TXOJ XOV ZOO MALAKAUS SAU

1 Txoj xov zoo txog Vajtswv tus Tub Yexus Khetos pib li no. 2 Yaxayas uas yog tus cev Vajtswv lus twb sau lawm tias, “(Kuv yuav txib kuv tus tub xa xov ua koj ntej. Nws yuav mus kho kev tos koj.)* 3 Muaj ib lub suab hu tom roob moj sab qhua tuaj tias, ‘Cia li kho kev tos Vajtswv Yehauvas!* Kho nws txoj kev kom tiaj tus.’” 4 Yauhas tus uas muab neeg ua kev cai raus dej tshaj tawm tom roob moj sab qhua tias, “Cia li ua kev cai raus dej los qhia tias nej hloov dua siab tshiab, Vajtswv thiaj zam nej lub txim.” 5 Tag nrho cov neeg nyob teb chaws Yudias thiab hauv Yeluxalees tawm mus cuag nws. Lawv lees txim tab meeg sawv daws thiab Yauhas muab lawv ua kev cai raus dej hauv tus Dej Yaladees. 6 Yauhas cev ris tsho yog plaub nees us* thiab nws sia ib txoj siv tawv. Nws noj kooj thiab zib ntab. 7 Nws tshaj tawm tias, “Ib tug muaj hwj chim loj dua kuv yuav los ua kuv qab. Kuv twb tsis tsim nyog daws nws txoj hlua khau. 8 Kuv muab nej ua kev cai raus dej tiam sis nws yuav muab nej ua kev cai raus lub hwj huam dawb huv.”

9 Lub sij hawm ntawd, Yexus tuaj pem Naxales hauv xeev Kalilais tuaj kom Yauhas muab nws ua kev cai raus dej hauv tus Dej Yaladees. 10 Thaum Yexus tawm plaws hauv dej los, nws pom rooj ntug qhib plho thiab Vajtswv lub hwj huam dawb huv zoo li ib tug nquab ya los tsaws rau saum nws. 11 Txawm muaj ib lub suab hais saum ntuj tuaj tias, “Koj yog kuv tus Tub. Kuv hlub koj heev. Koj ua haum kuv siab.”

12 Tam sim ntawd lub hwj huam dawb huv txawm ua rau Yexus mus tom roob moj sab qhua. 13 Nws nyob tod tau 40 hnub. Lub sij hawm ntawd Xatas nrhiav kev los sim nws. Nws nrog tej tsiaj qus nyob tiam sis cov tub txib saum ntuj los tu nws.

14 Tom qab Yauhas raug ntes lawd, Yexus mus rau pem Kalilais mus tshaj tawm txoj xov zoo txog Vajtswv. 15 Nws qhia tias, “Twb txog sij hawm lawm, Vajtswv txoj kev kav* los ze lawm. Cia li hloov dua siab tshiab thiab los ntseeg txoj xov zoo.”

16 Thaum Yexus taug ntug Hiav Txwv Kalilais, nws pom Ximoos thiab Anrus nkawd ob kwv tij tab tom ntaus ntses. Nkawd ua txoj hauj lwm ntaus ntses. 17 Yexus thiaj hais rau nkawd tias, “Cia li nrog kuv mus, kuv yuav qhia kom neb txawj nrhiav neeg ib yam li neb txawj ntaus ntses.” 18 Tam sim ntawd, nkawd thiaj tso plhuav nkawd ob lub vas tseg thiab nrog Yexus mus. 19 Dhau ntawd, Yexus ho mus pom Xenpedis ob tug tub, Yakaunpaus thiab Yauhas. Nkawd tab tom ntxiv vas hauv nkoj. 20 Yexus txawm yaum nkawd mus thiab. Nkawd thiaj tso plhuav nkawd txiv Xenpedis thiab cov neeg ua hauj lwm tseg hauv lub nkoj thiab nrog Yexus mus. 21 Ces lawv mus rau hauv Khapena-us lawm.

Thaum txog hnub Xanpataus, Yexus mus rau hauv lub tsev pe hawm thiab nws txawm pib qhia. 22 Thaum cov tib neeg hnov Yexus qhia ua rau lawv xav tsis thoob li rau qhov nws muaj hwj chim qhia, tsis thooj li lawv cov xib hwb.* 23 Tam sim ntawd muaj ib tug txiv neej raug dab hauv lub tsev pe hawm qw nrov nrov tias, 24 “Yexus tus neeg Naxales, koj tseem tuaj ua dab tsi ntawm no thiab? Koj tuaj rhuav tshem peb lod? Kuv paub koj yog leej twg lawm, koj twb yog Vajtswv tus tub qhe dawb huv ntag!” 25 Tiam sis Yexus txwv kiag tias, “Tsis txhob hais lus, cia li tawm plaws hauv tus neeg no mus!” 26 Ces niag dab txawm ua rau tus txiv neej ntawd vau hlo rau hauv pem teb huam ib tshaj, qw nrov nrov ces niag dab tawm plaws lawm. 27 Cov tib neeg xav tsis thoob li rau tej no, lawv sib nug zom zaws tias, “Ua cas nws ho ua tau li no? Nws txawj qhia ua luaj! Nws tseem muaj hwj chim ntiab tau dab tib si, dab tseem mloog nws lus thiab.” 28 Tib pliag ntshis xwb, tej uas nws ua ntawd txawm siv nrov ncha mus thoob plaws cheeb tsam Kalilais lawm.

29 Thaum lawv tawm hauv lub tsev pe hawm mus ces Yexus, Yakaunpaus, thiab Yauhas lawv nrog Ximoos thiab Anrus mus tom nkawd tsev. 30 Thaum ntawd Ximoos niam tais ua npaws pw saum txaj. Lawv thiaj li qhia rau Yexus paub tam sid. 31 Yexus mus tuav nkaus Ximoos niam tais tes rub nws sawv. Nws tus npaws txawm tu nrho thiab nws sawv tsees los ua zaub ua mov rau lawv noj.

32 Thaum hnub poob qho lawd, tib neeg txawm coj cov neeg muaj mob thiab cov neeg raug dab tuaj cuag Yexus. 33 Tag nrho cov neeg hauv nroog sau nthwv tuaj zov ntawm qhov rooj. 34 Cov neeg uas muaj mob li cas los Yexus kho tau zoo huv si. Cov uas raug dab los Yexus ntiab dab tawm tib si. Yexus txwv tsis pub dab hais ib los li, rau qhov lawv yeej paub tias Yexus yog Khetos.*

35 Thaum tsis tau kaj ntug, Yexus txawm sawv ntxov tsees mus rau ib qho chaw uas tsis muaj neeg li. Nws mus thov Vajtswv qhov ntawd. 36 Ces Ximoos lawv txawm nrhiav Yexus rau txhua qhov. 37 Thaum lawv nrhiav tau nws lawd, lawv hais tias, “Sawv daws nrhiav koj cuag tsi os.” 38 Tiam sis Yexus hais rau lawv tias, “Cia peb mus rau lwm qhov, hauv tej zej zog uas nyob ze ntawm no, kuv thiaj li tau mus tshaj tawm rau hauv thiab. Twb yog kuv los ua tes hauj lwm no ntag.” 39 Nws thiaj mus thoob plaws Kalilais mus tshaj tawm txoj xov zoo hauv tej tsev pe hawm thiab ntiab dab tawm.

40 Txawm muaj ib tug yawg mob ruas los txhos caug ntua thov Yexus tias, “Yog koj xav kho, koj yeej kho tau kuv zoo.” 41 Yexus hlub nws heev, Yexus thiaj cev loo tes mus tuav nkaus tus yawg ntawd thiab hais tias, “Kuv xav los ma, cia li zoo hlo.” 42 Tam sim ntawd nws tej ruas cia li zoo du lug lawm. 43 Yexus thiaj tso nws mus thiab txwv kiag tias, 44 “Tsis txhob qhia tej no rau leej twg. Cia li mus cuag cov pov thawj kom lawv tshuaj koj tus mob thiab muab khoom fij ua kev cai ntxuav raws li Mauxes tau hais lawd. Lawv thiaj pom tias koj zoo lawm tiag.” 45 Tiam sis thaum tus yawg ntawd mus lawm, nws txawm muab qhia thoob zej thoob zos. Yexus thiaj mus tsis tau tab meeg rau hauv ib lub nroog twg lawm. Nws tsuas nyob tom tej ntug zos uas tsis muaj neeg xwb. Txawm li ntawd los tseem muaj neeg tuaj txhua qhov tuaj cuag Yexus.

2 Ob peb hnub tom qab ntawd, Yexus rov mus rau Khapena-us. Sawv daws hais zom zaws tias Yexus nyob tsev. 2 Muaj neeg coob coob thiaj tuaj sib txiv ntom nti ntawm qhov rooj ces Yexus pib qhia Vajtswv txoj lus rau lawv. 3 Thaum ntawd muaj plaub tug txiv neej kwv ib tug yawg tuag tes tuag taw tuaj rau Yexus. 4 Tiam sis muaj neeg coob coob sib txiv qev xwb, lawv txeem tsis tau mus rau hauv tsev. Lawv thiaj tho saum ru tsev uas ncaj ntawm Yexus, thiab muab tus yawg tuag tes tuag taw uas pw saum txaj* tso dauv mus rau Yexus. 5 Thaum Yexus pom tias lawv muaj kev ntseeg heev, nws txawm hais rau tus yawg tuag tes tuag taw tias, “Me tub, kuv twb zam koj lub txim lawm.” 6 Muaj ib co xib hwb* zaum ntawd thiab, lawv xav hauv nruab siab tias, 7 “Ua cas tus yawg no hais li ntawd? Nws hais lus tuam mom Vajtswv, tsuas yog Vajtswv thiaj zam tau neeg lub txim xwb sad?” 8 Tam sim ntawd Yexus twb paub tej uas lawv xav hauv nruab siab lawm. Nws thiaj hais rau lawv tias, “Ua cas nej xav li kod? 9 Txawm leej twg los yeej hais tau rau tus yawg no tias, ‘Kuv zam koj lub txim lawm.’ Tiam sis leej twg yuav hais tau kom nws sawv tsees kwv hlo nws lub txaj mus? 10 Kuv yuav ua kom nej paub tias neeg Leej Tub muaj hwj chim zam tau neeg lub txim hauv ntiaj teb no.” Yexus txawm hais rau tus yawg tuag tes tuag taw tias, 11 “Cia li sawv tsees, kwv kiag koj lub txaj mus tsev.” 12 Tam sim ntawd nws txawm sawv tsees nqa hlo nws lub txaj tawm plaws mus tab meeg sawv daws, ua rau lawv xav tsis thoob li. Lawv thiaj qhuas Vajtswv tias, “Peb yeej tsis tau pom dua tej no ib zaug li.”

13 Yexus rov mus taug ntug hiav txwv. Muaj neeg coob coob los rau ntawm Yexus ces nws txawm pib qhia lawv. 14 Thaum Yexus dua kev, nws pom Levis uas yog Afe-as tus tub zaum ntawm lub rooj sau se. Yexus hais rau Levis tias, “Cia li nrog kuv mus.” Ces nws txawm sawv tsees nrog Yexus mus. 15 Dhau ntawd, Yexus mus noj mov hauv Levis tsev. Muaj cov neeg sau se thiab cov neeg txhaum coob tus tuaj nrog Yexus thiab nws cov thwj tim noj mov ua ke. Lawv coob tus txawm los raws Yexus qab ntxiv. 16 Tiam sis thaum cov xib hwb uas yog Falixais pom Yexus nrog cov neeg muaj txim thiab cov neeg sau se noj mov ua ke, lawv txawm nug Yexus cov thwj tim tias, “Ua cas nws tseem nrog cov neeg sau se thiab cov neeg txhaum noj haus ua ke thiab?” 17 Thaum Yexus hnov lawv hais li ntawd nws teb tias, “Cov neeg tsis muaj mob yeej tsis mus cuag kws kho mob, tsuas yog cov neeg muaj mob thiaj mus xwb. Kuv los nrhiav cov neeg txhaum, tsis yog los nrhiav cov neeg ncaj ncees.”*

18 Yauhas cov thwj tim thiab cov Falixais pheej ua kev cai yoo mov. Lawv ib txhia thiaj los nug Yexus tias, “Vim li cas Yauhas cov thwj tim thiab pab Falixais cov thwj tim ho ua kev cai yoo mov tiam sis koj cov thwj tim ho tsis ua?” 19 Yexus thiaj teb lawv tias, “Thaum tus nraug vauv tseem nrog nws cov kwv luag, lawv yuav yoo mov lod? Thaum tus nraug vauv tseem nrog lawv ces lawv yeej tsis yoo mov li. 20 Tiam sis yuav muaj ib hnub uas luag coj tus nraug vauv mus lawm ces lawv mam li yoo. 21 Tsis muaj leej twg yuav muab daim ntaub tshiab los ntxiv rau lub tsho qub. Yog nws ua li ntawd ces daim tshiab yuav rub lub tsho qub haj yam ntuag loj. 22 Kuj tsis muaj leej twg yuav muab cawv txiv hmab tshiab tsau hauv lub hnab tawv qub. Yog nws ua li ntawd ces lub hnab tawv qub yuav tawg ces cov cawv txiv hmab yuav paim tag. Lub hnab tawv kuj puas tsuaj lawm thiab. Tsuas muab cov cawv txiv hmab tshiab tsau hauv lub hnab tawv tshiab xwb.”

