaj qhia nej tias peb yog leej twg? Peb tseem yuav sau ntawv tuaj rau nej ib yam li luag tej thiab lod? Los sis thov nej sau ib tsab ntawv qhuas peb no lod? 2 Nej twb yog peb tsab ntawv ntag. Yog tsab ntawv uas sau rau hauv peb lub siab rau noob neej txhua tus los paub thiab tau nyeem. 3 Nej yog Khetos tsab ntawv mas peb yog Vajtswv cov tub qhe uas pab muab sau cia. Peb tsis yog siv kua mem los sau tiam sis yog Vajtswv tus muaj sia zees nyob lub hwj huam tshoov peb sau. Thiab tsis yog sau rau tej txiag zeb, tiam sis yog sau rau hauv neeg lub siab ntag.

4 Peb yeej tso siab plhuav hais tau li no tab meeg Vajtswv vim muaj tus Khetos. 5 Tsis yog peb khav tias peb muaj cuab kav ua tau tej no, tiam sis twb yog Vajtswv pab peb ua tau xwb. 6 Vajtswv yeej yog tus uas pab kom peb muaj cuab kav ua nws cov tub qhe raws li lo lus cog tseg tshiab, tsis yog raws li ib txoj kev cai twg tiam sis yog raws li lub hwj huam coj. Txoj kev cai tsuas teem lub txim tuag rau peb xwb, tiam sis lub hwj huam pub txoj sia rau peb.

7 Tau muab txoj kev cai uas teem lub txim tuag sau rau tej txiag zeb mas ci ntsa iab. Cov Ixayees thiaj tsa tsis taus qhov muag ntsia Mauxes lub ntsej muag uas ci ntsa iab li. Txawm li ntawd los lub hwj chim ci ntsa iab ntawd twb raug rhuav tshem lawm. 8 Yog txoj kev cai twb ci ntsa iab li ntawd ces tej uas lub hwj huam ua yim huab muaj hwj chim ci ntsa iab. 9 Yog txoj kev cai uas teem lub txim tuag twb ci ntsa iab ces tes hauj lwm uas coj neeg mus rau kev ncaj ncees yim huab ci tshaj ntawd! 10 Lo lus cog tseg tshiab lub hwj chim yeej ci tshaj, thiaj ua rau txoj kev cai lub hwj chim tsaus ntais lawm. 11 Yog tias yam uas yuav raug rhuav tshem twb tshwm los muaj hwj chim ci ntsa iab ces yam uas yuav nyob mus ib txhis yim huab muaj hwj chim ci ntsa iab!

12 Twb yog peb muaj txoj kev vam no peb thiaj tsis ntshai mus cuag Vajtswv thiab qhia tib neeg. 13 Peb tsis npog ntsej muag li Mauxes npog. Mauxes npog nws lub ntsej muag kom cov Ixayees thiaj tsis pom txoj kev cai lub hwj chim ci ntsa iab uas thaum kawg yuav muab rhuav mus. 14 Tiam sis lawv lub siab tsis nthuav. Daim ntaub tseem npog rawv lawv lub siab los txog niaj hnub nim no, lawv thiaj tsis nkag siab lo lus cog tseg qub. Tsuas yog Khetos thiaj tshem tau xwb. 15 Los txog niaj hnub no thaum lawv nyeem Mauxes tej lus, daim ntaub tseem npog rawv lawv lub siab. 16 Tiam sis yog leej twg tig rov los cuag Vajtswv Yehauvas* ces thiaj tshem tau daim ntaub tawm. 17 Vajtswv Yehauvas* yog tus uas peb qhov muag tsis pom* mas Yehauvas* lub hwj huam nyob qhov twg ces kev ywj pheej nyob qhov ntawd. 18 Peb sawv daws yog cov uas tsis muaj daim ntaub npog ntsej muag, peb thiaj zoo li daim tsom iav uas ci rau sawv daws pom Vajtswv Yehauvas* lub hwj chim ci ntsa iab. Peb tab tom hloov kom peb yoog tau raws li Vajtswv tus yam ntxwv mas yuav ua rau peb yim huab muaj koob meej ci ntsa iab, raws li Vajtswv Yehauvas* pom zoo.

4 Twb yog Vajtswv hlub* peb nws thiaj pub tes hauj lwm no rau peb ua, yog li ntawd peb yuav tsis tso tseg li. 2 Peb ntxub yam uas rhuav ntsej muag thiab yam uas ua zais ntshis. Peb tsis xav dag ntxias lwm leej lwm tus thiab peb yeej tsis muab Vajtswv txoj lus ntxeev. Tiam sis peb tshaj tawm qhov tseeb, peb thiaj ua tau qauv zoo rau txhua tus neeg* tab meeg Vajtswv. 3 Yog txoj xov zoo uas peb tshaj tawm raug muab npog lawd ces tsuas npog rau cov uas yuav raug puas tsuaj xwb. 4 Tus dab uas kav lub sim ceeb* no twb npog cov uas tsis ntseeg ntawd lub siab lawm. Lawv thiaj tsis pom txoj xov zoo uas ci ntsa iab txog tus Khetos uas muaj Vajtswv tus yam ntxwv ci tuaj rau lawv. 5 Rau qhov peb tsis tshaj tawm txog peb tus kheej tiam sis peb tshaj tawm txog Yexus Khetos uas yog tus Tswv. Thiab peb tshaj tawm tias peb zoo siab ua nej qhev vim peb ua Yexus tes hauj lwm. 6 Rau qhov Vajtswv yog tus uas hais tias, “Cia qhov kaj ci hauv qhov tsaus ntuj tuaj.” Vajtswv thiaj ua qhov kaj ci ntawm Khetos lub ntsej muag tuaj rau peb lub siab kom peb paub txog Vajtswv tus uas muaj hwj chim ci ntsa iab.

7 Txawm peb zoo li tej hub av xwb los, tau muab tej nyiaj tej kub muaj nqis ntim rau hauv. Qhov no qhia meej tias lub dag lub zog loj kawg nkaus uas peb muaj tsis yog neeg lub tiam sis yog Vajtswv lub. 8 Peb raug kev nyuaj siab txhua fab, tiam sis tsis yog peb nti tsis taus. Txawm peb kawg tswv yim los peb tsis tws kev. 9 Peb raug tsim txom tiam sis Vajtswv tsis tso peb tseg. Peb raug ntaus ntog tiam sis peb tseem sawv taus. 10 Peb cev nqaij tawv niaj hnub tiv kev ploj kev tuag ib yam li Yexus tiv, xwv sawv daws thiaj pom tias peb ua peb lub neej ib yam li Yexus* lub. 11 Peb ua neej nyob, peb niaj hnub ntsib kev ploj kev tuag vim peb ua Yexus tes hauj lwm, xwv sawv daws thiaj pom tias peb ua peb lub neej ib yam li Yexus* lub. 12 Yog li ntawd, peb niaj hnub ntsib kev ploj kev tuag kom nej tau txoj sia.

