SAU RAU COV LOOS

1 Kuv yog Povlauj uas yog Yexus Khetos* ib tug tub qhe. Nws hu kuv los ua ib tug tub txib thiab txib kuv mus tshaj tawm Vajtswv txoj xov zoo. 2 Vajtswv tau hais kom cov uas cev nws tej lus txheej thaum ub muab txoj xov zoo no sau rau hauv nws Txoj Lus dawb huv. 3 Txoj xov no hais txog nws tus Tub uas yog Daviv tus xeeb ntxwv. 4 Peb yeej paub tseeb tias tus no yog Vajtswv tus Tub rau qhov Vajtswv twb siv Nws lub hwj huam dawb huv tsa tus no sawv hauv qhov tuag rov los. Nws yeej yog peb tus Tswv Yexus Khetos tiag. 5 Twb yog Yexus hlub* kuv, nws thiaj xaiv kuv los ua ib tug tub txib mus coj txhua haiv neeg los ntseeg thiab mloog nws lus, kom sawv daws hwm nws lub npe. 6 Nej kuj yog cov uas tawm hauv lwm haiv neeg los ua Yexus Khetos cov thwj tim thiab. 7 Tsab ntawv no yog sau rau txhua tus uas nyob hauv Loos. Nej yog cov uas Vajtswv hlub thiab yog cov uas nws hu los ua cov dawb huv.

Thov kom Vajtswv uas yog peb Leej Txiv thiab tus Tswv Yexus Khetos foom koob hmoov nplua mias rau nej thiab nrog nej sib raug zoo.

8 Ua ntej no, kuv tuav Yexus Khetos lub npe ua kuv tus Vajtswv tsaug vim nej muaj kev ntseeg. Tib neeg thoob ntiaj teb twb hnov txog nej txoj kev ntseeg lawm. 9 Kuv yeej ua kawg kuv lub siab lub ntsws los tshaj tawm txoj xov zoo txog Vajtswv tus Tub. Vajtswv yeej paub tias kuv niaj hnub thov Nws pab nej tsis tseg. 10 Kuv niaj hnub thov Vajtswv tias yog nws pom zoo ces nws yuav qhib kev rau kuv tuaj pom nej tiag tiag li. 11 Kuv xav pom nej heev kom kuv thiaj txhawb tau nej txoj kev ntseeg ruaj khov rau Vajtswv. 12 Thiab kom peb ib leeg txhawb tau ib leeg txoj kev ntseeg.

13 Cov kwv tij, kuv xav kom nej paub tias kuv twb npaj siab yuav tuaj xyuas nej ob peb zaug tiam sis muaj chaw tab kaum lawm xwb. Kuv xav nrog nej mus tshaj tawm kom coj tau tib neeg los ua Yexus cov thwj tim, ib yam li thaum kuv mus qhia lwm haiv neeg. 14 Kuv tshuav neeg nqi, tsis hais cov Kilis los lwm haiv neeg, tus ruam tus ntse tib si. 15 Kuv thiaj xav xav tuaj tshaj tawm txoj xov zoo rau nej hauv Loos. 16 Kuv yeej tsis txaj muag tshaj tawm txoj xov zoo li. Txoj xov no ua pov thawj txog Vajtswv lub hwj chim uas yuav cawm tau cov muaj kev ntseeg. Twb xub muab tshaj tawm rau cov Yudais mam tshaj tawm rau cov Kilis. 17 Vajtswv nthuav nws txoj kev ncaj ncees rau cov uas muaj kev ntseeg. Qhov no ua rau lawv haj yam tuav kev ntseeg ruaj. Vajtswv Txoj Lus thiaj hais tias, “Tus ncaj ncees yuav tau txoj sia rau qhov nws muaj kev ntseeg.”

18 Vajtswv tus uas nyob saum ntuj npau taws heev rau cov neeg ua phem lim hiam. Lawv txwv tsis pub tib neeg los paub qhov tseeb. 19 Yeej tsim nyog lawv paub Vajtswv rau qhov Vajtswv twb muaj pov thawj qhia meej rau lawv paub txog nws lawm. 20 Txawm neeg tsis pom Vajtswv los yog lawv saib tej uas Vajtswv tsim txij thaum ntuj tsim teb raug los, lawv yeej paub tias Vajtswv zoo li cas. Thaum peb kawm txog tej uas Vajtswv tsim, peb yeej pom nws lub hwj chim uas nyob mus ib txhis thiab pom tias nws yeej yog Vajtswv tiag. Yog li ntawd, neeg yeej tsis muaj lus cav li. 21 Cov neeg no yeej paub Vajtswv tiam sis lawv tsis hwm nws, tsis nco nws txiaj ntsig. Twb yog lawv lub siab ruam tsis to taub, lawv thiaj ua lub neej tsaus ntuj nti. 22 Lawv khav tias lawv ntse tiam sis lawv ruam kawg li. 23 Lawv tsis kam pe hawm tus Vajtswv uas muaj sia zees nyob mus ib txhis.* Tiam sis lawv ho mus pe hawm tej mlom zoo li neeg uas txawj ploj txawj tuag, zoo li tej noog, zoo li tej tsiaj muaj plaub txhais tes taw, thiab zoo li tej nab.*

24 Vim li ntawd, Vajtswv thiaj tso lawv tseg cia lawv ua ywj siab. Lawv thiaj siv lawv lub cev mus ua ntau yam kev phem kev qias, rhuav ntsej muag kawg li. 25 Lawv yeej paub qhov tseeb txog Vajtswv tiam sis lawv ho mus ntseeg tej yam cuav. Lawv tsis kam pe hawm Vajtswv tus uas tsim ib puas tsav yam tiam sis lawv yeem mus pe tej uas Vajtswv tsim. Yeej tsim nyog qhuas Vajtswv mus ib txhis. Amees.* 26 Twb yog vim li no Vajtswv thiaj cia lawv mus sib daj sib dee tsis paub txaj muag li. Tej poj niam cia li rov sib dee lawm. Vajtswv yeej ib txwm tsis tau tsim kom tib neeg ua li no. 27 Tej txiv neej los kuj rov sib dee ib yam li ntawd thiab. Lawv tso tej poj niam tseg thiab huas kev ntshis mus nrhiav txiv neej lawm. Lawv thiaj ua phem ua qias ywj siab, vuab tsuab kawg li. Tiam sis lawv yuav raug txim txaus nkaus tej kev phem uas lawv tau ua ntawd.

28 Vim lawv tsis quav ntsej Vajtswv thiab tsis lees yuav nws, Vajtswv thiaj tso lawv tseg thiab cia tej kev phem thawm lawv tej siab tej ntsws. Lawv thiaj tau hau ntsoov rau txoj kev phem xwb. 29 Lawv lub siab thiaj puv npo tej kev nkhib nkhaus, kev phem, kev lim hiam, thiab kev siab hlob. Lawv khib xeeb, tua neeg, sib cav sib ceg, hais lus dag, thiab tsim txom luag. Lawv nyiam taug xaiv, 30 ib leeg ntxo ib leeg, ntxub Vajtswv, ua saib tsis taus luag, khav theeb, muab hlob, thiab tuav tswv yim ua phem. Lawv tsis mloog niam txiv lus, 31 tsis txawj xav, tsis ua raws li cog lus tseg, tsis txawj sib hlub, thiab tsis muaj lub siab khuv leej. 32 Lawv yeej paub tej uas Vajtswv tau sam hwm tias, tsim nyog muab cov neeg uas coj li no rhuav tshem, los lawv tseem ua txhaum qees. Lawv tseem qhuas cov neeg uas ua tej kev txhaum no thiab.

2 Koj yog leej twg es koj ho muaj cai thuam lwm leej lwm tus? Koj twb coj ib yam li lawv thiab. Yog koj thuam lawv ces twb yog koj rov thuam koj ntag. 2 Peb paub tias thaum Vajtswv txiav txim rau cov uas coj li ntawd, nws yuav txiav txim ncaj ncees xwb.

3 Koj twb coj ib yam li cov neeg koj thuam ntawd es koj tseem yuav khiav dim Vajtswv txoj kev txiav txim no lod? 4 Koj tsis paub tias Vajtswv ua siab ntev npaum li cas rau koj lod? Nws hlub koj thiab zam koj xwb. Koj tsis paub tias Vajtswv ua siab ntev qhia mus txog thaum koj hloov dua siab tshiab no lod? 5 Vim koj tawv ncauj tsis kam hloov dua siab tshiab, hnub uas Vajtswv npau taws koj yuav raug txim. Hnub ntawd nws yuav txiav txim ncaj ncees. 6 Nws yuav pauj txhua tus raws li lawv tes hauj lwm. 7 Nws yuav pub txoj sia ib txhis tsis kawg rau cov uas rau siab ntso ua qhov zoo. Lawv yog cov uas ntshaw lub meej mom thiab txoj sia uas tsis txawj ploj tsis txawj tuag. 8 Tiam sis Vajtswv yuav chim yuav npau taws heev rau cov uas pheej cov nyom luag lwm tus thiab tsis coj raws li qhov tseeb. 9 Txhua tus uas ua phem yuav raug txim, txawm nws yog neeg Yudais neeg Kilis los xij. 10 Tiam sis txhua tus uas ua zoo yuav tau koob meej thiab tau nrog Vajtswv sib raug zoo. Vajtswv xub hu cov Yudais. Nws kuj hu cov Kilis thiab. 11 Rau qhov Vajtswv tsis xaiv ntsej xaiv muag.

12 Txhua tus neeg txhaum uas tsis coj Mauxes Txoj Kev Cai, yeej yuav tuag txawm nws tsis paub txoj Kev Cai ntawd. Thiab txhua tus neeg txhaum uas coj Mauxes Txoj Kev Cai, yeej yuav raug txiav txim raws li txoj Kev Cai ntawd. 13 Vajtswv tsis suav tias cov uas hnov Mauxes Txoj Kev Cai twb ncaj ncees lawm. Tsuas yog cov uas coj lub neej raws li txoj Kev Cai, Vajtswv thiaj suav tias ncaj ncees xwb. 14 Lwm haiv neeg tsis coj Mauxes Txoj Kev Cai. Txawm li ntawd los lawv kuj paub ua lawv lub neej raws li txoj Kev Cai ntawd qhia. Yog li ntawd, nyob hauv lawv lub siab yeej muaj ib txoj kev cai cog rau hauv lawm. 15 Lawv lub neej ua pov thawj tias Vajtswv twb muab tej lus hauv Mauxes Txoj Kev Cai sau rau hauv lawv lub siab lawm. Lawv lub siab uas paub qhov zoo qhov phem thiaj phua cai rau lawv. Thaum lawv xav txog tej ntawd, lawv thiaj paub tias lawv ua yog los tsis yog. 16 Yuav muaj li no rau hnub uas Vajtswv kom Yexus Khetos* txiav txim rau tej uas neeg tau ua zais ntshis. Tej no puav leej muaj raws li txoj xov zoo uas kuv tshaj tawm.

17 Nej ib txhia tsuas tuav lub npe Yudais xwb. Nej tso siab rau Mauxes Txoj Kev Cai thiab khav tias nej paub Vajtswv zoo lawm. 18 Nej yeej paub Vajtswv lub siab nyiam thiab paub tias yam twg yog yam zoo kawg nkaus, vim nej twb kawm Mauxes Txoj Kev Cai lawm. 19 Nej ntseeg tias nej yog cov uas coj neeg dig muag kev, thiab yog lub teeb ci rau cov uas nyob hauv qhov tsaus ntuj. 20 Vim nej paub tej lus tseeb thiab tej hauv paus ntsiab lus hauv Mauxes Txoj Kev Cai, nej thiaj khav tias nej yog cov uas ntuas tus tsis paub qab hau thiab qhia tej me nyuam yaus. 21 Nej cov uas qhia lwm tus, ua cas nej ho tsis rov qhia nej? Nej qhia kom txhob ua tub sab, ua cas nej ho ua? 22 Nej qhia kom txhob deev luag poj luag txiv,* ua cas nej ho deev? Nej qhia kom ntxub tej mlom, ua cas nej ho mus nyiag hauv tej tsev teev mlom? 23 Nej khav tias nej paub Vajtswv txoj kev cai, ua cas nej ho tsis hwm Vajtswv thiab ho hla txoj Kev Cai? 24 Vajtswv Txoj Lus sau tias, “Twb yog tim nej, lwm haiv neeg thiaj thuam Vajtswv lub npe.”