23 Hnub Xanpataus, Yexus thiab nws cov thwj tim hla ib daim teb mog. Nws cov thwj tim txawm zaws hnab mog* los tev noj. 24 Cov Falixais thiaj hais rau Yexus tias, “Sim saib! Ua cas lawv ua txhaum kev cai rau hnub Xanpataus lawm?” 25 Yexus teb tias, “Nej tsis tau nyeem thaum Daviv thiab nws cov neeg tshaib plab lod? 26 Hauv zaj uas qhia txog tus pov thawj hlob* Anpiyathas, Daviv mus rau hauv Vajtswv lub tsev mus muab cov ncuav uas fij rau Vajtswv lawd los noj thiab nws kuj muab rau nws cov neeg noj tib si. Txoj kev cai txwv tsis pub leej twg noj cov ncuav ntawd, tsuas yog cov pov thawj thiaj noj tau xwb los sad?” 27 Ces Yexus hais ntxiv tias, “Vajtswv tsa hnub Xanpataus los pab tib neeg, tsis yog los tswj tib neeg. 28 Neeg Leej Tub twb yog tus Tswv uas kav hnub Xanpataus thiab.”

3 Yexus rov mus hauv lub tsev pe hawm, kuj muaj ib tug yawg qhuav tes tuaj ntawd thiab. 2 Cov Falixais ntsia ntsoov seb Yexus puas yuav kho tus yawg ntawd rau hnub Xanpataus kom lawv thiaj tau kev nkaug nws. 3 Yexus hais rau tus yawg qhuav tes tias, “Cia li los sawv hauv plawv no.” 4 Ces Yexus nug lawv tias, “Qhov twg thiaj raws li txoj kev cai rau hnub Xanpataus, ua qhov zoo los ua qhov phem? Cawm txoj sia los txov txoj sia?” Tiam sis tsis muaj leej twg teb ib los li. 5 Yexus ntsia puag ncig cov neeg ntawd ua chim tsawv. Nws tu siab tias lawv tsis muaj siab hlub leej twg li. Nws thiaj hais rau tus yawg qhuav tes tias, “Cia li xyab hlo koj txhais npab.” Thaum nws xyab hlo, nws txhais tes cia li zoo kiag lawm. 6 Tam sim ntawd cov Falixais tawm plaws mus tuav tswv yim nrog Helauj cov neeg* seb yuav ua li cas thiaj tua tau Yexus.

7 Tiam sis Yexus thiab nws cov thwj tim tawm mus rau nram ntug hiav txwv mas muaj neeg coob coob tuaj hauv Kalilais thiab Yudias tuaj caum Yexus. 8 Txawm cov neeg nram Yeluxalees, nram Idumias, cov uas nyob sab ntug Dej Yaladees tim ub, thiab cov uas nyob puag ncig Thailab thiab Xaidoos los puav leej hnov txog tej uas Yexus tau ua, lawv thiaj tuaj caum Yexus coob heev. 9 Nws thiaj kom cov thwj tim npaj ib lub nkoj me me tos nws, kom cov neeg coob coob ntawd txhob los phoom nws. 10 Twb yog vim Yexus kho tau coob tus zoo, cov uas muaj mob loj thiaj sib txiv qev los kov Yexus. 11 Txawm cov neeg raug dab los thaum lawv pom dheev Yexus, lawv khwb nkaus hauv pem teb hawm Yexus thiab quaj qw tias, “Koj yog Vajtswv Leej Tub.” 12 Tiam sis ntau zaus nws txwv tsis pub lawv qhia rau leej twg paub txog nws li.

13 Yexus nce mus rau saum ib lub roob. Nws hu cov thwj tim ib txhia los cuag nws. 14 Nws thiaj xaiv tau 12 leeg los ua ib pab thiab muab lawv hu ua cov tub txib. Lawv yog cov uas nrog nraim nws thiab nws txib lawv mus tshaj tawm txoj xov zoo. 15 Nws pub hwj chim rau lawv ntiab tau dab thiab.

16 Lawv 12 leeg uas Yexus xaiv ntawd yog Ximoos uas Yexus muab hu ua Petus, 17 Yakaunpaus thiab nws tus kwv Yauhas, nkawd yog Xenpedis ob tug tub (Yexus muab nkawd hu ua Npaunekes uas txhais tias, “Ob tug uas heev cuag xob”), 18 Anrus, Filis, Npathaulaumais, Mathais, Thaumas, Yakaunpaus uas yog Afe-as tus tub, Thade-as, Ximoos tus uas kub siab,* 19 thiab Yudas Ikhali-aus tus uas tom qab no ntxeev siab rau Yexus.

Ces Yexus txawm mus rau hauv ib lub tsev lawm. 20 Rov muaj neeg coob heev tuaj ua rau lawv twb tsis khoom noj mov li. 21 Tiam sis thaum Yexus tsev neeg hnov txog tej no, lawv txawm mus coj Yexus vim lawv hais tias, “Nws vwm lawm.” 22 Tsis tas li ntawd, cov xib hwb* uas tuaj nram Yeluxalees tuaj hais tias, “Twb yog Npexenpus* pab nws! Dab tus thawj pub hwj chim rau nws ntiab dab ntag.” 23 Yexus thiaj hu lawv los thiab ua lus piv txwv qhia lawv. Nws hais rau lawv tias, “Xatas yeej tsis ntiab Xatas los sad? 24 Yog ib lub teb chaws twg rov sib tua ces lub teb chaws ntawd yuav tawg ua sab ua sua mus. 25 Thiab yog ib tse neeg twg rov sib tawm tsam ces tsev neeg ntawd kuj yuav tawg ua sab ua sua mus thiab. 26 Ib yam li ntawd, yog Xatas rov tawm tsam nws cov dab ces lawv yeej yuav tawg ua sab ua sua puas tsuaj mus xwb. 27 Yog tus tswv tsev muaj zog heev, tsis muaj leej twg yuav txeem tau mus rau hauv nws lub tsev mus lws nws tej cuab txhiaj cuab tam, yuav tsum muab nws khi ua ntej tso. 28 Kuv hais ncaj qha rau nej tias, Vajtswv yeej zam tau txhua yam kev txhaum uas neeg ua thiab tej lus tuam mom uas lawv hais tib si. 29 Tiam sis tus uas txhob txwm thuam lub hwj huam dawb huv, Vajtswv yuav zam tsis tau li. Tus ntawd yuav muaj txim mus ib txhis.” 30 Yexus hais li no vim lawv hais tias, “Nws raug dab lawm.”

31 Thaum ntawd Yexus niam thiab nws cov kwv tuaj sawv nraum zoov. Lawv kom neeg mus hu nws los. 32 Muaj ib pab neeg tab tom zaum puag ncig nws. Lawv hais rau nws tias, “Koj niam thiab koj cov kwv tuaj nrhiav koj txog nraum zoov.” 33 Yexus teb tias, “Leej twg yog kuv niam thiab kuv cov kwv?” 34 Nws txawm tsa muag ntsia cov uas zaum puag ncig nws thiab hais tias, “Cov no ntag yog kuv niam thiab kuv cov kwv! 35 Cov uas ua raws li Vajtswv lub siab nyiam thiaj yog kuv tus kwv tij, kuv tus muam, thiab kuv niam.”

4 Yexus rov mus qhia ntawm ntug hiav txwv. Muaj ib pab neeg coob coob tuaj rau ntawm nws. Yexus thiaj nce mus zaum hauv ib lub nkoj kom nrug zog ntawm ntug dej. Nws mam qhia cov neeg uas nyob tim ntug. 2 Yexus txawm ua lus piv txwv qhia ntau yam rau lawv mloog. Nws hais rau lawv tias, 3 “Ua tib zoo mloog zaj no nawb. Muaj ib tug yawg tawm mus tseb noob. 4 Thaum nws tseb, muaj ib co noob poob rau hauv txoj kev ces noog txawm ya los khaws noj lawm. 5 Muaj ib co poob rau saum cov av uas muaj pob zeb tiv. Av tsis tob cov noob thiaj nthaw kaus sai heev. 6 Tiam sis vim cov cag ntsia tsis tob, thaum tshav tuaj ziab cov kaus thiaj ntsws tas lawm. 7 Muaj dua ib co noob poob rau hauv cov pos ces pos hlob tuaj laum thiaj txi tsis taus txiv. 8 Tiam sis muaj ib co noob poob rau cov av zoo ces thiaj loj hlob txhawv taus ntsu tau 30 npaug, 60 npaug, thiab 100 npaug ntxiv.” 9 Ces nws hais ntxiv tias, “Leej twg muaj pob ntseg, cia li mloog.”

10 Thaum tshuav Yexus ib leeg xwb, qee leej nrog 12 tug tub txib los nug nws txog cov lus piv txwv. 11 Nws hais rau lawv tias, “Vajtswv pub nej los paub txog nws txoj kev kav* uas tau muab npog cia lawm. Tiam sis cov neeg sab nraud tsuas hnov lus piv txwv xwb. 12 Lawv saib tas saib thiab los lawv tsis pom. Lawv mloog tas mloog thiab los lawv yuav tsis to taub. Lawv yeej yuav tsis tig rov los kom Vajtswv zam lawv lub txim.” 13 Yexus hais ntxiv tias, “Yog nej twb tsis paub zaj lus piv txwv no, nej yuav ua li cas paub lwm zaj?

14 “Tus yawg tseb noob yog tseb Vajtswv txoj lus. 15 Cov noob uas poob rau hauv txoj kev yog cov uas hnov dheev Vajtswv txoj lus ces Xatas txawm muab txeeb kiag lawm. 16 Cov noob uas poob rau cov av uas muaj pob zeb tiv, yog cov uas hnov dheev Vajtswv txoj lus thiab zoo siab hlo mloog. 17 Tiam sis vim tej cag ntsia av tsis tob lawv ntseeg ib ntus xwb, thaum lawv raug kev txom nyem los sis raug tsim txom lawv cia li tso tseg lawm. 18 Tshuav cov noob uas poob rau hauv cov pos. Lawv yog cov uas hnov Vajtswv txoj lus 19 tiam sis tej kev txhawj xeeb hauv lub neej,* kev ntshaw nyiaj txiag, thiab kev ntshaw ib puas tsav yam laum Vajtswv txoj lus lawm, lawv thiaj txi tsis taus txiv. 20 Cov noob uas poob rau qhov av zoo yog cov uas mloog Vajtswv txoj lus, lawv zoo siab hlo coj, lawv thiaj ntsu tau 30 npaug, 60 npaug, thiab 100 npaug ntxiv.”

21 Nws kuj hais rau lawv tias, “Tsis muaj leej twg yuav taws teeb es muab tawb* khwb los sis muab tso hauv qab txag li, puas yog? Nws tsuas muab tso rau saum tus ncej txawb teeb xwb los sad? 22 Yam uas muab zais cia yuav muab nthuav rau sawv daws pom, thiab yam uas muab npog cia zoo zoo lawd yuav muab qhia rau sawv daws paub. 23 Leej twg muaj pob ntseg, cia li mloog.”

24 Nws hais ntxiv rau lawv tias, “Ua tib zoo mloog tej uas nej hnov no. Nej mloog npaum li cas ces nej yuav khaws tau npaum li ntawd. Yog nej ua li no ces tseem yuav tsav tswv yim rau nej ntxiv thiab.* 25 Rau qhov tus uas twb paub lawd los tseem yuav muab tsav ntxiv rau nws. Tiam sis tus uas tsis paub, txawm nws paub me ntsis xwb los tseem yuav muab tshem ntawm nws mus.”

26 Nws hais ntxiv tias, “Vajtswv txoj kev kav* zoo ib yam li ib tug yawg uas tseb noob rau hauv daim teb. 27 Thaum hmo ntuj nws mus pw, thaum kaj ntug nws sawv los, cov noob ntawd nthaw kaus tuaj thiab hlob li cas los nws tsis paub. 28 Tej noob ntawd mam hlob zuj zus hauv av tuaj, xub hlob ua ib tsob mam li txhawv thiab rau hnab puv tuaj. 29 Thaum siav lawd, nws mam xuas liag hlais rau qhov twb txog caij sau qoob lawm.”

30 Nws hais ntxiv tias, “Peb yuav muab Vajtswv txoj kev kav* piv rau dab tsi? Yuav muab ua lus piv txwv qhia li cas? 31 Zoo ib yam li lub noob me me* uas me dua ntais tej noob hauv ntiaj teb no es ib tug yawg coj mus cog rau hauv av. 32 Thaum lub noob ntawd loj hlob tuaj, txawm loj dua txhua yam zaub huv si. Tsob ntawd kuj ncau ceg nyas, tej noog saum nruab ntug thiaj los ua zes los nkaum hauv tus duab ntxoov ntxoo.”