13 Peb muaj tib txoj kev ntseeg li Vajtswv txoj lus sau tseg no, “Twb yog kuv ntseeg, kuv thiaj hais.” Peb kuj ntseeg peb thiaj hais thiab. 14 Peb yeej paub tias tus uas tsa Yexus sawv rov los yeej yuav tsa peb sawv ib yam nkaus thiab. Nws yuav coj peb nrog nej mus cuag Yexus. 15 Txhua yam no yog ua rau nej xwv txoj kev hlub uas Vajtswv pub dawb thiaj yim huab ntws lug rau sawv daws, rau qhov muaj tib neeg coob kawg li ua Vajtswv tsaug Nws thiaj tau koob meej.

16 Yog li ntawd, peb yeej tsis tso tseg li. Txawm peb lub cev nqaij tawv thiab lub zog ntaug zuj zus los, peb lub siab niaj hnub rov muaj zog npho tuaj. 17 Tej nyuag teeb meem me me uas peb raug tsuas nyob ib vuag xwb, tiam sis tej ntawd yuav ua rau peb tau txais tej koob hmoov uas nyob mus ib txhis, tsis muaj ib yam dab tsi piv tau li. 18 Yog li ntawd, peb yuav tsis tsom ntsoov tej uas peb qhov muag pom, tiam sis peb yuav tsom ntsoov tej uas peb qhov muag tsis pom. Tej uas peb qhov muag pom tsuas nyob ib vuag xwb, tiam sis tej uas peb qhov muag tsis pom yuav nyob mus ib txhis.

5 Peb yeej paub tias yog peb lub cev uas zoo li lub tsev ntaub hauv ntiaj teb no raug rhuav tshem los, Vajtswv yeej yuav pub ib lub tsev rau peb. Lub tsev ntawd tsis yog neeg txhais tes ua thiab yuav nyob mus ib txhis saum ntuj ceeb tsheej. 2 Thaum peb tseem nyob hauv lub tsev ntaub no mas peb ntsaj ntsoog qees tos lub tsev uas ua tseg rau peb saum ntuj ceeb tsheej. Lub tsev saum ntuj zoo li tej tsoos uas qhwv peb lub cev. 3 Thaum txog caij hnav peb thiaj tsis liab qab. 4 Peb cov uas nyob hauv lub tsev ntaub no ntsaj ntsoog qees, nyuaj siab kawg li. Tsis yog peb xav muab lub tsev no hle tseg. Tiam sis peb xav muab lub tsev saum ntuj los hnav, xwv txoj sia ib txhis tsis kawg thiaj hloov tau lub cev uas txawj tuag. 5 Vajtswv yog tus npaj txoj sia no rau peb ntag. Nws yog tus pub lub hwj huam rau peb ua lub cim qhia tias yuav muaj dab tsi tom hauv ntej.

6 Peb yeej ua siab loj thiab paub tias yog peb tseem muaj lub cev no ces peb nyob deb heev ntawm tus Tswv, 7 rau qhov peb coj lub neej raws li kev ntseeg tsis yog raws li qhov muag pom. 8 Tiam sis peb yeej ua taus siab loj thiab yeem tso lub cev no tseg peb thiaj tau nrog tus Tswv nyob. 9 Txawm peb yuav nrog nws nyob los sis nyob deb ntawm nws los, peb lub hom phiaj yog ua kom haum nws siab. 10 Thaum kawg peb txhua tus yuav tau sawv ntawm Khetos lub rooj txiav txim. Peb yuav tau nqi zog raws li tej uas peb tau ua thaum peb tseem muaj lub cev no, tsis hais ua zoo los ua phem.

11 Yog li ntawd, peb paub ntshai tus Tswv peb thiaj niaj hnub yaum tib neeg los ntseeg. Vajtswv yeej paub tias peb zoo li cas tiag. Kuv vam tias nyaj nej* kuj paub tias peb zoo li cas thiab. 12 Tsis yog peb rov qhuas peb rau nej, tiam sis twb yog peb xav txhawb kom nej ho tig los qhuas peb thiab. Nej thiaj yuav muaj lus teb cov neeg uas khav txog tej lawv qhov muag pom xwb, tsis yog tej uas nyob hauv nruab siab. 13 Yog peb ua li tus neeg tsis meej pem, los yeej yog peb ua rau Vajtswv. Thiab yog peb ua li tus neeg meej pem los yeej yog peb ua pab nej. 14 Khetos txoj kev hlub yeej kav rawv peb, rau qhov peb pom tseeb tias, sawv daws twb tuag lawm,* ib tug txiv neej thiaj los tuag txhiv sawv daws. 15 Nws los tuag theej sawv daws lub txhoj thiab twb raug tsa ciaj sawv rov los lawm. Nws ua li ntawd kom txhua tus uas muaj txoj sia nyob ua lawv lub neej raws li nws pom zoo tsis yog raws li lawv pom zoo.

16 Txij no mus peb yuav tsis saib leej twg lub neej li neeg ib txwm saib. Txawm yav tas los peb ib txhia saib Khetos li ntawd los nim no peb tsis saib lawm. 17 Yog li ntawd, txhua tus uas nrog Khetos koom ib lub siab raug tsim dua tshiab lawm. Tej yam qub twb dua tas lawm. Saib maj! Vajtswv tsim tau tej yam tshiab lawm. 18 Tag nrho tej no yog Vajtswv pub. Vim muaj Khetos, Vajtswv thiaj coj peb los nrog nws sib raug zoo thiab pub peb ua tes hauj lwm mus coj neeg los nrog nws sib raug zoo. 19 Tes hauj lwm no yog qhov uas Vajtswv coj neeg ntiaj teb* rov los nrog nws sib raug zoo vim muaj Khetos mas nws tsis suav lawv lub txim lawm. Nws pub peb ua tes hauj lwm tshaj tawm kom neeg rov los nrog Vajtswv sib raug zoo.

