TXOJ XOV ZOO YAUHAS SAU

1 Thaum chiv keeb yeej muaj Txoj Lus* lawm. Txoj Lus yeej nrog Vajtswv nyob, thiab Txoj Lus zoo li Vajtswv. 2 Tus no yeej nrog Vajtswv nyob thaum chiv keeb los lawm. 3 Vajtswv kom nws tsim ib puas tsav yam. Tsis muaj ib yam uas tsis yog nws tsim li.

4 Twb yog muaj nws thiaj muaj txoj sia, thiab txoj sia ntawd yog qhov kaj rau tib neeg. 5 Qhov kaj ci rau hauv qhov tsaus tiam sis qhov tsaus laum tsis tau qhov kaj.

6 Vajtswv txib ib tug txiv neej hu ua Yauhas los sawv cev rau nws. 7 Tus yawg no los ua tim khawv txog qhov kaj kom txhua hom neeg thiaj los ntseeg tej uas nws qhia. 8 Nws tsis yog qhov kaj ntawd, tiam sis nws los ua tim khawv txog qhov kaj xwb.

9 Thaum ntawd qhov kaj uas yog qhov tseeb tab tom yuav los rau hauv lub qab ntuj neeg thiab yuav ci rau txhua hom neeg pom kev. 10 Nws twb los rau hauv lub qab ntuj neeg, thiab twb yog Vajtswv kom nws tsim lub qab ntuj neeg, tiam sis lub qab ntuj neeg tsis paub nws. 11 Nws los rau hauv nws lub teb lub chaw los nws haiv neeg twb tsis lees yuav nws. 12 Txawm li ntawd los, txhua tus uas lees yuav nws ces nws pub lawv muaj feem los ua Vajtswv cov me nyuam, rau qhov lawv ntseeg* nws.* 13 Lawv tau los ua Vajtswv cov me nyuam tsis yog yug li neeg ib txwm yug los sis yug tau li neeg lub siab ntshaw, tiam sis yog Vajtswv pom zoo lawv los ua nws cov me nyuam xwb.

14 Yog li ntawd, Txoj Lus los yug ua neeg* thiab nrog peb nyob. Peb pom nws lub hwj chim, yog lub hwj chim ci ntsa iab uas leej txiv pub rau nws tib leeg tub.* Vajtswv txaus siab heev rau nws thiab nws yeej ib txwm qhia qhov tseeb. 15 (Yauhas ua tim khawv txog nws thiab hais nrov nrov tias, “Tus no yog tus uas kuv hais tias, ‘Nws yuav lawv kuv qab los tiam sis nws twb mus deb tshaj kuv lawm, rau qhov nws xub nyob ua ntej kuv.’”) 16 Twb yog nws muaj kev hlub nplua mias,* nws thiaj hlub peb tas los hlub peb thiab. 17 Vajtswv muab txoj Kev Cai rau Mauxes qhia peb. Tiam sis Vajtswv muab txoj kev hlub nplua mias* thiab qhov tseeb rau Yexus Khetos qhia peb. 18 Tsis tau muaj leej twg pom Vajtswv ib zaug li. Tsuas yog tib leeg tub uas zoo li Vajtswv, tus uas nyob ntawm Leej Txiv ib sab,* thiaj qhia tau Leej Txiv rau peb xwb.

19 Thaum cov Yudais txib cov pov thawj thiab cov Levis hauv Yeluxalees tuaj nug Yauhas tias, “Koj yog leej twg?” Yauhas ua tim khawv li no. 20 Nws hais hlo rau lawv tsis zais li tias, “Kuv tsis yog tus Khetos.” 21 Lawv thiaj nug nws ntxiv tias, “Koj ho yog leej twg no? Koj yog Eliyas lod?” Nws teb tias, “Kuv tsis yog.” Lawv ho nug tias, “Koj puas yog tus cev Vajtswv lus uas peb tos?” Nws teb tias, “Tsis yog!” 22 Lawv thiaj hais rau nws tias, “Ces koj yog leej twg tiag? Qhia kiag rau peb, peb thiaj paub mus qhia rau cov uas txib peb tuaj. Cia li qhia tias koj yog leej twg.” 23 Yauhas txawm teb tias, “Kuv yog tus uas hu tom roob moj sab qhua tuaj tias, ‘Cia li kho Vajtswv Yehauvas* txoj kev kom tiaj tus’ ib yam li tus cev Vajtswv lus Yaxayas tau hais tseg.” 24 Cov ntawd yog cov Falixais txib tuaj. 25 Lawv thiaj nug nws tias, “Koj twb tsis yog tus Khetos, tsis yog Eliyas, thiab tsis yog tus cev Vajtswv lus uas peb tos, koj muab neeg ua kev cai raus dej ua dab tsi?” 26 Yauhas teb tias, “Kuv tsuas muab neeg ua kev cai raus dej xwb. Muaj ib tug nrog nej uas nej twb tsis paub, 27 nws yog tus uas lawv kuv qab los. Kuv twb tsis tsim nyog daws nws txoj hlua khau.” 28 Tau muaj li no thaum Yauhas muab neeg ua kev cai raus dej hauv Npethanis uas nyob ntawm tus Dej Yaladees sab tid.*

29 Hnub tom qab, Yauhas pom Yexus tab tom los rau ntawm nws. Yauhas txawm hais tias, “Tus no yog Vajtswv tus Me Nyuam Yaj uas yuav ris qab ntuj neeg lub txim mus! 30 Tus no yog tus uas kuv twb hais lawm tias, ‘Muaj ib tug txiv neej yuav lawv kuv qab los tiam sis nws twb mus deb tshaj kuv lawm, rau qhov nws xub nyob ua ntej kuv.’ 31 Txawm kuv kiag los twb tsis paub nws, tiam sis kuv los muab neeg ua kev cai raus dej xwv cov Ixayees thiaj paub nws.” 32 Yauhas kuj ua tim khawv tias, “Kuv pom lub hwj huam zoo li ib tug nquab nqes saum ntuj los rau saum nws.* 33 Txawm kuv kiag los twb tsis paub nws, tiam sis tus uas txib kuv los muab neeg ua kev cai raus dej hais rau kuv tias, ‘Koj pom lub hwj huam nqes los nyob rau saum tus twg, tus ntawd thiaj yog tus uas yuav muab neeg ua kev cai raus lub hwj huam dawb huv.’ 34 Kuv twb pom li ntawd lawm, kuv thiaj ua tau tim khawv tias tus no yeej yog Vajtswv tus Tub.”

35 Hnub tom qab, Yauhas rov sawv ntawd, nws ob tug thwj tim kuj nrog nws ua ke 36 mas nws ntsia pom Yexus tab tom taug kev, nws thiaj hais tias, “Tus no yog Vajtswv tus Me Nyuam Yaj!” 37 Thaum ob tug thwj tim hnov Yauhas hais li no, nkawd txawm raws Yexus qab. 38 Ces Yexus tig los pom nkawd lawv nws qab, nws thiaj hais rau nkawd tias, “Neb xav tau dab tsi?” Nkawd hais rau Yexus tias, “Lanpis* (uas txhais tias “Xib Hwb”), koj so qhov twg?” 39 Yexus teb nkawd tias, “Nrog kuv mus ces neb yuav pom.” Lub sij hawm ntawd kwv lam li plaub teev hnub qaij. Nkawd thiaj nrog Yexus mus pom qhov chaw uas nws so thiab nrog nws nyob hnub ntawd. 40 Ob tug uas hnov Yauhas hais es raws Yexus qab ntawd, ib tug yog Anrus uas yog Ximoos Petus tus kwv.* 41 Tom qab ntawd, Anrus txawm ncaj qha mus hais rau nws tus tij laug Ximoos tias, “Wb twb ntsib tus Mexiyas lawm” (lus Kilis yog “Khetos”). 42 Anrus thiaj coj Ximoos mus ntsib Yexus. Thaum Yexus ntsia Ximoos, nws hais tias, “Ximoos uas yog Yauhas tus tub, yuav muab koj hu ua Khefas” (lus Kilis yog “Petus”).

43 Hnub tom qab, Yexus xav mus rau Kalilais. Yexus txawm ntsib Filis thiab hais rau nws tias, “Cia li nrog kuv mus.” 44 Filis nyob lub nroog Npexedas tuaj, yog lub uas Anrus thiab Petus nkawd nyob hlob. 45 Filis mus nrhiav tau Nathana-ees thiab hais rau nws tias, “Peb twb ntsib tus uas Mauxes sau txog hauv txoj Kev Cai thiab cov cev Vajtswv lus sau txog lawm. Nws yog Yexus uas yog Yauxej tus tub, nws tuaj hauv Naxales tuaj.” 46 Tiam sis Nathana-ees hais rau nws tias, “Puas yuav muaj ib tug neeg tseem ceeb tuaj hauv Naxales tuaj mas?” Filis thiaj teb tias, “Nrog kuv mus ces koj yuav pom.” 47 Yexus pom Nathana-ees tab tom los rau ntawm nws ces nws txawm hais rau Nathana-ees tias, “Tus no yog ib tug neeg Ixayees uas lub siab tsis nkhaus kiag li.” 48 Nathana-ees nug Yexus tias, “Ua li cas koj txawm siv paub kuv lawm?” Yexus thiaj teb nws tias, “Ua ntej Filis los hais koj, kuv twb pom koj nyob hauv tsob qab ntoo cev lawm.” 49 Nathana-ees teb ntua tias, “Xib Hwb,* koj yeej yog Vajtswv tus Tub tiag, yog cov Ixayees tus Vaj Ntxwv.” 50 Yexus hais rau nws tias, “Puas yog kuv hais rau koj tias kuv twb pom koj nyob hauv tsob qab ntoo cev es koj thiaj ntseeg? Koj tseem yuav pom txuj ci loj tshaj no thiab.” 51 Yexus txawm hais tias, “Kuv hais ncaj qha rau nej tias nej yuav pom rooj ntug qhib plho thiab pom Vajtswv cov tub txib saum ntuj nqes mus nqes los rau ntawm neeg Leej Tub.”

2 Ob hnub tom qab ntawd, txawm muaj ib rooj tshoob nyob hauv lub zos Khanas, xeev Kalilais. Yexus niam kuj tuaj rau ntawd thiab. 2 Lawv kuj caw Yexus thiab nws cov thwj tim tuaj noj tshoob thiab.

3 Thaum cawv txiv hmab yuav tas, Yexus niam hais rau nws tias, “Lawv tsis tshuav cawv txiv hmab lawm.” 4 Tiam sis Yexus teb nws tias, “Tsis tas wb yuav txhawj.* Tseem tsis tau txog kuv lub sij hawm.”* 5 Nws niam txawm hais rau cov ce cawv tias, “Nws hais li cas, cia li ua li ntawd.” 6 Muaj rau hub dej txawb ntawd kom sawv daws thiaj tau ua kev cai ntxuav raws li cov Yudais txoj kev cai. Ib hub ntim tau ob peb thoob* dej. 7 Yexus hais rau lawv tias, “Cia li nqa dej los ntim cov hub.” Ces lawv thiaj nqa dej los ntim cov hub puv nkaus. 8 Nws hais rau lawv tias, “Ce ib qho nqa mus rau tus kav xwm.” Lawv thiaj ua li ntawd. 9 Tus kav xwm txawm saj cov dej uas tau muab hloov ua cawv txiv hmab. Tiam sis nws tsis paub xyov lawv muab qhov twg los (cov neeg ce cawv thiaj paub xwb.) Nws thiaj hu tus nraug vauv los. 10 Nws hais rau tus nraug vauv tias, “Luag ib txwm muab cov thawj caw los haus ua ntej, thaum sawv daws qaug lawd mam muab cov tw los haus ua qab. Tiam sis koj ho tseg cov thawj caw los haus ua qab li no.” 11 Yexus ua tej no hauv lub zos Khanas, xeev Kalilais. Nov yog thawj qho txuj ci Yexus tau ua. Nws ua li no kom sawv daws pom nws lub hwj chim. Nws cov thwj tim thiaj muaj kev ntseeg rau nws.

12 Tom qab ntawd, Yexus, nws niam, nws cov kwv, thiab nws cov thwj tim txawm mus hauv lub nroog Khapena-us tiam sis lawv tsuas nyob ob peb hnub xwb.

13 Thaum ntawd yuav txog lub caij cov Yudais ua Kev Cai Hla Dhau, Yexus thiaj mus rau Yeluxalees lawm. 14 Thaum nws mus txog hauv lub tuam tsev, nws pom cov neeg muag nyuj, muag yaj, muag nquab, thiab pom cov neeg pauv nyiaj zaum ntawm lawv tej rooj. 15 Yexus thiaj muab ib co hlua los ua ib rab nplawm los lawv cov yaj, cov nyuj, thiab ntiab cov neeg muag tsiaj tawm hauv lub tuam tsev mus. Nws mus rau ntawm cov neeg pauv nyiaj thiab muab lawv tej nyiaj nchuav pes nthawv, thiab muab lawv tej rooj ntxeev pes hlo. 16 Thiab nws hais rau cov neeg muag nquab tias, “Coj nej tej nquab tawm hauv no mus! Tseg tsis txhob muab kuv Txiv lub tsev ua lub chaw lag luam!” 17 Nws cov thwj tim thiaj nco dheev Vajtswv Txoj Lus sau tias, “Kuv lub siab kub lug rau koj lub tsev cuag li hluav taws hlawv.”

18 Cov Yudais thiaj nug Yexus tias, “Koj ua heev npaum li no, koj yuav ua txuj ci dab tsi los qhia peb tias koj muaj cai ua tej no?” 19 Yexus teb lawv tias, “Yog muab lub tuam tsev no rhuav kiag pov tseg los, peb hnub xwb kuv yuav tsa tau ib lub tshiab.” 20 Cov Yudais teb ntua tias, “Lub tuam tsev no kam siv 46 xyoo los ua diam es 3 hnub xwb koj yuav ua tau ib lub tshiab no lod?” 21 Tiam sis lub tuam tsev uas Yexus hais txog ntawd yog piv txog nws lub cev xwb. 22 Thaum Yexus sawv hauv qhov tuag rov los lawd, nws cov thwj tim mam nco dheev tias Yexus pheej hais li no. Lawv thiaj ntseeg tej uas tau sau tseg hauv Vajtswv Txoj Lus thiab tej uas Yexus tau hais ntawd.

23 Thaum lub caij ua Kev Cai Hla Dhau hauv Yeluxalees, sawv daws pom Yexus ua ntau yam txuj ci, coob leej ntau tus thiaj los ntseeg nws.* 24 Tiam sis Yexus tsis tso siab rau lawv vim nws paub lawv txhua tus lub siab. 25 Tsis tas leej twg yuav qhia tej uas neeg xav rau nws, rau qhov nws twb paub tej uas nyob hauv neeg lub siab lawm.

3 Muaj ib tug yawg Falixais npe hu ua Nikhaudemaus uas yog cov Yudais ib tug thawj coj. 2 Nws tuaj cuag Yexus hmo ntuj thiab hais tias, “Xib Hwb,* peb paub tias koj yog ib tug xib hwb uas Vajtswv txib los, rau qhov Vajtswv nrog tus twg, tus ntawd thiaj ua tau tej txuj ci uas koj ua xwb.” 3 Yexus teb nws tias, “Kuv hais ncaj qha rau koj tias, yog leej twg tsis yug dua tshiab, nws yuav tsis pom Vajtswv txoj kev kav.”* 4 Nikhaudemaus hais rau Yexus tias, “Ib tug neeg laus yuav ua li cas yug dua tshiab? Nws yeej rov tsis tau mus rau hauv nws niam lub plab es rov yug dua los sad?” 5 Yexus teb tias, “Kuv hais ncaj qha rau koj tias, yog leej twg tsis yog dej yug thiab tsis yog lub hwj huam yug ces nws yeej nkag tsis tau rau hauv Vajtswv lub Nceeg Vaj.* 6 Yam uas yog nqaij tawv yug yog neeg li tub, yam uas yog lub hwj huam yug yog Vajtswv li tub. 7 Tsis txhob poob siab rau tej uas kuv qhia koj. Nej yuav tsum yug dua tshiab. 8 Cua yuav ntsawj sab twg tuaj los yeej tau, yus yeej hnov tiam sis yus tsis paub xyov cua tuaj qhov twg tuaj thiab yuav ntsawj mus rau qhov twg. Txhua tus uas lub hwj huam yug kuj zoo ib yam li ntawd thiab.”

9 Nikhaudemaus thiaj nug Yexus tias, “Yuav ua li cas thiaj ua tau li ntawd?” 10 Yexus teb nws tias, “Koj twb yog cov Ixayees ib tug xib hwb es koj tseem tsis paub tej no lod? 11 Kuv hais ncaj qha rau koj tias, yam uas peb paub peb thiaj hais, yam uas peb pom peb thiaj ua tim khawv txog, tiam sis nej tsis ntseeg tej uas peb qhia. 12 Yog kuv hais tej yam hauv ntiaj teb no xwb es nej twb tsis ntseeg, nej yuav ua li cas ntseeg thaum kuv hais txog tej yam saum ntuj ceeb tsheej? 13 Tsis tas li ntawd xwb, yeej tsis tau muaj leej twg nce mus saum ntuj ceeb tsheej, tiam sis neeg Leej Tub thiaj nqes saum ntuj ceeb tsheej los xwb. 14 Thiab Mauxes dai tus nab tom teb chaws moj sab qhua li cas ces neeg Leej Tub yuav raug dai ib yam li ntawd 15 kom txhua tus uas ntseeg nws thiaj tau txoj sia ntev dhawv mus ib txhis.

16 “Rau qhov Vajtswv hlub lub qab ntuj neeg* kawg li, nws thiaj pub nws tib leeg Tub,* kom txhua tus uas ntseeg* tus Tub ntawd thiaj tsis raug puas tsuaj tiam sis tau txoj sia ntev dhawv mus ib txhis. 17 Tsis yog Vajtswv txib nws tus Tub los hauv lub qab ntuj los txiav txim rau qab ntuj neeg,* tiam sis nws los cawm lub qab ntuj neeg* xwb. 18 Tus uas ntseeg* tus Tub ntawd yuav tsis raug txiav txim. Tus uas tsis ntseeg* tus Tub ntawd twb raug txiav txim lawm vim nws tsis ntseeg* Vajtswv tib leeg Tub.* 19 Qhov kaj twb ci tuaj rau lub qab ntuj lawm, tiam sis neeg nyiam qhov tsaus tsis nyiam qhov kaj vim lawv tes hauj lwm phem. Twb yog vim li ntawd, lawv thiaj yuav raug txim. 20 Tus uas nyiam ua tej kev phem yeej ntxub qhov kaj thiab nws yuav tsis los rau hauv qhov kaj vim nws tsis xav kom luag pom nws tes hauj lwm phem. 21 Tiam sis tus uas nyiam ua qhov zoo, nws yuav los hauv qhov kaj kom sawv daws pom nws tes hauj lwm zoo uas haum Vajtswv siab.”

22 Tom qab ntawd, Yexus thiab nws cov thwj tim mus rau pem yaj sab hauv xeev Yudias. Nws nrog lawv nyob ib nyuag ntu thiab muab neeg ua kev cai raus dej.* 23 Tiam sis Yauhas kuj muab neeg ua kev cai raus dej hauv Enoos nyob ze Xalis vim qhov chaw ntawd muaj pas dej loj ces tib neeg pheej tuaj ua kev cai raus dej qhov ntawd. 24 Lub sij hawm ntawd Yauhas tseem tsis tau raug kaw hauv tsev loj cuj.

25 Yauhas cov thwj tim nrog ib tug Yudais sib cav txog kev cai ntxuav. 26 Lawv thiaj mus cuag Yauhas thiab hais tias, “Xib Hwb,* tus yawg uas nrog koj nyob ntawm tus Dej Yaladees sab tim ub uas koj ua tim khawv txog, tab tom muab neeg ua kev cai raus dej. Sawv daws cia li mus cuag nws lawm.” 27 Yauhas teb tias, “Neeg yeej ua tsis tau ib yam dab tsi yog Vajtswv tsis pub hwj chim rau nws. 28 Nej twb ua tim khawv hnov kuv hais tias, ‘Kuv tsis yog tus Khetos, tiam sis kuv yog tus uas txib los ua nws ntej xwb.’ 29 Tus nkauj nyab thiaj yog tus nraug vauv li. Tiam sis tus nraug vauv tus kwv luag, txawm nws sawv ib sab thiab hnov tus nraug vauv lub suab xwb los, nws yeej zoo siab kawg li lawm. Ib yam li ntawd, kuv los kuj zoo siab txaus nkaus lawm thiab. 30 Tus ntawd tes hauj lwm yuav ntau zuj zus tuaj, tiam sis kuv tes hauj lwm yuav tsawg zuj zus mus.”