33 Yexus muab Vajtswv txoj lus los ua piv txwv qhia ntau zaj rau lawv mloog. Nws qhia tej yam uas lawv yuav khaws tau xwb. 34 Tsis muaj ib zaj twg uas Yexus yuav tsis ua lus piv txwv qhia li. Nws tsuas txhais lub ntsiab twj ywm rau nws cov thwj tim xwb.

35 Hnub ntawd thaum yuav tsaus ntuj, nws hais rau lawv tias, “Cia peb caij nkoj hla mus rau sab tim ub.” 36 Thaum lawv tso cov neeg coob coob mus lawd, Yexus nrog lawv caij nkoj mus tam sid. Kuj muaj lwm cov nkoj nrog nws mus thiab. 37 Txawm muaj cua daj cua dub hlob heev, dej nphau nphwv los nyab lub nkoj, ua rau lub nkoj yuav luag tog. 38 Thaum ntawd Yexus tab tom rau ncoo pw tom tw nkoj. Lawv thiaj tsa Yexus sawv thiab hais tias, “Xib Hwb, koj tsis quav ntsej peb li lod, peb twb yuav tuag tam sim no.” 39 Yexus txawm sawv tsees los txwv kiag nag xob nag cua tias, “Tsum kiag! Ntsiag tam sim no.” Ces cua txawm tu nrho tam sid. 40 Nws thiaj hais rau lawv tias, “Ua cas nej siab me ua luaj? Cas nej tsis tso siab li?” 41 Lawv ntshai tshee hnyo thiab nyias taus nyias hais tias, “Tus no yog leej twg es cua thiab hiav txwv ho mloog nws lus thiab?”

5 Ces lawv caij nkoj hla hiav txwv mus txog sab tim ub hauv cheeb tsam Kelaxees. 2 Thaum Yexus tawm hauv nkoj los, txawm muaj ib tug yawg raug dab tawm tom toj ntxas los ntsib nws. 3 Tus yawg ntawd pheej nyob tom toj ntxas. Txij hnub nws raug dab los, yeej tsis muaj leej twg khi tau nws, txawm muab saw hlau khi los tsis tau li. 4 Muaj ntau zaus luag muab khawb hlau thiab saw hlau xauv nws tes nws taw los, nws muab ntiag thiab muab tsoo tawg tas, yeej tsis muaj leej twg muaj zog tswj tau nws li. 5 Nws niaj hnub niaj hmo quaj qw tom roob toj ntxas thiab saum tej roob, thiab muab pob zeb suam nws ib ce to tas. 6 Thaum nws pom dheev Yexus nyob deb tsawv, nws dhia loo mus txhos caug ntua ntawm Yexus. 7 Ces nws txawm qw nrov nrov tias, “Yexus, Vajtswv tus muaj hwj chim loj dua ntais tus Tub, koj tuaj ua dab tsi ntawm no? Thov cog lus rau Vajtswv tias koj yuav tsis rau txim rau kuv.” 8 Nws hais li no rau qhov Yexus hais rau nws tias, “Niag dab, koj cia li tawm hauv tus neeg no mus.” 9 Tiam sis Yexus nug nws tias, “Koj npe hu li cas?” Nws teb tias, “Kuv hu ua Coob, rau qhov peb coob heev.” 10 Nws thiaj thov Yexus tsis tseg kom txhob muab cov dab ntawd ntiab tawm hauv lub teb chaws mus.

11 Muaj ib pab npua coob heev tab tom nrhiav noj saum ntav roob. 12 Cov dab thiaj thov Yexus tias, “Cia peb mus rau hauv pab npua ntawd.” 13 Yexus thiaj tso cai ces cov dab txawm tawm plaws mus rau hauv pab npua, ua rau pab npua dhia nrov ntwg mus poob tsag tsua tuag tas rau hauv hiav txwv. Pab npua muaj li 2,000 tus. 14 Cov neeg yug npua txawm dhia tiaj lias mus hauv nroog thiab hauv tej zej zog qhia tej no rau sawv daws ces txawm muaj neeg tawm mus xyuas seb tau muaj li cas. 15 Thaum lawv mus txog ntawm Yexus, lawv pom tus yawg uas raug pab niag dab zaum ntawd, hnav ris tsho thiab meej pem lawm. Lawv txawm ntshai heev. 16 Cov uas pom tej xwm txheej no kuj piav txog tej uas Yexus tau ua los pab tus yawg raug dab thiab piav txog pab npua rau lawv mloog. 17 Lawv thiaj thov kom Yexus tawm hauv lawv cheeb tsam mus.

18 Thaum Yexus nce nkoj rov mus, tus yawg raug dab txawm thov nrog Yexus mus thiab. 19 Tiam sis Yexus tsis kam. Nws hais rau tus yawg ntawd tias, “Cia li mus tsev mus rau koj tej nruab tej ze, thiab qhia tej uas Vajtswv Yehauvas* tau pab koj, tias Nws hlub* koj npaum li cas.” 20 Tus yawg ntawd mus thoob plaws Dekapaulis,* mus tshaj tawm txog tej uas Yexus tau pab nws, ua rau cov tib neeg xav tsis thoob li.

21 Thaum Yexus caij nkoj rov mus txog sab tim ub es tseem tsis tau nqes, txawm siv muaj ib pab neeg coob coob tuaj nyob tim ntug tos nws lawm. 22 Muaj ib tug thawj uas saib xyuas lub tsev pe hawm hu ua Yailas txawm tuaj cuag Yexus. Thaum nws pom dheev Yexus, nws txhos caug ntua ntawm Yexus ko taw. 23 Nws thov thov Yexus tias, “Kuv tus me ntxhais nkees nkees li, xyov puas yuav nquag.* Thov koj mus tsa tes npuab nws kom nws nquag.” 24 Yexus txawm nrog nws mus ces ib pab neeg coob coob sib txiv qev raws Yexus qab.

25 Muaj ib tug poj niam uas nchuav cev tau 12 lub xyoos. 26 Nws mus cuag ntau tus kws kho mob tiam sis lawv yim huab ua rau nws txom nyem ntxiv xwb. Nws muab tag nrho nws tej nyiaj txiag ntiav lawv kho los tsis zoo li, tus mob tsuas loj zuj zus tuaj xwb. 27 Thaum nws hnov txog Yexus, nws thiaj txeem ntiag hauv pab neeg coob coob mus raws Yexus qab, kov kiag Yexus lub tw tsho. 28 Nws pheej xav tias, “Yog kuv ib nyuag kov nws lub tw tsho xwb, kuv yeej yuav zoo kiag.” 29 Ces tam sim ntawd ntshav txawm tu nrho. Nws hnov nws lub cev tus kiag. Nws dim plaws tus mob phem ntawd lawm.

30 Tam sim ntawd Yexus hnov hwj chim tawm hauv nws mus lawm, nws thiaj tig hlo nug sawv daws tias, “Leej twg kov kuv lub tsho?” 31 Tiam sis nws cov thwj tim hais rau nws tias, “Tib neeg coob sib txiv qev puag ncig koj es koj tseem nug tias leej twg kov koj?” 32 Txawm li ntawd los Yexus ntsia puag ncig cov tib neeg seb leej twg kov nws. 33 Tus poj niam paub tias nws zoo lawm, nws thiaj ntshai tshee na los txhos caug ntua ntawm Yexus. Nws lees hlo rau Yexus txog tej uas nws tau ua. 34 Yexus thiaj hais rau nws tias, “Me ntxhais’e, twb yog koj ntseeg koj thiaj zoo lawm. Cia li mus kaj siab lug, koj twb dim tus mob phem ntawd lawm.”

35 Thaum Yexus tab tom hais lus, muaj neeg tuaj tom Yailas tsev tuaj hais tias, “Koj tus ntxhais twb tuag lawm, tsis tas yuav tab kaum Xib Hwb ntxiv.” 36 Tiam sis Yexus hnov tej no, nws thiaj hais rau Yailas tias, “Tsis txhob ntshai, cia li ntseeg xwb.” 37 Yexus tsis pub leej twg nrog nws mus, tsuas pub Petus, Yakaunpaus, thiab Yakaunpaus tus kwv Yauhas xwb.

38 Thaum lawv los txog ntawm Yailas tsev, muaj neeg quaj ntsoog qees ntxhov hnyo. 39 Thaum Yexus nkag rau hauv tsev, nws hais rau lawv tias, “Ua cas nej yuav quaj ntxhov hnyo li no? Tus me nyuam tsaug zog xwb, nws tsis tau tuag.” 40 Lawv txawm luag Yexus zom zaws. Nws kom lawv txhua tus tawm mus sab nraud. Yexus coj leej niam leej txiv thiab cov thwj tim uas nrog nws mus rau ntawm qhov chaw uas tso tus me nyuam pw. 41 Ces Yexus txawm tuav nkaus tus me nyuam txhais tes thiab hais rau nws tias, “Talithas khumis.” Cov lus no txhais tias, “Me ntxhais’e, kuv hais rau koj tias, cia li sawv tsees!” 42 Tus me ntxhais txawm sawv tsees mus kev. (Nws muaj 12 xyoos.) Tam sim ntawd leej niam leej txiv xav tsis thoob li. Nkawd zoo siab xyiv fab tshaj plaws li. 43 Tiam sis Yexus hais tas hais thiab* kom txhob qhia tej no rau leej twg paub li, thiab nws hais kom muab mov rau tus me ntxhais noj.

6 Yexus thiaj tawm qhov ntawd mus rau hauv nws lub zej lub zos. Nws cov thwj tim kuj nrog nws mus thiab. 2 Thaum txog hnub Xanpataus, Yexus txawm mus qhia hauv lub tsev pe hawm. Cov uas hnov nws qhia xav tsis thoob li. Lawv hais tias, “Nws kawm tej no qhov twg los? Leej twg qhia tej tswv yim no rau nws? Ua cas nws ho muaj hwj chim ua tej txuj ci no thiab? 3 Tus no yog tus kws ntoo uas yog Maivliag tus tub los sad? Nws cov kwv yog Yakaunpaus, Yauxej, Yudas, thiab Ximoos los tsis yog? Nws cov muam twb nyob hauv no thiab ne.” Vim li no lawv thiaj tib Yexus. 4 Tiam sis Yexus hais rau lawv tias, “Luag zej luag zos yeej hwm tus cev Vajtswv lus, tsuas yog nws lub zej lub zos, nws tej nruab ze, thiab nws tsev neeg thiaj tsis hwm xwb.” 5 Yexus tsuas ua qho yam txuj ci rau lawv pom xwb. Nws tsa tes npuab thiab kho tus puav tej mob zoo. 6 Yexus xav tsis thoob rau lawv, vim lawv tsis muaj kev ntseeg li. Tom qab ntawd, nws tawm mus ncig thoob tej zej tej zos, mus tshaj tawm txoj xov zoo.

7 Yexus txawm txib nws 12 tug tub txib mus ib nkawg ib nkawg mus tshaj tawm txoj xov zoo. Nws kuj pub hwj chim rau lawv ntiab tau dab thiab. 8 Tsis tas li ntawd, nws kom lawv txhob nqa dab tsi, tsuas nqa tus pas nrig mus xwb, txhob ntim mov, txhob khuam hnab thoob puab, txhob nqa nyiaj,* 9 txhob npaj tsho* hloov, tsuas rau khau xwb. 10 Nws kuj hais ntxiv tias, “Thaum nej mus hauv ib lub nroog twg, yim twg hu nej mus so hauv lawv tsev, cia li nyob hauv mus txog thaum nej qhia thoob lub nroog ntawd. 11 Thiab yog cov neeg hauv ib koog twg tsis kam tos txais los sis mloog nej ces thaum nej mus rau lwm qhov cia li nchos tej hmoov av uas lo nej ko taw tseg kom ua tim khawv tias twb muaj neeg ceeb toom lawv lawm.” 12 Ces lawv txawm mus tshaj tawm kom ib tsoom neeg hloov dua siab tshiab. 13 Lawv ntiab ntau tus dab tawm thiab muab roj pleev cov neeg muaj mob coob tus zoo huv si.

14 Ces Vaj Ntxwv Helauj hnov txog tej no rau qhov Yexus lub npe twb ncha mus rau txhua qhov lawm. Tib neeg niaj hnub hais tias, “Nws yuav tsum yog tus Yauhas uas muab neeg ua kev cai raus dej. Ntshe yog nws sawv hauv qhov tuag rov los, nws thiaj ua tau txuj ci.” 15 Muaj dua ib co hais tias, “Nws yog Eliyas.” Tseem muaj dua lwm cov ho hais tias, “Nws yog ib tug cev Vajtswv lus, ib yam li cov cev Vajtswv lus txheej thaum ub.” 16 Thaum Helauj hnov txog tej no nws hais tias, “Ntshe yog tus Yauhas uas kuv muab txiav caj dab sawv rov los kaj.” 17 Helauj yuav Helaudias uas yog nws tus niam tij Filis ua poj niam. Nws xav kom Helaudias zoo siab, nws thiaj txib neeg mus ntes Yauhas kaw. 18 Yauhas pheej hais Helauj tias, “Koj yuav koj tus niam tij li ntawd tsis yog kev cai lawm.” 19 Twb yog li ntawd, Helaudias thiaj ntxub Yauhas twj ywm, xav muab nws tua pov tseg tiam sis tua tsis tau xwb. 20 Helauj ntshai Yauhas rau qhov nws paub tias Yauhas yog ib tug neeg dawb huv thiab ncaj ncees. Nws thiaj tsis pub leej twg ua phem rau Yauhas. Ntau zaus tej uas Yauhas qhia txaus Helauj siab heev, nws thiaj tsis pom qab muab Yauhas ua li cas.

