THAWJ TSAB NTAWV RAU COV KAULEETHAUS

1 Ntawm no yog Povlauj tus uas Vajtswv hu los ua Yexus Khetos* ib tug tub txib, thiab peb tus kwv tij Xauthenes. 2 Tsab ntawv no yog sau rau nej cov uas nyob hauv Vajtswv lub koom txoos hauv lub nroog Kauleethaus. Nej nrog Yexus Khetos* koom ib lub siab nej thiaj raug xaiv los ua Vajtswv tes hauj lwm, thiab raug xaiv los ua cov dawb huv. Tsab ntawv no kuj yog sau rau txhua tus nyob txhua qhov uas tuav peb tus Tswv Yexus Khetos lub npe hu. Nws yog lawv tus Tswv thiab yog peb tus.

3 Thov kom Vajtswv uas yog peb Leej Txiv thiab tus Tswv Yexus Khetos foom koob hmoov nplua mias rau nej thiab nrog nej sib raug zoo.

4 Kuv niaj hnub ua Vajtswv tsaug uas nws tau foom koob hmoov nplua mias rau nej vim nej yog Yexus Khetos* cov thwj tim. 5 Twb yog nej nrog Khetos koom ib lub siab nej thiaj tau txais koob hmoov nplua mias, tsis hais txawj qhia Vajtswv txoj lus thiab nkag siab zoo txog txoj lus ntawd. 6 Nej twb muaj kev ntseeg ruaj nreeg rau txoj xov zoo txog Khetos lawm. 7 Thaum nej tseem tos ntsoov hnub uas peb tus Tswv Yexus Khetos qhia nws lub hwj chim tshwm los, nej thiaj tsis tu ncua ib yam dab tsi uas Vajtswv pub li. 8 Vajtswv yuav pab kom nej sawv ruaj khov mus txog thaum kawg. Thaum txog peb tus Tswv Yexus Khetos hnub, nej thiaj tsis muaj chaw thuam li. 9 Vajtswv yog tus ncaj ncees. Nws yog tus hu nej los nrog nws tus Tub Yexus Khetos uas yog peb tus Tswv koom ib lub siab.*

10 Cov kwv tij, kuv tuav peb tus Tswv Yexus Khetos lub npe txhawb kom nej hais lus sib haum. Nej tsis txhob sib cais ua pab ua pawg, tiam sis nej yuav tsum koom ib lub siab thiab muaj tib txoj kev xav. 11 Kuv cov kwv tij, muaj ib txhia hauv Khalau-es tsev neeg tau qhia rau kuv tias nej pheej sib cav sib ceg. 12 Kuv hnov tias nej ib leeg hais lawm ib yam. Ib tug hais tias, “Kuv yog Povlauj pab.” Muaj dua lwm tus hais tias, “Kuv yog Apaulaus pab.” Ho muaj dua ib tug hais tias, “Kuv yog Khefas* pab.” Thiab muaj tus hais tias, “Kuv yog Khetos pab.” 13 Khetos tawg ua ob peb pab lawm lod? Povlauj tuag saum tus ncej ntoo* los theej nej lod? Nej tuav Povlauj lub npe ua kev cai raus dej lod? 14 Kuv ua Vajtswv tsaug uas kuv tsis tau muab nej ib tug ua kev cai raus dej li, tsuas yog Khipas thiab Ke-as nkawd xwb. 15 Nej thiaj tsis muaj ib tug hais tau tias nej tuav kuv lub npe ua kev cai raus dej. 16 Kuv kuj tau muab Xatefanas tsev neeg ua kev cai raus dej thiab, tiam sis lwm cov kuv tsis nco lawm. 17 Rau qhov tsis yog Khetos txib kuv mus muab neeg ua kev cai raus dej, tiam sis nws txib kuv mus tshaj tawm txoj xov zoo. Thiab tsis yog kuv siv tej lus txawj lus ntse los qhia, yog kuv ua li ntawd ces qhov uas Khetos tuag saum tus ncej ntoo* kuj yuav tsis muaj qab hau.

18 Zaj uas qhia tias Khetos tuag saum tus ncej ntoo* yeej tsis muaj qab hau rau cov neeg uas yuav raug puas tsuaj. Tiam sis peb cov uas tau kev cawm dim, paub tias zaj ntawd qhia txog Vajtswv lub hwj chim ntag. 19 Twb muaj lus sau cia tias, “Kuv yuav muab cov neeg muaj tswv yim lub tswv yim rhuav pov tseg, thiab kuv yuav muab cov neeg txawj ntse tej kev txawj ntse xyeeb tseg.” 20 Hauv lub qab ntuj no, cov neeg muaj tswv yim nyob qhov twg? Cov xib hwb* ne? Cov uas txawj nrog luag sib cav dua twg lawd? Vajtswv twb ua rau lub qab ntuj* no lub tswv yim ruam lawm los sad? 21 Twb yog lub qab ntuj tso siab rau lawv lub tswv yim, lawv thiaj tsis paub Vajtswv. Tiam sis Vajtswv yog tus muaj tswv yim. Nws thiaj pom zoo cawm cov uas ntseeg zaj uas lub qab ntuj no suav tias ruam.

22 Cov Yudais xav pom txuj ci thiab cov Kilis xav nrhiav tswv yim. 23 Tiam sis peb tshaj tawm tias Khetos raug tua rau saum tus ncej ntoo.* Zaj ntawd ua rau cov Yudais xav yuam kev thiab ua rau lwm haiv neeg thuam tias ruam kawg li. 24 Tiam sis cov uas Vajtswv hu los, tsis hais cov Yudais los sis cov Kilis, yeej paub tias Khetos yog Vajtswv lub hwj chim thiab Vajtswv lub tswv yim. 25 Rau qhov yam uas yog Vajtswv li es neeg thuam tias ruam kawg li thiab tsis muaj zog, tseem muaj tswv yim thiab muaj zog dua neeg.

26 Cov kwv tij, nej yeej paub tias nej cov uas Vajtswv hu los cuag nws zoo li cas. Neeg suav tias nej cov tsis muaj pes tsawg tus yog cov muaj tswv yim, yog cov muaj hwj chim, thiab yog noob nom noob tswv.* 27 Twb yog Vajtswv xaiv cov uas neeg suav tias ruam kawg li thiab tsis muaj zog hauv lub qab ntuj no, kom ua rau cov neeg muaj tswv yim thiab muaj zog poob ntsej muag. 28 Vajtswv xaiv cov uas lub qab ntuj no saib tsis tseem ceeb, saib tsis khuab qhov muag, thiab saib tsis muaj nqis li, kom cov uas lub qab ntuj no qhuas tias muaj nqis thiaj poob nqis mus. 29 Vajtswv ua li no thiaj tsis muaj leej twg khav tau tab meeg Nws. 30 Twb yog muaj Vajtswv peb thiaj nrog tau Yexus Khetos* koom ib lub siab. Khetos yog tus qhia Vajtswv lub tswv yim rau peb. Muaj Khetos, Vajtswv thiaj suav tias peb ncaj ncees thiab dawb huv, thiab muaj tus nqi txhiv peb thiaj dim. 31 Thaum kawg thiaj muaj raws li tau sau tseg no, “Tus uas khav, cia nws khav txog Vajtswv Yehauvas.”*

2 Cov kwv tij, thaum kuv tuaj xyuas nej, kuv tsis tau piav lus zaj lus zuag kom nej qhuas kuv lub tswv yim. Kuv tsuas qhia tej uas Vajtswv muab npog cia lawd rau nej xwb. 2 Thaum ntawd kuv npaj siab tias kuv yuav ua tus tsis paub ib yam dab tsi, tsuas paub Yexus Khetos thiab qhov uas nws raug tua rau saum tus ncej ntoo* xwb. 3 Thaum kuv tuaj xyuas nej ntawd, kuv ntshai tshee na thiab txhawj tsam kuv tsis muaj peev xwm.* 4 Thaum kuv tshaj tawm rau nej, kuv tsis tau siv tswv yim los yaum nej. Tiam sis tej uas kuv hais ua rau nej pom tias Vajtswv lub hwj huam muaj zog npaum li cas. 5 Kuv ua li no kom nej txoj kev ntseeg thiaj cog ruaj khov rau Vajtswv lub hwj chim, tsis yog neeg lub tswv yim.

6 Thaum peb nrog cov neeg paub qab hau, peb tham txog tswv yim. Tiam sis peb tsis tham txog lub qab ntuj neeg* thiab tej nom tswv hauv lub qab ntuj* no uas yuav dua mus tej tswv yim. 7 Peb qhia Vajtswv lub tswv yim uas nyob nraim nkoos xwb, yog lub tswv yim uas tau muab npog cia lawm. Vajtswv twb npaj lub tswv yim no puag ntxov, ua ntej tsis tau muaj lub sim ceeb* phem no xwv peb thiaj tau koob meej. 8 Tej nom tswv hauv lub qab ntuj* no yeej tsis paub txog lub tswv yim ntawd. Yog lawv paub mas lawv yeej tsis muab tus Tswv uas muaj hwj chim ci ntsa iab tua* pov tseg. 9 Yeej muaj raws nkaus li Vajtswv Txoj Lus sau tseg tias, “Qhov muag tsis tau pom, qhov ntsej tsis tau hnov. Txawm yog neeg lub siab los, twb xav tsis txog tej uas Vajtswv tau npaj tseg rau cov uas hlub nws.” 10 Tiam sis Vajtswv siv nws lub hwj huam los qhia tej no rau peb ntag. Lub hwj huam tshuaj pom txhua yam thiab qhia tawm Vajtswv lub tswv yim uas nyob tob heev.

11 Leej twg thiaj paub tej uas neeg xav hauv nruab siab? Nyias thiaj paub nyias lub siab xwb. Ib yam li ntawd, tsis muaj leej twg paub tej uas Vajtswv xav, tsuas yog Vajtswv lub hwj huam thiaj paub xwb. 12 Peb tsis cia lub qab ntuj neeg tus cwj pwm coj peb. Tiam sis peb cia Vajtswv lub hwj huam coj peb, xwv peb thiaj nkag siab tej uas Vajtswv ua siab dawb paug qhia peb. 13 Peb qhia tej no tiam sis peb tsis hais tej lus uas neeg lub tswv yim qhia. Peb tsuas hais tej lus uas lub hwj huam qhia peb xwb, peb thiaj qhia tau qhov tseeb txog Vajtswv.

14 Tiam sis tus uas ua raws li nws lub siab ntshaw tsis kam txais yuav tej uas Vajtswv lub hwj huam qhia, vim nws xav tias tsis muaj qab hau. Txawm nws ua npaum li cas los nws yeej tsis nkag siab rau qhov yuav tsum muaj lub hwj huam pab nws tshuaj nws thiaj nkag siab xwb. 15 Tus uas cia lub hwj huam coj nws kev thiaj nkag siab* txhua yam, tiam sis tsis muaj leej twg nkag siab* nws. 16 Muaj raws li Vajtswv Txoj Lus sau tseg tias, “Leej twg thiaj paub Vajtswv Yehauvas* lub siab es ho qhia tau nws?” Txawm li ntawd los peb yeej muaj Khetos lub siab.

3 Cov kwv tij, kuv thiaj tsis pom qab qhia nej li cov uas twb muaj kev ntseeg lawd. Kuv tsuas qhia nej li cov uas coj raws li neeg lub siab ntshaw xwb, zoo li tej me nyuam mos uas nyuam qhuav paub Khetos. 2 Kuv muab mis rau nej noj vim nej noj tsis taus zaub mov. Txawm nim no los nej tseem noj tsis taus qees 3 rau qhov nej coj raws li neeg lub siab ntshaw. Qhov uas nej niaj hnub sib khib, sib cav sib ceg, twb yog nej coj raws li lub qab ntuj neeg lawm los sad? 4 Thaum ib tug hais tias, “Kuv yog Povlauj pab,” thiab lwm tus ho hais tias, “Kuv yog Apaulaus pab,” ces twb yog nej coj li lub qab ntuj neeg lawm los sad?