20 Yog li ntawd, peb yog cov tub sawv cev uas nyob Khetos chaw. Cuag li Vajtswv siv peb lub qhov ncauj mus hu sawv daws los. Peb cov uas nyob Khetos chaw thiaj thov tias, “Cia li los nrog Vajtswv sib raug zoo.” 21 Khetos yeej tsis tau ua txhaum, tiam sis Vajtswv txib nws los ris peb lub txim. Vim muaj Yexus, Vajtswv thiaj suav tau tias peb ncaj ncees.

6 Peb cov uas nrog Vajtswv ua hauj lwm xav txhawb nej tias, Vajtswv twb foom koob hmoov nplua mias* rau nej lawm, nej yuav tsum saib qhov ntawd rau nqi. 2 Vajtswv hais tias, “Thaum txog lub sij hawm uas kuv txaus siab rau nej, kuv twb hnov nej, thiab thaum txog hnub cawm dim, kuv twb pab nej.” Nim no haj yam yog lub sij hawm uas Vajtswv txaus siab rau peb. Nim no twb txog hnub cawm dim lawm.

3 Peb tsis xav ua ib yam dab tsi kom luag xav yuam kev, xwv luag thiaj tsis muaj chaw thuam qhov uas peb ua Vajtswv tes hauj lwm. 4 Tiam sis peb ua txhua yam qhia tias peb yeej yog Vajtswv cov tub qhe. Tsis hais thaum peb tiv kev txom nyem, raug kev nyuaj siab, tu ncua ib yam twg, raug tej teeb meem, 5 raug luag ntaus, raug luag kaw, raug luag sau nthwv tawm tsam, khwv iab khwv daw, nyiaj tshaib yoo nqhis, thiab yoo dab ntub zias los peb yeej ua kom luag paub tias peb yog Vajtswv cov tub qhe. 6 Peb kuj ua lub neej dawb huv, paub qhov tseeb, ua siab ntev, ua zoo rau luag, thiab coj raws li lub hwj huam dawb huv qhia. Peb muaj lub siab dawb paug hlub luag, 7 peb hais lus tseeb, peb vam khom Vajtswv lub hwj chim, peb muab kev ncaj ncees los ua cuab yeej tuav ntawm sab tes xis* thiab sab tes laug.* 8 Peb ua li no txawm luag yuav thuam peb, yuav qhuas peb, thiab hais zoo hais phem txog peb. Txawm peb hais lus tseeb los luag yuav thuam tias peb dag. 9 Peb zoo li tej neeg uas tsis muaj leej twg paub los Vajtswv yeej paub peb.* Peb zoo li cov neeg uas yuav tu siav* los peb tseem ciaj. Peb zoo li cov neeg raug txim tiam sis luag ho tsis muab peb tua. 10 Peb zoo li cov neeg quaj ntsuag los peb tseem xyiv fab. Peb zoo li cov neeg pluag los peb tseem ua rau coob leej nplua nuj. Peb yog cov neeg tsis muaj ib yam dab tsi los ib puas tsav yam tseem yog peb tug.

11 Cov Kauleethaus’e, peb hais hlo rau nej tsis zais li, thiab peb twb ua lub siab dav fo hlub nej. 12 Peb tsis ua siab nqaim rau nej, tiam sis nej ua siab nqaim rau peb. 13 Yog li, kuv hais nej ib yam li nej yog kuv cov me nyuam, thov ua lub siab dav fo hlub peb thiab.

14 Tsis txhob nrog tus uas tsis ntseeg koom ib tug quab vim tsis sib luag. Cov ncaj ncees yeej tsis koom nrog cov tsis ncaj ncees los sad? Qhov kaj yeej tsis koom nrog qhov tsaus los sad? 15 Tsis tas li ntawd, Khetos yeej tsis nrog Npeli-as* koom ib lub siab los sad? Thiab tus ntseeg yeej tsis muaj feem nrog tus uas tsis ntseeg los sad? 16 Tej mlom yeej tsis muaj feem nyob hauv Vajtswv lub tuam tsev los sad? Peb zoo li Vajtswv tus muaj sia zees nyob lub tuam tsev ntag. Vajtswv twb hais tias, “Kuv yuav nrog lawv nyob thiab nrog lawv ua ke. Kuv yuav yog lawv tus Vajtswv, thiab lawv yuav yog kuv haiv neeg.” 17 “Vajtswv Yehauvas* thiaj hais tias, ‘Yog li ntawd, cia li tso lawv cov ntawd tseg mus nyob rau ib cag. Tseg tsis txhob kov yam uas qias.’” “‘Kuv thiaj txais yuav nej.’” 18 “Vajtswv Yehauvas* tus uas muaj hwj chim loj kawg nkaus hais tias, ‘Kuv yuav ua nej leej txiv thiab nej yuav ua kuv cov tub cov ntxhais.’”

7 Cov kwv tij uas kuv hlub’e, Vajtswv twb cog lus tseg li no rau peb lawm, cia peb muab txhua yam kev phem kev qias uas puas tsuas peb lub siab* lub cev tso pov tseg. Peb yuav tsum xyaum ua neeg dawb huv kawg nkaus thiab paub ntshai Vajtswv.

2 Thov nej qhib siab hlo tos txais peb mog. Peb tsis tau ua txhaum leej twg, tsis tau rhuav leej twg lub neej, thiab tsis tau ntxias leej twg noj. 3 Kuv hais li no, tsis yog kuv cem nej. Kuv twb hais rau nej lawm tias, txawm ciaj tuag los nej yeej nyob rawv hauv peb lub siab. 4 Kuv yeej tsis txaj muag hais phua hlo rau nej li no. Kuv qhuas nej kawg li. Nej nplig tau kuv lub siab heev thiab txawm peb raug tsim txom los kuv xyiv fab kawg li.

5 Thaum peb mus txog Maxedaunias, peb yeej tsis tau so li. Peb tseem raug tawm tsam txhua fab. Cov sab nraud los tawm tsam tuaj thiab cov sab hauv lub koom txoos los peb txhawj qees. 6 Tiam sis Vajtswv yog tus uas nplig cov uas qaug zog. Nws txib Titus tuaj nplig peb. 7 Tsis yog Titus tuaj xyuas peb thiaj txhawb tau peb lub zog xwb. Twb yog muaj nej txhawb nws es nws thiaj kaj siab lug tuaj txhawb peb thiab. Nws qhia rau peb tias nej nco kuv kawg li, nej tu siab heev, thiab mob siab txog kuv mas ua rau kuv xyiv fab lawm ntau.