21 Muaj ib hnub, zoo caij rau Helaudias ua raws li nws tau xav tseg, yog hnub uas Helauj npaj ib roog noj nco txog hnub yug nws. Helauj caw tej nom tswv loj, tej thawj tub rog, thiab cov neeg muaj meej mom siab tshaj hauv Kalilais tuaj noj huv si. 22 Ces Helaudias tus ntxhais txawm los seev cev rau sawv daws saib mas ua rau Helauj thiab nws cov qhua txaus siab heev. Vaj Ntxwv thiaj hais rau tus ntxhais tias, “Koj thov yam twg kuv yeej yuav muab pub rau koj.” 23 Nws cog lus rau tus ntxhais tias, “Txawm koj xav tau kuv lub teb chaws ib nrab los kuv yeej yuav muab rau koj.” 24 Tus ntxhais tawm mus nug nws niam tias, “Yuav thov dab tsi thiaj zoo?” Leej niam teb ntua tias, “Yauhas* lub taub hau.” 25 Tus ntxhais rov loo mus hais rau vaj ntxwv tias, “Kuv xav kom koj muab Yauhas* lub taub hau tso hauv ib lub phaj nqa los rau kuv tam sim no.” 26 Tej no ua rau Helauj ntxhov siab heev, rau qhov nws twb cog lus rau tus ntxhais tab meeg nws cov qhua lawm. 27 Tam sim ntawd vaj ntxwv thiaj txib ib tug tub rog mus tom tsev loj cuj, mus txiav Yauhas lub taub hau nqa los. Nws thiaj mus ua raws li vaj ntxwv hais. 28 Nws muab Yauhas lub taub hau tso hauv ib lub phaj nqa los. Helauj muab rau tus ntxhais ces tus ntxhais thiaj nqa mus rau nws niam. 29 Thaum Yauhas cov thwj tim hnov txog tej no, lawv thiaj tuaj coj Yauhas lub cev mus zais lawm.

30 Yexus cov tub txib los sawv puag ncig nws. Lawv qhia nws txog txhua yam uas lawv tau ua thiab tau qhia rau tib neeg lawd. 31 Thaum ntawd muaj neeg coob coob, ib pab tas ib pab tuaj, lawv twb tsis khoom noj mov li. Yexus thiaj hais rau lawv tias, “Cia peb mus rau ib qho chaw uas tsis muaj neeg, nej thiaj tau so me ntsis.” 32 Lawv thiaj caij nkoj mus rau ib qho chaw uas tsis muaj neeg kom lawv tau so. 33 Tiam sis muaj neeg pom Yexus lawv caij nkoj mus thiab muaj dua lwm cov hnov li ntawd. Txawm muaj neeg coob heev tawm hauv tej nroog dhia ua ntej mus txog qhov chaw uas Yexus lawv mus ntawd. 34 Thaum Yexus tawm hauv nkoj los, ua ciav twb muaj neeg coob coob tuaj tos lawv lawm. Yexus hlub lawv kawg li, rau qhov lawv zoo li pab yaj uas tsis muaj tsw. Nws thiaj qhia ntau yam rau lawv mloog.

35 Thaum lig lawd, cov thwj tim los hais Yexus tias, “Peb nyob deb zos heev thiab twb lig lig lawm. 36 Tso lawv mus, lawv thiaj mus nrhiav tau noj hauv tej zej zog.” 37 Yexus teb lawv tias, “Nej kuj muab mov rau lawv noj.” Lawv teb Yexus tias, “Koj xav kom peb coj 200 denalias* mus yuav mov rau cov tib neeg noj lod?” 38 Yexus thiaj hais tias, “Mus saib muaj pes tsawg lub ncuav.” Lawv mus saib thiab hais tias, “Muaj tsib lub ncuav thiab ob tug ntses xwb.” 39 Yexus thiaj kom sawv daws zaum ntawm cov nyom, ua tej pab tej pawg. 40 Lawv txawm zaum, tej pab muaj 100 leej, tej pab muaj 50 leej. 41 Yexus muab tsib lub ncuav thiab ob tug ntses los ces nws tsa muag ntsia saum ntuj ua Vajtswv tsaug. Nws muab cov ncuav ntais cev rau cov thwj tim coj mus faib rau sawv daws. Nws kuj muab ob tug ntses faib rau sawv daws thiab. 42 Lawv txhua tus noj tsau npo. 43 Cov thwj tim khaws cov ncuav uas noj tsis tas tau 12 tawb puv nkaus, tsis xam cov ntses. 44 Cov uas tau noj tej ncuav no, cov txiv neej xwb muaj 5,000 leej.

45 Yexus txawm hais kom nws cov thwj tim caij nkoj hla hiav txwv ua ntej mus rau sab tim ub. Lawv thiaj caij nkoj tshuv ntawm Npexedas mus rau sab tid. Tiam sis Yexus tseem nyob tom qab, tso cov neeg coob coob ntawd mus tsev. 46 Tom qab nws tso lawv mus lawd, nws mus thov Vajtswv rau saum roob. 47 Thaum tsaus ntuj lawd, lub nkoj tseem ntab yuj yeev hauv plawv hiav txwv tiam sis Yexus nyob ib leeg saum roob. 48 Yexus pom lawv nquam nkoj nyuaj heev vim muaj cua ntsawj hlob heev tom hau nkoj tuaj. Thaum tsis tau kaj ntug,* Yexus txawm mus ko taw saum nplaim dej los rau ntawm lawv, zoo li nws yuav hla dhau plaws lawv mus. 49 Thaum lawv pom Yexus los saum nplaim dej los, lawv txawm qw zom zaws tias, “Dab tsi los txog tod!”* 50 Thaum lawv pom Yexus los li ntawd ua rau lawv ntshai kawg li. Tam sim ntawd nws txawm hais rau lawv tias, “Txhob ntshai! Yog kuv xwb.” 51 Yexus nce mus rau hauv lub nkoj ces cua txawm tu nrho. Tej no ua rau lawv xav tsis thoob li. 52 Tsim nyog lawv paub tej no vim lawv twb pom Yexus muab ncuav faib rau sawv daws noj los lawv tseem tsis nkag siab Yexus lub hwj chim thiab.

53 Thaum lawv caij nkoj hla mus txog tim Kenexales, lawv txawm nres nkoj ze ntawd. 54 Thaum lawv tawm plaws hauv nkoj los xwb, cov tib neeg twb zeem tau Yexus lawm. 55 Lawv thiaj mus qhia thoob plaws cheeb tsam ntawd ces tib neeg txawm muab cov neeg muaj mob kwv saum txaj* tuaj cuag Yexus. 56 Txawm Yexus mus rau hauv tej zej zog, tej nroog, los sis tej ntug zos twg los, cov tib neeg coj cov uas muaj mob tuaj tso tom tej kiab tej khw. Lawv quaj thov kom Yexus cia lawv kov nws lub tw tsho xwb mas txhua tus uas tau kov puav leej zoo tib si.

7 Cov Falixais thiab cov xib hwb* uas tuaj nram Yeluxalees tuaj txawm los rau ntawm Yexus. 2 Lawv pom Yexus cov thwj tim ib txhia tes tsis huv es cia li noj mov. Qhov no yog lawv tsis ntxuav tes raws kev cai. 3 (Cov Falixais thiab cov Yudais yeej tuav rawv lawv cov yawg koob tej kev cai. Ua ntej noj mov, lawv yuav tsum ntxuav tes txij ntawm luj tshib los mas thiaj huv. 4 Thaum lawv mus kav kiab kav khw los, lawv yuav tsum ua kev cai ntxuav tso mam noj mov. Tseem muaj ntau txoj kev cai uas lawv tau kawm thiab coj nruj heev, xws li muab tej khob, tej tais, tej lauj kaub toog raus dej ua kev cai ntxuav huv si.) 5 Cov Falixais thiab cov xib hwb thiaj nug Yexus tias, “Ua cas koj cov thwj tim ho hla peb yawg koob tej kev cai, tes tsis huv los cia li noj mov?” 6 Yexus teb lawv tias, “Cov niag neeg siab nkhaus,* yeej tsim nyog rau Yaxayas hais txog nej lawm tias, ‘Cov neeg no hwm kuv ntawm lub ncauj xwb, tiam sis lawv lub siab tsis npuab kuv kiag li. 7 Qhov uas lawv pe hawm kuv tsis muaj qab hau, rau qhov lawv muab neeg tej kev cai los qhia ib yam li yog kuv tej.’ 8 Nej hla Vajtswv tej kev cai, tiam sis nej ho tuav rawv neeg tej.”

9 Yexus hais ntxiv rau lawv tias, “Nej muaj tswv yim diam, nej muab Vajtswv tej lus sam hwm ntxeev kom nej tau coj nej tej kev cai xwb. 10 Mauxes twb qhia lawm tias, ‘Hwm koj niam koj txiv,’ thiab, ‘Cia li muab tus uas foom nws niam nws txiv tua pov tseg.’ 11 Tiam sis nej ho qhia dua ib zaj tias, ‘Yog ib tug yawg twb muab nws tej qhov txhia chaw pub rau Vajtswv lawm, tsis tas nws muab tej ntawd los pab nws niam nws txiv.’ 12 Yog nej qhia li no ces twb yog nej txwv tsis pub tus ntawd pab nws niam nws txiv ib yam dab tsi li. 13 Tej kev cai uas nej qhia ib tiam dhau ib tiam li no, ua saib tsis taus Vajtswv tej kev cai lawm. Nej ua ntau yam zoo li no.” 14 Ces Yexus txawm hu cov neeg coob coob rov los rau ntawm nws thiab hais tias, “Nej sawv daws ua tib zoo mloog kuv hais, nej thiaj txais raug lub ntsiab. 15 Tsis yog yam uas nkag hauv neeg lub qhov ncauj mus ua rau neeg qias tsis huv, tiam sis yog yam uas tawm hauv neeg lub qhov ncauj los thiaj ua rau neeg qias tsis huv xwb.” 16 *——

17 Thaum Yexus mus deb zog ntawm cov neeg coob coob thiab mus rau hauv ib lub tsev lawm, nws cov thwj tim txawm los nug kom nws txhais cov lus piv txwv ntawd. 18 Nws thiaj hais rau lawv tias, “Nej txais tsis raug lub ntsiab ib yam li lawv thiab lod? Nej tsis paub tias yam uas nkag rau neeg lub qhov ncauj ua tsis tau kom neeg qias tsis huv lod? 19 Yam uas poob rau hauv lub plab tsis zoo li yam uas poob rau hauv lub siab. Tej uas poob rau hauv lub plab tsuas tawm mus lawm xwb.” Yog li, Yexus tus nru lus qhia tias txhua yam zaub mov yeej huv tib si. 20 Yexus hais ntxiv tias, “Yam uas tawm hauv neeg lub qhov ncauj los thiaj ua rau neeg qias tsis huv. 21 Rau qhov yam uas tawm hauv neeg lub siab los yog kev xav phem, kev nkauj kev nraug,* kev tub sab tub nyiag, kev tua neeg, 22 kev deev luag poj luag txiv,* kev siab hlob, kev lim hiam, kev dag ntxias, kev ua vuab tsuab tsis paub txaj muag li, kev khib xeeb, hais lus tuam mom Vajtswv, kev khav theeb, thiab lub siab ruam. 23 Tag nrho tej kev phem no tawm hauv neeg lub siab los thiab ua rau neeg tsis huv.”

24 Yexus txawm sawv kev mus rau pem cheeb tsam Thailab thiab Xaidoos. Nws nkag mus rau hauv ib lub tsev kom txhob muaj neeg paub, tiam sis nws nraim tsis tau li. 25 Txawm muaj ib tug poj niam uas nws tus me ntxhais raug dab hnov txog Yexus. Tam sim ntawd, nws tuaj khwb nkaus ntawm Yexus ko taw. 26 Tus poj niam ntawd yog neeg Kilis. Nws yug hauv Finixias nyob xeev Xilias. Nws pheej thov Yexus kom ntiab tus dab hauv nws tus me ntxhais tawm mus. 27 Tiam sis Yexus hais rau tus poj niam tias, “Cia cov me nyuam noj mov kom tsau tso. Tsis tsim nyog muab me nyuam tej mov pov rau me nyuam aub noj.” 28 Tus poj niam thiaj teb Yexus tias, “Yawg hlob, yog li koj hais los mas, tiam sis tej me nyuam aub hauv qab rooj los tseem tau noj tej mov uas me nyuam ua txeej thiab.” 29 Yexus txawm hais rau nws tias, “Vim koj cov lus ko, tus dab twb tawm hauv koj tus me ntxhais mus lawm. Cia li mus tsev.” 30 Ces tus poj niam rov loo mus tsev pom nws tus me nyuam pw saum txaj. Tus dab twb tawm mus lawm tiag.

