TES HAUJ LWM

1 The-aufilas, hauv thawj tsab ntawv uas kuv sau tuaj rau koj, kuv sau txog ib puas tsav yam uas Yexus tau ua thiab tau qhia 2 mus txog hnub uas Vajtswv coj nws mus saum ntuj. Tom qab lub hwj huam dawb huv tshoov kom nws cob qhia cov tub txib uas nws tau xaiv tseg tas, nws mam ncaim lawv mus. 3 Tom qab Yexus raug tsim txom tuag lawd, nws los tshwm rau lawv pom ntau zaus kom lawv paub tseeb tias nws ciaj sawv rov los lawm tiag. Nws tshwm rau lawv pom tsis tseg tau 40 hnub, thiab nws qhia lawv txog Vajtswv txoj kev kav.* 4 Thaum nws nrog lawv tham nws sam hwm rau lawv tias, “Txhob tawm hauv Yeluxalees mus tiam sis tos ntsoov qhov uas Leej Txiv twb cog lus tseg lawd. Nej twb hnov kuv qhia txog qhov no lawm. 5 Rau qhov Yauhas tau muab neeg ua kev cai raus dej, tiam sis tshuav ob peb hnub saum no xwb, nej yuav ua kev cai raus lub hwj huam dawb huv.”

6 Thaum lawv sib txoos ua ke lawv nug nws tias, “Tus Tswv, puas yog koj yuav rov muab lub Nceeg Vaj* rau cov neeg Ixayees kav tam sim no?” 7 Yexus teb lawv tias, “Tsuas yog Leej Txiv thiaj muaj cai* teem tseg xwb. Tsis tas nej yuav paub txog lub sij hawm thiab lub caij lub nyoog ntawd. 8 Tiam sis thaum nej tau lub hwj huam dawb huv lawd, nej yuav muaj hwj chim thiab yuav ua tim khawv txog kuv hauv Yeluxalees, mus thoob plaws hauv Yudias thiab Xamalis, thiab mus txog qab ntuj kawg.” 9 Thaum Yexus hais tej no tas mas lawv ntsia ntsoov nws ces Vajtswv txawm coj nws mus saum ntuj. Txawm muaj ib tauv huab los roos nws ces lawv tsis pom nws lawm. 10 Thaum lawv tseem tsa muag ntsia Yexus mus saum ntuj, txawm muaj ob tug txiv neej hnav tsoos dawb paug tshwm plaws ntawm lawv. 11 Nkawd hais tias, “Cov neeg Kalilais’e, nej tsa muag ntsia saum ntuj ua dab tsi? Yexus tus uas raug coj ntawm nej mus saum ntuj, thaum nws rov los* yuav zoo ib yam li thaum nej pom nws mus lawd thiab.”

12 Lawv mam nqes saum lub Roob Txiv Aulib rov los rau Yeluxalees. Lub roob ntawd tsuas nyob deb li ib kilumev* ntawm Yeluxalees xwb. 13 Thaum lawv los txog hauv nroog, lawv thiaj mus rau hauv lub tsev uas lawv so, thiab nce mus rau txheej tsev sab saud. Lawv cov ntawd yog Petus, Yauhas, Yakaunpaus thiab Anrus, Filis thiab Thaumas, Npathaulaumais thiab Mathais, Yakaunpaus uas yog Afe-as tus tub, thiab Ximoos tus uas kub siab, thiab Yudas uas yog Yakaunpaus tus tub. 14 Lawv sawv daws pheej tuaj ua ke koom ib lub siab thov Vajtswv tsis tseg. Kuj muaj ib co poj niam, thiab Maivliag uas yog Yexus niam thiab Yexus cov kwv nrog lawv koom thiab.

15 Muaj ib hnub thaum cov kwv tij tuaj thov Vajtswv ua ke, (muaj li 120 leej tuaj rau ntawd) Petus txawm sawv tsees hais tias, 16 “Cov kwv tij sawv daws, lub hwj huam dawb huv tau tshoov Daviv cev lus faj lem txog Yudas tus uas coj neeg mus ntes Yexus. Yeej yuav tsum muaj tiav raws li Vajtswv txoj lus tau hais tseg. 17 Rau qhov nws yeej yog ib tug hauv peb cov, thiab nws muaj feem ua tes hauj lwm no. 18 (Thaum kawg nws muab cov nyiaj ntiav nws ntxeev siab mus yuav ib thaj teb. Nws txawm poob taub hau ua ntej mus rau puag hauv pem teb ntsawm nws lub cev ua rau nws tej plab hnyuv paim tag. 19 Tej no nrov ncha mus txog txhua tus hauv Yeluxalees. Cov tib neeg thiaj muab daim teb ntawd hu ua Akhedamas ua lawv yam lus. Lo lus no txhais tias, “Teb Ntshav.”) 20 Twb muaj lus sau cia hauv phau Ntawv Nkauj tias, ‘Cia nws lub tsev nyob khoob ntshuv, thiab yuav tsis muaj leej twg nyob lawm’ thiab, ‘Cia lwm tus tuav nws tes hauj lwm.’* 21 Yog li ntawd, tsim nyog peb xaiv ib tug txiv neej uas ib txwm nrog nraim peb rau thaum tus Tswv Yexus ua nws tes hauj lwm hloov Yudas chaw. 22 Tus txiv neej no yuav tsum nrog nraim peb txij thaum Yauhas muab Yexus ua kev cai raus dej mus txog thaum Vajtswv coj Yexus mus saum ntuj. Tus txiv neej no yuav tsum nrog peb ua tim khawv pom Yexus sawv hauv qhov tuag rov los thiab.”

23 Cov thwj tim thiaj pom zoo muab ob tug txiv neej los rau sawv daws xaiv, ib tug yog Yauxej Npaxanpas uas kuj hu ua Yuxitas, thiab ib tug yog Mathias. 24 Lawv thiaj thov Vajtswv hais tias, “Vajtswv Yehauvas’e,* koj yeej paub txhua leej txhua tus lub siab. Thov koj pab saib ob tug txiv neej no seb tus twg yog tus uas koj pom zoo 25 hloov Yudas chaw los saib xyuas tes hauj lwm no thiab ua ib tug tub txib. Yudas tso tej no tseg mus ua ywj nws siab lawm.” 26 Lawv thiaj twv pov* seb tus twg yuav tau ua tes hauj lwm no. Thaum lawv rho tau Mathias ces thiaj muab nws ntxiv rau 11 tug tub txib.

2 Hnub uas tab tom ua Kev Cai Pheetekos,* cov thwj tim sawv daws tuaj ua ke rau hauv ib lub tsev. 2 Txawm muaj ib lub suab nrov nroo ntws saum ntuj los thoob plaws lub tsev yam nkaus li ib nthwv cua hlob heev. 3 Ua ciav lawv pom zoo li tej nplaim taws* tshwm plaws los faib pes rhe rau saum lawv txhua tus. 4 Lub hwj huam dawb huv thiaj los rau saum lawv txhua tus ces lawv txawm hais tau lwm yam lus raws li lub hwj huam ua rau lawv hais.

5 Thaum ntawd muaj cov Yudais uas hwm Vajtswv heev tuaj txhua lub teb chaws tuaj so hauv Yeluxalees. 6 Thaum sawv daws hnov lub suab nrov nroo ntws, muaj neeg coob coob txawm tuaj rau ntawm lub tsev seb muaj dab tsi. Ua ciav lawv hnov cov thwj tim hais tau lawv yam lus mas lawv xav tsis thoob li. 7 Lawv thiaj qhuas tias, “Cov no yog neeg Kalilais xwb los sad? 8 Ua cas peb ho hnov lawv hais tau peb yam lus thiab? 9 Peb cov no yog neeg Pathias, Medias, thiab Elas, thiab muaj cov nyob teb chaws Mexaupotamias, Yudias, Khapedaukias, Phauthias thiab xeev Axias* tuaj. 10 Lwm cov nyob teb chaws Fikias, Pafilias, Iyiv, thiab nyob koog Linpias ze Xailinis tuaj. Tseem muaj cov Yudais thiab lwm haiv neeg uas los coj Yudais tej kev cai uas tuaj hauv Loos tuaj. 11 Kuj muaj cov neeg Khetes, cov neeg Alanpias thiab. Peb kuj hnov lawv qhia Vajtswv tes hauj lwm zoo kawg nkaus ua peb yam lus tib si.” 12 Tej no ua rau sawv daws xav tsis thoob li, lawv thiaj sib nug zom zaws tias, “Ua cas ho muaj tau li no?” 13 Tiam sis muaj dua lwm cov ho thuam tias, “Cov niag ntawd qaug cawv* xwb.”

14 Tiam sis Petus sawv tsees nrog 11 tug tub txib hais nrov nrov rau sawv daws tias, “Ib tsoom neeg hauv Yudias thiab txhua tus uas nyob hauv Yeluxalees’e, peb xav kom nej paub txog tej no. Thov ua tib zoo mloog tej uas kuv yuav hais no. 15 Cov neeg no tsis qaug cawv li nej xav, rau qhov nyuam qhuav yog cuaj teev sawv ntxov xwb. 16 Tiam sis tej no muaj raws li Yau-ees tus uas cev Vajtswv lus tau hais tseg tias, 17 ‘Vajtswv hais tias, “Nyob rau tiam kawg, kuv yuav pub kuv lub hwj huam rau txhua hom neeg mas nej cov tub cov ntxhais yuav cev kuv tej lus. Nej cov tub hluas yuav ua yog toog thiab cov yawg laus yuav ua npau suav. 18 Thaum ntawd, kuv tej tub qhe ntxhais qhev los kuv yuav pub kuv lub hwj huam rau lawv mas lawv yuav cev kuv tej lus. 19 Kuv yuav ua txuj ci tshwm saum nruab ntug thiab ua txuj ci tshwm rau hauv ntiaj teb mas yuav muaj ntshav, muaj hluav taws, thiab muaj pa taws ncho auv niab. 20 Lub hnub yuav tsaus thiab lub hli yuav liab li ntshav ua ntej Vajtswv Yehauvas* hnub tseem ceeb ci ntsa iab los txog. 21 Thiab txhua tus uas tuav Vajtswv Yehauvas* lub npe thov yuav dim.”’

22 “Ib tsoom neeg Ixayees’e, ua tib zoo mloog cov lus no, Yexus tus neeg Naxales yog Vajtswv ua tus txib los. Peb yeej paub tseeb li no rau qhov Vajtswv pub hwj chim rau Yexus ua ntau yam txuj ci tseem ceeb tab meeg nej, ua rau sawv daws xav tsis thoob li. Nej yeej paub zoo txog tej no lawm. 23 Nej ntes tus txiv neej no thiab muab nws cob rau yeeb ncuab txhais tes. Qhov no yeej muaj raws li Vajtswv teem tseg, thiab Vajtswv twb paub tias nws yuav raug li cas. Thaum cov neeg lim hiam ntawd muab nws ntsia saum tus ncej ntoo,* twb yog nej tua nws ntag. 24 Tiam sis Vajtswv tsa nws ciaj sawv rov los uas yog tso nws dim txoj kev tuag, rau qhov txoj kev tuag tsis muaj hwj chim khi tau nws lawm. 25 Daviv twb hais txog nws li no, ‘Kuv yeej xav ntsoov txog Vajtswv Yehauvas.* Nws nyob rawv ntawm kuv sab xis, kuv thiaj nyob ruaj khov.* 26 Twb yog li ntawd, kuv lub siab thiaj kaj nrig thiab kuv lub ncauj thiaj hais tej lus zoo xyiv fab hlo. Kuv yuav nyob tso siab plhuav rau koj, 27 vim koj yeej tsis tso kuv* tseg rau hauv lub qhov tuag.* Koj yeej tsis cia tus uas muab siab npuab koj cev nqaij lwj. 28 Koj qhia txoj kev uas tau txoj sia rau kuv paub. Koj yuav ua rau kuv lub siab nyob kaj nrig hauv koj xub ntiag.’

29 “Ib tsoom kwv tij sawv daws, kuv hais tshab rau nej txog peb yawg koob Daviv. Thaum nws tuag, luag muab nws log. Nws lub ntxa tseem nyob los txog niaj hnub nim no. 30 Daviv yog ib tug cev Vajtswv lus thiab nws nco ntsoov Vajtswv lo lus cog tseg tias nws ib tug xeeb ntxwv yuav tau ua vaj ntxwv kav. 31 Daviv thiaj paub ua ntej tias Vajtswv yuav tsa tus Khetos ciaj sawv rov los, thiab qhia tias Vajtswv yeej yuav tsis tso Khetos tseg rau hauv lub qhov tuag,* thiab yuav tsis cia nws cev nqaij lwj. 32 Vajtswv twb tsa Yexus ciaj sawv rov los lawm tiag, peb sawv daws yeej ua tim khawv pom lawm. 33 Vajtswv tsa Yexus mus zaum ntawm Vajtswv sab xis, thiab nws txais lub hwj huam dawb huv uas Leej Txiv tau cog tseg lawd. Nim no Yexus pub* lub hwj huam ntawd rau peb, nej thiaj hnov thiab pom tej no. 34 Daviv yeej tsis tau mus saum ntuj, tiam sis nws hais hlo tias, ‘Vajtswv Yehauvas* hais rau kuv tus Tswv tias, “Los zaum ntawm kuv sab xis 35 mus txog thaum kuv muab koj cov yeeb ncuab rau koj tiag taw.”’ 36 Yog li ntawd, thov kom ib tsoom neeg Ixayees paub tseeb tias Yexus, tus uas nej muab tua rau saum tus ncej ntoo,* Vajtswv twb muab nws tsa ua tus Tswv thiab tus Khetos lawm.”

37 Thaum lawv hnov tej lus no ua rau lawv ntxhov siab heev. Lawv thiaj nug Petus thiab cov tub txib tias, “Cov kwv tij, peb yuav ua li cas?” 38 Petus thiaj teb lawv tias, “Yog nej xav kom Vajtswv zam nej lub txim, nej txhua tus yuav tsum hloov dua siab tshiab thiab tuav Yexus Khetos lub npe ua kev cai raus dej. Ces Vajtswv yuav muab lub hwj huam dawb huv pub* rau nej. 39 Rau qhov lub hwj huam no yog Vajtswv cog tseg rau nej thiab nej tej tub ki, thiab rau txhua tus uas nyob deb, thiab txhua tus uas peb tus Vajtswv Yehauvas* hu los cuag nws.” 40 Petus tseem hais ntau yam ntxiv los qhia tshab rau lawv, thiab nws txhawb kom lawv ua li no, “Cia li khiav kom dim tiam neeg siab nkhaus no.” 41 Yog li ntawd, txhua tus uas zoo siab hlo khaws Petus tej lus thiaj ua kev cai raus dej. Hnub ntawd muaj txog li 3,000 leej* los ntseeg ntxiv. 42 Lawv sawv daws thiaj kub siab lug tuaj mloog cov tub txib qhia, sib txhawb zog kom muaj kev sib raug zoo, noj haus ua ke, thiab thov Vajtswv tsis tseg.

43 Cov tub txib ua tau ntau yam txuj ci mas sawv daws* xav tsis thoob li thiab hwm* Vajtswv kawg nkaus. 44 Tag nrho cov uas los ntseeg tuaj ua ke thiab coj tej uas lawv muaj tuaj sib faib siv. 45 Lawv muab lawv tej teb tej av thiab tej qhov txhia chaw muag, thiab muab cov nyiaj faib rau sawv daws raws li lawv cheem tsum. 46 Lawv niaj hnub koom ib lub siab mus sib txoos ua ke hauv lub tuam tsev. Ib leeg kuj caw ib leeg mus noj mov tom lawv tej tsev thiab sib faib noj haus ua ke. Lawv yeej muaj lub siab dawb paug ua li no mas lawv xyiv fab kawg li. 47 Lawv niaj hnub qhuas Vajtswv, thiab ib tsoom neeg sawv daws txaus siab heev rau lawv. Tsis tas li ntawd xwb, Vajtswv Yehauvas* niaj hnub coj tib neeg los ntseeg coob zuj zus ntxiv thiaj cawm tau lawv dim.

3 Lub sij hawm thov Vajtswv thaum peb teev tav su, Petus thiab Yauhas nkawd mus rau hauv lub tuam tsev. 2 Muaj neeg kwv ib tug yawg uas mus tsis taus kev txij thaum yug los tuaj tso rau ntawd. Lawv niaj hnub coj nws tuaj tso rau ntawm lub rooj loog hu ua Zoo Nkauj, xwv nws thiaj tau thov khawv ntawm cov neeg uas tuaj mus hauv lub tuam tsev. 3 Thaum tus yawg ntawd pom Petus thiab Yauhas nkawd tuaj mus hauv lub tuam tsev ces nws txawm thov nkawd nyiaj. 4 Tiam sis Petus thiab Yauhas ntsia ntsoov nws thiab hais tias, “Cia li saib wb.” 5 Nws thiaj ntsia ntsoov nkawd thiab xav tias nkawd yuav muab dab tsi rau nws. 6 Tiam sis Petus txawm hais tias, “Nyiaj kub kuv tsis muaj, tiam sis kuv yuav pub yam uas kuv muaj rau koj. Kuv tuav Yexus Khetos uas yog tus neeg Naxales lub npe hais rau koj tias, cia li sawv tsees mus kev!” 7 Tam sim ntawd Petus tuav nkaus nws sab tes xis tsa nws sawv. Nws ob txhais ceg thiab tej pob qej txha cia li muaj zog khov kho tuaj. 8 Nws thiaj sawv tsees tam sid nrog nkawd taug kev mus hauv lub tuam tsev, thiab dhia paj paws qhuas Vajtswv. 9 Sawv daws pom nws qhuas Vajtswv taug kev los. 10 Lawv thiaj zeem tau tias nws yog tus yawg uas niaj hnub tuaj thov khawv ntawm lub rooj loog hu ua Zoo Nkauj hauv lub tuam tsev. Lawv zoo siab kawg uas nws mus taus kev lawm mas sawv daws xav tsis thoob li.

11 Thaum ntawd lawv nyob hauv Xalaumoos zaj qab khav ntawm lub tuam tsev. Tus yawg ntawd tseem tuav rawv Petus thiab Yauhas tes. Cov tib neeg thiaj sau nthwv los saib lawv thiab xav tsis thoob li. 12 Thaum Petus pom lawv ua li no, nws hais rau lawv tias, “Cov neeg Ixayees’e, ua cas tej no yuav ua rau nej xav tsis thoob li? Nej ntsia wb cuag li wb nim muaj hwj chim los yog npuab siab rau Vajtswv es thiaj kho tau tus yawg no mus taus kev. Tsis yog li ntawd. 13 Anplahas, Ixaj, thiab Yakhauj tus Vajtswv uas yog peb cov yawg koob tus Vajtswv twb pub nws tus Tub Txib Yexus tau koob meej lawm. Tus no yog tus uas nej muab cob rau luag txhais tes thiab tsis lees yuav nws tab meeg Philaj, txawm tias Philaj twb yuav muab nws tso. 14 Nej tsis kam lees yuav tus uas dawb huv thiab ncaj ncees, nej tseem thov kom Philaj tso ib tug yawg uas tua neeg los rau nej. 15 Nej ho muab tus Thawj* uas pub txoj sia tua pov tseg. Tiam sis Vajtswv twb tsa nws sawv hauv qhov tuag rov los lawm. Peb yeej ua tim khawv pom kiag. 16 Wb tuav Yexus lub npe thiab ntseeg nws,* thiaj pab tus yawg uas nej pom thiab paub no muaj zog npho tuaj. Twb yog vim wb ntseeg Yexus, tus yawg no thiaj zoo hlo tab meeg nej sawv daws. 17 Cov kwv tij, vim nej tsis paub, nej thiaj ua tau li ntawd lawm. Nej cov thawj coj los kuj tsis paub ib yam nkaus thiab. 18 Vajtswv cia kom muaj li no thiaj tiav raws li Vajtswv twb hais tseg lawm. Nws qhia rau cov cev lus ua ntej lawm tias tus Khetos* yuav raug tsim txom.

19 “Yog li ntawd, cia li hloov dua siab tshiab, Vajtswv thiaj zam* tau nej lub txim. Vajtswv Yehauvas* yuav pub nej nyob kaj siab lug 20 thiab yuav txib tus Khetos uas nws xaiv los pab nej, tus ntawd yog Yexus. 21 Yexus yuav tsum nyob saum ntuj tos txog lub sij hawm kho ib puas tsav yam dua tshiab. Thaum ub Vajtswv twb qhia tej no rau nws cov cev lus lawm. 22 Mauxes twb hais tseg lawm tias, ‘Yehauvas* uas yog nej tus Vajtswv yuav tsa nej haiv neeg ib tug los cev lus ib yam li kuv. Nws qhia li cas, nej yuav tsum mloog nws hais. 23 Yog leej twg* tsis kam mloog tus cev Vajtswv lus ntawd hais, nws yuav raug kev puas tsuaj.’ 24 Tag nrho cov cev Vajtswv lus, txij thaum Xamuyees nyob los, puav leej hais tshab txog tej* no lawm. 25 Nej yog cov cev Vajtswv lus tej xeeb ntxwv thiab lo lus cog tseg uas Vajtswv cog rau nej cov yawg koob yeej yog hais rau nej thiab. Vajtswv hais rau Anplahas tias, ‘Koj tus xeeb ntxwv yuav ua rau txhua haiv neeg* hauv ntiaj teb no tau koob hmoov.’ 26 Thaum Vajtswv xaiv nws tus Tub Txib,* Vajtswv xub txib nws los foom koob hmoov rau nej kom nej txhua tus thiaj tso nej tej kev phem tseg.”

4 Thaum Petus thiab Yauhas tseem qhia cov tib neeg mas cov pov thawj, tus thawj tub ceev xwm zov lub tuam tsev, thiab cov Xadukais txawm los rau ntawm nkawd. 2 Lawv chim heev rau ob tug tub txib ntawd vim nkawd tab tom qhia cov tib neeg thiab tshaj tawm tias Vajtswv twb tsa Yexus sawv hauv qhov tuag rov los lawm. 3 Lawv thiaj muab nkawd ntes kiag mus kaw ib hmos, rau qhov thaum ntawd twb tsaus ntuj lawm. 4 Tiam sis cov neeg uas mloog nkawd qhia los ntseeg coob heev, cov txiv neej thiaj muaj txog li 5,000 leej lawm.

5 Hnub tom qab ntawd, lawv cov thawj coj, cov txwj laus, thiab cov xib hwb* tuaj sab laj ua ke hauv Yeluxalees. 6 Tus pov thawj hlob Anas, Khayafas, Yauhas, Alexadaws, thiab tus pov thawj hlob cov txheeb ze puav leej tuaj rau ntawd thiab. 7 Lawv thiaj coj Petus thiab Yauhas nkawd los sawv tab meeg sawv daws thiab nug nkawd tias, “Leej twg pub hwj chim rau neb, thiab neb tuav leej twg npe ua tej no?” 8 Lub hwj huam dawb huv txawm ua rau Petus teb lawv tias,

“Nej cov thawj coj uas kav pej xeem thiab cov txwj laus’e, 9 hnub no nej coj wb tuaj ntawm no yog nej xav paub txog qhov uas wb tau pab tus yawg mus tsis taus kev. Thiab nej xav paub tseeb seb leej twg kho tau nws zoo lawm. 10 Kuv hais ncaj rau nej thiab ib tsoom neeg Ixayees sawv daws tias twb yog muaj Yexus Khetos uas yog tus neeg Naxales lub npe, tus yawg no thiaj zoo hlo los sawv tab meeg nej ntag. Nej muab Yexus ntsia rau saum tus ncej ntoo,* tiam sis Vajtswv twb tsa nws sawv hauv qhov tuag rov los lawm. 11 Yexus yog ‘lub pob zeb uas nej cov kws ua tsev saib tsis rau nqi, tiam sis twb muab teeb rau saum kaum tsev siab tshaj* lawm.’ 12 Yeej tsis muaj lwm tus yuav cawm tau tib neeg dim li lawm. Hauv lub qab ntuj no, yeej tsis muaj dua ib lub npe uas Vajtswv pub los cawm peb dim hlo li.”

13 Thaum cov thawj coj thiab cov txwj laus hnov Petus thiab Yauhas nkawd muaj lub siab tawv teb li no, ua rau lawv xav tsis thoob li, rau qhov Petus nkawd tsis tau kawm ntawv* thiab tsuas zoo li luag tej xwb. Lawv mam nco dheev tias nkawd twb nrog Yexus ua ke ntag. 14 Thaum ntawd tus yawg uas Petus nkawd kho zoo tab tom nrog nkawd sawv ua ke. Lawv ntsia ntsoov tus yawg ntawd mas lawv teb tsis taus ib los li. 15 Lawv thiaj ntiab nkawd thiab tus yawg ntawd tawm hauv lub tsev Xahenrees* mus. Lawv mam li sab laj 16 hais tias, “Peb yuav ua li cas rau ob tug neeg no? Qhov txuj ci uas nkawd ua no yeej tshwj xeeb heev. Tag nrho ib tsoom neeg hauv Yeluxalees twb paub lawm. Txawm peb tsis lees los yeej tsis tau li. 17 Cia peb hem kom nkawd ntshai, thiab txwv tu nrho tsis pub nkawd tuav Yexus lub npe qhia tib neeg lawm, zaj no thiaj tsis ncha ntxiv.”

18 Cov thawj coj thiab cov txwj laus thiaj hu nkawd rov los thiab txwv tu nrho kom nkawd tsis txhob hais txog thiab qhia txog Yexus lub npe ntxiv li lawm. 19 Tiam sis Petus thiab Yauhas teb tias, “Nej sim xav seb qhov twg haum Vajtswv siab, mloog nej lus los mloog Vajtswv lus? 20 Txawm li cas los, wb yeej yuav qhia tej uas wb tau pom thiab tau hnov lawd.” 21 Cov thawj coj thiab cov txwj laus thiaj rov hem nkawd thiab tso nkawd mus. Lawv tsis zoo rau txim rau nkawd vim lawv nrhiav tsis tau lus nkaug, thiab lawv kuj ntshai cov tib neeg rau qhov sawv daws tab tom qhuas Vajtswv txog tej uas nkawd tau ua. 22 Twb yog qhov txuj ci no, tus yawg ntawd thiaj zoo hlo. Nws twb muaj 40 tawm xyoo lawm.

23 Tom qab tso nkawd tawm, nkawd mus rau ntawm cov thwj tim thiab qhia tej uas cov pov thawj hlob thiab cov txwj laus tau hais rau nkawd. 24 Thaum lawv hnov tej no, lawv sawv daws koom ib lub siab tsa ncauj thov Vajtswv tias,

“Tus Tswv uas kav ib puas tsav yam, koj yog tus tsim lub ntuj, lub ntiaj teb, dej hiav txwv thiab txhua yam uas muaj nyob rau hauv. 25 Koj kom lub hwj huam dawb huv tshoov peb yawg koob Daviv uas yog koj tus tub qhe hais lawm tias, ‘Ua cas ib tsoom teb chaws ho npau taws ua luaj thiab ib tsoom neeg xav txog tej yam tsis muaj qab hau xwb? 26 Tej vaj ntxwv hauv ntiaj teb sawv tawm tsam thiab tej nom tswv sib sau ua ke los twv Vajtswv Yehauvas* thiab tus uas nws xaiv tseg.’ 27 Yeej muaj tseeb li no tiag, rau qhov Helauj thiab Phauthi-as Philaj tau nrog ib tsoom teb chaws thiab ib tsoom neeg Ixayees koom tes hauv lub nroog no los tawm tsam Yexus uas yog koj tus tub qhe dawb huv uas koj xaiv tseg. 28 Lawv ua txhua yam tiav raws li koj twb hais tseg lawd. Tej no muaj tshwm sim vim yog koj lub hwj chim* thiab koj tau teem tseg lawm. 29 Vajtswv Yehauvas* nim no thov koj pom txog tej uas lawv hem peb, thov pab kom koj cov tub qhe ua siab loj siab tawv tshaj tawm koj txoj lus tsis tseg. 30 Thov koj cev tes kho tib neeg tej mob thiab ua txuj ci tseem ceeb los ntawm Yexus uas yog koj tus tub qhe dawb huv lub npe.”