31 Tus uas los saum ntuj los siab dua txhua tus tib si. Tus uas nyob hauv ntiaj teb, yeej yog neeg ntiaj teb nws thiaj hais txog ntiaj teb zaj xwb. Tus uas los saum ntuj los yeej siab dua txhua tus tib si. 32 Nws ua tim khawv txog tej uas nws tau pom thiab tau hnov tiam sis tsis muaj leej twg kam ntseeg nws. 33 Tus uas ntseeg nws tej lus yeej lees* tias Vajtswv hais qhov tseeb xwb. 34 Rau qhov tus uas Vajtswv txib los tsuas hais Vajtswv tej lus xwb. Vajtswv yeej pub lub hwj huam puv npo rau tus ntawd, tsis khuv xim li. 35 Leej Txiv hlub Leej Tub thiab muab ib puas tsav yam cob rau hauv nws txhais tes. 36 Tus uas ntseeg* Leej Tub yuav tau txoj sia ntev dhawv mus ib txhis. Tus uas tsis mloog Leej Tub lus yuav tsis pom txoj sia, tiam sis Vajtswv yuav chim rau nws.

4 Tswv Yexus paub tias cov Falixais hnov txog zaj uas nws muaj thwj tim thiab muab neeg ua kev cai raus dej coob dua Yauhas lawm. 2 (Tiam sis Yexus tsis yog tus muab neeg ua kev cai raus dej, yog nws cov thwj tim muab xwb.) 3 Yexus thiaj tawm hauv Yudias rov mus rau Kalilais. 4 Tiam sis nws yuav tsum hla Xamalis mus. 5 Nws mus txog lub nroog Xaikhas hauv xeev Xamalis. Lub nroog ntawd nyob ze thaj av uas Yakhauj tau muab rau nws tus tub Yauxej. 6 Yakhauj lub qhov dej kuj nyob rau qhov ntawd thiab. Thaum 12 teev tav su Yexus taug kev los txog ntawd, nws sab sab nws thiaj zaum ntawm lub qhov dej.

7 Txawm muaj ib tug poj niam Xamalis tuaj nqa dej. Yexus hais rau nws tias, “Thov ce me ntsis dej rau kuv haus.” 8 (Thaum ntawd nws cov thwj tim tseem mus yuav mov hauv nroog lawm.) 9 Tus poj niam Xamalis thiaj hais rau Yexus tias, “Koj yog neeg Yudais hos kuv yog ib tug poj niam Xamalis, ua cas koj ho thov dej ntawm kuv haus?” (Cov Yudais yeej tsis koom nrog cov Xamalis.) 10 Yexus teb nws tias, “Yog koj paub yam uas Vajtswv pub dawb rau koj thiab paub tus uas thov koj dej haus yog leej twg ces koj yuav thov kom nws muab cov dej uas pub txoj sia rau koj.” 11 Tus poj niam ntawd hais rau Yexus tias, “Yawg hlob, koj twb tsis muaj thoob ntaus dej, thiab lub qhov dej tob npaum no, koj yuav muab cov dej uas pub txoj sia qhov twg los? 12 Koj tseem muaj hwj chim tshaj peb yawg koob Yakhauj lawm thiab lod? Nws yog tus pub lub qhov dej no rau peb. Nws cov tub thiab nws tej tsiaj txhu puav leej haus lub qhov dej no.” 13 Yexus teb tus poj niam ntawd tias, “Txhua tus uas haus lub qhov dej no yuav rov nqhis dua. 14 Tiam sis tus uas haus cov dej kuv muab, nws yuav tsis nqhis ib zaug li lawm. Cov dej uas kuv muab yuav txhawv hauv tus ntawd thiab pub txoj sia ntev dhawv mus ib txhis rau nws.” 15 Tus poj niam hais rau nws tias, “Yawg hlob, thov muab cov dej kod rau kuv haus, kuv thiaj tsis nqhis thiab tsis tas tuaj nqa dej ntawm no lawm.”

16 Yexus hais rau tus poj niam ntawd tias, “Mus coj koj tus txiv tuaj ntawm no.” 17 Tus poj niam teb tias, “Kuv tsis muaj txiv.” Yexus hais rau nws tias, “Yeej yog li koj hais, koj tsis muaj txiv tiag, 18 vim koj twb muaj tsib tug txiv lawm. Tus uas nrog koj nyob tam sim no, tsis yog koj tus txiv. Koj yeej hais tseeb lawm.” 19 Tus poj niam hais rau nws tias, “Yawg hlob, koj yog ib tug cev Vajtswv lus tiag. 20 Peb cov yawg koob yeej pe hawm Vajtswv saum lub roob no. Tiam sis nej cov Yudais hais tias yuav tsum mus pe hawm hauv Yeluxalees xwb.” 21 Yexus hais tias, “Cia li ntseeg kuv tej lus no nawb, muaj ib hnub uas nej yuav tsis pe hawm Leej Txiv saum lub roob no thiab hauv Yeluxalees lawm. 22 Nej tsis paub tus uas nej pe hawm, tiam sis peb paub tus uas peb pe hawm, rau qhov cov Yudais yog cov uas xub paub txog kev cawm dim. 23 Txawm li ntawd los, lub sij hawm* tab tom los thiab twb los txog lawm, cov uas pe hawm Vajtswv tiag tiag yuav pe hawm Leej Txiv raws li lub hwj huam coj thiab raws li qhov tseeb. Rau qhov Leej Txiv yeej nrhiav cov uas zoo li ntawd los pe hawm nws. 24 Vajtswv yog tus uas peb qhov muag tsis pom* mas cov uas pe hawm nws yuav tsum pe hawm raws li lub hwj huam coj thiab raws li qhov tseeb.” 25 Tus poj niam hais rau nws tias, “Kuv paub tias tus Mexiyas uas hu ua Khetos yeej yuav los. Thaum nws los txog, nws yuav qhia txhua yam rau peb.” 26 Yexus hais rau nws tias, “Kuv yog tus ntawd ntag, tus uas tab tom nrog koj tham no.”

27 Tam sim ntawd, nws cov thwj tim rov los txog. Lawv tsis pom qab xav li vim Yexus nrog ib tug poj niam tham. Tiam sis tsis muaj ib tug kav nug Yexus tias, “Koj xav tau dab tsi ntawm nws?” los sis “Vim li cas koj nrog tus poj niam ntawd tham?” 28 Tus poj niam txawm tso plhuav nws hub dej tseg thiab mus hauv nroog mus qhia rau tib neeg tias, 29 “Nrog kuv mus saib ib tug txiv neej nyob tod. Nws qhia tau txhua yam uas kuv ua lawd rau kuv. Ntshe nws yog tus Khetos kaj?” 30 Lawv thiaj tawm zom zaws hauv nroog tuaj cuag Yexus.

31 Lub sij hawm ntawd, cov thwj tim pheej hu Yexus tias, “Xib Hwb,* los noj mov.” 32 Tiam sis nws hais rau lawv tias, “Kuv twb muaj mov noj lawm, nej tsis paub tej mov ntawd.” 33 Cov thwj tim thiaj sib nug tias, “Leej twg txawm siv nqa mov tuaj rau nws noj lawm?” 34 Yexus hais rau lawv tias, “Kuv tej mov yog ua raws li tus uas txib kuv los lub siab nyiam thiab ua nws tes hauj lwm kom tiav. 35 Nej hais tias tshuav plaub lub hlis mam txog caij sau qoob los tsis yog? Tiam sis kuv hais rau nej tias, tsa muag saib tej teb, tej qoob twb siav daj rhuv zoo sau lawm. 36 Tus uas sau qoob tau nqi zog lawm thiab tej qoob ntawd yuav tau txoj sia ntev dhawv mus ib txhis. Tej no ua rau tus uas tseb thiab tus uas sau zoo siab ib yam nkaus. 37 Rau qhov yeej muaj tseeb raws li zaj paj lug uas hais tias, ib tug yog tus tseb thiab ib tug yog tus sau. 38 Kuv txib nej mus sau tej qoob uas tsis yog nej lub dag lub zog khwv. Nej cia li mus khaws sau tej uas lwm tus siv dag siv zog khwv xwb.”

39 Cov neeg Xamalis hauv lub nroog ntawd coob tus ntseeg Yexus rau qhov tus poj niam hais tias, “Nws qhia kuv txog txhua yam uas kuv tau ua lawd.” 40 Yog li ntawd, thaum cov Xamalis mus cuag Yexus, lawv thov kom nws nrog lawv nyob. Nws thiaj nrog lawv nyob tau ob hnub. 41 Thaum kawg thiaj muaj coob tus los ntseeg rau qhov lawv hnov tej uas nws qhia. 42 Lawv txawm hais rau tus poj niam tias, “Tsis yog peb hnov tej uas koj hais es peb thiaj ntseeg xwb, tiam sis nim no peb hnov kiag nws tej lus lawm. Peb paub tias tus yawg no yeej yog qab ntuj neeg tus cawm seej tiag.”

43 Ob hnub tom qab ntawd, Yexus mam mus rau Kalilais. 44 Yexus twb hais lawm tias ib tug cev Vajtswv lus, nws lub zej lub zos yeej tsis hwm nws. 45 Thaum Yexus mus txog hauv Kalilais, cov neeg Kalilais tos txais nws, rau qhov thaum lawv mus ua Kev Cai Hla Dhau hauv Yeluxalees, lawv tau pom txhua yam txuj ci uas Yexus ua.

46 Yexus txawm rov los rau hauv lub zos Khanas nyob xeev Kalilais, yog lub zos uas nws tau muab dej txia ua cawv txiv hmab. Muaj ib tug nom nyob hauv Khapena-us uas nws tus tub mob hnyav heev. 47 Thaum tus nom ntawd hnov tias Yexus twb tawm hauv Yudias los rau Kalilais lawm, nws thiaj mus cuag Yexus thiab thov kom Yexus mus kho nws tus tub uas mob hnyav heev twb yuav tuag. 48 Tiam sis Yexus hais rau nws tias, “Nej cov neeg kod mas, yog nej tsis pom tej txuj ci tseem ceeb* ces nej yeej yuav tsis ntseeg li.” 49 Tus nom hais rau Yexus tias, “Tus Tswv, thov nrog kuv mus, cheem kuv tus me tub tseem muaj txoj sia nyob.” 50 Yexus hais rau nws tias, “Rov mus tsev, koj tus tub twb zoo lawm.” Tus nom ntawd ntseeg Yexus tej lus, nws thiaj rov mus tsev. 51 Thaum tus nom mus txog ib tog kev, nws cov tub qhe tuaj ntsib nws thiab hais rau nws tias nws tus tub twb zoo lawm.* 52 Ces nws nug lawv seb thaum twg nws tus tub zoo lawm. Lawv teb tias, “Nag hmo thaum ib teev nws tus npaws tu kiag lawm.” 53 Leej txiv paub tias lub sij hawm ntawd yog thaum Yexus hais rau nws tias, “Koj tus tub twb zoo lawm.” Tus nom thiab nws tsev neeg thiaj los ntseeg Yexus. 54 Qhov txuj ci no yog zaum ob uas Yexus tau ua thaum nws rov nram Yudias los rau Kalilais.

5 Thaum txog caij rau cov Yudais ua kev cai,* Yexus thiaj mus rau hauv Yeluxalees. 2 Nyob hauv Yeluxalees ntawm lub Rooj Loog Yaj muaj ib lub pas dej uas lus Henplais hu ua Npexethas. Muaj tsib zaj qab khav* puag ncig lub pas dej. 3 Cov neeg muaj mob, cov dig muag, cov ceg tawv, thiab cov qhuav tes qhuav taw* coob tus tuaj pw ntawd. 4* —— 5 Tiam sis muaj ib tug yawg nyob ntawd twb mob tau 38 xyoo lawm. 6 Thaum Yexus pom nws pw ntawd, Yexus paub tias nws mob tau ntev heev lawm. Yexus thiaj hais rau nws tias, “Koj puas xav zoo?” 7 Tus yawg mob ntawd teb tias, “Yawg hlob, thaum lub pas dej ntas tsis muaj leej twg pab tuav kuv mus rau hauv. Thaum kuv tab tom yuav mus ces twb muaj lwm tus ua kuv ntej lawm.” 8 Yexus hais rau nws tias, “Cia li sawv tsees! Nqa koj daim lev* mus.” 9 Tus yawg ntawd txawm zoo kiag tam sid, nws thiaj nqa hlo nws daim lev* taug kev mus lawm.

Hnub ntawd yog hnub Xanpataus. 10 Cov Yudais txawm hais rau tus uas zoo mob ntawd tias, “Hnub no yog hnub Xanpataus, koj nqa lev* li ko txhaum cai lawm.” 11 Tiam sis nws teb lawv tias, “Twb yog tus uas kho kuv zoo hais rau kuv tias, ‘Nqa koj daim lev* mus.’” 12 Lawv nug nws tias, “Tus uas hais kom koj nqa koj daim lev* mus yog leej twg?” 13 Tiam sis tus uas zoo mob ntawd tsis paub xyov yog leej twg, vim Yexus twb mus xyaw cov neeg coob coob uas tuaj rau ntawd lawm.

14 Tom qab ntawd, Yexus mus pom nws hauv lub tuam tsev, Yexus hais rau nws tias, “Koj twb zoo lawm. Tsis txhob ua txhaum ntxiv tsam ho muaj tej yam phem tshaj no los raug koj.” 15 Tus yawg ntawd txawm mus qhia rau cov Yudais tias Yexus yog tus kho nws zoo. 16 Vim li no cov Yudais thiaj ua teeb meem rau Yexus rau qhov nws kho mob rau hnub Xanpataus. 17 Tiam sis Yexus teb lawv tias, “Kuv Leej Txiv yeej ib txwm ua hauj lwm los txog tav no ces kuv yuav ua thiab.” 18 Twb yog li ntawd, cov Yudais thiaj nrhiav nrhw kev muab Yexus tua pov tseg, vim lawv xav tias nws ua tej uas txwv tsis pub ua rau hnub Xanpataus. Thiab nws tseem muab Vajtswv hu ua nws Leej Txiv mas cuag li nws nrog Vajtswv sib txig sib luag.

19 Yexus thiaj teb lawv tias, “Kuv hais ncaj qha rau nej tias, Leej Tub yeej ua tsis tau ib yam dab tsi raws li nws siab xav, nws tsuas ua tej uas nws pom Leej Txiv ua xwb. Rau qhov Leej Txiv ua yam twg, Leej Tub kuj ua yam ntawd thiab. 20 Leej Txiv hlub Leej Tub nws thiaj qhia txhua yam uas nws ua rau Leej Tub. Nws tseem yuav qhia Leej Tub ua tej yam loj tshaj no thiab, mas nej yuav xav tsis thoob li. 21 Leej Txiv tsa cov tuag ciaj sawv rov los li cas, Leej Tub kuj tsa tau tus uas nws xav tsa ib yam li ntawd thiab. 22 Rau qhov Leej Txiv tsis txiav txim rau ib tug twg li, tiam sis nws tsa Leej Tub los ua tus txiav txim rau txhua leej txhua tus, 23 kom txhua tus thiaj hwm Leej Tub ib yam li hwm Leej Txiv. Tus uas tsis hwm Leej Tub kuj tsis hwm Leej Txiv tus uas txib Leej Tub los. 24 Kuv hais ncaj qha rau nej tias, tus uas hnov kuv tej lus thiab ntseeg Tus uas txib kuv los, tus ntawd yuav tau txoj sia ntev dhawv mus ib txhis. Nws yuav tsis raug txim tiam sis nws twb tawm hauv txoj kev tuag los tau txoj sia lawm.

25 “Kuv hais ncaj qha rau nej tias, hnub ntawd tab tom los thiab twb los txog lawm, thaum cov tuag hnov Vajtswv tus Tub lub suab hu thiab txhua tus uas hnov thiab coj raws li ntawd yuav tau txoj sia. 26 Leej Txiv yog lub hauv paus siav* li cas, nws kuj pub kom Leej Tub yog lub hauv paus siav ib yam li ntawd. 27 Thiab Leej Txiv pub Leej Tub muaj hwj chim txiav txim, rau qhov nws yog neeg Leej Tub. 28 Tsis txhob poob siab rau tej ntawd, rau qhov hnub ntawd tab tom los uas txhua tus nyob hauv qhov ntxa* yuav hnov nws lub suab hu 29 thiab tawm los. Cov uas ua zoo yuav ciaj sawv rov los tau txoj sia, thiab cov uas ua phem ua qias yuav ciaj sawv rov los raug txiav txim. 30 Kuv yeej ua tsis tau ib yam dab tsi raws li kuv lub siab xav. Kuv hnov li cas, kuv txiav txim li ntawd, thiab kuv yeej txiav txim ncaj ncees rau qhov kuv tsis xav ua raws li kuv lub siab nyiam, tiam sis kuv xav ua raws li tus uas txib kuv los lub siab nyiam xwb.

31 “Yog kuv rov ua tim khawv txog kuv tus kheej xwb ces yeej tsis muaj leej twg ntseeg kuv. 32 Kuj muaj lwm tus ua tim khawv txog kuv, thiab kuv paub tias tej uas nws ua tim khawv txog kuv ntawd yeej muaj tseeb. 33 Nej twb txib neeg mus cuag Yauhas, thiab nws yeej ua tim khawv tseeb txog kuv. 34 Txawm li ntawd los, kuv tsis tos leej twg ua tim khawv txog kuv, tiam sis kuv hais tej no kom pab tau nej dim. 35 Yauhas zoo li lub teeb ci lam lug rau nej mas nej xav nyob hauv qhov kaj ntawd kawg li, tiam sis nej tsuas zoo siab ib ntus xwb. 36 Yauhas ua tim khawv tias Leej Txiv txib kuv los. Tiam sis kuv tseem muaj pov thawj qhia meej tshaj tias Leej Txiv txib kuv los. Tes hauj lwm uas kuv tab tom ua no ua tim khawv tias Leej Txiv txib kuv los tiag. 37 Thiab Leej Txiv uas txib kuv los kuj ua tim khawv txog kuv. Nej tsis tau hnov nws lub suab thiab tsis tau pom nws lub ntsej muag ib zaug li. 38 Nws txoj lus tsis nyob hauv nej lub siab vim nej tsis ntseeg tus uas nws txib los.

39 “Nej ua tib zoo kawm Vajtswv Txoj Lus rau qhov nej xav tau txoj sia ntev dhawv mus ib txhis. Txoj Lus no twb ua tim khawv txog kuv ntag. 40 Txawm li ntawd los, nej tseem tsis kam los cuag kuv kom nej tau txoj sia. 41 Kuv tsis tos neeg qhuas kuv, 42 tiam sis kuv yeej paub tias nej tsis hlub Vajtswv. 43 Kuv los sawv cev rau kuv Leej Txiv lub npe, tiam sis nej tsis lees yuav kuv. Tus uas nws los nws xwb, nej ho lees yuav tus ntawd. 44 Nej yuav ua li cas ntseeg tej uas kuv hais? Nej ib tug ua rau ib tug qhuas, tiam sis tsis muaj leej twg ua rau tus tseem Vajtswv qhuas li. 45 Nej tsis txhob xav tias kuv yuav nkaug nej rau Leej Txiv, tus uas nkaug nej yog Mauxes tus uas nej cia siab rau. 46 Yog nej ntseeg Mauxes ces nej yuav ntseeg kuv thiab, rau qhov Mauxes twb sau txog kuv lawm. 47 Tiam sis yog nej twb tsis ntseeg tej uas Mauxes sau tseg, nej yuav ua li cas ntseeg tej uas kuv hais?”

6 Dhau ntawd, Yexus txawm caij nkoj hla Hiav Txwv Kalilais uas kuj hu ua Thinpelias, mus rau sab tim ub. 2 Muaj ib pab neeg coob coob pheej raws Yexus qab rau qhov lawv pom nws ua txuj ci kho cov neeg muaj mob. 3 Yexus txawm nce mus rau saum ib lub roob thiab nrog nws cov thwj tim zaum ua ke ntawd. 4 Thaum ntawd yuav txog lub caij cov Yudais ua Kev Cai Hla Dhau. 5 Thaum Yexus tsa muag ntsia pom ib pab neeg coob coob tuaj cuag nws mas nws hais rau Filis tias, “Peb yuav mus yuav mov qhov twg los rau cov neeg no noj?” 6 Tiam sis Yexus hais li no los sim seb Filis yuav teb li cas xwb. Yexus twb paub tias nws yuav ua dab tsi lawm. 7 Filis teb Yexus tias, “Txawm muab 200 denalias* mus yuav mov los ntshe ib leeg twb tsis tau ib qho me me li.” 8 Yexus cov thwj tim tus hu ua Anrus uas yog Ximoos Petus tus kwv hais rau Yexus tias, 9 “Tus me tub no muaj tsib lub ncuav* thiab ob tug ntses me me. Tiam sis yuav ua li cas txaus neeg coob npaum li no noj?”

10 Yexus hais tias, “Hais kom cov tib neeg zaum.” Qhov chaw ntawd muaj muaj nyom ces cov tib neeg thiaj zaum ntawd. Cov txiv neej xwb muaj li 5,000 leej. 11 Yexus muab cov ncuav los, thiab thaum nws ua Vajtswv tsaug tas nws muab faib rau cov uas zaum ntawd noj. Nws kuj ua ib yam li ntawd rau ob tug ntses me me thiab, mas tus yuav noj ntau npaum li cas los tau. 12 Thaum sawv daws noj tsau npo lawm, nws hais rau nws cov thwj tim tias, “Mus khaws tej uas seem thiaj tsis xuam pov tseg.” 13 Lawv thiaj mus khaws cov seem ntawm 5 lub ncuav uas sawv daws noj tsis tas tau 12 tawb puv nkaus.