31 Thaum Yexus tawm hauv Thailab mus, nws hla Xaidoos, mam nqes los rau Dekapaulis* hla mus rau nram Hiav Txwv Kalilais. 32 Lub sij hawm ntawd,* lawv coj ib tug yawg lag ntseg uas hais lus txhav txhav tuaj cuag Yexus. Lawv thov kom Yexus tsa tes npuab nws kom nws zoo. 33 Yexus thiaj coj tus yawg ntawd ib leeg mus rau lwm qhov kom nrug deb cov neeg coob coob. Yexus muab ntiv tes ntsaws tus yawg ntawd ob lub qhov ntsej thiab nto qaub ncaug tas ces kov nws tus nplaig. 34 Yexus txawm tsa muag ntsia saum ntuj, xyu ib suab thiab hais rau tus yawg ntawd tias, “Efathas.” Lo lus ntawd txhais tias, “Cia li qhib plho.” 35 Tam sim ntawd nws ob lub qhov ntsej cia li qhib plho, thiab nws txawm hais lus tsis txhav lawm. 36 Yexus txwv kom lawv txhob qhia tej no rau leej twg li. Tiam sis nws yim huab txwv, lawv yim huab qhia xwb. 37 Cov tib neeg xav tsis thoob li, lawv thiaj qhuas tias, “Nws ua tau txhua yam zoo huv si. Txawm cov lag ntseg thiab cov hais tsis tau lus los nws kho zoo tib si.”

8 Lub sij hawm ntawd, rov muaj ib pab neeg coob coob caum Yexus. Lawv tsis muaj dab tsi noj li, Yexus thiaj hu nws cov thwj tim los thiab hais rau lawv tias, 2 “Kuv hlub cov neeg no heev, rau qhov lawv twb nrog kuv tau peb hnub lawm, tsis tau noj dab tsi li. 3 Yog kuv cia li tso lawv mus tsev es tsis tau noj dab tsi ces lawv yuav mus qaug tshaib tom tej kev, rau qhov lawv ib txhia nyob deb heev tuaj.” 4 Tiam sis nws cov thwj tim teb tias, “Peb nyob deb zej zog heev, yuav mus nrhiav ncuav qhov twg thiaj txaus cov neeg no noj?” 5 Yexus thiaj nug lawv tias, “Nej muaj pes tsawg lub ncuav?” Lawv teb tias, “Xya lub.” 6 Ces Yexus kom cov tib neeg los zaum hauv pem teb. Nws muab xya lub ncuav los ua Vajtswv tsaug. Nws mam li muab ntais cev rau nws cov thwj tim coj mus faib rau sawv daws noj ces cov thwj tim txawm ua li ntawd. 7 Lawv kuj muaj ob peb tug ntses me me. Yexus thiaj muab cov ntses ntawd los ua Vajtswv tsaug thiab kom cov thwj tim coj mus faib rau sawv daws noj. 8 Cov tib neeg puav leej noj tsau tib si. Cov uas seem, lawv khaws tau xya maum tawb puv nkaus. 9 Cov uas tau noj hnub ntawd, cov txiv neej xwb muaj 4,000 leej. Ces Yexus mam tso lawv mus.

10 Tam sim ntawd, Yexus txawm nce nkoj nrog nws cov thwj tim mus rau cheeb tsam Damanuthas. 11 Cov Falixais txawm tuaj rau ntawm Yexus thiab nrog nws sib cav. Lawv sim Yexus, lawv thiaj kom nws tuav Vajtswv lub npe ua txuj ci rau lawv saib. 12 Yexus ntxhov siab kawg li, nws thiaj xyu ib suab thiab hais tias, “Ua cas tiam neeg no xav pom txuj ci ua luaj? Kuv hais ncaj qha rau nej tias tiam neeg no yuav tsis pom ib yam txuj ci kiag li.” 13 Tom qab ntawd, nws txawm ncaim lawv mus. Nws rov nce nkoj hla hiav txwv mus rau sab tim ub.

14 Tiam sis lawv tsis nco qab ntim ncuav mus lawm. Lawv tsuas nqa tau tib lub ncuav hauv nkoj xwb. 15 Yexus hais meej rau lawv tias, “Ceev faj cov Falixais tej keeb thiab Helauj tej keeb nawb.” 16 Lawv thiaj sib cav txog qhov uas lawv tsis nco qab ntim ncuav mus. 17 Yexus hnov lawv sib cav nws thiaj nug lawv tias, “Nej pheej sib cav txog ncuav ua dab tsi? Nej tseem txais tsis raug lub ntsiab thiab lod? Ua cas nej lub siab yuav tsis nthuav li? 18 ‘Nej twb muaj qhov muag, nej tsis pom lod? Nej twb muaj pob ntseg, nej tsis hnov lod?’ Nej tsis nco qab 19 thaum kuv muab tsib lub ncuav ntais faib rau 5,000 tus txiv neej noj lod? Thaum ntawd peb khaws tau cov seem tau pes tsawg tawb?” Lawv teb tias, “Tau 12 tawb.” 20 “Ua li thaum kuv muab xya lub ncuav ntais rau 4,000 tus txiv neej noj, nej khaws cov seem tau pes tsawg maum tawb?” Lawv teb tias, “Tau xya tawb.” 21 Ces Yexus mam nug lawv tias, “Nej tseem tsis to taub kuv hais thiab lod?”

22 Lawv txawm los txog hauv Npexedas. Muaj neeg coj ib tug yawg dig muag tuaj cuag Yexus, thiab lawv thov Yexus pab kho nws. 23 Yexus thiaj tuav tus yawg dig muag tes coj nws mus rau tom ntug zos. Yexus nto qaub ncaug pleev tus yawg ntawd ob lub qhov muag ces txawm tsa tes npuab nws thiab nug tias, “Koj pom dab tsi xwb?” 24 Tus yawg ntawd tsa muag ntsia thiab hais tias, “Kuv pom tib neeg zoo li tej ntoo mus mus los los xwb.” 25 Yexus rov tsa tes npuab tus yawg ntawd ob lub qhov muag ces nws txawm zoo hlo thiab pom txhua yam tseeb lawm. 26 Yexus kom nws rov mus tsev thiab hais tias, “Txhob rov mus tom lub zos tod.”

27 Yexus thiab nws cov thwj tim txawm sawv kev mus rau tej zej zog hauv Xixalias Filipis. Thaum lawv tab tom taug kev mus, nws nug nws cov thwj tim tias, “Luag tej hais tias kuv yog leej twg?” 28 Lawv teb tias, “Luag tej hais tias koj yog Yauhas tus muab neeg ua kev cai raus dej. Lwm cov hais tias koj yog Eliyas, tseem muaj dua ib co hais tias koj yog ib tug cev Vajtswv lus.” 29 Ces Yexus txawm nug lawv tias, “Nej ne, nej ho hais tias kuv yog leej twg?” Petus teb ntua tias, “Koj yog tus Khetos.” 30 Ces Yexus txawm txwv kiag tsis pub lawv qhia tias nws yog leej twg. 31 Tsis tas li ntawd xwb, Yexus txawm pib qhia lawv txog tej kev txom nyem uas neeg Leej Tub yuav tsum raug. Nws qhia tias cov txwj laus, cov pov thawj hlob, thiab cov xib hwb* yuav tsis kam lees nws. Luag yuav muab nws tua pov tseg, mas peb hnub xwb nws yuav sawv rov los. 32 Yexus qhia tseeb tseeb li no rau lawv tsis zais li. Petus thiaj coj Yexus mus rau ib cag thiab cheem nws. 33 Tam sim ntawd, Yexus txawm tig los ntsia nws cov thwj tim thiab ntuas Petus tias, “Xatas, khiav mus!* Koj xav li neeg xav xwb tsis xav li Vajtswv xav.”

34 Tom qab ntawd Yexus hu pab neeg coob coob los rau ntawm nws thiab nws cov thwj tim. Nws hais rau lawv tias, “Yog leej twg xav nrog kuv mus, tus ntawd yuav tsum tsis txhob ua raws li nws lub siab nyiam thiab nws yuav tsum kwv nws tus ncej ntoo* raws kuv qab. 35 Tus uas khuv xim nws txoj sia yuav tsis tau txoj sia, tiam sis tus uas yeem tuag rau kuv thiab rau txoj xov zoo, tus ntawd yuav rov tau txoj sia. 36 Yog leej twg tau txhua yam hauv lub qab ntuj no tiam sis nws tsis tau txoj sia ho muaj qab hau dab tsi? 37 Ua li, neeg yuav muab dab tsi los pauv tau nws txoj sia? 38 Tiam neeg no muaj txim thiab tsis muab siab npuab Vajtswv. Yog leej twg tseem txaj muag lees kuv thiab kuv tej lus tab meeg tiam no ces thaum Leej Txiv pub hwj chim rau neeg Leej Tub nrog cov tub txib saum ntuj los ces neeg Leej Tub kuj yuav txaj muag lees tus ntawd thiab.”

9 Yexus hais ntxiv rau lawv tias, “Kuv hais ncaj qha rau nej tias qee tus ntawm no yuav pom Vajtswv lub Nceeg Vaj* lub hwj chim los kav ua ntej lawv lub neej dua mus.” 2 Tau rau hnub tom qab ntawd, Yexus coj Petus, Yakaunpaus, thiab Yauhas lawv nrog nws mus rau saum ib lub roob siab siab. Thaum ntawd lawv pom Yexus lub cev hloov hlo. 3 Nws cev tsoos cia li dawb paug ci ntsa iab. Tsis muaj ib ce tsoos uas yuav ntxhua tau dawb npaum li ntawd. 4 Lawv kuj pom Eliyas thiab Mauxes nkawd tshwm ntawd nrog Yexus tham thiab. 5 Petus txawm hais rau Yexus tias, “Xib Hwb,* zoo siab kawg li uas peb tuaj rau ntawm no. Cia peb tsa peb lub tsev pheeb suab rau nej, ib lub rau koj, ib lub rau Mauxes, ib lub rau Eliyas.” 6 Petus tsis pom qab hais li cas, vim lawv ntshai heev. 7 Txawm muaj ib tauv huab los roos nkaus lawv ces muaj ib lub suab hais hauv cov huab tuaj tias, “Tus no yog kuv tus Tub. Kuv hlub nws heev. Cia li mloog nws lus.” 8 Tam sim ntawd ua ciav tsis pom leej twg li. Lawv saib puag ncig tsuas pom Yexus nrog lawv xwb.

9 Thaum lawv tab tom nqes saum roob los, Yexus txwv kom lawv tsis txhob qhia tej uas lawv pom ntawd rau leej twg kiag li, tos thaum neeg Leej Tub sawv hauv qhov tuag rov los tso. 10 Lawv khaws Yexus tej lus cia rau nruab siab tiam sis lawv tham zom zaws tias qhov uas sawv hauv qhov tuag rov los yog li cas tiag. 11 Ces lawv txawm nug Yexus tias, “Ua cas cov xib hwb* ho qhia tias Eliyas yuav tsum xub los ua ntej?” 12 Yexus teb tias, “Eliyas yuav tsum los ua ntej thiab npaj txhua yam kom tiav. Tiam sis ua cas ho muaj lus sau cia tias neeg Leej Tub yuav tsum raug ntau yam kev txom nyem thiab luag yuav ua saib tsis taus nws? 13 Tiam sis kuv qhia nej tias Eliyas twb los lawm, thiab tib neeg ua phem rau nws ywj siab, raws nkaus li Vajtswv Txoj Lus sau tseg.”

14 Thaum Yexus lawv rov los txog, lawv pom ib pab neeg coob coob vij vog cov thwj tim. Cov xib hwb tab tom nrog lawv sib cam. 15 Tiam sis thaum pab neeg ntawd pom dheev Yexus, lawv xav tsis thoob li. Lawv dhia tiaj lias mus tos nws. 16 Yexus nug cov tib neeg tias, “Nej sib cam txog dab tsi?” 17 Pab neeg coob coob ntawd ib tug thiaj teb ntua tias, “Xib Hwb, kuv coj kuv tus tub tuaj cuag koj rau qhov nws raug ib tug dab* ua rau nws hais tsis tau lus li lawm. 18 Thaum tus dab ntawd tswj nws, ua rau nws ntog kiag rau hauv av, ua npuas ncauj nto plaws, zom hniav qij qawj, thiab ib ce txhav tas. Kuv thov koj cov thwj tim ntiab tus dab no tawm tiam sis lawv ntiab tsis tau.” 19 Yexus teb nws tias, “Ua cas tiam neeg no yuav tsis muaj kev ntseeg li. Kuv yuav nrog nej nyob mus txog tav twg? Kuv yuav ua siab ntev rau nej mus txog thaum twg? Cia li coj nws los rau kuv.” 20 Lawv thiaj coj tus tub ntawd los rau Yexus. Thaum pom dheev Yexus, tus dab txawm ua rau tus tub huam ib tshaj ntog kiag. Nws da luam hauv av, npuas ncauj nto plaws. 21 Yexus thiaj nug leej txiv tias, “Nws ua li no tau hov ntev lawm?” Leej txiv teb tias, “Txij thaum yau los. 22 Muaj ntau zaus tus dab no ua rau nws vau hauv qhov cub thiab vau hauv dej kom nws tuag. Yog koj pab tau, thov koj hlub peb es pab kho nws.” 23 Yexus teb nws tias, “Yog pab tau no lod? Tus uas ntseeg yeej ua tau txhua yam.” 24 Tam sim ntawd leej txiv quaj dhev tias, “Kuv yeej ntseeg! Thov pab kom kuv muaj kev ntseeg ntxiv!”