31 Thaum lawv taij thov Vajtswv tas, lub tsev uas lawv nyob ntawd txawm ua zog koog. Lub hwj huam dawb huv txawm los rau saum lawv txhua leej txhua tus, lawv thiaj ua taus siab loj siab tawv tshaj tawm Vajtswv txoj lus.

32 Tsis tas li ntawd xwb, cov neeg coob coob uas los ntseeg ntawd koom ua ib lub siab.* Tsis muaj ib tug hais tias nws tej qhov txhia chaw yog nws li ntiag tug. Tiam sis lawv muab lawv tej qhov txhia chaw los sib faib siv. 33 Cov tub txib niaj hnub ua tim khawv qhia tias Vajtswv twb tsa Tswv Yexus ciaj sawv rov los lawm. Lawv qhia muaj ceem kawg li mas Vajtswv foom koob hmoov nplua mias rau sawv daws. 34 Tsis muaj leej twg tu ncua ib yam dab tsi li. Cov uas muaj liaj muaj teb, muaj vaj muaj tsev kuj muab tej ntawd muag 35 thiab nqa cov nyiaj tuaj rau cov tub txib tuav.* Cov tub txib mam li muab faib rau cov uas cheem tsum. 36 Muaj ib tug yawg hu ua Yauxej uas cov tub txib muab hu ua Npananpas (lub npe ntawd txhais tias tus uas txhawb zog*). Nws yog ib tug Levis uas yug hauv Xaipas. 37 Nws muab nws daim teb muag thiab coj cov nyiaj tuaj rau cov tub txib tuav.*

5 Tiam sis muaj ib tug yawg hu ua Ananias, thiab nws tus poj niam hu ua Xafilas, nkawd tau muab nkawd ib thaj av muag. 2 Thaum nws nqa cov nyiaj tuaj rau cov tub txib tuav, nws muab ib txhia qee twj ywm tseg lawm. Nws tus poj niam kuj paub tias nws ua li ntawd. 3 Tiam sis Petus hais rau nws tias, “Ananias, ua cas koj yuav cia Xatas ntxias tau koj los dag lub hwj huam dawb huv? Koj twb muab cov nyiaj muag teb ib txhia khaws cia lawm sad? 4 Daim teb ntawd yeej yog koj li los tsis yog? Thaum koj muab muag lawd, koj yuav muab cov nyiaj siv ua dab tsi los nyob ntawm koj. Ua cas koj yuav muaj lub siab dag li no? Tsis yog koj dag tib neeg, tiam sis yog koj dag Vajtswv ntag.” 5 Thaum Ananias hnov dheev li no, nws txawm vau hlo tuag kiag tam sid. Txhua tus uas hnov txog zaj no thiaj ntshai kawg li. 6 Cov tub hluas txawm los muab ntaub qhwv nws thiab kwv nws coj mus faus lawm.

7 Kwv lam peb txoos teev tom qab ntawd Ananias tus poj niam txawm tuaj txog, tiam sis nws tsis paub txog qhov xwm no. 8 Petus hais rau nws tias, “Qhia kuv seb, puas yog neb muag daim teb tau npaum li ntawd xwb tiag?” Nws teb tias, “Yeej tau li ntawd xwb.” 9 Petus thiaj hais rau nws tias, “Ua cas neb yuav koom ib lub siab dag Vajtswv Yehauvas* lub hwj huam li no? Koj puas hnov cov neeg uas coj koj tus txiv mus faus los txog ntawm qhov rooj lawd? Zaum no lawv yuav kwv koj mus thiab.” 10 Tam sim ntawd, tus poj niam kuj vau hlo ntawm Petus ko taw tuag kiag lawm thiab. Thaum cov tub hluas los txog, ua ciav nws tuag lawm. Lawv thiaj kwv nws mus faus ntawm nws tus txiv ib sab. 11 Tag nrho lub koom txoos thiab txhua tus uas hnov txog zaj no thiaj ntshai kawg li.

12 Cov tub txib niaj hnub ua txuj ci tseem ceeb rau sawv daws pom mas lawv xav tsis thoob li, thiab lawv kuj tuaj sib ntsib ua ke hauv Xalaumoos zaj qab khav. 13 Txawm tsis muaj leej twg kav tuaj koom cov thwj tim los, cov tib neeg yeej qhuas lawv heev. 14 Thiab muaj tej poj niam txiv neej coob kawg li los ntseeg tus Tswv ntxiv. 15 Kuj muaj tib neeg coj cov uas muaj mob tuaj tso ntawm ntug kev loj, thiab muab txaj muab lev pua rau lawv pw qhov ntawd. Lawv vam tias thaum Petus dua kev tuaj mus, nws tus duab yuav roos cov neeg muaj mob thiab kho tau lawv zoo. 16 Tseem muaj neeg coob kawg li tuaj hauv tej nroog puag ncig Yeluxalees tuaj cuag cov tub txib. Lawv kwv tej neeg muaj mob thiab cov uas raug dab tsim txom tuaj mas cov tub txib kho tau lawv zoo tib si.

17 Tiam sis tus tuam pov thawj hlob thiab cov Xadukais uas nrog nws ua ib pab khib kawg li. 18 Lawv thiaj ntes kiag cov tub txib coj mus kaw hauv tsev loj cuj. 19 Tiam sis thaum ib tag hmo Vajtswv Yehauvas* tus tub txib saum ntuj txawm qhib lub qhov rooj tsev loj cuj thiab coj lawv tawm mus. Nws hais rau lawv tias, 20 “Cia li mus hauv lub tuam tsev thiab kav tsij qhia rau cov tib neeg tias yuav ua li cas thiaj tau txoj sia.” 21 Thaum lawv hnov li no ces kaj ntug plaws xwb lawv txawm mus tom lub tuam tsev thiab pib qhia sawv daws.

Thaum tus tuam pov thawj hlob thiab cov uas nrog nws ua ib pab tuaj txog, lawv hu lub rooj Xahenrees* tuaj sab laj ua ke. Lawv hu ib tsoom neeg Ixayees cov kev txwj laus neeg tuaj tib si. Thiab lawv txib tub ceev xwm mus tom tsev loj cuj mus coj cov tub txib tawm los rau lawv. 22 Tiam sis thaum cov tub ceev xwm mus txog tom tsev loj cuj ua ciav tsis pom cov tub txib nyob hauv. Lawv thiaj rov los qhia tias, 23 “Peb mus txog tod, lub tsev loj cuj tej qhov rooj kaw nti. Muaj neeg zov rawv qhov rooj, tiam sis thaum peb qhib qhov rooj mus txog hauv, tsis muaj leej twg li.” 24 Thaum tus thawj tub ceev xwm zov lub tuam tsev thiab cov pov thawj hlob hnov li ntawd, lawv xav tsis thoob thiab tsis paub xyov tseem yuav zoo li cas ntxiv. 25 Tiam sis muaj neeg tuaj qhia rau lawv tias, “Cov txiv neej uas nej muab ntes kaw lawd nyob hauv lub tuam tsev. Lawv tab tom qhia cov tib neeg.” 26 Tus thawj tub ceev xwm thiaj coj nws cov tub ceev xwm mus ntes lawv los. Tiam sis lawv tsis ua nruj ua tsiv rau cov tub txib rau qhov lawv ntshai tsam cov tib neeg xuas pob zeb ntaus lawv.

27 Cov tub ceev xwm thiaj coj cov tub txib los sawv tab meeg lub rooj Xahenrees.* Tus tuam pov thawj hlob txawm los nug lawv. 28 Nws hais tias, “Peb twb txwv tu nrho tsis pub nej tuav lub npe no* qhia. Ua cas nej txawm siv muab zaj no qhia thoob Yeluxalees lawm! Nej tseem muab lub txim tua tus neeg ntawd nog rau peb ris thiab.” 29 Petus thiab cov tub txib thiaj teb tias, “Tsim nyog peb mloog Vajtswv* lus dua li mloog neeg lus. 30 Nej yog cov uas tua Yexus thiab muab nws ntsia saum tus ncej ntoo.* Peb yawg koob tus Vajtswv twb tsa nws ciaj sawv rov los lawm. 31 Vajtswv twb tsa nws ua tus Thawj* thiab tus Cawm Seej nyob ntawm Vajtswv sab xis, kom ib tsoom neeg Ixayees hloov dua siab tshiab thiab kom Vajtswv zam lawv lub txim. 32 Peb yog cov uas pom tej no. Thiab lub hwj huam dawb huv uas Vajtswv pub rau cov mloog nws lus, pab kom peb ua tim khawv qhia tej no.”

33 Thaum lawv hnov li ntawd, lawv npau taws heev thiab xav muab cov tub txib tua kiag tam sid. 34 Tiam sis ib tug Falixais hu ua Kamali-ees txawm sawv tsees los hais lub rooj Xahenrees.* Nws yog ib tug xib hwb qhia txoj Kev Cai uas sawv daws hwm heev. Nws kom lawv coj cov tub txib tawm mus sab nraud ib pliag. 35 Nws txawm hais tias, “Ib tsoom neeg Ixayees, nej yuav tau ceev faj, txhob rawm ua li cas rau cov neeg no. 36 Thaum ub muaj ib tug yawg sawv tawm tsam nom tswv hu ua Thudas. Nws khav tias nws yog ib tug neeg tseem ceeb. Muaj li 400 leej txiv neej caum nws. Tiam sis tsis ntev xwb, luag muab nws tua pov tseg ces pab ntawd txawm tawg ua sab ua sua ploj tag lawm. 37 Tom qab no, lub sij hawm uas txheeb pej xeem, Yudas uas yog neeg Kalilais ho sawv tawm tsam nom tswv. Nws ntxias tau coob tus caum nws. Tiam sis luag kuj muab nws tua pov tseg ces pab uas raws nws ntawd kuj tawg ua sab ua sua lawm thiab. 38 Yog li ntawd, kuv hais rau nej tias, tsis txhob txwv cov neeg no, cia lawv ua lawv. Yog lub tswv yim thiab tes hauj lwm no yog neeg li xwb ces yeej yuav mus tsis taus. 39 Tiam sis yog Vajtswv kom lawv ua ces nej yuav tawm tsam tsis yeej lawv. Nyob tsam ho yog nej tawm tsam Vajtswv ntag.” 40 Lawv thiaj pom zoo ua raws li Kamali-ees hais. Lawv hu cov tub txib rov los thiab muab lawv nplawm. Lawv txwv tu nrho kom cov tub txib tsis txhob tuav Yexus lub npe qhia ntxiv lawm ces lawv mam tso cov tub txib mus.

41 Thaum cov tub txib tawm ntawm lub rooj Xahenrees* mus, lawv zoo siab xyiv fab kawg li rau qhov lawv tau txoj koob hmoov uas yog raug tsim txom vim tuav Yexus lub npe. 42 Lawv niaj hnub mus hauv lub tuam tsev thiab mus ib lub tsev rau ib lub, mas lawv qhia thiab tshaj tawm txoj xov zoo tsis tseg txog Yexus uas yog tus Khetos.

6 Thaum cov thwj tim coob zuj zus tuaj, cov uas hais lus Kilis txawm pib yws cov uas hais lus Henplais. Lawv yws tias thaum faib zaub faib mov, luag tsis faib rau lawv cov poj ntsuam uas hais lus Kilis. 2 Yog li ntawd, 12 tug tub txib thiaj hu tag nrho cov thwj tim tuaj txoos ua ke thiab hais tias, “Tsis tsim nyog peb tso tes hauj lwm qhia Vajtswv txoj lus es los faib zaub faib mov rau sawv daws. 3 Yog li ntawd, cia li xaiv xya tus txiv neej uas sawv daws hwm thiab muaj lub hwj huam thiab muaj tswv yim. Peb mam li tsa lawv los saib xyuas tes hauj lwm no. 4 Tiam sis ntawm peb mas, peb yuav rau siab thov Vajtswv thiab qhia Vajtswv txoj lus tsis tseg.” 5 Sawv daws txaus siab heev rau tej uas cov tub txib tau hais ntawd. Lawv thiaj xaiv Xatefanaus uas yog ib tug txiv neej muaj kev ntseeg heev thiab muaj lub hwj huam dawb huv. Lawv kuj xaiv Filis, Pakhaulas, Nikhanaus, Thimoos, Pamenas, thiab Nikhaulaus. Nikhaulaus yog lwm haiv neeg uas los coj cov Yudais txoj kev cai, nws nyob hauv Athi-aus tuaj. 6 Lawv mam li coj cov txiv neej no los rau ntawm cov tub txib. Ces cov tub txib thov Vajtswv thiab muab tes npuab lawv taub hau tsa lawv tuav hauj lwm.

7 Twb yog li ntawd, Vajtswv txoj lus thiaj nrov ncha mus mas cov thwj tim hauv Yeluxalees muaj coob zuj zus ntxiv tuaj. Kuj muaj cov pov thawj coob leej los ntseeg thiab.

8 Thaum ntawd Vajtswv nrog nraim Xatefanaus thiab pub hwj chim rau nws ua ntau yam txuj ci tseem ceeb mas tib neeg xav tsis thoob li. 9 Tiam sis muaj ib co tuaj hauv pawg hu ua Cov Ywj Pheej Lub Tsev Pe Hawm* sawv twv Xatefanaus. Kuj muaj ib co neeg Xailinis thiab Alexadias, thiab muaj neeg tuaj Xilixias thiab Axias* tuaj nrog Xatefanaus sib cam thiab. 10 Tiam sis lub hwj huam pab Xatefanaus ces nws muaj tswv yim teb heev, lawv thiaj cav tsis yeej nws. 11 Lawv txawm ntxias twj ywm ib co neeg los dag li no, “Peb hnov nws hais lus tuam mom Vajtswv thiab Mauxes.” 12 Ces lawv tshum cov tib neeg, cov txwj laus, thiab cov xib hwb* kom ua phem rau Xatefanaus. Lawv sawv daws txawm ua nruj ua tsiv tib tsaug ntes kiag nws coj mus rau ntawm lub rooj Xahenrees.* 13 Kuj muaj cov tim khawv cuav uas lawv coj tuaj dag tias, “Tus yawg no yeej hais lus tawm tsam Vajtswv lub tuam tsev thiab txoj Kev Cai tsis tseg li. 14 Peb yeej hnov tus yawg no hais tias, Yexus uas yog neeg Naxales yuav muab lub tuam tsev no rhuav pov tseg thiab yuav muab tej kev cai uas Mauxes muab rau peb ntxeev huv si.”

15 Cov hauv lub rooj Xahenrees* ntsia ntsoov Xatefanaus. Nws lub siab nyob tus yees mas nws lub ntsej muag zoo li ib tug tub txib saum ntuj.

7 Tus tuam pov thawj hlob nug tias, “Puas muaj li lawv hais ntawd?” 2 Xatefanaus teb tias, “Nej cov ua kwv ua tij thiab cov txiv tsev sawv daws, thov mloog kuv hais. Thaum peb yawg koob Anplahas tsis tau los rau hauv Halas thiab tseem nyob hauv Mexaupotamias, Vajtswv tus uas muaj hwj chim loj kawg nkaus twb tshwm rau nws lawm. 3 Nws hais rau Anplahas tias, ‘Tso koj lub teb chaws thiab tej kwv tij neej tsa tseg, mus rau lub teb chaws uas kuv yuav qhia koj.’ 4 Nws thiaj tawm hauv teb chaws Kheedias mus nyob rau lub nroog Halas. Thiab thaum nws txiv dua lawm, Vajtswv hais kom nws los nyob lub teb chaws uas nej tab tom nyob no ntag. 5 Lub sij hawm ntawd Vajtswv tseem tsis tau muab ib qho av luaj xib teg* rau Anplahas li. Tiam sis Vajtswv yeej cog lus rau nws lawm tias nws cov xeeb ntxwv yuav tau lub teb chaws no ua lawv tug. Thaum ntawd Anplahas twb tsis tau muaj ib tug tub ki li. 6 Tsis tas li ntawd, Vajtswv kuj qhia tias Anplahas cov xeeb ntxwv yuav mus nrog lwm haiv neeg nyob hauv luag teb luag chaw, thiab yuav ua luag qhev raug luag tsim txom 400 xyoo. 7 Vajtswv hais tias, ‘Kuv yuav txiav txim rau haiv neeg uas muab lawv ua qhev. Tom qab ntawd lawv yuav tawm hauv lub teb chaws ntawd mus thiab los pe hawm kuv hauv lub teb chaws no.’

8 “Vajtswv kuj nrog Anplahas sib cog lus ua kev cai txiav.* Thaum Anplahas yug tau Ixaj muaj yim hnub, nws muab Ixaj ua kev cai txiav. Thaum Ixaj yug tau Yakhauj ces Yakhauj ho yug tau 12 leeg tub los ua 12 xeem neeg. 9 Cov tub no khib Yauxej heev, lawv thiaj muab nws muag mus rau Iyiv teb chaws. Tiam sis Vajtswv nrog nraim nws. 10 Vajtswv cawm Yauxej dim txhua yam kev txom nyem uas nws raug. Thiab Vajtswv pub tswv yim rau Yauxej mas Falaus uas yog Iyiv tus vaj ntxwv thiaj txaus siab heev rau nws. Falaus thiaj tsa nws ua tus kav Iyiv teb chaws thiab tag nrho Falaus tej cuab txhiaj cuab tam. 11 Txawm muaj kev tshaib kev nqhis thoob Iyiv thiab Khana-as teb chaws. Lub caij ntawd muaj kev txom nyem loj kawg nkaus. Peb tej yawg koob nrhiav tsis tau noj tsis tau haus li. 12 Tiam sis Yakhauj hnov tias hauv Iyiv teb chaws muaj mov noj, nws thiaj txib peb cov yawg koob mus yuav mov nrad. Nov yog thawj zaug uas lawv mus. 13 Zaum ob uas lawv rov mus nrad, Yauxej mam li qhia rau nws cov kwv tij paub tias nws yog leej twg. Thaum ntawd Falaus thiaj paub txog Yauxej tsev neeg. 14 Yauxej thiaj xa xov mus kom nws txiv uas yog Yakhauj thiab tag nrho nws cuab kwv tij mus rau nram Iyiv. Yakhauj tsev neeg muaj 75 leeg.* 15 Yog li ntawd, Yakhauj thiaj mus rau Iyiv teb chaws. Nws thiab peb cov yawg koob puav leej tuag tas rau nrad. 16 Luag tau coj lawv tej pob txha los rau ntawm Sekhees thiab muab faus rau hauv lub qhov ntxa uas Anplahas muab nyiaj yuav ntawm Hamaus cov tub hauv Sekhees.

17 “Thaum yuav txog lub caij uas muaj tiav raws li Vajtswv cog tseg rau Anplahas, cov neeg Ixayees huam vam coob heev hauv Iyiv teb chaws. 18 Thaum ntawd muaj ib tug vaj ntxwv tshiab sawv kav Iyiv teb chaws. Tus no tsis paub txog Yauxej. 19 Nws ntaus tswv yim ua phem heev rau peb haiv neeg. Nws yuam cov txiv tsev muab lawv tej me nyuam mos liab pov tseg kom puas tsuaj mus. 20 Lub sij hawm ntawd txawm yug Mauxes mas nws muaj tsim heev.* Nws niam nws txiv tu nws tau peb lub hlis. 21 Thaum nws niam nws txiv muab nws tso pov tseg lawd, Falaus tus ntxhais thiaj khaws tau Mauxes coj mus tu ua nws tub. 22 Mauxes kawm txhij kawm txhua txog cov Iyiv tej txuj ci thiab kev txawj ntse. Mauxes tej lus muaj kuab kawg li thiab nws tes hauj lwm zoo heev.

23 “Thaum Mauxes muaj 40 xyoo, nws xav twj ywm hauv nruab siab tias nws yuav tau mus saib nws cov kwv tij Ixayees. 24 Mauxes pom ib tug Iyiv tab tom tsim txom ib tug Ixayees nws thiaj mus pab. Mauxes txawm muab tus Iyiv tua kiag pauj qhov uas nws ua lim hiam ntawd. 25 Mauxes vam tias nws cov kwv tij yuav pom qhov uas Vajtswv txib nws los cawm lawv, tiam sis lawv tsis pom li ntawd. 26 Hnub tom qab, Mauxes ho mus pom ob tug Ixayees tab tom sib ntaus. Nws thiaj cheem nkawd tias, ‘Neb twb yog kwv tij, ua cas neb tseem sib ntaus thiab?’ 27 Tus Ixayees uas tab tom ntaus nws tus kwv tij txawm thawb ntiag Mauxes thiab hais tias, ‘Leej twg tsa koj ua nom los txiav txim rau peb? 28 Koj yuav muab kuv tua pov tseg li tus Iyiv nag hmo thiab lod?’ 29 Thaum Mauxes hnov dheev li ntawd nws thiaj khiav tawm hauv Iyiv teb chaws mus nyob Midias teb chaws. Tom qab no nws mam muaj ob tug tub.

30 “Thaum dhau 40 lub xyoos lawd, ib tug tub txib saum ntuj los tshwm rau Mauxes hauv cov nplaim hluav taws uas cig lam lug ntawm ib tsob pos. Thaum ntawd nws nyob hauv teb chaws moj sab qhua ze lub Roob Xinais. 31 Thaum Mauxes pom li no nws xav tsis thoob li. Nws thiaj txav zog mus xauj seb yog dab tsi ces nws txawm hnov Vajtswv Yehauvas* lub suab hais tias, 32 ‘Kuv yog koj cov yawg koob tus Vajtswv uas yog Anplahas, Ixaj, thiab Yakhauj tus Vajtswv.’ Mauxes thiaj ntshai tshee hnyo tsis kav mus xauj ti lawm. 33 Vajtswv Yehauvas* hais rau nws tias, ‘Hle koj nkawm khau, rau qhov thaj chaw uas koj sawv no dawb huv. 34 Kuv twb pom kuv haiv neeg raug kev txom nyem hauv Iyiv teb chaws lawm. Kuv yeej hnov lawv lub suab ntsaj, yog li kuv yuav los cawm lawv. Nim no kuv yuav txib koj mus rau Iyiv teb chaws.’ 35 Mauxes yog tus uas lawv tsis kam lees yuav. Lawv cem tias, ‘Leej twg tsa koj ua nom los txiav txim rau peb?’ Tiam sis Vajtswv tus tub txib saum ntuj tshwm rau Mauxes hauv ib tsob pos, thiab txib nws mus ua tus thawj thiab tus cawm lawv dim ntag. 36 Mauxes yog tus coj peb cov yawg koob tawm hauv Iyiv teb chaws los. Nws ua ntau yam txuj ci hauv Iyiv teb chaws, ntawm dej Hiav Txwv Liab, thiab hauv teb chaws moj sab qhua tau 40 xyoo mas sawv daws xav tsis thoob li.

37 “Mauxes yog tus uas hais rau ib tsoom neeg Ixayees tias, ‘Vajtswv yuav xaiv nej cov kwv tij ib tug los cev Vajtswv lus rau nej ib yam li kuv.’ 38 Mauxes yog tus uas nrog ib tsoom neeg Ixayees hauv teb chaws moj sab qhua. Nws tau nrog tus tub txib saum ntuj hais lus saum Roob Xinais, thiab yog tus cev lus rau peb cov yawg koob. Vajtswv kuj muab nws tej lus uas cog ruaj khov cob rau Mauxes qhia peb. 39 Tiam sis peb tej yawg koob tsis kam mloog nws lus. Lawv muab nws xyeeb tseg thiab lawv lub siab fab fo rov mus rau Iyiv teb chaws. 40 Lawv thiaj hais rau Aloos tias, ‘Puab ib co mlom los coj peb kev. Mauxes yog tus coj peb tawm hauv Iyiv teb chaws los, tiam sis peb tsis paub xyov nws dua twg lawm.’ 41 Lawv thiaj puab ib tug thav nyuj thiab nqa khoom tuaj fij rau tus mlom ntawd. Lawv kuj ua ib roog noj ua kev zoo siab rau tej uas lawv txhais tes tsim. 42 Vajtswv thiaj tso lawv tseg thiab cia lawv mus teev txhua yam saum nruab ntug. Yeej muaj raws li cov cev Vajtswv lus sau tseg tias, ‘Ib tsoom neeg Ixayees’e, 40 lub xyoos uas nej nyob hauv teb chaws moj sab qhua, nej yeej tsis tau tua tsiaj thiab muab khoom fij rau kuv li los sad? 43 Tiam sis nej muab tus dab Maulej lub tsev ntaub thiab lub hnub qub uas nej txua rau tus dab Lefas, thiaj ib qho rau ib qho rau nej teev. Yog li ntawd, kuv yuav muab nej ntiab kom dhau plaws Npanpiloos mus.’

44 “Thaum peb cov yawg koob nyob hauv teb chaws moj sab qhua, lawv yeej muaj lub tsev ntaub.* Vajtswv tau sam hwm kom Mauxes ua lub tsev ntaub raws nkaus li tus qauv uas Vajtswv qhia rau nws. 45 Peb cov yawg koob thiaj tau lub tsev ntaub ntawd ua lawv tug. Thaum Yausuas coj lawv los rau hauv lwm haiv neeg lub teb chaws, lawv kwv lub tsev ntaub nrog lawv los. Vajtswv muab lwm haiv neeg ntiab tawm kom peb cov yawg koob tau nyob. Lub tsev ntaub thiaj nyob nov los txog ntua Daviv tiam. 46 Daviv ua haum Yakhauj tus Vajtswv siab, nws thiaj thov ua ib lub tsev* rau Vajtswv nyob. 47 Tiam sis Xalaumoos yog tus uas tau ua lub tsev* no rau Vajtswv. 48 Txawm li ntawd los, Vajtswv tus uas Loj Dua Ntais tsis nyob hauv tej tsev uas neeg txhais tes ua. Yeej muaj raws li tus cev Vajtswv lus hais tias, 49 ‘Vajtswv Yehauvas* hais li no, “Lub ntuj yog kuv lub rooj zaum, thiab lub ntiaj teb yog kuv lub rooj tiag taw. Nej yuav ua lub tsev zoo li cas rau kuv nyob? Kuv yuav nyob qhov twg? 50 Ib puas tsav yam yeej yog kuv txhais tes tsim huv tib si los tsis yog?”’

51 “Cov niag neeg tawv ncauj, nej lub siab lub ntsws thiab tej qhov ntsej kaw tas. Nej yeej tawm tsam lub hwj huam dawb huv tas zog. Nej tej yawg koob ua li cas ces nej ua ib yam li ntawd ntag. 52 Nej cov yawg koob tau tsim txom txhua tus cev Vajtswv lus. Cov neeg uas tshaj tawm tias tus ncaj ncees yuav tshwm los, lawv tseem muab tua pov tseg thiab. Nim no nej twb yog cov uas ntxeev siab thiab tua tus ntawd ntag. 53 Txawm Vajtswv kom cov tub txib saum ntuj muab txoj Kev Cai cob rau nej tuav los nej yeej tsis khaws li.”

54 Thaum lawv hnov li no, chob lawv siab heev lawv thiaj zim hniav zog rau Xatefanaus. 55 Tiam sis thaum Xatefanaus tsa muag ntsia saum ntuj, lub hwj huam dawb huv ua rau nws pom Vajtswv lub hwj chim ci ntsa iab thiab pom Yexus sawv ntawm Vajtswv sab xis. 56 Nws thiaj hais tias, “Saib maj! Kuv pom rooj ntug qhib plho thiab pom neeg Leej Tub sawv ntawm Vajtswv sab xis.” 57 Tam sim ntawd, cov tib neeg txawm qw nrov nrov, pos pob ntseg thiab los vij nkaus nws. 58 Lawv muab nws thawb pes ntiag mus sab nraum lub nroog thiab khaws pob zeb ntaus nws. Cov uas ua tim khawv nkaug nws muab lawv tej tsho sab nraud* hle tso ntawm ib tug hluas hu ua Xolaus ko taw. 59 Thaum lawv tab tom xuas pob zeb ntaus Xatefanaus, nws thov tias, “Tswv Yexus’e, kuv muab kuv txoj sia tso rau hauv koj txhais tes.” 60 Xatefanaus thiaj txhos caug ntua qw nrov nrov tias, “Vajtswv Yehauvas’e,* thov tsis txhob rau txim rau lawv.” Thaum nws hais li no tas nws txoj sia txawm tu nrho* lawm.