14 Thaum cov tib neeg pom tej txuj ci Yexus tau ua, lawv txawm hais tias, “Tus no yeej yog tus cev Vajtswv lus uas cog tseg tias yuav los hauv lub qab ntuj no.” 15 Thaum Yexus paub tias lawv yuav muab nws ntes los tsa ua vaj ntxwv, nws thiaj rov mus tib leeg rau saum roob lawm.

16 Thaum yuav tsaus ntuj, Yexus cov thwj tim mus rau nram hiav txwv. 17 Lawv txawm nce nkoj hla hiav txwv mus rau Khapena-us. Thaum ntawd twb tsaus ntuj lawm, thiab Yexus tseem tsis tau los rau ntawm lawv. 18 Hiav txwv txawm pib ntas cuag tsi vim muaj cua ntsawj hlob heev. 19 Tiam sis thaum lawv nquam nkoj mus deb li peb plaub mais* lawm, lawv txawm pom Yexus los ko taw saum nplaim dej los yuav txog lub nkoj mas lawv ntshai kawg li. 20 Tiam sis Yexus hais rau lawv tias, “Yog kuv xwb, tsis txhob ntshai!” 21 Lawv thiaj cia Yexus nce rau hauv lub nkoj ces tib pliag xwb lawv twb mus txog chaw lawm.

22 Hnub tom qab, cov neeg coob coob uas tseem nyob sab hiav txwv tim ub pom tias lub nkoj me me tsis nyob lawm. Yexus cov thwj tim twb caij lub nkoj ntawd mus lawm, tiam sis Yexus tsis nrog lawv mus. 23 Muaj ib co nkoj tuaj hauv Thinpelias tuaj txog ze ntawm qhov chaw uas tus Tswv muab ncuav los ua Vajtswv tsaug thiab muab rau lawv noj. 24 Thaum cov neeg coob coob pom tias Yexus thiab nws cov thwj tim tsis nyob ntawd lawm, lawv txawm nce cov nkoj ntawd mus rau Khapena-us mus nrhiav Yexus.

25 Thaum lawv nrhiav tau Yexus sab hiav txwv tim ub, lawv thiaj hais rau nws tias, “Xib Hwb,* koj tuaj txog ntawm no thaum twg lawd?” 26 Yexus teb lawv tias, “Kuv hais ncaj qha rau nej tias, nej tuaj nrhiav kuv tsis yog vim nej pom tej txuj ci uas kuv ua, tiam sis vim yog kuv pub mov rau nej noj tsau npo xwb. 27 Tsis txhob nrhiav tej zaub mov uas txawj lwj, tiam sis nrhiav tej zaub mov uas tsis txawj lwj kom tau txoj sia ntev dhawv mus ib txhis. Neeg Leej Tub yuav pub cov mov no rau nej. Rau qhov Leej Txiv uas yog Vajtswv twb pom zoo* rau nws lawm.”

28 Lawv thiaj nug Yexus tias, “Vajtswv xav kom peb ua hauj lwm dab tsi?” 29 Yexus teb lawv tias, “Vajtswv tes hauj lwm yog kom nej ntseeg tus uas nws txib los.” 30 Lawv rov nug Yexus tias, “Koj yuav ua txuj ci dab tsi xwv peb thiaj pom thiab ntseeg koj? Koj yuav ua dab tsi? 31 Peb cov yawg koob mas lawv tau noj manas tom teb chaws moj sab qhua li Vajtswv txoj lus sau tseg tias, ‘Nws muab mov saum ntuj los rau lawv noj.’” 32 Yexus hais rau lawv tias, “Kuv hais ncaj qha rau nej tias, Mauxes tsis tau muab cov mov saum ntuj los rau nej cov yawg koob, tiam sis kuv Leej Txiv muab cov tseem mov saum ntuj los rau nej. 33 Rau qhov Vajtswv cov mov yog tus uas los saum ntuj los thiab pub txoj sia rau lub qab ntuj neeg.” 34 Lawv thiaj hais rau Yexus tias, “Tus Tswv, thov muab cov mov ntawd rau peb noj mus li.”

35 Yexus hais rau lawv tias, “Kuv yog cov mov uas pub txoj sia. Tus uas los cuag kuv yuav tsis tshaib li, thiab tus uas ntseeg* kuv yuav tsis nqhis ib zaug li lawm. 36 Tiam sis zoo li kuv hais rau nej lawd, nej twb pom kuv los nej tseem tsis ntseeg. 37 Txhua tus uas Leej Txiv muab pub rau kuv yuav los cuag kuv, thiab kuv yeej yuav tsis muab tus uas los cuag kuv ntiab mus ib zaug li. 38 Rau qhov kuv los saum ntuj los, tsis yog los ua raws li kuv lub siab nyiam, tiam sis yog los ua raws li tus uas txib kuv los lub siab nyiam. 39 Tus uas txib kuv los xav kom kuv saib xyuas cov uas nws pub rau kuv, tsis pub ib tug ploj li. Nws xav kom kuv tsa lawv ciaj sawv rov los rau hnub kawg. 40 Rau qhov kuv Leej Txiv xav kom txhua tus uas txais yuav Leej Tub thiab ntseeg* nws tau txoj sia ntev dhawv mus ib txhis, thiab kuv yuav tsa nws ciaj sawv rov los rau hnub kawg.”

41 Cov Yudais txawm pib yws Yexus vim nws hais tias, “Kuv yog cov mov uas los saum ntuj los.” 42 Thiab lawv hais tias, “Tus no twb yog Yauxej tus tub Yexus los tsis yog? Peb twb paub nws niam nws txiv sad? Ua cas nws ho hais tias, ‘Kuv los saum ntuj los’?” 43 Yexus thiaj teb lawv tias, “Cia li tseg tsis txhob yws yws. 44 Tsis muaj leej twg los cuag tau kuv yog Leej Txiv tus uas txib kuv los tsis rub nws, thiab kuv yuav tsa nws ciaj sawv rov los rau hnub kawg. 45 Cov cev Vajtswv lus sau tseg tias, ‘Vajtswv Yehauvas* yuav qhia lawv sawv daws.’ Txhua tus uas hnov Leej Txiv tej lus thiab ua raws li tej lus ntawd yuav los cuag kuv. 46 Tsis muaj leej twg tau pom Leej Txiv, tsuas yog tus uas los ntawm Vajtswv los, tus ntawd thiaj pom Leej Txiv xwb. 47 Kuv hais ncaj qha rau nej tias, tus uas ntseeg yuav tau txoj sia ntev dhawv mus ib txhis.

48 “Kuv yog cov mov uas pub txoj sia. 49 Nej cov yawg koob tau noj manas tom teb chaws moj sab qhua los lawv tuag tas lawm. 50 Tiam sis tus uas tau noj cov mov los saum ntuj los yuav tsis tuag. 51 Kuv yog cov mov los saum ntuj los uas pub txoj sia. Yog leej twg noj cov mov no ces nws yuav nyob mus ib txhis. Tsis tas li ntawd, cov mov uas kuv yuav pub rau lub qab ntuj neeg tau txoj sia yog kuv cev nqaij ntag.”

52 Cov Yudais txawm sib cav zom zaws tias, “Tus yawg no yuav ua li cas muab nws cev nqaij rau peb noj?” 53 Yexus thiaj hais rau lawv tias, “Kuv hais ncaj qha rau nej tias yog nej tsis noj neeg Leej Tub cev nqaij thiab haus nws cov ntshav, nej yuav tsis tau txoj sia.* 54 Tus uas noj kuv cev nqaij thiab haus kuv cov ntshav yuav tau txoj sia ntev dhawv mus ib txhis, thiab kuv yuav tsa nws ciaj sawv rov los rau hnub kawg, 55 rau qhov kuv cev nqaij yog cov tseem mov thiab kuv cov ntshav yog cov tseem dej. 56 Tus uas noj kuv cev nqaij thiab haus kuv cov ntshav nrog kuv koom ib lub siab, thiab kuv nrog nws koom ib lub siab. 57 Leej Txiv uas muaj txoj sia txib kuv los, kuv thiaj muaj sia vim yog muaj Leej Txiv. Ib yam li ntawd, tus uas noj kuv cev nqaij yuav muaj txoj sia vim yog muaj kuv thiab. 58 Cov mov uas los saum ntuj los no tsis thooj li cov uas nej tej yawg koob tau noj es tuag tas lawm. Tus uas noj cov mov no yuav nyob mus ib txhis.” 59 Yexus hais tej no rau thaum nws tab tom qhia hauv ib lub tsev pe hawm hauv Khapena-us.

60 Thaum lawv hnov li no, nws cov thwj tim coob tus hais tias, “Nws qhia txawv dhau, leej twg yuav xav mloog?” 61 Tiam sis Yexus paub tias nws cov thwj tim yws txog qhov ntawd, nws thiaj hais rau lawv tias, “Qhov no ua rau nej ceeb lod? 62 Yog nej tseem pom neeg Leej Tub mus rau saum qhov chaw uas nws xub nyob mas ntshe nej yuav haj yam ceeb loj! 63 Lub hwj huam pub tau txoj sia, nqaij tawv pub tsis tau. Tej lus uas kuv hais rau nej yog los ntawm lub hwj huam los thiab pub tau txoj sia. 64 Tiam sis nej cov ntawm no ib txhia tsis ntseeg.” Yexus hais li no rau qhov nws twb paub ua ntej tias cov twg tsis ntseeg thiab paub tus uas yuav ntxeev siab rau nws lawm. 65 Yexus hais ntxiv tias, “Twb yog vim li no kuv thiaj hais rau nej tias, tsis muaj leej twg los cuag tau kuv, yog Leej Txiv tsis pub nws los.”

66 Vim tej uas Yexus hais no, cov thwj tim coob tus thiaj tsis raws Yexus qab thiab thim rov mus ua tej uas lawv twb tso tseg lawm. 67 Yexus thiaj nug 12 tug tub txib tias, “Nej yuav thim rov qab thiab lod?” 68 Ximoos Petus txawm teb ntua tias, “Tus Tswv, peb yuav thim rov qab mus cuag leej twg? Koj thiaj qhia txog txoj sia ntev dhawv mus ib txhis xwb. 69 Peb yeej ntseeg thiab paub tias koj yog tus Tub Qhe Dawb Huv uas Vajtswv txib los.” 70 Yexus teb lawv tias, “Kuv yog tus xaiv nej 12 leeg no, los tsis yog? Tiam sis nej cov no ib tug zoo li Ntxwg Nyoog.”* 71 Yexus hais li ntawd twb yog nws hais txog Yudas uas yog Ximoos Ikhali-aus tus tub. Txawm Yudas yog ib tug ntawm 12 tug tub txib los nws tseem yuav ntxeev siab rau Yexus.

7 Tom qab ntawd, Yexus tsuas tshaj tawm hauv Kalilais lawm xwb. Nws tsis xav mus rau Yudias, vim cov Yudais nrhiav nrhw kev muab nws tua. 2 Thaum ntawd twb yuav txog lub caij cov Yudais ua Kev Cai Nyob Tsev Pheeb Suab.* 3 Yexus cov kwv txawm hais rau nws tias, “Cia li mus rau Yudias xwv koj cov thwj tim nrad thiaj pom tej hauj lwm uas koj ua thiab. 4 Yog leej twg xav kom teb chaws paub nws ces nws yeej tsis ua hauj lwm nraim nkoos li. Yog koj yuav ua tej no ces mus ua tab meeg sawv daws.” 5 Txawm Yexus cov kwv los kuj tsis ntseeg nws thiab. 6 Yexus thiaj hais rau lawv tias, “Kuv lub sij hawm tseem tsis tau los txog, tiam sis nej li nej mus thaum twg los tau. 7 Lub qab ntuj neeg tsis ntxub nej tiam sis lawv ntxub kuv, vim kuv ua tim khawv txog lawv tej hauj lwm phem. 8 Nej yuav mus ua kev cai los nej mus nej. Kuv tsis tau mus rau qhov kuv lub sij hawm tsis tau los txog.” 9 Tom qab nws hais li ntawd rau lawv, nws tseem nyob hauv Kalilais.

10 Thaum nws cov kwv mus dhau lawd, nws mam mus twj ywm tsis pub leej twg paub. 11 Thaum tab tom ua kev cai, cov Yudais txawm nrhiav Yexus thiab sib nug tias, “Tus yawg ntawd nyob qhov twg ne?” 12 Pab neeg coob coob ntawd sib ntxhi zom zaws txog Yexus. Ib txhia hais tias, “Nws yog ib tug neeg zoo.” Lwm cov hais tias, “Nws tsis yog neeg zoo. Nws xav ntxias tib neeg yuam kev xwb.” 13 Tiam sis tsis muaj ib tug kav tham txog Yexus tab meeg sawv daws vim lawv ntshai cov Yudais.

14 Thaum lawv ua kev cai kwv lam li plaub hnub* lawd, Yexus txawm mus qhia hauv lub tuam tsev. 15 Cov Yudais xav tsis thoob li, lawv thiaj hais tias, “Ua li cas tus yawg no ho paub Vajtswv Txoj Lus ua luaj, nws twb tsis tau mus kawm qhov twg li sad?”* 16 Yexus thiaj teb lawv tias, “Tej lus uas kuv qhia tsis yog kuv li, tiam sis yog tus uas txib kuv los li xwb. 17 Yog leej twg xav ua raws li Vajtswv lub siab nyiam, tus ntawd yeej yuav paub tias tej uas kuv qhia yog kuv lub tswv yim los yog Vajtswv lub. 18 Tus uas hais raws li nws lub tswv yim xwb, xav kom luag qhuas nws. Tiam sis tus uas xav kom luag qhuas tus uas txib nws los, tus ntawd thiaj hais qhov tseeb thiab ua qhov ncaj. 19 Mauxes twb muab txoj Kev Cai rau nej los tsis yog? Tiam sis nej tsis muaj ib tug ua raws li txoj Kev Cai ntawd. Vim li cas nej ho nrhiav kev nrhw tua kuv?” 20 Pab neeg ntawd teb tias, “Koj raug dab lawm kaj. Leej twg nrhiav kev tua koj?” 21 Yexus teb lawv tias, “Kuv ua tib qho txuj ci xwb es nej twb ceeb tas. 22 Sim xav seb, Mauxes kom nej ua kev cai txiav* mas nej twb muab tej me tub ua kev cai txiav rau hnub Xanpataus ne. Tsis yog Mauxes hais, tiam sis yog nej cov yawg koob hais. 23 Yog nej twb muab tej me tub ua kev cai txiav rau hnub Xanpataus kom txhob hla Mauxes Txoj Kev Cai, vim li cas thaum kuv kho ib tug neeg zoo rau hnub Xanpataus, nej ho ua nruj ua tsiv rau kuv? 24 Tseg tsis txhob txiav txim raws li nej lub qhov muag pom xwb, cia li txiav txim raws li txoj kev ncaj ncees.”

25 Muaj ib txhia uas nyob hauv Yeluxalees txawm hais tias, “Tus yawg no twb yog tus uas lawv nrhiav tua los sad? 26 Ua cas nws qhia tab meeg sawv daws los, lawv ho tsis hais dab tsi li? Tsis yog cov thawj coj paub tseeb lawm tias tus no yog tus Khetos lod? 27 Tiam sis peb yeej paub tias tus yawg no nyob qhov twg tuaj. Thaum tus Khetos los mas yeej tsis muaj leej twg paub tias nws nyob qhov twg tuaj li.” 28 Thaum Yexus tab tom qhia hauv lub tuam tsev, nws hais nrov nrov tias, “Nej yeej paub kuv thiab paub tias kuv nyob qhov twg tuaj. Tsis yog kuv tuaj kuv xwb, tiam sis tus uas txib kuv los yeej muaj nyob tiag, thiab nej tsis paub nws. 29 Kuv paub nws, rau qhov kuv sawv cev rau nws, thiab tus ntawd txib kuv los.” 30 Ces lawv txawm nrhiav kev ntes Yexus tiam sis tsis muaj leej twg kav ntes, rau qhov tsis tau txog nws lub sij hawm. 31 Txawm li ntawd los, muaj coob tus ntseeg nws, thiab lawv hais tias, “Thaum tus Khetos los, nws tseem yuav ua txuj ci ntau dua tus yawg no thiab lod?”

32 Thaum cov Falixais hnov pab neeg coob coob sib ntxhi txog Yexus li ntawd, cov pov thawj hlob thiab cov Falixais thiaj txib tub ceev xwm mus ntes nws. 33 Ces Yexus hais tias, “Kuv tsuas nrog nej nyob ib ntus xwb. Kuv yuav mus cuag tus uas txib kuv los. 34 Nej yuav nrhiav kuv, tiam sis yuav tsis pom kuv, thiab qhov chaw uas kuv yuav mus, nej mus tsis tau.” 35 Yog li ntawd, cov Yudais thiaj sib tham tias, “Tus yawg no yuav mus qhov twg es peb ho nrhiav tsis pom nws? Puas yog nws yuav mus poo cov Yudais uas tawg mus xyaw cov Kilis lawd es qhia cov Kilis? 36 Nws hais tias, ‘Nej yuav nrhiav kuv, tiam sis nej yuav tsis pom kuv, thiab qhov chaw uas kuv yuav mus, nej mus tsis tau.’ Nws cov lus no yog li cas tiag?”

37 Hnub ua kev cai xaus uas yog hnub tseem ceeb, Yexus txawm sawv ntsug thiab hais nrov nrov tias, “Yog tus twg nqhis dej, cia nws los cuag kuv mas kuv yuav muab dej rau nws haus. 38 Tus uas ntseeg kuv yuav zoo li Vajtswv Txoj Lus tau hais no, ‘Tus dej cawm siav yuav txhawv hauv nws lub siab los.’” 39 Yexus hais li no yog hais txog lub hwj huam uas cov ntseeg nws tab tom yuav tau txais. Lawv tseem tsis tau txais lub hwj huam rau qhov Yexus tseem tsis tau mus saum ntuj.* 40 Cov neeg coob coob ntawd qee leej uas hnov Yexus tej lus txawm hais tias, “Tus no yeej yog tus cev Vajtswv lus tiag.” 41 Lwm cov hais tias, “Tus no yog tus Khetos.” Tiam sis muaj dua lwm cov ho hais tias, “Tus Khetos tsis yog nyob hauv Kalilais tuaj los sad? 42 Vajtswv Txoj Lus twb hais tseg tias tus Khetos yog Daviv xeeb ntxwv thiab nyob hauv Npelehees uas yog Daviv lub zos tuaj los sad?” 43 Cov neeg coob coob ntawd txawm hais tsis sib haum txog Yexus. 44 Lawv ib txhia xav ntes Yexus, tiam sis tsis muaj ib tug kav ntes nws li.

45 Thaum cov tub ceev xwm rov los, cov pov thawj hlob thiab cov Falixais nug lawv tias, “Ua cas nej tseem tsis muab nws ntes kiag los?” 46 Cov tub ceev xwm teb tias, “Tsis tau muaj ib tug neeg uas txawj qhia npaum li tus no.” 47 Cov Falixais thiaj teb tias, “Tsis yog nej raug nws ntxias lawm thiab lod? 48 Twb tsis muaj ib tug thawj coj los sis ib tug Falixais ntseeg nws li los sad. 49 Tiam sis pab neeg coob coob uas tsis paub Mauxes Txoj Kev Cai no twb raug Vajtswv foom tsis zoo lawm.” 50 Nikhaudemaus, tus uas twb mus cuag Yexus dua lawd thiab yog cov Falixais ib tug, thiaj hais rau lawv tias, 51 “Raws li peb txoj Kev Cai, ua ntej yuav txiav txim rau ib tug twg, yuav tsum xub taug qab thiab mloog nws daws nws zaj tso los sad?” 52 Lawv teb ntua tias, “Tsis yog koj tuaj pem Kalilais tuaj thiab lod? Sim mus tshawb seb puas muaj ib tug cev Vajtswv lus nyob hauv Kalilais tuaj.”*

8 12 Yexus rov hais rau lawv tias, “Kuv yog qhov kaj uas ci rau qab ntuj neeg pom kev. Tus uas raws kuv qab yuav tsis taug txoj kev tsaus ntuj, tiam sis yuav tau qhov kaj uas pub txoj sia.” 13 Cov Falixais txawm hais rau Yexus tias, “Koj ua tim khawv txog koj tus kheej xwb. Koj tej lus tsis muaj tseeb.” 14 Yexus teb lawv tias, “Txawm yog kuv ua tim khawv txog kuv tus kheej xwb los kuv tej lus yeej muaj tseeb, rau qhov kuv paub tias kuv los qhov twg los thiab kuv yuav mus rau qhov twg. Tiam sis nej tsis paub tias kuv los qhov twg los thiab kuv yuav mus rau qhov twg. 15 Nej txiav txim raws li neeg lub qhov muag pom.* Kuv tsis txiav txim rau leej twg li. 16 Yog tias kuv ho txiav txim rau leej twg los kuv yeej txiav ncaj ncees,* rau qhov tsis yog kuv tib leeg xwb tiam sis Leej Txiv tus uas txib kuv los yeej nrog nraim kuv. 17 Tsis tas li ntawd xwb, hauv nej txoj Kev Cai los yeej sau tias, ‘Muaj ob leeg ua tim khawv thiaj tseeb.’ 18 Kuv yog tus ua tim khawv txog kuv tus kheej, thiab Leej Txiv tus uas txib kuv los kuj ua tim khawv txog kuv.” 19 Ces lawv txawm hais rau nws tias, “Es koj Txiv nyob qhov twg?” Yexus teb tias, “Nej yeej tsis paub kuv Txiv wb. Yog nej paub kuv, nej kuj paub kuv Txiv thiab.” 20 Nws hais tej lus no thaum nws tab tom qhia hauv lub tuam tsev ntawm chav rau nyiaj. Tiam sis tsis muaj leej twg ntes nws rau qhov tsis tau txog nws lub sij hawm.