25 Txoj kev cai txiav* tsuas pab tau tus uas coj raws li Mauxes Txoj Kev Cai xwb. Yog nej tsis coj raws li txoj Kev Cai ces zoo ib yam li nej tsis tau ua kev cai txiav. 26 Txawm ib tug twg tsis tau ua kev cai txiav los, yog nws coj ncaj ncees raws li Mauxes Txoj Kev Cai ces Vajtswv kuj suav tias nws twb ua kev cai txiav lawm. 27 Nej twb yog cov uas kawm txog kev cai txiav thiab kawm txog Mauxes Txoj Kev Cai tiam sis nej ho tsis coj raws li nej tau kawm. Yog li ntawd, thaum ib tug uas tsis tau ua kev cai txiav ho coj raws li Mauxes Txoj Kev Cai ces qhia tias nej ua txhaum lawm. 28 Tus tseem Yudais tsis yog saib rau nws lub ntsej lub muag, thiab tus uas ua kev cai txiav tiag tiag tsis yog txiav nqaij txiav tawv xwb. 29 Tus tseem Yudais yog tus teev tiam Vajtswv tiag tiag. Nws tsis yog ua kev cai txiav raws li Mauxes Txoj Kev Cai tiam sis nws ua kev cai txiav hauv nruab siab raws li lub hwj huam dawb huv. Txawm neeg tsis qhuas nws los, Vajtswv yeej qhuas.

3 Haiv neeg Yudais yeej tau zoo dua lwm haiv neeg thiab txoj kev cai txiav* yeej muaj qab hau tiag. Ua cas thiaj hais tau li no? 2 Lawv yeej tau zoo tiag, rau qhov Vajtswv xub muab nws Txoj Lus* rau cov Yudais hwj xwm. 3 Ua li yog cov Yudais ib txhia tsis muab siab npuab Vajtswv ne, puas yog peb tso siab tsis tau rau Vajtswv txoj lus lawd? 4 Yeej tsis yog li ntawd! Txawm txhua tus hais lus dag los, Vajtswv yeej hais lus tseeb. Vajtswv Txoj Lus twb hais tias, “Koj tej lus yeej yog lus tseeb. Koj yeej daws tau tej lus uas luag iab hiam koj.” 5 Thaum peb ua txhaum,* yim huab ua rau tib neeg pom tias Vajtswv yog tus ncaj ncees. Ua li, thaum Vajtswv rau txim rau peb puas yog nws ua txhaum lawd? (Ib txhia yeej xav li no.) 6 Yeej tsis txhaum! Yog Vajtswv tsis ncaj ncees, nws yeej tsis muaj cai txiav txim rau lub qab ntuj no!

7 Lwm cov ho cav tias, ‘Yog kuv tej lus dag twb ua rau Vajtswv tau ntsej muag vim nws hais lus tseeb ces ua cas nws haj tseem rau txim rau kuv thiab?’ 8 Los sis lawv kuj cav li no, “Cia peb ua phem kom peb tau zoo yav tom hauv ntej.” Muaj neeg liam tias peb yog cov uas tawm lub tswv yim ntawd. Tiam sis cov uas qhia li ntawd yeej yuav raug txim.

9 Yog li, puas tsim nyog peb haiv neeg Yudais khav tias peb zoo dua lwm haiv neeg? Yeej tsis tsim nyog li! Peb twb kawm lawm tias cov Yudais thiab cov Kilis puav leej muaj txim txhaum ib yam nkaus. 10 Vajtswv Txoj Lus twb hais tias, “Tsis muaj leej twg coj tau ncaj ncees, yeej tsis muaj ib tug li. 11 Tsis muaj ib tug thoob tsib to nrog. Tsis muaj ib tug nrhiav Vajtswv li. 12 Lawv nyias nrhiav nyias kev lawm xwb. Lawv txhua tus puav leej tsis tsim txiaj. Yeej tsis muaj ib tug txawj xav, tsis muaj ib tug kiag li.” 13 “Lawv tej lus lom neeg tuag. Lawv tus nplaig txawj dag ntxias.” “Lawv lub qhov ncauj muaj taug cuag taug nab.” 14 “Lawv lub qhov ncauj puv nkaus tej lus tsawm foom, lus iab lus daw.” 15 “Lawv huas ntshis kev ua nruj ua tsiv, maj nroos mus txov luag txoj sia.” 16 “Txhua yam uas lawv ua tsuas tsim kev kub ntxhov thiab kev txom nyem rau luag xwb. 17 Lawv tsis paub nrog luag nyob sib haum xeeb.” 18 “Lawv tsis paub ntshai Vajtswv.”

19 Peb paub tias txhua nqe hauv Mauxes Txoj Kev Cai yog sau rau cov Yudais.* Twb yog muaj txoj Kev Cai ntawd lawv thiaj tsis muaj lus cav tias lawv yog neeg dawb huv. Txoj Kev Cai qhia tias neeg ntiaj teb txhua tus tsim nyog Vajtswv rau txim. 20 Tsis yog tib neeg coj Mauxes Txoj Kev Cai es Vajtswv txawm suav tias lawv ncaj ncees. Tiam sis txoj Kev Cai ua rau peb yim huab pom txog neeg lub txim txhaum.

21 Nim no peb paub tias txawm peb tsis coj Mauxes Txoj Kev Cai los, peb tseem coj tau ncaj ncees raws li Vajtswv pom zoo. Mauxes Txoj Kev Cai thiab cov cev Vajtswv lus twb qhia tseg li no lawm. 22 Yog leej twg muaj kev ntseeg, txawm nws yog haiv neeg twg los xij, yog nws ntseeg Yexus Khetos ces Vajtswv yuav suav tias nws ncaj ncees. 23 Txhua tus puav leej yog neeg txhaum thiaj yoog tsis tau Vajtswv tus yam ntxwv uas zoo kawg nkaus. 24 Vim muaj Yexus Khetos* them tus nqi txhiv uas tso noob neej dim, Vajtswv thiaj suav tias lawv ncaj ncees. Vajtswv yog tus muaj lub siab dawb siab zoo, nws thiaj pub tej no dawb dawb* rau tib neeg. 25 Vajtswv txib Yexus los tuag txhiv noob neej thiaj qhib kev rau lawv los nrog Vajtswv sib raug zoo, tiam sis lawv yuav tsum muaj kev ntseeg tias Yexus cov ntshav ntxuav tau lawv lub txim. Vajtswv ua li no vim nws ncaj ncees. Tsis yog nws muaj lub siab ntev zam txim rau tej kev txhaum uas tib neeg tau ua xwb, 26 tiam sis nim no nws kuj ua rau peb pom nws txoj kev ncaj ncees, vim nws suav tias tus uas muaj kev ntseeg rau Yexus twb ncaj ncees lawm.

27 Yog li ntawd, peb puas muaj chaw khav? Yeej tsis muaj. Puas tsim nyog peb khav tias peb coj tau raws li Mauxes Txoj Kev Cai? Tsis tsim nyog. Tiam sis tsim nyog peb coj txoj kev cai uas qhia kom muaj kev ntseeg. 28 Rau qhov Vajtswv yeej suav tias tus uas muaj kev ntseeg yog tus uas ncaj ncees, tsis yog tus uas coj raws li Mauxes Txoj Kev Cai. 29 Ua li Vajtswv tsuas yog cov Yudais tus Vajtswv xwb lod? Nws tsis yog txhua haiv neeg tus Vajtswv thiab lod? Peb paub tias nws yog txhua haiv neeg tus Vajtswv. 30 Rau qhov tsuas muaj tib tug Vajtswv xwb, txawm tus ua kev cai txiav thiab tsis ua los, yog nws muaj kev ntseeg ces Vajtswv yeej suav tias nws ncaj ncees. 31 Ua li, puas yog kev ntseeg rhuav Mauxes Txoj Kev Cai lawd? Tsis yog! Twb yog peb ntseeg txoj Kev Cai thiaj muaj nqis.

4 Peb yuav hais li cas txog peb yawg koob Anplahas? 2 Yog tias Anplahas tes hauj lwm twb ua rau nws ncaj ncees lawd ces nws yuav muaj chaw khav. Tiam sis rau Vajtswv, Anplahas yeej tsis muaj chaw khav kiag li. 3 Vajtswv Txoj Lus hais li cas? Nws Txoj Lus hais tias, “Anplahas muaj kev ntseeg rau Vajtswv Yehauvas,* txoj kev ntseeg ntawd ua rau nws ncaj ncees.” 4 Muab hais li no, yog ib tug neeg ua hauj lwm, nws tej nqi zog yog nws khwv tau, tsis yog luag pub dawb rau nws. 5 Tiam sis tus neeg txhaum uas Vajtswv suav tias ncaj ncees tsis thooj li ntawd. Tsis yog Vajtswv saib rau nws tes hauj lwm tiam sis yog saib rau nws txoj kev ntseeg, Vajtswv thiaj suav tias nws ncaj ncees. 6 Daviv kuj hais tias tus neeg uas Vajtswv suav tias ncaj ncees, nws yuav kaj siab rau qhov Vajtswv tsis saib rau nws tes hauj lwm. 7 “Thaum Vajtswv zam txim thiab tsis cim ntsoov tus twg tej kev txhaum, tus ntawd yuav kaj siab. 8 Thaum Vajtswv Yehauvas* tsis suav txim rau tus twg, tus ntawd yuav nyob kaj siab lug.”

9 Puas yog cov uas ua kev cai txiav lawd thiaj kaj siab xwb? Ua li, cov uas tsis tau ua kev cai txiav* ne? Peb twb hais tias, “Anplahas txoj kev ntseeg ua rau nws ncaj ncees lawm.” 10 Thaum Vajtswv suav tias Anplahas ncaj ncees, Anplahas puas tau ua kev cai txiav los tsis tau? Yog thaum nws tsis tau ua kev cai txiav los sad. 11 Tom qab no Vajtswv mam sam hwm kom Anplahas ua kev cai txiav los ua lub cim qhia tias Anplahas yeej ncaj ncees vim nws muaj kev ntseeg ua ntej nws ua kev cai txiav. Anplahas thiaj yog txhua tus uas muaj kev ntseeg tus yawg koob, txawm lawv tsis ua kev cai txiav. Vajtswv thiaj suav tau tias lawv ncaj ncees. 12 Anplahas kuj yog cov uas ua kev cai txiav tus yawg koob thiab. Lawv tsis yog ua kev cai txiav xwb, tiam sis lawv kuj muaj kev ntseeg ib yam li Anplahas thaum nws tsis tau ua kev cai txiav.

13 Vajtswv cog lus tias Anplahas yuav tau txais lub ntiaj teb ua nws tug, tsis yog vim Anplahas thiab nws cov xeeb ntxwv coj ib txoj kev cai twg, tiam sis yog vim Anplahas muaj kev ntseeg xwb. Twb yog Anplahas ntseeg, Vajtswv thiaj suav tias nws ncaj ncees. 14 Yog tus uas coj raws li Mauxes Txoj Kev Cai thiaj tau txais Vajtswv tej lus cog tseg xwb ces tsis tas muaj kev ntseeg rau Vajtswv li. Tej lus cog tseg rau Anplahas kuj tsis muaj qab hau li thiab. 15 Twb yog tib neeg hla Mauxes Txoj Kev Cai lawv thiaj raug txim. Tiam sis yog tsis muaj kev cai ces lawv kuj tsis ua txhaum cai li.

16 Yog li ntawd, vim peb muaj kev ntseeg rau Vajtswv peb thiaj tau txais nws tej lus cog tseg. Vajtswv yog tus pub tej no dawb dawb* rau peb xwb. Anplahas cov xeeb ntxwv puav leej tau txais tej lus cog tseg no, tsis yog cov uas coj txoj Kev Cai nkaus xwb tiam sis yog cov uas muaj kev ntseeg ib yam li Anplahas thiab. Nws yeej yog peb sawv daws tus yawg koob. 17 (Tej no muaj raws nkaus li Vajtswv Txoj Lus tau hais tias, “Kuv tsa koj ua yawg koob rau ntau haiv neeg.”) Anplahas yeej ntseeg tus Vajtswv uas tsa tau cov tuag ciaj rov los, thiab tus uas qhia txog tej uas tseem tsis tau muaj cuag li twb muaj lawm. 18 Txawm dhau lub caij Anplahas nkawd muaj tub ki lawm los, nws yeej vam thiab ntseeg tias nws yuav tau ua ntau haiv neeg tus yawg koob. Vajtswv tau cog tseg tias, “Koj yuav muaj xeeb ntxwv coob heev.” 19 Anplahas yeej paub tias nws lub zog ntaug tag (nws twb yuav muaj 100 xyoo). Nws kuj paub tias Xalas laus heev xeeb tsis taus tub lawm. Txawm li ntawd los nws tseem tuav kev ntseeg ruaj nreeg. 20 Anplahas yeej ntseeg Vajtswv tej lus cog tseg, nws thiaj tso siab plhuav rau Vajtswv tsis ua xyem xyav li. Twb yog Anplahas ntseeg, nws thiaj ua siab tawv qhawv thiab ua rau Vajtswv tau koob meej. 21 Nws ntseeg ruaj nreeg tias Vajtswv yeej ua tau raws li Vajtswv cog lus tseg. 22 Twb yog vim nws ntseeg, “Vajtswv thiaj suav tias nws ncaj ncees.”