25 Tam sim ntawd Yexus pom ib pab neeg coob coob dhia los rau ntawm lawv. Yexus thiaj hais tawv tawv rau niag dab* ntawd tias, “Niag dab* phem, koj ua rau tus me tub no hais tsis tau lus thiab tsis hnov lus. Cia li tawm plaws hauv nws mus, tsis yoom nkag rov los rau hauv nws lawm!” 26 Tus dab ua rau tus tub quaj qw nrov nrov, huam ib tshaj ib tshaj ces mam li tawm plaws mus. Tom qab ntawd tus tub pw twj ywm zoo li tsis muaj sia lawm, coob tus thiaj hais tias, “Nws tuag lawm!” 27 Tiam sis Yexus tuav nkaus nws tes tsa nws sawv ces nws txawm sawv tsees. 28 Tom qab ntawd Yexus mus rau hauv ib lub tsev ces nws cov thwj tim los nug nws twj ywm tias, “Ua cas peb ho ntiab tsis tau tus dab no?” 29 Yexus hais rau lawv tias, “Hom dab no mas yuav tsum thov Vajtswv thiaj ntiab tau xwb.”

30 Lawv thiaj tawm qhov chaw ntawd thiab sawv kev mus rau hauv Kalilais, tiam sis Yexus tsis xav kom leej twg paub tias lawv mus rau qhov twg lawm. 31 Twb yog Yexus xav qhia nws cov thwj tim tias, “Luag yuav ntxeev siab rau neeg Leej Tub thiab yuav muab nws cob rau nws cov yeeb ncuab txhais tes, thiab lawv yuav muab nws tua pov tseg. Txawm nws tuag lawm los tom qab peb hnub nws yuav sawv rov los.” 32 Cov thwj tim tsis nkag siab tej uas nws hais los lawv tsis muaj cuab kav nug ib los li.

33 Thaum lawv los txog Khapena-us thiab los nyob hauv tsev lawm, Yexus nug cov thwj tim tias, “Thaum peb los txog tom kev, nej sib cav txog dab tsi?” 34 Tiam sis tsis muaj ib tug teb li, rau qhov lawv sib cav tias leej twg yog tus loj dua. 35 Yexus txawm zaum thiab hu 12 tug tub txib los. Nws hais rau lawv tias, “Yog leej twg xav ua tus thawj, tus ntawd yuav tsum tuaj tom tw thiab ua sawv daws tus tub txib.” 36 Ces Yexus txawm coj ib tug me nyuam los sawv ntawm lawv xub ntiag. Nws puag tus me nyuam ntawd thiab hais rau lawv tias, 37 “Tus uas tos txais ib tug me nyuam zoo li no vim yog hwm kuv lub npe kuj yog nws tos txais kuv. Thiab tus uas tos txais kuv, tsis yog tos txais kuv xwb tiam sis kuj yog nws tos txais tus uas txib kuv los thiab.”

38 Yauhas txawm hais rau Yexus tias, “Xib Hwb, peb pom ib tug yawg tuav koj lub npe ntiab dab, tiam sis peb cheem nws rau qhov nws twb tsis yog peb pab.” 39 Tiam sis Yexus hais tias, “Txhob cheem nws. Tsis muaj leej twg tuav kuv lub npe ua txuj ci es yuav tig rov los thuam kuv. 40 Tus uas tsis thuam peb yeej tuaj peb tog. 41 Thiab yog leej twg muab ib khob dej rau nej haus vim nej yog Khetos ib tug thwj tim ces kuv hais ncaj qha rau nej tias, nws yeej yuav tau nqi zog. 42 Tiam sis yog leej twg ua rau ib tug nyuag thwj tim no tso kev ntseeg tseg ces muab ib txhib zeb khi nws caj dab nrom rau hauv hiav txwv zoo dua.

43 “Yog koj txhais tes ua rau koj ua txhaum ces cia li muab txiav pov tseg. Koj tshuav ib txhais tes tiam sis tau txoj sia zoo dua koj muaj ob txhais tes es raug puas tsuaj* hauv cov nplaim taws cig tsis txawj tuag. 44 *—— 45 Yog koj txhais taw ua rau koj ua txhaum, cia li muab txiav pov tseg. Koj tshuav ib txhais taw tiam sis tau txoj sia zoo dua koj muaj ob txhais taw es raug puas tsuaj.* 46 *—— 47 Yog koj lub qhov muag ua rau koj ua txhaum, cia li muab kaus pov tseg. Koj tshuav ib sab qhov muag es tau mus rau hauv Vajtswv lub Nceeg Vaj* zoo dua li koj muaj ob lub qhov muag es raug puas tsuaj.* 48 Qhov chaw ntawd muaj tej kas uas tsis txawj tuag, thiab tej hluav taws uas cig tsis paub tuag.

49 “Vajtswv yuav tso hluav taws los rau neeg ib yam li neeg nphoo ntsev rau tej zaub tej mov. 50 Ntsev yeej zoo tiam sis yog ntsev tsuag lawd ces yuav ua li cas thiaj li rov qab? Nej yuav tsum zoo li cov ntsev uas qab, thiab nyob sib haum xeeb.”

10 Yexus txawm sawv kev qhov ntawd mus hla tus Dej Yaladees mus rau nram ciam teb Yudias lawm. Muaj neeg coob coob rov tuaj cuag Yexus ces nws txawm pib qhia lawv li nws niaj zaus qhia. 2 Cov Falixais txhob txwm tuaj thom Yexus. Lawv nug Yexus seb tus txiv puas muaj cai muab nws tus poj niam nrauj. 3 Yexus teb lawv tias, “Mauxes qhia kom nej coj li cas?” 4 Lawv teb tias, “Mauxes twb tso cai rau tus txiv ua ntawv nrauj nws tus poj niam.” 5 Yexus teb tias, “Twb yog nej tawv ncauj tsis muaj leej twg hais tau, nws thiaj tso cai rau nej ua li ntawd. 6 Tiam sis thaum chiv keeb, ‘Vajtswv tsim tus txiv neej thiab tus poj niam. 7 Vim li no tus txiv neej thiaj tso nws niam nws txiv tseg, 8 nkawd ob leeg yuav koom ua ib lub cev.’ Nkawd tsis yog ob leeg tiam sis yog ib leeg lawm xwb. 9 Vajtswv twb muab nkawd txis ua txij ua nkawm lawm, tsis pub leej twg muab nkawd cais.” 10 Thaum lawv rov mus hauv tsev, cov thwj tim txawm nug Yexus txog qhov no. 11 Nws teb tias, “Yog leej twg nrauj nws tus poj niam es mus yuav dua lwm tus kuj yog nws ua nkauj ua nraug* thiab ua txhaum rau nws tus poj niam lawm. 12 Tsis tas li ntawd xwb, yog ib tug poj niam nrauj nws tus txiv es mus yuav dua lwm tus ces twb yog nws ua nkauj ua nraug* lawm thiab.”

13 Tib neeg txawm coj lawv tej me nyuam tuaj cuag Yexus kom nws foom koob hmoov thiab plhws cov me nyuam ntawd, tiam sis cov thwj tim cem tsis pub lawv ua li ntawd. 14 Thaum Yexus pom lawv ua li no, nws tsis zoo siab. Nws thiaj hais rau cov thwj tim tias, “Txhob cheem lawv, tso cov me nyuam los rau kuv. Rau qhov cov uas muaj lub siab zoo li tej me nyuam yaus no thiaj tau Vajtswv lub Nceeg Vaj.* 15 Kuv hais ncaj qha rau nej tias, tus uas tsis kam lees yuav Vajtswv txoj kev kav* ib yam li ib tug me nyuam yaus yeej yuav mus tsis tau rau hauv lub Nceeg Vaj* ntawd.” 16 Yexus thiaj puag cov me nyuam ntawd rau hauv nws xub ntiag, plhws lawv, thiab foom koob hmoov rau lawv.

17 Thaum Yexus yuav sawv kev mus rau lwm qhov, ib tug txiv neej txawm dhia loo los txhos caug ntua ntawm nws xub ntiag thiab hais tias, “Tus Xib Hwb uas zoo’e, kuv yuav ua li cas kuv thiaj tau txoj sia mus ib txhis?” 18 Yexus teb nws tias, “Ua cas koj ho hais tias kuv zoo? Tsis muaj leej twg zoo, tsuas yog Vajtswv tib leeg thiaj zoo xwb. 19 Koj twb paub tej kev cai no lawm tias, ‘Txhob tua neeg, txhob deev luag poj luag txiv,* txhob ua tub sab, txhob ua cuav tim khawv, txhob ntxo luag tug, hwm koj niam koj txiv.’” 20 Tus txiv neej teb tias, “Xib Hwb, kuv yeej ib txwm coj tej kev cai no thaum yau los lawm.” 21 Yexus tsa muag ntsia nws mas Yexus hlub nws heev. Yexus thiaj hais rau nws tias, “Tshuav ib yam uas koj tsis tau ua. Cia li muab koj tej cuab txhiaj cuab tam muag es muab pub rau cov txom nyem, koj thiaj khaws tau yam uas muaj nqis rau saum ntuj ceeb tsheej ces los ua kuv ib tug thwj tim.” 22 Thaum tus txiv neej hnov li no, nws rov mus tsev nyuaj siab kawg li vim nws muaj ntau tsav ntau yam uas nws tsis xav tso tseg.

23 Yexus tsa muag ntsia sawv daws tas ces nws hais rau nws cov thwj tim tias, “Yeej tsis yooj yim rau cov neeg nplua nuj mus rau hauv Vajtswv lub Nceeg Vaj* li!” 24 Tiam sis cov thwj tim xav tsis thoob rau Yexus tej lus. Nws thiaj hais rau lawv tias, “Cov me nyuam’e, yeej tsis yooj yim mus rau hauv Vajtswv lub Nceeg Vaj* kiag li! 25 Ib tug nees us* nkag lub qhov koob tseem yooj yim dua ib tug neeg nplua nuj nkag rau hauv Vajtswv lub Nceeg Vaj.”* 26 Cov lus no ua rau lawv haj yam xav tsis thoob, lawv thiaj nug Yexus* tias, “Yog li ntawd leej twg thiaj yuav dim tau?” 27 Yexus ntsia ntsoov lawv thiab hais tias, “Neeg cawm tsis tau neeg dim, tiam sis Vajtswv cawm tau. Vajtswv ua tau txhua yam.” 28 Petus txawm hais rau Yexus tias, “Peb twb tso ib puas tsav yam tseg los raws koj xwb.” 29 Yexus thiaj hais tias, “Kuv hais ncaj qha rau nej li no, txhua tus uas tso niam tso txiv,* tso tub tso kiv, tso kwv tso tij, tso nkauj tso muam, tso vaj tso tsev, tso liaj tso teb tseg los ua kuv tus thwj tim, 30 tiam no yuav tau 100 npaug ntxiv, tsis hais niam txiv,* tub ki, kwv tij nkauj muam, vaj tse, liaj teb. Nws kuj yuav raug tsim txom. Thiab tiam* tom ntej nws yuav tau txoj sia ib txhis tsis kawg. 31 Tiam sis coob tus uas ua qab yuav tau ua ntej thiab coob tus uas ua ntej yuav tau ua qab.”

32 Thaum lawv taug txoj kev uas mus rau pem lub nroog Yeluxalees es pom Yexus mus ua lawv ntej mas cov thwj tim xav tsis thoob li, tiam sis ib txhia uas nrog lawv txawm pib ntshai. Yexus rov coj 12 tug tub txib mus rau ib cag thiab qhia lawv txog tej xwm uas tseem yuav los raug nws. 33 Yexus hais tias, “Ua tib zoo mloog nawb, peb yuav mus rau pem lub nroog Yeluxalees. Luag yuav muab neeg Leej Tub cob rau cov pov thawj hlob thiab cov xib hwb.* Lawv yuav muab lub txim tuag rau nws thiab muab nws cob rau lwm haiv neeg txhais tes. 34 Lwm haiv neeg yuav thuam luag nws, nto qaub ncaug rau nws, muab nws nplawm, thiab muab nws tua pov tseg. Tiam sis peb hnub xwb nws yuav ciaj sawv rov los.”