21 Yexus rov hais rau lawv tias, “Kuv yuav mus mas nej yuav nrhiav kuv, tiam sis nej yuav ris nej lub txim mus txog hnub tuag. Nej mus tsis tau qhov chaw uas kuv yuav mus.” 22 Cov Yudais txawm hais tias, “Ua cas nws ho hais tias, ‘Nej mus tsis tau qhov chaw uas kuv yuav mus’? Tsis yog nws yuav tua nws tus kheej lod?” 23 Nws hais ntxiv rau lawv tias, “Nej yog neeg ntiaj teb, kuv yog neeg qaum ntuj. Nej yog qab ntuj neeg li, tiam sis kuv tsis yog. 24 Twb yog vim li no kuv thiaj hais rau nej tias, nej yuav ris nej lub txim mus txog hnub tuag. Rau qhov yog nej tsis ntseeg tias kuv yog tus uas yuav los ces nej yuav ris nej lub txim mus txog thaum tuag.” 25 Ces lawv txawm hais rau nws tias, “Koj yog leej twg?” Yexus teb lawv tias, “Ua cas yuav nkim kuv lub sij hawm qhia nej xwb os. 26 Kuv muaj ntau yam yuav hais txog nej thiab tshuav ntau yam uas kuv yuav txiav txim rau. Tiam sis tus uas txib kuv los yeej hais qhov tseeb, thiab tej uas nws hais rau kuv yog tej uas kuv tab tom muab hais rau lub qab ntuj neeg.” 27 Lawv tsis to taub tias tej uas nws hais ntawd yog hais txog Leej Txiv. 28 Ces Yexus hais tias, “Tom qab nej muab neeg Leej Tub dai rau saum tus ncej ces nej mam paub tias kuv yog leej twg* thiab kuv tsis ua ib yam dab tsi raws li kuv lub siab nyiam, tiam sis Leej Txiv qhia li cas ces kuv hais li ntawd. 29 Thiab tus uas txib kuv los yeej nrog nraim kuv. Nws tsis tso kuv tseg rau qhov kuv ua txhua yam raws li nws pom zoo.” 30 Thaum nws hais tej lus no muaj coob tus los ntseeg nws.

31 Yexus txawm hais rau cov Yudais uas ntseeg nws tias, “Yog nej tuav rawv kuv tej lus, nej thiaj yog kuv cov thwj tim tiag. 32 Nej yuav paub qhov tseeb thiab qhov tseeb yuav tso nej dim.” 33 Lawv teb nws tias, “Peb yog Anplahas cov xeeb ntxwv, peb yeej tsis tau ua leej twg qhev li. Ua cas koj ho hais tias, ‘Nej yuav dim’?” 34 Yexus teb lawv tias, “Kuv hais ncaj qha rau nej tias txhua tus uas ua txhaum yeej ua kev txhaum qhev. 35 Tsis tas li ntawd, tus qhev yeej tsis tau nyob hauv tus tswv lub tsev mus ib txhis, tus tub thiaj tau nyob xwb. 36 Yog li ntawd, yog Leej Tub tso nej dim ces nej yeej yuav dim tiag. 37 Kuv paub tias nej yog Anplahas cov xeeb ntxwv, tiam sis nej nrhiav nrhw kev tua kuv rau qhov nej tsis ntseeg tej uas kuv qhia. 38 Kuv hais tej uas kuv pom thaum kuv nrog kuv Leej Txiv nyob, tiam sis nej ua tej uas nej kawm ntawm nej txiv.” 39 Lawv teb nws tias, “Peb txiv yog Anplahas.” Yexus hais rau lawv tias, “Yog Anplahas yog nej txiv, nej yeej ua nej lub neej raws li Anplahas lub. 40 Tiam sis nim no nej nrhiav nrhw kev tua kuv pov tseg. Kuv tsuas qhia qhov tseeb uas Vajtswv qhia kuv xwb. Anplahas yeej tsis ua li no ib zaug li. 41 Twb yog nej ua raws li nej txiv ua.” Lawv hais rau nws tias, “Peb tsis yog me nyuam tsaub. Peb muaj tib Leej Txiv xwb, yog Vajtswv.”

42 Yexus hais rau lawv tias, “Yog Vajtswv yog nej Txiv tiag, nej yeej yuav hlub kuv rau qhov Vajtswv txib kuv los, kuv thiaj nyob ntawm no. Tsis yog kuv los kuv xwb, tiam sis Nws txib kuv los. 43 Twb yog nej tsis kam mloog tej uas kuv qhia, nej thiaj tsis nkag siab tej uas kuv hais. 44 Nej txiv yog Dab Ntxwg Nyoog, nej thiaj xav ua raws li nej txiv lub siab nyiam. Tus ntawd yeej tua neeg txij thaum nws pib ua phem los lawm, thiab nws tsis coj raws li qhov tseeb vim qhov tseeb tsis nyob hauv nws lub siab. Nws hais lus dag rau qhov txoj kev dag nyob rawv hauv nws nruab siab. Nws yog ib tug niag dag thiab yog txhua tus uas dag leej txiv. 45 Tiam sis kuv qhia qhov tseeb rau nej, nej thiaj tsis ntseeg kuv. 46 Nej cov leej twg yuav liam txim tau rau kuv? Kuv tsuas hais qhov tseeb xwb, ua cas nej ho tsis ntseeg kuv? 47 Vajtswv cov me nyuam yeej mloog Vajtswv lus. Nej tsis mloog Vajtswv lus rau qhov nej tsis yog Vajtswv cov me nyuam.”

48 Cov Yudais txawm teb Yexus tias, “Tos peb hais tias koj yog neeg Xamalis thiab koj raug dab lawm, tseem tsis yog li peb hais lod?” 49 Yexus teb tias, “Kuv tsis raug dab, twb yog kuv hwm kuv Leej Txiv tiam sis nej tsis hwm kuv. 50 Txawm li ntawd los, kuv tsis nrhiav koob meej rau kuv tus kheej. Vajtswv yog tus nrhiav koob meej rau kuv thiab nws mam li ua tus txiav txim. 51 Kuv hais ncaj qha rau nej tias tus uas mloog kuv lus, nws yeej yuav tsis tuag ib zaug li.” 52 Cov Yudais hais rau nws tias, “Zaum no peb paub tias koj raug dab lawm tiag. Anplahas twb tuag lawm thiab cov cev Vajtswv lus los twb tuag tas lawm, tiam sis koj ho hais tias tus uas mloog koj lus yeej yuav tsis tuag ib zaug li. 53 Koj tseem loj dua peb yawg koob Anplahas uas tuag lawd thiab lod? Cov cev Vajtswv lus twb tuag tas lawm es koj ho yog leej twg thiab?” 54 Yexus teb tias, “Yog kuv rov qhuas kuv tus kheej ces tsis muaj qab hau dab tsi. Kuv Leej Txiv yog tus uas qhuas kuv. Nws yog tus uas nej hais tias yog nej tus Vajtswv. 55 Txawm li ntawd los nej tsis paub nws, tiam sis kuv paub nws. Yog kuv hais tias kuv tsis paub nws kuj yog kuv dag li nej thiab. Tiam sis kuv yeej paub nws thiab ua raws li nws tej lus. 56 Nej yawg koob Anplahas tos ntsoov hnub uas kuv yuav los. Thaum nws xav txog hnub ntawd* mas nws xyiv fab kawg li.” 57 Cov Yudais txawm hais rau nws tias, “Koj twb tsis tau muaj 50 xyoo es koj nim pom Anplahas thiab lod?” 58 Yexus hais rau lawv tias, “Kuv hais ncaj qha rau nej tias, kuv twb xub nyob ua ntej Anplahas lawm.” 59 Ces lawv txawm khaws pob zeb yuav txawb rau Yexus tiam sis nws khiav nkaum thiab tawm hauv lub tuam tsev mus lawm.

9 Thaum Yexus tab tom taug kev mus, nws pom ib tug yawg uas dig muag txij thaum yug los. 2 Cov thwj tim thiaj nug Yexus tias, “Xib Hwb,* leej twg ua txhaum es tus yawg no thiaj yug los dig muag li ntawd, yog tim nws los yog tim nws niam nws txiv?” 3 Yexus teb tias, “Tsis yog tim nws los sis tim nws niam nws txiv. Tiam sis tau muaj li no kom tib neeg pom Vajtswv lub hwj chim.* 4 Thaum tseem yog nruab hnub, peb yuav tsum ua Vajtswv tus uas txib kuv los tes hauj lwm. Thaum tsaus ntuj, tsis muaj leej twg ua tau hauj lwm lawm. 5 Thaum kuv tseem nyob hauv lub qab ntuj no ces kuv yog qhov kaj rau qab ntuj neeg pom kev.” 6 Tom qab nws hais tej no tas, nws nto qaub ncaug rau hauv av thiab muab do ua ib qho av nkos. Nws mam muab pleev tus yawg ntawd ob lub qhov muag 7 thiab hais rau nws tias, “Mus ntxuav muag tom lub pas dej Xilau-as” (uas txhais tias “Txhawv Los”). Thaum nws mus ntxuav muag los, nws txawm pom kev lawm.

8 Tej neeg zej zog thiab cov uas yav tas los pom nws thov khawv txawm hais tias, “Tus yawg no twb yog tus uas pheej zaum thov khawv los tsis yog?” 9 Muaj ib txhia hais tias, “Yog nws kawg.” Lwm cov hais tias, “Tsis yog, nws muaj ntsis zoo li tus ntawd xwb.” Tiam sis tus yawg ntawd pheej teb tias, “Kuv yog tus ntawd ntag.” 10 Lawv thiaj nug nws tias, “Ua li cas koj ho pom kev lawd?” 11 Nws teb tias, “Muaj ib tug yawg hu ua Yexus ua ib qho av nkos pleev kuv ob lub qhov muag thiab hais rau kuv tias, ‘Mus ntxuav muag tom lub pas dej Xilau-as.’ Kuv mus ntxuav tas ces kuv txawm pom kev lawm.” 12 Lawv thiaj hais rau nws tias, “Tus yawg ntawd dua twg lawd?” Nws teb tias, “Kuv tsis paub.”

13 Lawv txawm coj tus yawg dig muag uas pom kev ntawd mus ntsib cov Falixais. 14 Hnub uas Yexus ua qhov av nkos kho tus yawg ntawd qhov muag pom kev ncaj rau hnub Xanpataus. 15 Ces cov Falixais thiaj nug tus yawg ntawd tias ua li cas nws ho pom kev. Nws hais rau lawv tias, “Nws muab av nkos pleev kuv qhov muag thiab kuv mus ntxuav muag tas ces kuv txawm pom kev lawm.” 16 Cov Falixais ib txhia txawm hais tias, “Tus yawg ntawd tsis yog Vajtswv txib los vim nws tsis caiv hnub Xanpataus.” Lwm cov ho hais tias, “Ib tug neeg muaj txim puas ua tau txuj ci li ntawd?” Yog li, lawv thiaj hais tsis sib haum. 17 Lawv rov nug tus yawg dig muag tias, “Nws twb yog tus kho koj pom kev kiag, koj xav nws yog leej twg?” Tus yawg ntawd teb ntua tias, “Nws yog ib tug cev Vajtswv lus.”

18 Tiam sis cov Yudais tsis ntseeg tias tus yawg ntawd dig muag es pom kev lawm. Lawv thiaj hu nws niam nws txiv tuaj 19 thiab nug nkawd tias, “Tus no puas yog neb tus tub? Puas yog nws ib txwm yug los tsis pom kev? Ua li cas nim no nws ho pom kev lawm?” 20 Nkawd teb tias, “Tus no yog wb tus tub mas. Thaum yug los nws yeej tsis pom kev tiag. 21 Tiam sis wb tsis paub xyov ua cas nim no nws ho pom kev lawm. Thiab wb tsis paub xyov leej twg kho nws zoo. Nws twb muaj hnub nyoog lawm, mus nug nws. Cia nws mam qhia nej.” 22 Nws niam nws txiv hais li no vim nkawd ntshai cov Yudais. Cov Yudais twb hais haum lawm tias yog leej twg lees Yexus ua tus Khetos mas tus ntawd yuav raug rho tawm hauv lub tsev pe hawm mus. 23 Vim li no nws niam nws txiv thiaj hais tias, “Nws twb muaj hnub nyoog lawm, mus nug nws.”

24 Lawv thiaj rov hu tus yawg dig muag los thiab hais rau nws tias, “Cia li qhia kiag qhov tseeb tab meeg Vajtswv. Peb paub tias tus yawg ntawd yog ib tug neeg muaj txim.” 25 Nws teb lawv tias, “Xyov nws yog ib tug neeg muaj txim los tsis muaj, kuv tsis paub. Kuv tsuas paub tias kuv yeej dig muag tiam sis nim no kuv pom kev lawm.” 26 Lawv thiaj nug nws tias, “Nws ua li cas rau koj es koj thiaj pom kev?” 27 Nws teb lawv tias, “Kuv twb qhia nej tas lawm, tiam sis nej tsis xav mloog. Ua cas nej ho xav kom kuv qhia dua? Tsis yog nej xav ua nws li thwj tim thiab lod?” 28 Thaum nws hais li ntawd tas lawv cem nws tias, “Koj yog tus yawg ntawd thwj tim, tiam sis peb yog Mauxes thwj tim. 29 Peb paub tias Vajtswv yeej hais lus rau Mauxes, tiam sis tus yawg ntawd, xyov nws tuaj qhov twg tuaj.” 30 Nws thiaj teb tias, “Kuv tsis paub hais nej li, ua cas nej tseem tsis paub tias nws tuaj qhov twg tuaj thiab. Nws twb kho tau kuv pom kev lawm ne. 31 Peb yeej paub tias Vajtswv tsis mloog cov neeg muaj txim tej lus thov. Tiam sis Vajtswv mloog tus uas hwm* Vajtswv thiab ua raws li nws lub siab nyiam xwb. 32 Ib txwm thaum ub los yeej tsis tau hnov dua tias muaj neeg kho tau tus uas yug los es dig muag li. 33 Yog tus yawg ntawd tsis yog Vajtswv txib los, nws yeej ua tsis tau dab tsi li.” 34 Lawv teb ntua tias, “Koj yug poob nthav los twb muaj txim li kod es koj tseem muaj cuab kav ntuas peb thiab lod?” Ces lawv txawm muab nws ntiab tawm kiag!

35 Yexus hnov tias lawv muab nws ntiab tawm. Thaum Yexus mus pom nws, Yexus nug tias, “Koj ntseeg neeg Leej Tub lawm lod?” 36 Tus yawg ntawd teb tias, “Yawg hlob, nws yog leej twg es kuv thiaj paub ntseeg?” 37 Yexus hais rau nws tias, “Koj twb pom nws lawm. Nws yog tus uas tab tom nrog koj tham ntag.” 38 Nws hais tias, “Tus Tswv, kuv yeej ntseeg nws.” Ces nws txhos caug ntua hawm Yexus. 39 Yexus thiaj hais tias, “Kuv los hauv lub qab ntuj kom neeg ntiaj teb raug txiav txim li no, cov dig muag yuav pom kev thiab cov pom kev yuav dig muag.” 40 Cov Falixais uas hnov Yexus qhia ntawd thiaj hais rau nws tias, “Koj xav tias peb dig muag thiab no lod?” 41 Yexus hais rau lawv tias, “Yog nej dig muag ces nej tsis muaj txim. Tiam sis nej ho hais tias nej pom kev ces nej yuav tau ris nej lub txim.”

10 “Kuv hais ncaj qha rau nej tias, tus uas tsis mus ntawm lub rooj loog mus rau hauv pab yaj tiam sis nws nce laj kab mus, tus ntawd yog tub sab xwb. 2 Tiam sis tus uas mus ntawm lub rooj loog mus yog tus tswv yug yaj. 3 Tus uas zov lub rooj loog thiaj qhib qhov rooj rau tus no, thiab cov yaj paub nws lub suab. Nws cuab nws cov yaj tej npe thiab coj cov yaj tawm mus. 4 Thaum nws coj nws cov yaj tawm huv si lawm, nws mus ua cov yaj ntej, thiab cov yaj lawv nws qab, rau qhov cov yaj paub nws lub suab. 5 Cov yaj yuav tsis caum tus uas lawv tsis paub, tiam sis yuav khiav ntawm nws mus, rau qhov cov yaj tsis paub tus ntawd lub suab.” 6 Yexus hais zaj lus piv txwv no rau lawv, tiam sis lawv tsis nkag siab xyov nws hais txog dab tsi.

7 Yexus rov hais dua tias, “Kuv hais ncaj qha rau nej tias kuv yog lub rooj loog yaj. 8 Txhua tus uas ua txuj sawv kuv chaw, puav leej yog tub sab tub nyiag, tiam sis cov yaj tsis kam mloog lawv lus. 9 Kuv yog lub rooj loog. Tus uas mus ntawm kuv mus yuav dim. Tus ntawd yuav nkag mus nkag los thiab nrhiav tau tshav zaub. 10 Tus tub sab tsuas tuaj nyiag, tuaj tua, thiab tuaj ua kom cov yaj puas tsuaj xwb. Tiam sis kuv los kom cov yaj tau txoj sia ntev dhawv mus ib txhis. 11 Kuv yog tus tswv yaj zoo. Tus tswv yaj zoo yeej muab nws txoj sia* los theej cov yaj. 12 Tus uas luag ntiav tsis yog tus tswv yug yaj. Cov yaj tsis yog nws li. Thaum nws pom hma los nws txawm tso tes khiav, hma thiaj tom cov yaj ua rau cov yaj tawg ua sab ua sua. 13 Tos nws khiav los twb yog luag ntiav nws xwb, nws thiaj tsis mob siab cov yaj. 14 Kuv yog tus tswv yaj zoo. Kuv paub kuv cov yaj thiab kuv cov yaj paub kuv, 15 ib yam li Leej Txiv paub kuv thiab kuv paub Leej Txiv. Kuv txaus siab muab kuv txoj sia* los theej cov yaj.

16 “Kuv muaj dua lwm pab yaj uas tsis nrog pab no. Kuv yuav coj pab ntawd los thiab. Pab ntawd yuav mloog kuv lub suab thiab yuav los nrog pab no koom ua tib pab, muaj tib tug tswv. 17 Leej Txiv hlub kuv, rau qhov kuv yeem tso kuv txoj sia* tseg kom kuv thiaj rov tau txoj sia.* 18 Tsis muaj leej twg txeeb tau kuv txoj sia* mus tiam sis kuv yeem tso kuv. Kuv muaj cai tso kuv txoj sia* thiab kuv muaj cai tau txoj sia* rov qab los. Kuv Leej Txiv yog tus sam hwm kom kuv ua tej no.”

19 Cov lus no ua rau cov Yudais rov tsis sib haum. 20 Muaj coob tus hais tias, “Nws raug dab, nws vwm lawm. Ua cas nej tseem mloog nws hais thiab?” 21 Muaj dua lwm cov hais tias, “Ib tug neeg raug dab tsis lam qhia li no. Dab yeej tsis muaj cuab kav kho tau cov dig muag pom kev los sad?”

22 Lub caij ntawd, lawv tab tom ua Kev Cai Nco Txog Cob Lub Tuam Tsev* hauv Yeluxalees. Thaum ntawd yog lub caij ntuj no, 23 Yexus tab tom taug kev ntawm lub tuam tsev zaj qab khav Xalaumoos. 24 Cov Yudais los vij nkaus Yexus thiab hais tias, “Koj yuav tos ntev npaum li cas koj mam qhia tseeb rau peb? Qhia ncaj qha rau peb seb koj puas yog tus Khetos los tsis yog.” 25 Yexus teb tias, “Kuv twb qhia nej los nej tsis ntseeg. Tes hauj lwm uas kuv tuav kuv Leej Txiv lub npe ua, twb ua tim khawv txog kuv ntag. 26 Tiam sis nej tsis ntseeg, rau qhov nej tsis yog kuv cov yaj. 27 Kuv cov yaj yeej mloog kuv lub suab thiab kuv paub kuv cov yaj. Kuv cov yaj yeej raws kuv qab. 28 Kuv yuav pub txoj sia ntev dhawv mus ib txhis rau kuv cov yaj, thiab kuv cov yaj yuav tsis raug puas tsuaj li. Tsis muaj leej twg yuav txeeb tau ib tug hauv kuv txhais tes mus. 29 Cov uas Leej Txiv muab pub rau kuv muaj nqis dua txhua yam. Tsis muaj leej twg yuav txeeb tau ib tug hauv Leej Txiv txhais tes mus. 30 Kuv Txiv wb koom ib lub siab.”