5 Apaulaus yog leej twg? Povlauj ho yog leej twg? Wb tsuas yog ob tug nyuag tub qhe uas pab nej los ntseeg xwb. Wb tsuas ua tes hauj lwm uas tus Tswv pom zoo rau wb ua xwb. 6 Kuv yog tus cog, Apaulaus yog tus ywg dej, tiam sis Vajtswv yog tus ua kom loj hlob. 7 Yog li ntawd, tus uas cog thiab tus uas ywg dej tsis tseem ceeb. Tiam sis cia li qhuas Vajtswv rau qhov nws yog tus ua kom loj hlob. 8 Tus cog thiab tus ywg dej koom ua ib teg hauj lwm, thiab nyias yuav tau txais nqi zog raws li nyias tes hauj lwm. 9 Peb nrog Vajtswv koom ua hauj lwm ua ke. Nej zoo li daim teb uas Vajtswv tab tom ua thiab zoo li lub tsev uas Vajtswv tab tom tsa.

10 Twb yog Vajtswv foom koob hmoov nplua mias rau kuv es kuv thiaj ua tau tus kws ua tsev uas pua lub plag tsev cia. Nim no ho muaj dua lwm tus los pab ua lub tsev. Tiam sis txhua tus uas pab ua lub tsev, nyias yuav tsum ua tib zoo ua nyias tes hauj lwm. 11 Vajtswv yog tus muab Yexus Khetos ua lub plag tsev mas tsis muaj leej twg yuav pua tau lwm lub plag tsev ntxiv lawm. 12 Ib txhia yuav nqa kub, nqa nyiaj, nqa tej pob zeb muaj nqis, nqa ntoo, thiab nqa quav nyab tuaj ua lub tsev. 13 Tiam sis thaum kawg nyias yuav pom seb nyias tes hauj lwm zoo li cas. Thaum txog hnub ntawd, yuav muab txhua tus tes hauj lwm nthuav tawm. Yuav muab hluav taws sim mas thaum hluav taws kub thiaj yuav paub seb leej twg tes hauj lwm ruaj khov. 14 Yog leej twg tes hauj lwm tseem nyob ruaj khov ces tus ntawd yuav tau nqi zog. 15 Tiam sis tus uas hluav taws kub nws tes hauj lwm puas tsuaj tas, tus ntawd yuav poob ntau yam. Txawm nws cawm tau nws tus kheej los, yuav zoo li tus uas khiav dim hluav taws hlawv xwb.

16 Nej tsis paub tias nej yog Vajtswv lub tuam tsev thiab Vajtswv lub hwj huam nyob rau hauv nej no lod? 17 Yog leej twg muab Vajtswv lub tuam tsev rhuav tshem mas Vajtswv yuav muab tus ntawd rhuav tshem. Vajtswv lub tuam tsev dawb huv thiab nej yog lub tuam tsev ntawd.

18 Txhob rov dag nej tus kheej. Yog leej twg xav tias nws txawj ntse hauv lub qab ntuj* no mas cia tus ntawd tig los ua tus ruam nws thiaj yuav txawj ntse. 19 Vajtswv suav tias cov neeg hauv lub qab ntuj no lub tswv yim tsis muaj qab hau. Vajtswv Txoj Lus twb sau tseg tias, “Nws cia cov neeg txawj ntse muab lawv lub tswv yim rov ua rooj ntxiab cuab lawv kev.” 20 Kuj muaj lus sau cia tias, “Vajtswv Yehauvas* paub tias tej uas cov neeg txawj ntse xav tseg tsis muaj qab hau.” 21 Yog li ntawd, tsis tsim nyog nej khav txog tej uas tib neeg ua tau, vim ib puas tsav yam yog nej li. 22 Tsis hais Povlauj, Apaulaus, Khefas, lub qab ntuj no, txoj sia, kev tuag, tej uas muaj tam sim no los sis tej uas tseem yuav muaj tshwm los, ib puas tsav yam yog nej li tib si. 23 Tiam sis nej yog Khetos tug thiab Khetos yog Vajtswv tug.

4 Tsim nyog tib neeg saib peb zoo li Khetos cov tub qhe thiab cov tub txib uas saib xyuas tej yam Vajtswv muab npog cia lawd. 2 Tus tswv tso siab tias cov tub txib ntawd yuav coj ncaj ncees. 3 Txawm nej los sis ib rooj txiav txim twg yuav tshuaj kuv zaj los tsis tseem ceeb rau kuv. Txawm kuv los kuv twb tsis tshuaj kuv tus kheej. 4 Kuv yeej pom tias kuv tsis tau ua txhaum dab tsi. Tiam sis qhov ntawd tsis qhia tias kuv ncaj ncees lawm. Tus uas yuav tshuaj ntsuam kuv* yog Vajtswv Yehauvas.* 5 Yog li ntawd, tsis txhob txiav txim rau ib tug twg ua ntej tsis tau txog sij hawm. Thaum tus Tswv los nws yuav ua qhov kaj ci rau yam uas neeg ua nraim nkoos hauv qhov tsaus ntuj. Nws yuav muab tej uas nyob hauv txhua tus lub siab nthuav tawm. Thaum ntawd Vajtswv mam li qhuas nws raws li tsim nyog qhuas.

6 Cov kwv tij, kuv tau hais li no txog kuv tus kheej thiab txog Apaulaus kom nej thiaj txais raug lub ntsiab. Wb ua qauv rau nej xyaum xwv nej thiaj nkag siab lub ntsiab no, “Tsis txhob ua dhau tej uas tau muab sau tseg lawd.” Yog nej coj li no nej yuav tsis khav theeb es muab ib tug saib hlob dua ib tug. 7 Nej muaj dab tsi es nej ho zoo dua lwm tus? Ib puas tsav yam uas nej muaj twb yog Vajtswv pub xwb los sad? Vajtswv twb pub tej ntawd rau nej, ua cas nej ho khav cuag li yog nej khwv tau los?

8 Nej twb muaj txhua yam uas nej xav tau lawm lod? Nej twb nplua nuj lawm lod? Puas yog nej twb sawv ua vaj ntxwv kav ua ntej peb lawd? Kheev lam nej twb ua vaj ntxwv kav lawm tiag ces peb kuj tau nrog nej kav thiab. 9 Cuag li peb cov tub txib raug muab ua ib zaj yeeb yam rau lub qab ntuj no kom neeg thiab cov tub txib saum ntuj tau saib. Vajtswv cia kuv thiab lwm cov tub txib tshwm hauv zaj yeeb yam ntawd rau puag tom kawg mas peb yog cov uas raug lub txim tuag. 10 Yog vim Khetos luag thiaj thuam tias peb ruam, tiam sis nej ho xav tias yog vim Khetos nej thiaj ntse. Peb qaug zog tiam sis nej xav tias nej muaj zog. Luag hwm nej tiam sis luag saib tsis taus peb. 11 Los txog niaj hnub no, peb tseem tshaib tseem nqhis, tsis muaj noj tsis muaj hnav. Peb raug luag ntaus, tsis muaj vag muaj tse nyob. 12 Peb ua hauj lwm khwv kawg li. Thaum luag foom phem rau peb los, peb foom koob hmoov rau luag. Thaum luag tsim txom peb los, peb ua siab ntev thev. 13 Thaum luag iab hiam peb los peb ua siab mos muag teb. Peb zoo li tej yam vuab tsuab uas luag muab xuam pov tseg hauv lub qab ntuj, los txog niaj hnub nim no.

14 Tsis yog kuv sau tej no tuaj ua kom nej txaj muag, tiam sis kuv qhuab qhia nej ib yam li tej me nyuam uas kuv hlub. 15 Txawm tias muaj 10,000 leej ua xib hwb cob qhia nej kom coj li Khetos los, nej tsis muaj pes tsawg leej txiv. Kuv zoo tam li ib leej txiv rau nej rau qhov kuv coj txoj xov zoo txog Yexus Khetos* tuaj qhia nej. 16 Yog li ntawd, kav tsij xyaum kuv. 17 Twb yog li ntawd, kuv thiaj txib Timautes tuaj cuag nej. Kuv hlub nws yam li wb yog ob txiv tub uas ntseeg tus Tswv. Nws yuav pab kom nej nco ntsoov tej uas kuv tau ua thiaj haum Yexus Khetos* siab. Thiab nws yuav qhia nej txog ib puas tsav yam uas kuv tab tom qhia hauv txhua lub koom txoos.

18 Nej ib txhia khav theeb heev, cuag li kuv yuav tsis rov tuaj xyuas nej li lawm. 19 Yog Vajtswv Yehauvas* pom zoo ces kuv yuav tuaj sai sai no mas thaum kuv tuaj txog cia seb cov uas khav ntawd muaj cuab kav npaum li cas diam. 20 Qhov uas peb zwm rau Vajtswv txoj kev kav,* tsis yog tej lus uas peb hais, tiam sis yog qhov uas peb muaj Vajtswv lub hwj chim. 21 Nej yuav xaiv qhov twg? Nej xav kom kuv nqa qws tuaj ntuas nej los nej xav kom kuv hlub thiab ua lub siab mos siab muag qhia nej?

5 Kuv hnov xov tias nej ib txhia tau ua plees ua yi* vim muaj ib tug txiv neej mus nrog nws txiv tus poj niam nyob ua ke lawm. Txawm yog cov uas tsis ntseeg los twb tsis ua tej kev txhaum zoo li ntawd. 2 Nej tseem muaj plhus khav thiab lod? Tsim nyog nej nyuaj siab, thiab muab tus uas tau ua li ntawd tshem hauv nej mus los sad? 3 Txawm kuv tsis nrog nej nyob los, kuv lub siab* nrog nraim nej. Kuv twb txiav txim rau tus yawg no ib yam li kuv nrog nej nyob tim ntsej tim muag. 4 Thaum nej tuav peb tus Tswv Yexus lub npe tuaj sib txoos ua ke, nco ntsoov tias kuv lub siab* thiab peb tus Tswv Yexus lub hwj chim nrog nraim nej. 5 Nej yuav tsum muab tus ntawd tso rau Xatas xwv tej uas nws lub cev nqaij tawv ntshaw thiaj puas tsuaj mus.* Ua li no thiaj tiv thaiv lub koom txoos txoj kev ntseeg* rau tus Tswv hnub.

6 Yeej tsis zoo rau nej khav txog tej no li. Nej tsis paub lod? Ib nyuag qhov keeb* xwb yeej ua rau cov hmoov su tag nrho. 7 Cia li muab cov hmoov qub uas xyaw keeb tshem tawm mus, nej thiaj yuav zoo li cov hmoov tshiab uas tsis xyaw keeb. Nej tsis xyaw keeb rau qhov twb muab Khetos uas yog peb tus me nyuam yaj fij ua Kev Cai Hla Dhau lawm. 8 Yog li ntawd, peb yuav tsum tsis txhob muab cov ncuav uas xyaw keeb coj los ua Kev Cai Hla Dhau. Cov keeb ntawd piv txog kev txhaum thiab kev phem. Tiam sis peb yuav tsum noj cov ncuav uas tsis xyaw keeb. Cov ncuav ntawd yog lub siab dawb paug thiab kev ncaj ncees.

9 Kuv sau hauv kuv tsab ntawv tuaj rau nej tias tsis txhob nrog cov neeg ua plees ua yi.* 10 Kuv tsis yog hais txog cov neeg hauv lub qab ntuj no uas pheej ua plees ua yi, muab hlob, dag noj dag haus, los sis pe dab pe mlom. Yog kuv hais txog tej neeg hauv lub qab ntuj no ces nej yuav tsum tawm hauv lub qab ntuj no mus. 11 Tiam sis qhov uas kuv sau tuaj rau nej no, yog kuv sau kom nej tsis txhob nrog tus neeg uas hais tias nws yog nej kwv tij tiam sis nws ho mus ua plees ua yi, muab hlob, pe dab pe mlom, hais lus phem cem lwm tus, qaug dej qaug cawv, thiab dag noj dag haus. Txawm yog koom tsum xwb los nej yuav tsum tsis txhob koom hlo li. 12 Tsis yog kuv hauj lwm los txiav txim rau cov nyob sab nraum lub koom txoos. Tiam sis tsim nyog nej txiav txim rau cov nyob sab hauv lub koom txoos. 13 Vajtswv mam li txiav txim rau cov uas nyob sab nraud. “Nej yuav tsum muab tus neeg phem tshem ntawm nej mus.”