8 Xolaus kuj pom zoo lawv muab Xatefanaus tua thiab.

Txij hnub ntawd los lub koom txoos hauv Yeluxalees raug tsim txom loj kawg li. Sawv daws thiaj tawg ua sab ua sua thoob koog teb chaws Yudias thiab Xamalis, tsuas tshuav cov tub txib lawm xwb. 2 Tiam sis cov uas hwm Vajtswv coj Xatefanaus lub cev mus zais mas lawv quaj nws kawg li. 3 Lub sij hawm ntawd Xolaus txawm pib nrhiav kev los rhuav lub koom txoos. Nws txeem kiag ib lub tsev rau ib lub, ntes poj niam txiv neej huv si coj mus cob rau luag kaw hauv tsev loj cuj.

4 Tiam sis cov uas tawg ua sab ua sua mus thoob teb chaws. Lawv qhia txoj xov zoo uas yog Vajtswv txoj lus rau txhua qhov chaw uas lawv mus. 5 Filis txawm mus rau ib lub nroog hauv Xamalis mus qhia tib neeg txog tus Khetos. 6 Muaj neeg coob coob tuaj mloog tej uas Filis qhia thiab lawv pom tej txuj ci uas Filis ua mas lawv kub siab lug mloog. 7 Muaj coob leej ntau tus raug dab. Dab ua rau lawv quaj qw tawg ntho mam li tawm mus. Tsis tas li ntawd, muaj cov neeg tuag tes tuag taw thiab cov neeg ceg tawv tuaj rau nws kho mas lawv zoo huv si. 8 Twb yog li no, cov neeg hauv lub nroog thiaj muaj kev zoo siab xyiv fab kawg nkaus.

9 Hauv lub nroog ntawd muaj ib tug yawg hu ua Ximoos uas ib txwm txawj ua khawv koob yees siv. Cov neeg Xamalis thiaj xav tsis thoob li. Nws khav tias nws muaj hwj chim kawg li. 10 Txawm tus hlob tus yau los yeej kub siab lug mloog nws qhia thiab qhuas tias, “Tus yawg no muaj Vajtswv lub hwj chim loj kawg nkaus.” 11 Cov tib neeg pom nws ua yees siv li ntawd tau ib ntus mas lawv xav tsis thoob li, lawv thiaj caum nws. 12 Thaum Filis tshaj tawm txoj xov zoo txog Vajtswv txoj kev kav* thiab Yexus Khetos lub npe, muaj cov poj niam txiv neej los ntseeg thiab ua kev cai raus dej tib si. 13 Ximoos kuj los ntseeg thiab. Tom qab nws ua kev cai raus dej, nws nrog nraim Filis thiab nws xav tsis thoob rau tej txuj ci thiab tes hauj lwm loj kawg nkaus uas Filis tau ua.

14 Thaum cov tub txib hauv Yeluxalees hnov tias cov neeg hauv Xamalis los ntseeg Vajtswv txoj lus lawm, lawv thiaj txib Petus thiab Yauhas nkawd mus saib lawv. 15 Nkawd mus thov Vajtswv pub lub hwj huam dawb huv rau lawv. 16 Thaum ntawd lawv tsuas txais yuav tus Tswv Yexus ua kev cai raus dej xwb, tiam sis tsis tau muaj ib tug txais lub hwj huam dawb huv li. 17 Petus thiab Yauhas nkawd thiaj tsa tes npuab lawv ces lawv mam li tau txais lub hwj huam dawb huv.

18 Thaum Ximoos pom tias ob tug tub txib tsa tes npuab lawv ces lawv tau txais lub hwj huam, nws txawm rho nyiaj los cev rau nkawd thiab 19 hais tias, “Thov pub lub hwj chim no rau kuv thiab, kom kuv tsa tes npuab leej twg los tus ntawd tau txais lub hwj huam dawb huv.” 20 Tiam sis Petus teb ntua tias, “Koj yuav nrog koj cov nyiaj puas tsuaj ua ke, vim koj xav tias koj muab nyiaj yuav tau yam uas Vajtswv pub dawb. 21 Koj yuav tsis muaj feem ua tes hauj lwm no rau qhov Vajtswv paub tias koj muaj lub siab nkhaus. 22 Cia li hloov dua siab tshiab, tso koj tej kev phem kod tseg. Kav tsij taij thov Vajtswv Yehauvas* saib nws puas yuav zam tej uas koj xav phem hauv nruab siab. 23 Kuv paub tias muaj taug* puv nkaus koj lub siab, thiab kev txhaum twb muab koj khi cia lawm.” 24 Ximoos thiaj teb tias, “Thov neb taij thov Vajtswv Yehauvas* pab kom kuv tsis txhob raug tej uas neb hais ko.”

25 Nkawd tshaj tawm Vajtswv Yehauvas* txoj lus thiab ua tim khawv thoob koog ntawd. Nkawd mam sawv kev rov mus rau Yeluxalees. Thaum nkawd rov mus, nkawd kuj tshaj tawm txoj xov zoo rau cov neeg Xamalis ntau lub zej zog thiab.

26 Tiam sis Vajtswv Yehauvas* tus tub txib saum ntuj hais rau Filis tias, “Cia li sawv tsees mus nram qab teb, mus taug txoj kev uas tawm hauv Yeluxalees mus nram lub nroog Kaxas.” (Nov yog ib txoj kev hla moj sab qhua.) 27 Filis thiaj sawv tsees mus. Ua ciav nws mus pom ib tug nom* Ethi-aupias uas tuav hauj lwm tseem ceeb rau tus poj vaj Ethi-aupias hu ua Khadakes. Nws yog tus saib xyuas poj vaj lub txhab nyiaj tas nrho. Nws nyuam qhuav mus pe hawm Vajtswv pem Yeluxalees 28 rov los. Nws caij tsheb nees los thiab tab tom nyeem tej lus uas tus cev Vajtswv lus Yaxayas sau tseg. 29 Lub hwj huam txhib Filis tias, “Cia li mus rau ntawm lub tsheb nees.” 30 Filis thiaj dhia ntawm ib sab lub tsheb nees mus thiab hnov tus nom tab tom nyeem tej lus uas tus cev Vajtswv lus Yaxayas tau sau. Filis nug nws tias, “Koj puas nkag siab tej uas koj nyeem kod?” 31 Nws teb tias, “Yog tsis muaj tus qhia, kuv yuav ua li cas nkag siab?” Nws thiaj kom Filis nce tsheb nees nrog nws mus. 32 Nws tab tom nyeem cov nqe no, “Luag cab nws mus tua ib yam li tus yaj. Tus me nyuam yaj tsis ua suab nrov thaum luag txiav plaub li cas, nws kuj tsis qhib ncauj hais ib los li thiab. 33 Luag rhuav nws ntsej muag thiab ua tsis ncaj rau nws. Vim nws tsis muaj txoj sia nyob hauv ntiaj teb no lawm, leej twg yuav taug nws tus caj ces?”

34 Tus nom thiaj hais rau Filis tias, “Thov qhia kuv seb, tus cev Vajtswv lus hais txog leej twg? Nws hais txog nws tus kheej, los yog lwm tus?” 35 Filis thiaj pib txhais zaj no thiab qhia txoj xov zoo txog Yexus rau nws. 36 Thaum nkawd los txog ntawm ib qho chaw muaj dej, tus nom txawm hais tias, “Saib maj! Muaj dej nyob ntawd, ua cas kuv ho yuav tsis ua kev cai raus dej?” 37* —— 38 Tus nom thiaj kom lub tsheb nees nres. Nkawd txawm nqes mus rau hauv dej, Filis thiaj nws muab tus nom ua kev cai raus dej. 39 Thaum tus nom tawm hauv dej los, Vajtswv Yehauvas* lub hwj huam coj kiag Filis mus rau lwm qhov. Nws thiaj tsis pom Filis nyob qhov twg li lawm. Tiam sis tus nom mus tsev zoo siab xyiv fab hlo. 40 Filis ho mus rau lub nroog Axautos. Nws tshaj tawm txoj xov zoo thoob koog ntawd thiab qhia ib lub nroog rau ib lub mus txog ntua Xixalias.

9 Xolaus tseem nrhiav nrhw kev los tua tus Tswv cov thwj tim. Nws thiaj mus cuag tus tuam pov thawj hlob 2 thiab mus thov kom tus tuam pov thawj hlob ua ntawv rau nws nqa mus qhia rau cov tsev pe hawm hauv Damaxakas. Ua li no, nws thiaj muaj cai ntes cov uas coj tus Tswv Txoj Kev Cai, tsis hais poj niam txiv neej cab los rau hauv Yeluxalees.

3 Thaum Xolaus mus yuav txog Damaxakas, txawm muaj duab ci ntsa iab saum ntuj tuaj laum nkaus nws. 4 Nws thiaj vau hlo hauv pem teb thiab hnov ib lub suab hais tias, “Xolaus’os, Xolaus’e, koj tsim txom kuv ua dab tsi?” 5 Nws thiaj nug tias, “Tus Tswv, koj yog leej twg?” Lub suab ntawd teb tias, “Kuv yog Yexus, tus uas koj tsim txom ntag. 6 Cia li sawv tsees mus rau hauv nroog, luag mam qhia koj seb koj yuav ua dab tsi.” 7 Cov txiv neej uas nrog Xolaus ua ke yoob tas hais tsis taus ib los li, vim lawv hnov lub suab hais lus tiam sis tsis pom leej twg li. 8 Thaum Xolaus sawv los, nws rua hlo qhov muag tiam sis ua cas nws tsis pom kev lawm. Lawv thiaj tuav nws tes coj nws mus rau hauv Damaxakas. 9 Nws tsis pom kev tau peb hnub nkaus thiab nws tsis noj tsis haus ib yam dab tsi li.

10 Muaj ib tug thwj tim hauv Damaxakas hu ua Ananias. Tus Tswv ua yog toog rau nws thiab hais tias, “Ananias’e!” Nws teb tias, “Tus Tswv, kuv nyob ntawm no.” 11 Tus Tswv hais rau nws tias, “Cia li sawv tsees mus rau txoj kev hu ua Ncaj mas koj yuav pom ib tug yawg hauv Yudas tsev hu ua Xolaus uas yog neeg Thaxas. Nws tab tom thov Vajtswv 12 thiab nws twb ua yog toog pom kiag koj Ananias, mus saib nws thiab tsa tes npuab nws, kho nws rov pom kev.” 13 Tiam sis Ananias teb tias, “Tus Tswv, kuv twb hnov txog tus yawg ntawd lawm. Nws ua lim hiam kawg li rau koj cov tib neeg* hauv Yeluxalees. 14 Cov pov thawj hlob tseem tso cai rau nws ntes txhua tus uas tuav koj lub npe thov.” 15 Tiam sis tus Tswv hais rau nws tias, “Cia li mus xwb! Kuv twb xaiv nws los ua tus sawv cev rau kuv lawm. Nws yuav qhia kuv lub npe rau lwm haiv neeg, rau tej vaj ntxwv, thiab rau ib tsoom neeg Ixayees. 16 Kuv yuav qhia meej rau nws tias, nws yuav raug kev txom nyem npaum li cas vim nws tuav kuv lub npe.”

17 Ananias thiaj sawv kev mus rau lub tsev ntawd. Thaum nws mus txog, nws tsa tes npuab Xolaus thiab hais tias, “Kwv tij Xolaus’e, thaum koj tab tom tuaj, tus Tswv Yexus twb tshwm rau koj pom ntawm ib tog kev lawm. Nws yog tus txib kuv tuaj pab kom koj rov pom kev thiab tau txais lub hwj huam dawb huv.” 18 Tam sim ntawd txawm muaj ib yam zoo li nplai ntses poob ntawm Xolaus qhov muag los ces nws rov pom kev lawm. Nws thiaj sawv tsees ua kev cai raus dej. 19 Nws mam li noj mov thiab rov muaj zog tuaj.

Xolaus nrog cov thwj tim hauv Damaxakas nyob tau ob peb hnub ntxiv 20 thiab txawm pib tshaj tawm hauv tej tsev pe hawm tias Yexus yog Vajtswv tus Tub. 21 Cov uas hnov Xolaus qhia xav tsis thoob li thiab hais tias, “Tus yawg no twb yog tus tsim txom cov uas tuav Yexus lub npe hauv Yeluxalees los tsis yog? Nws tuaj hauv no twb yog nws tuaj ntes lawv mus rau cov pov thawj hlob los sad.” 22 Tiam sis Xolaus haj yam txawj qhia zuj zus tuaj xwb. Nws piav tau tshab tshab tias Yexus yeej yog tus Khetos mas ua rau cov Yudais hauv Damaxakas tsis muaj lus teb li lawm.

23 Thaum Xolaus ua li ntawd tau ib ntus, cov Yudais txawm tuav tswv yim yuav muab nws tua pov tseg. 24 Tiam sis Xolaus twb hnov txog tej uas lawv xav ua ntawd lawm. Lawv zov rawv cov rooj loog nruab hnub hmo ntuj, nrhiav kev nrhw muab nws tua pov tseg. 25 Muaj ib hmos Xolaus cov thwj tim thiaj muab nws tso hauv ib lub pob tawb dauv ntawm qhov rais mus sab nraud tus ntsa loog.

26 Thaum Xolaus mus txog hauv Yeluxalees nws xav mus koom cov thwj tim. Tiam sis sawv daws ntshai nws heev vim lawv tsis ntseeg tias nws yog Yexus ib tug thwj tim. 27 Yog li ntawd, Npananpas thiaj los pab daws Xolaus zaj thiab coj nws mus cuag cov tub txib. Npananpas mam li qhia meej rau lawv tias tus Tswv twb tshwm rau Xolaus pom ntawm ib tog kev thiab nrog nws tham lawm. Tsis tas li ntawd, Xolaus kuj ua siab tawv qhawv tshaj tawm Yexus lub npe hauv Damaxakas thiab. 28 Tom qab ntawd, Xolaus thiaj tau nrog lawv nyob thiab nws mus txhua qhov hauv Yeluxalees. Nws muaj lub siab tawv qhawv tshaj tawm tus Tswv lub npe rau sawv daws. 29 Nws kuj mus xyuas cov Yudais uas hais lus Kilis thiab nrog lawv sib cam mas lawv thiaj nrhiav kev muab nws tua ob peb zaug. 30 Thaum cov kwv tij hnov zaj no, lawv thiaj coj Xolaus mus rau Xixalias thiab xa nws mus rau lub nroog Thaxas lawm.

31 Txawm muaj ib lub caij uas tag nrho cov koom txoos hauv Yudias, Kalilais, thiab Xamalis tau nyob kaj siab lug. Tsis muaj tus tawm tsam lawv mas sawv daws ib leeg txhawb ib leeg lub zog. Lawv puav leej paub ntshai Vajtswv Yehauvas* thiab lub hwj huam dawb huv txhawb lawv tas zog mas lawv huam vam coob kawg li.

32 Lub sij hawm uas Petus mus ncig xyuas tag nrho cheeb tsam ntawd, nws kuj los saib cov thwj tim* hauv lub nroog Lidas. 33 Hauv lub nroog ntawd Petus mus ntsib ib tug yawg hu ua Ane-as uas tuag tes tuag taw pw tau yim lub xyoos. 34 Petus hais rau nws tias, “Ane-as, Yexus Khetos kho koj zoo. Cia li sawv tsees los pua koj lub txaj.” Nws txawm sawv tsees tam sid. 35 Thaum cov uas nyob hauv Lidas thiab hauv lub tiaj Saloos pom nws zoo lawm, lawv txawm los ntseeg tus Tswv.

36 Thaum ntawd hauv lub nroog Yaupas muaj ib tug thwj tim hu ua Thanpitas. Nws lub npe txhais ua lus Kilis yog “Daukhas.”* Nws yog ib tug poj niam uas ua ntau yam hauj lwm zoo thiab muaj lub siab dawb pub rau cov txom nyem. 37 Tiam sis muaj ib hnub nws mob hnyav heev ces nws txawm tuag lawm. Lawv muab nws lub cev ntxuav thiab tso nws pw hauv chav tsev txheej saud. 38 Lub nroog Lidas nyob tsis deb ntawm Yaupas. Thaum cov thwj tim hnov tias Petus tuaj txog Lidas, lawv thiaj txib ob tug txiv neej mus thov Petus tias, “Thov mus saib peb tam sim no.” 39 Petus thiaj sawv tsees nrog nkawd mus. Thaum Petus mus txog hauv Yaupas, lawv coj nws mus rau chav tsev txheej sab saud. Tag nrho cov poj ntsuam txawm los quaj zom zaws rau Petus. Lawv muab tej tsho thiab tej khaub ncaws uas Daukhas xaws pub rau lawv thaum nws tseem muaj txoj sia nyob thau los rau Petus saib. 40 Petus kom sawv daws tawm mus sab nraud ces nws txawm txhos caug thov Vajtswv. Nws mam tig los saib lub cev tuag thiab hais tias, “Thanpitas, cia li sawv tsees!” Thanpitas txawm rua hlo qhov muag mas thaum nws pom dheev Petus, nws sawv tsees los zaum. 41 Petus tuav nkaus nws tes tsa nws sawv. Petus mam li hu cov thwj tim* thiab cov poj ntsuam los mas lawv pom tias Thanpitas rov ciaj sia lawm. 42 Zaj no nrov ncha mus thoob plaws hauv Yaupas mas coob tus los ntseeg tus Tswv. 43 Petus thiaj nrog Ximoos nyob ib ntus hauv Yaupas. Ximoos yog ib tug kws luam tawv tsiaj.

10 Thaum ntawd muaj ib tug yawg hauv Xixalias hu ua Khaunelias. Nws yog ib tug thawj tub rog saib pab tub rog Italis uas muaj 100 leej. 2 Khaunelias thiab nws tsev neeg puav leej ntseeg thiab hwm Vajtswv heev. Nws muaj lub siab dawb pub rau cov txom nyem thiab niaj hnub taij thov Vajtswv tsis tseg. 3 Kwv lam peb teev tav su, Khaunelias ua yog toog pom Vajtswv ib tug tub txib saum ntuj los kiag rau ntawm nws thiab hais tias, “Khaunelias’e!” 4 Mas Khaunelias ntshai kawg li. Nws saib ntsoov tus tub txib saum ntuj thiab hais tias, “Tus Tswv, koj xav kom kuv ua dab tsi?” Nws teb tias, “Vajtswv twb hnov koj tej lus thov lawm thiab twb pom qhov uas koj muaj lub siab dawb pub rau cov txom nyem. 5 Kav tsij txib neeg mus hauv lub nroog Yaupas mus hu Ximoos uas muaj dua ib lub npe hu ua Petus tuaj ntawm no. 6 Petus tab tom so hauv Ximoos uas yog tus kws luam tawv tsiaj lub tsev uas nyob ntawm ntug hiav txwv.” 7 Thaum tus tub txib saum ntuj ncaim nws lawm, Khaunelias txawm hu nws ob tug tub qhe thiab ib tug tub rog los cuag nws. Tus tub rog ntawd yog Khaunelias ib tug tub txib uas ntseeg Vajtswv heev. 8 Khaunelias qhia txhua yam uas tus tub txib saum ntuj tau hais, nws mam txib lawv mus rau Yaupas.

9 Hnub tom qab ntawd, thaum lawv mus yuav txog lub nroog, Petus nce mus thov Vajtswv saum txheej tsev las tshav, kwv lam 12 teev tav su. 10 Petus txawm hnov plab tshaib thiab xav noj mov. Thaum lawv tab tom ua su, nws looj hlias ua yog toog 11 pom lub ntuj qhib plho. Muaj ib yam zoo li ib daim ntaub dav dav uas khi plaub ceg kaum tso saum ntuj los rau hauv ntiaj teb. 12 Muaj ntau hom tsiaj, tsis hais tej uas muaj plaub txhais tes taw, tej nab thiab nab qa,* thiab tej noog saum nruab ntug nyob rau hauv. 13 Txawm muaj ib lub suab hais rau nws tias, “Petus! Sawv tsees muab tua noj!” 14 Tiam sis Petus teb tias, “Tus Tswv, noj tsis tau. Kuv ib txwm tsis noj tej tsiaj uas qias tsis huv li no.” 15 Nws hnov lub suab hais zaum ob tuaj tias, “Yam uas Vajtswv muab ntxuav dawb huv lawd, koj tsis txhob hais tias qias.” 16 Nws rov hnov lub suab hais zaum peb tas ces tej uas Petus pom ntawd cia li rov nkaum mus saum ntuj lawm.

17 Thaum Petus tseem xav mus xav los seb zaj yog toog ntawd txhais li cas, cov txiv neej uas Khaunelias txib tuaj twb nrhiav tau Ximoos lub tsev thiab tuaj txog ntawm rooj loog lawm. 18 Lawv thiaj hu seb Ximoos Petus puas so hauv lub tsev ntawd. 19 Thaum Petus tseem tab tom xav txog zaj yog toog, lub hwj huam txhib nws tias, “Muaj peb tug txiv neej tuaj nrhiav koj. 20 Cia li sawv tsees nqes lawm sab hauv thiab nrog lawv mus. Txhob poob siab, twb yog kuv txib lawv tuaj.” 21 Petus thiaj nqes mus nrog cov txiv neej ntawd tham. Nws hais tias, “Kuv yog tus uas nej tuaj nrhiav. Nej tuaj ua dab tsi?” 22 Lawv teb tias, “Tus thawj tub rog Khaunelias yog ib tug neeg ncaj ncees uas hwm Vajtswv heev. Ib tsoom neeg Yudais yeej qhuas nws. Vajtswv kom ib tug tub txib saum ntuj tshwm rau Khaunelias thiab kom nws hu koj mus tom nws tsev. Nws xav paub txog tej uas koj qhia.” 23 Petus thiaj hu lawv los so ib hmos hauv tsev.

Hnub tom qab Petus mam sawv kev nrog lawv mus. Muaj ib co kwv tij hauv Yaupas kuj nrog nws mus thiab. 24 Hnub tom qab ntawd, lawv mam mus txog hauv Xixalias. Khaunelias tos ntsoov lawv thiab nws twb hu tej kwv tij neej tsa thiab tej phooj ywg zoo tuaj tos hauv nws tsev lawm. 25 Thaum Petus los hauv tsev, Khaunelias tos txais nws thiab txhos caug ntua khwb nkaus ntawm Petus ko taw hawm nws. 26 Tiam sis Petus tuav nkaus nws thiab hais tias, “Sawv tsees, kuv yog tib neeg thiab xwb.” 27 Thaum Petus nrog Khaunelias tham thiab nkawd mus rau hauv tsev, ua ciav twb muaj neeg coob heev tuaj tos nws lawm. 28 Petus hais rau sawv daws tias, “Nej yeej paub li no, Yudais kev cai txwv tsis pub ib tug Yudais mus nrog lwm haiv neeg hais lus los sis nrog lawv ua ke. Tiam sis Vajtswv twb qhia rau kuv lawm tias kuv yuav tsum tsis txhob saib ib tug twg qias tsis huv. 29 Twb yog li ntawd thaum lawv tuaj hu kuv mas kuv thiaj nrog lawv tuaj tsis yig li. Ua li, nej hu kuv tuaj ua dab tsi?”

30 Khaunelias teb tias, “Plaub hnub dhau los, kuv tab tom thov Vajtswv tib lub caij peb teev hnub qaij li no. Txawm muaj ib tug txiv neej hnav khaub ncaws dawb paug tshwm ntawm kuv xub ntiag. 31 Nws hais rau kuv tias, ‘Khaunelias’e, Vajtswv twb hnov koj tej lus thov lawm thiab twb pom qhov uas koj muaj lub siab dawb pub rau cov txom nyem. 32 Yog li ntawd, cia li txib neeg mus rau lub nroog Yaupas thiab hu Ximoos uas kuj hu ua Petus tuaj. Nws tab tom so hauv Ximoos uas yog tus kws luam tawv tsiaj lub tsev, nyob ntawm ntug hiav txwv.’ 33 Kuv thiaj txib neeg tuaj hu koj tam sid. Ua tsaug uas koj tseem zoo siab hlo tuaj thiab. Peb sawv daws tuaj hnub no tab meeg Vajtswv, tos mloog tej uas Vajtswv Yehauvas* sam hwm kom koj qhia peb.”

34 Petus txawm pib qhia tias, “Nim no kuv paub tseeb lawm tias Vajtswv tsis xaiv leej twg ntsej muag. 35 Txawm haiv neeg twg los xij, tus uas hwm Vajtswv thiab ua ncaj ua ncees, Vajtswv yeej txais yuav tus ntawd. 36 Vajtswv tau qhia ib txoj xov zoo rau ib tsoom neeg Ixayees tias, lawv yuav tau nrog Vajtswv sib raug zoo vim muaj Yexus Khetos. Tus Yexus no yog sawv daws tus Tswv. 37 Nej yeej paub zaj uas sawv daws tham txog tom qab Yauhas tshaj tawm kom ua kev cai raus dej. Luag pib tham txog zaj no hauv Kalilais, mam li ncha mus thoob plaws Yudias. 38 Zaj no yog hais txog Yexus uas nyob hauv Naxales tuaj. Vajtswv tau xaiv nws ua tus Mexiyas thiab pub lub hwj huam dawb huv thiab pub hwj chim rau nws. Yexus thiaj mus thoob teb chaws ua ntau yam hauj lwm zoo thiab kho cov neeg uas raug Dab Ntxwg Nyoog tsim txom, rau qhov Vajtswv nrog nraim nws. 39 Peb cov no yeej ua tim khawv pom txhua yam uas nws tau ua hauv cov Yudais lub teb chaws thiab hauv Yeluxalees. Tiam sis lawv muab nws dai saum tus ncej ntoo,* nws thiaj tuag lawm. 40 Peb hnub tom qab xwb, Vajtswv twb tsa nws sawv hauv qhov tuag rov los lawm thiab cia nws los tshwm rau neeg pom. 41 Tsis yog tshwm rau txhua tus pom. Tsuas yog peb cov uas tau nrog nws noj haus ua ke tom qab nws sawv rov los thiaj pom xwb. Vajtswv xaiv peb ua ntej los ua tim khawv pom nws thiab qhia txog nws. 42 Yexus sam hwm kom peb mus tshaj tawm rau tib neeg thiab ua tim khawv qhia meej tias nws yog tus uas Vajtswv tau tsa los ua tus txiav txim rau cov ciaj thiab cov tuag. 43 Nws yog tus uas tag nrho cov cev Vajtswv lus ua tim khawv txog. Lawv qhia tias vim nws lub npe, Vajtswv thiaj zam txim rau txhua tus uas ntseeg nws.”

44 Thaum Petus tseem tab tom qhia, lub hwj huam dawb huv txawm los rau txhua tus uas mloog tej lus ntawd. 45 Cov ntseeg uas twb ua kev cai txiav* uas nrog Petus tuaj ntawd xav tsis thoob li, rau qhov lwm haiv neeg kuj tau txais lub hwj huam dawb huv uas Vajtswv pub dawb lawm thiab. 46 Lawv hnov sawv daws hais tau lwm yam lus thiab qhuas Vajtswv. Petus thiaj hais tias, 47 “Cov neeg no twb tau txais lub hwj huam dawb huv ib yam li peb lawm. Leej twg tseem yuav txwv tsis pub lawv ua kev cai raus dej?” 48 Nws thiaj kom lawv ua kev cai raus dej qhia tias lawv txais yuav Yexus Khetos. Lawv thov kom Petus nrog lawv nyob ob peb hnub.