8 Txawm kuv tsab ntawv ua rau nej tu siab los, kuv paub tias tsim nyog sau li ntawd tuaj. Thaum xub thawj kuv nyuaj siab tias kuv sau li ntawd (vim ua rau nej tu siab kawg li, tiam sis tsuas tu siab ib nyuag ntu xwb). 9 Nim no kuv xyiv fab lawm, rau qhov tsis yog ua rau nej tu siab xwb, tiam sis vim qhov uas nej tu siab ntawd ua rau nej hloov dua siab tshiab. Twb yog nej tu siab raws li Vajtswv pom zoo, tej uas peb hais rau nej thiaj tsis ua teeb meem dab tsi rau nej. 10 Yog leej twg tu siab raws li Vajtswv pom zoo ces yeej yog ib qho zoo, vim yuav pab nws hloov dua siab tshiab mas qhov ntawd yuav cawm nws dim. Tiam sis yog leej twg tu siab raws li lub qab ntuj ces yuav coj nws mus raug kev ploj kev tuag. 11 Sim xav seb, qhov uas nej tu siab raws li Vajtswv pom zoo yeej pab kom nej kub siab ua qhov zoo. Nej thiaj daws tau nej lub npe, ntxub qhov txhaum, paub ntshai Vajtswv, xav hloov dua siab tshiab tiag, thiab kub siab lug muab qhov nkhaus kho kom ncaj! Txhua yam uas nej tau ua los daws qhov teeb meem no yeej raug cai lawm. 12 Thaum kuv sau ntawv tuaj rau nej, tsis yog sau rau tus uas tau ua txhaum, thiab kuj tsis yog sau rau tus uas luag ua txhaum rau. Tiam sis kuv sau rau nej seb nej puas xav mloog peb lus tab meeg Vajtswv tiag. 13 Twb yog vim li ntawd thiaj nplig tau peb siab heev.

Tsis tas li ntawd xwb, peb yim huab zoo siab uas muaj nej txhawb Titus ua rau nws xyiv fab heev. 14 Kuv qhuas nej kawg li rau Titus mas tej uas kuv hais ntawd tsis yog kuv khav dawb xwb. Txhua yam uas peb tau qhia rau nej muaj tseeb li cas ces tej uas peb qhuas rau Titus kuj muaj tseeb li ntawd thiab. 15 Tsis tas li ntawd, nim no nws haj yam hlub tshua nej. Nws nco ntsoov tias thaum nws tuaj, nej mloog lus kawg li mas nej saib taus nws thiab hwm nws heev. 16 Kuv zoo siab kawg li rau qhov kuv yeej tso siab plhuav tau rau ib puas tsav yam uas nej ua.

8 Cov kwv tij, peb xav kom nej paub txog txoj kev hlub uas Vajtswv pub dawb rau cov koom txoos hauv Maxedaunias. 2 Txawm lawv raug sim, raug tsim txom hnyav heev los, lawv tseem zoo siab xyiv fab kawg li. Lawv txom nyem kawg nkaus los lawv tseem ua siab dav pub rau luag. 3 Lawv yeej pub kawg lawv lub dag lub zog, thiab tseem pub tshaj qhov uas lawv muaj lawm thiab. Kuv pom kiag tej uas lawv ua. 4 Lawv tsis tos leej twg hais, tiam sis lawv taij tsis tseg kom peb cia lawv tau txoj koob hmoov pub rau luag. Lawv xav muaj feem pab cov ntseeg.* 5 Tsis yog lawv ua npaum li peb xav xwb, lawv tseem ua tshaj ntawd lawm thiab. Lawv muab hlo lawv tus kheej pub rau tus Tswv, thiab pub rau peb raws li Vajtswv lub siab nyiam. 6 Peb thiaj txhawb kom Titus rov tuaj ntawm nej vim nws twb yog tus uas xub tuaj pab nej sau khoom. Nws mam sau tej qhov txhia chaw uas nej xav pub kom tas. 7 Nej yog cov uas muaj ib puas tsav yam nplua mias, tsis hais kev ntseeg, txawj hais lus, txawj ntse thiab muaj lub siab kub lug ua hauj lwm. Nej txawj hlub luag lwm tus ib yam li peb hlub nej. Thov kom nej muaj lub siab dav pub rau luag nplua mias li no.

8 Kuv hais li no tsis yog kuv yuam nej, tiam sis kuv xav kom nej pom tias lwm tus kub siab ua hauj lwm npaum li cas. Nej yuav tsum ntsuam xyuas seb nej puas hlub nej cov kwv tij tiag. 9 Nej yeej paub zoo txog txoj kev hlub uas peb tus Tswv Yexus Khetos pub dawb. Txawm nws nplua nuj los nws yeem ua tus pluag, kom nws txoj kev txom nyem qhib kev rau nej los ua neeg nplua nuj.

10 Kuv xav li no tias, yog nej ua tes hauj lwm no tiav, tsuas zoo rau nej xwb. Tsaib no nej twb pib ua lawm thiab nej yeej zoo siab hlo ua. 11 Yog li ntawd, cia li ua tes hauj lwm no kom tiav. Nej cia li zoo siab hlo ua ib yam li thaum chiv thawj nej pib. 12 Yog leej twg zoo siab hlo pub ces Vajtswv yim huab txaus siab, rau qhov Vajtswv yeej xav kom peb pub raws li peb muaj tsis yog raws li peb tsis muaj. 13 Tsis yog kuv xav tsub nra hnyav rau nej es ho txo lwm tus lub nra. 14 Tiam sis nim no nej muaj nplua mias, nej yuav pab tau qhov uas lawv tu ncua. Thiab qhov uas lawv muaj nplua mias yuav pab tau qhov uas nej tu ncua. Ua li no thiaj tsis ua nra hnyav rau ib tog twg. 15 Twb muaj lus sau cia tias, “Tus uas khaws tau ntau kuj tsis tau ntau dhau, thiab tus uas khaws tau tsawg kuj tsis tau tsawg dhau.”

16 Ua Vajtswv tsaug uas Titus mob siab txog nej ib yam li peb thiab. 17 Nws yeej ua raws li peb tau hais. Tiam sis nws xav rov tuaj saib nej kawg li, nws yeej zoo nws siab tuaj. 18 Peb kuj txib ib tug kwv tij nrog Titus tuaj thiab. Nws yog tus uas txhua lub koom txoos qhuas rau qhov nws txhawb nqa txoj xov zoo. 19 Tsis tas li ntawd xwb, cov koom txoos* tau tsa nws los ua tus nrog peb xa tej qhov txhia chaw mus faib rau cov kwv tij. Tej no yog ua los qhuas tus Tswv thiab ua pov thawj tias peb muaj lub siab kub lug xav pab tiag. 20 Peb ua li no kom luag thiaj tsis muaj chaw thuam qhov uas peb sau thiab faib tej uas nej pub nplua mias ntawd. 21 Peb yeej ‘tuav txhua txoj hauj lwm kom ncaj ncees. Tsis yog kom Vajtswv Yehauvas* pom xwb, tiam sis tib neeg yuav tsum pom thiab.’