6 Yog nej cov kwv tij ib tug muaj xaiv muaj lus rau ib tug, puas tsim nyog nej mus cuag cov tsis ntseeg kom lawv tu nej tej plaub? Ua cas nej ho tsis mus cuag cov uas Vajtswv xaiv tseg* hauv lub koom txoos? 2 Nej yeej paub tias cov xaiv tseg yog cov uas yuav txiav txim rau lub qab ntuj neeg. Yog nej yuav ua cov txiav txim rau lub qab ntuj no, ua cas nej tseem tu tsis tau tej nyuag plaub ntug no thiab? 3 Nej tsis paub tias peb yuav txiav txim rau cov tub txib saum ntuj no lod? Tsim nyog nej tu tau tej nyuag plaub ntug niaj hnub no los sad. 4 Yog thaum nej muaj teeb meem, ua cas nej tseem coj mus rau cov sab nraum lub koom txoos tu thiab? 5 Kuv hais li no yog hais kom nej paub txaj muag. Nej cov txawm tsis muaj ib tug muaj tswv yim los tu nws cov kwv tij tej teeb meem li lod? 6 Tiam sis nyias ho coj nyias tus kwv tij mus kom tab meeg cov uas tsis ntseeg hauv tej tsev tu plaub!

7 Yog nej ib leeg coj ib leeg mus kom hauv tsev tu plaub ces nej puav leej swb tib si lawm. Ua cas nej ho tsis yeem ua tus swb es cia luag ntxo nej? 8 Tiam sis nej tseem xav ua kom nej tus kwv tij swb kiag es nej tau ntxo nws!

9 Nej tsis paub tias cov uas tsis ncaj ncees yuav tsis tau Vajtswv lub Nceeg Vaj* no lod? Nej tsis txhob rov dag nej.* Cov neeg ua plees ua yi,* pe dab pe mlom, deev luag poj luag txiv,* txiv neej deev txiv neej,* 10 ua tub sab tub nyiag, siab hlob, quav dej quav cawv, tsawm foom luag, thiab txeeb luag tug yuav tsis tau Vajtswv lub Nceeg Vaj* hlo li. 11 Yav nram ntej nej ib txhia tau coj li no ntag. Tiam sis nim no Vajtswv twb muab nej ntxuav, thiab nej twb dawb huv lawm. Vajtswv twb suav tias nej ncaj ncees vim muaj peb tus Tswv Yexus Khetos lub npe thiab muaj Vajtswv lub hwj huam.

12 Kuv yeej muaj cai ua txhua yam tiam sis tsis yog txhua yam yuav muaj qab hau. Kuv yeej muaj cai ua txhua yam tiam sis kuv yuav tsis cia ib yam dab tsi tswj kuv. 13 Zaub mov yog npaj los ntim rau lub plab, lub plab yog npaj los ntim zaub mov. Tiam sis Vajtswv yog tus yuav ua kom ob yam no dua mus. Lub cev tsis yog npaj los ua plees ua yi,* lub cev yog npaj los ua hauj lwm rau tus Tswv, thiab tus Tswv yog tus tsom kwm lub cev. 14 Tiam sis Vajtswv lub hwj chim tsa tau tus Tswv ciaj sawv rov los mas nws kuj yuav tsa peb ciaj sawv hauv qhov tuag rov los thiab.

15 Nej tsis paub tias nej lub cev koom Khetos lub no lod? Puas tsim nyog muab yam uas koom nrog Khetos coj mus koom nrog ib tug niam ntiav? Yeej tsis tsim nyog li! 16 Nej tsis paub tias yog leej twg deev ib tug niam ntiav ces twb yog nws nrog tus niam ntiav ntawd koom ib lub cev lawm no lod? Rau qhov Vajtswv hais tias, “Nkawd yuav koom ua ib lub cev.” 17 Tiam sis yog leej twg koom tus Tswv ces kuj yog nws nrog tus Tswv koom ib lub siab.* 18 Cia li khiav ntawm kev plees kev yi!* Tej kev txhaum uas neeg niaj hnub ua tsis ua puas tsuas neeg lub cev. Tiam sis yog leej twg ua plees ua yi* ces yog nws ua txhaum puas tsuas nws lub cev ntag. 19 Nej tsis paub tias nej lub cev yog lub tuam tsev rau lub hwj huam dawb huv no lod? Vajtswv yog tus pub lub hwj huam. Tsis tas li ntawd, nej tsis yog nej ntiag tug lawm 20 rau qhov Vajtswv twb txhiv nej kim kawg li lawm. Yog li ntawd, cia li muab nej lub cev los qhuas Vajtswv.

7 Ntawm no kuv yuav teb cov lus uas nej sau tuaj nug kuv. Zoo dua yog ib tug txiv neej tsis yuav poj niam, txhob kov* hlo li. 2 Tiam sis vim muaj kev plees kev yi* txhua qhov, cia cov txiv neej nyias muaj nyias ib tug poj niam thiab cov poj niam nyias muaj nyias ib tug txiv. 3 Tus txiv tsis txhob cais nws tus poj niam chaw pw,* thiab tus poj niam los tsis txhob cais nws tus txiv chaw pw ib yam nkaus. 4 Tus poj niam tsis muaj cai kav nws lub cev, tiam sis nws tus txiv yog tus muaj cai kav. Ib yam li ntawd, tus txiv los tsis muaj cai kav nws lub cev, tiam sis nws tus poj niam yog tus muaj cai kav. 5 Ob niam txiv tsis txhob sib cais chaw pw. Tsuas yog thaum ob leeg hais sib haum mam sib cais hmo puav xwb kom muaj sij hawm thov Vajtswv. Tiam sis dhau ntawd neb yuav tsum rov los pw ua ke xwv Xatas thiaj ntxias tsis tau neb mus ua txhaum vim neb tswj tsis tau neb tus kheej. 6 Kuv hais li no tsis yog kuv tsa kev cai rau nej coj, tiam sis kuv xav kom nej paub tias nej kuj ua tau li ntawd thiab. 7 Kuv xav kom txhua tus nyob tab seeb li kuv. Tiam sis Vajtswv pub nyias muaj nyias siab, ib txhia muaj txij nkawm, ib txhia thiaj tsis muaj.

8 Ntawm no yog kuv sau rau cov tsis muaj txij nkawm thiab cov poj ntsuam. Yog lawv nyob tab seeb li kuv yuav zoo dua. 9 Tiam sis yog lawv tswj tsis tau lawv tus kheej ces cia lawv nrhiav txij nkawm. Qhov uas lawv muaj txij nkawm zoo dua qhov uas lawv niaj hnub ntshaw.

10 Ntawm no yog hais rau cov uas muaj txij nkawm. Cov lus no tsis yog kuv hais tiam sis yog tus Tswv hais. Tus poj niam yuav tsum tsis txhob khiav nws tus txiv. 11 Yog tus poj niam ho khiav lawm los nws yuav tsum tsis txhob mus yuav dua txiv tshiab, tiam sis rov los kho kom nrog nws tus txiv sib haum xwb. Tus txiv los tsis txhob tso nws tus poj niam tseg.

12 Ntawm no yog hais rau lwm cov. Tej lus no tsis yog tus Tswv hais tiam sis yog kuv hais. Yog ib tug kwv tij tus poj niam tsis ntseeg, los tus poj niam zoo siab nrog nws nyob ces tsis txhob muab tso tseg. 13 Yog ib tug poj niam tus txiv tsis ntseeg los tus txiv zoo siab nrog nws nyob ces tsis txhob muab tso tseg. 14 Txawm tus txiv tsis ntseeg los vim nws tus poj niam ntseeg, Vajtswv suav tias nkawd txoj kev txij nkawm dawb huv. Thiab txawm tus niam tsis ntseeg los vim tus txiv ntseeg, Vajtswv suav tias nkawd txoj kev txij nkawm dawb huv. Tsis yog li ntawd ces Vajtswv suav tias nkawd cov me nyuam tsis huv, tiam sis nim no lawv dawb huv lawm. 15 Yog tus uas tsis ntseeg txiav txim siab tso nws tus txij nkawm tseg los txhob tav nws. Yog muaj li ntawd ces tus kwv tij los sis tus muam tsis tas nrog tus uas tsis ntseeg nyob lawm. Rau qhov Vajtswv yeej xav kom cov ntseeg muaj kev sib haum xeeb. 16 Tiam sis nej cov poj niam, yog nej nrog nej tus txiv nyob tej zaum kuj yuav cawm tau nws dim. Thiab nej cov txiv, yog nej nrog nej tus poj niam nyob tej zaum kuj yuav cawm tau nws dim thiab.

17 Txawm li cas los xij, thaum Vajtswv Yehauvas* hu nej los cuag nws, nej lub neej zoo li cas ces kuj coj li ntawd xwb. Kuv yeej sam hwm li no rau txhua lub koom txoos. 18 Yog leej twg twb ua kev cai txiav ua ntej Vajtswv hu nws los, cia nws nyob nws li ntawd. Thiab yog leej twg tsis tau ua kev cai txiav thaum Vajtswv hu nws los ces nws tsis tas ua lawm. 19 Txawm yuav ua kev cai txiav thiab tsis ua los tsis tseem ceeb. Qhov tseem ceeb yog mloog Vajtswv tej lus sam hwm xwb. 20 Thaum Vajtswv hu nej los ntseeg, nej zoo li cas ces yuav li ntawd xwb. 21 Thaum Vajtswv hu koj los, yog koj tseem ua qhev los txhob nyuaj siab rau koj lub neej ua qhev. Tiam sis yog muaj chaw dim cia li peem tiag kom dim cev qhev. 22 Yog leej twg ua qhev thaum tus Tswv hu nws los, tus ntawd dim los ua tus Tswv ib tug qhev lawm. Thiab yog leej twg nyob ywj pheej thaum tus Tswv hu nws los, tus ntawd yuav yog Khetos ib tug qhev. 23 Vajtswv txhiv nej kim kawg li los, tsis txhob ua neeg qhev. 24 Cov kwv tij, thaum Vajtswv hu nej los, nej zoo li cas cia zoo li ntawd tab meeg Vajtswv.

25 Ntawm no yog hais rau cov nkauj xwb nraug xwb. Tej lus no tsis yog Vajtswv sam hwm los rau nej tiam sis kuv hais raws li kuv pom tias zoo. Tus Tswv twb khuv leej kuv, yog li nej yeej tso siab tau rau kuv tej lus. 26 Vim niaj hnub no muaj kev ntxhov siab ntau yam, yog leej twg nyob taus twj ywm ntshe yuav zoo dua. 27 Yog koj muaj poj niam lawm, txhob nrhiav kev tso nws tseg. Yog koj ho tsis muaj los txhob mus nrhiav. 28 Tiam sis yog koj yuav poj niam los yeej tsis txhaum. Yog ib tug nkauj xwb nraug xwb yuav txij nkawm los yeej tsis txhaum. Tiam sis cov uas yuav txij nkawm yuav muaj kev ntxhov siab. Kuv hais li no yog kuv xav pab nej dim tej kev ntxhov siab ntawd xwb.