11 Cov tub txib thiab cov kwv tij hauv Yudias hnov tias lwm haiv neeg kuj los ntseeg Vajtswv txoj lus lawm thiab. 2 Thaum Petus mus rau Yeluxalees cov uas xav kom sawv daws ua kev cai txiav* thiaj thuam nws 3 tias, “Koj tseem mus nrog cov neeg uas tsis tau ua kev cai txiav noj haus ua ke hauv lawv tej tsev thiab.” 4 Petus thiaj piav ib qho zuj zus li no tias,

5 “Thaum kuv tseem thov Vajtswv hauv lub nroog Yaupas, kuv txawm looj hlias ua yog toog pom ib yam zoo li daim ntaub dav dav khi plaub ceg kaum tso saum ntuj los kiag rau ntawm kuv. 6 Kuv ua tib zoo saib, ua ciav pom tej tsiaj muaj plaub txhais tes taw, tej tsiaj qus, tej nab thiab nab qa,* thiab tej noog saum nruab ntug. 7 Kuv txawm hnov ib lub suab hais tias, ‘Petus! Sawv tsees muab tua noj!’ 8 Tiam sis kuv teb tias, ‘Noj tsis tau. Tus Tswv, kuv tsis tau noj tej tsiaj uas qias tsis huv ib zaug li.’ 9 Zaum ob ces lub suab ho hais saum ntuj tuaj tias, ‘Yam uas Vajtswv muab ntxuav dawb huv lawd, koj tsis txhob hais tias qias tsis huv.’ 10 Kuv hnov lub suab hais zaum peb ces ib puas tsav yam cia li nkaum rov rau saum ntuj lawm. 11 Tam sim ntawd muaj peb tug txiv neej txawm tuaj txog ntawm lub tsev uas peb nyob. Luag txib lawv tuaj hauv Xixalias tuaj hu kuv. 12 Lub hwj huam kom kuv tso siab es cia li nrog lawv mus. Tiam sis rau tus kwv tij no kuj nrog kuv mus thiab. Peb thiaj mus rau tom Khaunelias lub tsev.

13 “Khaunelias txawm piav rau peb tias muaj ib tug tub txib saum ntuj los tshwm hauv nws tsev, thiab hais rau nws tias, ‘Cia li txib neeg mus rau lub nroog Yaupas mus hu Ximoos uas kuj hu ua Petus tuaj. 14 Nws yuav qhia seb koj yuav tsum ua li cas koj thiab koj tsev neeg thiaj dim.’ 15 Thaum kuv pib qhia, ua ciav lub hwj huam dawb huv txawm los rau saum lawv, ib yam li thaum chiv thawj los rau saum peb thiab. 16 Tam sim ntawd kuv mam nco dheev cov lus uas tus Tswv txeev hais tias, ‘Yauhas muab neeg ua kev cai raus dej tiam sis nej yuav ua kev cai raus lub hwj huam dawb huv.’ 17 Yog Vajtswv twb pub dawb rau lawv ib yam li nws tau pub rau peb cov uas ntseeg tus Tswv Yexus Khetos ces kuv yog leej twg es kuv ho yuav txwv Vajtswv thiab?”

18 Thaum cov kwv tij hnov tej uas Petus hais ntawd, lawv thiaj tso tseg tsis nrog nws sib cav* lawm. Lawv qhuas Vajtswv thiab hais tias, “Vajtswv kuj qhib kev rau lwm haiv neeg hloov dua siab tshiab kom tau txoj sia lawm thiab.”

19 Tom qab Xatefanaus raug tua, cov ntseeg raug tsim txom loj heev. Lawv thiaj tawg ua sab ua sua mus nyob deb heev, txog ntua Finixias, Xaipas thiab Athi-aus. Cov ntawd tsuas qhia txoj xov zoo rau cov Yudais xwb. 20 Tiam sis muaj ib txhia hauv Xaipas thiab Xailinis tuaj rau hauv Athi-aus. Cov ntawd ho pib qhia txoj xov zoo txog tus Tswv Yexus rau cov neeg uas hais lus Kilis. 21 Vajtswv Yehauvas* kuj nrog nraim lawv, muaj coob tus thiaj los ntseeg thiab los cuag tus Tswv.

22 Thaum lub koom txoos hauv Yeluxalees hnov txog lawv, cov kwv tij ntawd thiaj txib Npananpas mus rau Athi-aus. 23 Thaum Npananpas mus txog, nws pom tias Vajtswv foom koob hmoov npluas mias rau lawv. Nws zoo siab xyiv fab kawg li, thiab txhawb kom lawv sawv daws cog kev ntseeg ruaj nreeg rau tus Tswv. 24 Npananpas yog ib tug neeg zoo uas muaj kev ntseeg heev thiab puv npo lub hwj huam dawb huv. Twb yog vim li ntawd thiaj muaj neeg coob heev los ntseeg tus Tswv ntxiv. 25 Npananpas txawm sawv kev mus rau Thaxas mus nrhiav Xolaus ib qho rau ib qho. 26 Thaum nws nrhiav tau lawd, nws thiaj coj Xolaus rov los rau hauv Athi-aus. Nkawd txhawb lub koom txoos ntawd tau ib lub xyoos nkaus, thiab qhia neeg coob kawg li. Lub nroog Athi-aus no yog thawj pawg uas Vajtswv pom zoo cov thwj tim tau lub npe hu ua Khixatias.*

27 Lub caij ntawd, muaj ib co cev Vajtswv lus hauv Yeluxalees tuaj rau Athi-aus. 28 Ib tug ntawd yog Akanpas. Lub hwj huam dawb huv tshoov nws los cev Vajtswv lus tias yuav muaj kev tshaib kev nqhis thoob plaws lub ntiaj teb. Txawm muaj raws li nws hais tseg rau lub caij uas huab tais* Khaladias kav. 29 Yog li ntawd, cov thwj tim thiaj pom zoo sau khoom xa mus pab cov kwv tij uas nyob hauv Yudias, nyias muab raws li nyias muaj. 30 Lawv mam li muab tej qhov txhia chaw ntawd cob rau Npananpas thiab Xolaus nkawd coj mus rau cov txwj laus.

12 Lub caij ntawd, Vaj Ntxwv Helauj pib tsim txom ib txhia hauv lub koom txoos. 2 Helauj kom luag muab ntaj tua Yauhas tus tij laug* Yakaunpaus tuag. 3 Thaum Helauj pom tias qhov uas nws ua ntawd haum cov Yudais siab, nws thiaj mus ntes Petus thiab. (Tau muaj tej no rau thaum tab tom ua Kev Cai Noj Ncuav Tsis Xyaw Keeb.*) 4 Nws muab Petus ntes kaw hauv tsev loj cuj thiab kom plaub pab tub rog sib hloo zov, ib pab twg muaj plaub tug tub rog. Nws npaj tias thaum ua Kev Cai Hla Dhau tas, nws yuav coj Petus mus hais plaub tab meeg cov pej xeem. 5 Lub sij hawm uas Petus raug kaw, lub koom txoos thov Vajtswv pab nws tsis tseg.

6 Hmo ua ntej Helauj yuav coj Petus tawm mus hais plaub, lawv muab saw hlau khi Petus, nws pw hauv ob tug tub rog kis nruab nrab. Kuj muaj ob tug tub rog zov rawv sab nraum qhov rooj thiab. 7 Ua ciav Vajtswv Yehauvas* ib tug tub txib saum ntuj txawm tshwm los rau ntawm lawv, thiab muaj duab ci tuaj rau hauv chav ntawd. Nws diaj Petus thiab hais tias, “Cia li sawv tsees!” Tej saw hlau uas khi Petus ob txhais tes txawm plam plaws. 8 Tus tub txib saum ntuj thiaj hais rau nws tias, “Hnav ris tsho* thiab rau khau.” Petus thiaj ua li nws hais. Nws hais ntxiv tias, “Cia li vaj koj daim ntaub,* thiab raws nraim kuv qab.” 9 Petus thiaj raws nws qab tawm mus. Tiam sis Petus xav tias ntshe nws ua yog toog xwb, nws tsis paub tias tus tub txib saum ntuj coj nws kev tiag. 10 Tus tub txib saum ntuj coj nws mus dhau pab tub rog ib thiab pab tub rog ob, mam mus txog ntawm lub rooj loog hlau uas nkag rau hauv nroog. Lub rooj loog txawm cia li qhib plho rau nkawd. Thaum nkawd nkag mus rau hauv nroog thiab taug kev mus me ntsis, tus tub txib saum ntuj txawm ncaim Petus lawm. 11 Thaum Petus feeb meej lawd, nws thiaj hais tias, “Nim no kuv paub tseeb tias Vajtswv Yehauvas* tau txib nws tus tub txib saum ntuj los cawm kuv dim ntawm Helauj txhais tes thiab ntawm tej kev phem uas cov Yudais xav kom los raug kuv.”

12 Tom qab Petus paub li ntawd, nws thiaj mus rau tom Maivliag tsev. Maivliag yog Yauhas uas muaj dua npe hu ua Malakaus niam. Cov thwj tim coob tus tuaj thov Vajtswv hauv nws tsev. 13 Thaum Petus mus khob lub rooj loog, ib tug ntxhais qhev hu ua Laudas dhia los qhib. 14 Thaum Laudas hnov dheev Petus lub suab nws paub tias yog Petus. Nws zoo siab dhau lawm, nws cia li tsis nco qhib lub rooj loog. Nws dhia loo rov mus hauv tsev mus qhia sawv daws tias Petus tuaj txog nraum rooj loog. 15 Lawv hais rau nws tias, “Koj tsis meej pem lawm.” Tiam sis nws hais tas zog tias yog Petus tiag. Lawv thiaj hais tias, “Ntshe yog ib tug tub txib saum ntuj* xwb.” 16 Tiam sis Petus tseem sawv nraum lub rooj loog khob tsis tseg. Thaum lawv qhib rooj loog ua ciav yog nws tiag, mas lawv xav tsis thoob li. 17 Tiam sis nws co tes kom lawv ua twj ywm. Nws qhia txhua yam uas Vajtswv Yehauvas* tau ua thiab tso nws tawm hauv tsev loj cuj li cas. Thiab nws hais tias, “Mus qhia tej no rau Yakaunpaus thiab cov kwv tij.” Tom qab ntawd nws txawm mus rau lwm qhov lawm.

18 Thaum kaj ntug, cov tub rog ntxhov siab kawg li rau qhov lawv tsis paub tias Petus dua twg lawm. 19 Helauj thiaj txib neeg mus nrhiav kom tau Petus los. Tiam sis thaum nrhiav tsis tau, nws thom cov tub rog thiab sam hwm kom coj lawv mus rau txim. Nws thiaj sawv kev hauv Yudias mus rau Xixalias, thiab nyob ib ntus qhov ntawd.

20 Thaum ntawd Helauj npau taws heev rau cov neeg Thailab thiab Xaidoos. Lawv thiaj koom siab tuaj cuag Helauj. Lawv thov kom Nplatus uas yog tus saib xyuas Vaj Ntxwv tej cuab txhiaj cuab tam pab lawv, thiab thov kom Helauj nrog lawv sib raug zoo rau qhov lub caij ntawd Helauj pab zaub mov yug lawv lub teb lub chaw. 21 Thaum txog hnub uas teem tseg, Helauj hnav ib ce tsoos vaj ntxwv ci nplas thiab los zaum saum rooj txiav txim hais lus rau cov pej xeem sawv daws. 22 Cov neeg uas tuaj txoos ua ke mloog nws hais, txawm qw nrov nrov tias, “Lub suab no zoo li Vajtswv lub tsis yog neeg lub!” 23 Tam sim ntawd Vajtswv Yehauvas* tus tub txib saum ntuj txawm rau txim kiag rau Helauj vim nws tsis muab koob meej rau Vajtswv. Kas cia li noj nws lub nrog cev nws thiaj tuag lawm.

24 Tiam sis Vajtswv Yehauvas* txoj lus nrov ncha deb zuj zus ntxiv thiaj muaj coob tus los ntseeg.

25 Thaum Npananpas thiab Xolaus nkawd xa tej qhov txhia chaw mus pab cov ntseeg hauv Yeluxalees tas lawd, nkawd thiaj rov los thiab coj Yauhas uas muaj dua lub npe hu ua Malakaus nrog nkawd los.

13 Hauv lub koom txoos uas nyob lub nroog Athi-aus, cov cev Vajtswv lus thiab cov xib hwb muaj npe li no, Npananpas, Xime-oos uas kuj hu ua Dub,* Lukias uas nyob Xailinis tuaj, Mana-ees uas nrog tus nom Helauj* kawm ntawv ua ke, thiab Xolaus. 2 Thaum lawv tseem ua Vajtswv Yehauvas* tes hauj lwm thiab ua kev cai yoo mov, lub hwj huam dawb huv txawm tshoov kom muab Npananpas thiab Xolaus tshwj cia rau Vajtswv, rau qhov nws yuav txib nkawd mus ua ib teg hauj lwm. 3 Thaum ua kev cai yoo mov thiab thov Vajtswv tas, lawv thiaj tsa tes npuab nkawd thiab txib nkawd mus lawm.

4 Lub hwj huam dawb huv txib nkawd mus rau nram Xeluxias, nkawd mam li caij nkoj mus rau lub pov txwv Xaipas. 5 Thaum nkawd mus txog hauv lub nroog Xalamis, nkawd pib tshaj tawm Vajtswv txoj lus hauv cov Yudais tej tsev pe hawm. Yauhas kuj mus ua tus pab nkawd thiab.

6 Thaum lawv qhia thoob lub pov txwv mus txog ntua lub nroog Pafaus, lawv txawm ntsib ib tug yawg Yudais hu ua Npayexus. Nws txawj ua khawv koob yees siv thiab yog ib tug cev lus cuav. 7 Npayexus nrog tus tswv xeev Xawkias Paulus ua ke. Xawkias Paulus yog ib tug neeg ntse heev. Nws xav hnov Vajtswv txoj lus kawg li, nws thiaj hu Npananpas thiab Xolaus los rau ntawm nws. 8 Tiam sis tus yawg txawj ua yees siv uas kuj hu ua Elimas* txawm pib tawm tsam nkawd. (Lub npe Elimas txhais tias tus txawj ua khawv koob yees siv.) Nws tsis xav kom tus tswv xeev ntseeg Vajtswv txoj lus. 9 Xolaus uas muaj dua lub npe hu ua Povlauj puv npo lub hwj huam dawb huv. Nws thiaj ntsia ntsoov tus yawg ntawd 10 thiab hais tias, “Niag neeg ko, koj lub siab puv nkaus tej kev dag ntxias thiab kev phem lim hiam. Koj yog Dab Ntxwg Nyoog tus tub ntag. Koj ua yeeb ncuab tawm tsam txhua yam kev ncaj ncees. Koj yuav cov nyom Vajtswv Yehauvas* txoj kev ncaj ncees mus txog tav twg? 11 Saib nawb! Vajtswv Yehauvas* yuav rau txim rau koj mas koj yuav dig muag thiab yuav tsis pom lub hnub ci mus ib ntus.” Tam sim ntawd nws ob lub qhov muag txawm plooj nkaus. Nws thiaj xuas dub mus rau ub rau no nrhiav neeg tuav tes. 12 Thaum tus tswv xeev pom li no nws thiaj los ntseeg rau qhov tej uas nws kawm txog Vajtswv Yehauvas* ua rau nws xav tsis thoob li.

13 Povlauj lawv thiaj caij nkoj ntawm Pafaus mus rau lub nroog Pawkas uas nyob hauv teb chaws Pafilias. Tiam sis Yauhas tso nkawd tseg thiab rov mus rau Yeluxalees lawm. 14 Nkawd sawv kev ntawm Pawkas mus rau Athi-aus uas nyob hauv Pixidias cheeb tsam. Hnub Xanpataus, nkawd txawm mus zaum hauv lub tsev pe hawm. 15 Thaum cov tib neeg nyeem Mauxes Txoj Kev Cai thiab cov cev Vajtswv lus tej lus qhia tas lawd, cov thawj saib xyuas lub tsev pe hawm txawm hais rau nkawd tias, “Ob tug kwv tij, yog neb muaj lus txhawb sawv daws ces kav tsij hais.” 16 Povlauj thiaj sawv tsees thiab tsa tes kom sawv daws nyob twj ywm. Nws txawm hais tias,

“Ib tsoom neeg Ixayees thiab tag nrho cov uas hwm Vajtswv’e, thov mloog nawb. 17 Haiv neeg Ixayees tus Vajtswv tau xaiv peb cov yawg koob cia lawm. Mas thaum lawv tseem nyob hauv Iyiv teb chaws uas tsis yog lawv teb lawv chaw, Vajtswv twb txhawb kom lawv vam meej lawm. Vajtswv siv nws lub hwj chim loj kawg nkaus coj lawv tawm hauv lub teb chaws ntawd los. 18 Nws ua siab ntev kawg li rau lawv tau 40 xyoo hauv teb chaws moj sab qhua. 19 Tom qab Vajtswv rhuav tshem xya haiv neeg hauv teb chaws Khana-as, nws mam li faib teb faib chaw rau peb cov yawg koob ua qub txeeg qub teg. 20 Ncua sij hawm uas muaj tej no, ntev li 450 xyoo.

“Tom qab ntawd, nws mam li tsa cov txiav txim los coj lawv, mus txog ntua Xamuyees tus uas cev Vajtswv lus. 21 Tiam sis cov pej xeem ho thov kom tsa ib tug vaj ntxwv los kav lawv. Vajtswv thiaj tsa Xa-us uas yog Khij tus tub thiab yog ib tug hauv xeem Npeeyamees, los kav lawv tau 40 lub xyoos. 22 Thaum Vajtswv txo Xa-us, nws ho tsa Daviv ua vaj ntxwv. Vajtswv ua tim khawv txog Daviv li no, ‘Daviv uas yog Yexis tus tub yeej ua haum kuv siab thiab nws yuav ua txhua yam raws li kuv pom zoo.’ 23 Raws li Vajtswv cog lus tseg, nws tau xaiv Daviv ib tug xeeb ntxwv los cawm haiv neeg Ixayees. Tus ntawd yog Yexus. 24 Ua ntej tus ntawd tshwm los, Yauhas twb tshaj tawm rau ib tsoom Ixayees tias lawv yuav tsum ua kev cai raus dej qhia tias lawv hloov dua siab tshiab. 25 Thaum Yauhas ua nws tes hauj lwm yuav tiav nws hais tias, ‘Nej xav tias kuv yog leej twg? Kuv tsis yog tus uas nej niaj hnub tos. Tus yuav lawv kuv qab los, kuv twb tsis tsim nyog daws nws txoj hlua khau.’

26 “Cov kwv tij, nej cov uas yog Anplahas xeeb ntxwv, thiab nej cov uas hwm Vajtswv, kuv qhia rau nej tias txoj xov txog Vajtswv txoj kev cawm dim twb los txog peb lawm. 27 Cov neeg hauv Yeluxalees thiab lawv tej thawj coj* tsis xam pom tus cawm seej no. Thaum lawv txiav txim rau nws, lawv ua raws nkaus li cov cev Vajtswv lus tau hais tseg ntag. Txhua hnub Xanpataus luag yeej nyeem tej lus ntawd rau sawv daws mloog. 28 Txawm lawv nrhiav tsis tau txim tua nws los, lawv tseev kom Philaj muab nws tua pov tseg. 29 Thaum lawv ua tiav raws li txhua yam uas sau tseg txog nws lawd, lawv mam li txo nws lub cev saum tus ncej ntoo* thiab coj nws mus zais hauv ib lub qhov ntxa. 30 Tiam sis Vajtswv tsa nws sawv hauv qhov tuag rov los. 31 Thiab tau ntau hnub nws los tshwm rau cov uas niaj hnub nrog nws ua ke hauv Kalilais mus rau Yeluxalees pom. Nim no cov ntawd yog cov uas ua tim khawv qhia tib neeg txog nws ntag.

32 “Yog li ntawd, wb tuaj ntawm no yog tuaj qhia txoj xov zoo txog Vajtswv lo lus cog tseg rau peb cov yawg koob. 33 Thaum Vajtswv tsa Yexus ciaj sawv rov los ces twb yog Vajtswv ua raws li lo lus cog tseg ntawd, xwv thiaj pab tau peb uas yog lawv tej xeeb ntxwv. Tau muaj raws li sau cia hauv phau ntawv nkauj zaj ob* tias, ‘Koj yog kuv tus tub, hnub no kuv yog koj txiv lawm.’ 34 Vajtswv tsa Yexus sawv hauv qhov tuag rov los mas nws yuav tsis muaj lub cev uas txawj lwj lawm. Rau qhov Vajtswv hais tseg li no tias, ‘Kuv yuav hlub koj mus li, ib yam li kuv cog lus rau Daviv lawm. Kuv tej lus cog tseg yeej tso siab tau.’ 35 Kuj muaj dua lwm zaj nkauj hais tias, ‘Koj yuav tsis cia tus uas muab siab npuab koj cev nqaij lwj.’ 36 Daviv ua Vajtswv tes hauj lwm mus tas nws tiam neej. Thaum nws tuag, luag muab nws faus nrog nws tej yawg koob thiab nws cev nqaij yeej lwj tas lawm. 37 Tiam sis tus uas Vajtswv tsa sawv rov los, tus ntawd cev nqaij yeej tsis lwj li.

38 “Yog li ntawd, cov kwv tij, kuv hais ncaj qha rau nej sawv daws tias yog vim muaj tus no, Vajtswv thiaj zam tau lub txim txhaum. 39 Mauxes Txoj Kev Cai daws tsis tau nej lub txim huv si mus, tiam sis txhua tus uas ntseeg tus no, Vajtswv yuav daws nws lub txim huv si mus. 40 Yog li ntawd, ceev faj tsam tej uas cov cev Vajtswv lus hais tseg ho los raug nej li hais no, 41 ‘Nej cov uas pheej thuam luag, cia li saib tes hauj lwm uas kuv ua rau nej lub caij lub nyoog. Txawm muaj neeg qhia tes hauj lwm no meej kawg li rau nej los nej yeej yuav tsis ntseeg. Tiam sis nej yuav xav tsis thoob li thiab nej yuav puas tsuaj mus.’”

42 Thaum nkawd yuav tawm mus, cov tib neeg thov kom nkawd rov tuaj qhia zaj no rau hnub Xanpataus tom ntej thiab. 43 Thaum sawv daws sib txoos hauv lub tsev pe hawm tas, coob tus Yudais thiab lwm haiv neeg uas los coj Yudais kev cai txawm raws Povlauj thiab Npananpas qab mus. Nkawd txhawb kom sawv daws tuav rawv kev ntseeg xwv lawv thiaj cog ruaj khov hauv Vajtswv txoj kev hlub nplua mias.*

44 Thaum rov qab txog hnub Xanpataus, yuav luag txhua tus hauv lub nroog tuaj mloog Vajtswv Yehauvas* txoj lus. 45 Thaum cov Yudais pom cov neeg coob coob ntawd, lawv khib heev. Lawv thiaj tig los dag thiab cov nyom tej uas Povlauj qhia. 46 Povlauj thiab Npananpas ua siab tawv qhawv teb lawv tias, “Yuav tsum xub muab Vajtswv txoj lus qhia rau nej ua ntej. Tiam sis nej tsis xav hnov, nej ua qhia tias nej tsis tsim nyog tau txoj sia ib txhis tsis kawg. Yog li ntawd, peb yuav mus qhia rau lwm haiv neeg. 47 Vajtswv Yehauvas* twb sam hwm li no rau peb lawm tias, ‘Kuv tsa koj ua qhov kaj ci rau lwm haiv neeg, koj thiaj coj tau kev cawm dim mus txog qab ntuj kawg.’”*

48 Thaum lwm haiv neeg hnov li no mas lawv zoo siab xyiv fab kawg li. Lawv txawm pib qhuas Vajtswv Yehauvas* txoj lus thiab txhua tus uas muaj lub siab xib rau Vajtswv thiab xav tau txoj sia ib txhis tsis kawg txawm los ntseeg. 49 Vajtswv Yehauvas* txoj lus thiaj nrov ncha mus thoob plaws cheeb tsam ntawd. 50 Tiam sis cov Yudais tshum kom cov poj niam nto moo uas ntseeg Vajtswv thiab cov txiv neej uas ua thawj hauv lub nroog tig los tawm tsam Povlauj thiab Npananpas nkawd. Luag thiaj tsim txom nkawd thiab muab nkawd ntiab tawm hauv cheeb tsam ntawd mus. 51 Nkawd thiaj nchos tej hmoov av uas lo ko taw tseg thiab sawv kev mus rau Ikhaunias lawm. 52 Mas cov thwj tim niaj hnub zoo siab xyiv fab thiab lawv puv npo lub hwj huam dawb huv.

14 Thaum Povlauj thiab Npananpas mus txog Ikhaunias, nkawd mus rau hauv cov Yudais lub tsev pe hawm. Nkawd qhia tau zoo heev mas cov Yudais thiab cov Kilis coob leej los ntseeg. 2 Tiam sis cov Yudais uas tsis ntseeg tshum thiab ntxias kom lwm haiv neeg tawm tsam cov kwv tij. 3 Nkawd thiaj nrog cov kwv tij ntawd nyob ib ntus. Vajtswv Yehauvas* muab hwj chim rau nkawd muaj lub siab tawv qhawv qhia tsis ntshai li. Nws pub nkawd ua tej txuj ci tseem ceeb, ua rau sawv daws xav tsis thoob. Tej no ua tim khawv txog Vajtswv txoj kev hlub nplua mias. 4 Thaum ntawd lub nroog tawg ua ob pab, ib pab tuaj cov Yudais tog, ib pab tuaj cov tub txib tog. 5 Lwm haiv neeg, cov Yudais, thiab lawv tej thawj coj txawm nrhiav kev ua phem rau Povlauj thiab Npananpas thiab xuas pob zeb ntaus nkawd. 6 Tiam sis muaj neeg ceeb toom nkawd ces nkawd thiaj khiav mus rau hauv Likhaunias, Lixathas thiab Dawnpis, thiab mus rau tej zej zog uas nyob ze ntawd. 7 Nkawd tshaj tawm txoj xov zoo tsis tseg rau qhov ntawd.

8 Hauv Lixathas muaj ib tug yawg uas yug los lub cev tsis meej xeeb, nws ib txwm mus tsis taus kev. 9 Nws zaum mloog Povlauj qhia. Povlauj saib ntsoov nws thiab pom tias nws muaj kev ntseeg thiab tso siab tias Vajtswv yeej kho tau nws zoo. 10 Povlauj thiaj hais nrov nrov tias, “Cia li sawv tsees.” Nws txawm sawv tsees tam sid thiab mus taus kev lawm. 11 Thaum cov neeg coob coob pom Povlauj ua tau li no, lawv txawm qw ua lus Likhaunias tias, “Tej tim tswv txia los ua neeg nrog peb nyob lawm lauj!” 12 Lawv thiaj muab Npananpas hu ua Xus thiab muab Povlauj hu ua Hawmes rau qhov Povlauj yog tus qhia ntau. 13 Lub tuam tsev lawv teev Xus nyob ze ntawm rooj loog nkag mus rau hauv nroog. Tus pov thawj uas teev Xus txawm cab nyuj thiab nqa paj ntoos* tuaj rau ntawm rooj loog, kom cov tib neeg muab xyeem rau Povlauj thiab Npananpas.

14 Thaum Npananpas thiab Povlauj* pom tej no, nkawd thiaj dua rhe nkawd ob lub tsho dhia mus rau ntawm cov tib neeg thiab hais tias, 15 “Cov kwv tij’e, nej ua dab tsi li no? Wb yog neeg ib yam li nej thiab xwb! Wb tuaj ntawm no, yog xav tshaj tawm txoj xov zoo rau nej kom nej tso tej yam tsis muaj qab hau no tseg thiab los cuag tus Vajtswv uas muaj sia zees nyob. Nws yog tus tsim lub ntuj lub teb, tej dej hiav txwv thiab ib puas tsav yam hauv lub qab ntuj khwb no. 16 Yav tas los, Vajtswv cia txhua haiv neeg ua ywj siab ywj ntsws. 17 Txawm li ntawd los, Vajtwv yeej ua tim khawv tias nws zoo npaum li cas tiag. Nws niaj hnub tso tshav tso nag los kom tej qoob loo siav raws caij raws nyoog, nej thiaj muaj txaus noj txaus haus thiab muaj kev zoo siab.” 18 Txawm nkawd hais li no los, nkawd cheem yuav luag tsis tau cov tib neeg kom txhob muab tej ntawd xyeem rau nkawd.