23 Tiam sis qhov uas Vajtswv “suav tias nws ncaj ncees” tsis yog sau rau Anplahas xwb. 24 Cov lus no kuj yog sau rau peb thiab. Vim peb ntseeg Vajtswv tus uas tsa tau peb tus Tswv Yexus sawv hauv qhov tuag rov los, Vajtswv kuj suav tias peb ncaj ncees thiab. 25 Vajtswv cia luag muab Yexus tua yog vim peb lub txim. Tiam sis Vajtswv twb tsa Yexus sawv rov los lawm, Vajtswv thiaj suav tias peb ncaj ncees.

5 Yog li ntawd, rau qhov muaj peb tus Tswv Yexus Khetos, Vajtswv thiaj suav tias peb ncaj ncees, peb thiaj tau nrog Vajtswv sib raug zoo. 2 Qhov uas peb ntseeg Yexus qhib kev rau peb mus cuag Vajtswv thiab kom Nws khuv leej* peb. Cia peb zoo siab xyiv fab rau qhov peb cia siab tias Vajtswv yuav pub meej mom rau peb. 3 Tsis tas li ntawd xwb, cia peb zoo siab xyiv fab thaum peb raug kev txom nyem, peb thiaj paub ua siab ntev thev. 4 Yog peb ua siab ntev thev ces yuav haum Vajtswv siab. Yog haum Vajtswv siab ces peb yuav muaj kev vam. 5 Tsis yog peb vam qhuav xwb, tiam sis Vajtswv pub nws lub hwj huam dawb huv rau peb kom peb paub tias nws hlub peb kawg li.

6 Thaum peb tsis muaj kev vam,* Khetos los tuag this tib neeg txhaum raws nkaus li lub sij hawm uas Vajtswv teem tseg. 7 Tsis muaj tsawg tus yeem tuag this tus neeg ncaj ncees, los tej zaum yuav muaj tej tug yeem tuag this tus neeg zoo. 8 Tiam sis Vajtswv hlub peb, nws thiaj cia Khetos los tuag this peb, txawm peb yog neeg txhaum. 9 Yexus cov ntshav twb ntxuav peb lub txim lawm, Vajtswv thiaj suav tias peb ncaj ncees. Yog li ntawd, peb thiaj haj yam paub tseeb tias peb yuav dim Vajtswv txoj kev npau taws. 10 Txawm yav nram ntej peb yog Vajtswv cov yeeb ncuab los, vim nws tus Tub tau tuag this peb, nim no peb thiaj tau los ua nws cov phooj ywg. Yog li ntawd, peb twb yog Vajtswv cov phooj ywg lawm ces peb yeej paub tseeb tseeb tias peb yuav dim vim Yexus twb ciaj sia lawm. 11 Tsis tas li ntawd xwb, peb kuj zoo siab xyiv fab heev rau tej uas Vajtswv tau ua vim muaj peb tus Tswv Yexus Khetos. Twb yog muaj Yexus peb thiaj tau nrog Vajtswv sib raug zoo.

12 Vim ib tug neeg ua txhaum, txhua tus hauv ntiaj teb thiaj muaj txim. Lub txim ntawd ua rau neeg raug kev ploj kev tuag. Txoj kev tuag thiaj kis mus rau txhua tus rau qhov lawv puav leej yog neeg txhaum. 13 Kev txhaum twb muaj ua ntej Mauxes Txoj Kev Cai lawm, tiam sis yog tsis muaj kev cai ces kuj tsis suav txim rau leej twg li. 14 Txij thaum Adas los txog thaum Mauxes nyob, kev tuag yeej kav rawv noob neej. Txawm cov uas tsis tau ua txhaum li Adas los, txoj kev tuag kuj kav lawv thiab. Adas zoo li tus uas yuav los tom qab.

15 Tiam sis yam uas Vajtswv pub dawb tsis zoo li Adas txoj kev txhaum. Vim ib tug ua txhaum tib neeg thiaj raug kev ploj kev tuag. Tiam sis vim Vajtswv muaj lub siab dawb siab zoo,* nws thiaj pub yam zoo tshaj plaws rau peb. Nws pub ib tug uas yog Yexus Khetos tus uas muaj lub siab hlub,* koob hmoov thiaj ntws laub lug rau coob leej ntau tus. 16 Yam uas Vajtswv pub dawb tsis zoo li Adas lub txim rau qhov Adas ua txhaum tib zaug xwb ua rau noob neej raug txim. Tiam sis txawm noob neej ua txhaum tas zog los, twb yog muaj yam uas Vajtswv pub dawb thiaj suav tau tias lawv yog neeg ncaj ncees. 17 Peb paub tias txoj kev tuag kav noob neej vim ib tug tau ua txhaum. Yog li ntawd, peb haj yam paub tseeb tias vim ib tug uas yog Yexus Khetos, tib neeg yuav tau txoj sia thiab tau ua vaj ntxwv kav. Twb yog Vajtswv muaj lub siab dawb siab zoo* lawv thiaj tau qhov khoom pub no, Vajtswv thiaj suav tias lawv ncaj ncees.

18 Tib qho txhaum xwb ua rau txhua hom neeg raug lub txim tuag, yog li ntawd tib qho hauj lwm ncaj ncees xwb kuj daws tau txhua hom neeg los ua neeg ncaj ncees kom tau txoj sia. 19 Ib tug tsis mloog lus thiaj ua rau txhua tus ua txhaum. Ib yam li ntawd, ib tug mloog lus thiaj ua rau coob tus ncaj ncees. 20 Mauxes Txoj Kev Cai ua rau tib neeg pom tias lawv lub txim loj npaum li cas. Tiam sis thaum lawv yim huab pom lawv tej kev txhaum, Vajtswv yim huab ua lub siab dawb siab zoo* rau lawv. 21 Vim kev txhaum kav ua rau tib neeg raug kev ploj kev tuag. Tiam sis muaj Vajtswv txoj kev siab dawb* kav, Vajtswv thiaj suav tau tias tib neeg ncaj ncees. Lawv thiaj tau txoj sia ib txhis tsis kawg vim muaj peb tus Tswv Yexus Khetos.

6 Puas yog peb yuav ua txhaum qees kom Vajtswv yim huab muaj lub siab dawb* zam txim rau peb? 2 Yeej tsis yog li ntawd! Peb twb dim kev txhaum lawm, peb tseem yuav ua txhaum qees thiab lod? 3 Nej tsis paub tias peb cov uas ua kev cai raus dej nrog Yexus Khetos* koom ib lub siab twb ua kev cai raus dej nrog nws tuag ua ke lod? 4 Yog li ntawd, thaum peb ua kev cai raus dej nrog nws tuag ua ke, twb muab peb faus nrog nws lawm. Leej Txiv siv nws lub hwj chim ci ntsa iab tsa Khetos sawv hauv qhov tuag rov los, peb thiaj tau lub neej tshiab. 5 Peb nrog Khetos koom ib lub siab, peb thiaj tuag li nws tuag. Ib yam li ntawd, vim peb nrog nws koom ib lub siab, peb yeej yuav sawv rov los tau txoj sia li nws sawv thiab. 6 Peb yeej paub tias peb lub siab qub twb raug ntsia rau saum tus ncej ntoo* nrog Khetos, kev txhaum thiaj tsis muaj hwj chim kav peb ntxiv lawm. Peb tsis ua qhev rau kev txhaum ntxiv lawm. 7 Rau qhov tus uas tuag lawd twb dim nws lub txim lawm.

8 Peb twb nrog Khetos tuag, yog li peb ntseeg tias peb yuav tau txoj sia nrog nws nyob thiab. 9 Peb paub tias nim no Khetos twb sawv hauv qhov tuag rov los lawm, nws yuav tsis tuag ib zaug ntxiv. Kev tuag yuav tsis muaj hwj chim yuam tau nws ntxiv lawm. 10 Nws tuag tib zaug xwb los daws lub txim txhaum. Nim no nws sawv rov los muaj txoj sia ua raws li Vajtswv lub siab nyiam lawm xwb. 11 Ib yam li ntawd, nej yuav tsum nco ntsoov tias nej lub neej ua txhaum tuag lawm. Nim no nej yog Yexus Khetos* cov thwj tim, nej ua lub neej raws li Vajtswv lub siab nyiam lawm xwb.

12 Yog li, tsis txhob cia kev txhaum kav nej lub neej. Tsis txhob ua raws li nej cev nqaij daim tawv uas txawj tuag ntshaw. 13 Tsis txhob muab nej lub cev pub rau kev txhaum siv mus ua phem ua qias.* Tiam sis muab nej lub cev pub rau Vajtswv, rau qhov nej zoo li cov neeg uas twb ciaj sawv hauv qhov tuag rov los lawm. Cia li muab nej lub cev pub rau Vajtswv siv mus ua tej hauj lwm zoo.* 14 Nim no nej twb tsis coj Mauxes Txoj Kev Cai lawm, tiam sis Vajtswv twb ua lub siab dawb hlub* nej. Yog li ntawd, tsis txhob cia kev txhaum kav nej.

15 Yog peb tsis coj Mauxes Txoj Kev Cai thiab Vajtswv twb muaj lub siab dawb* zam txim lawm ces peb yuav cia li mus ua txhaum no lod? Yeej tsis yog li ntawd! 16 Nej yeej paub tias yog nej mloog leej twg lus ces twb yog nej yeem ua tus ntawd qhev los sad? Yog nej yeem ua kev txhaum qhev ces nej yuav raug kev ploj kev tuag. Tiam sis yog nej yeem ua Vajtswv qhev thiab mloog nws lus ces nej yuav ua neeg ncaj ncees. 17 Peb ua Vajtswv tsaug uas yav tas los nej ua kev txhaum qhev tiam sis nim no nej muaj lub siab xav mloog Vajtswv lus tiag tiag thiab coj raws li nws tau qhia lawm. 18 Yog li, nej twb dim tsis ua kev txhaum qhev lawm, nej thiaj tau los ua kev ncaj ncees qhev. 19 Kuv hais li neeg ib txwm hais, nej thiaj nkag siab vim nej yog noob txaug neeg txhaum. Yav tas los nej ua ywj siab raws li cev nqaij daim tawv ntshaw, nej thiaj ua kev phem kev qias qhev. Tiam sis nim no nej yuav tsum ua kev ncaj ncees kev dawb huv qhev. 20 Thaum nej tseem ua kev txhaum qhev, nej twb tsis tas ua qhov ncaj qhov yog.

21 Thaum nej ua kev txhaum qhev, nej coj li cas xwb? Nej ua tej yam uas nim no nej txaj muag kawg li. Tej ntawd ua rau neeg raug kev ploj kev tuag xwb. 22 Tiam sis nim no nej twb dim tsis ua kev txhaum qhev lawm, cia li ua lub neej dawb huv los ua Vajtswv qhev. Thaum kawg nej thiaj yuav tau txoj sia ntev dhawv mus ib txhis. 23 Tus nqi uas them lub txim txhaum yog kev tuag. Tiam sis yam uas Vajtswv pub dawb rau peb yog txoj sia ntev dhawv mus ib txhis vim muaj peb tus Tswv Yexus Khetos.*

7 Zaum no kuv hais rau nej cov kwv tij uas paub Mauxes Txoj Kev Cai. Nej tsis paub tias txoj Kev Cai tsuas kav tau ib tug neeg thaum nws tseem ua neej nyob xwb lod? 2 Raws li txoj Kev Cai, thaum tus txiv tseem ua neej nyob, tus poj niam tsis muaj cai tso nws tseg. Tiam sis yog tus txiv tuag lawd, nws txoj kev cai tsis kav tus poj niam lawm. 3 Yog nws tus txiv tseem ua neej nyob es nws mus yuav dua txiv ces twb yog nws deev hluas nraug.* Tiam sis yog tus txiv tuag lawd, nws txoj kev cai tsis kav tus poj niam lawm. Yog nws mus yuav dua txiv los tsis txhaum kev nkauj kev nraug.*

4 Cov kwv tij, Mauxes Txoj Kev Cai kuj kav nej thiab. Tiam sis vim muaj Khetos tuag txhiv nej, nim no nej dim* lawm thiab nej yog Khetos li. Nws yog tus sawv hauv qhov tuag rov los. Zaum no nej thiaj ua tau ntau yam hauj lwm zoo los qhuas Vajtswv. 5 Thaum peb tseem ua lub neej raws li cev nqaij daim tawv ntshaw, txoj Kev Cai ua rau peb pom tias tej uas peb ntshaw ntawd yog kev txhaum uas coj peb mus raug kev ploj kev tuag xwb. 6 Nim no peb dim Mauxes Txoj Kev Cai lawm. Txoj Kev Cai ntawd kav tsis tau peb. Peb muaj ib txoj kev tshiab los pe hawm Vajtswv raws li lub hwj huam qhia, tsis yog raws li txoj qub Kev Cai uas nyob hauv nruab ntaw.