22 Tsis tas li ntawd xwb, peb kuj txib ib tug kwv tij nrog nkawd tuaj thiab. Peb twb sim nws ntau zaus mas pom tias nws nquag ua hauj lwm heev. Nim no nws yim huab kub siab vim nws tso siab kawg li rau nej. 23 Yog leej twg ho nug txog Titus, qhia nej paub tias nws nrog kuv koom tes ua hauj lwm pab nej. Yog leej twg ho nug txog ob tug kwv tij no los, qhia nej paub tias nkawd sawv cev* rau cov koom txoos thiab nkawd ua rau Khetos tau koob meej. 24 Yog li ntawd, nej yuav tsum ua qhia tias nej hlub tshua lawv tiag, xwv cov koom txoos thiaj pom tias tsis yog peb lam qhuas nej xwb.

9 Tsis tas kuv yuav sau tuaj qhia kom nej pab cov ntseeg.* 2 Kuv paub tias nej yeej zoo siab hlo pab lawv. Kuv thiaj qhuas nej rau cov kwv tij hauv Maxedaunias tias, puag tsaib no nej cov uas nyob hauv Akhayas twb muaj lub siab kub lug xav pab lawm. Vim nej kub siab li no, ua rau feem coob kub siab lug xav pab ib yam nkaus. 3 Tiam sis kuv txib cov kwv tij no tuaj kom sawv daws thiaj pom tias tsis yog kuv lam qhuas nej qhuav xwb, thiab kom nej thiaj npaj txhij raws li kuv tau hais lawd. 4 Yog nej tsis ua li ntawd tsam cov kwv tij hauv Maxedaunias ho nrog kuv tuaj es nej npaj tsis txhij ces tsis yog nej txaj muag xwb, tiam sis peb yuav txaj muag thiab, vim peb twb tso siab rau nej lawm. 5 Kuv thiaj pom zoo txib cov kwv tij no tuaj kom ntxov, tuaj pab sau tej qhov txhia chaw uas nej twb cog lus yuav pub nplua mias lawm. Thaum peb tuaj txog, tes hauj lwm no tiav log lawm thiaj qhia tias tsis yog peb yuam nej tiam sis nej yeej muaj lub siab dawb paug pub tiag.

6 Tiam sis nco ntsoov tias, tus uas tsis khuv xim es tseb ntau yuav sau tau ntau, thiab tus uas khuv xim es tseb tsawg yeej yuav sau tau tsawg. 7 Cia peb txhua tus pub raws li peb twb xav tseg lawd. Tsis yog yus yuav khuv xim los sis yuam yus lub siab pub, rau qhov Vajtswv hlub tus uas zoo siab hlo pub.

8 Tsis tas li ntawd, Vajtswv muaj hwj chim foom koob hmoov nplua mias* kom nej muaj txaus noj txaus siv txhua lub sij hawm, thiab muaj nplua mias los ua txhua yam hauj lwm zoo. 9 (Twb muaj lus sau cia tias, “Nws yog tus muaj lub siab dawb pub nplua mias. Nws tau pub rau cov pluag. Nws txoj kev ncaj ncees yuav nyob mus ib txhis.” 10 Yog li ntawd, tus uas pub noob qoob nplua mias rau tus tseb, thiab tus uas pub mov rau neeg noj, yuav pub noob ntws lug rau nej tseb thiab tsav qoob nplua mias rau nej sau vim nej ua ncaj ua ncees.) 11 Twb yog Vajtswv foom koob hmoov nplua mias rau txhua yam uas nej ua, nej thiaj pub tau nplua mias rau luag lwm tus. Thaum kawg tib neeg yuav ua Vajtswv tsaug vim tej uas nej tau muab rau peb xa mus pub lawv. 12 Tes hauj lwm pab luag li no tsis yog pab tau cov ntseeg* kom txhob tu ncua xwb, tiam sis yuav ua rau sawv daws ua Vajtswv tsaug tsis tseg tsis tu. 13 Tes hauj lwm no ua pov thawj tias nej muaj lub siab dawb pub rau luag. Lawv yuav qhuas Vajtswv rau qhov nej coj raws li txoj xov zoo txog tus Khetos uas nej niaj hnub tshaj tawm, thiab rau qhov nej pub nplua mias rau lawv thiab txhua leej txhua tus. 14 Thaum lawv taij thov Vajtswv pab nej mas lawv yuav qhia tias lawv hlub nej npaum li cas rau qhov lawv pom txoj kev hlub uas Vajtswv pub dawb nyob hauv nej tiag.

15 Ua Vajtswv tsaug rau tej uas nws pub dawb rau peb, zoo tshaj plaws tsis pom qab hais li lawm.

10 Kuv yog Povlauj, kuv xyaum li Khetos uas muaj lub siab mos muag thiab lub siab zoo, thov kom nej mloog lus. Nej ib txhia hais tias thaum nej pom kuv tim ntsej tim muag, kuv tsis khuab qhov muag ua luaj twg tiam sis thaum kuv sau ntawv tuaj mas kuv sau muaj ceem kawg li. 2 Kuv vam tias thaum kuv tuaj txog cov uas thuam tias peb coj raws li neeg lub tswv yim twb hloov lawm, kuv thiaj tsis tau ntuas lawv hnyav. 3 Txawm peb ua neej nyob hauv lub qab ntuj no los, peb tsis ua tsov ua rog li lub qab ntuj neeg. 4 Tej cuab yeej uas peb siv los ntaus rog tsis yog tej uas neeg ib txwm siv. Tiam sis yog Vajtswv tej cuab yeej uas muaj hwj chim rhuav tau yam cog ruaj cog khov. 5 Peb thiaj rhuav tau tej tswv yim dag thiab txhua yam uas tav neeg kev los paub txog Vajtswv. Cuag li peb yuam thiab tswj tau kom txhua lub tswv yim los zwm rau tus Khetos. 6 Thaum nej mloog lus lawm tiag, peb mam rau txim rau txhua tus uas tsis kam mloog.