31 Cov Yudais txawm rov khaws pob zeb yuav muab Yexus ntaus. 32 Yexus hais rau lawv tias, “Kuv Txiv kom kuv ua ntau yam hauj lwm zoo. Nej twb pom tej ntawd lawm. Yog tim qhov twg es nej ho muab pob zeb ntaus kuv?” 33 Cov Yudais teb tias, “Tos peb muab pob zeb ntaus koj los twb yog tim koj hais lus tuam mom Vajtswv, tsis yog tim tej hauj lwm zoo uas koj ua. Koj yog neeg xwb los koj nim tsab loj li Vajtswv ntag.” 34 Yexus teb lawv tias, “Hauv nej txoj Kev Cai, Vajtswv twb hais tias, ‘Nej zoo li Vajtswv’ no los sad? 35 Yeej tsis muaj leej twg yuav hloov tau Vajtswv txoj lus li. Yog Vajtswv twb muab cov neeg uas tsim nyog raug txim piv zoo li ‘Vajtswv,’ 36 qhov uas kuv hais tias kuv yog Vajtswv tus Tub, puas tsim nyog nej nkaug tias kuv tuam mom Vajtswv? Leej Txiv twb suav tias kuv dawb huv thiab txib kuv los hauv lub qab ntuj no. 37 Yog kuv tsis ua kuv Txiv tes hauj lwm, tsis txhob ntseeg kuv. 38 Tiam sis yog tias kuv ua tes hauj lwm ntawd tiag, txawm nej tsis ntseeg kuv los, kuj ntseeg tes hauj lwm uas kuv ua. Nej thiaj li pom thiab paub tseeb zuj zus tias Leej Txiv nrog kuv koom ib lub siab, thiab kuv nrog Leej Txiv koom ib lub siab.” 39 Lawv txawm rov ntes Yexus tiam sis nws khiav dim lawm.

40 Yexus thiaj hla tus Dej Yaladees mus rau sab tid, thiab mus nyob ntawm qhov chaw uas Yauhas xub muab neeg ua kev cai raus dej. 41 Muaj neeg coob heev tuaj cuag Yexus thiab hais tias, “Yauhas tsis ua ib qho txuj ci li, tiam sis txhua yam uas nws hais txog tus yawg no yeej muaj tseeb.” 42 Thiaj muaj coob tus los ntseeg nws rau qhov chaw ntawd.

11 Muaj ib tug yawg hu ua Laxalaus tau mob. Nws nyob hauv Npethanis uas yog lub zos Maivliag thiab nws tus niam laus Mathas nkawd nyob. 2 Tus Maivliag no yog tus uas muab tshuaj tsw qab hliv rau tus Tswv ko taw thiab muab nws cov plaub hau los so. Tus yawg uas mob ntawd yog Maivliag tus nus Laxalaus. 3 Laxalaus ob tug muam thiaj xa xov mus rau Yexus tias, “Tus Tswv, koj tus phooj ywg uas koj hlub tshua mob lawm.” 4 Tiam sis thaum Yexus hnov li ntawd, nws hais tias, “Tus mob no yuav tsis ua rau nws tuag, tiam sis yuav ua rau Vajtswv thiab Nws tus Tub tau koob meej.”

5 Yexus hlub Mathas thiab nws tus niam hluas thiab Laxalaus heev. 6 Txawm li ntawd los, thaum Yexus hnov tias Laxalaus mob lawm, nws tseem nyob qhov chaw ntawd ob hnub ntxiv. 7 Tom qab ntawd, nws hais rau nws cov thwj tim tias, “Cia peb rov mus rau Yudias.” 8 Cov thwj tim hais rau Yexus tias, “Xib Hwb,* tsis ntev los no cov neeg Yudias twb yuav muab pob zeb ntaus koj es koj tseem yuav rov mus thiab lod?” 9 Yexus teb tias, “Ib hnub muaj 12 txoos teev los tsis yog? Yog leej twg taug kev nruab hnub nws yuav tsis dawm ib yam dab tsi, rau qhov nws pom qhov kaj uas ci rau lub qab ntuj neeg. 10 Tiam sis yog leej twg taug kev hmo ntuj, nws yuav dawm, rau qhov tsis muaj qhov kaj nyob hauv nws.”

11 Tom qab nws hais tej no tas, nws hais ntxiv tias, “Peb tus kwv luag Laxalaus pw tsaug zog lawm, tiam sis kuv yuav mus tsa nws sawv.” 12 Cov thwj tim hais rau nws tias, “Tus Tswv, yog nws tsaug zog lawm ces nws yeej yuav zoo.” 13 Twb yog Yexus hais tias Laxalaus tuag lawm, tiam sis cov thwj tim xav tias ntshe Yexus hais tias Laxalaus tsaug zog lawm xwb. 14 Yexus thiaj hais hlo rau lawv tias, “Laxalaus tuag lawm, 15 zoo uas kuv tsis nyob ntawd, xwv nej thiaj li ntseeg kuv. Cia peb mus saib nws.” 16 Ces Thaumas tus uas hu ua Ntxaib txawm hais rau cov thwj tim tias, “Cia peb mus thiab, peb thiaj nrog Yexus tuag ua ke.”

17 Thaum Yexus mus txog, nws pom tias twb muab Laxalaus zais tau plaub hnub lawm. 18 Npethanis nyob tsis deb ntawm Yeluxalees, kwv lam ob mais* kev xwb. 19 Cov Yudais coob tus tuaj nplig Mathas thiab Maivliag nkawd vim nkawd tus nus tas sim neej lawm. 20 Thaum Mathas hnov tias Yexus tab tom tuaj, nws txawm mus tos Yexus, tiam sis Maivliag nyob tom tsev. 21 Ces Mathas hais rau Yexus tias, “Tus Tswv, yog koj nyob ntawm no, kuv tus nus yeej tsis tuag. 22 Tiam sis kuv paub tias yog koj thov yam twg los Vajtswv yeej yuav pub rau koj.” 23 Yexus hais rau Mathas tias, “Koj tus nus yeej yuav sawv.” 24 Mathas hais rau Yexus tias, “Kuv paub tias nws yeej yuav ciaj sawv rov los thaum txog hnub kawg.” 25 Yexus hais rau Mathas tias, “Kuv yog tus tsa tau tib neeg sawv hauv qhov tuag rov los thiab pub txoj sia rau lawv. Tus uas ntseeg* kuv txawm nws tuag lawm los nws yuav rov muaj txoj sia, 26 thiab txhua tus uas ntseeg* kuv uas tseem muaj txoj sia yuav tsis tuag ib zaug li. Koj puas ntseeg qhov no?” 27 Mathas hais rau Yexus tias, “Tus Tswv, kuv yeej ntseeg tias koj yog tus Khetos uas yog Vajtswv tus Tub, tus uas raug txib los rau hauv lub qab ntuj no.” 28 Thaum Mathas hais li no tas, nws txawm rov loo mus hu nws tus niam hluas Maivliag thiab hais twj ywm rau Maivliag tias, “Xib Hwb tuaj txog nov lawm. Nws nug txog koj.” 29 Thaum Maivliag hnov dheev li no, nws sawv tsees mus tos Yexus.

30 Yexus tuaj tsis tau txog hauv zos, tiam sis nws tseem nyob tom qhov chaw uas Mathas mus tos nws. 31 Thaum cov Yudais uas tuaj nplig Maivliag hauv tsev pom nws sawv nrawm nroos mus, lawv txawm raws nws qab. Lawv xav tias ntshe nws yuav mus quaj tom lub ntxa. 32 Thaum Maivliag mus pom dheev Yexus, nws khwb nkaus ntawm Yexus ko taw thiab hais tias, “Tus Tswv, yog koj nyob ntawm no, kuv tus nus twb tsis tuag.” 33 Thaum Yexus pom Maivliag thiab cov Yudais quaj quaj, nws txawm xyu ib suab mob siab kawg li. 34 Yexus hais tias, “Nej muab nws zais qhov twg lawm?” Lawv hais rau nws tias, “Tus Tswv, mus saib maj.” 35 Yexus kua muag poob nthav tam sid. 36 Thaum cov Yudais pom li ntawd, lawv hais tias, “Ua cas Yexus hlub Laxalaus ua luaj!” 37 Tiam sis lawv ib txhia hais tias, “Nws twb kho tau tus yawg dig muag pom kev es nws tseem ua tsis tau kom tus no txhob tuag lod?”

38 Yexus rov xyu ib suab thiab mus rau tom lub ntxa. Lub ntxa txaug rau ntawm ib phab tsua thiab muaj ib daim txiag zeb npog lub rooj ntxas. 39 Yexus hais tias, “Muab daim txiag zeb tshem tawm.” Mathas uas yog tus tuag tus muam hais rau Yexus tias, “Tus Tswv, twb muab nws zais tau plaub hnub, ntshe nws twb tsw tsw lawm.” 40 Yexus hais rau nws tias, “Kuv twb hais rau koj tias yog koj ntseeg, koj yuav pom Vajtswv lub hwj chim ci ntsa iab no ne?” 41 Lawv thiaj muab daim txiag zeb tshem ces Yexus tsa muag ntsia saum ntuj thiab hais tias, “Leej Txiv, ua koj tsaug tias koj mloog kuv tej lus thov. 42 Kuv paub hais tias koj ib txwm mloog kuv tej lus thov. Tiam sis kuv hais li no kom cov neeg uas sawv puag ncig ntawm no ntseeg tias koj txib kuv los.” 43 Thaum nws hais tej no tas, nws hu nrov nrov tias, “Laxalaus, cia li tawm los!” 44 Tus tuag mam tawm los. Tseem muaj ntaub qhwv nws tes nws taw thiab muaj ib daim ntaub qhwv nws lub ntsej muag. Yexus hais rau lawv tias, “Muab daws es tso nws mus.”

45 Thaum cov Yudais coob tus uas tuaj saib Maivliag pom tej uas Yexus tau ua, lawv thiaj ntseeg nws. 46 Tiam sis muaj ib txhia txawm mus qhia cov Falixais txog tej uas Yexus ua ntawd. 47 Cov pov thawj hlob thiab cov Falixais thiaj hu pab Xahenrees* tuaj ua ke thiab hais tias, “Peb yuav ua li cas? Tus yawg no ua ntau yam txuj ci. 48 Yog peb pheej cia nws ua li no, lawv sawv daws yuav ntseeg nws ces cov Loos yuav tuaj rhuav lub tuam tsev thiab peb haiv neeg.” 49 Tiam sis lawv pab ntawd ib tug yog Khayafas. Xyoo ntawd nws yog tus tuam pov thawj hlob. Nws hais rau lawv tias, “Nej tsis paub dab tsi li. 50 Sim xav seb, cia ib tug tuag theej sawv daws kuj zoo dua ib haiv neeg raug puas tsuaj tib si.” 51 Qhov uas nws hais li no tsis yog nws hais raws li nws lub tswv yim. Tiam sis xyoo ntawd, nws yog tus tuam pov thawj hlob, Vajtswv thiaj tshoov kom nws cev lus tias Yexus yuav tuag theej cov Yudais. 52 Thiab tsis yog tuag theej cov Yudais xwb tiam sis nws tuag li ntawd thiaj coj tau Vajtswv cov me nyuam uas tawg ua sab ua sua los ua ke. 53 Txij hnub ntawd los, lawv thiaj nrhiav kev tua Yexus.

54 Yog li ntawd, Yexus thiaj tsis mus rau ub rau no tab meeg cov Yudais lawm. Nws tawm mus rau ib lub nroog hu ua Efa-is, nyob ze roob moj sab qhua, thiab nws nrog cov thwj tim nyob qhov ntawd. 55 Thaum yuav txog caij cov Yudais ua Kev Cai Hla Dhau, muaj neeg coob coob tuaj pem yaj sab tuaj rau hauv Yeluxalees tuaj ua kev cai ntxuav ua ntej lawv yuav ua Kev Cai Hla Dhau. 56 Lawv nyob ntawm lub tuam tsev, xam puag ncig seb puas pom Yexus thiab ib leeg nug ib leeg tias, “Koj xav li cas? Ntshe nws tsis tuaj ua kev cai kaj?” 57 Tiam sis cov pov thawj hlob thiab cov Falixais twb hais lawm tias yog leej twg hnov tias Yexus nyob qhov twg mas yuav tsum qhia rau lawv paub, lawv yuav ntes Yexus.

12 Tshuav rau hnub ua ntej ua Kev Cai Hla Dhau, Yexus tuaj txog lub zos Npethanis uas Laxalaus nyob. Laxalaus yog tus uas Yexus tsa ciaj sawv rov los. 2 Lawv thiaj npaj ib pluag hmo rau Yexus noj. Mathas yog tus rau zaub rau mov rau sawv daws noj. Laxalaus kuj nrog lawv koom tsum thiab. 3 Maivliag txawm muab ib hwj* roj tsw qab uas kim heev coj los hliv rau Yexus ko taw thiab muab nws cov plaub hau los so. Cov roj ntawd tsw qab ntxiag thoob plaws hauv tsev. 4 Tiam sis Yexus tus thwj tim hu ua Yudas Ikhali-aus uas yuav ntxeev siab rau Yexus txawm hais tias, 5 “Ua cas tsis muab cov roj tsw qab no muag 300 denalias* es coj mus pub rau cov pluag?” 6 Yudas hais li no tsis yog nws txhawj txog cov pluag tiam sis nws yog ib tug tub sab. Nws yog tus tuav lub thawv rau nyiaj mas nws pheej nyiag cov nyiaj hauv mus siv. 7 Yexus txawm hais tias, “Cia nws ua nws. Nws ua li no yog npaj rau hnub uas faus kuv. 8 Cov pluag yuav nrog nej nyob mus li, tiam sis kuv yuav tsis nrog.”

9 Thaum ntawd, muaj ib pab Yudais coob heev hnov tias Yexus nyob qhov ntawd. Tsis yog lawv xav tuaj pom Yexus xwb, tiam sis lawv xav pom Laxalaus, tus uas Yexus tau tsa ciaj sawv rov los. 10 Zaum no cov pov thawj hlob kuj nrhiav kev tua Laxalaus thiab. 11 Twb yog tim Laxalaus es thiaj muaj coob tus Yudais mus rau Npethanis thiab los ntseeg Yexus.

12 Hnub tom qab, cov neeg coob coob uas tuaj ua kev cai hnov tias Yexus tab tom tuaj rau hauv Yeluxalees. 13 Lawv thiaj mus txiav nplooj toov laj thiab mus tos Yexus. Lawv qw tias, “Thov Vajtswv tsom kwm koj! Cov Ixayees tus Vaj Ntxwv, tus uas sawv cev rau Vajtswv Yehauvas* lub npe tau koob hmoov nplua mias!” 14 Thaum Yexus mus pom ib tug me nyuam nees luav, nws txawm muab caij mus. Tej no muaj raws nkaus li sau tseg tias, 15 “Cov uas nyob hauv Xi-oos’e* tsis txhob ntshai. Saib maj! Koj tus vaj ntxwv tab tom caij rawv ib tug me nyuam nees luav los.” 16 Thaum ntej Yexus cov thwj tim tsis nkag siab tej no, tiam sis thaum Yexus tau koob meej lawd, lawv mam nco tias tej no twb muab sau ua ntej txog nws lawm, thiab luag yeej ua li ntawd rau nws tiag.

17 Pab neeg coob coob uas pom Yexus tsa Laxalaus ciaj sawv hauv lub qhov ntxa rov los, pheej ua tim khawv txog tej uas lawv tau pom. 18 Twb yog vim li ntawd, cov neeg uas tuaj ua kev cai thiaj mus tos Yexus, rau qhov lawv hnov tias nws tau ua qhov txuj ci no. 19 Cov Falixais thiaj sib tham tias, “Nej sim ntsia saib! Tej uas peb ua tsis muaj qab hau li lawm lauj. Tag nrho lub niag qab ntuj no caum nws lawm ne.”

20 Muaj ib co neeg Kilis kuj tuaj nrog lawv pe hawm Vajtswv thiab ua kev cai. 21 Cov ntawd mus cuag Filis uas nyob lub nroog Npexedas, xeev Kalilais tuaj. Lawv txawm thov nws tias, “Yawg hlob, peb xav pom Yexus.” 22 Filis thiaj mus qhia Anrus ces nkawd txawm mus qhia Yexus.

23 Tiam sis Yexus teb nkawd tias, “Lub sij hawm los txog lawm, neeg Leej Tub yuav tau koob meej. 24 Kuv hais ncaj qha rau nej tias, yog lub noob mog* tsis poob rau hauv av es lwj* ces lub noob tsuas nyob tib lub xwb. Tiam sis yog lub noob lwj* ces yuav nthaw kaus thiab rau hnab ncw tuaj. 25 Tus uas khuv xim nws txoj sia,* nws txoj sia* yuav tu. Tiam sis hauv lub ntiaj teb no, yog leej twg tsis khuv xim nws txoj sia,* nws yuav tuav tau nws txoj sia nyob mus ib txhis. 26 Yog ib tug twg yeem ua kuv tus tub txib, cia nws los raws kuv qab. Kuv nyob qhov twg, kuv tus tub txib yuav nyob qhov ntawd. Yog ib tug twg yeem ua kuv tus tub txib, kuv Txiv yuav qhuas tus ntawd. 27 Tam sim no kuv* ntxhov siab heev es kuv yuav hais li cas? Kuv Txiv, thov koj cawm kuv lub sij hawm no. Txawm li cas los xij, qhov kuv los no twb yog kuv yuav tsum raug tej no. 28 Kuv Txiv, thov kom koj lub npe tau koob meej.” Ces txawm muaj ib lub suab hais saum ntuj tias, “Kuv twb tau koob meej lawm thiab kuv tseem yuav ua kom tau koob meej ntxiv.”

29 Cov neeg coob coob uas sawv ntawd kuj hnov thiab. Lawv hais tias yog xob nroo. Lwm cov ho hais tias, “Yog ib tug tub txib saum ntuj hais lus rau nws.” 30 Yexus teb tias, “Lub suab no yog hais los pab nej, tsis yog pab kuv. 31 Vajtswv tab tom txiav txim rau lub qab ntuj no thiab nws yuav muab tus uas kav lub qab ntuj no ntiab tawm mus. 32 Tiam sis yog kuv raug dai, kuv yuav coj tau txhua hom neeg los rau kuv.” 33 Nws hais li no twb yog nws hais tias tshuav tsis ntev xwb nws yuav tuag li cas. 34 Cov neeg coob coob txawm teb nws tias, “Txoj Kev Cai hais tias tus Khetos yuav nyob mus ib txhis no ne. Ua cas koj ho hais tias nws yuav tsum raug muab dai? Neeg Leej Tub ho yog leej twg?” 35 Yexus thiaj hais rau lawv tias, “Qhov kaj tseem yuav nrog nej nyob ib nyuag ntu. Yeej meem taug txoj kev kaj thaum tseem pom kev xwv qhov tsaus thiaj laum tsis tau nej. Tus uas maub dub tsis paub tias nws yuav mus qhov twg. 36 Thaum qhov kaj tseem nrog nej nyob, cia li ntseeg* qhov kaj xwv nej thiaj yog qhov kaj tej tub ki.”

Thaum Yexus hais tej no tas, nws txawm mus nkaum lawm. 37 Txawm nws ua ntau yam txuj ci rau lawv pom los lawv tsis ntseeg nws. 38 Tau muaj li ntawd kom tiav raws li tus cev lus Yaxayas tau hais tseg tias, “Vajtswv Yehauvas,* puas muaj leej twg ntseeg tej uas peb hais? Thiab Vajtswv Yehauvas* ua nws lub hwj chim* rau leej twg pom?” 39 Tos lawv tsis ntseeg los, Yaxayas kuj hais hauv lwm nqe tias, 40 “Nws ua rau lawv dig muag thiab lawv lub siab tawv, xwv lawv thiaj tsis pom thiab tsis nkag siab, thiab tsis tig rov los kom kuv tau kho lawv.” 41 Yaxayas hais tej no rau qhov nws twb pom Khetos lub hwj chim ci ntsa iab lawm. 42 Txawm li ntawd los, coob tus thawj coj yeej ntseeg Yexus, tiam sis lawv tsis kam lees paub nws vim lawv ntshai tsam cov Falixais muab lawv ntiab tawm hauv lub tsev pe hawm mus. 43 Rau qhov lawv nyiam tib neeg qhuas lawv dua li Vajtswv qhuas.

44 Tiam sis Yexus hais nrov nrov tias, “Tus uas ntseeg kuv tsis yog ntseeg kuv xwb, tiam sis ntseeg tus uas txib kuv los, 45 thiab tus uas pom kuv kuj pom tus uas txib kuv los. 46 Kuv los ua qhov kaj ci rau lub qab ntuj kom txhua tus uas ntseeg kuv thiaj tsis nyob hauv qhov tsaus ntuj mus li. 47 Tiam sis yog leej twg hnov kuv tej lus es tsis khaws, los kuv yuav tsis txiav txim rau nws. Rau qhov kuv tsis yog los txiav txim rau lub qab ntuj tiam sis yog los cawm lub qab ntuj neeg. 48 Tus uas tsis quav ntsej kuv thiab tsis khaws kuv tej lus, muaj ib tug yuav txiav txim rau nws. Thaum txog hnub kawg, tej lus uas kuv qhia yuav txiav txim rau tus ntawd. 49 Rau qhov tsis yog kuv hais raws li kuv lub tswv yim, tiam sis Leej Txiv tus uas txib kuv los sam hwm kom kuv hais thiab kuv qhia xwb. 50 Thiab kuv paub tias tus uas coj raws li Nws tej lus sam hwm yuav tau txoj sia ntev dhawv mus ib txhis. Yog li ntawd, txhua yam uas kuv hais, kuv tsuas hais raws li Leej Txiv qhia rau kuv xwb.”