29 Tsis tas li ntawd xwb, cov kwv tij, lub sij hawm tshuav tsis ntev lawm. Txij no mus, nej cov uas muaj poj niam yuav tsum nyob li cov uas tsis muaj. 30 Cov uas quaj ntsuag yuav tsum nyob li cov uas tsis quaj ntsuag. Cov uas xyiv fab yuav tsum nyob li cov uas tsis xyiv fab. Cov uas yuav tej ub tej no yuav tsum nyob li tej ntawd tsis yog nws tug. 31 Thiab cov uas siv tej qhov txhia chaw hauv lub qab ntuj no yuav tsum txhob siv kom txaus nkaus, rau qhov lub qab ntuj no tab tom hloov zuj zus. 32 Kuv xav kom nej dim kev txhawj xeeb. Tus uas tsis muaj poj niam txhawj txog tus Tswv tes hauj lwm seb yuav ua li cas thiaj haum tus Tswv siab. 33 Tiam sis tus uas muaj poj niam niaj hnub txhawj txog tej yam hauv lub neej vim nws xav kom nws tus poj niam zoo siab, 34 nws thiaj muaj ob teg hauj lwm. Zoo ib yam li ntawd, tus poj niam uas tsis muaj txiv thiab tus nkauj xwb, tsuas txhawj txog tus Tswv tes hauj lwm, kom nws txoj kev xav thiab nws lub cev dawb huv. Tiam sis tus poj niam uas muaj txiv niaj hnub txhawj txog tej yam hauv lub neej no vim nws xav kom nws tus txiv zoo siab. 35 Kuv tsuas hais tej no los pab nej xwb, tsis yog kuv tswj nej. Kuv xav kom nej ua tej yam uas tsim nyog ua, thiaj tsis muaj ib yam dab tsi tab kaum tes hauj lwm nej niaj hnub ua rau tus Tswv.

36 Yog ib tug twg paub tab thiab hnub nyoog nchav lawm es nws nyob tsis taus nws ib leeg tsam nws tswj tsis tau nws tus kheej ces cia nws mus nrhiav txij nkawm raws li nws lub siab nyiam. Nws ua li ntawd yeej tsis txhaum. 37 Tiam sis yog ib tug twg txaus siab nyob ib leeg tsis yuav txij nkawm, thiab nws kuj tswj tau nws tus kheej es twb ua ib siab tsis nrhiav txij nkawm mas nws yuav tau zoo. 38 Yog li ntawd, tus uas yuav txij nkawm yeej tau zoo, tiam sis tus uas tsis yuav yim huab tau zoo dua.

39 Tus poj niam yuav tsum nrog nws tus txiv nyob mus tas tus txiv sim neej. Tiam sis yog nws tus txiv nruam sim lawd, nws mus yuav leej twg los nyob ntawm nws nyiam, tsuav yog tus ntawd ntseeg tus Tswv xwb. 40 Tiam sis raws li kuv xav mas yog nws nyob twj ywm ib leeg, nws yuav kaj siab dua. Thiab kuv yeej ntseeg tias Vajtswv lub hwj huam coj kuv tiag.

8 Nim no kuv yuav sau txog tej zaub mov uas twb muab fij rau tej mlom lawd. Peb sawv daws yeej paub txog tej no. Kev txawj ntse ua rau yus khav theeb tiam sis kev hlub ua rau yus sawv khov. 2 Txawm leej twg xav tias nws twb paub ntau lawm los nws yeej paub tsis txhij. 3 Tiam sis yog leej twg hlub Vajtswv mas Vajtswv thiaj paub tus ntawd xwb.

4 Ntawm no kuv yuav tham txog qhov uas noj tej zaub mov uas twb muab fij rau mlom lawm. Peb paub tias tej mlom yeej tsis muaj qab hau dab tsi, thiab tsuas muaj tib tug Vajtswv xwb. 5 Tib neeg ntseeg tias muaj ntau tus tim tswv, tsis hais saum ntuj thiab hauv ntiaj teb no. Yog li ntawd, tib neeg yeej teev hawm ntau yam thiab ntau tus tswv. 6 Tiam sis peb ntseeg tias tsuas muaj tib tug Vajtswv uas yog peb Leej Txiv xwb. Nws yog tus tsim ib puas tsav yam, thiab tsim peb los ua nws tug. Thiab tsuas muaj tib tug Tswv uas yog Yexus Khetos xwb. Vajtswv kom nws tsim ib puas tsav yam thiab twb yog muaj nws peb thiaj muaj txoj sia nyob.

7 Tiam sis tsis yog txhua tus yuav nkag siab tej no. Yav tas los muaj ib txhia teev mlom. Yog li ntawd, thaum lawv noj tej zaub mov uas muab fij rau mlom lawd, lawv thiaj suav tias lawv twb teev tus mlom ntawd lawm. Lawv lub siab nkaug lawv vim lawv lub siab tsis paub cais qhov zoo qhov phem. 8 Tiam sis tej zaub mov yuav tsis ua kom peb nrog Vajtswv sib raug zoo. Txawm peb tsis noj los tsis txhaum, txawm peb ho noj los tsis yog peb zoo dua lwm tus. 9 Peb yeej muaj cai txiav txim siab li cas los tau, tiam sis ceev faj tsam peb ho ua rau cov uas lub siab tsis paub cais qhov zoo qhov phem xav yuam kev. 10 Txawm koj paub tias tej mlom tsis muaj qab hau los, yog tus uas lub siab tsis paub cais qhov zoo qhov phem pom koj noj hauv ib lub tsev mlom, nws yuav xav li cas? Txawm nws lub siab nkaug nws los, nws yuav cia li lam tau lam mus noj tej uas muab fij rau mlom lawd. 11 Vim koj yog tus uas paub, qhov koj ua li ntawd yuav rhuav tau tus uas lub siab tsis paub cais qhov zoo qhov phem txoj kev ntseeg. Nco ntsoov tias, Khetos tuag this koj tus kwv tij ntawd thiab. 12 Thaum nej ua txhaum nej cov kwv tij li no es lawv lub siab uas tsis paub cais qhov zoo qhov phem rov nkaug lawv ces twb yog nej ua txhaum Khetos ntag. 13 Vim li ntawd, yog tias zaub mov ua rau kuv tus kwv tij xav yuam kev, kuv yuav tsis noj nqaij ib zaug ntxiv li lawm, xwv kuv thiaj tsis ua rau kuv tus kwv tij xav yuam kev.

9 Kuv tsis muaj cai ua ywj siab lod? Kuv tsis yog ib tug tub txib lod? Kuv twb pom peb tus Tswv Yexus lawm los sad? Nej twb yog tes hauj lwm uas kuv ua rau tus Tswv ntag. 2 Txawm lwm tus tsis lees tias kuv yog ib tug tub txib los, yeej tsim nyog nej lees kuv! Nej yog lub hom thawj nias cim tias kuv yog tus Tswv ib tug tub txib tiag.

3 Kuv hais daws kuv zaj li no rau cov uas thuam kuv. 4 Wb tseem tsis muaj cai noj thiab haus tej uas luag pub rau wb thiab lod? 5 Wb tsis muaj cai yuav poj niam thiab coj poj niam nrog nraim wb thiab lod? Lwm cov tub txib, tsis hais tus Tswv cov kwv thiab Khefas lawv puav leej ua tau li no. 6 Tsuas yog Npananpas wb thiaj yuav tsum nrhiav rau wb noj wb haus xwb yod? 7 Tus tub rog tseem yuav tau them nws tej nuj nqis thiab lod? Leej twg cog ib lub vaj txiv hmab es tseem noj tsis tau tej txiv ntawd thiab? Los sis tus tswv yug yaj tseem tso tsis tau yaj tej kua mis haus thiab lod?

8 Tej no puas yog kuv hais raws li tib neeg lub tswv yim xwb? Tsis yog, Mauxes Txoj Kev Cai yeej hais ib yam li no thiab. 9 Mauxes Txoj Kev Cai sau tseg tias, “Thaum nyuj tab tom tsuj mog,* tsis txhob muab tawb looj nyuj qhov ncauj.” Ua li puas yog Vajtswv txhawj tsam nyuj tsis tau noj xwb? 10 Los yog nws txhawj txog peb? Twb yog Vajtswv txhawj txog peb ntag. Yeej tsim nyog tus uas laij teb thiab tus uas ntaus mog tau sau ib feem ntawm daim teb thiab.

11 Yog peb twb qhia Vajtswv txoj lus rau nej, tsis tsim nyog peb tau qho yam ntawm nej los yug peb thiab lod? 12 Yog lwm tus twb muaj cai tos nej yug lawv li no ces peb yim huab muaj cai puas yog? Tiam sis peb twb tsis yuam nej yug peb li. Peb tiv txhua yam kev txom nyem thiaj tsis muaj ib yam dab tsi txwv tau txoj xov zoo txog tus Khetos. 13 Nej yeej paub tias cov uas ua hauj lwm hauv lub tuam tsev yeej noj tau tej yam uas luag nqa tuaj rau hauv, thiab cov uas tuav hauj lwm ntawm lub thaj yeej noj tau tej uas muab fij rau saud puas yog? 14 Ib yam li ntawd, tus Tswv sam hwm tias tsim nyog cov uas tshaj tawm txoj xov zoo tau noj tau haus ntawm txoj xov zoo.

15 Tiam sis kuv twb tsis tos ib yam dab tsi ntawm nej li. Kuv sau li no, tsis yog kuv xav kom nej pub tej ntawd rau kuv. Yog kuv tseem tos nej noj thiab ces kuv yeem tuag zoo dua. Kuv yeej tsis cia leej twg thuam qhov uas kuv khav tias kuv tshaj tawm txoj xov zoo tsis yuav nqi li! 16 Txawm kuv tshaj tawm txoj xov zoo los kuv tsis muaj chaw khav, yeej tsim nyog kuv mus tshaj tawm. Yog kuv tsis tshaj tawm txoj xov zoo kuv yeej yuav ntxhov siab* xwb! 17 Yog kuv zoo siab hlo ua tes hauj lwm no, kuv yuav tau nqi zog. Tiam sis txawm kuv yuam kuv tus kheej ua xwb los, tes hauj lwm tseem ceeb no yeej yog muab cob rau kuv lawm. 18 Thaum kawg kuv yuav tau nqi zog dab tsi? Yog qhov uas kuv zoo siab hlo tshaj tawm txoj xov zoo dawb xwb. Kuv ua li no kuv thiaj tsis ua dhau cai thaum kuv tshaj tawm txoj xov zoo.

19 Txawm kuv tsis yog ib tug qhev los kuv ua sawv daws qhev xwv thiaj rub tau coob leej ntau tus los ntseeg. 20 Kuv coj li neeg Yudais thiaj pab tau cov Yudais los ntseeg. Kuv ua lub neej li cov uas tseem coj Mauxes Txoj Kev Cai thiaj pab tau lawv los ntseeg, txawm kuv tsis coj txoj Kev Cai ntawd. 21 Thiab kuv ua li tus uas tsis coj Mauxes Txoj Kev Cai kom pab tau cov uas tsis coj txoj Kev Cai ntawd los ntseeg. Kuv ua li ntawd tiam sis kuv yeej coj raws li Vajtswv tej kev cai thiab cia tus Khetos txoj kev cai kav kuv. 22 Kuv coj li tus uas qaug zog kom pab tau cov qaug zog los ntseeg. Kuv ua li no twb yog kuv yoog txhua hom neeg. Kuv nrhiav txhua txoj hau kev seb puas yuav cawm tau ib txhia. 23 Kuv ua txhua yam kom txoj xov zoo nrov ncha mus rau txhua qhov xwv kuv thiaj qhia tau txoj xov ntawd rau lwm tus.

24 Nej tsis paub lod? Thaum luag sib tw dhia, sawv daws tib txhij dhia tiam sis tsuas muaj ib tug thiaj tau paj tshab xwb. Yog li ntawd, cia li dhia kom yeej hlo! 25 Txhua tus uas sib tw yuav tsum tswj lawv tus kheej rau txhua fab. Lawv sib tw kom tau txais lub kaus mom uas txawj lwj, tiam sis peb sib tw kom tau txais lub kaus mom uas yuav nyob mus ib txhis. 26 Yog li ntawd, kuv tsis yog lam tau lam dhia tsis muaj hom phiaj. Thaum kuv ntaus nrig, kuv ua tib zoo tsom thiaj tsis yog ntaus qhuav xwb. 27 Kuv tswj kuv lub cev tuag nthi ib yam li tus qhev, nyob tsam thaum kuv qhia lwm tus tas Vajtswv ho tsis txaus siab rau kuv.