7 Nej tsuas saib ntsej saib muag xwb. Yog leej twg khav tias nws yog Khetos li, cia tus ntawd nco ntsoov tias, peb kuj yog Khetos li thiab. 8 Tus Tswv yog tus pub hwj chim rau peb los txhawb nqa nej, tsis yog los txo nej. Txawm kuv khav zog txog qhov no los kuv yeej tsis txaj muag li. 9 Kuv tsis xav kom nej xav yuam kev tias kuv sau ntawv tuaj hem nej xwb. 10 Rau qhov muaj ib txhia hais tias, “Nws sau ntawv muaj ceem kawg li tuaj, tiam sis thaum pom dheev nws ua cas tsis muaj tsim hlo li thiab qhia tsis muaj kuab kiag li.” 11 Tus uas hais li ntawd yuav tsum nco ntsoov tias peb sau ntawv tuaj li cas, thaum peb tuaj txog peb yeej yuav ua raws li ntawd. 12 Peb yeej tsis lam nrog cov uas rov qhuas lawv tus kheej ua ib pab, los sis muab peb tus kheej piv rau lawv. Lawv tsis yog neeg thoob tsib to nrog rau qhov lawv ntsuas lawv tus kheej raws li lawv pom zoo xwb, thiab lawv muab ib leeg piv rau ib leeg.

13 Tiam sis peb yuav tsis khav txog kev tshaj tawm ntawm lwm koog. Peb tsuas khav txog koog uas Vajtswv tu rau peb tshaj tawm xwb mas nej nyob rau koog ntawd ntag. 14 Tsis yog peb yuav tsum mus dhau peb koog mam tuaj txog nej. Tiam sis peb yog cov uas xub tuaj qhia txoj xov zoo txog tus Khetos rau nej. 15 Tsis yog peb yuav khav dhau koog uas muab tu rau peb es ho khav txog lwm tus tes hauj lwm. Tiam sis peb vam tias nej txoj kev ntseeg yuav haj yam cog ruaj khov, xwv tes hauj lwm uas peb tau ua lawd thiaj nthuav dav zuj zus hauv peb koog. Peb thiaj yuav ua tau hauj lwm ntau zuj zus ntxiv 16 thiab tshaj tawm txoj xov zoo mus rau lwm teb chaws uas tseem nyob deb tshaj nej. Peb ua li no thiaj tsis yog peb khav txog tes hauj lwm uas lwm tus twb ua tiav rau lawv koog lawd. 17 “Tiam sis tus uas khav, cia nws khav txog Vajtswv Yehauvas.”* 18 Vajtswv Yehauvas* qhuas tus uas nws pom zoo. Tiam sis Vajtswv tsis pom zoo tus uas rov qhuas nws tus kheej.

11 Yog kuv hais lus tom ntej tom qab los thov nej ua siab ntev rau kuv. Tiam sis nej twb ua siab ntev kawg li rau kuv lawm tiag. 2 Rau qhov kuv khib nej ib yam li Vajtswv khib ntag. Kuv twb muab nej qhaib rau ib tug txiv lawm, yog tus Khetos. Nej thiaj zoo li tus nkauj xwb dawb huv uas kuv yuav muab cob kiag rau nws. 3 Tiam sis kuv txhawj tsam nej ho raug ntxias ib yam li tus nab tau siv tswv yim ntxias Evas yuam kev. Yog luag ntxias tau nej lub siab ces nej yuav tsis hlub Khetos hauv nruab siab tuaj thiab yuav tsis yog neeg dawb huv li tsim nyog ua rau Khetos lawm. 4 Thaum luag tuaj tshaj tawm txog ib tug Yexus txawv tus uas peb tau tshaj tawm rau nej, los sis luag coj ib tug cwj pwm txawv tus uas lub hwj huam qhia nej coj, thiab qhia ib txoj xov txawv txoj uas nej xub hnov lawd, nej ho tos txais lawv thiab. 5 Kuv yeej tsis tau ua ib yam dab tsi qhia tias kuv qis dua nej cov tub txib uas ua txuj tsab loj kawg nkaus ntawd. 6 Txawm kuv tsis paub hais lus npaum twg los, kuv yeej paub zoo txog Vajtswv. Txhua yam uas peb ua twb ua rau nej pom tseeb li ntawd lawm.

7 Kuv zoo siab hlo tshaj tawm Vajtswv txoj xov zoo rau nej tsis yuav nqi li. Kuv txo hwj chim kom nej tau ntsej muag tseem txhaum thiab lod? 8 Cuag li kuv nyiag lwm cov koom txoos los yug kuv kom kuv thiaj tau ua hauj lwm rau nej. 9 Thaum kuv tseem nrog nej nyob es kuv tu ncua yam twg los, kuv yeej tsis ua nra hnyav rau leej twg. Cov kwv tij uas tuaj Maxedaunias tuaj twb pub nplua mias rau kuv lawm. Yog li ntawd, txawm yam twg los xij kuv tsis ua nra hnyav rau nej leej twg, thiab kuv yeej yuav coj li no mus li. 10 Yog qhov tseeb txog tus Khetos tseem nyob hauv kuv lub siab ces kuv yeej yuav khav li no tsis tseg mus thoob Akhayas. 11 Ua cas kuv ho ua li no? Puas yog kuv tsis hlub nej? Vajtswv yeej paub tias kuv hlub nej npaum li cas.

12 Tiam sis kuv yuav ua li no mus li kom cov uas ua txuj hais tias lawv tuav tes hauj lwm ua tub txib li peb, thiaj tsis muaj chaw khav. 13 Cov txiv neej ntawd yog cuav tub txib, lawv dag ntxias luag lwm tus thiab ua txuj coj li lawv yog Khetos cov tub txib. 14 Tos lawv coj li no los, Xatas twb ua txuj coj li ib tug tub txib saum ntuj uas ci ntsa iab thiab. 15 Yog li ntawd, thaum nws cov tub txib ua txuj coj li cov tub txib ncaj ncees, kuj tsis nyuaj ua luaj twg. Tiam sis thaum kawg lawv yuav tau nqi zog raws li lawv tes hauj lwm.