13 Ua ntej tsis tau ua Kev Cai Hla Dhau, Yexus paub lawm tias twb txog lub sij hawm uas nws yuav ncaim lub qab ntuj no mus cuag Leej Txiv. Yexus hlub nws cov thwj tim uas tseem nyob hauv lub qab ntuj no heev thiab nws hlub lawv mus txog thaum kawg. 2 Thaum lawv tab tom noj hmo, Ntxwg Nyoog twb tshoov Ximoos tus tub Yudas Ikhali-aus* kom ntxeev siab rau Yexus lawm. 3 Yexus paub tias Leej Txiv twb muab ib puas tsav yam cob rau nws txhais tes lawm, thiab Vajtswv yog tus txib nws los thiab nws yuav rov mus cuag Vajtswv. 4 Nws thiaj sawv tsees ntawm tsum mov hle nws lub tsho* rau ib cag. Nws mam li muab ib txoj phuam los sia ntawm duav. 5 Ces nws muab dej hliv rau lub tais thiab pib ntxuav cov thwj tim ko taw, nws mam muab txoj phuam ntawm duav los so. 6 Thaum nws los txog ntawm Ximoos Petus mas Petus hais rau nws tias, “Tus Tswv, koj yuav ntxuav kuv ko taw thiab lod?” 7 Yexus teb nws tias, “Tam sim no koj tsis nkag siab tej uas kuv ua no. Tiam sis lwm hnub koj yuav nkag siab.” 8 Petus hais rau Yexus tias, “Kuv tsis pub koj ntxuav kuv ko taw ib zaug li.” Yexus teb Petus tias, “Yog kuv tsis ntxuav koj ko taw ces koj tsis muaj feem koom nrog kuv.” 9 Ximoos Petus hais rau Yexus tias, “Tus Tswv, txhob ntxuav kuv txhais ko taw xwb tiam sis thov ntxuav kuv txhais tes thiab taub hau tib si.” 10 Yexus hais rau nws tias, “Tus uas da dej lawd tsuas ntxuav ko taw xwb, rau qhov nws lub cev twb huv lawm. Nej cov no yeej huv tiam sis tshuav ib tug xwb.” 11 Yexus twb paub tus uas yuav ntxeev siab rau nws. Twb yog vim li no nws thiaj hais tias, “Nej cov no yeej huv tiam sis tshuav ib tug xwb.”

12 Thaum nws ntxuav lawv ko taw tas nws rov muab tsho* los hnav thiab rov mus nrog lawv zaum ntawm rooj mov. Nws hais rau lawv tias, “Nej puas nkag siab qhov uas kuv ntxuav nej ko taw? 13 Nej muab kuv hu ua ‘Xib Hwb’ thiab ‘Tus Tswv,’ nej yeej hu yog lawm. 14 Yog li ntawd, kuv yog nej tus Tswv thiab tus Xib Hwb, kuv twb ntxuav nej ko taw lawm ces tsim nyog nej ib leeg ntxuav ib leeg ko taw thiab. 15 Rau qhov kuv ua qauv tseg rau nej xyaum. Kuv ua li cas rau nej lawm, nej yuav tsum ua ib yam li ntawd. 16 Kuv hais ncaj qha rau nej tias ib tug tub qhe tsis muaj hwj chim npaum li nws tus los pav, thiab tus uas raug txib los, tsis muaj hwj chim npaum li tus uas txib nws. 17 Yog nej paub txog tej no, nej yuav zoo siab yog tias nej ua raws li ntawd. 18 Tsis yog kuv hais txog nej txhua leej txhua tus. Kuv yeej paub cov uas kuv xaiv tseg lawd. Tiam sis yuav tsum muaj li no, thiaj tiav raws li Vajtswv txoj lus tau hais tseg no, ‘Tus uas nrog kuv noj ib lub ncuav yuav tsa luj taws tuam kuv.’* 19 Txij no mus, kuv yuav qhia nej ua ntej txog tej uas tseem yuav tshwm sim, xwv thaum muaj lawd nej thiaj ntseeg tias kuv yog tus ntawd. 20 Kuv hais ncaj qha rau nej tias, yog leej twg tos txais tus uas kuv txib mus, kuj yog nws tos txais kuv thiab. Tsis tas li ntawd xwb, yog tus twg tos txais kuv, kuj yog nws tos txais tus uas txib kuv los thiab.”

21 Tom qab Yexus hais tej no tas, nws ntxhov siab heev. Nws thiaj hais hlo rau lawv tias, “Kuv hais ncaj qha rau nej tias, nej cov no ib tug yuav ntxeev siab rau kuv.” 22 Cov thwj tim ib leeg ntsia ib leeg, tsis paub xyov Yexus hais txog leej twg. 23 Tus thwj tim uas Yexus hlub zaum npuas nws. 24 Ximoos Petus thiaj ncaws hau rau tus ntawd thiab hais tias, “Nws hais txog leej twg?” 25 Tus thwj tim ntawd thiaj tig pheeb rau Yexus thiab nug tias, “Tus Tswv, yog leej twg?” 26 Yexus teb tias, “Kuv muab qhov ncuav ntsw cev rau tus twg ces yog tus ntawd.” Thaum Yexus ntsw qhov ncuav tas, nws muab cev rau Yudas uas yog Ximoos Ikhali-aus tus tub. 27 Tom qab Yudas txais nkaus qhov ncuav, Xatas txawm tshoov nws lub siab. Yexus thiaj hais rau nws tias, “Koj yuav ua dab tsi, cia li ua tsuag tsuag.” 28 Tiam sis cov uas zaum ntawm rooj mov tsis muaj leej twg paub vim li cas Yexus ho hais li ntawd rau nws. 29 Yudas yog tus tuav lub thawv nyiaj, ib txhia thiaj xav tias Yexus kom nws mus yuav tej yam uas lawv cheem tsum siv ua kev cai,* los yog kom nws muab me ntsis pub rau cov pluag. 30 Thaum Yudas txais nkaus qhov ncuav, nws tawm plaws mus tam sid. Thaum ntawd twb tsaus ntuj lawm.

31 Thaum Yudas tawm mus lawd, Yexus hais tias, “Nim no neeg Leej Tub tau koob meej, thiab Vajtswv kuj tau koob meej vim muaj Leej Tub. 32 Vajtswv yog tus uas yuav ua rau Leej Tub tau koob meej, thiab Vajtswv yuav ua li no sai sai. 33 Kuv cov kwv luag,* kuv yuav nrog nej nyob tsis ntev lawm xwb. Nej yuav nrhiav kuv, tiam sis kuv yuav hais rau nej li hais rau cov Yudais tias, ‘Qhov chaw uas kuv mus, nej yuav mus tsis tau.’ 34 Kuv muab ib txoj kev cai tshiab rau nej hais tias, nej yuav tsum sib hlub. Kuv hlub nej li cas lawm, nej ib leeg hlub ib leeg li ntawd. 35 Yog nej sib hlub li no ces sawv daws yuav paub tias nej yog kuv cov thwj tim.”

36 Ximoos Petus nug Yexus tias, “Tus Tswv, koj yuav mus qhov twg?” Yexus teb tias, “Qhov chaw uas kuv yuav mus, koj caum tsis tau kuv, tiam sis lwm hnub koj yuav lawv kuv qab los.” 37 Petus txawm hais tias, “Tus Tswv, vim li cas kuv ho nrog tsis tau koj mus tam sim no? Kuv yeem muab kuv txoj sia* this koj.” 38 Yexus teb tias, “Koj yuav muab koj txoj sia* this kuv lod? Kuv hais ncaj qha rau koj tias, ua ntej qaib qua, koj yuav tsis lees paub kuv peb zaug.”

14 “Tsis txhob ntxhov siab. Cia li tso siab plhuav rau* Vajtswv thiab tso siab plhuav rau* kuv. 2 Hauv kuv Leej Txiv lub tsev muaj chaw nyob ntau heev. Yog tsis muaj ces kuv yeej tsis hais li ntawd rau nej. Tiam sis yeej muaj tiag, kuv thiaj yuav mus tu chaw tos nej. 3 Tsis tas li ntawd xwb, thaum kuv mus tu tau chaw tos nej lawd, kuv yuav rov qab los tos nej mus nrog kuv nyob. Ces kuv nyob qhov twg, nej yuav nyob qhov ntawd. 4 Qhov chaw uas kuv yuav mus, nej twb paub kev lawm.”

5 Thaumas hais rau nws tias, “Tus Tswv, peb twb tsis paub koj yuav mus qhov twg, peb yuav ua li cas paub kev?”

6 Yexus teb nws tias, “Kuv yog txoj kev, yog qhov tseeb, thiab yog txoj sia. Tsis muaj leej twg mus cuag tau Leej Txiv, tsuas yog mus ntawm kuv mus xwb. 7 Yog nej paub kuv tiag, nej kuj yuav paub kuv Leej Txiv thiab. Txij no mus nej twb paub nws thiab pom nws lawm.”

8 Filis hais rau nws tias, “Tus Tswv, thov qhia Leej Txiv rau peb pom xwv thiaj txaus nkaus peb lub siab.”

9 Yexus teb nws tias, “Filis, kuv twb nrog nej nyob ntev npaum li no, koj tseem tsis tau paub kuv thiab lod? Tus uas pom kuv twb pom Leej Txiv lawm thiab. Ua cas koj tseem hais tias, ‘Qhia Leej Txiv rau peb?’ 10 Koj tsis ntseeg tias kuv nrog Leej Txiv koom ib lub siab thiab Leej Txiv nrog kuv koom ib lub siab no lod? Tej uas kuv hais rau nej tsis yog kuv lub tswv yim, tiam sis yog Leej Txiv uas nrog kuv koom ib lub siab kom kuv ua nws tes hauj lwm xwb. 11 Cia li ntseeg tias kuv nrog Leej Txiv koom ib lub siab, thiab Leej Txiv nrog kuv koom ib lub siab. Txawm nej tsis ntseeg los, tsim nyog ntseeg tes hauj lwm uas kuv ua. 12 Kuv hais ncaj qha rau nej tias tus uas tso siab plhuav rau* kuv kuj yuav ua tau tes hauj lwm uas kuv ua. Nws tseem yuav ua tau ntau tshaj kuv ua thiab, rau qhov kuv yuav mus cuag Leej Txiv. 13 Tsis tas li ntawd xwb, yog nej tuav kuv lub npe thov ib yam twg, kuv yuav ua yam ntawd rau nej, kom Leej Tub thiaj ua rau Leej Txiv tau koob meej. 14 Yog nej tuav kuv lub npe thov ib yam twg, kuv yuav ua yam ntawd rau nej.

15 “Yog nej hlub kuv, nej yuav mloog kuv tej lus sam hwm. 16 Kuv yuav thov Leej Txiv kom nws pub dua ib tug los pab* nej thiab yuav nrog nej nyob mus ib txhis. 17 Lub hwj huam ntawd qhia qhov tseeb tiam sis lub qab ntuj neeg txais tsis tau, vim lawv tsis pom thiab tsis paub lub hwj huam ntawd. Nej ho paub rau qhov lub hwj huam nrog nraim nej thiab nyob hauv nej. 18 Kuv yuav tsis tseg nej nyob ua ntsoj ua ntsuag, kuv yuav rov los nrog nej. 19 Tshuav tsis ntev xwb, lub qab ntuj yuav tsis pom kuv ntxiv lawm, tiam sis nej yuav pom kuv rau qhov kuv muaj sia nyob, yog li ntawd nej yuav muaj sia nyob thiab. 20 Hnub ntawd nej yuav paub tias kuv nrog Leej Txiv koom ib lub siab, thiab nej nrog kuv koom ib lub siab. Kuv kuj nrog nej koom ib lub siab. 21 Tus uas lees yuav kuv tej lus sam hwm thiab coj raws li ntawd yog tus uas hlub kuv. Tus uas hlub kuv ces kuv Leej Txiv yuav hlub nws. Kuv yuav hlub nws thiab yuav qhia kom nws paub kuv zoo.”

22 Yudas uas tsis yog Yudas Ikhali-aus txawm nug tias, “Tus Tswv, ua li cas koj ho qhia kom peb paub koj zoo es ho tsis qhia rau lub qab ntuj neeg?”

23 Yexus teb tias, “Yog leej twg hlub kuv, nws yuav ua raws li kuv tej lus ces kuv Leej Txiv yuav hlub nws. Thiab wb yuav los cuag nws thiab nrog nws nyob. 24 Tus uas tsis hlub kuv tsis mloog kuv tej lus. Tej lus uas nej hnov no, tsis yog kuv lub tswv yim tiam sis yog Leej Txiv lub. Nws txib kuv los qhia xwb.

25 “Thaum kuv tseem nrog nej nyob, kuv qhia tej no rau nej. 26 Tiam sis tus pab* yog lub hwj huam dawb huv uas kuv thov kom Leej Txiv txib los,* tus ntawd yuav pab nej thiab qhia txhua yam rau nej, kom nej nco tau ib puas tsav yam uas kuv twb qhia rau nej lawd. 27 Kuv yuav pub kom nej muaj lub siab tus* mus li, ib yam li nej nrog kuv muaj tam sim no. Lub siab tus* no txawv lub siab tus* uas lub qab ntuj neeg pub. Tsis txhob ntxhov siab thiab tsis txhob poob siab. 28 Nej twb hnov kuv hais lawm tias, ‘Kuv yuav ncaim nej mus tiam sis kuv yuav rov qab los.’ Yog nej hlub kuv tiag, nej yuav zoo siab qhov uas kuv mus cuag Leej Txiv, rau qhov Leej Txiv muaj hwj chim loj dua kuv. 29 Kuv qhia tej no rau nej ua ntej tsis tau muaj tshwm sim, xwv thaum muaj tiav lawd nej thiaj ntseeg. 30 Kuv yuav tsis tau nrog nej tham ntev lawm, rau qhov tus uas kav lub qab ntuj no tab tom los, tiam sis nws tsis muaj hwj chim kav kuv. 31 Yuav kom lub qab ntuj no paub tias kuv hlub Leej Txiv, kuv yuav ua txhua yam raws nraim li Leej Txiv tau sam hwm tseg rau kuv. Cia li sawv, peb mus.

15 “Kuv yog tsob tseem txiv hmab thiab kuv Leej Txiv yog tus uas tu. 2 Txhua ceg hmab ncau ntawm kuv uas tsis txi txiv, nws yuav muab txiav pov tseg. Thiab txhua ceg hmab uas txi txiv, nws yuav muab tav* kom yim huab txi ncw tuaj. 3 Tej lus uas kuv qhia rau nej, twb muab nej tu du lug lawm. 4 Nej cia li nrog kuv koom ib lub siab mus li ces kuv yuav nrog nej koom ib lub siab mus li thiab. Yog tus ceg tsis ncau ntawm tsob txiv hmab mus ces yeej txi tsis taus txiv. Ib yam li ntawd, yog nej tsis nrog kuv koom ib lub siab mus li, nej yeej txi tsis taus txiv thiab. 5 Kuv yog tsob txiv hmab, nej yog tej ceg hmab. Tus uas nrog kuv koom ib lub siab mus li thiab kuv nrog nws koom ib lub siab, tus ntawd yuav txi txiv ncw. Yog nej tsis nrog kuv ces nej yeej ua tsis tau ib yam dab tsi li. 6 Yog leej twg tsis nrog kuv koom ib lub siab mus li ces nws yuav zoo li tej ceg hmab uas raug txiav pov tseg thiab qhuav tas. Luag mam muab sua coj mus hlawv. 7 Yog leej twg nrog kuv koom ib lub siab mus li thiab khaws kuv tej lus twj ywm rau nruab siab, nws thov yam twg los nws yeej yuav tau yam ntawd. 8 Kuv Leej Txiv yuav tau koob meej yog nej txi txiv ncw thiab ua pov thawj tias nej yog kuv cov thwj tim tiag. 9 Leej Txiv hlub kuv li cas, kuv hlub nej ib yam li ntawd. Nej cia li tuav rawv kuv txoj kev hlub mus li. 10 Yog nej mloog kuv tej kev cai ces nej yuav yog cov uas kuv hlub mus li, ib yam li kuv mloog kuv Leej Txiv tej kev cai es kuv yog tus uas nws hlub mus li.

11 “Kuv hais tej no rau nej kom nej thiaj muaj kev zoo siab puv npo ib yam li kuv thiab. 12 Kuv sam hwm rau nej tias, nej ib leeg yuav tsum hlub ib leeg, ib yam li kuv hlub nej. 13 Tsis muaj ib tug muaj kev hlub loj tshaj tus uas muab nws txoj sia* this nws cov phooj ywg kwv luag. 14 Yog nej mloog tej uas kuv tau sam hwm rau nej ces nej thiaj yog kuv cov phooj ywg kwv luag. 15 Kuv tsis muab nej hu ua tub qhe lawm. Tus tub qhe yeej tsis paub tej uas nws tus tswv yuav ua. Tiam sis kuv muab nej hu ua kuv cov phooj ywg kwv luag, rau qhov txhua yam uas kuv Leej Txiv qhia rau kuv, los kuv twb qhia rau nej lawm. 16 Tsis yog nej xaiv kuv tiam sis yog kuv xaiv nej. Kuv yog tus xaiv nej los mus txi txiv ncw, kom nej tes hauj lwm zoo* yuav nyob ruaj khov mus li. Twb yog vim li ntawd, thaum nej tuav kuv lub npe thov Leej Txiv txog yam twg los nws yuav pub rau nej.

17 “Kuv sam hwm tej no rau nej kom nej ib leeg txawj hlub ib leeg. 18 Yog lub qab ntuj neeg ntxub nej, nco ntsoov tias lawv twb xub ntxub kuv lawm. 19 Yog nej koom nrog lub qab ntuj neeg ces lawv yeej yuav nyiam nej. Tiam sis nej tsis koom nrog lub qab ntuj neeg, thiab kuv twb xaiv nej tawm hauv lub qab ntuj no lawm. Twb yog vim li ntawd lawv thiaj ntxub nej. 20 Nco ntsoov tej lus uas kuv hais rau nej no, tus tub qhe yeej tsis loj dua nws tus tswv. Yog lawv twb tsim txom kuv lawm ces lawv kuj yuav tsim txom nej thiab. Yog lawv mloog kuv lus lawm ces lawv kuj yuav mloog nej lus thiab. 21 Tiam sis lawv yuav ua txhua yam no los tawm tsam nej rau qhov nej yog kuv cov thwj tim, vim lawv tsis paub tus uas txib kuv los. 22 Yog kuv tsis tau los qhia lawv ces lawv tsis muaj txim. Tiam sis nim no kuv twb qhia lawv lawm. Yog li, lawv hais tsis tau li cas los daws lawv lub txim. 23 Yog leej twg ntxub kuv, kuj yog nws ntxub kuv Leej Txiv thiab. 24 Yog lawv tsis tau pom kuv ua tej txuj ci uas tsis tau muaj leej twg ua dua ces lawv tsis muaj lub txim txhaum. Tiam sis nim no lawv twb pom kuv los lawv tseem ntxub kuv thiab kuv Leej Txiv. 25 Yuav tsum muaj li no kom tiav raws li lawv txoj Kev Cai* sau tias, ‘Lawv lam ntxub kuv dawb dawb xwb.’ 26 Kuv yuav thov Leej Txiv tso tus pab* los rau nej, yog lub hwj huam uas qhia qhov tseeb. Lub hwj huam yog Leej Txiv pub, thiab yuav ua tim khawv txog kuv. 27 Thaum ntawd nej yuav ua tim khawv txog kuv, rau qhov nej ib txwm nrog nraim kuv.

16 “Kuv hais tej no rau nej xwv nej thiaj tsis tso kuv tseg. 2 Neeg yuav muab nej ntiab tawm hauv tej tsev pe hawm mus. Lub sij hawm tab tom los thaum txhua tus uas nrhiav kev tua nej yuav xav tias twb yog lawv ua Vajtswv tes hauj lwm ntag. 3 Tiam sis lawv ua tej no rau qhov lawv tsis tau paub kuv thiab tsis paub Leej Txiv. 4 Txawm li cas los, kuv qhia tej no rau nej xwv thaum txog sij hawm tej no muaj tshwm sim, nej thiaj nco ntsoov tej lus uas kuv qhia rau nej lawd.

“Kuv tsis ntxov qhia tej no rau nej rau qhov kuv tseem nrog nej nyob. 5 Nim no kuv yuav mus cuag tus uas txib kuv los, tiam sis nej tsis muaj ib tug nug kuv tias, ‘Koj yuav mus qhov twg?’ 6 Kuv hais tej no, ua rau nej nyuaj siab kawg li. 7 Txawm li ntawd los, kuv qhia tseeb rau nej tias kuv yuav tsum ncaim nej mus thiaj pab tau nej. Yog kuv tsis mus ces tus pab* yuav tsis los. Tiam sis yog kuv mus, kuv yuav tso tus pab* los rau nej. 8 Thaum tus ntawd los, tus ntawd yuav qhia meej rau qab ntuj neeg txog kev txhaum, kev ncaj ncees, thiab Vajtswv txoj kev txiav txim. 9 Tus ntawd yuav qhia txog kev txhaum vim neeg ntiaj teb tsis ntseeg kuv, 10 thiab yuav qhia txog tej uas kuv ua ncaj ua ncees, rau qhov kuv yuav mus cuag Leej Txiv mas nej yuav tsis pom kuv lawm. 11 Tus ntawd kuj yuav qhia txog Vajtswv txoj kev txiav txim, rau qhov Vajtswv twb txiav txim rau tus uas kav lub qab ntuj no lawm.