35 Xenpedis ob tug tub uas yog Yakaunpaus thiab Yauhas txawm los cuag Yexus thiab hais tias, “Xib Hwb, thov koj ua ib yam rau wb.” 36 Yexus nug nkawd tias, “Neb xav kom kuv ua dab tsi?” 37 Nkawd teb tias, “Thaum koj tau hwj chim lawm, thov cia wb zaum ntawm koj sab xis thiab sab laug.” 38 Tiam sis Yexus teb nkawd tias, “Yam uas neb thov neb yeej tsis paub txog. Neb haus puas taus lub khob uas kuv tab tom haus? Neb puas yuav tiv taus tej uas kuv tab tom raug?”* 39 Nkawd teb tias, “Haus tau kawg.” Yexus thiaj teb ntua tias, “Neb yeej yuav haus lub khob uas kuv tab tom haus, thiab neb yeej yuav raug tej uas kuv tab tom raug tiag.* 40 Tiam sis kuv tsis muaj cai xaiv seb tus twg yuav zaum ntawm kuv sab xis thiab sab laug. Tsuas yog Vajtswv thiaj muaj cai xaiv xwb.”

41 Thaum uas kaum tus thwj tim hnov tej uas nkawd hais ntawd, lawv txawm npau taws heev rau Yakaunpaus thiab Yauhas. 42 Yexus thiaj hu cov thwj tim los thiab hais tias, “Nej yeej paub tias lub qab ntuj* no tej vaj ntxwv tsuas kav ywj siab xwb. Thiab tej neeg muaj meej mom siab tsuas caij tsuj pej xeem xwb. 43 Tiam sis nej tsis txhob coj li ntawd. Yog nej leej twg xav ua tus loj, tus ntawd yuav tsum ua nej tus tub txib. 44 Thiab tus uas xav ua nej tus thawj, tus ntawd yuav tsum ua sawv daws tus qhev. 45 Txawm neeg Leej Tub los, nws tsis tau los kom leej twg tiam nws. Tiam sis nws los tiam sawv daws thiab muab nws txoj sia txhiv coob leej.”

46 Ces lawv los txog hauv Yelikaus. Thaum Yexus thiab nws cov thwj tim nrog ib pab neeg coob coob tawm hauv Yelikaus mus, muaj ib tug yawg dig muag thov khawv zaum ntawm ntug kev. Nws hu ua Npathimias (uas yog Thime-as tus tub). 47 Thaum nws hnov tias Yexus uas yog neeg Naxales tab tom dua kev mus, nws quaj qw nrov nrov tias, “Yexus, Daviv tus Xeeb Ntxwv’e, thov hlub* kuv lauj!” 48 Coob tus thiaj cem nws kom nyob twj ywm, tiam sis nws haj yam qw nrov tias, “Daviv tus Xeeb Ntxwv’e, thov hlub* kuv thiab lauj!” 49 Yexus nres kiag thiab hais tias, “Hu nws los ntawm no.” Lawv thiaj hais rau tus yawg dig muag tias, “Txhob ntshai! Sawv tsees, Yexus hu koj lawm.” 50 Nws sawv tsees muab nws lub tsho sab nraud ua ntia hauv pem teb thiab mus cuag Yexus. 51 Ces Yexus nug nws tias, “Koj xav kom kuv ua dab tsi?” Tus yawg dig muag teb tias, “Xib Hwb,* thov pab kom kuv rov pom kev.” 52 Yexus hais rau nws tias, “Cia li mus tsev, twb yog koj ntseeg koj thiaj zoo lawm.” Nws txawm pom kev tam sim ntawd thiab nrog lawv raws Yexus qab mus.

11 Thaum lawv mus yuav txog Yeluxalees ntawm lub Roob Txiv Aulib, ze lub zos Npefantsis thiab Npethanis, Yexus txawm hais rau ob tug thwj tim 2 tias, “Cia li mus rau lub zos tom neb hauv ntej. Thaum mus txog, neb yuav pom ib tug me nyuam nees luav khi cia uas tsis tau muaj neeg caij dua li. Neb muab daws cab los rau kuv. 3 Yog leej twg nug tias, ‘Neb coj mus ua dab tsi?’ neb cia li teb tias, ‘Tus Tswv yuav siv, ib pliag nws mam coj rov los.’” 4 Nkawd mus pom ib tug me nyuam nees luav khi ntawm qhov rooj ze ntawm ntug kev. Nkawd thiaj daws tus me nyuam nees luav. 5 Tiam sis cov neeg nyob ze ntawd nug tias, “Neb daws tus me nyuam nees luav mus ua dab tsi?” 6 Nkawd teb li Yexus tau qhia ces lawv thiaj cia nkawd cab mus lawm.

7 Nkawd thiaj cab tus me nyuam nees luav los rau Yexus. Lawv hle lawv tej tsho* pua tus me nyuam nees luav rau Yexus caij. 8 Tsis tas li ntawd, muaj coob tus hle lawv tej tsho* los pua kev, thiab muaj dua lwm cov txiav nplooj toov laj tom ntug kev los pua. 9 Cov uas ua nws ntej thiab lawv nws qab qw nrov nrov tias, “Thov tsom kwm* Daviv tus Xeeb Ntxwv! Tus uas sawv cev rau Vajtswv Yehauvas* lub npe yog tus tau koob hmoov nplua mias! 10 Thov foom koob hmoov rau peb yawg koob Daviv tus xeeb ntxwv uas yuav tau kav! Thov tus uas nyob saum ntuj tsom kwm Daviv tus xeeb ntxwv!” 11 Thaum Yexus mus txog hauv Yeluxalees, nws mus rau hauv lub tuam tsev. Tom qab nws saib txhua yam tas ces twb lig lawm. Nws thiaj nrog 12 tug tub txib mus rau Npethanis.

12 Hnub tom qab thaum lawv sawv kev hauv Npethanis mus, Yexus hnov plab tshaib. 13 Yexus pom ib tsob txiv cev nyob deb tsawv. Tsob ntoo muaj nplooj ntsuab xiab, Yexus thiaj mus saib seb puas muaj txiv, tiam sis tsuas pom nplooj xwb, rau qhov tsis tau txog caij txi. 14 Yexus thiaj hais rau tsob txiv ntoo tias, “Yuav tsis muaj leej twg tau noj koj cov txiv ib zaug li lawm.” Cov thwj tim hnov tej uas Yexus hais ntawd.

15 Thaum lawv mus txog Yeluxalees, Yexus mus rau hauv lub tuam tsev. Nws muab cov tub lag tub luam thiab cov neeg uas tuaj yuav khoom ntiab tawm tib si. Nws muab cov neeg pauv nyiaj tej rooj thiab cov neeg muag nquab tej rooj zaum ntxeev pes hlo tseg. 16 Yexus tsis pub leej twg nqa ib yam dab tsi hla lub tuam tsev mus li. 17 Nws txawm qhia cov tib neeg li no, “Vajtswv Txoj Lus twb hais tias, ‘Kuv lub tsev yuav yog lub tsev thov Vajtswv’ los sad? Tiam sis nej ho muab ua chaw rau tub sab nkaum.” 18 Cov pov thawj hlob thiab cov xib hwb* hnov xov txog tej no, lawv thiaj nrhiav kev los muab Yexus tua pov tseg. Tiam sis lawv ntshai nws rau qhov cov tib neeg qhuas tej uas Yexus qhia heev.

19 Thaum yuav tsaus ntuj, Yexus lawv mam li tawm hauv nroog mus. 20 Hnub tom qab sawv ntxov, lawv rov mus pom tsob txiv cev qhuav ti nkaus hauv paus lawm. 21 Petus nco dheev Yexus cov lus nws thiaj hais rau Yexus tias, “Xib Hwb,* koj sim saib! Tsob txiv cev uas koj foom twb qhuav tas lawm.” 22 Yexus teb tias, “Cia li muaj kev ntseeg rau Vajtswv. 23 Kuv hais ncaj qha rau nej tias, yog leej twg ntseeg tias yuav muaj raws li nws thov es txhob ua xyem xyav ces yog nws hais rau lub roob no tias, ‘Cia li tsaws hlo mus rau hauv dej hiav txwv,’ ces yeej yuav muaj raws li ntawd. 24 Kuv thiaj hais rau nej tias, txhua yam uas nej thov, nej yuav tsum ntseeg cuag li nej twb tau txais lawd mas nej yeej yuav tau xwb. 25 Tsis tas li ntawd, thaum nej sawv ntsug thov Vajtswv, nej yuav tsum zam txim rau txhua tus uas ua txhaum rau nej lawd mas nej Leej Txiv uas nyob saum ntuj thiaj yuav zam txim rau nej thiab.” 26 *——

27 Thaum Yexus lawv rov mus txog hauv Yeluxalees, lawv mus rau hauv lub tuam tsev ces cov pov thawj hlob, cov xib hwb, thiab cov txwj laus txawm los nug Yexus 28 tias, “Koj puas muaj cai ua li no? Thiab leej twg tso cai rau koj ua tej no?” 29 Yexus teb lawv tias, “Kuv yuav nug nej ib los thiab. Yog nej teb tau ces kuv mam li qhia rau nej tias leej twg tso cai rau kuv ua tej no. 30 Nej sim teb soj, leej twg tso cai rau Yauhas muab neeg ua kev cai raus dej? Yog Vajtswv los yog tib neeg?” 31 Lawv txawm sab laj tias, “Yog peb teb tias yog Vajtswv ces nws yuav nug peb tias vim li cas peb ho tsis ntseeg Yauhas. 32 Peb tsis kav teb tias yog tib neeg.” Lawv ntshai tsam pab neeg ntawd ho ua li cas rau lawv, vim cov tib neeg yeej ntseeg tias Yauhas yog ib tug uas cev Vajtswv lus. 33 Lawv thiaj teb Yexus tias, “Peb tsis paub.” Yexus hais rau lawv tias, “Ces kuv yuav tsis qhia nej tias leej twg tso cai rau kuv ua tej no thiab.”

12 Ces Yexus txawm ua lus piv txwv qhia lawv tias, “Muaj ib tug yawg cog tau ib daim teb txiv hmab. Nws xov laj kab puag ncig thiab khawb tau ib lub qhov tsuam txiv hmab. Nws kuj ua tau ib lub tsev tsom faj zov daim teb ntawd thiab. Nws cia ib co neeg tu* daim teb ntawd ces nws tawm mus ncig teb ncig chaw lawm. 2 Thaum txog caij sau txiv hmab, nws txib nws tus tub qhe mus sau nws feem txiv hmab ntawm cov neeg uas tu daim teb. 3 Tiam sis lawv cia li muab tus tub qhe ntawd ntes coj mus ntaus thiab tso mus tes dawb tes npliag. 4 Nws rov txib dua ib tug tub qhe mus, tiam sis lawv cia li muab tus ntawd ntaus taub hau to tas thiab ua saib tsis taus nws li. 5 Nws ho txib dua lwm tus mus, tiam sis lawv txawm muab tus ntawd tua pov tseg. Nws txib ib tug tas ib tug tuaj, tej tug lawv muab ntaus, tej tug lawv muab tua pov tseg lawm. 6 Zaum no tsuas tshuav nws tus tub lawm xwb. Nws xav tias, ‘Lawv yeej yuav hwm kuv tus tub.’ Nws thiaj txib nws tus tub uas nws hlub kawg li mus. 7 Tiam sis cov neeg tu daim teb txawm sib ntxhi tias, ‘Tus no yog tus uas yuav tau daim teb los ua qub txeeg qub teg ntag. Peb cia li muab nws tua kiag pov tseg, peb thiaj tau nws daim teb los ua peb tug.’ 8 Lawv thiaj ntes kiag tus tub coj mus tua thiab muab nws lub cev pov rhees sab nraum daim teb txiv hmab. 9 Tus tswv teb yuav ua li cas xwb? Nws yeej yuav muab cov neeg tu daim teb txiv hmab ntawd tua pov tseg thiab muab daim teb rau lwm tus tu. 10 Nej tsis tau nyeem lod? Vajtswv Txoj Lus twb hais tias, ‘Lub pob zeb uas cov kws ua tsev muab xyeeb tseg, twb muab teeb rau saum kaum tsev uas siab tshaj* lawm. 11 Lub pob zeb ntawd los ntawm Vajtswv Yehauvas* los, thiab lub pob zeb ntawd yog lub tseem ceeb tshaj plaws.’”

12 Cov pov thawj hlob, cov xib hwb,* thiab cov txwj laus paub tias Yexus hais txog lawv ntag. Lawv xav muab nws ntes kiag tam sim ntawd tiam sis lawv ntshai cov tib neeg. Lawv thiaj mus rau lwm qhov lawm.