7 Puas yog Mauxes Txoj Kev Cai tsis zoo? Yeej tsis yog! Yog kuv tsis paub Mauxes Txoj Kev Cai ces kuv yeej tsis paub kev txhaum zoo li cas tiag. Yog tsis muaj txoj Kev Cai qhia tias, “Koj txhob ntshaw luag tug” ces kuv yeej tsis paub tias ntshaw luag tug txhaum li. 8 Tiam sis cuag li kev txhaum siv txoj kev cai ntawd ua rau kuv muaj lub siab ntshaw ntau yam. Yog tsis muaj txoj kev cai ntawd ces kev txhaum yeej tsis muaj hwj chim ua dab tsi. 9 Muab xav los mas thaum tsis tau muaj txoj Kev Cai, kuv ciaj sia. Tiam sis thaum muaj txoj Kev Cai lawd, kuv mam paub tseeb tias kuv yog neeg txhaum, kuv thiaj tuag lawm. 10 Yog li ntawd, txoj Kev Cai uas yuav coj kuv mus rau txoj sia, ho coj kuv mus rau kev ploj kev tuag. 11 Cuag li kev txhaum muab txoj Kev Cai no ntxias kuv thiab muab kuv tua pov tseg. 12 Txawm li ntawd los Mauxes Txoj Kev Cai yeej dawb huv. Tej kev cai ntawd yeej dawb huv, ncaj ncees, thiab zoo kawg nkaus.

13 Puas yog yam uas zoo ua rau kuv raug kev ploj kev tuag? Yeej tsis yog li! Twb yog tim kev txhaum. Mauxes Txoj Kev Cai zoo kawg li tiam sis muaj txoj Kev Cai ntawd kuv mam li pom tias yog kev txhaum tua kuv. Yog li ntawd, txoj Kev Cai pab tau peb pom tias kev txhaum yeej phem kawg li tiag. 14 Peb yeej paub tias Mauxes Txoj Kev Cai yog Vajtswv lub hwj huam pub. Tiam sis kuv yog neeg muaj roj muaj ntshav, poob ua kev txhaum qhev. 15 Kuv tsis to taub tej uas kuv ua. Yam uas kuv nyiam kuv ho tsis ua, yam uas kuv ntxub kuv ho mus ua. 16 Kuv pom tias Mauxes Txoj Kev Cai yeej zoo, tiam sis kuv tseem ua qees tej uas kuv tsis xav ua. 17 Yog li ntawd, kuv tsis yog tus ua tej kev phem ntawd, tiam sis yog txoj kev txhaum uas nyob rau hauv kuv ua. 18 Kuv paub tias tsis muaj ib yam zoo nyob rau hauv kuv cev nqaij daim tawv uas muaj kev txhaum. Txawm kuv xav ua qhov zoo los kuv ua tsis tau. 19 Yam zoo uas kuv xav ua, kuv ho tsis ua. Yam phem uas kuv tsis xav ua, kuv ho ua. 20 Yog kuv ua tej yam uas kuv tsis xav ua ces kuv tsis yog tus ua tej ntawd. Tiam sis yog txoj kev txhaum uas nyob hauv kuv ua tej ntawd xwb.

21 Kuv pom tias muaj ib txoj kev cai kav rawv kuv. Thaum kuv xav ua qhov ncaj qhov yog los kuv tseem muaj ib nplooj siab xav ua qhov phem qhov nkhaus thiab. 22 Nyob puag hauv kuv nruab siab, kuv yeej nyiam Vajtswv txoj cai heev. 23 Tiam sis kuv ho pom dua ib txoj cai hauv kuv lub cev uas tawm tsam txoj cai uas kav kuv txoj kev xav. Txoj cai ntawd yog txoj kev txhaum uas nyob hauv kuv nruab ce kav rawv kuv. 24 Ua cas kuv yuav ntxhov siab ua luaj! Lub cev no yuav coj kuv mus raug kev ploj kev tuag, leej twg thiaj yuav cawm tau kuv dim? 25 Ua Vajtswv tsaug uas muaj peb tus Tswv Yexus Khetos, Vajtswv thiaj cawm kuv dim. Vajtswv txoj cai kav rawv kuv txoj kev xav, tiam sis kev txhaum txoj cai kav rawv kuv lub cev.

8 Yog li ntawd, cov uas nrog Yexus Khetos* koom ib lub siab yuav tsis raug lub txim tuag. 2 Lub hwj huam txoj cai pub nej muaj txoj sia, nej thiaj nrog tau Yexus Khetos* koom ib lub siab. Txoj cai ntawd kuj tso nej dim ntawm kev txhaum thiab kev tuag txoj cai. 3 Mauxes Txoj Kev Cai tsis muaj hwj chim tso tau nej dim rau qhov nej yog tib neeg muaj roj muaj ntshav thiab muaj txim txhaum. Tiam sis Vajtswv tso tau nej dim rau qhov nws txib nws tus Tub los yug ua tib neeg muaj roj muaj ntshav los rhuav txoj kev txhaum. Yog li ntawd, Vajtswv yog tus teem txim rau txoj kev txhaum hauv neeg cev nqaij daim tawv. 4 Vajtswv thiaj suav tias peb coj tau ncaj ncees raws li Mauxes Txoj Kev Cai rau qhov peb tsis ua raws li peb cev nqaij daim tawv ntshaw, tiam sis ua raws li lub hwj huam coj peb. 5 Cov uas ua raws li cev nqaij daim tawv ntshaw xav ntsoov txog tej uas lawv lub siab ntshaw. Tiam sis cov uas ua raws li lub hwj huam coj xav ntsoov seb lub hwj huam coj lawv li cas. 6 Tus uas xav ntsoov tej uas cev nqaij daim tawv ntshaw yuav raug kev ploj kev tuag. Tiam sis tus uas xav ntsoov rau lub hwj huam yuav tau txoj sia thiab nyob kaj siab lug. 7 Yog peb cia tej uas cev nqaij daim tawv ntshaw kav peb txoj kev xav ces peb yuav ua Vajtswv tus yeeb ncuab vim cev nqaij daim tawv tsis coj raws li Vajtswv txoj cai. Cev nqaij daim tawv yeej tsis kam coj li. 8 Cov uas coj raws li cev nqaij daim tawv ntshaw yeej tsis haum Vajtswv siab.

9 Tiam sis cov kwv tij, nej tsis coj raws li cev nqaij daim tawv ntshaw. Yog Vajtswv lub hwj huam nrog nej tiag ces nej yeej yuav cia lub hwj huam coj nej txoj hau kev. Tsis tas li ntawd xwb, yog leej twg tsis muaj Khetos lub siab ces nws tsis yog Khetos li. 10 Yog nej nrog Khetos koom ib lub siab, txawm nej lub cev txawj tuag vim kev txhaum los, lub hwj huam yuav pub txoj sia rau nej rau qhov Vajtswv suav tias nej ncaj ncees lawm. 11 Vajtswv lub hwj huam twb tsa Yexus sawv hauv qhov tuag rov los lawm. Yog lub hwj huam ntawd nyob hauv nej ces Vajtswv yuav siv lub hwj huam ua kom nej lub cev uas txawj tuag rov ciaj sia thiab.

12 Yog li ntawd, cov kwv tij tsis txhob cia cev nqaij daim tawv kav nej. 13 Yog nej ua raws li cev nqaij daim tawv ntshaw ces nej yeej yuav raug kev ploj kev tuag xwb. Tiam sis yog nej cia lub hwj huam pab nej muab tej uas cev nqaij daim tawv ntshaw rhuav tshem mus ces nej yuav tau txoj sia. 14 Cov uas Vajtswv lub hwj huam coj lawv txoj hau kev thiaj li yog Vajtswv cov tub. 15 Vajtswv lub hwj huam tsis quab yuam nej ua qhev thiab tsis ua rau nej txhawj ntshai. Tiam sis vim muaj lub hwj huam ntawd Vajtswv thiaj saws nej ua nws cov me nyuam. Lub hwj huam ua rau peb hu Vajtswv tias, “Anpas!”* txhais tias, “Txiv!” 16 Vajtswv lub hwj huam ua pov thawj tias peb yog Vajtswv cov me nyuam tiag. 17 Yog Vajtswv saws peb ua nws cov me nyuam ces peb yuav tau txais nws tej qub txeeg qub teg. Peb yuav tau nrog Khetos saws qub txeeg qub teg ntag. Tiam sis peb yuav tsum nrog nws tiv kev txom nyem ua ntej, peb thiaj nrog nws tau koob meej.

18 Tej kev txom nyem uas tam sim no peb raug yeej tsis loj ua luaj twg, yog muab piv rau lub koob meej uas Vajtswv tseem yuav pub rau peb. 19 Ib puas tsav yam uas Vajtswv tsim* tos ntsoov hnub uas Vajtswv qhia tias nws cov tub tau txais koob meej lawm. 20 Txawm ib puas tsav yam uas Vajtswv tsim tsis xav raug txim tau lub neej qhuav qhawv los Vajtswv cia kom muaj li ntawd. Tiam sis thaum Vajtswv teem txim li no, nws tseem qhib kev kom peb muaj chaw vam. 21 Vajtswv paub tias muaj ib hnub tej uas nws tsim* kuj yuav dim plaws lub cev txawj ploj txawj tuag thiab yuav tau nyob ywj pheej ua Vajtswv cov me nyuam. 22 Peb paub tias ib puas tsav yam uas Vajtswv tsim niaj hnub nyob txom nyem ntsuav ntsaj ntsoog qees los txog tav no. 23 Txawm peb yog cov tau txais lub hwj huam dawb huv uas yog thawj feem ntawm peb tej qub txeeg qub teg los peb tseem ntsaj ntsoog qees tos hnub uas Vajtswv saws peb ua nws cov tub. Thaum ntawd peb yuav tso lub cev nqaij daim tawv tseg vim Khetos twb txhiv peb lawm. 24 Vajtswv twb tso peb dim kev txaug kev txhaum lawm, peb thiaj muaj chaw vam li ntawd. Yog peb twb tau yam uas peb vam ntsoov ces peb kuj tsis tos lawd. 25 Tiam sis yog peb tsis tau txais yam uas peb vam ntsoov ces peb yeej yuav ua siab ntev tos.

26 Tsis tas li ntawd xwb, lub hwj huam yuav pab peb thaum peb qaug zog. Peb yeej paub tias peb yuav tsum thov Vajtswv tiam sis tej lub sij hawm peb tsis pom qab yuav thov li cas. Thaum peb tsis pom qab yuav hais zaj twg lub hwj huam pab peb, Vajtswv thiaj paub tej uas peb lub siab ntshaw. 27 Vajtswv yog tus paub neeg lub siab, thiab nws paub tej uas lub hwj huam ua los pab cov dawb huv. Lub hwj huam tsuas ua raws li Vajtswv lub siab nyiam xwb.

28 Peb paub tias txhua yam hauj lwm uas Vajtswv ua puav leej yog ua los txhawb nqa cov uas hlub Vajtswv. Cov ntawd yog cov uas Vajtswv pom zoo hu raws li nws lub siab nyiam. 29 Txij thaum chiv keeb los Vajtswv twb npaj tseg lawm tias nws yuav xaiv ib pab thiab lawv yuav tsum coj raws li nws Leej Tub. Nws tus Tub thiaj tau ua tij rau lawv pab kwv tij. 30 Cov Vajtswv xaiv tseg yog cov uas nws tau hu. Thiab cov uas nws hu ntawd yog cov uas nws suav tias ncaj ncees. Cov uas nws suav tias ncaj ncees, twb yog cov uas nws pub koob meej rau.