12 “Tseem muaj ntau yam uas kuv xav qhia rau nej, tiam sis tam sim no nej yuav tsis nkag siab. 13 Thaum tus pab* uas yog lub hwj huam qhia qhov tseeb los txog ces nws yuav coj nej kev kom nej nkag siab qhov tseeb txhua nrho. Tus ntawd tsis qhia ywj siab tiam sis tsuas qhia raws li Vajtswv hais xwb, thiab yuav qhia nej txog tej uas tseem yuav los tom hauv ntej. 14 Tus ntawd yuav ua rau kuv tau ntsej muag, rau qhov nws yuav muab tej uas kuv qhia rau nws los qhia rau nej. 15 Txhua yam uas Leej Txiv paub, nws twb qhia rau kuv lawm. Twb yog li ntawd, kuv thiaj hais rau nej tias lub hwj huam yuav muab tej uas kuv qhia rau nws los qhia rau nej. 16 Tshuav tsis ntev xwb nej yuav tsis pom kuv lawm, tiam sis tshuav tsis ntev xwb nej yuav rov pom kuv.”

17 Thaum nws hais li ntawd, cov thwj tim ib txhia txawm sib tham tias, “Ua cas nws ho hais tias, ‘Tshuav tsis ntev xwb nej yuav tsis pom kuv lawm, tiam sis tshuav tsis ntev xwb nej yuav rov pom kuv,’ thiab ua cas nws ho hais tias, ‘rau qhov kuv yuav mus cuag Leej Txiv’?” 18 Lawv kuj tham tias, “Ua cas nws ho hais tias, ‘tshuav tsis ntev xwb’? Peb tsis nkag siab txog tej uas nws hais li.” 19 Yexus paub tias lawv xav xav nug txog tej no, nws thiaj hais rau lawv tias, “Puas yog nej sib nug txog qhov uas kuv hais tias, ‘Tshuav tsis ntev xwb nej yuav tsis pom kuv lawm, tiam sis tshuav tsis ntev xwb nej yuav rov pom kuv’? 20 Kuv hais ncaj qha rau nej tias, nej yuav tsa suab hlo quaj tiam sis neeg ntiaj teb yuav xyiv fab. Nej yuav nyuaj siab tiam sis nej txoj kev nyuaj siab yuav ntxeev ua kev xyiv fab. 21 Thaum txog caij ib leej niam yuav yug me nyuam mas nws txhawj kawg li. Tiam sis thaum yug tau, nws tsis nco mob plab lawm, tsuas muaj zoo siab xwb, rau qhov nws yug tau ib tug me nyuam los rau hauv lub ntiaj teb no lawm. 22 Nej zoo ib yam li ntawd. Tam sim no nej txhawj kawg li, tiam sis kuv yuav rov pom nej dua mas thaum ntawd nej yuav xyiv fab. Tsis muaj leej twg yuav txeeb tau nej txoj kev xyiv fab mus. 23 Hnub ntawd nej yuav tsis nug kuv txog ib yam dab tsi li lawm. Kuv hais ncaj qha rau nej tias, yog nej tuav kuv lub npe thov yam twg, Leej Txiv yuav pub yam ntawd rau nej. 24 Txog tav no nej twb tsis tau tuav kuv lub npe thov ib yam dab tsi li. Cia li thov mas nej yuav tau txais, nej thiaj muaj kev xyiv fab txaus nkaus.

25 “Kuv muab tej no ua lus piv txwv qhia nej. Lwm hnub kuv yuav tsis ua lus piv txwv qhia lawm. Thaum ntawd kuv yuav qhia phua hlo rau nej txog Leej Txiv. 26 Hnub ntawd nej yuav tuav kuv lub npe thov Leej Txiv. Tiam sis tsis yog kuv yuav ua tus thov Leej Txiv rau nej. 27 Twb yog Leej Txiv hlub nej, rau qhov nej hlub kuv thiab ntseeg tias kuv los sawv cev rau Vajtswv. 28 Kuv los hauv lub ntiaj teb no yog los sawv cev rau Leej Txiv. Nim no kuv yuav ncaim lub ntiaj teb mus cuag Leej Txiv.”

29 Nws cov thwj tim thiaj hais tias, “Zaum no koj tsis ua lus piv txwv qhia lawm, koj qhia phua hlo rau peb lawm xwb. 30 Nim no peb paub tias koj paub ib puas tsav yam, tsis tas leej twg yuav nug koj txog ib yam dab tsi, rau qhov koj paub tej uas peb xav hauv nruab siab tib si. Tej no ua rau peb ntseeg tias Vajtswv txib koj los tiag.” 31 Yexus teb lawv tias, “Nim no nej ntseeg lawm lod? 32 Twb yuav txog lub sij hawm uas nej txhua tus tso kuv tseg, yuav txog sai sai no. Nej yuav khiav ua sab ua sua mus nkaum hauv nyias vaj nyias tsev, tso kuv ib leeg tseg. Txawm li ntawd los, tsis yog kuv ib leeg xwb, Leej Txiv yeej nrog nraim kuv. 33 Kuv hais tej no rau nej kom nej thiaj kaj siab, vim muaj kuv. Hauv lub qab ntuj no nej yuav raug kev txom nyem nyuaj siab, tiam sis ua siab loj! Kuv twb kov yeej lub qab ntuj lawm.”

17 Thaum Yexus hais tej no tas, nws txawm tsa muag ntsia saum ntuj thov tias, “Leej Txiv, twb txog lub sij hawm lawm. Thov ua rau koj leej tub tau koob meej, koj leej tub thiaj ua rau koj tau koob meej, 2 ib yam li koj tau pub hwj chim rau nws kav txhua leej txhua tus* kom nws thiaj pub tau txoj sia ib txhis tsis kawg rau txhua tus uas koj muab pub rau nws. 3 Yuav kom tau txoj sia ntev dhawv mus ib txhis, lawv yuav tsum kawm lawv thiaj los paub koj uas yog tib tug tseem Vajtswv thiab paub Yexus Khetos tus uas koj txib los. 4 Kuv twb ua tes hauj lwm uas koj muab cob rau kuv tiav lawm, koj thiaj tau koob meej hauv ntiaj teb no. 5 Leej Txiv, ua ntej muaj qab ntuj neeg, kuv tau koob meej nyob ntawm koj ib sab. Nim no thov koj pub kuv rov tau lub koob meej ntawd.

6 “Kuv twb qhia koj lub npe rau cov neeg uas koj muab pub rau kuv hauv lub qab ntuj neeg no lawm. Lawv yog koj tug tiam sis koj muab pub rau kuv, thiab lawv tuav rawv* koj txoj lus. 7 Nim no lawv paub lawm tias txhua yam uas koj pub rau kuv yeej yog koj li tiag, 8 rau qhov txhua yam uas koj qhia kuv lawd, kuv twb qhia rau lawv lawm. Lawv yeej khaws tej lus uas kuv hais thiab paub tseeb tias kuv sawv cev rau koj. Thiab lawv ntseeg tias koj txib kuv los tiag. 9 Kuv thov koj pab lawv, tsis yog thov rau lub qab ntuj neeg, tiam sis kuv thov rau cov uas koj muab pub rau kuv rau qhov lawv yog koj tug. 10 Txhua yam uas kuv muaj yog koj li thiab txhua yam uas koj muaj yog kuv li. Tej ntawd ua rau kuv tau koob meej lawm.

11 “Kuv tab tom yuav los cuag koj, kuv yuav ncaim lub qab ntuj no, tiam sis lawv tseem nyob hauv lub qab ntuj. Leej Txiv tus uas dawb huv, thov tsom kwm lawv vim koj lub npe uas koj muab rau kuv,* xwv lawv thiaj koom ua ib lub siab, ib yam li wb koom ua ib lub siab. 12 Thaum kuv nrog lawv nyob kuv yeej tsom kwm lawv vim koj lub npe uas koj muab rau kuv.* Kuv tiv thaiv lawv, tsis muaj ib tug raug puas tsuaj li. Tsuas yog tus uas yuav raug puas tsuaj thiaj raug xwb, kom muaj tiav raws li koj txoj lus tau hais tseg. 13 Nim no kuv yuav los cuag koj. Thaum kuv tseem nyob hauv lub qab ntuj no, kuv hais tej no kom lawv thiaj nrog kuv zoo siab txaus nkaus. 14 Kuv twb muab koj txoj lus qhia rau lawv, tiam sis lub qab ntuj neeg ntxub lawv vim lawv tsis koom nrog lub qab ntuj neeg, ib yam li kuv tsis koom nrog lub qab ntuj neeg.

15 “Tsis yog kuv thov koj coj lawv tawm hauv lub qab ntuj neeg mus, tiam sis kuv thov koj tiv thaiv lawv ntawm Xatas.* 16 Lawv tsis koom nrog lub qab ntuj neeg, ib yam li kuv tsis koom nrog lub qab ntuj neeg. 17 Thov kom qhov tseeb cais lawv ua neeg dawb huv,* rau qhov koj txoj lus yeej yog qhov tseeb. 18 Ib yam li koj txib kuv los rau hauv lub qab ntuj neeg, kuv kuj txib lawv mus rau hauv lub qab ntuj neeg thiab. 19 Kuv cais kuv tus kheej kom dawb huv xwv thiaj pab tau lawv, qhov tseeb thiaj cais tau lawv ua neeg dawb huv thiab.

20 “Tsis yog kuv thov rau cov no xwb, tiam sis kuv kuj thov rau cov uas lawv qhia tau los ntseeg kuv thiab. 21 Kuv thov li no kom lawv sawv daws thiaj muaj ib lub siab koom nrog wb, ib yam li koj uas yog kuv Leej Txiv koom nrog kuv, thiab kuv koom nrog koj. Thov cia muaj li no kom lub qab ntuj neeg thiaj ntseeg tias koj txib kuv los tiag. 22 Koj pub koob meej rau kuv li cas ces kuv twb pub koob meej rau lawv ib yam li ntawd lawm, xwv lawv thiaj koom ua ib lub siab, ib yam li wb koom ua ib lub siab. 23 Kuv nrog lawv koom ua ib lub siab, thiab koj nrog kuv koom ua ib lub siab, xwv peb thiaj koom tib lub siab tiag tiag kom lub qab ntuj neeg thiaj paub tias koj txib kuv los thiab koj yeej hlub lawv ib yam li koj hlub kuv. 24 Leej Txiv, kuv nyob qhov twg kuv thov kom cov uas koj muab pub rau kuv nyob qhov ntawd thiab, kom lawv thiaj pom lub koob meej uas koj muab pub rau kuv, rau qhov koj yeej hlub kuv ua ntej ntuj tsim teb raug* lawm. 25 Leej Txiv tus uas ncaj ncees, lub qab ntuj neeg yeej tsis paub koj, tiam sis kuv paub koj. Thiab cov no yeej paub tseeb lawm tias koj txib kuv los tiag. 26 Kuv twb qhia koj lub npe rau lawv paub lawm thiab tseem yuav qhia ntxiv, kom lawv thiaj paub hlub lwm tus ib yam li koj hlub kuv lawd. Kuv thiaj nrog tau lawv koom ua ib lub siab.”

18 Thaum Yexus hais tej no tas nws txawm coj nws cov thwj tim hla lub Hav Khinroos mus rau hauv ib lub vaj uas nyob sab tid. 2 Yexus kheev coj nws cov thwj tim mus rau hauv lub vaj ntawd, Yudas tus uas ntxeev siab rau Yexus thiaj paub qhov chaw ntawd. 3 Yudas txawm coj ib pab tub rog thiab cov pov thawj hlob thiab cov Falixais lawv tej tub ceev xwm tuaj rau ntawd. Lawv taws teeb taws tsau nqa ntaj nqa qws tuaj. 4 Yexus twb paub txhua yam uas yuav raug nws lawm. Nws thiaj txav zog mus hais lawv tias, “Nej tuaj nrhiav leej twg?” 5 Lawv teb tias, “Peb tuaj nrhiav Yexus tus neeg Naxales.” Yexus hais tias, “Yog kuv ntag.” Yudas tus uas ntxeev siab rau Yexus kuj nrog lawv sawv ntawd thiab.

6 Thaum Yexus teb tias, “Yog kuv ntag,” lawv txawm thaub pes ncho ntog hauv pem teb. 7 Yexus thiaj rov nug tias, “Nej tuaj nrhiav leej twg?” Lawv teb tias, “Tuaj nrhiav Yexus tus neeg Naxales.” 8 Yexus teb lawv tias, “Kuv twb hais rau nej tias yog kuv no ne. Yog nej nrhiav kuv xwb, cia li tso cov neeg no mus.” 9 Tau muaj li no kom tiav raws li nws tau hais tseg tias, “Cov neeg uas koj muab pub rau kuv, tsis muaj ib tug ploj li.”

10 Ximoos Petus nqa ib rab ntaj. Nws txawm rho hlo ntaj tib ntag tus tuam pov thawj hlob tus tub qhe sab nplooj ntseg xis tu nrho. Tus tub qhe ntawd hu ua Makhas. 11 Yexus txawm hais rau Petus tias, “Cia li muab koj rab ntaj ntxig rau hauv hnab. Yeej tsim nyog kuv haus lub khob uas Leej Txiv muab rau kuv.”

12 Cov tub rog, tus thawj tub rog,* thiab cov Yudais tej tub ceev xwm txawm ntes kiag Yexus thiab muab nws khi. 13 Lawv xub coj Yexus mus rau tom Anas tsev. Anas yog Khayafas yawm txiv. Xyoo ntawd Khayafas tau ua tus tuam pov thawj hlob. 14 Khayafas twb yog tus uas hais rau cov Yudais tias zoo dua ib tug tuag this cov tib neeg.

15 Ximoos Petus thiab muaj dua ib tug thwj tim raws Yexus qab mus. Tus tuam pov thawj hlob paub tus thwj tim uas nrog Petus ntawd, nws thiaj raws tau Yexus qab mus rau hauv tus tuam pov thawj hlob lub loog. 16 Tiam sis Petus sawv sab nraum rooj loog. Tus thwj tim uas paub tus tuam pov thawj hlob thiaj mus hais tus uas zov rooj loog kom cia Petus los. 17 Tus ntxhais qhev uas zov rooj loog txawm nug Petus tias, “Koj yog tus yawg ntawd ib tug thwj tim thiab los sad?” Nws teb tias, “Kuv tsis yog.” 18 Hmo ntawd no heev, cov tub qhe thiab cov tub ceev xwm thiaj rauv ib cub thee mas sawv daws nte puag ncig. Petus kuj los sawv ntawd nrog lawv nte thiab.

19 Tus pov thawj hlob* thiaj nug Yexus txog nws cov thwj tim thiab tej uas nws qhia. 20 Yexus teb tias, “Kuv yeej tab meeg qhia ib tsoom neeg sawv daws. Kuv qhia hauv tej tsev pe hawm thiab ntawm lub tuam tsev uas yog tej chaw cov Yudais ib txwm tuaj. Kuv yeej qhia hlo tsis zais li. 21 Ua cas koj ho nug kuv? Mus nug cov uas twb hnov kuv qhia lawd. Lawv yeej paub tej uas kuv qhia.” 22 Thaum Yexus hais li ntawd tas, ib tug tub ceev xwm uas nyob ntawd txawm tib tawg ncuav Yexus sab plhu thiab hais tias, “Koj tseem teb tus pov thawj hlob li ko thiab lod?” 23 Yexus hais rau nws tias, “Yog kuv hais qhov twg tsis yog, cia li qhia qhov txhaum los. Tiam sis yog kuv hais yog lawd, koj ntaus kuv ua dab tsi?” 24 Tom qab ntawd, Anas thiaj kom lawv cab Yexus mus cuag tus tuam pov thawj hlob Khayafas.

25 Thaum ntawd Ximoos Petus tseem sawv nte taws ntawd. Lawv thiaj nug nws tias, “Koj yog nws ib tug thwj tim thiab los sad?” Petus tsis lees thiab hais tias, “Kuv tsis yog.” 26 Tus tuam pov thawj hlob ib tug qhev uas txheeb tus yawg uas Petus txiav nplooj ntseg tu nrho, txawm nug Petus tias, “Kuv twb pom koj nrog nws nyob hauv lub vaj thiab los sad?” 27 Tiam sis Petus rov tsis lees dua ces qaib txawm qua tam sid.

28 Lawv ho coj Yexus tawm hauv Khayafas tsev mus rau tom tus tswv xeev tsev. Thaum ntawd twb kaj ntug txoog lawm. Tiam sis lawv tseem yuav noj pluas hmo ua Kev Cai Hla Dhau, lawv thiaj tsis kam nkag mus rau hauv tus tswv xeev lub tsev kom txhob ua rau lawv qias. 29 Philaj thiaj tawm tuaj nug lawv tias, “Tus yawg no tau ua txhaum dab tsi?” 30 Lawv teb tias, “Yog tus neeg no tsis tau ua txhaum ces peb yeej tsis muab nws cob rau koj li.” 31 Philaj thiaj hais lawv tias, “Nej kuj coj nws mus txiav txim raws li nej txoj kev cai.” Tiam sis cov Yudais teb tias, “Peb tsis muaj cai teem txim tuag rau ib tug twg.” 32 Tau muaj li no kom tiav raws li tej lus uas Yexus hais tias nws yuav tuag li cas.

33 Philaj thiaj rov mus rau hauv tus tswv xeev lub tsev thiab hu Yexus los cuag nws. Ces nws nug Yexus tias, “Koj puas yog cov Yudais tus Vaj Ntxwv?” 34 Yexus ho nug nws tias, “Puas yog koj xav paub koj los yog lwm tus hais txog kuv rau koj?” 35 Philaj teb tias, “Koj yeej paub tias kuv tsis yog neeg Yudais. Twb yog koj haiv neeg thiab nej cov pov thawj hlob coj koj tuaj cob rau kuv. Koj tau ua txhaum dab tsi lawm?” 36 Yexus teb tias, “Kuv txoj kev kav* tsis txuam nrog qab ntuj neeg. Yog kuv txoj kev kav* txuam nrog qab ntuj neeg ces kuv cov tub qhe yeej tsis pub cov Yudais ntes tau kuv li. Tiam sis kuv txoj kev kav* yeej tsis txuam nrog qab ntuj neeg.” 37 Philaj thiaj nug Yexus tias, “Yog li, koj puas yog ib tug vaj ntxwv?” Yexus teb tias, “Yog li koj hais.* Kuv los yug ua neeg thiab mus tshaj tawm rau ib tsoom neeg xwv kuv thiaj ua tau tim khawv txog qhov tseeb. Txhua tus uas nyiam coj raws li qhov tseeb, yeej mloog kuv lub suab.” 38 Philaj txawm nug Yexus tias, “Qhov tseeb twg?”

Thaum Philaj nug li no tas, nws rov tawm mus rau ntawm cov Yudais thiab hais tias, “Kuv tsis pom nws ib qho txhaum li. 39 Raws li nej txoj kev cai, thaum txog lub caij ua Kev Cai Hla Dhau, kuv yuav tsum tso ib tug neeg raug txim los rau nej. Ua li, nej puas xav kom kuv tso cov Yudais tus Vaj Ntxwv los rau nej?” 40 Lawv rov qw ib tsaug tias, “Txhob tso tus ko, tso Npalanpas!” Tus Npalanpas no yog ib tug tub sab.

19 Philaj thiaj kom cov tub rog coj Yexus mus nplawm. 2 Cov tub rog thiaj muab hmab pos qhaib ua ib lub kauj rau Yexus ntoo, thiab muab ib lub tsho tsam xem rau nws hnav. 3 Lawv txawm los rau ntawm Yexus qw tias, “Hawm cov Yudais tus Vaj Ntxwv lauj!” Ces lawv ib sij xuas tawg ncuav rau nws lub ntsej muag. 4 Philaj rov tawm mus rau sab nraud thiab hais rau cov Yudais tias, “Saib maj! Kuv coj nws tawm los rau nej kom nej paub tias kuv nrhiav tsis tau nws ib qho txhaum li.” 5 Yexus thiaj tawm los rau sab nraud, nws ntoo rawv lub kauj pos thiab hnav lub tsho tsam xem. Philaj thiaj hais rau sawv daws tias, “Saib tus neeg no nawj!” 6 Thaum cov pov thawj hlob thiab cov tub ceev xwm pom Yexus, lawv qw ib tsaug ib tsaug tias, “Muab ntsia saum ntoo!* Muab ntsia saum ntoo!”* Philaj thiaj hais rau lawv tias, “Nej mam tua nej, kuv yeej tsis pom nws ib qho txhaum li.” 7 Cov Yudais teb Philaj tias, “Peb muaj ib txoj kev cai sam hwm tias yuav tsum muab nws tua pov tseg vim nws khav tias nws yog Vajtswv tus tub.”