10 Cov kwv tij, kuv xav kom nej paub tias tauv huab yeej roos rawv peb cov yawg koob, thiab lawv sawv daws hla dhau dej hiav txwv. 2 Thaum tauv huab roos lawv, thiab lawv hla dhau dej hiav txwv, twb yog lawv ua kev cai raus dej los ua Mauxes cov thwj tim. 3 Lawv puav leej koom noj cov mov uas Vajtswv pub 4 thiab puav leej koom haus cov dej uas Vajtswv pub. Yav tas los lawv haus cov dej ntawm phab tsua uas nrog nraim lawv. Phab tsua ntawd yog Vajtswv pub thiab piv txog tus Khetos. 5 Tiam sis Vajtswv tsis txaus siab rau lawv feem coob, lawv thiaj tuag rau hauv teb chaws moj sab qhua.

6 Tej uas lawv raug ntawd yog ib qho ceeb toom rau peb kom peb tsis txhob ntshaw tej yam phem li lawv ntshaw. 7 Peb yuav tsum tsis txhob teev mlom li lawv cov ntawd ib txhia. Vajtswv Txoj Lus hais tias, “Cov tib neeg nyob noj nyob haus thiab sawv ua kev lom zem.” 8 Peb yuav tsum tsis txhob ua kev plees kev yi,* ib yam li lawv cov ntawd ib txhia uas tib hnub xwb lawv tuag 23,000 leej. 9 Peb yuav tsum tsis txhob sim Vajtswv Yehauvas* ib yam li lawv cov ntawd ib txhia uas raug nab tom tuag. 10 Peb yuav tsum tsis txhob yws taus ib yam li lawv cov ntawd ib txhia uas raug tus tub txib saum ntuj muab rhuav tshem. 11 Tej xwm uas lawv raug ntawd yog muab sau los ceeb toom peb cov uas nyob rau thaum lub sim ceeb* yuav kawg.

12 Yog li ntawd, tus uas xav tias nws twb sawv khov lawd yuav tsum ceev faj tsam nws ntog. 13 Txhua yam kev sim siab uas nej raug tsuas yog tej uas sawv daws raug xwb. Tiam sis Vajtswv yog tus ncaj ncees, nws yuav tsis cia nej raug sim dhau qhov uas nej thev tsis taus. Thaum nej raug sim, Vajtswv yuav qhib kev rau nej kom nej thiaj thev taus.

14 Yog li ntawd, cov uas kuv hlub, cia li khiav deb ntawm txoj kev teev mlom. 15 Kuv hais nej ib yam li hais rau tej neeg paub qab hau. Ua tib zoo ntsuas seb puas muaj tseeb li kuv hais. 16 Thaum peb ua Vajtswv tsaug rau lub khob koob hmoov ces twb yog peb koom Khetos cov ntshav los tsis yog? Thaum peb ntais lub ncuav twb yog peb koom Khetos lub cev los tsis yog? 17 Tsuas muaj tib lub ncuav xwb. Yog li ntawd, txawm peb coob los peb koom tib lub cev, rau qhov peb koom tib lub ncuav ntawd.

18 Xav txog haiv neeg Ixayees, thaum lawv noj tej khoom fij saum lub thaj, twb yog lawv muaj feem koom nrog Vajtswv los sad? 19 Puas yog kuv hais tias tej nqaij uas muab fij rau mlom ntawd tsuas yog nqaij xwb? Los sis puas yog tej mlom ntawd ciaj sia tiag? 20 Tsis yog li ntawd. Kuv hais tias thaum tej haiv neeg muab khoom fij rau mlom twb yog lawv fij rau dab, tsis yog fij rau Vajtswv mas kuv tsis xav kom nej koom dab hlo li. 21 Nej yuav haus Vajtswv Yehauvas* lub khob thiab haus dab lub khob yeej tsis tau. Nej yuav “noj Vajtswv Yehauvas* tsum mov” thiab noj dab tsum mov yeej tsis tau ib yam nkaus. 22 Puas yog ‘peb xav zes kom Vajtswv Yehauvas* khib’? Peb nim muaj hwj chim loj dua Nws lod?

23 Peb yeej muaj cai ua txhua yam, tiam sis tsis yog txhua yam yuav zoo rau peb ua. Peb yeej muaj cai ua txhua yam, tiam sis tsis yog txhua yam yuav txhawb tau peb lub zog. 24 Cia peb nrhiav kev los ua kom haum lwm tus, tsis yog ua kom peb tau zoo xwb.

25 Noj tej nqaij uas luag coj tuaj muag hauv tej kiab tej khw. Yog nej noj los cia li noj kaj siab lug tsis tas nug li, 26 rau qhov Vajtswv Txoj Lus hais tias, “Lub ntiaj teb thiab txhua yam uas nyob hauv ntiaj teb yog Vajtswv Yehauvas* li.” 27 Yog muaj ib tug uas tsis ntseeg caw nej mus noj mov es nej ho mus ces cia li kaj siab lug noj tej uas nws tau npaj tseg rau nej, tsis tas nug dab tsi. 28 Tiam sis yog leej twg hais rau nej tias, “Cov nqaij no twb muab fij rau mlom lawm,” nej yuav tsum tsis txhob noj nyob tsam tus uas hais nej ntawd ho xav yuam kev. Ua li no, thiaj tsis muaj leej twg lub siab rov nkaug nws. 29 Tsis yog kuv hais tias nej lub siab yuav rov nkaug nej, tiam sis tus ntawd lub siab yuav rov nkaug nws. Tsis tsim nyog kuv ua ywj siab yog tias qhov uas kuv ua ntawd yuav ua rau lwm tus lub siab rov nkaug lawv. 30 Txawm kuv yuav ua Vajtswv tsaug rau tej zaub mov thiab yeej muaj cai noj los, yog lwm tus yuav thuam kuv, puas tsim nyog kuv noj?

31 Yog li ntawd, txawm nej yuav noj yuav haus los sis yuav ua ib yam dab tsi, cia li ua txhua yam kom Vajtswv tau koob meej. 32 Tsis txhob ua rau luag lwm tus xav yuam kev, tsis hais neeg Yudais, neeg Kilis los sis cov uas nyob hauv Vajtswv lub koom txoos. 33 Kuv yeej xav xyaum ua txhua yam kom haum sawv daws siab. Kuv tsis yog ua kom kuv tau zoo xwb, tiam sis kuv ua kom haum feem coob xwv lawv thiaj dim.

11 Nej cia li xyaum kuv ib yam li kuv xyaum Khetos.

2 Kuv qhuas nej rau qhov nej yeej ib txwm nco ntsoov kuv, thiab nej coj raws nraim li tus qauv uas kuv muab cob rau nej lawd. 3 Kuv xav kom nej paub tias Khetos yog txhua tus txiv neej lub taub hau. Txiv neej yog poj niam lub taub hau, thiab Vajtswv yog Khetos lub taub hau. 4 Yog ib tug txiv neej thov Vajtswv los sis cev Vajtswv lus es nws ntoo phuam ces twb yog nws ua saib tsis taus nws lub taub hau. 5 Tiam sis yog ib tug poj niam thov Vajtswv los sis cev Vajtswv lus es nws ho tsis ntoo phuam ces kuj yog nws ua saib tsis taus nws lub taub hau. Qhov nws ua li ntawd zoo li nws chais taub hau ntag. 6 Rau qhov yog ib tug poj niam tsis ntoo phuam, nws kuj muab nws cov plaub hau txiav kiag mus. Yog qhov uas txiav plaub hau thiab chais taub hau ua rau ib tug poj niam poob ntsej muag ces nws yuav tsum ntoo phuam.

7 Tus txiv neej yuav tsum tsis txhob ntoo phuam, rau qhov Vajtswv tsim nws zoo li Vajtswv tus yam ntxwv thiab lub meej mom. Tiam sis tus poj niam yog tus txiv neej lub meej mom. 8 Rau qhov tsis yog Vajtswv tsim txiv neej los ntawm poj niam lub cev los, tiam sis nws tsim poj niam los ntawm txiv neej lub cev los. 9 Tsis tas li ntawd xwb, tsis yog Vajtswv tsim tus txiv neej rau tus poj niam tiam sis yog nws tsim tus poj niam rau tus txiv neej. 10 Twb yog vim li no thiab vim muaj cov tub txib saum ntuj pom, tus poj niam yuav tsum ntoo phuam thiaj qhia tias nws zwm rau txiv neej lub taub hau.

11 Tsis tas li ntawd xwb, hauv tus Tswv lub koom txoos cov poj niam yeej vam khom cov txiv neej. Cov txiv neej los yeej vam khom cov poj niam ib yam nkaus. 12 Vajtswv tsim poj niam los ntawm txiv neej lub cev los thiab cov txiv neej los kuj yog poj niam yug. Tiam sis Vajtswv yog tus tsim ib puas tsav yam. 13 Nej sim xav seb puas tsim nyog rau ib tug poj niam tsis ntoo phuam thov Vajtswv? 14 Nej yeej paub tias txiv neej ib txwm tsis tseg plaub hau ntev vim yuav ua rau nws poob ntsej muag. 15 Tiam sis yog ib tug poj niam plaub hau ntev mas tsav meej mom rau nws. Thiab nws cov plaub hau yog ib hauv phuam rau nws ntoo. 16 Yog leej twg xav kom coj lwm txoj kev cai, peb thiab Vajtswv cov koom txoos tsuas muaj tib txoj cai no xwb.

17 Txawm kuv qhia tej no rau nej los kuv tsis qhuas nej, vim tias thaum nej tuaj sib txoos ua ke pab tsis tau nej, tiam sis yim huab ua rau nej muaj teeb meem xwb. 18 Thawj yam kuv yuav hais no mas kuv hnov tias thaum nej tuaj sib txoos ua ke, nej sib cais ua pab ua pawg. Tej zaum kuj muaj li ntawd tiag thiab. 19 Nej yeej yuav sib cais ua pab ua pawg xwv thiaj pom tseeb tias cov uas Vajtswv pom zoo yog cov twg tiag.

20 Thaum nej tuaj noj tus Tswv Pluas Hmo ua ke, nej ua tsis yog lawm. 21 Rau qhov thaum nej tuaj noj ua ke, nyias taus nyias noj ua ntej lawm, ib txhia tseem tshaib, hos lwm cov twb qaug cawv lawm. 22 Nej tsis muaj vaj muaj tsev noj haus lod? Nej saib tsis taus Vajtswv lub koom txoos thiab txhob txwm ua rau cov txom nyem txaj muag lod? Kuv yuav hais li cas rau nej? Puas tsim nyog kuv qhuas nej? Hais txog zaj no kuv yeej tsis qhuas nej li.

23 Tej uas kuv qhia nej no yog tej uas kuv kawm ntawm tus Tswv los. Hmo uas luag ntxeev siab rau nws, tus Tswv Yexus tau muab ib lub ncuav los. 24 Tom qab nws ua Vajtswv tsaug tas, nws muab ntais thiab hais tias, “Lub ncuav no piv txog kuv lub cev uas muab txhiv nej. Cia li ua li no kom nej nco ntsoov kuv.” 25 Tom qab lawv noj pluas hmo tas nws muab lub khob los ua ib yam li ntawd thiab. Nws hais tias, “Lub khob no piv txog lo lus cog tseg tshiab uas muaj kuv cov ntshav ua lub hom thawj nias rau. Cia li ua li no xwv txhua zaus nej haus, nej thiaj nco ntsoov kuv.” 26 Txhua zaus nej noj lub ncuav no thiab haus khob cawv txiv hmab no, twb yog nej tshaj tawm tus Tswv txoj kev tuag mus txog thaum nws rov los.