31 Tej no yog li cas? Yog Vajtswv tuaj peb tog lawm, leej twg tseem yuav tawm tsam yeej peb thiab? 32 Vajtswv twb tsis khuv xim nws tus Tub nws thiaj cia nws tus Tub los tuag txhiv peb. Yog li ntawd, nws tseem yuav tsis pub ib puas tsav yam rau peb lod? 33 Vajtswv twb yog tus suav tias cov uas nws xaiv tseg ncaj ncees lawm, leej twg tseem yuav thuam tau lawv? 34 Leej twg tseem txiav txim rau lawv? Tsis muaj leej twg li. Yexus Khetos* twb tuag txhiv lawv thiab Yexus yog tus uas sawv hauv qhov tuag rov los lawm. Nim no Yexus nyob ntawm Vajtswv sab xis, niaj hnub taij thov Vajtswv pab peb.

35 Leej twg yuav cais tau peb ntawm Khetos txoj kev hlub? Txawm yog kev txom nyem, kev nyuaj siab ntxhov plawv, kev tsim txom, kev tshaib kev nqhis, kev khaub hlab, kev nruj kev tsiv los, yeej yuav cais tsis tau peb ntawm Khetos txoj kev hlub. 36 Vajtswv Txoj Lus hais tias, “Peb niaj hnub ntsib kev ploj kev tuag rau qhov peb yog koj cov tub qhe. Luag yeej suav tias peb zoo li tej yaj uas luag cab mus tua xwb.” 37 Txawm li ntawd los, peb yuav kov yeej txhua yam rau qhov muaj tus uas hlub peb heev. 38 Kuv ntseeg ruaj nreeg tias tsis muaj ib yam dab tsi yuav cais tau peb ntawm Vajtswv txoj kev hlub. Tsis hais ciaj los tuag, cov tub txib saum ntuj, tej tseem fwv, tej uas muaj nim no, tej uas tseem yuav muaj los, tej hwj chim, 39 tsis hais qhov siab, qhov tob,* los sis ib yam dab tsi uas Vajtswv tau tsim, yeej yuav tsis muaj ib yam dab tsi cais tau peb ntawm Vajtswv thiab peb tus Tswv Yexus Khetos* txoj kev hlub.

9 Kuv yog Khetos ib tug thwj tim, kuv hais qhov tseeb xwb kuv yeej tsis dag li. Kuv lub siab yeej ua raws li lub hwj huam dawb huv coj, thiab ua tau tim khawv tias 2 kuv nyuaj siab heev, mob kuv siab tas li. 3 Kheev lam tias kuv yog tus raug foom nyob kuv cov kwv tij uas yog kuv haiv neeg chaw, kuv mam ua tus tsis tau nrog Khetos sib raug zoo. 4 Lawv yog haiv neeg Ixayees. Vajtswv twb npaj tias nws yuav saws lawv los ua nws cov me nyuam. Vajtswv ua rau lawv pom nws lub hwj chim ci ntsa iab. Nws nrog lawv sib cog lus thiab muab Mauxes Txoj Kev Cai rau lawv. Lawv muaj txoj koob hmoov los pe hawm Vajtswv thiab tau txais nws tej lus cog tseg. 5 Lawv yog peb cov yawg koob tej xeeb ntxwv. Khetos kuj yug ntawm caj ces no los thiab. Thov kom sawv daws qhuas Vajtswv tus uas kav ib puas tsav yam mus ib txhis. Amees.

6 Tiam sis Vajtswv tej lus cog tseg yeej tsis poob ib los li. Tsis yog txhua tus Ixayees yog tseem haiv neeg Ixayees tiag. 7 Txawm lawv yog Anplahas cov xeeb ntxwv los, tsis yog lawv txhua tus tau ua Anplahas cov me nyuam. Vim Vajtswv hais rau Anplahas tias, “Koj cov xeeb ntxwv yuav yog Ixaj caj ces xwb.” 8 Yog li ntawd, tsis yog Anplahas cov me nyuam txhua tus yog Vajtswv me nyuam. Tiam sis cov me nyuam uas yug los raws li Vajtswv tej lus cog tseg thiaj yog Anplahas xeeb ntxwv xwb. 9 Vajtswv twb cog lus tias, “Lwm xyoo lub caij no kuv rov tuaj ces Xalas tau ib tug tub lawm.” 10 Thaum Lenpekas xeeb nws ob tug ntxaib kuj zoo li ntawd thiab. Nkawd txiv yog peb yawg koob Ixaj. 11 Thaum tsis tau yug ob tug me nyuam ntxaib, thiab nkawd tseem tsis tau ua zoo ua phem, Vajtswv twb qhia lawm tias, nws pom zoo xaiv tus twg ces nws yuav xaiv tus ntawd. Nws tsis saib rau tes hauj lwm. 12 Vajtswv thiaj hais rau Lenpekas tias, “Tus tij yuav ua tus kwv qhev.” 13 Vajtswv Txoj Lus kuj hais tias, “Kuv hlub Yakhauj tiam sis kuv ntxub Exaus.”

14 Peb yuav hais tias Vajtswv ua tsis ncaj lod? Yeej tsis yog! 15 Vajtswv twb hais rau Mauxes tias, “Yog kuv pom zoo khuv leej tus twg ces kuv yuav khuv leej tus ntawd. Yog kuv yuav hlub tus twg ces kuv yeej hlub tus ntawd.” 16 Yog li ntawd, Vajtswv tsis saib rau neeg tes hauj lwm los sis tej uas neeg xav tau. Tiam sis Vajtswv khuv leej tus twg ces nws xaiv tus ntawd. 17 Vajtswv Txoj Lus kuj hais li no txog Falaus* tias, “Kuv tseg koj txoj sia kom sawv daws pom kuv lub hwj chim, kuv lub npe thiaj nrov ncha mus thoob ntiaj teb.” 18 Yog li ntawd, yog Vajtswv pom zoo khuv leej tus twg ces nws yuav khuv leej tus ntawd. Tiam sis tus uas yeem tawv ncauj ces nws yuav cia tawv ncauj.

19 Tej zaum ib txhia yuav nug tias, “Twb tsis muaj leej twg cam tau Vajtswv, ua cas nws ho nrhiav txim rau peb?” 20 Tiam sis koj yog leej twg es koj muaj cai thuam Vajtswv? Lub lauj kaub av puas muaj cai cam tus kws puab nws tias, “Ua cas koj puab kuv zoo li no?” 21 Tus kws puab lauj kaub yeej muaj cai muab tib thooj av los puab ob lub lauj kaub, ib lub siv rau yam muaj nqis, ib lub siv rau yam tsis muaj los sad? 22 Vajtswv kuj muaj cai ua li ntawd thiab. Cov neeg phem ua rau Vajtswv npau taws heev, thiab Vajtswv yeej xav ua rau lawv pom nws lub hwj chim los Vajtswv tseem ua siab ntev rau lawv, txawm lawv zoo li tej lauj kaub av uas tsim nyog muab rhuav tshem. 23 Vajtswv ua li no kom cov uas txais yuav nws txoj kev hlub* thiaj pom nws lub hwj chim ci ntsa iab. Lawv zoo li tej lauj kaub av uas Vajtswv npaj tseg los txais koob meej. 24 Peb yog cov ntawd ntag, tsis yog Vajtswv hu cov Yudais xwb tiam sis nws hu lwm haiv neeg los thiab. 25 Tej no muaj tiav li Hauxeyas tau hais tseg tias, “Cov uas tsis yog kuv haiv neeg, kuv yuav hu lawv ua ‘kuv haiv neeg.’ Tus poj niam uas kuv tsis hlub, kuv yuav tig los hlub. 26 Thiab ntawm qhov chaw uas kuv hais rau lawv tias, ‘Nej tsis yog kuv haiv neeg lawm,’ kuv yuav hais rau lawv tias, ‘Kuv yog Vajtswv tus uas muaj sia zees nyob, nej yog kuv cov tub.’”

27 Yaxayas quaj qw txog cov Ixayees tias, “Txawm ib tsoom Ixayees coob npaum li tej xuab zeb ntawm ntug hiav txwv los tsawg tus* thiaj dim xwb. 28 Rau qhov Vajtswv Yehauvas* yog tus txiav txim rau lub ntiaj teb thiab nws yeej maj nroos ua raws li nws tu tseg lawm.” 29 Thiab zoo ib yam li Yaxayas tau hais lawm tias, “Vajtswv Yehauvas* yog tus coj cov tub txib saum ntuj. Yog nws tsis tseg ib tug tsuv noob li ces peb yeej yuav zoo nkaus li Xaudoos thiab Kaumaulas ntag.”

30 Yog li ntawd, txawm lwm haiv neeg tsis coj ncaj ncees raws li Vajtswv txoj kev cai los, thaum kawg Vajtswv suav tias lawv ncaj ncees rau qhov lawv muaj kev ntseeg. 31 Txawm cov Ixayees niaj hnub xyaum raws li txoj kev cai ncaj ncees los thaum kawg lawv coj tsis tau raws li txoj kev cai ntawd. 32 Vim li cas? Vim lawv xav tias lawv tes hauj lwm yuav ua rau lawv ncaj ncees, tsis yog kev ntseeg yuav ua rau lawv ncaj ncees. Thaum kawg lawv thiaj dawm lub “pob zeb uas ua rau coob tus ntog.” 33 Vajtswv Txoj Lus twb hais tias, “Saib maj! Kuv tab tom teeb ib lub pob zeb rau hauv Xi-oos. Lub pob zeb ntawd yuav ua rau coob tus dawm thiab ntog thiab ua rau lawv npau taws. Tiam sis cov uas cog kev ntseeg ruaj rau lub pob zeb ntawd yuav tsis poob ntsej muag.”

10 Cov kwv tij, kuv niaj hnub thov Vajtswv pab kom kuv haiv neeg dim, qhov ntawd yog qhov uas kuv lub siab ntshaw. 2 Kuv pom tias lawv kub siab lug ua Vajtswv tes hauj lwm tiam sis lawv tsis paub qhov tseeb xwb. 3 Lawv tsis paub coj ncaj raws li Vajtswv lub siab nyiam, lawv tsuas ua raws li lawv pom tias ncaj xwb. Vim li no, Vajtswv thiaj tsis suav tias lawv ncaj ncees. 4 Mauxes Txoj Kev Cai twb xaus rau Khetos lawm. Nim no Vajtswv suav tias txhua tus uas ntseeg Khetos yog neeg ncaj ncees.

5 Mauxes sau tias tus uas coj ncaj ncees raws li txoj Kev Cai thiaj yuav muaj txoj sia nyob. 6 Tiam sis Vajtswv Txoj Lus kuj hais tias tus muaj kev ntseeg yog tus uas Vajtswv suav tias ncaj ncees. Vajtswv Txoj Lus twb hais tias, “Tsis txhob hais tuj taws rau nruab siab tias, ‘Leej twg yuav mus saum ntuj?’ uas yog mus coj Khetos nqes los. 7 Tsis txhob hais tias, ‘Leej twg yuav nqes mus rau hauv nruab a?’* uas yog mus tsa Khetos sawv hauv qhov tuag rov los.” 8 Yog li Vajtswv Txoj Lus hais li cas? Hais tias, “Txoj xov twb nrov ncha tuaj txog nej lawm, nyob kiag hauv nej lub qhov ncauj thiab hauv nej lub siab.” Nov yog txoj xov uas peb tshaj tawm ntag, tsuas yog cov muaj kev ntseeg thiaj ua tib zoo mloog xwb. 9 Yog nej coj txoj xov uas nyob hauv nej lub qhov ncauj mus tshaj tawm tab meeg sawv daws tias Yexus yog tus Tswv, thiab hauv nej lub siab, yog nej ntseeg tias Vajtswv twb tsa Yexus sawv rov los lawd ces nej yuav dim. 10 Yog nej lub siab ntseeg ces Vajtswv suav tias nej ncaj ncees, thiab yog nej lub ncauj lees tab meeg sawv daws ces nej yuav dim.