8 Thaum Philaj hnov lawv qw li ntawd mas ua rau nws haj yam ntshai. 9 Philaj thiaj rov mus rau hauv tus tswv xeev lub tsev thiab nug Yexus tias, “Koj nyob qhov twg tuaj?” Tiam sis Yexus tsis teb nws ib los li. 10 Philaj thiaj hais rau Yexus tias, “Koj tseem tsis teb kuv ib los li lod? Koj tsis paub tias kuv muaj hwj chim tso koj dim thiab muaj hwj chim muab koj tua* no lod?” 11 Yexus teb Philaj tias, “Yog Vajtswv tsis tso cai mas koj yeej tsis muaj hwj chim ua ib yam dab tsi rau kuv li. Twb yog li ntawd, tus uas ntes kuv tuaj cob rau koj thiaj muaj txim hnyav dua koj.”

12 Vim li ntawd, Philaj thiaj nrhiav kev los tso Yexus. Tiam sis cov Yudais qw nrov nrov tias, “Yog koj tso tus neeg no twb yog koj ua yeeb ncuab rau Xixas. Tus uas khav ua vaj ntxwv yeej tawm tsam Xixas.” 13 Thaum Philaj hnov tej lus ntawd, nws coj Yexus tawm los rau sab nraud. Philaj txawm zaum saum lub rooj txiav txim ntawm qhov chaw hu ua Tshav Pua Lag Zeb, lus Henplais hu ua Kanpathas. 14 Hnub ntawd yog hnub sawv daws npaj ua Kev Cai Hla Dhau,* twb yuav txog 12 teev tav su. Philaj hais rau cov Yudais tias, “Saib nej tus vaj ntxwv nawj!” 15 Tiam sis lawv qw tawg ntho tias, “Muab nws tua! Muab nws tua! Muab nws ntsia saum ntoo!”* Philaj hais rau lawv tias, “Kuv tseem yuav muab nej tus vaj ntxwv tua thiab lod?” Cov pov thawj hlob teb ntua tias, “Peb tus vaj ntxwv yog Xixas xwb.” 16 Philaj txawm muab Yexus cob rau lawv coj mus ntsia rau saum tus ncej ntoo.*

Ces lawv thiaj coj Yexus mus lawm. 17 Lawv muab tus ncej ntoo* rau Yexus kwv mus. Nws thiaj mus rau qhov chaw hu ua Txha Taub Hau, lus Henplais hu ua Kaukauthas. 18 Qhov chaw ntawd, lawv muab Yexus ntsia rau saum tus ncej ntoo.* Lawv kuj muab ob tug txiv neej dai thiab, ib tug nyob ntawm Yexus ib sab. 19 Philaj kuj sau ntawv rau ib daig txiag ntsia saum tus ncej ntoo* hais tias, “Yexus, tus neeg Naxales uas yog cov Yudais tus Vaj Ntxwv.” 20 Coob tus Yudais pom daim txiag no rau qhov Yexus raug ntsia saum ib tug ncej ntoo* uas nyob ze Yeluxalees, thiab yog sau ua lus Henplais, lus Latees, thiab lus Kilis. 21 Tiam sis cov Yudais tej pov thawj hlob hais rau Philaj tias, “Txhob sau tias, ‘Cov Yudais tus Vaj Ntxwv,’ tiam sis sau tias tus yawg no khav tias nws yog cov Yudais tus Vaj Ntxwv.” 22 Philaj teb tias, “Kuv sau li cas, yuav li ntawd xwb.”

23 Tom qab cov tub rog muab Yexus ntsia saum tus ncej ntoo* lawd, lawv muab nws lub tsho sab nraud* los dua ua plaub daig, ib leeg tau ib daim. Lawv kuj muab nws lub tsho sab hauv* los thiab. Tiam sis lawv pom tias lub tsho sab hauv* ntos keev xeeb hlo thoob plaws.* 24 Lawv thiaj hais zom zaws tias, “Peb txhob muab lub tsho no dua, cia peb muab twv seb leej twg tau xwb.” Tau muaj li no kom tiav raws li Vajtswv txoj lus tau hais tseg tias, “Lawv muab kuv cev tsoos tsho sib faib, thiab muab kuv lub tsho twv seb leej twg tau.” Cov tub rog tau ua li ntawd lawm tiag.

25 Yexus niam thiab nws niam tus niam hluas, thiab Maivliag uas yog Khopas tus poj niam, thiab Maivliag Madalas lawv puav leej sawv ze ntawm tus ncej ntoo* uas ntsia Yexus. 26 Thaum Yexus ntsia mus pom nws niam thiab tus thwj tim uas nws hlub sawv ze ntawd, nws thiaj hais tias, “Niad, tus kod yog koj tus tub.” 27 Yexus kuj hais rau tus thwj tim ntawd tias, “Nws yog koj niam lawm os.” Txij thaum ntawd los, nws thiaj coj Maivliag mus nrog nws nyob lawm.

28 Tom qab ntawd, Yexus paub tias nws twb ua txhua yam tiav raws li nws Leej Txiv tau hais tseg lawm. Nws txawm hais tias, “Kuv nqhis dej.” Nws hais li ntawd kom muaj tiav raws li Vajtswv txoj lus tau hais tseg. 29 Muaj ib hub cawv txiv hmab qaub puv nkaus txawb ntawd. Lawv thiaj muab ib lub xwb kuab raus cov cawv txiv hmab qaub thiab muab chob ib tug tauj* cev mus rau Yexus qhov ncauj. 30 Thaum Yexus saj cov cawv txiv hmab qaub ntawd, nws hais tias, “Tiav lawm lauj!” Nws txawm hnyo hau ntshis, tu siav nrho.

31 Hnub ntawd yog hnub uas npaj rau hnub Xanpataus, thiaj tsis zoo tseg lawv tej cev tuag dai saum ncej rau hnub Xanpataus (vim hnub ntawd tshwj xeeb dua lwm hnub Xanpataus). Cov Yudais thiaj thov Philaj kom muab cov neeg uas dai saum ncej ntoo* tsoo kom lov ceg* es mam li txo cov cev tuag mus. 32 Cov tub rog thiaj los muab ob tug txiv neej uas dai ntawm Yexus ob sab tsoo lov ceg tas. 33 Ua ciav thaum lawv los txog ntawm Yexus, lawv pom tias nws twb tuag lawm. Lawv thiaj tsis tsoo nws ob txhais ceg. 34 Tiam sis ib tug tub rog xuas hmuv nkaug kiag nws phab tav ces dej thiab ntshav txawm tawm los. 35 Tus thwj tim uas Yexus hlub ua tim khawv pom txog tej no. Tej uas nws ua tim khawv txog muaj tseeb tiag. Nws yeej paub tseeb li ntawd tiag, nej thiaj ntseeg tau nws tej lus. 36 Tau muaj li no kom tiav raws li Vajtswv txoj lus hais tseg tias, “Yuav tsis pub nws ib yag txha lov li.” 37 Muaj dua ib nqe hais tias, “Lawv yuav ntsia ntsoov tus uas lawv xuas hmuv nkaug.”

38 Tom qab muaj li no, Yauxej uas nyob hauv lub nroog Alimathias tuaj thov Philaj tso cai rau nws coj Yexus lub cev mus. Yauxej kuj yog Yexus ib tug thwj tim, tiam sis nws tsis qhia leej twg paub rau qhov nws ntshai cov Yudais. Thaum Philaj tso cai, nws thiaj coj Yexus lub cev mus lawm. 39 Nikhaudemaus kuj nqa ib co hmoov tshuaj tsw qab mules thiab alaus hnyav txog 100 phaus* tuaj ntawd thiab. Nws yog tus uas yav nram ntej mus cuag Yexus hmo ntuj. 40 Nkawd thiaj muab cov tshuaj tsw qab tso rau cov ntaub mag qhwv Yexus lub cev raws li cov Yudais txoj kev cai log tuag. 41 Muaj ib lub vaj nyob ze qhov chaw uas ntsia Yexus. Hauv lub vaj ntawd kuj muaj ib lub qhov ntxa txaug tshiab tshiab uas tsis tau muab leej twg tso rau hauv li. 42 Vim lub qhov ntxa nyob ze ze, thiab tseem yog hnub uas cov Yudais npaj rau hnub ua Kev Cai Noj Ncuav Tsis Xyaw Keeb,* lawv thiaj muab Yexus zais rau qhov chaw ntawd.

20 Lub lim tiam ntawd thawj hnub,* thaum kaj ntug txoog, Maivliag Madalas mus txog tom lub ntxa, nws pom tias luag twb muab daim lag zeb uas npog lub rooj ntxas dov rau ib cag lawm. 2 Nws thiaj dhia ceev nrooj mus cuag Ximoos Petus thiab tus thwj tim uas Yexus hlub thiab hais tias, “Luag muab tus Tswv lub cev hauv qhov ntxa coj mus lawm. Peb tsis paub xyov lawv coj mus dua twg lawm.”

3 Petus thiab tus thwj tim ntawd thiaj mus kiag tom lub qhov ntxa. 4 Nkawd tib tsaug dhia mus, tiam sis tus thwj tim ntawd khiav ceev dua Petus, nws thiaj xub mus txog tom lub ntxa. 5 Tus thwj tim ntawd txawm khoov mus xauj hauv lub qhov ntxa, nws pom cov ntaub mag ua ib pawg tiam sis nws tsis nkag mus rau hauv. 6 Thaum Ximoos Petus tuaj txog, nws thiaj nkag kiag mus rau hauv lub qhov ntxa. Nws kuj pom cov ntaub mag ua ib pawg thiab. 7 Daim ntaub uas qhwv Yexus taub hau tsis nyob nrog cov ntaub uas qhwv Yexus lub cev, tiam sis ho muab kauv zoo zoo rau ib cag. 8 Tus thwj tim uas xub mus txog tom lub ntxa mam li nkag mus rau hauv thiab. Thaum nws pom tej no nws thiaj ntseeg. 9 Thaum ntawd, ob tug tseem tsis tau nkag siab nqe uas hais tias nws yuav tsum sawv hauv qhov tuag rov los. 10 Ces ob tug thwj tim ntawd thiaj rov mus tsev lawm.

11 Tiam sis Maivliag tseem sawv sab nraum lub ntxa quaj quaj. Thaum nws khoov mus xauj hauv lub qhov ntxa, 12 nws pom ob tug tub txib saum ntuj hnav tsoos dawb paug zaum ntawm qhov chaw uas lawv muab Yexus tso rau. Ib tug zaum ntawm tog taub hau, ib tug zaum ntawm tog ko taw. 13 Nkawd thiaj hais rau Maivliag tias, “Koj quaj ua dab tsi?” Nws teb tias, “Luag muab kuv tus Tswv coj mus, kuv tsis paub xyov lawv muab coj mus tso qhov twg lawm.” 14 Thaum nws hais li ntawd tas, nws tig los pom ib tug neeg sawv ntawd, tiam sis nws tsis paub tias yog Yexus. 15 Yexus thiaj nug nws tias, “Koj quaj ua dab tsi? Koj nrhiav leej twg?” Maivliag xav tias nws yog tus uas tu lub vaj, Maivliag thiaj hais tias, “Puas yog koj coj nws lub cev mus lawm os? Thov qhia rau kuv paub seb koj muab nws lub cev tso qhov twg lawm, kuv mam li mus coj.” 16 Yexus txawm hais tias, “Maivliag!” Maivliag thiaj tig hlo saib Yexus thiab hais ua lus Henplais tias, “Lanpaunis!”* (lo lus no txhais tias “Xib Hwb!”) 17 Yexus hais rau Maivliag, “Txhob tuav kuv, rau qhov kuv tseem tsis tau mus cuag Leej Txiv. Tiam sis mus qhia rau kuv cov kwv tij tias, ‘Kuv yuav mus cuag kuv Leej Txiv uas yog nej Leej Txiv, thiab mus cuag kuv tus Vajtswv uas yog nej tus Vajtswv.’” 18 Maivliag Madalas thiaj los qhia tej no rau cov thwj tim tias, “Kuv twb pom tus Tswv lawm!” Tej uas Yexus hais rau nws mas nws muab qhia tib si rau lawv.

19 Tib hnub* ntawd, thaum yuav tsaus ntuj, cov thwj tim tuaj ua ke hauv ib lub tsev. Lawv ntshai cov Yudais, lawv thiaj xauv qhov rooj zoo zoo. Tiam sis Yexus los tshwm plaws hauv chav uas lawv nyob ntawd thiab hais tias, “Thov kom nej nyob kaj siab lug.”* 20 Thaum nws hais li ntawd tas, nws muab nws ob txhais tes thiab sab tav rau lawv saib. Cov thwj tim zoo siab kawg li uas lawv pom tus Tswv lawm tiag. 21 Yexus rov hais rau lawv tias, “Thov kom nej nyob kaj siab lug.* Leej Txiv txib kuv mus li cas, kuv yuav txib nej mus ib yam li ntawd.” 22 Thaum nws hais li no tas, nws txawm tshuab pa rau lawv thiab hais tias, “Cia li txais lub hwj huam dawb huv. 23 Yog nej zam txim rau tus twg ces Vajtswv twb zam txim rau tus ntawd ua ntej lawm. Yog nej tsis zam txim rau tus twg ces Vajtswv kuj tsis tau zam txim rau tus ntawd thiab.”

24 Tiam sis thaum Yexus los tshwm rau lawv, Thaumas tus uas hu ua Ntxaib tsis nyob ntawd. Nws yog ib tug ntawm 12 tug tub txib. 25 Cov thwj tim hais rau nws tias, “Peb twb pom tus Tswv lawm tiag!” Tiam sis Thaumas teb tias, “Yog kuv lub qhov muag tsis pom kiag lub qhov ntsia hlau hauv nws ob txhais tes thiab tsis tau xuas ntiv tes ntxig kiag ob lub qhov ntawd, thiab tsis tau kov kiag lub qhov uas lawv nkaug ntawm nws sab tav mas kuv yeej tsis ntseeg li.”

26 Yim hnub tom qab ntawd, cov thwj tim rov tuaj ua ke hauv lub tsev. Zaum no Thaumas kuj nrog lawv thiab. Txawm tias lawv twb xauv qhov rooj zoo zoo lawm los, Yexus cia li tshwm plaws hauv chav uas lawv nyob ntawd thiab hais tias, “Thov kom nej nyob kaj siab lug.”* 27 Yexus thiaj hais rau Thaumas tias, “Cia li xuas ntiv tes ntxig lub qhov hauv kuv ob txhais tes thiab cev tes los kov kuv sab tav. Cia li ntseeg xwb, txhob ua xyem xyav.” 28 Thaumas thiaj hais tias, “Yog koj tiag! Kuv tus Tswv, thiab kuv tus Vajtswv!”* 29 Yexus hais rau Thaumas tias, “Koj pom kuv es koj mam li ntseeg lod? Cov uas tsis tau pom tiam sis ho ntseeg yog cov uas zoo siab.”

30 Yexus yeej ua ntau yam txuj ci rau nws cov thwj tim pom lawm tiag, tiam sis tsis muab sau hauv kauj ntawv* no xwb. 31 Tau muab tej no sau tseg xwv nej thiaj ntseeg tias Yexus yeej yog tus Khetos uas yog Vajtswv Leej Tub. Yog nej ntseeg, nej yuav tau txoj sia vim nws lub npe.*

21 Tom qab ntawd, Yexus rov tshwm rau cov thwj tim pom ntawm Hiav Txwv Thinpelias.* Nws los rau lawv pom li no. 2 Thaum ntawd Ximoos Petus, Thaumas (tus uas hu ua Ntxaib), Nathana-ees uas nyob lub zos Khanas hauv Kalilais tuaj, Xenpedis ob tug tub, thiab muaj dua ob tug thwj tim, lawv tuaj ua ke rau ntawd. 3 Ximoos Petus hais rau lawv tias, “Kuv yuav mus ntaus ntses.” Lawv thiaj hais tias, “Peb nrog koj mus thiab.” Lawv txawm nce nkoj mus, tiam sis hmo ntawd tsis mag ib tug ntses li.

4 Thaum kaj ntug txoog, Yexus sawv tim ntug dej tiam sis cov thwj tim tsis paub tias yog nws. 5 Yexus hais rau lawv tias, “Cov kwv luag,* nej puas muaj dab tsi* noj?” Lawv teb tias, “Tsis muaj!” 6 Yexus thiaj qhia lawv tias, “Ntaus nej lub vas rau ntawm lub nkoj sab xis ces yuav mag ntses.” Lawv txawm ntaus li ntawd ces mag ntses ntau heev, lawv rub tsis taus los li. 7 Tus thwj tim uas Yexus hlub thiaj hais rau Petus tias, “Yog tus Tswv sad!” Thaum Ximoos Petus hnov dheev li ntawd, nws sawv tsees khaws nkaus lub tsho* los hnav vim nws muab hle lawm,* thiab tib plhaw rau hauv dej. 8 Tiam sis cov thwj tim caij lub nkoj me me los. Lawv maj mam rub lub vas uas mag ntses puv nkaus los rau tim ntug. Thaum ntawd lawv nyob tsis deb ntawm ntug, tsuas deb li 100 mev* xwb.

9 Thaum lawv los txog tim ntug, lawv pom ib cub thee muaj ntses thiab muaj ncuav. 10 Yexus hais rau lawv tias, “Nqa ib co ntses uas nyuam qhuav mag los thiab.” 11 Ximoos Petus thiaj rov nce saum lub nkoj thiab rub lub vas los rau tim ntug. Lub vas puv nkaus tej ntses loj loj xwb, mag tau 153 tug. Txawm lub vas mag ntses ntau npaum li ntawd los tsis ntuag li. 12 Yexus thiaj hu lawv tias, “Los noj tshais.” Tiam sis cov thwj tim tsis muaj ib tug kav nug tias nws yog leej twg, rau qhov lawv yeej paub tias yog tus Tswv. 13 Yexus thiaj muab cov ncuav cev rau lawv, nws mam li muab cov ntses. 14 Txij hnub uas Yexus sawv hauv qhov tuag rov los, zaum no yog zaum peb uas nws tshwm rau cov thwj tim pom.

15 Thaum lawv noj tshais tas, Yexus txawm nug Ximoos Petus tias, “Ximoos uas yog Yauhas tus tub, koj puas hlub kuv tshaj tej no?” Nws teb tias, “Tus Tswv, koj yeej paub tias kuv hlub koj.” Yexus thiaj hais tias, “Cia li yug kuv cov me nyuam yaj.” 16 Yexus rov nug zaum ob tias, “Ximoos uas yog Yauhas tus tub, koj puas hlub kuv?” Nws teb tias, “Hlub los mas, tus Tswv, koj yeej paub tias kuv hlub koj.” Yexus hais tias, “Cia li tu kuv cov me nyuam yaj.” 17 Yexus thiaj rov nug zaum peb tias, “Ximoos uas yog Yauhas tus tub, koj puas hlub kuv?” Petus thiaj ntxhov siab qhov uas Yexus rov nug nws zaum peb tias, “Koj puas hlub kuv?” Petus thiaj teb Yexus tias, “Tus Tswv, koj paub ib puas tsav yam thiab paub tias kuv yeej hlub koj.” Yexus thiaj hais tias, “Cia li yug kuv cov me nyuam yaj. 18 Kuv hais ncaj qha rau koj tias, thaum koj tseem hluas, koj tu cev khov kho thiab mus txoj ke twg los tau. Tiam sis thaum koj laus lawd, koj yuav xyab tes rau luag kho khaub ncaws rau koj hnav, thiab luag yuav coj koj mus rau qhov chaw uas koj tsis xav mus.” 19 Yexus hais li no qhia tias Petus yuav tuag li cas Vajtswv thiaj tau koob meej. Thaum Yexus hais li ntawd tas, nws hais tias, “Cia li nrog nraim kuv.”

20 Petus txawm tig mus pom tus thwj tim uas Yexus hlub lawv nkawd qab. Nws yog tus thwj tim uas thaum lawv noj pluas hmo es zaum pheeb Yexus thiab nug tias, “Tus Tswv, leej twg yog tus ntxeev siab rau koj?” 21 Thaum Petus pom tus thwj tim ntawd nws thiaj nug Yexus tias, “Tus Tswv, es tus no ho yuav raug li cas?” 22 Yexus thiaj teb tias, “Txawm kuv yuav tseg nws nyob mus txog thaum kuv rov qab los, los tsis tas koj yuav txhawj. Koj cia li nrog nraim kuv xwb.” 23 Tom qab ntawd, tej no txawm nrov ncha mus rau cov kwv tij sawv daws tias tus thwj tim ntawd yuav tsis tuag li. Tiam sis Yexus tsis tau hais tias nws yuav tsis tuag. Yexus tsuas hais tias, “Txawm kuv yuav tseg nws nyob mus txog thaum kuv rov qab los, los tsis tas koj yuav txhawj.”

24 Tus no yog tus thwj tim uas ua tim khawv txog tej no, thiab yog tus uas muab tej no sau cia. Peb paub tias nws yeej ua tim khawv tseeb.

25 Tseem tshuav ntau yam uas Yexus tau ua. Yog yuav muab sau huv tib si cia, ntshe hauv lub qab ntuj no yuav tsis muaj chaw txaus ntim tej kauj ntawv* ntawd.