16 Kuv rov hais dua tias, txhob xav tias kuv yog ib tug neeg hais lus tom ntej tom qab. Yog nej xav li ntawd los, thov zam qhov uas kuv hais tom ntej tom qab, kom kuv thiaj tau khav me ntsis thiab. 17 Tej lus uas kuv yuav hais no tsis raws li tej uas tus Tswv hais, tiam sis kuv hais khav ntxhias li tus neeg hais lus tom ntej tom qab xwb. 18 Vim muaj coob tus khav txog tej uas lawv tau hauv lub qab ntuj no,* kuv yuav khav li ntawd thiab. 19 Nej mas txawj xav diam, nej thiaj zam tau cov uas hais lus tom ntej tom qab. 20 Nej thiaj zam tau cov uas yuam nej ua qhev, cov uas lws nej tej qhov txhia chaw, cov uas txeeb nej tug, cov uas caij tsuj nej, thiab xuas tawg ncuav rau nej plhu.

21 Kuv yeej txaj muag uas peb hais tej no, rau qhov ib txhia yuav xav tias peb tsis muaj lub siab tawv.

Tiam sis yog muaj cov uas tsis txaj muag khav ces kuv kuj tsis txaj muag khav thiab, txawm kuv hais tom ntej tom qab xwb los xij. 22 Lawv yog neeg Henplais lod? Kuv kuj yog thiab. Lawv yog neeg Ixayees lod? Kuv kuj yog thiab. Lawv yog Anplahas xeeb ntxwv lod? Kuv kuj yog thiab. 23 Lawv yog Khetos cov tub txib lod? Kuv yuav teb ntua li tus neeg vwm tias, kuv tus no yim huab yog Khetos ib tug tub txib ntag. Kuv ua tau hauj lwm ntau dua, raug kaw ntau dua, raug nplawm suav tsis txheeb, thiab yuav luag tuag ntau zaus. 24 Kuv raug cov Yudais nplawm 5 zaug, ib zaug 39 nplawg. 25 Kuv raug luag xuas pas nplawm peb zaug, kuv raug luag xuas pob zeb ntaus ib zaug, kuv caij nkoj tawg peb zaug, thiab kuv nyob ib hnub ib hmos hauv dej hiav txwv dua los lawm. 26 Kuv ncig mus ntau qhov chaw mas ntsib xwm txheej hauv nruab deg, ntsib tub sab tub nyiag, kuv haiv neeg los tsim txom kuv, lwm haiv neeg los tsim txom kuv thiab. Kuv ntsib teeb meem hauv nroog thiab hauv moj sab qhua tib si, ntsib xwm hauv hiav txwv, thiab raug tej cuav kwv tij ua phem. 27 Kuv khwv iab khwv daw, yoo dab ntub zias, yoo tshaib yoo nqhis, thiab tiv no tsis muaj ris tsho hnav.

28 Tej ntawd yog tej yam sab nraud xwb, tiam sis tshuav yam uas kuv niaj hnub ntxhov siab, yog kuv txhawj xeeb txog cov koom txoos tib si. 29 Yog leej twg qaug zog, kuv tseem tsis mob siab lod? Yog leej twg ua rau ib tug xav yuam kev, kuv tseem tsis chim lod?

30 Yog kuv yuav khav ces kuv yeem khav txog tej uas ua rau kuv qaug zog. 31 Vajtswv uas yog tus Tswv Yexus leej Txiv yog tus uas tsim nyog peb qhuas mus ib txhis. Nws yeej paub tias kuv tsis dag. 32 Thaum kuv nyob hauv Damaxakas, tus tswv xeev uas Vaj Ntxwv Aletas tsa, tau txib tub rog tuaj zov ntawm rooj loog nroog ntes kuv. 33 Tiam sis lawv muab kuv tso hauv ib lub pob tawb dauv ntawm qhov rais tawm ntawm tus ntsa loog mus, kuv thiaj dim nws txhais tes lawm.

12 Kuv yuav tsum khav. Txawm pab tsis tau dab tsi los cia kuv tham txog tej yog toog uas tus Tswv ua tshwm rau kuv pom. 2 Kuv paub ib tug yawg uas nrog Khetos koom ib lub siab mas 14 lub xyoos dhau los nws raug coj kiag mus rau puag saum qaum ntuj txheej peb.* Tsis paub xyov yog coj kiag nws lub cev lawm los tsis yog, tsuas yog Vajtswv thiaj paub xwb. 3 Kuv yeej paub tus yawg ntawd tiam sis kuv tsis paub xyov yog coj kiag nws lub cev mus los tsis yog, Vajtswv thiaj paub xwb. 4 Nws raug coj kiag mus rau ib lub vaj kaj siab* mas nws hnov tej lus uas tsis pub hais tawm thiab tsis pub leej twg qhia rau lwm tus. 5 Kuv yeej yuav khav txog tus yawg uas zoo li ntawd, tiam sis kuv yuav tsis khav txog kuv tus kheej. Kuv tsuas khav txog qhov uas kuv qaug zog xwb. 6 Txawm kuv yuav khav los, yeej tsis yog kuv khav li tus neeg hais lus tom ntej tom qab, vim kuv tsuas hais qhov tseeb xwb. Tiam sis kuv yuav tsis khav, xwv luag thiaj tsis qhuas kuv heev dua li luag tau pom kuv ua thiab kuv hais. 7 Thiab luag thiaj tsis qhuas kuv vim qhov uas muaj tej yog toog zoo kawg nkaus tshwm rau kuv pom.

Kuv muaj ib txoj kev nyuaj siab zoo li tus saus* uas chob kuv cev nqaij kom kuv thiaj tsis muab khav dhau lawm. Tus saus ntawd zoo ib yam li Xatas tus tub txib uas niaj hnub xuas tawg ncuav rau kuv sab plhu kom kuv txo hwj chim. 8 Kuv taij thov tus Tswv peb zaug txog qhov no, kom nws muab tus saus no rho ntawm kuv mus. 9 Tiam sis nws teb tias, “Qhov uas kuv ua lub siab dawb paug hlub* koj twb txaus lawm. Cov qaug zog thiaj pom kuv lub hwj chim ua rau lawv muaj zog npho.” Yog li ntawd, kuv zoo siab khav txog qhov uas kuv qaug zog zis, xwv Khetos lub hwj chim thiaj nrog nraim kuv yam li lub tsev ntaub roos rawv kuv. 10 Vim muaj Khetos, kuv thiaj txaus siab hlo ua ib tug neeg qaug zog, raug luag thuam, raug txom nyem, raug tsim txom thiab raug kev nyuaj siab. Rau qhov thaum kuv qaug zog, kuv thiaj muaj zog npho.