11 Vajtswv Txoj Lus twb hais txog Khetos tias, “Cov uas cog kev ntseeg ruaj nreeg rau nws yuav tsis xav txog lig.” 12 Tos hais li no los tus neeg Yudais yeej tsis txawv tus neeg Kilis, vim tib tug Tswv tsom kwm sawv daws thiab foom koob hmoov nplua mias rau cov uas thov nws. 13 Yog li, “txhua tus uas tuav Vajtswv Yehauvas* lub npe thov yuav dim.” 14 Tiam sis lawv yuav ua li cas thov tus uas lawv tsis tau ntseeg? Thiab lawv yuav ua li cas ntseeg tus uas lawv tsis tau hnov? Thiab lawv yuav ua li cas hnov yog tsis muaj tus mus tshaj tawm? 15 Thiab lawv yuav ua li cas mus tshaj tawm yog tsis muaj tus txib? Vajtswv Txoj Lus twb hais lawm tias, “Cas zoo ua luaj thaum pom tib neeg* mus tshaj tawm txoj xov zoo!”

16 Txawm li ntawd los tsis yog txhua tus yuav mloog txoj xov zoo. Yaxayas twb hais lawm tias, “Vajtswv Yehauvas,* leej twg thiaj ntseeg tej uas peb hais?” 17 Yog li ntawd, tsuas yog tus uas hnov thiaj paub ntseeg. Yuav tsum muaj tus tshaj tawm txoj xov txog Khetos neeg thiaj hnov. 18 Ua li puas yog cov Ixayees tsis tau hnov txoj xov ntawd? Tsis yog, rau qhov “tib neeg thoob ntiaj teb twb hnov txog lawm, txawm cov uas nyob plaub ceg kaum ntuj los kuj hnov huv si.” 19 Ua li, puas yog cov Ixayees tsis to taub txoj xov? Tsis yog. Lawv yeej to taub rau qhov Mauxes twb hais tias, “Kuv yuav ua kom nej khib lwm haiv neeg. Kuv yuav zes kom nej chim rau haiv neeg uas tsis paub qab hau.” 20 Thiab Yaxayas ua lub siab tawv qhawv hais hlo tias, “Cov uas tsis nrhiav kuv ho ntsib kuv, thiab cov uas tsis thov kuv, ho paub kuv.” 21 Tiam sis nws hais li no txog cov Ixayees tias, “Kuv niaj hnub cev tes pab cov neeg tawv ncauj tsis mloog lus no.”

11 Ua li, puas yog Vajtswv tsis yuav nws haiv neeg lawd? Tsis yog! Rau qhov kuv kuj yog neeg Ixayees thiab. Kuv yog Anplahas xeeb ntxwv. Kuv yog xeem Npeeyamees. 2 Vajtswv tsis tau tso nws haiv neeg tseg. Lawv yog haiv neeg uas nws xub xaiv lawd. Nej tsis nco qab tej uas Vajtswv Txoj Lus hais txog Eliyas lod? Eliyas yws rau Vajtswv txog cov Ixayees tias, 3 “Vajtswv Yehauvas’e,* lawv twb muab koj cov cev lus tua pov tseg tas. Lawv muab koj tej thaj dawj hlo tseg. Tshuav kuv tib leeg xwb los lawv tseem nrhiav kev txov kuv txoj sia thiab.” 4 Vajtswv teb Eliyas li cas? Nws teb tias, “Kuv tseem tshuav 7,000 leej uas tsis tau txhos caug pe Npa-as li.” 5 Niaj hnub no los zoo ib yam li ntawd thiab. Vajtswv yog tus muaj kev hlub nplua mias,* nws tseem tseg qee tus Ixayees cia. 6 Tsis yog Vajtswv saib rau lawv tes hauj lwm es nws thiaj tseg lawv cia tiam sis twb yog nws muaj kev hlub nplua mias.* Yog Vajtswv saib rau lawv tes hauj lwm ces kuj tsis yog nws hlub lawv tiag.

7 Yog li, peb yuav hais li cas? Cov neeg Ixayees tsis tau yam uas lawv ntshaw, tsuas yog qee tus uas Vajtswv xaiv cia lawd thiaj tau xwb, dua li cov tsis quav ntsej li. 8 Muaj raws li Vajtswv Txoj Lus tau hais tias, “Vajtswv ua rau lawv tsaug zog heev kom lawv qhov muag thiaj tsis pom thiab pob ntseg thiaj tsis hnov los txog niaj hnub nim no.” 9 Tsis tas li ntawd xwb, Daviv hais tias, “Cia qhov uas lawv muaj nplua mias ua yej ua ntxiab cuab lawv kom lawv thiaj yuam kev thiab raug txim. 10 Thov kom lawv lub qhov muag fam lawv thiaj tsis pom kev thiab cia lawv ris lawv lub nra khoov nkoos.”

11 Ua li, thaum cov Yudais yuam kev, puas yog lawv puas tsuaj tas tib si lawm? Tsis yog! Lawv yuam kev li ntawd, lwm haiv neeg thiaj tau kev cawm dim, cov Yudais thiaj khib heev. 12 Vim cov Yudais ua yuam kev, lub qab ntuj neeg thiaj tau koob hmoov nplua mias. Vim lawv poob li ntawd, koob hmoov thiaj laub lug rau lwm haiv neeg. Thaum sau cov Yudais thiab lwm haiv neeg txhij txhua lawd ces lub qab ntuj neeg yuav yim huab tau koob hmoov ntws lug.

13 Nim no kuv hais rau nej cov uas yog lwm haiv neeg. Kuv yog tus tub txib uas qhia lwm haiv neeg. Kuv saib kuv tes hauj lwm rau Vajtswv muaj nqis heev. 14 Kuv vam tias tej uas kuv hais no yuav ua rau kuv haiv neeg khib nej, kom lawv qee leej thiaj ras thiab tau kev cawm dim. 15 Qhov uas lawv raug ntiab tawm ua rau neeg ntiaj teb ib txhia tau los nrog Vajtswv sib raug zoo. Yog Vajtswv ho txais cov Yudais rov qab ces yuav zoo ib yam li Nws tsa lawv sawv hauv qhov tuag rov los ntag. 16 Tsis tas li ntawd xwb, yog thawj feem uas de ntawm lub ncuav* coj mus fij twb dawb huv lawm ces tag nrho lub ncuav* kuj dawb huv. Thiab yog tus cag ntoo twb dawb huv lawm ces tej ceg kuj dawb huv thiab.

17 Tiam sis tej ceg ntoo txiv aulib ib txhia raug muab txiav pov tseg. Koj zoo li tus ceg ntoo txiv aulib qus uas muab txuas rau xwb. Nim no tsob ntoo txiv aulib tej cag kuj yug koj lawm thiab. 18 Tiam sis koj tsis txhob khav tias koj zoo dua tej ceg uas raug muab txiav pov tseg lawd. Yog koj khav ces nco ntsoov tias tsob ntoo yug koj, tsis yog koj yug tsob ntoo. 19 Nej ib txhia yuav hais tias, “Tej ceg ntawd raug muab txiav kom txuas tau kuv ntag.” 20 Yog li ntawd tiag! Vim lawv tsis muaj kev ntseeg lawv thiaj raug txiav pov tseg. Tiam sis koj tau nyob vim koj muaj kev ntseeg. Txawm li ntawd los tsis txhob khav tiam sis yuav tsum paub ntshai. 21 Yog Vajtswv twb tsis tseg tej ceg uas ib txwm tuaj, Vajtswv tseem yuav tseg koj thiab lod? 22 Yog li ntawd, Vajtswv yog tus muaj siab dawb siab zoo tiam sis nws yeej txiav txim hnyav thiab. Tos Vajtswv txiav txim hnyav rau cov uas poob lawm los twb yog lawv tsis muaj kev ntseeg. Tiam sis Vajtswv yuav hlub koj yog koj coj zoo kom tsim nyog nws txoj kev hlub. Yog koj tsis coj li ntawd, koj yuav raug txiav pov tseg ib yam nkaus thiab. 23 Yog cov Yudais pib muaj kev ntseeg ces Vajtswv yuav rov muab lawv los txuas rau tsob ntoo txiv aulib, rau qhov Vajtswv yeej ua tau li ntawd. 24 Koj yog tus ceg qus uas raug muab los txuas rau tsob ntoo txiv aulib nyeg, yeej ib txwm tsis muaj leej twg txuas li ntawd. Haj yam yooj yim muab tej ceg ntoo txiv aulib nyeg rov los txuas rau tsob ntoo los sad!

25 Cov kwv tij, kuv xav kom nej paub tej uas Vajtswv tau muab npog cia, rau qhov kuv tsis xav kom nej khav tias nej ntse. Kuv xav kom nej paub tias cov neeg Ixayees ib txhia yuav tawv ncauj mus txog thaum cov uas Vajtswv xaiv tawm hauv lwm haiv neeg los kom txhij tso. 26 Thaum muaj li no ces ib tsoom Ixayees thiaj dim tag nrho. Ib yam li Vajtswv Txoj Lus tau hais, “Tus cawm seej yuav tawm hauv Xi-oos los thiab yuav ua kom Yakhauj cov xeeb ntxwv tso lawv tej kev phem lim hiam tseg. 27 Thiab thaum kuv zam txim rau lawv lawd, kuv yuav nrog lawv sib cog lus.” 28 Cov Yudais ib txhia tawm tsam txoj xov zoo, nej thiaj tau los ntseeg. Tiam sis Vajtswv nco ntsoov lawv tej yawg koob, nws thiaj xaiv lawv thiab tseem hlub lawv. 29 Vajtswv yeej tsis khuv xim tej uas nws tau pub, thiab nws yeej tsis xav txog lig rau cov uas nws twb hu lawd. 30 Yav tas los nej twb tsis mloog Vajtswv lus thiab tiam sis vim cov Yudais tsis mloog lus, nws thiaj tig los hlub* nej. 31 Yog Vajtswv twb tig los hlub* nej vim cov Yudais ua txhaum ces nws kuj tig tau los hlub* lawv thiab. 32 Yog li ntawd, Vajtswv cia lawv txhua tus poob cev qhev rau txoj kev tsis mloog lus kom nws thiaj zoo hlub* lawv sawv daws.

33 Vajtswv yog tus foom koob hmoov nplua mias! Nws lub tswv yim thiab kev txawj ntse tob kawg nkaus! Vajtswv txoj kev txiav txim tsis muaj leej twg paub txog, thiab nws tes hauj lwm tsis muaj leej twg yuav nkag siab tau! 34 Vajtswv Txoj Lus thiaj hais tias, “Leej twg yuav paub Vajtswv Yehauvas* lub siab, thiab leej twg yuav pab Vajtswv tawm tswv yim?” 35 Los sis, “Leej twg xub pub rau Vajtswv es Vajtswv yuav tsum pauj?” 36 Tsis muaj leej twg li, rau qhov Vajtswv yog tus tsim ib puas tsav yam, muaj Vajtswv thiaj muaj tej ntawd, thiab tej ntawd yog nws tsim rau nws. Thov kom Vajtswv tau koob meej mus ib txhiab ib txhis. Amees.

12 Cov kwv tij, vim Vajtswv hlub tshua nej, kuv thiaj thov nej muab nej lub neej thiab lub cev ua khoom fij dawb huv pub rau Vajtswv kom haum nws siab. Cia li ua Vajtswv tes hauj lwm kawg nej lub laj lim tswv yim. 2 Tseg tsis txhob yoog raws li lub qab ntuj* no tiam sis cia Vajtswv hloov nej txoj kev xav, nej thiaj paub tias tej uas haum Vajtswv siab yog li cas thiab paub tias tej uas Vajtswv xav kom nej ua yeej tsim nyog thiab zoo kawg nkaus.

3 Vim Vajtswv muaj lub siab dawb siab zoo hlub* kuv lawm, kuv thov kom nej tsis txhob xav txog nej tus kheej tshaj li uas tsim nyog. Tiam sis ua neeg thoob tsib rau qhov twb yog muaj Vajtswv pab, nej thiaj muaj kev ntseeg. 4 Muab piv rau lub cev muaj tes muaj taw, muaj ntau yam, nyias ua nyias hauj lwm tsis yog ua tib txog xwb. 5 Ib yam li ntawd, peb muaj coob tus tiam sis peb puav leej nrog Khetos koom tib lub cev. Thiab peb txhua tus ib leeg vam khom ib leeg yam li tej tes taw koom tib lub cev. 6 Vajtswv muaj lub siab dawb siab zoo hlub* peb, nws pub peb nyias txawj nyias lawm ib yam. Yog li ntawd, yog Vajtswv pub peb tus twg txawj cev Vajtswv lus, cia li cev npaum li peb twb ntseeg lawd. 7 Yog Vajtswv pub peb tus twg tuav tes hauj lwm pab luag, cia li pab kawg lub dag lub zog. Yog Vajtswv pub peb tus twg txawj qhuab qhia, cia li kub siab qhia. 8 Los sis yog Vajtswv pub peb tus twg tuav tes hauj lwm txhawb luag, cia li txhawb. Yog Vajtswv pom zoo peb tus twg pub rau luag, cia li ua siab dawb paug pub. Tus uas saib xyuas lub koom txoos, cia nws rau siab ntso ua nws tes hauj lwm. Tus uas khuv leej luag, cia nws zoo siab hlo hlub luag.