19 Tiam sis muaj ib co Yudais tuaj hauv Athi-aus thiab Ikhaunias tuaj ntxias tau cov tib neeg. Lawv txawm xuas pob zeb ntaus Povlauj thiab muab nws cab mus pov sab nraum lub nroog rau qhov lawv xav tias nws tuag lawm. 20 Tiam sis thaum cov thwj tim los vij vog Povlauj, nws cia li tsim los thiab rov mus rau hauv lub nroog. Hnub tom qab ntawd, nws nrog Npananpas mus rau Dawnpis. 21 Nkawd tshaj tawm txoj xov zoo hauv lub nroog ntawd thiab nrhiav tau coob tus thwj tim los ntseeg ces nkawd mam rov mus rau Lixathas, Ikhaunias, thiab Athi-aus. 22 Nkawd txhawb kom cov thwj tim tuav kev ntseeg ruaj nreeg. Nkawd hais tias, “Peb yuav tsum tiv kev txom nyem nyuaj siab ntau yam thiaj mus tau rau hauv Vajtswv lub Nceeg Vaj.”* 23 Tsis tas li ntawd xwb, nkawd tsa ib co los ua txwj laus rau txhua lub koom txoos. Nkawd thov Vajtswv thiab ua kev cai yoo mov thiab muab cov txwj laus ntawd tso rau Vajtswv Yehauvas* tus uas lawv ntseeg saib xyuas.

24 Tom qab ntawd, nkawd sawv kev hla cheeb tsam Pixidias mus rau lub xeev Pafilias. 25 Thaum nkawd tshaj tawm hauv lub nroog Pawkas tas lawm, nkawd txawm mus rau nram lub nroog Athalias. 26 Dhau ntawd, nkawd nce nkoj rov mus rau lub nroog Athi-aus uas yav nram ntej cov kwv tij thov Vajtswv foom koob hmoov nplua mias rau nkawd mus tshaj tawm txoj xov zoo. Nim no nkawd twb ua tiav tes hauj lwm ntawd lawm.

27 Thaum nkawd mus txog thiab tau nrog lub koom txoos ua ke, nkawd qhia ntau yam uas Vajtswv txib kom nkawd mus ua, thiab qhia tias Vajtswv twb qhib kev rau lwm haiv neeg los ntseeg lawm. 28 Nkawd thiaj nrog cov thwj tim nyob ntev loo.

15 Txawm muaj ib co txiv neej* tuaj hauv Yudias tuaj qhia cov kwv tij tias, “Yog nej tsis ua kev cai txiav* raws li Mauxes Txoj Kev Cai ces nej yuav tsis dim.” 2 Povlauj thiab Npananpas thiaj nrog cov ntawd sib cam muaj ceem heev. Tom qab ntawd, cov kwv tij thiaj kom Povlauj, Npananpas thiab ib co kwv tij coj qhov teeb meem no mus rau cov tub txib thiab cov txwj laus hauv Yeluxalees tu.

3 Cov ntseeg hauv lub koom txoos thiaj xa cov kwv tij mus txog ib nrab ke. Thaum lawv hla Finixias thiab Xamalis mus, nkawd piav txhua yam rau cov kwv tij hauv ob lub xeev ntawd tias lwm haiv neeg los ntseeg Vajtswv lawm, mas cov kwv tij sawv daws xyiv fab kawg li. 4 Thaum lawv mus txog hauv Yeluxalees, cov ntseeg hauv lub koom txoos, cov tub txib, thiab cov txwj laus zoo siab hlo tos txais lawv mas nkawd thiaj piav ntau yam uas Vajtswv tau txib nkawd mus ua. 5 Tiam sis ib co ntseeg uas yav tas los koom nrog pab Falixais txawm sawv tsees hais tias, “Tsim nyog muab cov ntawd ua kev cai txiav thiab kom lawv coj Mauxes Txoj Kev Cai.”

6 Cov tub txib thiab cov txwj laus thiaj sab laj txog qhov teeb meem no. 7 Lawv sib cam muaj ceem kawg li ces Petus txawm sawv tsees hais rau lawv tias, “Cov kwv tij, nej yeej paub lawm tias thaum chiv thawj Vajtswv xaiv kuv tawm hauv nej kom lwm haiv neeg thiaj tau hnov txoj xov zoo thiab los ntseeg. 8 Mas Vajtswv tus uas paub neeg lub siab, qhia tias nws txaus siab rau lawv nws thiaj pub lub hwj huam dawb huv rau lawv ib yam li nws tau pub rau peb thiab. 9 Vajtswv yeej suav tias peb cov Yudais thiab lwm haiv neeg zoo ib yam nkaus xwb. Twb yog lawv ntseeg, Vajtswv thiaj ntxuav lawv lub siab kom dawb huv. 10 Ua cas nim no nej ho sim kom Vajtswv chim. Nej tseem yuav xav muab lub nra hnyav uas peb thiab peb tej yawg koob twb ris tsis taus nog, rau cov thwj tim ris thiab lod? 11 Peb twb ntseeg tias tus Tswv Yexus uas muaj kev hlub nplua mias cawm tau peb dim lawm. Lawv los kuj ntseeg ib yam li peb thiab.”

12 Tam sim ntawd sawv daws txawm ntsiag tas. Lawv mloog Npananpas thiab Povlauj qhia txog qhov uas Vajtswv tau pub nkawd ua tej txuj ci tseem ceeb rau lwm haiv neeg xav tsis thoob. 13 Thaum nkawd qhia tas, Yakaunpaus txawm hais tias, “Cov kwv tij, thov mloog kuv hais. 14 Xime-oos twb qhia meej txog thawj zaug uas Vajtswv nco txog lwm haiv neeg thiab tau coj ib co los ua nws haiv neeg sawv cev rau nws lub npe. 15 Tej uas cov cev Vajtswv lus sau tseg kuj hais mus rau tib seem tias, 16 ‘Thaum tej no dua lawd, kuv yuav rov los thiab rov tsa Daviv lub tsev ntaub uas vau tas lawd. Txawm lub tsev ntawd puas tsuaj tas lawm los kuv yuav muab kho dua tshiab. 17 Kuv ua li no kom cov neeg uas tseem nyob thiab lwm haiv neeg uas tuav kuv lub npe thiaj nrhiav tau kuv uas yog Vajtswv Yehauvas.* Kuv uas yog Vajtswv Yehauvas* tau hais li no thiab yuav ua tej no ntag. 18 Kuv twb npaj ua li no puag thaum ub los lawm.’ 19 Yog li, raws li kuv pom zoo mas tsis txhob ua rau lwm haiv neeg uas tab tom los cuag Vajtswv ntxhov siab. 20 Tiam sis cia peb sau mus rau lawv kom caiv tej yam uas fij rau dab mlom, tsis txhob ua kev plees kev yi,* caiv tej tsiaj uas zawm caj dab tuag thiab caiv ntshav. 21 Rau qhov txij puag thaum ub los yeej muaj neeg muab tej ntawv uas Mauxes sau, coj mus qhia ib lub nroog rau ib lub. Thiab txhua hnub Xanpataus luag yeej nyeem tej ntawv no hauv tej tsev pe hawm.”

22 Cov tub txib thiab cov txwj laus, thiab tag nrho lub koom txoos thiaj pom zoo xaiv ob tug kwv tij nrog Povlauj thiab Npananpas mus rau Athi-aus. Ob tug ntawd yog Yudas uas muaj dua npe hu ua Npaxanpas thiab Xilas. Nkawd kuj yog ob tug uas tuav hauj lwm tseem ceeb hauv lub koom txoos thiab. 23 Tsab ntawv uas muab rau lawv nqa mus hais li no,

“Peb uas yog cov tub txib thiab cov txwj laus, peb yog nej cov kwv tij. Peb sau tsab ntawv no tuaj rau nej cov kwv tij uas yog lwm haiv neeg nyob rau Athi-aus, Xilias, thiab Xilixias. Vam tias nej sawv daws yuav noj qab nyob zoo! 24 Peb hnov tias ib txhia hauv peb cheeb tsam tau tuaj tsim teeb meem rau nej kom nej tso kev ntseeg tseg, tiam sis peb tsis tau tso cai rau lawv tuaj hais tej ntawd. 25 Peb thiaj pom zoo txib neeg nrog Npananpas thiab Povlauj uas peb hlub tshua tuaj rau ntawm nej. 26 Nkawd yeej sev nyog nkawd txoj sia mus tshaj tawm tus Tswv Yexus Khetos lub npe. 27 Peb kuj txib Yudas thiab Xilas tuaj kom nkawd qhia tib co lus no rau nej thiab. 28 Lub hwj huam dawb huv thiab peb pom zoo tias txhob ua nra ntxiv rau nej ris, tsuas yog ua tej uas tsim nyog ua no xwb, 29 cia li caiv tej uas muab fij rau dab mlom, caiv ntshav, caiv tej tsiaj uas zawm caj dab tuag, thiab tsis txhob ua kev plees kev yi.* Yog nej coj raws nraim li no ces nej yuav tau zoo nyob. Thov kom nej noj qab nyob zoo!”

30 Thaum tham tas, cov txiv neej thiaj mus rau Athi-aus thiab lawv hu tag nrho cov thwj tim tuaj txoos ua ke. Lawv mam muab tsab ntawv cev rau cov kwv tij. 31 Thaum cov kwv tij nyeem tas, sawv daws zoo siab kawg li rau tsab ntawv uas txhawb lawv zog heev. 32 Yudas thiab Xilas kuj yog ob tug cev Vajtswv lus thiab. Nkawd cev ntau zaj lus qhuab qhia uas txhawb tau cov kwv tij lub zog. 33 Thaum nkawd nrog cov kwv tij nyob tau ib nyuag ntu, lawv mam xa nkawd rov mus rau Yeluxalees kaj siab lug. 34* —— 35 Tiam sis Povlauj thiab Npananpas nkawd tseem nrog coob leej ntau tus nyob hauv Athi-aus. Nkawd qhuab qhia thiab nrog lawv tshaj tawm txoj xov zoo uas yog Vajtswv Yehauvas* txoj lus.

36 Ib ntus tom qab ntawd, Povlauj hais rau Npananpas tias, “Cia wb rov mus xyuas cov kwv tij hauv txhua lub nroog uas wb twb tshaj tawm Vajtswv Yehauvas* txoj lus seb lawv nyob li cas.” 37 Npananpas tseev kom coj Yauhas nrog nkawd mus thiab. Yauhas kuj muaj ib lub npe hu ua Malakaus. 38 Tiam sis Povlauj tsis pom zoo coj nws mus, rau qhov yav nram ntej nws tso nkawd tseg rau hauv Pafilias thiab tsis pab nkawd ua hauj lwm. 39 Nkawd txawm sib cav npau taws vog. Povlauj thiab Npananpas thiaj sib ncaim, nyias mus nyias lawm. Npananpas coj Malakaus nrog nws caij nkoj mus rau Xaipas. 40 Hos Povlauj coj Xilas nrog nws mus. Thaum cov kwv tij thov Vajtswv Yehauvas* foom koob hmoov nplua mias* rau Povlauj tas, nkawd txawm sawv kev mus lawm. 41 Nws mus thoob Xilias thiab Xilixias, mus txhawb tag nrho cov koom txoos lub zog.

16 Povlauj mus rau Dawnpis, nws mam li mus rau Lixathas. Nws ntsib ib tug thwj tim hu ua Timautes nyob ntawd. Timautes niam yog neeg Yudais tiam sis nws txiv yog neeg Kilis. 2 Cov kwv tij hauv Lixathas thiab Ikhaunias puav leej qhuas tias Timautes coj tau zoo heev. 3 Povlauj thiaj xav coj Timautes nrog nws mus. Nws muab Timautes ua kev cai txiav* rau qhov cov Yudais hauv koog ntawd puav leej paub tias nws txiv yog neeg Kilis. 4 Thaum lawv mus rau hauv tej nroog, lawv qhia tej kev cai uas cov tub txib thiab cov txwj laus hauv Yeluxalees sau tseg xwv cov kwv tij thiaj coj tau raws li ntawd. 5 Thaum kawg cov koom txoos thiaj tuav kev ntseeg ruaj nreeg thiab huam vam coob zuj zus tuaj.

6 Lawv txawm sawv kev mus rau hauv Fikias thiab Kalatias rau qhov lub hwj huam dawb huv txwv tsis pub lawv mus qhia Vajtswv txoj lus hauv lub xeev Axias.* 7 Thaum lawv mus txog koog teb chaws Mixias, lawv twb xav mus rau Npithinias tiam sis Yexus kom lub hwj huam txwv tsis pub lawv mus. 8 Lawv thiaj mus rau Mixias thiab mus dhau plaws rau nram Rhau-as lawm. 9 Thaum tsaus ntuj, Povlauj txawm ua yog toog pom ib tug yawg Maxedaunias sawv ntawm nws xub ntiag. Nws thov Povlauj tias, “Cia li tuaj rau hauv teb chaws Maxedaunias, tuaj pab peb.” 10 Thaum nws pom zaj yog toog no, peb txawm nrhiav kev mus rau Maxedaunias rau qhov peb pom tias yog Vajtswv txib peb mus tshaj tawm txoj xov zoo rau cov neeg tid.

11 Peb thiaj caij nkoj ntawm Rhau-as ncaj nraim mus rau lub pov txwv Xamorhes ces hnub tom qab peb mam mus rau Ne-apolis. 12 Peb ho sawv kev ntawd mus rau Filipis uas yog ib lub nroog cov Loos kav, thiab yog ib lub nroog tseem ceeb hauv lub xeev Maxedaunias. Peb nyob ib ntus hauv lub nroog no. 13 Thaum txog hnub Xanpataus, peb mus sab nraum tus ntsa loog ntawm ib tug dej. Peb hnov tias muaj neeg tuaj thov Vajtswv ntawd. Muaj ib co poj niam twb tuaj rau ntawd lawm, peb thiaj nrog lawv tham pem. 14 Muaj ib tug poj niam hu ua Lidias uas muag ntaub tsam xem nyob hauv lub nroog Thiyatilas tuaj ntawd thiab. Nws yeej pe hawm Vajtswv thiab nws tab tom mloog tej uas Povlauj qhia. Vajtswv Yehauvas* txawm qhib plho nws lub siab kom nws txais raug tej uas Povlauj hais. 15 Thaum nws thiab nws tsev neeg ua kev cai raus dej tas nws txawm hais rau peb tias, “Yog nej pom tias kuv ntseeg Vajtswv Yehauvas* tiag ces cia li mus so tom kuv tsev.” Nws tseev kom peb mus xwb.

16 Muaj ib hnub thaum peb tab tom mus rau qhov chaw uas sawv daws tuaj thov Vajtswv, ib tug ntxhais qhev uas muaj dab leej nkaub txawm tuaj ntsib peb. Qhov uas nws txawj saib yaig li ntawd, ua rau nws cov los pav tau nyiaj ntau heev. 17 Tus ntxhais no pheej raws Povlauj peb qab thiab qw tias, “Cov txiv neej no yog Vajtswv tus loj dua ntais cov tub qhe. Lawv tab tom tshaj tawm kev cawm dim rau nej.” 18 Nws pheej ua li no tau ntau hnub. Povlauj meem txom, nws thiaj tig loo mus hais rau tus dab tias, “Kuv tuav Yexus Khetos lub npe ntiab koj tawm hauv tus ntxhais no mus.” Tus dab txawm tawm plaws tam sid.

19 Thaum tus ntxhais ntawd cov los pav pom tias lawv tsis tau nyiaj lawm, lawv thiaj ntes kiag Povlauj thiab Xilas cab mus rau tom tshav puam mus cuag lawv tej nom tswv. 20 Lawv thiaj coj nkawd mus rau cov tswv nroog thiab hais tias, “Ob tug yawg no tuaj tsim teeb meem rau peb lub nroog. Nkawd yog neeg Yudais. 21 Peb yog neeg Loos, nkawd qhia tej kev cai uas txhaum peb lawm.” 22 Txawm muaj neeg coob heev los vij vog nkawd. Cov tswv nroog kom muab nkawd tej ris tsho dua rhe thiab xuas qws ntaus nkawd. 23 Lawv muab nkawd ntaus sab kawg li, lawv mam coj nkawd mus kaw hauv tsev loj cuj, thiab kom tus zov tsev loj cuj zov nkawd zoo zoo. 24 Vim lawv hais li ntawd, tus zov tsev loj cuj thiaj muab nkawd kaw rau chav sab hauv, thiab muab xauv ko taw tib si.

25 Tiam sis thaum ib tag hmo, Povlauj thiab Xilas nkawd thov Vajtswv thiab hu nkauj qhuas Vajtswv mas cov neeg raug txim puav leej mloog ntsoov nkawd. 26 Txawm muaj av qeeg loj heev ua rau lub tsev loj cuj ua zog koog. Tag nrho tej qhov rooj txawm qhib plho, thiab tej saw hlau uas khi txhua tus kuj hle pes hlo. 27 Thaum tus zov tsev loj cuj tsim dheev los, ua ciav lub tsev loj cuj tej qhov rooj qhib tib si lawm. Nws thiaj rho hlo ntaj yuav tua nws tus kheej, rau qhov nws xav tias cov neeg raug txim dim tas lawm. 28 Tiam sis Povlauj hu tawg ntho tias, “Txhob ua phem rau koj tus kheej, peb txhua tus puav leej nyob ntawm no!” 29 Tus zov tsev loj cuj thiaj kom lawv taws tsau los rau nws mus hauv chav ntawd. Nws ntshai tshee na mus txhos caug ntua ntawm Povlauj thiab Xilas ko taw. 30 Tom qab ntawd nws coj nkawd tawm hauv tsev loj cuj los thiab nug tias, “Ob tug yawg hlob, kuv yuav ua li cas kuv thiaj dim?” 31 Nkawd thiaj hais tias, “Koj yuav tsum los ntseeg Tswv Yexus, thiaj cawm tau koj thiab koj tsev neeg dim.” 32 Nkawd txawm pib qhia Vajtswv Yehauvas* txoj lus rau nws thiab txhua tus uas nyob hauv nws tsev. 33 Tib hmos ntawd nws kuj coj nkawd mus ntxuav tej qhov txhab uas luag ntaus. Ces tag nrho nws thiab nws tsev neeg txawm los ua kev cai raus dej tsis tos li. 34 Nws mam li coj nkawd los hauv nws tsev thiab ua ib rooj mov rau nkawd noj. Nws thiab txhua tus hauv nws tsev zoo siab kawg li uas lawv tau los ntseeg Vajtswv lawm.

35 Thaum kaj ntug, cov tswv nroog txawm txib tub ceev xwm mus hais kom tus zov tsev loj cuj tso ob tug txiv neej ntawd mus. 36 Tus zov tsev loj cuj thiaj hais rau Povlauj tias, “Cov tswv nroog txib neeg tuaj tso neb dim lawm. Kav tsij tawm los es mus zoo neb.” 37 Tiam sis Povlauj teb tias, “Txawm wb yog neeg Loos los lawv cia li muab wb nplawm tab meeg sawv daws, thiab muab wb kaw tsis taug wb zaj seb wb puas tau ua txhaum. Nim no lawv ho tso wb mus twj ywm, tsis tau li! Lawv yuav tsum los coj kiag wb tawm mus thiaj tas.” 38 Cov tub ceev xwm thiaj rov mus hais tej no rau cov tswv nroog mas lawv ntshai heev thaum lawv hnov tias nkawd yog neeg Loos. 39 Cov tswv nroog thiaj tuaj thov kom Povlauj nkawd zam txim. Tom qab lawv coj nkawd tawm hauv tsev loj cuj mus lawv thov kom Povlauj nkawd mus rau lwm lub nroog. 40 Tiam sis thaum nkawd tawm, nkawd mus rau tom Lidias tsev. Thaum nkawd pom cov kwv tij, nkawd txhawb sawv daws lub zog, nkawd mam sawv kev mus rau lwm qhov.

17 Zaum no lawv mus dhau Afipolis thiab Apaulaunias mus rau Thexalaunikas. Nyob hauv Thexalaunikas, cov Yudais muaj ib lub tsev pe hawm. 2 Povlauj thiaj mus rau hauv raws li nws ib txwm mus. Nws ua tib zoo piav Vajtswv Txoj Lus rau lawv kom lawv nkag siab. Nws ua li no tau peb hnub Xanpataus. 3 Nws muab tej nqe hauv Vajtswv Txoj Lus los piav rau lawv mloog tias tus Khetos yuav tsum raug tsim txom thiab tuag es sawv hauv qhov tuag rov los. Nws hais tias, “Yexus yog tus Khetos, nws yog tus uas kuv tshaj tawm rau nej no ntag.” 4 Lawv ib txhia thiaj los ntseeg thiab los koom nrog Povlauj thiab Xilas. Muaj ib co neeg Kilis coob heev uas pe hawm Vajtswv thiab ib co poj niam uas muaj meej mom kuj los ntseeg thiab.

5 Tiam sis cov Yudais khib heev, lawv thiaj nrhiav ib co neeg tsis tsim txiaj uas tuaj nyob dawb tom tshav puam los ua ib pab tsim kev kub ntxhov rau lub nroog. Lawv txeem kiag mus rau hauv Yaxoos tsev, mus nrhiav Povlauj thiab Xilas los rau pab neeg coob coob ntawd. 6 Thaum lawv nrhiav tsis tau nkawd, lawv thiaj ntes kiag Yaxoos thiab cov kwv tij ib txhia cab mus cuag cov tswv nroog thiab hais tias, “Cov txiv neej uas tsim kev kub ntxhov rau txhua qhov kuj tuaj txog hauv lub nroog no lawm thiab, 7 Yaxoos tseem tos txais lawv los so hauv nws tsev thiab. Tag nrho cov neeg no tawm tsam Xixas txoj kev cai rau qhov lawv hais tias muaj dua ib tug vaj ntxwv hu ua Yexus.” 8 Thaum lawv hnov dheev tej no, cov neeg coob coob thiab cov tswv nroog ntxhov siab heev. 9 Thaum lawv muab Yaxoos nplua tas ces cov nom tswv mam tso lawv mus.

10 Thaum tsaus ntuj zuag, cov kwv tij txawm xa Povlauj thiab Xilas mus rau Npelias lawm. Thaum mus txog chaw, nkawd ncaj qha mus rau ntawm cov Yudais lub tsev pe hawm. 11 Cov uas nyob hauv Npelias yooj yim qhia dua cov uas nyob hauv Thexalaunikas, rau qhov lawv kub siab lug txais yuav txoj xov zoo thiab lawv niaj hnub tshawb nrhiav Vajtswv Txoj Lus seb puas muaj raws li lawv tau kawm tiag. 12 Thaum kawg lawv coob tus thiaj los ntseeg. Muaj coob tus poj niam Kilis uas paub tab thiab cov txiv neej ib txhia kuj los ntseeg thiab. 13 Thaum cov Yudais hauv Thexalaunikas hnov tias Povlauj mus tshaj tawm Vajtswv txoj lus hauv Npelias thiab, lawv txawm tuaj tshum kom cov tib neeg ntxhov. 14 Cov kwv tij thiaj xa Povlauj mus rau ntawm qhov chaw nres nkoj tam sid, tiam sis tseg Xilas thiab Timautes nkawd nyob. 15 Cov uas nrog Povlauj ua ke xa nws mus txog Athees xwb, rau qhov Povlauj txib kom lawv rov mus hais Xilas thiab Timautes nkawd tuaj cuag nws sai sai.

16 Thaum Povlauj nyob tos nkawd hauv Athees, nws pom tias lub nroog ntawd muaj mlom puv ntia txhua txhia qhov chaw mas ua rau nws meem txom. 17 Nws txawm ua tib zoo piav Vajtswv Txoj Lus rau cov Yudais hauv lub tsev pe hawm thiab lwm cov uas tuaj pe hawm Vajtswv kom lawv nkag siab. Nws kuj niaj hnub mus qhia cov tib neeg uas tuaj tom tej tshav puam thiab. 18 Tiam sis cov xib hwb hauv pab Epekulus* thiab pab Xatau-is* txawm nrog Povlauj sib cam. Muaj ib co hais tias, “Tus niag neeg ntau ncauj no tuaj qhia peb txog dab tsi?” Lwm cov hais tias, “Zoo li nws tuaj qhia txog lwm haiv neeg tej dab qhuas sub.” Lawv hais li no rau qhov nws qhia txoj xov zoo txog Yexus thiab qhia tias neeg yuav sawv hauv qhov tuag rov los. 19 Lawv thiaj coj nws mus rau saum Alepakas* thiab hais tias, “Thov koj piav ntxiv txog tej kev cai tshiab uas koj qhia ntawd. 20 Koj qhia tej yam txawv ua luaj, peb tsis tau hnov dua li. Peb xav paub seb tej ntawd yog li cas tiag.” 21 Thaum cov neeg Athees thiab lwm haiv neeg uas tuaj rau ntawd tau nyob dawb, lawv tsuas mloog luag piav txog tej zaj tshiab thiab qhia tej zaj tshiab rau lwm tus xwb. 22 Povlauj thiaj sawv tab meeg sawv daws saum Alepakas* thiab hais tias,

“Cov neeg Athees’e, kuv pom tias txhua yam uas nej ua qhia tias nej hwm nej tej dab qhuas* heev dua lwm pab lwm pawg. 23 Thaum kuv ncig mus ua tib zoo saib tej uas nej teev hawm, kuv pom ib lub thaj txaug tias, ‘Teeb rau tus vaj tswv uas peb tsis paub.’ Tus uas nej tsis paub es nej pe hawm ntawd yog tus uas kuv tab tom qhia rau nej ntag. 24 Tus Vajtswv uas tsim lub qab ntuj khwb thiab ib puas tsav yam uas nyob rau hauv, twb yog tus Tswv uas kav lub ntuj lub teb. Yog li ntawd, nws tsis nyob hauv tej tuam tsev uas neeg txhais tes ua. 25 Tsis tas leej twg yuav thiaj nws cuag li nws vam khom tib neeg, rau qhov nws twb yog tus rau siav rau pa rau txhua leej txhua tus thiab ib puas tsav yam. 26 Nws tsim txhua haiv neeg hauv qab ntuj no tawm hauv ib tug txiv neej los xwb. Nws teem caij teem nyoog rau txhua yam thiab tu ciam dej ciam av rau neeg nyob. 27 Nws ua li no kom neeg los nrhiav Vajtswv. Yog neeg kub siab nrhiav nws, lawv yeej nrhiav tau, rau qhov Vajtswv nyob tsis deb ntawm peb txhua tus. 28 Twb yog muaj Vajtswv peb thiaj txawj mus txawj los, muaj txoj sia nyob li no. Nej cov neeg txawj hais lus paj huam los ib txhia kuj hais tias, ‘Peb yog nws tej tub ki thiab.’

29 “Yog li ntawd, peb twb yog Vajtswv tej tub ki ces tsis tsim nyog peb xav tias Vajtswv zoo li tej mlom nyiaj, mlom kub, mlom pob zeb uas neeg xav hauv nruab siab thiab muab txaug tawm los. 30 Yav tas los tib neeg coj li no vim lawv tsis paub, Vajtswv thiaj tsis suav txim rau lawv. Tiam sis nim no nws tshaj tawm rau ib tsoom neeg uas nyob txhua qhov tias lawv yuav tsum hloov dua siab tshiab. 31 Rau qhov nws twb teem ib hnub cia rau tus uas nws tsa los txiav txim ncaj ncees rau ib tsoom neeg thoob ntiaj teb. Vajtswv twb tsa tus ntawd sawv hauv qhov tuag rov los lawm, kom neeg tso siab tias hnub ntawd yeej yuav los tiag.”

32 Thaum cov neeg hnov Povlauj qhia tias cov tuag yuav sawv rov los, ib txhia thuam nws tiam sis lwm cov ho hais tias, “Peb xav mloog zaj no ntxiv.” 33 Povlauj thiaj mus rau lwm qhov, 34 tiam sis ho muaj ib txhia caum nws thiab los ntseeg. Cov ntawd yog Di-aunixias uas yog ib tug txiav txim ntawm lub Alepakas,* thiab ib tug poj niam hu ua Damalis. Kuj muaj dua lwm cov los ntseeg thiab.