27 Yog leej twg cia li noj tus Tswv lub ncuav thiab haus tus Tswv lub khob tiam sis tsis tsim nyog nws ua li ntawd ces yog nws ua txhaum tawm tsam tus Tswv lub cev thiab nws cov ntshav. 28 Txhua tus yuav tsum ua tib zoo tshuaj xyuas nws lub siab ua ntej seb puas tsim nyog tso, nws mam noj tau lub ncuav thiab haus tau lub khob xwb. 29 Rau qhov yog nws cia li noj thiab haus tiam sis tsis nkag siab tias tej no piv txog tus Tswv lub cev ces yog nws rov ua rau nws raug txim. 30 Twb yog vim li ntawd nej cov thiaj muaj coob tus qaug zog zis thiab muaj mob muaj nkeeg, thiab ib txhia kuj raug ploj tuag.* 31 Tiam sis yog peb ua tib zoo tshuaj peb lub siab, peb yuav tsis raug txim. 32 Txawm li ntawd los thaum Vajtswv Yehauvas* txiav txim rau peb, twb yog nws qhuab ntuas peb xwb, kom peb thiaj tsis nrog lub qab ntuj neeg raug txim. 33 Yog li ntawd, kuv cov kwv tij thaum nej tuaj noj tus Tswv Pluas Hmo ua ke, ib leeg cia li tos ib leeg. 34 Yog leej twg tshaib cia nws noj tom tsev, xwv thaum nej tuaj txoos ua ke nej thiaj tsis raug txim. Dua li lwm yam, thaum kuv tuaj txog kuv mam li tu.

12 Cov kwv tij kuv xav kom nej nkag siab txog qhov uas Vajtswv lub hwj huam dawb huv pub peb nyias muaj nyias peev xwm. 2 Nej cov uas yog lwm haiv neeg nej yeej paub tias ua ntej nej los ntseeg, nej twb raug tej mlom uas tsis txawj hais lus tswj thiab dag lawm. Nej raws tej mlom ntawd mus rau txhua txoj ke. 3 Nim no kuv xav kom nej paub tias tsis muaj ib tug uas Vajtswv lub hwj huam coj es yuav hais tias, “Cia Yexus raug foom tsis zoo!” Thiab tsis muaj ib tug hais tau tias, “Yexus yog tus Tswv!” Tsuas yog tus uas Vajtswv lub hwj huam coj thiaj hais tau xwb.

4 Vajtswv lub hwj huam pub peb nyias muaj nyias peev xwm tiam sis puav leej yog tib lub hwj huam ntawd pub xwb. 5 Vajtswv tes hauj lwm yeej muaj ntau txoj tiam sis peb puav leej ua rau tib tug Tswv xwb. 6 Vajtswv pab kom tib neeg txawj ua ntau yam hauj lwm, tiam sis tsuas yog tib tug Vajtswv pab xwb. 7 Vajtswv pub lub hwj huam dawb huv rau nyias txawj nyias ib yam xwv thiaj pab tau sawv daws. 8 Lub hwj huam pab tau ib tug txawj nthuav tswv yim, thiab tib lub hwj huam ntawd pab tau ib tug hais tej lus txawj ntse. 9 Tib lub hwj huam ntawd pab tau ib tug muaj kev ntseeg, ib tug ho txawj kho mob. 10 Tib lub hwj huam ntawd pab tau ib tug txawj ua txuj ci tseem ceeb, ib tug txawj cev lus faj lem, ib tug txawj tshuaj seb tej uas luag hais puas yog Vajtswv tshoov tiag, ib tug txawj hais lwm yam lus, thiab ib tug txawj txhais lwm yam lus. 11 Tag nrho tej no yog tib lub hwj huam ua xwb. Nyias muaj nyias lub peev xwm raws li Vajtswv lub hwj huam tau pub rau lawv.

12 Tib neeg lub cev muaj ntau yam los sib koom ua ke, tiam sis tsuas yog tib lub cev xwb. Tag nrho txhua yam puav leej koom rau tib lub cev ntawd. Khetos lub cev zoo ib yam li ntawd. 13 Peb sawv daws puav leej ua kev cai raus dej ntawm tib lub hwj huam thiaj koom tau ib lub cev. Txawm peb yog neeg Yudais los sis neeg Kilis, yog neeg ua qhev los sis tsis ua qhev, peb sawv daws puav leej tau txais tib lub hwj huam xwb.

14 Rau qhov lub cev yeej tsis yog muaj ib yam xwb tiam sis muaj ntau yam koom ua ke. 15 Yog txhais ko taw hais tias, “Kuv tsis yog txhais tes, kuv tsis muaj feem koom lub cev,” los nws yeej tseem yog ib feem ntawm lub cev. 16 Yog lub pob ntseg hais tias, “Kuv tsis yog qhov muag, kuv tsis muaj feem koom lub cev,” los nws yeej tseem yog ib feem ntawm lub cev. 17 Yog tas nrho lub cev tsuas muaj qhov muag xwb, tus tib neeg yuav ua li cas hnov lus? Yog tas nrho lub cev tsuas muaj pob ntseg xwb, tus tib neeg yuav ua li cas hnov ntxhiab? 18 Tiam sis Vajtswv tsim kom nyias nyob muaj nyias chaw raws li nws pom zoo.

19 Yog txhua feem ntawm lub cev yog ib yam xwb, puas yuav tsheej ib lub cev? 20 Yog li ntawd, yeej muaj ntau yam, tiam sis tsuas muaj tib lub cev xwb. 21 Lub qhov muag hais tsis tau rau txhais tes tias, “Kuv tsis tas yuav koj,” thiab lub taub hau hais tsis tau rau txhais ko taw tias, “Kuv tsis tas yuav koj.” 22 Tej yam ntawm lub cev uas saib zoo li tsis muaj qab hau los yeej tseem ceeb. 23 Thiab tej yam uas peb xav tias tsis zoo saib, peb ho tu ntshis xwv thiaj npog tau yam uas tsis tsim nyog rau luag pom. 24 Tiam sis tej yam ntawm peb lub cev uas twb zoo nkauj lawd tsis tas tu ntshis. Yog li ntawd, Vajtswv yog tus tsim lub cev. Nws ua rau yam uas tsis zoo nkauj muaj tsim tuaj. 25 Nws ua li no kom lub cev thiaj koom tau ua tib ke. Txhua yam ntawm lub cev, ib yam thiaj mob siab txog ib yam. 26 Yog ib yam ntawm lub cev mob lawm ces txhua yam kuj yuav mob tib si thiab. Yog luag qhuas ib yam ntawm lub cev ces txhua yam ntawm lub cev kuj xyiv fab tib si thiab.

27 Nej yog Khetos lub cev, thiab nyias muaj nyias feem koom lub cev ntawd. 28 Vajtswv tsa kom txhua tus hauv lub koom txoos nyias muaj nyias hauj lwm. Pab ib yog cov tub txib, pab ob yog cov cev Vajtswv lus, pab peb yog cov xib hwb txawj qhia. Dua li ntawd, nws tsa cov txawj ua txuj ci tseem ceeb, cov txawj kho mob, cov txawj pab lwm tus, cov txawj coj, thiab cov txawj hais lwm yam lus. 29 Tsis yog txhua tus ua tub txib los sad? Tsis yog txhua tus cev Vajtswv lus los sad? Tsis yog txhua tus ua cov xib hwb txawj qhia los sad? Tsis yog txhua tus txawj ua txuj ci tseem ceeb los sad? 30 Tsis yog txhua tus txawj kho mob los sad? Tsis yog txhua tus txawj hais lwm yam lus thiab txawj txhais lwm yam lus los sad? 31 Txawm li ntawd los, cia li peem tiag kom tau txais lub peev xwm uas tseem ceeb tshaj. Tiam sis kuv tseem yuav qhia yam uas zoo tshaj tej ntawd huv si rau nej.

13 Txawm kuv txawj hais ntau yam lus thiab tseem hais tau cov tub txib saum ntuj lus, los yog kuv tsis muaj kev hlub ces kuv tsuas zoo li lub tswb toog thiab lub nruas uas nrov ua nqaj ua nqug xwb. 2 Txawm kuv txawj cev Vajtswv lus thiab nkag siab txhua yam uas Vajtswv tau muab npog cia, thiab paub txhua tsav txhua yam, thiab muaj kev ntseeg tsaws tau tej pov roob mus rau lwm qhov, los yog kuv tsis muaj kev hlub ces kuv tsis muaj nqis dab tsi li. 3 Thiab txawm kuv muab kuv tej qhov txhia chaw tib si muag coj mus yug lwm tus, los sis kuv khav tias kuv yeem tuag this lwm tus, los yog kuv tsis muaj kev hlub ces tsis muaj qab hau dab tsi li.

4 Tus uas muaj kev hlub nws ua taus siab ntev thiab ua zoo rau luag. Nws tsis khib xeeb, tsis khav theeb, thiab tsis muab hlob. 5 Tus uas muaj kev hlub tsis ua rhuav ntsej muag, tsis xam pom nws tus kheej xwb, tsis chim sai, thiab tsis khaws chim. 6 Tus uas muaj kev hlub tsis xyiv fab thaum lwm tus ua txhaum, tiam sis nws xyiv fab rau qhov tseeb. 7 Nws nyiaj taus txhua yam, ntseeg txhua yam,* cia siab rau txhua yam, thev txhua yam.

8 Kev hlub yuav nyob mus ib txhis tiam sis qhov uas lub hwj huam pub kom txawj cev Vajtswv lus, thiab pub kom txawj hais lwm yam lus yuav ploj mus. Qhov uas pub kev txawj ntse los kuj yuav dua mus ib yam nkaus. 9 Nim no kev txawj ntse los peb paub tsis txhij, thiab cev Vajtswv lus los peb paub tsis txhua. 10 Tiam sis thaum peb paub txhij txhua lawd ces tej uas peb paub tsis txhij tsis txhua yuav ploj mus. 11 Thaum kuv tseem yau, kuv hais lus li me nyuam yaus, kuv xav li me nyuam yaus, kuv lub tswv yim yog me nyuam yaus lub. Tiam sis nim no kuv hlob tiav txiv, kuv tsis coj li me nyuam yaus lawm. 12 Nim no peb tsuas pom zem zuag li hauv daim iav hlau plooj nplas xwb, tiam sis lwm hnub peb yuav pom tim ntsej tim muag. Nim no kuv paub tsis txhij, tiam sis lwm hnub kuv yuav paub txhij ib yam li Vajtswv paub kuv. 13 Yog li ntawd, tseem tshuav peb yam no nyob, yog kev ntseeg, kev vam, thiab kev hlub. Tiam sis yam uas tseem ceeb tshaj yog kev hlub.

14 Xyaum tiag kom txawj sib hlub tiam sis peem tiag kom tau txais tej uas lub hwj huam dawb huv pub, tshwj xeeb yog qhov uas txawj cev Vajtswv lus. 2 Tus uas hais lwm yam lus tsuas yog Vajtswv thiaj paub xwb, tib neeg tsis paub. Tsis muaj leej twg nkag siab tej uas nws hais, rau qhov lub hwj huam kom nws hais tej uas muab npog cia lawm. 3 Tiam sis tus uas cev Vajtswv lus txhawb tau luag lub zog. Nws tej lus yuav pab thiab nplig tau lwm tus lub siab. 4 Tus uas hais lwm yam lus txhawb tau nws tus kheej. Tiam sis tus uas cev Vajtswv lus txhawb tau lub koom txoos. 5 Kuv xav kom nej sawv daws txawj hais lwm yam lus, tiam sis kuv xav kom nej cev Vajtswv lus zoo dua. Tus uas cev Vajtswv lus yeej tau hauj lwm dua tus uas txawj hais lwm yam lus. Yog tus txawj hais lwm yam lus tsis muab txhais tawm ces txhawb tsis tau lub koom txoos. 6 Cov kwv tij, yog kuv tuaj txog ntawm nej es kuv hais tej lus uas nej tsis paub, puas yuav pab tau nej? Tsuas pab tau nej thaum kuv piav tej uas Vajtswv ua tshwm rau kuv pom, los yog kuv hais txog tej tswv yim tob tob, los sis kuv cev Vajtswv lus, los sis kuv txawj qhia xwb.