9 Koj yuav tsum muaj lub siab hlub luag tiag tiag. Ntxub tej yam phem, tuav rawv tej yam zoo. 10 Cia li sib hlub li tej kwv tij, ib leeg mob siab ib leeg tiag tiag. Cia li xub hwm luag, txhob tos luag hwm yus. 11 Cia li nquag ua hauj lwm, txhob tub nkeeg. Cia lub hwj huam dawb huv txhib ntshis koj. Cia li kub siab lug ua Vajtswv Yehauvas* tes hauj lwm kawg siab kawg ntsws. 12 Cia li zoo siab rau tej uas koj vam ntsoov. Cia li thev tiag thaum koj raug kev nyuaj siab. Cia li thov Vajtswv tsis tu ncua. 13 Yog Vajtswv cov tib neeg tu ncua yam twg, cia li pub yam ntawd rau lawv. Nrhiav nrhw kev los txais qhua. 14 Thov Vajtswv foom koob hmoov rau cov uas tsim txom koj, txhob foom phem rau lawv. 15 Thaum luag zoo siab cia li nrog luag zoo siab, thaum luag quaj cia li nrog luag quaj. 16 Koj mob siab koj tus kheej li cas, koj yuav tsum mob siab luag lwm tus ib yam li ntawd. Tsis txhob tsab ua loj tiam sis txo hwj chim,* txhob xav tias yus ntse dua luag.

17 Tsis txhob ua phem pauj phem. Cia li ua yam uas sawv daws pom tias zoo xwb. 18 Ua txhua yam kom nrog sawv daws nyob sib haum xeeb li koj ua tau. 19 Cov kwv tij, tsis txhob ua phem pauj phem, cia Vajtswv mam li pauj nws txoj kev chim rau lawv xwb. Vajtswv Txoj Lus hais li no, “Vajtswv Yehauvas* hais tias, ‘Kuv mam li pauj tej uas lawv ua phem.’” 20 Koj yuav tsum ua li no, “Yog koj tus yeeb ncuab tshaib plab, cia li pub rau nws noj. Yog nws nqhis dej, cia li pub rau nws haus. Yog koj ua li no tej zaum yuav txo tau nws lub siab chim* los muaj thiab.” 21 Txhob cia txoj kev phem kov yeej koj, tiam sis ua zoo koj thiaj kov yeej txoj kev phem.

13 Peb yuav tsum mloog tej nom tswv lus. Vajtswv yog tus cia tej nom tswv nyias muaj nyias hwj chim kav.* Yog Vajtswv tsis tso cai ces lawv yeej tsis tau kav. 2 Yog peb tawm tsam tej nom tswv ces twb yog peb tawm tsam Vajtswv ntag. Yog leej twg cov nyom cov uas Vajtswv tsa no ces tus ntawd yuav raug txim. 3 Cov neeg zoo yeej tsis ntshai nom tswv, tsuas yog cov neeg phem thiaj ntshai xwb. Tsis tas nej yuav ntshai nom tswv. Yog nej coj zoo ces lawv yuav qhuas nej xwb. 4 Lawv* yog Vajtswv cov tub qhe uas Nws txib los pab nej. Yog nej ua phem ces tsim nyog nej ntshai. Lawv muaj cai thiab muaj hwj chim rau txim rau cov neeg uas ua txhaum kev cai. Lawv yog Vajtswv cov tub qhe uas Nws txib los rau txim rau cov neeg ua phem.

5 Yeej tsim nyog nej mloog tej nom tswv lus. Tsis yog nej mloog kom nej txhob raug txim xwb tiam sis kom nej lub siab txhob nkaug nej. 6 Twb yog vim li ntawd nej thiaj them se, rau qhov lawv yog Vajtswv cov tub qhe uas niaj hnub ua hauj lwm rau ib zej tsoom sawv daws. 7 Cia li muab rau txhua tus raws li tsim nyog muab, cia li them txhua yam se rau nom tswv raws li lawv kom tseg, cia li saib taus tus uas tsim nyog saib taus, thiab hwm tus uas tsim nyog hwm.

8 Tsis txhob tshuav leej twg nqi tiam sis qhov uas nej tshuav ces yog hlub luag xwb. Leej twg hlub nws tus kwv tij ces twb yog nws ua raws li txoj kev cai lawm. 9 Mauxes Txoj Kev Cai twb hais tias, “Tsis txhob deev luag poj luag txiv,* tsis txhob tua neeg, tsis txhob ua tub sab, tsis txhob ntshaw luag tug.” Tag nrho tej kev cai no thiab lwm nqe hauv Mauxes Txoj Kev Cai puav leej xaus rau nqe no, “Nej yuav tsum hlub kwv tij zej zog ib yam li nej hlub nej tus kheej.” 10 Tus uas muaj kev hlub yeej tsis ua phem rau ib tug twg. Yog li ntawd, tus uas muaj kev hlub ua raws li Mauxes Txoj Kev Cai.

11 Tsim nyog nej ua li no vim twb txog lub sij hawm uas nej tsim dheev nruab dab ntub. Hnub uas peb yuav dim twb los ze heev, ze tshaj thaum peb nyuam qhuav los ntseeg lawm. 12 Tsaus ntuj ntev lawm twb yuav kaj ntug, tsim nyog peb tso tej hauj lwm uas ua tsaus ntuj nti tseg. Cia li muab tej cuab yeej nruab hnub coj los hnav. 13 Tsim nyog peb coj li cov neeg uas nyob nruab hnub. Tsis txhob noj tsau haus qaug qw ua nqaj ua nqug, quav dej quav cawv, ua nkauj ua nraug, ua vuab tsuab tsis paub txaj muag li,* sib cav sib ceg, sib khib sib chim. 14 Tiam sis cia peb coj raws nraim li tus Tswv Yexus Khetos, thiab txhob ntaus tswv yim mus ua txhaum raws li cev nqaij daim tawv ntshaw.

14 Cia li tos txais tus uas kev ntseeg yau thiab txhob thuam cov uas tsis xav li koj. 2 Tus uas kev ntseeg loj yuav noj dab tsi los tau, tiam sis tus uas kev ntseeg yau tsuas noj zaub xwb. 3 Tus uas noj txhua yam tsis txhob thuam tus uas tsis kam noj, thiab tus uas tsis kam noj txhua yam tsis txhob thuam tus uas noj rau qhov Vajtswv twb zoo siab tos txais nws lawm. 4 Koj yog leej twg es koj yuav thuam luag tus tub qhe? Nws tus tswv mam li txiav txim seb tej uas nws ua ntawd yog los tsis yog. Twb muaj Vajtswv Yehauvas* pab ces nws yeej yuav ua qhov yog kom haum nws tus tswv.

5 Ib txhia xav tias ib hnub tseem ceeb dua ib hnub. Lwm cov ho xav tias txhua hnub tseem ceeb ib yam. Nyias yuav tsum ntseeg tias qhov uas nyias xav yog lawm. 6 Cov uas suav tias ib hnub tseem ceeb dua ib hnub yog lawv ua los qhuas Vajtswv Yehauvas.* Cov uas noj txhua yam yog lawv noj los qhuas Vajtswv Yehauvas,* rau qhov lawv twb ua Vajtswv tsaug rau tej zaub mov uas lawv noj. Cov uas tsis kam noj los kuj qhuas Vajtswv Yehauvas* thiab kuj ua Vajtswv tsaug. 7 Peb tsis muaj ib tug twg yuav ua neej rau nws tus kheej xwb, thiab peb tsis muaj ib tug twg yuav tuag rau nws tus kheej xwb. 8 Yog peb ciaj los ciaj rau Vajtswv Yehauvas,* yog peb tuag los tuag rau Vajtswv Yehauvas.* Txawm peb ciaj thiab tuag los peb yog Vajtswv Yehauvas* ntiag tug. 9 Qhov uas Khetos tuag thiab ciaj sawv rov los yog kom nws ua tau tus Tswv uas muaj hwj chim kav cov ciaj thiab cov tuag.

10 Ua cas koj yuav thuam koj tus kwv tij? Los sis ua cas koj yuav saib tsis taus nws? Peb txhua tus yuav sawv ntawm Vajtswv lub rooj txiav txim. 11 Vajtswv Txoj Lus twb sau li no tias, “Vajtswv Yehauvas* hais tias, ‘Kuv yeej yog Vajtswv tus muaj txoj sia nyob, txhua tus yuav tsum txhos caug ntua pe kuv thiab txhua tus yuav tsum lees tias kuv yog Vajtswv.’” 12 Yog li ntawd, Vajtswv yuav txiav txim rau txhua leej txhua tus raws li nyias tes hauj lwm.

13 Yog li ntawd, ib leeg tsis txhob thuam ib leeg ntxiv lawm. Tsis txhob ua ib yam dab tsi los txo koj tus kwv tij txoj kev ntseeg los sis ua rau nws mus ua txhaum. 14 Kuv yog tus Tswv Yexus ib tug thwj tim, kuv thiaj paub tias tsis muaj ib yam dab tsi uas peb noj yuav ua rau peb qias. Tiam sis yog leej twg xav tias yam uas nws noj ua rau nws qias ces yam ntawd thiaj tsis huv rau nws xwb. 15 Yog tias tej yam uas koj noj ua rau koj tus kwv tij xav yuam kev* ces kuj yog koj tsis hlub nws. Nco ntsoov tias Khetos tuag txhiv tus kwv tij ntawd. Yog li, tsis txhob noj tej yam uas yuav rhuav tau nws txoj kev ntseeg. 16 Tsis txhob ua ib yam dab tsi kom luag tau chaw thuam koj tes hauj lwm zoo. 17 Qhov uas peb yuav tau Vajtswv lub Nceeg Vaj* tsis yog tej peb noj peb haus. Qhov tseem ceeb yog coj ncaj coj ncees, nrog sawv daws nyob sib haum xeeb, thiab muaj kev xyiv fab rau qhov muaj lub hwj huam dawb huv pab peb. 18 Tus uas kub siab lug ua Khetos tes hauj lwm li no, nws ua haum Vajtswv siab thiab luag yuav qhuas nws.

19 Yog li ntawd, tsim nyog peb ua txhua yam kom nrog luag nyob sib haum xeeb, ib leeg txhawb ib leeg lub zog. 20 Tseg tsis txhob muab tej zaub mov uas peb noj los rhuav Vajtswv tes hauj lwm. Txhua yam zaub mov yus noj yeej tsis txhaum, tiam sis yog noj tej zaub mov uas yuav txo tau yus tus kwv tij txoj kev ntseeg ces txhaum. 21 Yog koj noj nqaig haus cawv, los sis ua ib yam dab tsi uas yuav txo tau koj tus kwv tij txoj kev ntseeg ces txhob noj, txhob ua zoo dua. 22 Txawm koj ntseeg li cas txog tej ntawd los nyob ntawm koj thiab Vajtswv xwb. Thaum koj ua yam uas koj ntseeg tias yog lawd, koj lub siab yuav tsis nkaug koj ces koj yuav kaj siab. 23 Tiam sis yog leej twg lub siab tsis kheev los nws tseem noj ces yog nws ua txhaum vim nws twb tsis noj raws li nws ntseeg. Yog li ntawd, txhua yam uas peb ua yog peb tsis ua raws li peb ntseeg ces txhaum.

15 Cov uas kev ntseeg loj yuav tsum xav txog tej uas cov kev ntseeg yau ua tsis tau. Peb tsis txhob ua kom haum peb siab xwb. 2 Peb txhua tus yuav tsum nrhiav kev los ua kom haum peb tus kwv tij zej zog. Cia peb ua tej yam uas yuav pab tau nws kom txhawb tau nws lub zog. 3 Txawm Khetos los, nws twb tsis ua kom haum nws siab xwb. Vajtswv Txoj Lus hais tias, “Tej uas luag thuam koj twb yog thuam kuv ntag.” 4 Txhua yam hauv Vajtswv Txoj Lus uas sau puag thaum ub los yog sau los qhuab qhia peb. Vajtswv Txoj Lus pab kom peb thev taus thiab txhawb tau peb lub zog, peb thiaj muaj chaw vam rau yav tom hauv ntej. 5 Thov Vajtswv txhawb nej lub zog thiab pab kom nej thev taus, thiab kuv thov kom Vajtswv pub nej muaj tib tug cwj pwm li Yexus Khetos.* 6 Ua li no, nej thiaj koom tau ib lub siab qhuas Vajtswv uas yog peb tus Tswv Yexus Khetos Leej Txiv.