18 Tom qab ntawd, Povlauj tawm hauv lub nroog Athees mus rau lub nroog Kauleethaus. 2 Nws ntsib ib tug neeg Yudais hu ua Akilas uas yug hauv thaj tsam Phauthias thiab nws tus poj niam Paxilas. Nkawd nyuam qhuav tsiv teb chaws Italis los vim Khaladias ntiab cov Yudais kom khiav tawm hauv Loos mus. Povlauj thiaj mus saib nkawd. 3 Vim lawv ua tib txoj hauj lwm xaws tsev ntaub, Povlauj thiaj so hauv nkawd tsev thiab nrog nkawd ua hauj lwm ua ke. 4 Txhua hnub Xanpataus, Povlauj mus cev lus qhuab qhia* hauv lub tsev pe hawm thiab nws yaum kom cov Yudais thiab cov Kilis los ntseeg.

5 Thaum Xilas thiab Timautes nkawd tuaj hauv lub xeev Maxedaunias tuaj txog, Povlauj yim huab kub siab tshaj tawm Vajtswv txoj lus. Nws ua tim khawv qhia kom cov Yudais paub tseeb tias Yexus yog tus Khetos tiag. 6 Tiam sis cov Yudais pheej tawm tsam thiab thuam Povlauj tas zog. Nws thiaj muab nws lub tsho nchos* thiab hais rau lawv tias, “Nej mam ris nej lub txim.* Kuv yuav tsis ris. Txij no mus kuv yuav mus qhia lwm haiv neeg.” 7 Povlauj thiaj tawm hauv lub tsev pe hawm mus qhia hauv ib tug yawg hu ua Thitias Yuxitas lub tsev. Nws yog ib tug uas pe hawm Vajtswv, thiab nws lub tsev nyob npuab lub tsev pe hawm. 8 Khipas uas yog tus thawj saib xyuas lub tsev pe hawm txawm los ntseeg tus Tswv. Nws tsev neeg kuj los ntseeg tib si thiab. Cov neeg Kauleethaus uas hnov txoj xov zoo kuj muaj coob tus los ntseeg thiab ua kev cai raus dej. 9 Tsis tas li ntawd, muaj ib hmos Povlauj ua yog toog pom tus Tswv hais rau nws tias, “Tsis txhob ntshai, tsis txhob tso tseg. Cia li tshaj tawm tiag. 10 Tseem muaj neeg coob heev hauv lub nroog no uas yuav los ntseeg. Yog li ntawd, kuv yeej nrog nraim koj. Tsis muaj leej twg yuav tsa tes tawm tsam koj.” 11 Povlauj thiaj nyob hauv lub nroog tau ib xyoos thiab rau lub hlis. Nws qhia Vajtswv txoj lus rau sawv daws.

12 Thaum Kali-aus ua tswv xeev kav Akhayas, cov Yudais tuav tswv yim los tawm tsam Povlauj thiab coj nws mus kom ntawm lub rooj txiav txim. 13 Lawv liam tias, “Tus yawg no yaum sawv daws pe hawm Vajtswv tsis thooj li peb txoj kev cai lawm.” 14 Thaum Povlauj tsis tau teb, Kali-aus twb hais rau cov Yudais lawm tias, “Cov Yudais’e, yog nws txhaum loj tiag ces yeej tsim nyog kuv ua siab ntev mloog nej zaj. 15 Tiam sis yog nej lam sib cav txog tej lus, tej nyuag npe, thiab nej txoj kev cai xwb ces nej mam tu nej. Kuv yuav tsis tu tej plaub ntug zoo li no.” 16 Nws hais li ntawd tas, nws txawm muab lawv ntiab tawm hauv lub rooj txiav txim mus. 17 Cov tib neeg thiaj sau nthwv los ntes kiag Xauthenes uas yog tus thawj saib xyuas lub tsev pe hawm. Lawv cia li muab nws ntaus tab meeg lub rooj txiav txim. Txawm li ntawd los, Kali-aus tsis quav ntsej li.

18 Povlauj nyob tau ob peb hnub hauv lub nroog ntawd ntxiv, nws mam li hais cov kwv tij tias nws yuav tsum ncaim lawv mus. Nws thiaj nrog Akilas thiab Paxilas nkawd caij nkoj mus rau lub xeev Xilias. Ntawm Xeekhias,* Povlauj muab nws cov plaub hau tshib kom luv raws li nws tau cog lus rau Vajtswv lawm. 19 Thaum lawv mus txog hauv lub nroog Efexaus, Povlauj tseg nkawd nyob rau qhov ntawd ces nws txawm mus qhia cov Yudais hauv lub tsev pe hawm. Nws ua tib zoo piav kom lawv nkag siab Vajtswv Txoj Lus. 20 Txawm lawv cheem npaum li cas kom nws nrog lawv nyob los nws tsis kam. 21 Nws hais rau lawv tias nws yuav tsum ncaim lawv mus thiab hais ntxiv tias, “Yog Vajtswv Yehauvas* pom zoo ces kuv mam rov tuaj saib nej dua.” Tom qab ntawd, nws caij nkoj tawm hauv Efexaus 22 mus rau Xixalias. Nws thiaj mus rau lub nroog Yeluxalees mus xyuas lub koom txoos ces nws mam li mus rau lub nroog Athi-aus.

23 Tom qab nws nyob tau ib ntus hauv lub nroog ntawd, nws mam ncaim lawv mus nyob ib qho rau ib qho thoob teb chaws Kalatias thiab Fikias. Nws mus txhawb cov thwj tim sawv daws lub zog.

24 Txawm muaj ib tug Yudais hu ua Apaulaus tuaj txog hauv Efexaus. Nws yug hauv lub nroog Alexadias. Nws qhia muaj ceem heev thiab paub Vajtswv Txoj Lus zoo kawg li. 25 Nws twb kawm Vajtswv Yehauvas* txoj kev cai los lawm, mas lub hwj huam ua rau nws kub siab lug qhia. Thaum nws piav txog Yexus zaj mas nws qhia tau meej heev. Tiam sis nws tsuas paub txog qhov uas Yauhas muab neeg ua kev cai raus dej xwb. 26 Apaulaus txawm mus qhia hauv lub tsev pe hawm tsis ntshai li. Thaum Akilas thiab Paxilas hnov nws qhia, nkawd thiaj coj nws nrog nkawd los thiab piav Vajtswv txoj kev cai meej dua rau nws ntxiv. 27 Tom qab ntawd, nws xav hla mus rau Akhayas. Cov kwv tij hauv Efexaus thiaj sau ib tsab ntawv mus rau cov thwj tim hauv Akhayas kom lawv zoo siab tos txais Apaulaus. Thaum Apaulaus mus txog tid, nws pab tau cov uas los ntseeg zoo heev. Twb yog muaj Vajtswv txoj kev hlub nplua mias lawv thiaj tau los ntseeg. 28 Apaulaus pab tau lawv heev vim nws qhia tab meeg sawv daws muaj ceem kawg li. Nws piav tshab tshab tias cov Yudais ntseeg yuam kev lawm, thiab muab Vajtswv Txoj Lus qhia meej tias Yexus yog tus Khetos ntag.

19 Thaum Apaulaus tseem nyob hauv Kauleethaus, Povlauj twb taug kev hla roob hla hav hauv xeev Axias* los txog lub nroog Efexaus lawm. Nws mam ntsib ib co thwj tim ntawm qhov chaw ntawd 2 thiab hais rau lawv tias, “Thaum nej los ntseeg, nej puas tau txais lub hwj huam dawb huv?” Lawv teb tias, “Peb yeej tsis tau hnov txog lub hwj huam dawb huv li.” 3 Nws thiaj nug tias, “Yog li nej ua kev cai raus dej li cas?” Lawv teb tias, “Peb ua kev cai raus dej raws li Yauhas qhia.” 4 Povlauj thiaj hais tias, “Yauhas muab neeg ua kev cai raus dej los qhia tias lawv hloov dua siab tshiab, thiab qhia kom cov tib neeg ntseeg Yexus, tus uas yuav lawv nws qab los.” 5 Thaum lawv hnov li no, lawv thiaj tuav tus Tswv Yexus lub npe ua kev cai raus dej. 6 Thaum Povlauj tsa tes npuab lawv, lub hwj huam dawb huv thiaj los rau saum lawv thiab lawv txawm hais tau lwm yam lus thiab cev Vajtswv lus. 7 Lawv cov ntawd muaj li 12 leeg txiv neej.

8 Povlauj mus qhia hauv tej tsev pe hawm tau peb lub hlis, tsis ntshai li. Nws cev lus qhuab qhia, thiab nws ua tib zoo piav kom cov tib neeg nkag siab txog Vajtswv txoj kev kav.* 9 Tiam sis muaj ib txhia tawv qhawv tsis kam ntseeg li. Lawv thuam tus Tswv Txoj Kev Cai* tab meeg sawv daws. Povlauj thiaj ncaim lawv thiab coj cov thwj tim nrog nws mus. Nws niaj hnub mus qhia hauv Thilanas chav tsev sab laj. 10 Nws qhia li no tau ob lub xyoos nkaus mas cov neeg hauv xeev Axias,* tsis hais cov Yudais thiab cov Kilis puav leej tau hnov tus Tswv txoj lus.

11 Vajtswv pub hwj chim tas zog rau Povlauj ua ntau yam txuj ci tseem ceeb. 12 Txawm tej phuam so hws thiab tej ntaub npua ua hauj lwm uas Povlauj tau kov los, thaum muab coj mus tso rau ntawm cov neeg muaj mob mas lawv tej mob zoo huv si, thiab tseem ua rau dab khiav tawm tib si. 13 Tiam sis cov Yudais ib txhia pheej mus ntiab dab rau ub rau no. Lawv sim tuav Tswv Yexus lub npe hais rau cov neeg raug dab tias, “Kuv tuav Yexus uas Povlauj niaj hnub qhia lub npe ntiab nej tawm.” 14 Thaum ntawd yog Xivas xya leej tub ua li no. Xivas yog cov Yudais ib tug pov thawj hlob. 15 Muaj ib zaug thaum lawv tab tom ntiab dab, tus dab txawm hais rau lawv tias, “Kuv paub Yexus, kuv kuj paub Povlauj thiab. Tiam sis nej ho yog leej twg?” 16 Tam sim ntawd tus yawg raug dab txawm tib plhaw los ntaus lawv ib tug zuj zus mas ntaus yeej lawv tib si. Lawv raug mob sab heev thiab dhia liab qab tawm hauv lub tsev ntawd mus lawm. 17 Cov Yudais thiab cov Kilis uas nyob hauv lub nroog Efexaus puav leej hnov txog zaj no mas lawv ntshai kawg li. Tiam sis tus Tswv Yexus lub npe yim huab nrov ncha. 18 Coob leej uas los ntseeg lawd txawm tuaj lees lawv tej kev txhaum thiab tej uas lawv tau ua. 19 Thiab cov neeg txawj ua khawv koob muaj coob leej sau lawv tej ntawv khawv koob tuaj ua ke rau ntawd, thiab muab hlawv tab meeg sawv daws. Lawv muab tej ntawv ntawd ntaus nqi raug 50,000 lub nyiaj. 20 Twb yog li ntawd, Vajtswv Yehauvas* txoj lus thiaj nrov ncha mus deb zuj zus thiab muaj hwj chim heev.

21 Tom qab tau muaj li no, Povlauj txiav txim siab tias thaum nws mus dhau Maxedaunias thiab Akhayas lawm, nws yuav mus rau Yeluxalees. Nws hais tias, “Tom qab kuv mus rau Yeluxalees, kuv yuav tsum mus rau Loos thiab.” 22 Yog li ntawd, Povlauj thiaj txib Timautes thiab Elatas uas yog ob tug uas pab nws ua hauj lwm mus rau Maxedaunias. Tiam sis Povlauj ho nyob hauv xeev Axias* ib ntus.

23 Lub sij hawm ntawd txawm muaj coob tus sawv tawm tsam cov uas coj tus Tswv Txoj Kev Cai. 24 Muaj ib tug yawg hu ua Demethias uas yog ib tug kws ntaus nyiaj. Nws muab nyiaj ntaus ua tej lub thaj teev Athemis mas ua rau cov kws ntaus nyiaj tau peev ntau heev. 25 Nws hu cov no thiab lwm cov uas txawj ntaus nyiaj ib yam tuaj ua ke thiab hais tias, “Nej yeej paub zoo lawm tias qhov uas peb vam meej yog muaj tes hauj lwm no. 26 Nim no nej twb hnov thiab pom lawm tias tsis yog nyob hauv Efexaus no xwb, tiam sis yuav luag thoob xeev Axias,* tus Povlauj no twb yaum tau coob leej hloov siab lawm. Nws qhia tias tej mlom uas peb xuas tes ua no tsis muaj hwj chim dab tsi. 27 Yog cia muaj li no ces thaum kawg luag yuav saib tsis taus peb tes hauj lwm. Tsis tas li ntawd xwb, luag tseem yuav saib tsis taus lub tuam tsev pe hawm tus poj dab Athemis lawm thiab. Tag nrho lub xeev Axias* thiab neeg thoob ntiaj teb yeej pe hawm nws tiam sis lwm hnub yuav tsis muaj leej twg paub txog nws lub koob meej li lawm.” 28 Thaum cov neeg ntawd hnov li no mas lawv npau taws heev thiab qw ntsho tsuam tias, “Athemis yog tus loj dua ntais hauv Efexaus!”

29 Lub nroog txawm muaj kev kub ntxhov thoob plaws mas cov tib neeg sau nthwv mus rau hauv lub tshav puam. Lawv ntes kiag Ke-as thiab Alithakhas cab mus rau hauv thiab. Nkawd yog neeg Maxedaunias uas nrog Povlauj ua hauj lwm ua ke. 30 Povlauj yeej xav mus pab hais cov tib neeg, tiam sis cov thwj tim tsis pub nws mus. 31 Cov thawj saib xyuas lub tshav puam* muaj ib txhia ncawg Povlauj. Lawv kuj xa lus mus cheem kom nws tsis txhob mus rau hauv lub tshav puam thiab. 32 Sawv daws qw ntsho tsuam tsis paub tog twg. Nyias taus nyias qw, feem coob twb tsis paub tias lawv tuaj ua dab tsi ntawd. 33 Lawv txawm coj Alexadaws tawm hauv pab neeg coob coob los. Cov Yudais muab nws thawb pes ntiag mus rau tom hauv ntej. Alexadaws thiaj co tes kom cov neeg nyob twj ywm vim nws xav hais daws nws zaj. 34 Tiam sis thaum lawv pom tias nws yog neeg Yudais, lawv sawv daws txawm qw ib tsaug ib tsaug tau ob txoos teev tias, “Athemis yog tus loj dua ntais hauv Efexaus!”

35 Thaum tus tswv zos hais tau lawv ntsiag lawd, nws hais tias, “Nej cov uas nyob hauv Efexaus’e, lub nroog Efexaus no yog lub uas tu ntshis tus mlom uas poob saum ntuj los thiab lub tuam tsev rau Athemis uas loj dua ntais. Leej twg yuav tsis paub tej no? 36 Peb sawv daws yeej paub tias muaj li no tiag. Yog li ntawd, tsis txhob ua kub ua ceev, yuav tsum ua lub siab tus tus. 37 Nej coj ob tug yawg no tuaj tsis muaj qab hau dab tsi. Nkawd twb tsis yog tub sab tuaj lws lub tuam tsev. Nkawd kuj tsis tau hais lus tuam mom peb tus poj mlom thiab. 38 Yog Demethias thiab cov uas nrog nws ua hauj lwm xav ua plaub rau leej twg, yeej muaj tej hnub tu plaub ntug, thiab muaj cov neeg txiav plaub txiav ntug los sad? Lawv mam mus hais lawm tod. 39 Tiam sis yog nej muaj teeb meem loj tshaj no, yuav tau teem caij teem nyoog tuaj sab laj raws li nom tswv kev cai. 40 Pab neeg no tuaj ua nqaj ua nqug tsis muaj hauv paus hauv ntsis, ntshai tsam nom tswv yuav hais tias peb txhob txwm ntxeev nom ntxeev tswv.” 41 Tom qab nws hais tej no tas, nws kom lawv rov mus nyias vaj nyias tsev.

20 Thaum dhau tej teeb meem ntawd lawm, Povlauj hu cov thwj tim tuaj. Nws txhawb lawv lub zog thiab qhia tias nws yuav ncaim lawv mus ces nws sawv kev mus rau lub xeev Maxedaunias. 2 Tom qab nws mus ib lub nroog rau ib lub thiab mus txhawb cov ntseeg uas nyob hauv tej nroog ntawd, nws mam mus rau teb chaws Kilis. 3 Povlauj nyob ntawd tau peb lub hlis. Thaum nws tab tom yuav nce nkoj mus rau Xilias, nws hnov tias cov Yudais tuav tswv yim yuav muab nws tua. Nws thiaj txiav txim siab hla Maxedaunias rov mus. 4 Cov uas nrog Povlauj mus yog Xaupataws uas yog Pilas tus tub nyob Npelias tuaj, Alithakhas thiab Xekhudas uas nyob Thexalaunikas tuaj, Ke-as uas nyob Dawnpis tuaj, thiab Timautes. Thikikas thiab Thaufimas uas nyob lub xeev Axias* tuaj kuj nrog lawv mus thiab. 5 Lawv cov no ua ntej mus tos peb hauv lub nroog Rhau-as. 6 Thaum dhau lub sij hawm ua Kev Cai Noj Ncuav Tsis Xyaw Keeb,* peb mam caij nkoj hauv Filipis mus. Peb mus tsib hnub mam txog lawv rau hauv Rhau-as ces peb nyob tau xya hnub qhov ntawd.

7 Lub lim tiam ntawd thawj hnub,* peb sawv daws tuaj noj ib pluag mov ua ke. Povlauj txawm cev lus qhuab qhia vim tias hnub tom qab xwb, nws yuav ncaim sawv daws mus. Nws qhia mus txog ib tag hmo. 8 Chav tsev uas peb tuaj sib txoos ntawd nyob rau txheej saud. Peb taws teeb lam lug. 9 Muaj ib tug tub hluas hu ua Yuthikhas zaum ntawm qhov rais. Thaum Povlauj tab tom qhia, nws tsaug zog ncaws nruj nris ces nws txawm poob nthav ntawm lub qhov rais uas yog txheej peb mus rau hauv. Thaum lawv nqis mus txog hauv nws twb tuag lawm. 10 Tiam sis thaum Povlauj mus txog, nws txawm pw tsuam khawm nkaus tus tub hluas thiab hais tias, “Txhob poob siab, nws ciaj sia* lawm.” 11 Povlauj mam rov mus rau saud. Nws pib daus mov noj ces sawv daws noj haus ua ke. Nws nrog sawv daws tham ib hmos kaj ntug ces nws mam ncaim lawv mus. 12 Lawv coj tus tub hluas mus tsev mas sawv daws zoo siab kawg li uas nws rov ciaj lawm.

13 Peb thiaj caij nkoj ua ntej mus rau lub nroog Axaus. Tiam sis Povlauj taug kev mus xwb. Nws twb hais lawm tias nws mam ntsib peb nrad thiab nrog peb caij nkoj mus. 14 Thaum Povlauj tuaj txog hauv Axaus, nws mam nce nkoj nrog peb mus rau lub nroog Mithilenes. 15 Hnub tom qab ntawd, peb ho caij nkoj ntawm Mithilenes mus nres ze ntawm koog pov txwv Khi-aus. Tiam sis hnub tom qab ntawd, peb mus txog koog pov txwv Xamos ces ib hnub tom qab ntxiv peb thiaj mus txog Milethas. 16 Povlauj npaj siab tias nws yuav caij nkoj hla Efexaus mus kom thiaj tsis tau nres hauv lub xeev Axias.* Nws maj maj mus rau Yeluxalees seb puas ncav cuag hnub ua Kev Cai Pheetekos.*

17 Tiam sis thaum Povlauj tseem nyob hauv Milethas, nws xa xov mus rau Efexaus kom cov txwj laus hauv lub koom txoos tuaj cuag nws. 18 Thaum lawv tuaj txog, nws hais rau lawv tias, “Nej yeej paub zoo tias txij hnub uas kuv tuaj tsuj kiag lub xeev Axias* no, kuv tau coj li cas rau nej. 19 Kuv txo hwj chim ua tus Tswv tes hauj lwm ib yam li tus qhev. Ntau zaus kuv los kua muag kawg li thiab ntsib kev txom nyem vim cov Yudais pheej tuav hauv ua phem rau kuv. 20 Txawm li ntawd los tej yam zoo uas yuav pab tau nej, kuv yeej qhia tsis zais hlo li. Kuv qhia nej tab meeg sawv daws thiab qhia ib lub tsev rau ib lub. 21 Kuv yeej ua tim khawv qhia tshab tshab rau cov Yudais thiab cov Kilis tib si tias yuav tsum hloov dua siab tshiab los cuag Vajtswv, thiab yuav tsum ntseeg peb tus Tswv Yexus. 22 Zaum no lub hwj huam yuav coj kuv mus rau Yeluxalees, tiam sis kuv tsis paub xyov kuv yuav raug dab tsi. 23 Thaum kuv mus ib lub nroog rau ib lub mas lub hwj huam dawb huv yeej ua tim khawv tsis tseg rau kuv tias kuv yuav raug kaw thiab raug kev txom nyem nyuaj siab. 24 Txawm li cas los xij, kuv tsis suav tias kuv txoj sia* tseem ceeb, tsuav yog kuv dhia mus txog tom kawg thiab ua tiav tes hauj lwm uas tus Tswv Yexus muab cob rau kuv xwb. Tes hauj lwm ntawd yog ua tim khawv tshab tshab rau txhua tus txog txoj xov zoo tias Vajtswv muaj kev hlub nplua mias.

25 “Nim no kuv paub tias nej cov uas tau hnov kuv tshaj tawm txog Vajtswv txoj kev kav* yuav tsis pom kuv ntxiv lawm. 26 Hnub no ntag kuv hu nej tuaj ua tim khawv tias kuv tsis ris leej twg tej ntshav. 27 Kuv twb qhia txhua yam txog Vajtswv lub ntsiab rau nej lawm, kuv tsis zais ib los li. 28 Nej yuav tsum ua tib zoo saib xyuas nej tus kheej thiab pab yaj uas lub hwj huam dawb huv tsa nej ua cov saib xyuas. Cia li tu Vajtswv lub koom txoos li tus tswv yug yaj. Vajtswv tau muab nws Leej Tub cov ntshav los txhiv lawv. 29 Kuv paub tias thaum kuv mus lawd, yuav muaj tej hma los xyaw nej mas lawv yuav tsis hlub pab yaj. 30 Txawm nej cov los yuav muaj ib txhia muab qhov tseeb ntxeev kom ntxias tau cov thwj tim raws lawv qab.

31 “Yog li ntawd, cia li ceev faj. Nco ntsoov tias peb lub xyoos uas kuv nrog nej nyob, kuv ntuas nej tsis tseg nruab hnub hmo ntuj mas los kuv kua muag kawg li. 32 Thov kom Vajtswv thiab nws txoj lus uas qhia txog nws txoj kev hlub nplua mias tsom kwm nej. Txoj lus ntawd yuav txhawb nej lub zog thiab nej yuav tau tej qub txeeg qub teg uas cog tseg rau cov uas dawb huv. 33 Kuv tsis ntshaw leej twg tej nyiaj tej kub thiab tej tsoos tsho hnav. 34 Nej yeej paub lawm tias kuv ob txhais tes no khwv los yug kuv thiab cov uas nrog kuv ua ke, peb thiaj tau noj tau hnav. 35 Txhua yam uas kuv tau ua lawd qhia nej tias peb yuav tsum khwv li no thiaj pab tau cov uas qaug zog, thiab nco ntsoov tus Tswv Yexus tej lus uas hais tias, ‘Thaum yus pub rau luag, yus zoo siab dua li thaum luag pub rau yus.’”

36 Thaum Povlauj hais tej no tas rau lawv, nws nrog lawv txhos caug thov Vajtswv ua ke. 37 Mas lawv sawv daws txawm quaj heev thiab khawm nkaus Povlauj nwj. 38 Lawv nyuaj siab heev rau Povlauj lo lus tias lawv yuav tsis pom nws ntxiv lawm. Tom qab ntawd, lawv thiaj nrog Povlauj mus tom lub nkoj.

21 Peb ua ib siab tso lawv tseg caij nkoj mus mas cua ntsawj lub nkoj ncaj nraim mus rau lub nroog Khos. Hnub tom qab ntawd peb mam li mus txog lub nroog Laudes. Tom qab ntawd peb ho mus rau lub nroog Patalas. 2 Peb nrhiav tau ib lub nkoj uas tab tom yuav hla mus rau koog Finixias, peb thiaj caij lub ntawd mus. 3 Peb pom lub pov txwv Xaipas nyob rau sab laug tiam sis peb ncaj qha mus rau lub xeev Xilias thiab mus nres ntawm lub nroog Thailab, lub nkoj yuav mus thau nra rau qhov ntawd. 4 Thaum peb mus nrhiav tau cov thwj tim lawd, peb nrog lawv nyob xya hnub nkaus. Cov kwv tij pheej txwv tsis pub Povlauj mus rau lub nroog Yeluxalees vim tej uas lub hwj huam tau qhia rau lawv. 5 Thaum txog caij mus lawd peb thiaj sawv kev mus tiam sis cov kwv tij sawv daws, tsis hais poj niam me nyuam tib si, txawm xa peb mus txog sab nraum lub nroog. Peb txhos caug ntawm ntug hiav txwv thov Vajtswv ua ke. 6 Sawv daws sib fim tas ces peb txawm nce nkoj mus lawm. Cov kwv tij nyias mam rov mus nyias tsev.

7 Thaum peb caij nkoj ntawm lub nroog Thailab mus txog lub nroog Thaulemais peb nqes nkoj mus saib cov kwv tij thiab nrog lawv nyob tau ib hnub. 8 Hnub tom qab ntawd peb ho mus txog lub nroog Xixalias ces peb thiaj mus so hauv Filis tus uas tshaj tawm txoj xov zoo lub tsev. Nws yog ib tug ntawm xya leej txiv neej uas raug xaiv.* 9 Filis muaj plaub tug ntxhais tsis tau yuav txiv uas puav leej cev Vajtswv lus. 10 Thaum peb so ntawd tau ob peb hnub lawd, muaj ib tug cev Vajtswv lus hu ua Akanpas tuaj hauv xeev Yudias tuaj. 11 Akanpas tuaj rau ntawm peb thiab muab Povlauj txoj siv sia rov los khi Akanpas tej tes taw ces nws hais tias, “Lub hwj huam dawb huv hais li no, ‘Tus yawg uas sia txoj siv no yuav raug cov Yudais hauv Yeluxalees muab khi li no. Lawv yuav muab nws cob rau lwm haiv neeg txhais tes.’” 12 Thaum peb hnov li no, peb thiab cov uas nyob ntawd txawm thov kom Povlauj txhob mus hauv Yeluxalees. 13 Povlauj thiaj hais tias, “Nej quaj ua dab tsi, nej xav ua rau kuv poob siab lod? Tsis yog kuv yeem raug khi xwb, tiam sis kuv yeem raug tua hauv Yeluxalees vim kuv ntseeg tus Tswv Yexus.” 14 Peb cheem tsis tau Povlauj li, peb thiaj tso tseg thiab hais tias, “Thov kom muaj raws li Vajtswv Yehauvas* lub siab nyiam.”

15 Tom qab ntawd, peb thiaj npaj sawv kev mus rau Yeluxalees. 16 Cov thwj tim uas nyob hauv Xixalias ib txhia kuj nrog peb mus thiab. Lawv coj peb mus ua qhua hauv Manaxoos uas tuaj hauv Xaipas tuaj lub tsev. Nws yog ib tug thwj tim uas twb ntseeg puag ntxov lawm. 17 Thaum peb mus txog hauv Yeluxalees, cov kwv tij zoo siab hlo tos txais peb. 18 Hnub tom qab Povlauj nrog peb mus ntsib Yakaunpaus mas tag nrho cov txwj laus kuj tuaj ntawd thiab. 19 Povlauj thiaj nrog lawv tham thiab piav txhua yam uas Vajtswv tau ua tab meeg lwm haiv neeg thaum nws mus tshaj tawm txoj xov zoo rau lawv.