7 Qhov ntawd zoo ib yam li thaum luag tshuab raj los sis ntaus nkauj nog ncas, yog tsis muaj suab sab ces leej twg yuav paub lub ntsiab? 8 Yog tus tshuab raj xyu tshuab tsis meej, leej twg yuav paub npaj tua rog? 9 Ib yam li ntawd, yog nej hais tej lus uas tsis yooj yim nkag siab ces leej twg yuav paub tej uas nej hais? Nej tej lus yuav tsis muaj qab hau li.* 10 Hauv lub qab ntuj no muaj ntau yam lus mas tej lus ntawd yeej muaj ntsiab rau. 11 Yog kuv tsis to taub tej lus uas luag hais ces luag yuav saib kuv yog lwm haiv neeg thiab kuv yuav saib luag yog lwm haiv neeg ib yam. 12 Nej los zoo ib yam li ntawd thiab. Nej yeej muaj lub siab ntshaw rwg tej uas lub hwj huam dawb huv pub. Yog li ntawd, cia li nrhiav nrhw tej uas yuav txhawb tau lub koom txoos.

13 Yog li ntawd, tus uas hais lwm yam lus yuav tsum thov Vajtswv kom nws txhais tau tej uas nws hais. 14 Yog kuv thov Vajtswv ua lwm yam lus, twb yog lub hwj huam pub kom kuv thov tau, tiam sis kuv tsis nkag siab tej uas kuv hais. 15 Yog li ntawd, kuv yuav ua li cas? Kuv yuav thov li lub hwj huam qhia kuv, tiam sis kuv kuj yuav thov ua yam lus uas kuv nkag siab. Kuv yuav hu nkauj li lub hwj huam pub, tiam sis kuv kuj yuav hu ua yam lus uas kuv nkag siab. 16 Tsis yog li ntawd ces txawm lub hwj huam pub koj txawj qhuas Vajtswv los tus uas zaum ntawm koj ib sab uas tsis tau paub dua yuav ua li cas hais “Amees” thaum koj ua Vajtswv tsaug? Rau qhov nws twb tsis nkag siab tej uas koj hais. 17 Tej zaum koj yeej ua Vajtswv tsaug zoo kawg li tiam sis pab tsis tau lwm tus. 18 Kuv ua Vajtswv tsaug tias nws pub kuv txawj hais ntau yam lus dua nej txhua tus. 19 Tiam sis hauv lub koom txoos, yog kuv hais tsib lo lus uas luag nkag siab thiaj qhia tau lwm tus, zoo dua li kuv hais kaum txhiab lo lus uas tsis muaj leej twg nkag siab.

20 Cov kwv tij, tsis txhob xav li tej me nyuam yaus xav. Tiam sis thaum hais txog kev phem, cia li coj li tus me nyuam mos. Cia li xav ib yam li tus neeg laus. 21 Twb muaj lus sau cia hauv txoj Kev Cai li no, “Vajtswv Yehauvas* hais tias, ‘Kuv yuav kom lwm haiv neeg uas hais lwm yam lus tuaj qhia cov neeg no. Thiab kom tej neeg uas lawv tsis paub tuaj hais lawv. Txawm li ntawd los lawv yeej yuav tsis kam mloog kuv lus.’” 22 Qhov uas lub hwj huam pub kom txawj hais lwm yam lus yog txuj ci rau cov uas tsis ntseeg pom, tsis yog rau cov uas ntseeg. Tiam sis qhov uas cev Vajtswv lus yog rau cov uas ntseeg, tsis yog rau cov uas tsis ntseeg. 23 Yog tag nrho lub koom txoos tuaj ua ke tiam sis nyias hais nyias ib yam lus ces thaum cov tsis ntseeg los sis cov uas tsis tau paub dua tuaj koom, lawv yuav hais tias nej tsis meej pem lawm sad? 24 Tiam sis yog nej txhua tus cev Vajtswv lus es ib tug uas tsis ntseeg los sis ib tug uas tsis tau paub dua tuaj koom nej, tej uas nws hnov yuav ntuas nws ces nws yuav ua tib zoo tshuaj nws lub siab. 25 Tej uas nws xav nraim nkoos hauv nruab siab yuav tshwm los ces nws yuav txhos caug ntua pe hawm Vajtswv thiab hais tias, “Vajtswv nrog nraim nej tiag.”

26 Yog li ntawd, cov kwv tij, nej yuav tsum ua li cas? Thaum nej tuaj ua ke cia ib tug hu nkauj, ib tug qhuab qhia, ib tug piav tej uas yuav muaj tshwm sim, ib tug hais lwm yam lus, thiab ib tug txhais tej lus ntawd. Nej ua li no, ib tug thiaj txhawb tau ib tug lub zog. 27 Yog muaj ib txhia hais tau lwm yam lus, tsuas cia ob los peb tug hais xwb. Ib tug hais tas ib tug mam hais, thiab yuav tsum muaj ib tug los txhais. 28 Tiam sis yog tsis muaj tus txhais ces yuav tsum nyob twb ywm txhob hais lus hauv lub koom txoos. Nws mam hais twj ywm hauv nruab siab thiab rau Vajtswv xwb. 29 Cia ob los peb tug cev lus, thiab cia cov uas mloog ua tib zoo mloog kom khaws tau lub ntsiab. 30 Yog thaum sawv daws tuaj sib txoos es Vajtswv txawm tshoov kom ib tug pom txog tej uas yuav muaj tshwm sim los, cia tus uas tab tom hais tos tso. 31 Cia ib leeg cev lus tas ib leeg mam cev xwv thiaj txhawb tau txhua tus, thiab txhua tus thiaj kawm tau. 32 Cov cev Vajtswv lus yuav tsum tsis txhob lam tau lam siv tej uas lub hwj huam pub rau lawv ntawd. 33 Rau qhov Vajtswv tsis yog tus Vajtswv uas nyiam ua ntxhov hnyo tiam sis nyiam nyob sib haum xeeb.

Ib yam li uas muaj hauv cov dawb huv txhua lub koom txoos, 34 cov poj niam yuav tsum nyob twb ywm thaum tuaj txoos ua ke, tsis pub lawv hais lus rau lub koom txoos.* Lawv yuav tsum mloog lus ib yam li txoj Kev Cai tau qhia. 35 Yog lawv xav paub dab tsi, lawv yuav tsum nug lawv tus txiv tom tsev. Yog ib tug poj niam hais lus rau lub koom txoos yuav ua rau nws poob ntsej muag.

36 Vajtswv txoj lus xub tshwm ntawm nej los lod? Los sis nej thiaj tau txais xwb lod?

37 Yog leej twg xav tias nws yog ib tug cev Vajtswv lus los sis tau txais tej uas lub hwj huam dawb huv pub lawd, nws yuav tsum lees tias tej uas kuv sau rau nej no yog tus Tswv lo lus sam hwm. 38 Yog leej twg tsis kam lees li no, Vajtswv yuav tsis kam lees tus ntawd. 39 Yog li ntawd, kuv cov kwv tij, cia li kub siab lug cev Vajtswv lus, tiam sis tsis txhob txwv tus uas hais lwm yam lus. 40 Cia li ua txhua yam kom raws kab raws kev thiab muaj chaw txawb chaw rau.

15 Cov kwv tij, kuv xav kom nej nco ntsoov txoj xov zoo uas kuv tau tshaj tawm rau nej lawd. Nej twb txais yuav thiab tso siab plhuav rau txoj xov ntawd lawm. 2 Yog nej tuav rawv txoj xov zoo uas kuv tau tshaj tawm ces twb cawm nej dim lawm. Yog nej tsis tuav rawv txoj xov zoo ces nej lam ntseeg qhuav xwb.

3 Tej uas kuv xub qhia rau nej yog tej uas luag twb qhia rau kuv lawm thiab. Raws li Vajtswv Txoj Lus qhia, tus Khetos tau tuag kom peb dim peb lub txim. 4 Vajtswv Txoj Lus hais tias luag muab nws faus tiam sis hnub peb Vajtswv twb tsa nws ciaj sawv rov los lawm. 5 Nws los tshwm rau Khefas pom ces mam los tshwm rau 12 tug tub txib pom. 6 Dhau ntawd, nws los tshwm rau tshaj li 500 leej kwv tij pom ua ke. Feem coob tseem muaj txoj sia nyob, tiam sis ib txhia nruam sim lawm. 7 Tom qab ntawd nws los tshwm rau Yakaunpaus ces mam los tshwm rau cov tub txib sawv daws pom. 8 Thaum kawg nws kuj los tshwm rau kuv pom thiab. Kuv zoo li tus me nyuam mos liab uas tsis tau txog caij yug es cia li yug lawm.

9 Kuv yog tus tub txib uas qis tshaj. Kuv tsis tsim nyog muab hu ua tub txib vim kuv tsim txom Vajtswv lub koom txoos. 10 Tiam sis twb yog muaj Vajtswv txoj kev hlub nplua mias kuv thiaj tau los ua ib tug tub txib. Qhov uas nws muaj kev hlub nplua mias rau kuv yeej tsis nkim pov tseg rau qhov kuv siv zog khwv dua lwm tus. Txawm li ntawd los, tsis yog kuv lub dag lub zog ua tau, tiam sis yog Vajtswv txoj kev hlub nplua mias rau kuv xwb. 11 Txawm nej kawm ntawm kuv los sis kawm ntawm lwm tus los, txoj xov no yog txoj uas peb tshaj tawm, thiab yog txoj uas nej tau los ntseeg.

12 Peb tshaj tawm tias tus Khetos twb sawv hauv qhov tuag rov los lawm. Vim li cas nej ib txhia ho hais tias cov tuag yuav tsis sawv rov los? 13 Yog cov tuag tsis sawv rov los ces tus Khetos kuj tsis tau sawv rov los thiab. 14 Tiam sis yog tus Khetos tsis tau sawv rov los ces peb tes hauj lwm tshaj tawm tsis muaj qab hau li. Tej uas nej ntseeg los kuj tsis muaj qab hau li thiab. 15 Tsis tas li ntawd xwb, peb tseem ua tim khawv cuav txog Vajtswv thiab. Yog cov tuag tsis sawv rov los tiam sis peb tshaj tawm tias Vajtswv twb tsa Khetos sawv rov los lawm ces kuj yog peb dag txog Vajtswv xwb. 16 Yog cov tuag tsis sawv rov los ces tus Khetos kuj tsis tau sawv rov los thiab. 17 Yog tus Khetos tsis tau sawv rov los ces nej txoj kev ntseeg tsis muaj qab hau li. Nej tseem muaj txim li qub. 18 Cov ntseeg Khetos uas twb nruam sim lawd los kuj ploj mus ib txhis lawm thiab. 19 Lub neej no yog peb tsuas vam khom Khetos xwb ces pab peb tu siab lauj!