7 Khetos zoo siab tos txais nej li cas, nej ib leeg yuav tsum zoo siab tos txais ib leeg li ntawd. Yog nej ua li no Vajtswv thiaj yuav tau ntsej muag. 8 Kuv xav kom nej paub tias Khetos los ua cov Yudais ib tug tub qhe. Nws ua li no kom lawv pom tias Vajtswv tej lus muaj tseeb thiab yeej yuav muaj raws li tej lus uas Vajtswv cog tseg rau lawv cov yawg koob. 9 Thiab muaj li ntawd kom lwm haiv neeg thiaj tau los qhuas Vajtswv tus uas khuv leej lawv. Vajtswv Txoj Lus thiaj hais tias, “Kuv yuav qhuas koj tab meeg lwm haiv neeg. Kuv yuav hu nkauj qhuas koj lub npe.” 10 Vajtswv Txoj Lus hais ntxiv tias, “Lwm haiv neeg’e, cia li nrog Vajtswv haiv neeg zoo siab.” 11 Thiab hais ntxiv tias, “Lwm haiv neeg’e, cia li qhuas Vajtswv Yehauvas.* Txhua leej txhua tus cia li qhuas nws.” 12 Yaxayas kuj hais tias, “Yuav muaj ib tug sawv hauv Yexis caj ces* los. Tus ntawd yuav kav lwm haiv neeg thiab lawv yuav vam khom nws.” 13 Thov tus Vajtswv uas pab nej muaj kev vam ua rau nej muaj kev xyiv fab thiab muaj lub siab tus rau qhov nej tso siab rau nws. Thov kom lub hwj huam dawb huv nrog nraim nej thiab pab nej yim huab tso siab rau nws.

14 Cov kwv tij, kuv yeej paub tseeb tias nej sawv daws muaj lub siab zoo, nej txawj ntse, thiab nej ib leeg txawj qhuab ntuas ib leeg. 15 Tiam sis kuv sau li no tuaj rau nej thiab qhia ncaj qha txog tej no kom nej thiaj nco ntsoov. Tos kuv ua li no los twb yog Vajtswv muaj kev hlub nplua mias* rau kuv. 16 Kuv thiaj ua tau Yexus Khetos* ib tug tub qhe uas tshaj tawm rau lwm haiv neeg. Kuv niaj hnub tshaj tawm Vajtswv txoj xov zoo kom lwm haiv neeg tau los paub nws. Lub hwj huam dawb huv yuav pab tau lawv kom zoo li tej khoom fij dawb huv uas haum Vajtswv siab.

17 Kuv yeej zoo siab ua Yexus Khetos* ib tug thwj tim thiab ua Vajtswv tes hauj lwm. 18 Kuv yuav tsis tham txog ib yam dab tsi uas kuv tus kheej ua tau. Kuv tsuas tham txog tej uas Khetos kom kuv ua thiab kuv hais, mus pab lwm haiv neeg los mloog nws lus xwb. 19 Lawv mloog lus rau qhov lawv pom Vajtswv lub hwj huam pab kuv ua tej txuj ci tseem ceeb uas ua rau sawv daws xav tsis thoob li. Yog li ntawd, kuv yeej hais tau tias kuv twb ncig mus tshaj tawm txoj xov zoo txog tus Khetos hauv Yeluxalees mus txog ntua cheeb tsam Ilelikhus lawm. 20 Kuv twb npaj lawm tias kuv yuav tsis mus tshaj tawm rau tej koog uas twb hnov txog Khetos lawd. Kuv tsis xav mus qhia tej koog uas lwm tus twb qhia lawd.* 21 Yeej muaj raws li Vajtswv Txoj Lus tau hais lawm tias, “Cov uas tsis tau muaj leej twg qhia yuav pom nws, thiab cov uas tsis tau hnov dua yuav to taub.”

22 Twb yog muaj ntau yam hauj lwm tab kaum li no, kuv thiaj tsis tau tuaj xyuas nej. 23 Nim no kuv twb mus tshaj tawm thoob tej koog no lawm, tau ntau xyoo kuv yeej xav tuaj saib nej kawg. 24 Thaum kuv tuaj hla nej mus rau teb chaws Xipees, kuv vam tias kuv yuav tau pom nej. Tom qab kuv nrog nej nyob txaus siab lawm, kuv cia siab tias nej yuav pab xa kuv mus rau Xipees. 25 Tam sim no kuv tab tom npaj yuav mus pab cov kwv tij* hauv Yeluxalees. 26 Cov kwv tij hauv Maxedaunias thiab hauv Akhayas zoo siab hlo pab nyiaj rau cov kwv tij* uas txom nyem hauv Yeluxalees. 27 Cov kwv tij ntawd yeej zoo siab hlo pab rau qhov lawv pom tias tsim nyog pauj cov kwv tij hauv Yeluxalees txiaj ntsig. Twb yog muaj cov kwv tij hauv Yeluxalees pab, lwm haiv neeg thiaj los paub txog Vajtswv. Yog li ntawd, yeej tsim nyog pab cov kwv tij uas tu ncua hauv Yeluxalees. 28 Tom qab kuv xa nyiaj mus rau cov kwv tij hauv Yeluxalees lawd, kuv yuav los xyuas nej ua ntej kuv mus rau Xipees. 29 Kuv paub tias thaum kuv los txog ntawm nej, kuv yuav coj Khetos tej koob hmoov nplua mias los rau nej thiab.

30 Cov kwv tij, peb yeej muaj kev ntseeg rau peb tus Tswv Yexus Khetos thiab twb yog muaj Vajtswv lub hwj huam dawb huv peb thiaj txawj sib hlub. Yog li, kuv thov nej kub siab lug nrog kuv thov Vajtswv pab kuv thiab. 31 Thov kom Vajtswv pab kuv thaum kuv mus hauv Yudias, kom cov tsis ntseeg Yexus txhob tav kuv kev. Thiab thov kom cov kwv tij hauv Yeluxalees txaus siab txais yuav tej nyiaj txiag uas kuv coj mus rau lawv. 32 Dhau ntawd yog Vajtswv pom zoo, kuv yuav tau los xyuas nej. Thaum ntawd kuv yuav zoo siab heev thiab peb ib leeg yuav txhawb tau ib leeg lub zog. 33 Thov kom Vajtswv tus uas pub peb nyob kaj siab lug nrog nraim nej txhua tus. Amees.

16 Kuv thov kom nej cia li tos txais peb tus muam Finpis. Nws yog ib tug uas pab txhawb lub koom txoos* hauv Xeekhias. 2 Thov nej zoo siab tos txais nws thiaj tsim nyog nej yog Vajtswv cov neeg dawb huv. Cia li pab txhua yam uas nws cheem tsum rau qhov nws twb pab txheem kuv thiab coob tus lawm.

3 Thov xa xov rau Paxilas thiab Akilas nkawd uas nrog kuv ua Yexus Khetos* tes hauj lwm. 4 Nkawd tsis khuv xim nkawd txoj sia los pab kuv li. Cov koom txoos uas yog lwm haiv neeg thiab kuv yeej nco nkawd txiaj ntsig kawg li. 5 Thov xa xov rau lub koom txoos uas tuaj sib txoos hauv nkawd tsev. Xa xov rau Epanetas tus uas kuv hlub tshua. Nws yog ib tug ntawm cov uas xub los ntseeg Khetos hauv Axias. 6 Xa xov rau Maivliag, tus uas twb sib zog ua hauj lwm pab nej lawd. 7 Xa xov rau Anraunikas thiab Yunias, kuv ob tug txheeb ze uas nrog kuv raug kaw. Cov tub txib yeej paub nkawd tes hauj lwm zoo thiab nkawd xub los ntseeg Khetos dua kuv.

8 Xa xov rau Aplhi-athas, kuv tus me phooj ywg uas ntseeg tus Tswv. 9 Xa xov rau Unpanas, tus uas nrog peb ua Khetos tes hauj lwm, thiab xa xov rau kuv tus me phooj ywg Xathakis. 10 Xa xov rau Apeles tus uas Khetos pom zoo. Thiab xa xov rau txhua tus uas nyob hauv Alithanpulus tsev. 11 Xa xov rau Helaudi-oos, kuv tus txheeb ze. Xa xov rau txhua tus uas nyob hauv Naxixas tsev uas ntseeg tus Tswv. 12 Xa xov rau Tafinas thiab Tafauxas, ob tug muam uas sib zog ua hauj lwm rau tus Tswv. Xa xov rau peb tus muam Phawxis, tus peb hlub tshua uas twb sib zog ua tus Tswv tes hauj lwm lawd. 13 Xa xov rau Lufas uas yog ib tug tub qhe zoo heev rau tus Tswv, thiab nws niam. Nws niam kuj tam li kuv niam thiab. 14 Xa xov rau Axikitas, Filekoos, Hawmes, Palaunpas, Hawmas, thiab cov kwv tij uas nrog lawv tib si. 15 Xa xov rau Filaulaukas thiab Yulis, xa rau Nele-as thiab nws tus muam, xa rau Aulipas, thiab tag nrho Vajtswv cov tib neeg uas nrog lawv ua ke. 16 Thov kom nej txhua tus ib leeg zoo siab hlo tos txais ib leeg.* Tag nrho cov koom txoos uas ntseeg Khetos kuj xa xov tuaj rau nej thiab.

17 Cov kwv tij nej yuav tsum ceev faj cov neeg uas tshum kom sawv daws tawg ua pab ua pawg thiab nrhiav kev los rhuav lwm tus txoj kev ntseeg. Lawv txhob txwm tawm tsam tej uas nej twb kawm los lawd. Tsis txhob mus poo lawv hlo li. 18 Cov neeg ntawd tsis yog peb tus Tswv Khetos cov tub qhe, tiam sis lawv ua qhev rau tej uas lawv lub siab ntshaw xwb. Lawv niaj hnub ua ncauj qab zib nplaig qab ntse ntxias kom tib neeg yuam kev. 19 Thaum kuv hnov sawv daws hais tias nej mloog lus mas kuv zoo siab kawg li. Kuv xav kom nej ua neeg ntse es ua qhov zoo thiab ua neeg ncaj es txhob ua qhov phem. 20 Tshuav tsis ntev, tus Vajtswv uas pub peb muaj lub siab tus yuav muab Xatas nias nthi rau nej tsuj. Thov kom peb tus Tswv Yexus foom koob hmoov nplua mias rau nej txhua tus.

21 Timautes tus uas nrog kuv ua hauj lwm, thiab kuv cov kwv tij Lukias, Yaxoos, Xauxipataws kuj xa xov tuaj rau nej.

22 Kuv yog Thawtias tus uas pab sau tsab ntawv no thiab yog nej tus kwv tij uas ntseeg tus Tswv. Kuv xa xov tuaj rau nej thiab.

23 Ke-as tus uas tos txais kuv thiab lub koom txoos uas tuaj txoos hauv nws tsev puav leej xa xov tuaj rau nej. Elatas uas yog tus saib xyuas txhab nyiaj hauv lub nroog xa xov tuaj rau nej. Nws tus kwv tij* Khuathas kuj xa xov tuaj rau nej thiab. 24 ——*

25 Vajtswv yeej yuav pab nej sawv khov kho rau qhov muaj txoj xov zoo kuv tshaj tawm uas hais txog Yexus Khetos. Txoj xov zoo no qhia raws li tej uas Vajtswv twb muab npog cia ib tiam dhau ib tiam los lawm tiam sis nim no nws muab nthuav ib qho zuj zus rau peb paub. 26 Twb yog muaj tej lus faj lem hauv Vajtswv Txoj Lus nthuav tej no tawm peb thiaj to taub zuj zus. Peb tus Vajtswv uas nyob mus ib txhis tau sam hwm kom peb muab tej no tshaj tawm rau lwm haiv neeg paub, xwv lawv thiaj los ntseeg thiab mloog Vajtswv lus. 27 Vajtswv tib leeg yog tus muaj tswv yim, tsim nyog nws tau koob meej mus ib txhis vim yog muaj Yexus Khetos. Amees.