20 Thaum cov txwj laus hnov li no lawv tsa suab qhuas Vajtswv tiam sis lawv hais rau Povlauj tias, “Tus kwv tij, muaj ntau txhiab tus Yudais tau los ntseeg lawm, thiab lawv mob siab Mauxes Txoj Kev Cai heev. 21 Tiam sis lawv hnov lus paj lus cua tias koj qhia kom cov Yudais uas nyob txawv teb chaws tawm tsam Mauxes Txoj Kev Cai. Thiab koj hais tias tsis tas muab tej me tub ua kev cai txiav* thiab tsis tas coj kev cai li cov Yudais ib txwm coj lawm. 22 Nim no peb yuav ua li cas? Lawv yeej yuav hnov tias koj tuaj txog hauv no lawm. 23 Thov ua li peb hais no, muaj plaub tug txiv neej uas tseem tab tom ua raws li lawv tau cog lus rau Vajtswv. 24 Cia li coj lawv nrog koj mus ua kev cai ntxuav. Them lawv tej nuj nqis huv si kom lawv thiaj tau chais plaub hau.* Thaum sawv daws pom koj ua li no ces lawv yuav paub tias tej lus paj lus cua uas hais txog koj tsis muaj tiag rau qhov koj yeej mloog lus thiab coj raws li Mauxes Txoj Kev Cai. 25 Tiam sis hais txog lwm haiv neeg uas tau los ntseeg mas, peb twb sau ib tsab ntawv mus rau lawv txog qhov uas peb tau txiav txim lawm. Peb sau tias, yuav tsum caiv yam uas tau muab fij rau tej dab tej mlom, caiv ntshav, caiv tej tsiaj zawm caj dab tuag thiab tsis txhob ua kev plees kev yi.”*

26 Hnub tom qab Povlauj thiaj coj cov txiv neej ntawd nrog nws mus ua kev cai ntxuav. Lawv mus hauv lub tuam tsev thiab qhia seb tshuav pes tsawg hnub lawv mam li ua kev cai ntxuav tas, kom lawv thiaj muab tau ib leeg ib tug tsiaj rau tus pov thawj tua fij.

27 Thaum ua kev cai ntxuav* yuav puv xya hnub, cov Yudais uas nyob lub xeev Axias* tuaj pom dheev Povlauj hauv lub tuam tsev. Lawv txawm tshum cov tib neeg kom ntes Povlauj. 28 Lawv qw tias, “Ib tsoom neeg Ixayees! Thov pab lauj! Tus yawg no yog tus uas qhia tib neeg qhov txhia chaw kom tawm tsam peb haiv neeg thiab peb txoj Kev Cai thiab lub tuam tsev no ntag. Nws tseem coj cov Kilis los hauv lub tuam tsev ua puas tsuas qhov chaw dawb huv no thiab.” 29 Lawv nyuam qhuav pom Thaufimas uas nyob Efexaus tuaj nrog Povlauj ua ke hauv lub nroog. Lawv thiaj xav tias ntshe yog Povlauj coj nws los hauv lub tuam tsev. 30 Thoob lub nroog muaj kev ntxhov hnyo mas cov tib neeg dhia loo tuaj ntes Povlauj cab tawm hauv lub tuam tsev mus. Tam sim ntawd luag muab tej rooj loog kaw nkaus cia. 31 Thaum lawv tab tom muab nws ntaus kom tuag, muaj neeg xa xov mus rau tus thawj tub rog* tias muaj kev kub ntxhov hauv Yeluxalees. 32 Tus thawj tub rog thiaj coj kiag tub rog thiab lwm cov thawj tub rog* mus rau ntawm lawv. Thaum cov tib neeg pom dheev tus thawj tub rog thiab pab tub rog, lawv thiaj tseg tsis ntaus Povlauj lawm.

33 Tus thawj tub rog* los rau ntawm Povlauj thiab muab nws ntes kiag. Nws hais kom luag muab ob txoj saw hlau khi Povlauj. Nws thiaj nug tias Povlauj yog leej twg thiab nws tau ua txhaum dab tsi. 34 Tiam sis cov tib neeg txawm qw ntsho tsuam tsis paub tog twg li. Tus thawj tub rog* thiaj mloog tsis tau ib los tseem ceeb vim ntxhov dhau lawm. Nws thiaj hais kom coj Povlauj mus rau hauv lub yeej tub rog. 35 Tiam sis thaum lawv mus txog ntawm cov taw ntaiv cov tib neeg ua nruj ua tsiv heev, cov tub rog thiaj muab Povlauj kwv hlo mus. 36 Pab neeg ntawd pheej qw caum lawv qab tias, “Muab nws tua kiag!”

37 Thaum lawv tab tom yuav mus rau hauv lub yeej tub rog, Povlauj thov tus thawj tub rog* tias, “Kuv thov hais ob peb los rau koj puas tau?” Nws teb tias, “Koj paub lus Kilis thiab lod? 38 Koj puas yog tus neeg Iyiv uas tsis ntev los no ntxias tau 4,000 leej txiv neej sia ntaj sawv tawm tsam nom tswv es coj lawv mus rau teb chaws moj sab qhua lawd?” 39 Povlauj teb tias: “Kuv yog neeg Yudais. Kuv yug hauv lub nroog Thaxas, xeev Xilixias, thiab yog ib tug pej xeem hauv lub nroog tseem ceeb ntawd. Kuv thov koj cia kuv hais ob peb los rau cov tib neeg.” 40 Thaum tus thawj tub rog* tso cai lawd, Povlauj thiaj sawv ntawm tus ntaiv thiab co tes rau cov tib neeg. Thaum lawv ntsiag lawm nws thiaj hais lus Henplais rau lawv tias,

22 “Cov kwv tij thiab cov uas yog txiv tsev, thov nej mloog kuv hais tso.” 2 Thaum lawv hnov nws hais lus Henplais rau lawv ces lawv thiaj ntsiag tas ua twj ywm mloog. Nws hais rau lawv tias, 3 “Kuv yog neeg Yudais, kuv yug hauv lub nroog Thaxas, xeev Xilixias. Kamali-ees yog tus xib hwb qhia ntawv rau kuv hauv lub nroog no ntag. Kuv kawm paub txhua nqe thiab coj raws li Mauxes Txoj Kev Cai uas peb poj koob yawm txwv ib txwm coj. Kuv yeej kub siab lug ua Vajtswv tes hauj lwm ib yam li nej. 4 Kuv tsim txom cov uas coj tus Tswv Txoj Kev Cai. Tsis hais poj niam txiv neej los kuv ntes coj mus kaw hauv tsev loj cuj tib si thiab muab lawv tua pov tseg. 5 Tus tuam pov thawj hlob thiab cov kev txwj laus neeg puav leej ua tau tim khawv txog tej no. Kuv thov ntawv tso cai ntawm lawv nqa mus rau cov thawj coj Yudais hauv lub nroog Damaxakas. Kuv thiaj npaj mus ntes cov ntseeg hauv lub nroog ntawd thiab muab lawv khi cab los rau txim hauv Yeluxalees.

6 “Tiam sis thaum kuv mus yuav txog Damaxakas, kwv lam tav su, txawm muaj duab tshav ntuj ci dawb paug saum ntuj tuaj vij nkaus kuv. 7 Kuv thiaj ntog kiag rau hauv pem teb, thiab hnov ib lub suab hais rau kuv tias, ‘Xolaus’os, Xolaus’e, koj tsim txom kuv ua dab tsi?’ 8 Kuv thiaj nug tias, ‘Tus Tswv, koj yog leej twg?’ Nws teb tias, ‘Kuv yog Yexus tus neeg Naxales, tus uas koj tsim txom ntag.’ 9 Cov txiv neej uas nrog kuv ua ke pom tus duab tshav ntuj tiam sis lawv tsis hnov lub suab uas hais lus rau kuv. 10 Kuv thiaj nug tias, ‘Tus Tswv, kuv yuav ua li cas?’ Tus Tswv teb kuv tias, ‘Cia li sawv tsees mus rau hauv Damaxakas mas yuav muaj neeg qhia txhua yam uas koj yuav tsum tau ua.’ 11 Tus duab ntawd ci kawg nkaus li, ua rau kuv tsis pom kev lawm. Cov uas nrog kuv thiaj cab kuv tes coj kuv mus rau hauv lub nroog Damaxakas.

12 “Muaj ib tug yawg hu ua Ananias uas hwm Vajtswv thiab coj raws li Mauxes Txoj Kev Cai. Cov Yudais uas nyob hauv lub nroog ntawd yeej qhuas txog nws. 13 Nws txawm tuaj saib kuv. Nws los sawv ntawm kuv thiab hais tias, ‘Kwv tij Xolaus’e, cia li rov pom kev!’ Tam sim ntawd, kuv tsa hlo qhov muag saib ua ciav kuv txawm pom nws lawm. 14 Nws hais rau kuv tias, ‘Peb cov yawg koob tus Vajtswv tau xaiv koj ua tus paub tej uas nws lub siab nyiam, thiab kom koj pom tus uas ncaj ncees thiab hnov nws lub suab. 15 Nws xaiv koj ua tim khawv qhia rau txhua leej txhua tus txog tej uas koj tau hnov thiab tau pom. 16 Koj tseem tos dab tsi? Cia li sawv tsees ua kev cai raus dej, thiab tuav Yexus lub npe thov, Vajtswv thiaj zam koj tej kev txhaum.’

17 “Tiam sis thaum kuv rov los rau hauv Yeluxalees thiab tseem tab tom thov Vajtswv hauv lub tuam tsev, kuv ua yog toog 18 pom nws hais rau kuv tias, ‘Cia li tawm hauv Yeluxalees mus tsuag tsuag, rau qhov lawv yuav tsis mloog tej uas koj ua tim khawv txog kuv.’ 19 Kuv thiaj hais tias, ‘Tus Tswv, lawv yeej paub tias yav tas los kuv mus ib lub tsev pe hawm rau ib lub, mus ntes cov uas ntseeg koj thiab muab lawv nplawm. 20 Thaum lawv muab Xatefanaus uas yog koj ib tug tim khawv tua, kuv yeej pom zoo thiab. Kuv sawv ntawd zov cov neeg uas tua nws tej tsho.’* 21 Tiam sis nws hais rau kuv tias, ‘Cia li mus, rau qhov kuv yuav txib koj mus rau lwm haiv neeg uas nyob deb heev.’”

22 Thaum lawv mloog nws hais tas lawv txawm qw nrov nrov tias, “Tsim nyog muab tus neeg zoo li no tua pov tseg!” 23 Lawv qw nrov heev, muab lawv tej tsho* cuam rau ub rau no, thiab tsuab hmoov av w rau saum ntuj. 24 Tus thawj tub rog* thiaj hais kom coj Povlauj los rau hauv lub yeej thiab muab nws nplawm xwv thiaj nug tau tias yog tim li cas cov tib neeg yuav tawm tsam nws heev ua luaj. 25 Tiam sis thaum lawv muab Povlauj khi yuav muab nws nplawm, nws hais rau tus thawj tub rog* uas sawv ntawd tias, “Puas raug cai rau nej nplawm ib tug neeg Loos uas tsis tau taug nws zaj?” 26 Thaum nws hnov li ntawd nws thiaj mus hais rau tus thawj tub rog* tod tias, “Yuav ua li cas? Rau qhov tus yawg no yog ib tug neeg Loos.” 27 Tus thawj tub rog tod thiaj los hais rau Povlauj tias, “Qhia kuv soj, koj yog neeg Loos lod?” Povlauj teb tias, “Yog.” 28 Tus thawj tub rog* teb tias, “Kuv them nyiaj kim heev kuv thiaj tau los ua neeg Loos hod.” Povlauj teb tias, “Tiam sis kuv yeej yug los ua neeg Loos.”

29 Tam sim ntawd, cov txiv neej uas tab tom yuav thom thiab yuav nplawm Povlauj txawm thaub ncho lawm. Tus thawj tub rog* kuj pib ntshai thiab, rau qhov Povlauj yog neeg Loos tiam sis nws twb muab saw hlau khi Povlauj lawm.

30 Nws xav paub tseeb tias vim li cas cov Yudais yuav tawm tsam Povlauj ua luaj. Hnub tom qab, nws thiaj kom muab tej saw hlau uas khi Povlauj daws thiab kom cov pov thawj hlob thiab tag nrho lub rooj Xahenrees* tuaj txoos ua ke. Nws thiaj coj Povlauj los sawv tab meeg sawv daws.

23 Povlauj ntsia ntsoov lub rooj Xahenrees* thiab hais tias, “Cov kwv tij’e, kuv yeej hais tau tab meeg Vajtswv tias kuv tsis tau ua txhaum dab tsi los txog niaj hnub nim no. Kuv lub siab yeej tsis nkaug kuv li.” 2 Tam sim ntawd tus tuam pov thawj hlob Ananias thiaj sam hwm kom cov uas sawv ntawd ntaus Povlauj qhov ncauj. 3 Povlauj thiaj hais rau nws tias, “Niag neeg siab nkhaus,* Vajtswv yuav ntaus koj ntag. Koj txiav txim rau kuv raws li Mauxes Txoj Kev Cai tiam sis koj ho hla txoj Kev Cai ntawd es sam hwm kom luag ntaus kuv. Ua li no puas yog lawd?” 4 Cov uas sawv ib cag ntawd txawm hais tias, “Koj tseem hais lus saib tsis taus Vajtswv tus tuam pov thawj hlob thiab lod?” 5 Povlauj thiaj teb tias, “Cov kwv tij, kuv tsis paub tias nws yog tus tuam pov thawj hlob. Yeej muaj lus sau cia tias, ‘Tsis txhob hais lus saib tsis taus tus uas kav koj haiv neeg.’”

6 Povlauj paub tias lub rooj Xahenrees,* ib nrab yog cov Xadukais thiab ib nrab yog cov Falixais, nws thiaj hais nrov nrov tias, “Cov kwv tij’e, kuv yog ib tug Falixais, kuv tej yawg koob kuj yog Falixais thiab. Twb yog kuv ntseeg tias cov tuag yuav ciaj sawv rov los, luag thiaj coj kuv tuaj txiav txim ntawm no.” 7 Thaum Povlauj hais li ntawd tas cov Falixais thiab cov Xadukais txawm sib cav muaj ceem heev, lub rooj sab laj thiaj tawg kiag ua ob pab. 8 Cov Xadukais ntseeg tias cov tuag ciaj tsis tau sawv rov los, thiab tsis muaj tub txib saum ntuj,* tiam sis cov Falixais ntseeg tias muaj tej no tib si. 9 Sawv daws txawm sib nthe ntsoog qees. Cov Falixais uas ua xib hwb* ib txhia thiaj sawv tsees nthe nqho tias, “Peb pom tias tus yawg no yeej tsis tau ua txhaum dab tsi li. Tsam ho yog ib tug tub txib saum ntuj* hais lus rau nws ne?” 10 Thaum sawv daws sib cav heev lawm, tus thawj tub rog* ntshai tsam lawv muab Povlauj tua. Nws thiaj kom cov tub rog mus chua ntia Povlauj los rau hauv lub yeej tub rog.

11 Hmo ntawd tus Tswv txawm los tshwm rau Povlauj thiab hais tias, “Ua siab loj! Koj ua tim khawv txog kuv thoob Yeluxalees li cas ces koj yuav ua tim khawv txog kuv li ntawd hauv Loos thiab.”

12 Thaum kaj ntug, cov Yudais thiaj tuav hauv thiab cog lus* tias lawv yuav tsis noj tsis haus mus txog thaum lawv tua tau Povlauj. 13 Muaj tshaj li 40 tus txiv neej uas tuav hauv thiab cog lus li ntawd. 14 Cov txiv neej ntawd thiaj mus cuag cov pov thawj hlob thiab cov txwj laus, thiab hais tias, “Peb twb cog lus lawm tias peb yuav tsis noj tsis haus mus txog thaum peb tua tau Povlauj tso. 15 Yog li ntawd, nej thiab lub rooj Xahenrees* cia li ua txuj hais rau tus thawj tub rog tias nej xav taug Povlauj zaj ntxiv, kom nws coj Povlauj los rau nej. Thaum lawv coj Povlauj los yuav txog, peb mam muab nws tua kiag pov tseg.”

16 Povlauj tus muam tus tub hnov txog qhov uas lawv tuav hauv tua Povlauj. Nws thiaj los qhia rau Povlauj hauv lub yeej tub rog. 17 Povlauj thiaj hu ib tug tub rog los rau ntawm nws thiab hais tias, “Thov coj tus hluas no mus cuag tus thawj tub rog. Nws muaj lus tseem ceeb yuav hais.” 18 Tus tub rog thiaj coj tus hluas mus cuag tus thawj tub rog thiab hais tias, “Povlauj tus uas raug kaw kom kuv coj tus hluas no los cuag koj vim nws muaj lus tseem ceeb yuav qhia koj.” 19 Tus thawj tub rog thiaj tuav tus hluas ntawd tes coj mus rau ib cag thiab nug nws twj ywm tias, “Koj muaj lus dab tsi yuav qhia kuv?” 20 Nws teb tias, “Cov Yudais twb hais haum lawm tias lawv yuav thov kom koj coj Povlauj mus rau lub tsev Xahenrees* tag kis. Lawv ua txuj xav taug Povlauj zaj ntxiv. 21 Txhob ntseeg lawv rau qhov twb muaj 40 tawm tus txiv neej cog lus lawm tias lawv yuav tsis noj tsis haus ib yam dab tsi mus txog thaum lawv tua tau Povlauj. Lawv yuav zov kev tos nej. Lawv twb npaj txhij lawm, tos koj tso cai xwb.” 22 Ua ntej tus thawj tub rog tso tus tub hluas mus, nws nkaw lus tias, “Txhob cia leej twg paub tias koj twb qhia tej no rau kuv lawm.”

23 Tus thawj tub rog thiaj hais rau ob tug tub rog tias, “Cia li mus txhij 200 leej tub rog, 70 leej tub rog caij nees, thiab 200 leej tub rog nqa hmuv. Thaum cuaj teev tsaus ntuj mas nej yuav tsum sawv kev mus kom txog ntua Xixalias. 24 Npaj nees rau Povlauj caij. Tsis txhob pub nws raug xwm dab tsi thiab coj nws mus kom txog ntua tus tswv xeev Felis.” 25 Tus thawj tub rog kuj sau tsab ntawv nram no mus thiab.

26 “Ntawm no yog Khaladias Lixias ua tus sau rau yawg hlob Felis uas yog tus tswv xeev. Vam tias koj yuav ntsib kev noj qab nyob zoo! 27 Tus txiv neej no raug cov Yudais ntes thiab lawv yuav luag muab nws tua. Tiam sis thaum kuv paub tias nws yog neeg Loos, kuv thiab kuv cov tub rog thiaj maj nroos mus cawm nws. 28 Kuv xav paub seb nws ua txhaum dab tsi es cov Yudais ho liam txim rau nws. Kuv thiaj coj nws mus cuag lub rooj Xahenrees.* 29 Raws li kuv pom, lawv tsuas liam txog lawv txoj Kev Cai uas hais tsis sib haum xwb. Tsis muaj ib lub txim uas yuav tsim nyog muab nws tua los sis muab nws kaw. 30 Tiam sis muaj neeg ntxhi rau kuv tias luag tuav hauv yuav muab tus txiv neej no tua. Yog li ntawd, kuv thiaj xa nws tuaj cuag koj. Kuv nkaw lus rau cov neeg uas iab liam nws tias lawv yuav tsum tuaj hais plaub ntawm koj.”

31 Cov tub rog thiaj coj Povlauj mus hmo ntuj raws li tus thawj tub rog tau sam hwm thiab mus txog lub nroog Athipatis. 32 Hnub tom qab ntawd, cov tub rog caij nees nrog Povlauj mus tiam sis lwm cov rov qab mus rau lub yeej tub rog lawm. 33 Cov tub rog caij nees mus txog ntua lub nroog Xixalias. Lawv nqa tsab ntawv thiab coj Povlauj mus cob nkaus rau tus tswv xeev. 34 Thaum tus tswv xeev nyeem tsab ntawv tas, nws nug seb Povlauj nyob lub xeev twg tuaj. Povlauj teb tias nws nyob lub xeev Xilixias tuaj. 35 Tus tswv xeev hais rau Povlauj tias, “Thaum cov yeej kom* tuaj txog, kuv mam li mloog koj zaj.”* Tus tswv xeev thiaj sam hwm kom tub rog zov Povlauj rau hauv Helauj lub loog.

24 Tsib hnub tom qab ntawd tus tuam pov thawj hlob Ananias tuaj txog hauv Xixalias. Nws coj ib co txwj laus thiab ib tug kws lij choj hu ua Thawtulas nrog nws tuaj thiab. Lawv thiaj kom Povlauj rau tus tswv xeev. 2 Thaum hu Thawtulas los hais, nws kom Povlauj li no,

“Yawg hlob Felis, twb yog muaj koj, lub teb lub chaw thiaj nyob tiaj nyob tus. Koj yog tus pom deb pom dav, muaj laj lim tswv yim, peb haiv neeg thiaj vam meej. 3 Yawg hlob Felis, peb xav ua koj tsaug. Txawm peb nyob qhov twg los peb yeej ris koj txiaj ntsig rau tej no tib si. 4 Kuv yeej tsis xav tab kaum koj, tiam sis thov koj ua siab ntev mloog peb hais ob peb los rau koj. 5 Peb pom tias tus yawg no yog ib tug neeg xeeb plaub, tshum kom cov Yudais thoob ntiaj teb ntxeev nom ntxeev tswv. Nws yog ib tug uas ntaus thawj hauv pab Naxales. 6 Nws yuav luag ua puas tsuas lub tuam tsev, peb thiaj ntes kiag nws. 7* —— 8 Thaum koj taug nws zaj, koj yuav pom tias yeej muaj tseeb raws li peb tau kom no tiag.”

9 Tam sim ntawd cov Yudais kuj nrog nws ua ib nqag liam tias tej no yeej muaj tseeb tiag. 10 Thaum tus tswv xeev ncaws hau kom Povlauj daws nws zaj, Povlauj teb tias,

“Kuv paub tias koj twb txiav txim rau peb haiv neeg tau ntau xyoo lawm. Yog li, kuv zoo siab daws kuv zaj rau koj mloog. 11 Thaum koj taug qab, koj yuav pom tias txij thaum kuv mus pe hawm Vajtswv hauv lub nroog Yeluxalees tsuas muaj 12 hnub nkaus xwb. 12 Lawv yeej tsis tau pom kuv nrog ib tug twg hauv lub tuam tsev sib cav sib ceg li. Lawv kuj tsis pom kuv tshum kom cov tib neeg muaj kev kub ntxhov hauv lub tsev pe hawm los sis hauv nroog hlo li thiab. 13 Lawv yeej tsis muaj pov thawj dab tsi los ua tim khawv txog tej uas lawv liam kuv no. 14 Tiam sis kuv lees hlo tias kuv yeej pe hawm kuv tej yawg koob tus Vajtswv raws li pab uas lawv hu ua Naxales ntawd. Kuv kuj ntseeg txhua yam hauv txoj Kev Cai thiab txhua yam uas cov cev Vajtswv lus sau tseg. 15 Kuv thiab cov neeg no yeej cia siab rau Vajtswv tias cov ncaj ncees* thiab cov tsis ncaj yuav ciaj sawv hauv qhov tuag rov los. 16 Twb yog li ntawd, kuv thiaj rau siab ntso ua kuv lub neej kom haum Vajtswv siab thiab tsis hla neeg tej kev cai, kuv thiaj kaj siab. 17 Tom qab ntau lub xyoos, kuv rov mus rau Yeluxalees thiab nqa khoom mus pub kuv haiv neeg uas txom nyem thiab muab khoom fij rau Vajtswv. 18 Thaum kuv tab tom ua tej no, lawv pom kuv hauv lub tuam tsev. Thaum ntawd kuv twb ua kev cai ntxuav tas lawm. Tsis muaj neeg coob nrog kuv ua ke, kuv kuj tsis tau tsim teeb meem rau leej twg li. Tiam sis muaj ib co Yudais nyob lub xeev Axias* tuaj rau ntawd. 19 Yog lawv cov ntawd muaj lus cov nyom dab tsi txog kuv, tsim nyog lawv tuaj hais lawv zaj rau ntawm koj no. 20 Tsis yog li ntawd ces cia cov txiv neej no qhia los seb, lawv pom kuv ua dab tsi txhaum tab meeg lub rooj Xahenrees.* 21 Lawv tsuas tib qhov uas kuv hais nthe nqho tias, ‘Kuv ntseeg tias cov tuag yuav ciaj sawv rov los, luag thiaj coj kuv tuaj hais plaub ntawm no!’”

22 Tiam sis Felis paub zoo txog tus Tswv Txoj Kev Cai.* Nws thiaj muab ncua cia thiab hais tias, “Thaum tus thawj tub rog* Lixias tuaj txog, kuv mam tu koj tshaj plaub no.” 23 Felis thiaj sam hwm rau tus thawj tub rog* kom txib tub rog zov Povlauj tiam sis tsis tas zov nruj, thiab cia Povlauj cov neeg tuaj tu nws.

24 Ob peb hnub tom qab ntawd Felis nkawd ob niam txiv txawm tuaj saib Povlauj. Nws tus poj niam yog neeg Yudais, npe hu ua Nruxilas. Nws hu kom Povlauj los ces nkawd mloog Povlauj qhia txog txoj kev ntseeg Yexus Khetos.* 25 Povlauj qhia txog kev ncaj ncees, kev tswj lub siab, thiab Vajtswv txoj kev txiav txim tom hauv ntej. Felis txawm ntshai thiab hais tias, “Koj mus los tau, lwm hnub muaj sij hawm kuv mam hu koj los tham dua.” 26 Nws vam tias Povlauj yuav muab nyiaj xiab nws. Twb yog li ntawd, nws thiaj ib sij hu Povlauj los nrog nws tham ib zaug. 27 Thaum dhau ob lub xyoos lawd Phaukias Fexatas los hloov Felis chaw ua tswv xeev. Tiam sis Felis xav kom cov Yudais qhuas nws ces nws thiaj tsis tso Povlauj tawm.

25 Thaum Fexatas tuaj txog lub xeev Yudias thiab ua tus tswv xeev tau peb hnub, nws txawm sawv kev hauv Xixalias mus rau Yeluxalees. 2 Cov pov thawj hlob thiab cov neeg Yudais uas tseem ceeb thiaj tuaj kom Povlauj rau nws. Lawv taij kom Fexatas 3 xav txog lawv es tso cai rau luag coj Povlauj los rau hauv Yeluxalees. Tiam sis lawv twb npaj neeg tos kev tua Povlauj lawm. 4 Fexatas thiaj teb tias nws yuav cia Povlauj nyob hauv Xixalias rau qhov nws twb yuav rov mus ped. 5 Fexatas hais tias, “Nej cov ua thawj mam li nrog kuv mus rau Xixalias xwb. Yog tus yawg ntawd tau ua txhaum tiag, nej mam tuaj hais nws ped.”

6 Fexatas tsuas nrog lawv nyob hauv nroog kwv lam yim mus rau kaum hnub xwb ces nws txawm rov mus rau Xixalias lawm. Hnub tom qab ntawd, nws zaum saum lub rooj txiav txim thiab hais kom luag coj Povlauj los cuag nws. 7 Thaum Povlauj los txog ntawd, cov Yudais uas tuaj hauv Yeluxalees tuaj los sawv vij vog nws. Lawv liam txim hnyav kawg li rau nws tiam sis tsis muaj ib qho pov thawj twg qhia tias muaj tseeb li lawv hais.

8 Povlauj daws nws zaj tias, “Kuv yeej tsis tau ua txhaum cov Yudais txoj Kev Cai, tsis tau ua txhaum lub tuam tsev, thiab tsis tau ua txhaum Xixas kiag li.” 9 Tiam sis Fexatas xav kom cov Yudais qhuas nws ces nws thiaj nug Povlauj tias, “Koj puas xav mus nram Yeluxalees? Kuv mam tu tshaj plaub no rau nrad.” 10 Tiam sis Povlauj teb tias, “Kuv twb sawv ntawm Xixas lub rooj txiav txim lawm, tsim nyog tu rau ntawm no. Kuv tsis tau ua txhaum cov Yudais li, koj yeej pom li ntawd thiab. 11 Yog kuv tau ua txhaum thiab tsim nyog raug lub txim tuag, kuv yeej tsis tawv li. Tiam sis yog lawv lam tau lam nkaug kuv xwb, tsis muaj leej twg muaj cai muab kuv cob rau lawv kom haum lawv siab. Kuv thov mus hais plaub ntawm Xixas!” 12 Fexatas nrog cov tuav xam sab laj tas ces nws teb tias, “Koj thov mus hais plaub ntawm Xixas lawm ces koj yuav tau mus cuag Xixas.”