11 Nim no kuv zoo li tus neeg hais lus tom ntej tom qab. Tiam sis yog tim nej, twb tsim nyog nej pab qhuas kuv me ntsis. Kuv tsis yog leej twg, tiam sis kuv yeej tsis tau ua ib yam dab tsi qhia tias kuv qis dua nej cov tub txib uas tsab loj kawg nkaus ntawd. 12 Kuv ua siab ntev kawg nej thiaj pom tias kuv yog ib tug tseem tub txib mas kuv ua ntau yam txuj ci tseem ceeb tab meeg nej, ua rau sawv daws xav tsis thoob li, thiab ua tej txuj ci loj kawg nkaus. 13 Ua cas nej ho tsis thooj li lwm cov koom txoos? Tshuav qhov uas kuv tsis kam ua nra hnyav rau nej xwb. Thov nej zam qhov uas kuv tsis tos nej yug kuv.

14 Zaum no yog zaum peb uas kuv npaj txhij yuav tuaj xyuas nej. Kuv yuav tsis ua nra hnyav rau nej rau qhov kuv tsis ntshaw ib yam dab tsi ntawm nej, kuv tsuas ntshaw nrog nej xwb. Vim tias tsis tsim nyog tej me nyuam txhawm rau niam txiv tiam sis tsim nyog niam txiv txhawm rau tej me nyuam. 15 Kuv mas yeej zoo siab hlo siv tag nrho kuv lub dag lub zog, thiab kuv txoj sia los pab nej.* Yog kuv twb hlub nej npaum li no lawm, tsis tsim nyog nej hlub kuv ib yam thiab lod? 16 Txawm li cas los, kuv yeej tsis ua nra hnyav rau nej. Tiam sis nej tseem hais tias kuv siv tswv yim haub ntxias nej. 17 Kuv tsis tau txib neeg tuaj ntxias noj ntxias haus ntawm nej los sad? 18 Kuv thov Titus thiab txib dua ib tug kwv tij nrog nws tuaj xyuas nej. Titus twb tsis tau ntxias nej noj los sad? Wb yeej koom ib lub siab thiab coj tib tug cwj pwm puas yog?

19 Ntshe nej xav tias peb hais daws peb zaj xwb. Tiam sis twb yog peb nrog Khetos koom ib lub siab hais tej no tab meeg Vajtswv ntag. Cov kwv tij nkauj muam’e, peb hlub nej kawg li, peb tsuas xav txhawb nej lub zog xwb. 20 Kuv ntshai nyob tsam thaum kuv tuaj txog nej tsis coj li kuv xav, thiab kuv tsis coj li nej xav. Tiam sis yuav muaj kev sib cav sib ceg, khib xeeb, sib chim, sib faib, ib leeg thuam ib leeg, taug xaiv, khav theeb, thiab ua ntxhov hnyo. 21 Thaum kuv rov tuaj ntawm nej, ntshe Vajtswv yuav cia kuv poob ntsej muag tab meeg nej. Ntshe kuv yuav nyuaj siab rau cov uas tau ua txhaum yav tas los es tsis kam hloov dua siab tshiab. Vim lawv tsis ntxub qhov uas lawv ua qias tsis huv, ua plees ua yi,* thiab ua tej yam vuab tsuab tsis paub txaj muag li.*

13 Zaum no yog zaum peb uas kuv yuav npaj tuaj xyuas nej. “Thaum muaj ob los peb tug ua tim khawv thiaj paub tseeb tias tau muaj li cas.” 2 Txawm yog tam sim no kuv tsis nrog nej los, thov khaws kuv cov lus no ib yam li yog zaum ob uas kuv tuaj xyuas nej. Kuv rov ceeb toom nej cov uas twb ua txhaum los lawd, thiab ceeb toom lwm cov tib si tias yog kuv tau rov tuaj xyuas nej ces kuv yuav tsis tseg cov uas tau ua phem li ntawd. 3 Vim nej xav tau pov thawj tias puas yog Khetos kom kuv hais tej no. Khetos yeej tsis ua ib tug qaug zog zis nrog nej tiam sis nws ua nws lub hwj chim tshwm rau nej pom. 4 Nws raug tua saum tus ncej ntoo* vim nws yog ib tug neeg qaug zog zis. Tiam sis Vajtswv lub hwj chim ua rau nws ciaj sawv rov los lawm. Peb kuj nrog nws qaug zog zis, tiam sis Vajtswv lub hwj chim yuav ua rau peb ciaj sawv rov los nrog nws thiab mas lub hwj chim no tab tom ua hauj lwm rau hauv nej.

5 Tshuaj nej tus kheej seb nej puas tuav kev ntseeg ruaj nreeg. Sim nej tus kheej thiaj paub tseeb tias nej zoo li cas tiag. Nej tsis paub tias Yexus Khetos nrog nej koom ib lub siab lod? Tsam Vajtswv ho tsis txaus siab rau nej xwb. 6 Vajtswv yeej txaus siab rau peb. Kuv vam tias nej yuav paub tseeb li ntawd.

7 Peb thov Vajtswv tias nej yuav tsis ua dab tsi txhaum. Tsis yog peb ua li no kom luag qhuas tias Vajtswv txaus siab rau peb, tiam sis kom nej thiaj ua tau zoo xwb. Txawm luag yuav xav tias Vajtswv tsis txaus siab rau peb los xij. 8 Peb ua tsis tau ib yam dab tsi los tawm tsam qhov tseeb, tsuas muaj txhawb qhov tseeb xwb. 9 Txawm peb qaug zog zis los peb zoo siab heev rau thaum nej muaj hwj chim. Peb thov Vajtswv tas zog kom nej rov kho nej tus kheej. 10 Twb yog li ntawd kuv thiaj sau tej no tuaj rau nej thaum kuv tsis tau tuaj. Thaum kuv tuaj txog kuv thiaj tsis tau siv lub hwj chim uas tus Tswv pub rau kuv los hais hnyav rau nej. Vim kuv tsuas xav txhawb nej xwb tsis yog txo nej.

11 Cov kwv tij’e, kuv xaus lus li no, thov nej cia li zoo siab xyiv fab, rau siab kho nej tus kheej, cia luag nplig nej siab, koom ib lub siab, nyob sib haum xeeb mas Vajtswv tus uas muaj kev hlub thiab kev sib haum xeeb yuav nrog nraim nej. 12 Ib leeg cia li zoo siab hlo tos txais* ib leeg. 13 Cov ntseeg* txhua tus xa lus noj qab nyob zoo tuaj rau nej.

14 Thov kom txoj kev hlub uas Tswv Yexus Khetos pub dawb thiab Vajtswv txoj kev hlub thiab lub hwj huam dawb huv uas pab lub koom txoos nrog nraim nej txhua tus.