20 Tiam sis peb paub tias Khetos twb raug tsa sawv hauv qhov tuag rov los lawm. Cov neeg uas tuag lawd, nws yog thawj tug* uas sawv rov los. 21 Vim ib tug txiv neej thiaj muaj txoj kev tuag tshwm los, yog li ntawd vim ib tug txiv neej thiaj muaj txoj kev sawv hauv qhov tuag rov los. 22 Adas ua rau txhua tus raug kev ploj kev tuag li cas, tus Khetos yuav ua rau txhua tus ciaj sia ib yam li ntawd thiab. 23 Tiam sis nyias yuav sawv rov los raws li nyias lub sij hawm. Khetos yog thawj tug.* Thaum tus Khetos rov los,* mam tsa cov uas yog nws li sawv. 24 Ces thaum kawg uas tom qab nws muab txhua roog nom tswv, txhua tus tswj hwm, thiab txhua lub hwj chim kav rhuav tshem lawd, nws mam muab lub Nceeg Vaj* cob rau nws tus Vajtswv uas yog nws Leej Txiv. 25 Nws yuav ua vaj ntxwv kav mus txog thaum Vajtswv muab txhua tus yeeb ncuab rau nws tsuj. 26 Ces tus yeeb ncuab kawg uas yog txoj kev tuag yuav raug rhuav tshem. 27 Vajtswv Txoj Lus hais tias Vajtswv “muab txhua yam rau nws kav.”* Tiam sis qhov uas hais tias ‘txhua yam muab rau nws kav,’ tsis yog nws yuav kav Vajtswv tus uas tau muab txhua yam rau nws kav. 28 Tiam sis thaum Vajtswv muab txhua yam rau nws kav lawd, Leej Tub yuav zwm rau Vajtswv tus uas tau muab txhua yam rau nws kav. Thaum ntawd Vajtswv tib leeg yuav ua tus kav ib puas tsav yam.

29 Tsis yog li ntawd ces yuav ua li cas rau cov uas ua kev cai raus dej kom coj mus rau kev ploj kev tuag? Yog cov tuag tsis ciaj sawv rov los ces vim li cas lawv ho ua kev cai raus dej li ntawd? 30 Thiab yog vim li cas peb ho raug tsim txom tas zog? 31 Kuv niaj hnub ntsib kev tuag. Cov kwv tij, yeej muaj tseeb li kuv hais no. Muaj tseeb npaum li qhov uas kuv khav txog nej vim nej txoj kev sib raug zoo nrog peb tus Tswv Yexus Khetos.* 32 Yog kuv tawm tsam tej tsiaj qus hauv Efexaus ib yam li lwm cov, kuv ho tau nqi zog dab tsi? Yog cov tuag tsis ciaj sawv rov los ces “noj tiag haus tiag, rau qhov tag kis peb yuav tuag.” 33 Tsis txhob xav yuam kev. Yog yus poo tej neeg phem yuav rhuav tau yus tes hauj lwm zoo. 34 Cia li feeb meej thiab ua qhov yog. Tsis txhob mus ua txhaum. Nej cov ib txhia yeej tsis paub Vajtswv. Kuv hais li no twb yog kuv hais kom nej paub txaj muag.

35 Tiam sis yuav muaj neeg nug tias, “Cov tuag yuav ua li cas sawv tau rov los? Lawv lub cev yuav zoo li cas?” 36 Ua cas yuav tsis xav tom ntej tom qab li lauj! Thaum koj cog ib lub noob, yog tsis lwj* ces lub noob yeej tsis nthaw kaus.* 37 Thiab thaum koj cog, koj yeej tsis muab ib niag tsob* coj mus cog. Txawm yog noob nplej los sis lwm yam noob, koj tsuas cog lub noob qhuav xwb. 38 Vajtswv xav kom tsob qoob zoo li cas los nyob ntawm nws pom zoo. Nws pub tej noob qoob nyias zoo txawv nyias. 39 Ib yam li ntawd, tej uas muaj roj muaj ntshav los zoo tsis sib thooj. Tib neeg, tsiaj txhu, tej nas noog, thiab tej ntses muaj roj muaj ntshav ib yam tiam sis nyias zoo txawv nyias. 40 Muaj cov uas nyob saum ntuj thiab muaj cov uas nyob hauv ntiaj teb mas lub cev saum ntuj thiab lub cev hauv ntiaj teb zoo tsis sib thooj. Nyias muaj tsim lawm nyias ib seem. 41 Lub hnub, lub hli, thiab tej hnub qub los nyias ci txawv nyias. Txawm yog tej hnub qub los ib lub ci tsis thooj ib lub.

42 Zoo ib yam li ntawd rau thaum cov tuag ciaj sawv rov los. Yam uas muab faus* lawd yuav lwj mus, yam uas tsa sawv rov los yuav tsis txawj lwj. 43 Yam uas muab faus lawd tsis muaj meej mom, yam uas tsa sawv rov los yuav muaj koob meej. Yam uas muab faus lawd zog ntaug tas, yam uas tsa sawv rov los yuav muaj zog npho. 44 Yam uas muab faus lawd muaj roj muaj ntsha, tiam sis yam uas sawv rov los tsis muaj. Yog twb muaj lub cev uas muaj roj muaj ntshav lawd ces kuj muaj tau lub cev uas tsis muaj thiab. 45 Ib yam li Vajtswv Txoj Lus hais tias, “Thawj tug Adas ciaj sia ua ib tug tib neeg.”* Hos tus Adas uas los tom kawg muaj lub cev tsis muaj roj muaj ntsha uas pub tau txoj sia. 46 Tiam sis yeej muaj lub cev uas muaj roj muaj ntshav ua ntej mam li muaj lub cev uas tsis muaj. 47 Tau muab hmoov av tsim thawj tug txiv neej tawm hauv ntiaj teb los. Tus txiv neej ob los saum ntuj los. 48 Cov uas muab hmoov av tsim zoo ib yam li thawj tug txiv neej uas tau muab hmoov av tsim. Cov uas nyob saum ntuj zoo ib yam li tus uas los saum ntuj los. 49 Peb zoo li tus uas muab hmoov av tsim li cas ces peb kuj yuav zoo ib yam li tus uas los saum ntuj los thiab.

50 Cov kwv tij kuv qhia rau nej tias, lub cev uas muaj roj muaj ntshav nkag tsis tau rau hauv Vajtswv lub Nceeg Vaj.* Thiab yam uas txawj lwj tsis muaj feem tau yam uas tsis txawj lwj. 51 Nim no kuv yuav qhia nej txog qhov uas Vajtswv tau muab npog cia lawd. Tsis yog peb txhua tus yuav tuag, tiam sis peb txhua tus yuav hloov hlo 52 thaum tshuab raj xyu zaum kawg. Tib ntsais muag xwb peb yuav hloov tam sid. Thaum tshuab raj xyu nrov ces cov tuag yuav ciaj sawv rov qab los thiab yuav muaj lub cev uas tsis txawj lwj lawm thiab peb yuav hloov hlo. 53 Lub cev uas txawj lwj* yuav hloov ua lub cev uas tsis txawj lwj. Thiab lub cev uas txawj tuag yuav hloov ua lub cev uas tsis txawj tuag li lawm. 54 Tiam sis thaum yam uas txawj lwj tsis lwj lawm, thiab yam uas txawj tuag tsis tuag li lawm ces yuav muaj tiav raws li Vajtswv Txoj Lus hais tias, “Muab kev tuag nqos mus ib txhis lawm.” 55 “Kev tuag’e, koj swb lawm! Kev tuag’e, koj tej taug tsuag tas lawm lauj!” 56 Kev txhaum twb yog lub hwj chim ua rau neeg tuag thiab kev txhaum tau hwj chim los ntawm Mauxes Txoj Kev Cai. 57 Tiam sis peb ua Vajtswv tsaug uas nws pab peb kov yeej txoj kev tuag vim muaj peb tus Tswv Yexus Khetos!

58 Yog li ntawd, cov kwv tij uas kuv hlub cia li sawv khov kho, txhob ua ywj fab ywj fwj. Tus Tswv tes hauj lwm muaj ntau heev ua, cia li rau siab ntso ua tiag. Nco ntsoov tias tej uas nej siv zog ua rau tus Tswv yeej tsis nkim nej lub zog li.

16 Ntawm no kuv yuav hais txog tej nyiaj txiag uas sau mus pab cov kwv tij.* Nej yuav tsum sau ib yam li kuv tau hais rau cov koom txoos hauv Kalatias lawd. 2 Thawj hnub ntawm txhua lub lim tiam nyias yuav tau khaws me ntsis raws li nyias muaj. Thaum kuv tuaj saib nej thiaj tsis tas sau ntxiv lawm. 3 Thaum kuv tuaj txog, kuv yuav txib cov txiv neej uas nej sau ntawv tuaj qhia kuv lawd nqa nej cov dej siab mus rau Yeluxalees. 4 Tiam sis yog tsim nyog mus ces kuv mam nrog lawv mus thiab.

5 Tom qab kuv mus rau Maxedaunias lawd kuv mam tuaj rau ntawm nej, rau qhov kuv tseem npaj yuav mus rau Maxedaunias. 6 Tej zaum kuv yuav nrog nej nyob kom dhau lub caij ntuj no ces kuv yuav mus qhov twg los nej mam xa kuv mus kom txog ib tog kev. 7 Rau qhov kuv tsis xav tuaj pom nej ib muag xwb. Yog Vajtswv Yehauvas* pom zoo, kuv yeej xav tuaj nrog nej nyob ntev loo. 8 Tam sim no kuv yuav nyob hauv Efexaus mus txog thaum ua Kev Cai Pheetekos tas tso. 9 Rau qhov Vajtswv tau qhib rooj lug rau kuv ua ntau yam hauj lwm ntxiv, tiam sis muaj coob leej tawm tsam kawg li.

10 Yog Timautes tuaj txog nej, cia li tos txais nws thiab nrog nws koom tes ua hauj lwm, thaum nws nrog nej nyob nws thiaj tsis ntxhov siab. Rau qhov nws ua Vajtswv Yehauvas* tes hauj lwm ib yam li kuv thiab. 11 Yog li ntawd, tsis txhob cia leej twg saib tsis taus nws. Kuv thiab cov kwv tij yeej tos ntsoov nws, cia li xa nws tuaj cuag kuv kaj siab lug.

12 Ntawm peb tus kwv tij Apalaus mas kuv txhawb kom nws nrog cov kwv tij tuaj xyuas nej. Nws tsis tau npaj tuaj tam sim no, tiam sis thaum tsis muaj chaw tab kaum ces nws yuav tuaj.

13 Cia li tsim dheev tsis txhob tsaug zog, muab siab rau ntseeg, ua siab loj siab tuab thiab muaj zog npho. 14 Ib puas tsav yam uas nej ua, cia li ua raws txoj kev hlub.

15 Cov kwv tij, nej yeej paub tias Xatefanas thiab nws tsev neeg yog thawj phaum uas los ntseeg hauv lub xeev Akhayas, thiab lawv kub siab lug nqes tes pab* cov dawb huv. 16 Kuv txhawb kom nej nrog cov neeg zoo li no koom siab koom ntsws. Cia li nrog txhua tus uas tab tom siv zog ntsos ua hauj lwm, thiab nrog lawv koom tes ua ke. 17 Kuv zoo siab uas Xatefanas, Fautunatus, thiab Akhayikus lawv tuaj rau ntawm kuv no. Lawv pab tau kuv npaum nkaus li nej pab kuv lawm ntag. 18 Lawv txhawb tau kuv ib yam li txhawb tau nej thiab. Yog li ntawd, tsim nyog hwm cov txiv neej zoo li no.

19 Cov koom txoos hauv Axias* xa lus noj qab nyob zoo tuaj rau nej. Akilas thiab Paxilas nkawd nrog rau lub koom txoos hauv nkawd tsev kuj xa lus noj qab nyob zoo tuaj rau nej txhua tus uas ntseeg tus Tswv thiab. 20 Cov kwv tij txhua tus xa lus noj qab nyob zoo tuaj rau nej. Thov kom nej txhua tus ib leeg zoo siab hlo tos txais ib leeg.*

21 Kuv yog Povlauj, kuv ua tus sau kiag tej lus noj qab nyob zoo no tuaj rau nej.

22 Yog leej twg tsis hwm tus Tswv, cia tus ntawd raug foom tsis zoo. Peb tus Tswv, cia li los kiag! 23 Thov kom peb tus Tswv Yexus txoj kev hlub nplua mias nrog nraim nej. 24 Thov kom nej cov uas yog Yexus Khetos* cov thwj tim paub tias kuv hlub nej txhua tus.