13 Ob peb hnub tom qab ntawd tus vaj ntxwv Akipas thiab Npawnij txawm tuaj tsham Fexatas hauv Xixalias. 14 Nkawd tuaj so ntau hnub hauv Xixalias, Fexatas thiaj qhia nkawd txog Povlauj tshaj plaub.

Fexatas piav tias, “Muaj ib tug yawg uas raug Felis kaw hauv tsev loj cuj txog tav no. 15 Thaum kuv mus nram Yeluxalees, cov Yudais tej pov thawj hlob thiab cov txwj laus tuaj kom nws rau kuv, thiab thov kom kuv rau txim rau nws. 16 Tiam sis kuv teb lawv tias Loos txoj kev cai txwv tsis pub muab ib tug twg cob rau lwm tus txhais tes kom zoo luag siab xwb. Tus pem kom* muaj cai hais daws nws zaj tab meeg cov yeej kom.* 17 Thaum cov Yudais tuaj txog ntawm no, kuv thiaj maj nroos hais tshaj plaub no. Hnub tom qab, kuv zaum saum lub rooj txiav txim thiab kom luag coj tus txiv neej ntawd los cuag kuv. 18 Thaum cov yeej kom sawv los hais lawv zaj, ua cas lawv ho tsis hais txog tej kev txhaum loj li kuv xav. 19 Lawv tsuas sib cav txog lawv tej nyuag kev cai thiab cav txog ib tug txiv neej hu ua Yexus uas twb tuag lawm los Povlauj pheej hais tias tseem muaj sia nyob. 20 Kuv tsis pom qab tu tshaj plaub no, kuv thiaj nug seb nws puas xav mus nram Yeluxalees es kuv mam tu tshaj plaub no rau nrad. 21 Tiam sis Povlauj ho thov kom mus hais plaub ntawm Xixas. Kuv thiaj sam hwm kom muab nws kaw mus txog thaum zoo coj nws mus cuag Xixas.”

22 Akipas hais rau Fexatas tias, “Kuv xav mloog nws zaj thiab.” Fexatas teb tias, “Tag kis koj yeej yuav tau hnov nws zaj.” 23 Yog li ntawd, hnub tom qab Akipas thiab Npawnij txawm khav ntxhias los rau hauv chav tsev hais plaub. Nkawd nrog cov thawj tub rog* thiab cov neeg tseem ceeb hauv lub nroog ua ke los. Fexatas mam li tso lus kom luag coj Povlauj los. 24 Fexatas hais tias, “Vaj Ntxwv Akipas thiab txhua leej txhua tus uas tuaj ntawm no, nej puav leej pom tus txiv neej no. Tag nrho cov Yudais, tsis hais cov nyob hauv Yeluxalees thiab cov nyob ntawm no, puav leej nkaug nws rau kuv. Lawv qw zom zaws tias tsim nyog muab nws tua pov tseg. 25 Tiam sis kuv pom tias nws tsis tau ua ib qho txhaum uas tsim nyog muab nws tua. Thaum nws thov mus hais plaub ntawm Xixas, kuv thiaj tso cai rau nws mus. 26 Tiam sis kuv tsis muaj lus dab tsi sau txog nws mus rau Huab Tais.* Yog li ntawd, kuv thiaj coj nws los sawv tab meeg nej sawv daws, tshwj xeeb yog Vaj Ntxwv Akipas, kom nej pab taug nws zaj xwv kuv thiaj pom qab sau txog nws. 27 Yog kuv xa ib tug neeg raug txim mus rau tim Loos es tsis muaj ntaub ntawv dab tsi los qhia txog tej uas luag kom nws mas tsis zoo xa nws mus.”

26 Akipas hais rau Povlauj tias, “Koj hais daws koj zaj los tau.” Povlauj thiaj xyab hlo tes thiab hais daws nws zaj li no,

2 “Vaj Ntxwv Akipas, kuv zoo siab uas hnub no kuv tau los sawv ntawm koj xub ntiag hais daws txhua zaj uas cov Yudais tau nkaug kuv. 3 Koj yeej paub zoo txog cov Yudais tej kev lig kev cai thiab tej uas lawv niaj hnub sib cav txog. Yog li ntawd, kuv thov koj ua siab ntev mloog kuv zaj.

4 “Muaj coob tus Yudais yeej paub zoo txog kuv lub neej thaum yau uas kuv nrog kuv haiv neeg nyob ua ke, los txog thaum kuv nyob hauv Yeluxalees. 5 Yog lawv xav ua tim khawv, lawv yeej hais tau tias kuv koom pab uas coj peb txoj kev cai nruj tshaj vim yav tas los kuv yog ib tug Falixais. 6 Tiam sis hnub no luag coj kuv tuaj hais plaub twb yog vim kuv cia siab rau Vajtswv lo lus cog tseg rau peb cov yawg koob. 7 Peb 12 xeem neeg Ixayees kub siab lug ua Vajtswv tes hauj lwm nruab hnub hmo ntuj, twb yog lawv cia siab tias yuav muaj raws li tib lo lus cog tseg no. Vaj Ntxwv, twb yog kuv cia siab li no, cov Yudais thiaj nkaug kuv.

8 “Ua cas nej ho hais tias qhov uas Vajtswv tsa tau cov tuag sawv rov los tsis txaus ntseeg? 9 Kuv yog ib tug uas xav tias tsim nyog tawm tsam Yexus tus neeg Naxales.* 10 Kuv thiaj ua li ntawd hauv Yeluxalees ntag. Cov pov thawj hlob tso cai rau kuv mus ntes coob tus thwj tim* los kaw hauv tsev loj cuj. Thaum muab lawv teem txim tuag, kuv yog ib tug uas pom zoo tib si. 11 Kuv mus txhua nrho tej tsev pe hawm, mus muab lawv rau txim kom lawv tso kev ntseeg tseg. Kuv ntxub lawv tshaj plaws li, kuv tseem mus tsim txom cov uas nyob tom tej ntug zos tib si.

12 “Muaj ib hnub cov pov thawj hlob kuj tso cai rau kuv mus ua tej no hauv lub nroog Damaxakas thiab. Kuv thiaj sawv kev mus rau lub nroog ntawd. 13 Vaj Ntxwv, kuv qhia koj tias kwv lam tav su nrig, txawm muaj duab ci ntsa iab saum ntuj tuaj, ci tshaj lub hnub puag ncig kuv thiab cov uas nrog kuv ua ke. 14 Peb sawv daws txawm vau hlo rau hauv pem teb ces kuv hnov ib lub suab hais lus Henplais rau kuv tias, ‘Xolaus’o, Xolaus’e, koj tsim txom kuv ua dab tsi? Koj pheej tawm tsam kuv li no yuav rov ua rau koj mob xwb.’* 15 Kuv thiaj nug tias, ‘Tus Tswv, koj yog leej twg?’ Tus Tswv teb tias, ‘Kuv yog Yexus tus uas koj tsim txom ntag. 16 Cia li sawv tsees. Kuv tshwm rau koj pom li no yog kuv xaiv koj los ua ib tug tub qhe. Koj yuav ua tim khawv qhia txog tej uas koj twb pom lawm thiab tej uas kuv tseem yuav ua rau koj pom ntxiv. 17 Kuv yuav cawm koj dim ntawm haiv neeg no thiab lwm haiv neeg uas kuv txib koj mus 18 qhib lawv lub qhov muag. Lawv thiaj tawm tau hauv qhov tsaus ntuj los rau qhov kaj thiab dim ntawm Xatas lub hwj chim los cuag Vajtswv. Yog lawv ntseeg kuv, Vajtswv yuav zam lawv lub txim thiab lawv yuav tau nrog cov neeg dawb huv tau txais qub txeeg qub teg.’

19 “Vaj Ntxwv Akipas, kuv thiaj ua raws li zaj yog toog no uas qhia saum ntuj tuaj. 20 Kuv xub mus qhia cov neeg hauv Damaxakas ces mam li mus qhia hauv Yeluxalees. Tom qab ntawd kuv qhia thoob Yudias thiab kuj mus qhia lwm haiv neeg tib si. Kuv tshaj tawm tias lawv yuav tsum hloov dua siab tshiab thiab rov los cuag Vajtswv. Lawv tes hauj lwm yuav tsum qhia tias lawv hloov dua siab tshiab lawm tiag. 21 Twb yog vim li no cov Yudais thiaj ntes kuv hauv lub tuam tsev thiab nrhiav kev muab kuv tua. 22 Tiam sis muaj Vajtswv pab, kuv thiaj tau ua tim khawv qhia tus hlob tus yau los txog tav no. Kuv tsuas qhia tej uas cov cev Vajtswv lus thiab Mauxes tau qhia tseg tias yuav muaj tshwm sim xwb. Lawv qhia tias 23 tus Khetos yuav raug tsim txom thiab raug tua. Nws yuav yog thawj tug uas Vajtswv tsa sawv hauv qhov tuag rov los ces nws yuav qhia qhov kaj rau haiv neeg no thiab lwm haiv neeg tib si.”

24 Thaum Povlauj tab tom hais daws nws zaj li no, Fexatas txawm hais nrov nrov tias, “Povlauj’e koj vwm lawm po? Koj kawm txuj kawm ci siab dhau ua rau koj vwm lawm lau!” 25 Tiam sis Povlauj teb tias, “Yawg Hlob Fexatas, kuv tsis vwm. Kuv yeej meej pem. Kuv tsuas hais tej lus tseeb xwb. 26 Vaj Ntxwv yeej paub zoo txog tej no, kuv thiaj hais phua hlo rau nws. Tej no tsis yog tej yam ua nraim nkoos es nws tsis tau hnov txog. 27 Vaj Ntxwv Akipas, koj puas ntseeg tej uas cov cev Vajtswv lus tau hais tseg? Kuv paub tias koj yeej ntseeg.” 28 Tiam sis Akipas teb Povlauj tias, “Ntshe tsis ntev xwb koj yuav yaum tau kuv los ua ib tug Khixatias* hoj.” 29 Povlauj thiaj teb tias, “Kuv thov Vajtswv tias tsis hais tam sim no los yog lwm hnub, thov kom koj thiab txhua tus uas hnov kuv qhia hnub no los ntseeg ib yam li kuv, tsuas yog txhob raug saw hlau khi li kuv xwb.”

30 Vaj Ntxwv txawm sawv tsees ces tus tswv xeev thiab Npawnij thiab cov txiv neej puav leej sawv tib si. 31 Thaum lawv tab tom tawm mus, lawv tham zom zaws tias, “Tus yawg no tsis tau ua ib qho txhaum uas yuav tsim nyog tuag los sis muab kaw.” 32 Akipas txawm hais rau Fexatas tias, “Kheev lam tus yawg no txhob thov mus hais plaub ntawm Xixas mas peb twb tso nws lawm.”

27 Thaum nom tswv tso cai peb mus rau Italis, lawv muab Povlauj thiab lwm cov uas raug kaw cob rau ib tug thawj tub rog* hu ua Yulias uas nrog pab tub rog Aukatas. 2 Peb txawm nce ib lub nkoj uas tuaj hauv lub nroog Alamethias tuaj. Lub nkoj ntawd tseem yuav mus rau tej nroog hauv xeev Axias* uas muaj chaw nres nkoj. Thaum ntawd Alithakhas nrog peb mus. Nws yog ib tug neeg Maxedaunias nyob Thexalaunikas tuaj. 3 Hnub tom qab peb mus txog Xaidoos. Yulias hlub Povlauj, nws thiaj cia Povlauj mus xyuas tej phooj ywg hauv lub nroog ntawd kom lawv saib xyuas tau nws.

4 Thaum peb nce nkoj qhov ntawd mus, peb caij nkoj sab qaum pov txwv Xaipas mus kom nraim cua, rau qhov sab nrad cua hlob dhau lawm. 5 Peb hla ntu hiav txwv ntawm Xilixias thiab Pafilias ces mam li los nres nkoj ntawm lub nroog Milas hauv xeev Lisias. 6 Hauv Milas, tus thawj tub rog ho nrhiav tau ib lub nkoj tuaj Alexadias tuaj uas tab tom yuav mus rau Italis. Nws thiaj coj peb mus nce lub nkoj ntawd. 7 Lub nkoj ntawd mus qeeb heev, tau ob peb hnub mam li mus txog lub nroog Khanidas mas tsis yooj yim kiag li. Cua hlob dhau mus tsis taus li lawm, peb thiaj mus dhau Xamones mus vias lub pov txwv Khetes sab nrad kom nraim tau cua. 8 Peb caij nkoj ntawm ntug hiav txwv mus nyuaj kawg li, peb mam li mus txog ib qho chaw uas luag hu ua Chaw Zoo Nres Nkoj ze lub nroog Luxias.

9 Peb nyob ntawd tau ntau hnub mas yim huab tsis zoo tsav nkoj mus lawm. Lub sij hawm yoo mov rau Hnub Ua Kev Cai Ntxuav* los twb dhau lawm. Povlauj thiaj hais rau sawv daws tias, 10 “Cov kwv tij, yog peb peem mus ntshe peb yuav raug kev puas ntsoog, tsis hais lub nkoj, tej qhov txhia chaw uas nej thauj no, thiab peb txoj sia* tib si.” 11 Tiam sis tus thawj tub rog yeem mloog tus tsav nkoj thiab tus tswv nkoj, tsis mloog Povlauj hais. 12 Qhov chaw nres nkoj ntawd tsis zoo nres rau lub caij ntuj no. Feem coob thiaj hais kom mus rau Finis es mam mus so qhov ntawd rau lub caij ntuj no. Finis yog ib qho chaw nres nkoj hauv Khetes uas muaj chaw tawm rau sab qaum teb hnub tuaj thiab sab qab teb hnub tuaj tib si.

13 Thaum cov cua sab qab teb tuaj ntaug lawm, lawv xav tias lawv yuav tsum mus txog Finis xwb. Lawv thiaj rub lub thauj los thiab tsav nkoj raws ntug hiav txwv ntawm Khetes. 14 Tiam sis thaum mus ib nyuag chim, ua ciav muaj ib nthwv cua hu ua Yulu-akulus* ntsawj hlob heev tuaj. 15 Nthwv cua los nplawm lub nkoj, thiaj tsav tsis tau lub nkoj tiv cua li lawm. Peb thiaj tso cua ntsawj lub nkoj mus lawm xwb. 16 Peb mus nraim cua ntawm ib lub pov txwv me me hu ua Khodas. Txawm li ntawd los, peb yuav luag rub tsis tau lub nkoj me me tom tw nkoj los. 17 Thaum kawg lawv rub tau lub nkoj me me los rau saum lub nkoj loj. Lawv ho cab hlua hauv qab plab nkoj los zoj lub nkoj loj kom txhob tawg. Lawv ntshai tsam lub nkoj yuav mus daig ntawm ntug hiav txwv Xawthis, lawv thiaj txo cov ntaub cug cua kom lub nkoj mus raws cua. 18 Vim cua daj cua dub hlob heev nplawm lub nkoj ua yoj ua yees, hnub tom qab lawv thiaj muab tej nra thau pov tseg kom sib. 19 Thaum dhau peb hnub lawd, lawv kuj muab tej twj uas siv hauv nkoj thau pov tseg tib si thiab.

20 Lub ntuj tsaus nti tau ntau hnub, tsis pom lub hnub thiab tej hnub qub li. Cua daj cua dub tseem nplawm lub nkoj qees. Qhov uas peb yuav dim ces tsawg lawm. 21 Lawv tsis tau noj dab tsi tau ntau hnub. Povlauj txawm sawv tsees hais rau lawv tias, “Cov kwv tij, kheev lam nej mloog kuv hais es peb nyob twj ywm tom lub pov txwv Khetes ces peb twb tsis raug tej xwm no, peb lub nkoj los tsis puas thiab tej khoom los tsis poob. 22 Txawm li ntawd los, ua siab loj, nej cov no yuav tsis muaj ib tug* puas tsuaj li, tsuas yog lub nkoj puas xwb. 23 Thaum ib tag hmo, Vajtswv tus uas kuv pe hawm thiab teev tiam twb kom nws ib tug tub txib saum ntuj los tshwm rau kuv pom. 24 Tus tub txib saum ntuj hais tias, ‘Povlauj, txhob ntshai. Koj yeej yuav tau mus sawv ntawm Xixas. Vim muaj koj, Vajtswv yuav cawm txhua tus uas nrog koj caij nkoj no.’ 25 Yog li ntawd, cov kwv tij, cia li ua siab loj! Kuv yeej ntseeg tias Vajtswv yuav ua raws li nws tau hais tseg rau kuv lawd. 26 Txawm li cas los, lub nkoj yeej yuav mus khuam rau ib lub pov txwv twg.”

27 Cua ntsawj lub nkoj ntab mus ntab los tau 14 hnub hauv Hiav Txwv Anrias. Hmo 14, thaum ib tag hmo, cov neeg tsav nkoj ntsuas pom tias lub nkoj ntab mus ze zuj zus tim ntug hiav txwv lawm. 28 Lawv muab thauj ntsuas pom tias dej tob kwv lam 36 mev.* Thaum lub nkoj mus tom ntej me ntsis, lawv rov ntsuas dua mas tob kwv lam 27 mev* lawm. 29 Lawv ntshai tsam lub nkoj mus tsoo pob zeb. Lawv thiaj tso plaub lub thauj tom tw nkoj hlauv mus hauv hiav txwv mas ceeb laj tos kaj ntug kawg. 30 Cov neeg tsav nkoj xav nrhiav kev khiav ua ntej, lawv thiaj txo lub nkoj me me mus rau hauv dej. Lawv ua txuj hais tias lawv yuav tso cov thauj uas nyob tom hau nkoj. 31 Tiam sis Povlauj hais rau tus thawj tub rog thiab cov tub rog tias, “Yog lawv cov ntawd tsis nyob twj ywm hauv lub nkoj no ces yuav cawm tsis tau nej ib tug li.” 32 Cov tub rog thiaj muab cov hlua uas khi lub nkoj me txiav kiag thiab cia ntab mus lawm.

33 Thaum yuav kaj ntug, Povlauj kom lawv noj mov thiab hais tias, “Nej twb tos tau 14 hnub nkaus ua rau nej nyuaj siab kawg li. Nej kuj tsis tau noj dab tsi li thiab. 34 Kav tsij noj mov thiaj pab tau nej. Kuv qhia nej tias txawm nej cov plaub hau los yuav tsis poob ib txog li.” 35 Thaum Povlauj hais li no tas, nws muab ib lub ncuav los ua Vajtswv tsaug tab meeg sawv daws ces nws muab ntais noj. 36 Lawv sawv daws thiaj ua taus siab loj thiab kuj noj taus mov lawm. 37 Peb cov uas nyob hauv lub nkoj muaj 276 leej.* 38 Thaum lawv noj tsau npo lawd, lawv muab tej mog* thau pov tseg hauv hiav txwv kom lub nkoj sib.

39 Thaum kaj ntug, lawv pom ib ceg hiav txwv uas muaj xuab zeb tiam sis lawv tsis paub tias yog lub teb chaws twg. Lawv thiaj hais tias lawv yuav tsav nkoj mus nres qhov ntawd. 40 Lawv thiaj muab cov thauj txiav pov tseg rau hauv hiav txwv. Lawv kuj daws txoj hlua khi ob tug duav uas nyob tom tw nkoj. Lawv mam tsa daim ntaub cug cua tom hau nkoj thiab tsav lub nkoj ncaj nraim rau ntawm ceg hiav txwv uas muaj xuab zeb. 41 Lub nkoj cia li los nkaug ib co xuab zeb hauv qab thu dej, daig kiag tsis txav li lawm. Dej txawm ntas cuag tsi los ntaus lub nkoj ua rau yav tw nkoj tawg tas. 42 Cov tub rog txiav txim siab tias yuav muab cov neeg raug txim tua tib si, tsam tej tug ho ua luam dej khiav dim mus lawm. 43 Tiam sis tus thawj tub rog txwv tsis pub lawv ua li ntawd rau qhov nws xav coj Povlauj mus kom txog chaw. Nws thiaj sam hwm kom txhua tus uas txawj luam dej, cia li dhia lawm hauv hiav txwv es ua luam dej mus tim ntug ua ntej. 44 Dua li cov mam lawv qab. Lawv mam muab tej daim txiag thiab tej yav ntoo uas tawg ntawm lub nkoj los tiag ua luam dej mus. Thaum kawg lawv txhua tus mus txog tim ntug, tsis raug mob qhov twg li.

28 Thaum peb los txog ntawm ntug hiav txwv lawd, peb mam li paub tias lub pov txwv ntawd hu ua Maulithas. 2 Cov neeg hauv lub pov txwv ntawd siab dawb tshaj plaws li. Lawv tos txais peb zoo heev thiab rauv taws rau peb nte tib si rau qhov tab tom los nag thiab no kawg li. 3 Povlauj khaws tau ib tsuag taws los tso plhuav saum cub tawg. Vim kub heev ib tug nab tawm plaws los tom kiag nws txhais tes. 4 Thaum cov neeg hauv lub pov txwv pom tus nab dai vias ntawm Povlauj txhais tes, lawv txawm hais zom zaws tias, “Ntshe nws yog ib tug neeg tua neeg po? Nws dim kev tuag hauv hiav txwv los tus uas tswj kev ncaj ncees* tseem tsis tseg nws txoj sia thiab.” 5 Tiam sis Povlauj tib nchos tus nab poob nthav rau hauv cub tawg tiam sis tsis ua li cas rau nws li. 6 Cov tib neeg xav tias ntshe nws yuav o tuaj los sis vau hlo tuag tam sid. Tiam sis lawv tos ntev loo tsis muaj xwm dab tsi. Lawv txawm xav hais tias, ntshe nws yog neeg qaum ntuj.

7 Muaj ib tug thawj coj hu ua Pulias uas muaj liaj muaj teb nyob tsis deb qhov chaw ntawd. Nws yog ib tug neeg tseem ceeb hauv lub pov txwv ntawd, thiab nws kuj zoo siab hlo tos txais peb mus so hauv nws tsev tau peb hnub nkaus. 8 Thaum ntawd Pulias txiv tab tom ua npaws thiab raws plab heev pw saum txaj. Povlauj thiaj mus rau ntawm nws thiab thov Vajtswv. Povlauj tsa tes npuab nws thiab kho nws zoo hlo. 9 Tom qab ntawd, tag nrho cov neeg muaj mob hauv lub pov txwv txawm tuaj cuag Povlauj mas nws kho lawv zoo tib si. 10 Lawv pub tshav ntuj ntau kawg li los ua peb tsaug. Thaum peb yuav caij nkoj mus, lawv kuj nqa ntau yam uas peb cheem tsum tuaj pub rau peb thiab.

11 Peb nyob ntawm lub pov txwv no tau peb lub hlis nkaus peb mam nce nkoj mus. Peb nce lub nkoj uas muaj tus mlom Xus ob tug tub tom hau nkoj. Thaum lub caij ntuj no, lub nkoj twb tuaj Alexadias tuaj nres hauv lub pov txwv no lawm. 12 Thaum peb mus nres ntawm Xilakhus, peb so ntawd tau peb hnub nkaus. 13 Peb ho caij nkoj mus rau Likias. Hnub tom qab, txawm muaj cua tshuab sab qab teb tuaj ces ob hnub xwb lub nkoj txawm siv mus txog Puthi-aulis lawm. 14 Peb mus nrhiav tau cov kwv tij uas nyob hauv lub nroog ntawd. Lawv cheem peb nrog lawv nyob tau xya hnub nkaus, peb mam li sawv kev mus rau Loos. 15 Thaum cov kwv tij hauv Loos hnov tias peb sawv kev mus lawm, lawv txawm tuaj tos peb. Ib txhia tuaj ntsib peb ntawm qhov chaw hu ua Peb Lub Tsev So. Muaj dua lwm cov muaj peev xwm tuaj txog ntua ntawm lub Khw Api-us. Thaum Povlauj pom dheev lawv, nws ua Vajtswv tsaug thiab yim huab ua taus siab loj. 16 Thaum peb mus txog hauv Loos, luag tso cai rau Povlauj nws nyob nws ib lub tsev, tsuas tseg ib tug tub rog zov nws xwb.

17 Peb hnub tom qab ntawd, Povlauj hu cov thawj coj Yudais tuaj xyuas nws. Thaum lawv tuaj txog, nws hais rau lawv tias, “Cov kwv tij, txawm kuv tsis tau ua ib yam dab tsi txhaum cov tib neeg thiab tsis tau hla tej kev cai uas peb tej yawg koob ib txwm coj los, luag muab kuv ntes hauv Yeluxalees thiab muab kuv cob rau cov Loos. 18 Thaum cov Loos taug kuv zaj tas, lawv xav tso kuv mus rau qhov lawv tsis pom ib qho txhaum uas tsim nyog muab kuv tua. 19 Tiam sis cov Yudais txwv tsis pub li, kuv thiaj thov tuaj hais plaub ntawm Xixas. Qhov kuv ua li no tsis yog kuv tuaj nkaug kuv haiv neeg rau Xixas. 20 Kuv thiaj thov nej tuaj nrog kuv tham ntawm no. Tos luag muab saw hlau khi kuv li no los, twb yog kuv ntseeg tus uas peb cov Ixayees cia siab ntsoov rau xwb.” 21 Lawv teb nws tias, “Peb tsis tau txais ib tsab ntawv tham txog koj hauv Yudias tuaj li. Cov kwv tij uas tuaj tid tuaj los, tsis muaj ib tug xa xov phem txog koj li thiab. 22 Tiam sis peb xav tias tsim nyog peb mloog koj hais, vim pab uas koj hais txog no yeej raug luag thuam qhov txhia qhov chaw li.”

23 Lawv thiaj teem ib hnub tuaj ntsib Povlauj. Thaum txog hnub ntawd lawv tseem tuaj coob tshaj tuaj hauv nws tsev. Nws ua tim khawv qhia ib hnub tsaus ntuj rau lawv txog Vajtswv txoj kev kav,* thiab muab Mauxes Txoj Kev Cai thiab tej uas cov cev Vajtswv lus sau tseg los ua tib zoo piav kom lawv los ntseeg Yexus. 24 Ib txhia los ntseeg tiam sis lwm cov tsis kam ntseeg. 25 Lawv thiaj hais tsis sib haum ces nyias txawm sawv nyias mus lawm. Povlauj thiaj hais ib los li no,

“Yeej tsim nyog lub hwj huam dawb huv tshoov Yaxayas uas yog tus cev Vajtswv lus hais rau nej cov yawg koob 26 tias, ‘Mus rau cov neeg no thiab hais tias, “Nej yeej yuav hnov tiam sis nej tsis nkag siab, nej yeej yuav saib tiam sis nej tsis pom. 27 Haiv neeg no lub siab tawv kawg li lawm. Lawv muaj pob ntseg hnov tiam sis lawv tsis quav ntsej. Lawv qi qhov muag kom lawv tsis txhob pom thiab pos pob ntseg kom lawv tsis txhob hnov. Lawv tsis xav paub, lawv thiaj tsis tig los cuag kuv, kom kuv kho lawv zoo.”’ 28 Yog li ntawd, kuv xav qhia nej sawv daws paub tias yuav muab txoj kev cawm dim uas Vajtswv pub no qhia rau lwm haiv neeg mas lawv yeej yuav mloog.” 29* ——

30 Povlauj nyob ob xyoos hauv lub tsev uas nws ntiav ntawd. Nws zoo siab tos txais txhua tus uas tuaj saib nws. 31 Nws tshaj tawm txog Vajtswv txoj kev kav* thiab qhia lawv txog tus Tswv Yexus Khetos tsis ntshai li, thiab tsis muaj leej twg txwv nws li.