13 Tom qab ntawd cov Falixais thiab Helauj cov neeg* txawm mus thom Yexus kom nws teb yuam kev. 14 Thaum lawv mus txog, lawv nug Yexus tias, “Xib Hwb, peb paub tias koj nyiam ua qhov ncaj thiab koj tsis tuaj leej twg tog li rau qhov koj tsis xaiv leej twg ntsej muag. Koj qhia qhov tseeb txog Vajtswv xwb. Ua li, puas tsim nyog peb them se rau Xixas los tsis tsim nyog? 15 Koj xav peb yuav them los tsis them?” Yexus paub tias lawv ua txuj nug xwb nws thiaj teb tias, “Ua cas nej lam thom kuv? Muab ib lub nyiaj denalias* los rau kuv.” 16 Lawv thiaj muab rau nws ces nws nug lawv tias, “Lub ntsej muag thiab lub npe txaug rau lub nyiaj no yog leej twg li?” Lawv teb tias, “Xixas li.” 17 Yexus thiaj hais tias, “Ces them Xixas li rau Xixas, them Vajtswv li rau Vajtswv.” Yexus tej lus ua rau lawv xav tsis thoob li.

18 Cov Xadukais tsis ntseeg tias cov tuag sawv tau rov los. Lawv thiaj los nug Yexus tias, 19 “Xib Hwb, Mauxes sau tseg tias yog leej twg ib tug kwv tij tuag lawd es tsis tau muaj tub ces nws yuav tsum tuav tus poj ntsuam kom tus tuag thiaj muaj xeeb ntxwv cia. 20 Thaud muaj xya leej kwv tij. Tus tij laug yuav poj niam tsis tau muaj me nyuam ces txawm tuag lawm. 21 Lawv thiaj muab tus niam tij txis rau tus kwv tiam sis tus kwv kuj tuag lawm thiab, tsis tau muaj ib tug me nyuam li. Tau muaj li no rau tus kwv ob thiab. 22 Lawv xya kwv tij puav leej tuag tas tsis muaj ib tug me nyuam li. Thaum kawg tus poj niam kuj tuag lawm thiab. 23 Lawv xya kwv tij tau yuav tus poj niam ntawd lawm. Ua li, thaum lawv ciaj sawv rov los, tus poj niam ntawd yuav yog leej twg tus?” 24 Yexus teb tias, “Tos nej xav yuam kev li ko los twb yog vim nej tsis paub Vajtswv Txoj Lus thiab nws lub hwj chim. 25 Thaum Vajtswv tsa cov tuag ciaj sawv rov los, tib neeg tsis sib yuav ua txij ua nkawm lawm. Lawv yuav nyob li cov tub txib saum ntuj xwb. 26 Hais txog cov tuag ciaj sawv rov los, nej tsis tau nyeem lod? Hauv zaj uas Mauxes sau txog tsob ntoo pos, Vajtswv hais rau nws tias, ‘Kuv yog Anplahas tus Vajtswv, yog Ixaj tus Vajtswv, thiab yog Yakhauj tus Vajtswv.’ 27 Yog li, nws yog cov neeg ciaj tus Vajtswv tsis yog cov neeg tuag tus Vajtswv. Nej xav yuam kev deb heev lawm lauj.”

28 Cov xib hwb* uas tuaj ntawd ib tug hnov Yexus nrog lawv sib hais. Nws pom tias Yexus txawj teb heev. Nws thiaj nug Yexus tias, “Xib Hwb, txoj kev cai twg tseem ceeb dua ntais?” 29 Yexus teb tias, “Thawj nqe yog li no, ‘Ib tsoom neeg Ixayees’e cia li mloog, peb tus Vajtswv Yehauvas* tsuas yog tib tug Yehauvas* xwb. 30 Koj yuav tsum hlub Yehauvas* uas yog koj tus Vajtswv kawg siab kawg ntsws, kawg koj txoj sia,* kawg laj lim tswv yim.’ 31 Nqe ob yog li no, ‘Hlub kwv tij zej zog ib yam li koj hlub koj tus kheej.’ Tsis muaj dua lwm nqe tseem ceeb tshaj ob nqes no lawm.” 32 Tus xib hwb ntawd thiaj hais rau Yexus tias, “Zoo heev Xib Hwb, koj teb yog kawg, ‘Tsuas muaj Nws tib leeg xwb, tsis muaj dua lwm tus vajtswv li lawm.’ 33 Yeej tsim nyog peb hlub Vajtswv kawg peb lub siab lub ntsws, kawg peb lub dag lub zog, thiab kawg peb lub laj lim tswv yim tiag. Thiab peb yuav tsum hlub kwv tij zej zog ib yam li peb hlub peb tus kheej. Tej no yeej muaj nqis tshaj tej tsiaj uas tua hlawv kheej fij rau Vajtswv tib si.” 34 Thaum nws teb li no, Yexus pom tias nws teb tau zoo. Yexus thiaj hais rau nws tias, “Koj twb ze qhov uas yuav tau Vajtswv lub Nceeg Vaj* lawm.” Ces tsis muaj leej twg kav nug Yexus ntxiv lawm.

35 Thaum Yexus tab tom qhia hauv lub tuam tsev, nws nug tias, “Ua cas cov xib hwb ho qhia tias tus Khetos yog Daviv xeeb ntxwv? 36 Lub hwj huam dawb huv twb tshoov kom Daviv hais li no, ‘Vajtswv Yehauvas* hais rau kuv tus Tswv tias, “Los zaum ntawm kuv sab xis mus txog thaum kuv muab koj tej yeeb ncuab rau koj tsuj.”’ 37 Daviv twb muab tus Khetos hu ua nws tus Tswv, yuav ua li cas hais tau tias Khetos yog Daviv tus xeeb ntxwv?”

Cov neeg coob coob ntawd nyiam mloog Yexus qhia heev. 38 Ces Yexus qhia ntxiv tias, “Ceev faj cov xib hwb uas hnav tsho tsuj tseeb ncig yuj yeev thiab xav kom tib neeg hawm lawv tom tej tshav puam. 39 Hauv tej tsev pe hawm los lawv nyiam zaum tom hauv ntej* xwb, thiab muaj noj muaj haus los lawv nyiam zaum tej rooj siab. 40 Lawv txeeb cov poj ntsuam tej vaj tse, thiab lawv ua txuj thov Vajtswv ntev ntev tab meeg sawv daws. Cov no yuav raug txim hnyav dua lwm tus.”

41 Yexus zaum ncaj ntawm cov thawv tso nyiaj. Nws ntsia cov tib neeg coob coob ntawd tso nyiaj rau hauv tej thawv. Nws pom coob tus neeg nplua nuj tso nyiaj ntau heev. 42 Muaj ib tug poj ntsuam txom nyem heev txawm los tso ob lub nyuag txiaj toog xwb.* 43 Yexus hu nws cov thwj tim los thiab hais rau lawv tias, “Kuv hais ncaj qha rau nej tias tus poj ntsuam uas txom nyem ntawd tseem tso ntau tshaj cov uas tso nyiaj rau hauv tej thawv no tib si. 44 Rau qhov lawv tso tej nyiaj seem xwb, tiam sis tus poj ntsuam ntawd khee hlo tej uas nws muaj tib si tuaj tso.”

13 Thaum Yexus tawm hauv lub tuam tsev mus, nws ib tug thwj tim hais rau nws tias, “Xib Hwb, koj saib luag muab tej pob zeb zoo zoo los ua tau lub tuam tsev zoo nkauj kawg li!” 2 Tiam sis Yexus teb nws tias, “Koj qhuas lub tuam tsev zoo nkauj no lod? Muaj ib hnub tej pob zeb no yuav pluam tas tib si nyias nyob nyias.”

3 Thaum Yexus zaum saum lub Roob Txiv Aulib uas nyob ncaj lub tuam tsev, Petus, Yakaunpaus, Yauhas, thiab Anrus txawm los nug nws twj ywm tias, 4 “Thov qhia rau peb seb thaum twg mam li muaj tej ntawd, thiab yuav muaj pov thawj dab tsi qhia tias tej no twb yuav kawg mus?” 5 Yexus thiaj qhia lawv tias, “Ceev faj tsis txhob cia leej twg ntxias tau nej yuam kev. 6 Yuav muaj coob leej tuav kuv lub npe dag tias, ‘Kuv yog tus Khetos,’ mas lawv yuav ntxias tau ntau leej yuam kev. 7 Tsis tas li ntawd, nej yuav hnov suab ntaj suab riam thiab yuav hnov txog kev tsov kev rog. Txawm li ntawd los tsis txhob poob siab. Yeej yuav muaj tej no, tiam sis lub sim ceeb* tseem tsis tau kawg.

8 “Ib haiv neeg yuav sawv tawm tsam ib haiv neeg thiab ib lub teb chaws yuav sawv tawm tsam ib lub teb chaws. Yuav muaj av qeeg ib qho rau ib qho thiab yuav muaj kev tshaib kev nqhis. Tej no zoo yam li tus poj niam uas pib mob plab yuav yug me nyuam xwb.

9 “Nej yuav tau ceev faj, vim luag yuav ntes nej mus kom hauv tej tsev tu plaub thiab yuav muab nej nplawm hauv tej tsev pe hawm. Luag yuav coj nej mus kom ntawm tej tswv xeev thiab tej vaj ntxwv vim nej yog kuv cov thwj tim. Thaum ntawd nej yuav ua tim khawv rau lawv. 10 Tsis tas li ntawd, yuav tsum muab txoj xov zoo txog Vajtswv txoj kev kav* tshaj tawm rau txhua haiv neeg ua ntej tso. 11 Thiab thaum luag ntes nej mus hais plaub los tsis txhob txhawj tias nej yuav teb li cas. Lub sij hawm ntawd Vajtswv lub hwj huam dawb huv yuav pab nej teb. Thaum ntawd yuav tsis yog nej teb, tiam sis yog lub hwj huam dawb huv teb ntag. 12 Tsis tas li ntawd xwb, txawm ob kwv tij los ib tug yuav muab ib tug cob rau luag tua. Ob txiv tub los leej txiv yuav muab tus me nyuam cob rau luag tua. Me nyuam los yuav sawv tawm tsam niam txiv thiab muab nkawd cob rau luag tua. 13 Tib neeg yuav ntxub nej vim nej yog kuv cov thwj tim. Tiam sis tus uas thev mus txog thaum kawg yuav dim.

14 “Yog li ntawd, thaum nej pom yam qias vuab tsuab uas ua rau txhua yam puas tsuaj nyob hauv qhov chaw uas tsis tsim nyog yam ntawd nyob (tus nyeem yuav tau ua tib zoo xav, nws thiaj to taub tej no) ces cov nyob hauv Yudias yuav tsum khiav tawm mus rau pem tej roob. 15 Tus uas nyob saum txheej tsev las tshav tsis txhob nqes los vuag ib yam dab tsi hauv tsev. 16 Thiab tus uas nyob tom teb tsis txhob rov los nqa nws lub tsho.* 17 Cov poj niam uas suab me nyuam thiab cov uas muaj me nyuam mos noj mis yuav txom nyem lauj! 18 Yeej meem thov Vajtswv kom tsis txhob muaj tej no tshwm sim rau lub caij ntuj no. 19 Rau qhov lub sij hawm ntawd yuav muaj kev txom nyem loj kawg nkaus li. Txij thaum Vajtswv tsim ntuj tsim teb los txog niaj hnub nim no yeej tsis tau muaj dua thiab yav tom ntej los yuav tsis muaj ntxiv lawm. 20 Thiab vim muaj cov uas xaiv tseg, Vajtswv Yehauvas* yuav txiav hnub txiav nyoog kom luv. Yog Vajtswv tsis ua li ntawd ces yuav tsis muaj leej twg dim li.

21 “Thaum ntawd yog muaj leej twg hais rau nej tias, ‘Saib seb! Tus Khetos nyob ntawm no,’ los sis hais tias, ‘Nws nyob tod!’ nej tsis txhob ntseeg. 22 Rau qhov yuav muaj cov Khetos cuav thiab cov neeg ua txuj cev Vajtswv lus los ua ntau yam txuj ci tseem ceeb ntxias tib neeg yuam kev, tsis hais cov uas xaiv tseg huv si. 23 Yog li ntawd, nej yuav tsum ceev faj. Kuv twb qhia tej no huv si rau nej ua ntej lawm.

24 “Thaum ntawd, tom qab lub caij muaj kev txom nyem loj kawg nkaus dhau lawm, lub hnub yuav tsaus, lub hli yuav tsis ci, 25 thiab tej hnub qub yuav poob saum ntuj los. Tej yam uas muaj hwj chim saum nruab ntug yuav ua zog koog. 26 Lawv yuav pom neeg Leej Tub muaj hwj chim loj ci ntsa iab nrog huab nrog cua saum ntuj los. 27 Nws yuav txib kom cov tub txib saum ntuj mus qaws cov uas Vajtswv xaiv tseg nyob plaub ceg kaum ntuj,* txij qab ntuj mus txog qaum ntuj los ua ke.

28 “Cia li saib tsob txiv cev. Thaum tej ceg mos pib hlav nplooj, koj yeej paub tias yuav txog lub caij ntuj so. 29 Ib yam li ntawd, thaum nej pom tej no ces nej yeej paub tias neeg Leej Tub los ze lawm, twb txog ntawm taw rooj lawm. 30 Kuv hais ncaj qha rau nej tias yuav tsum muaj tiav raws li tej no ua ntej tiam no dua mus. 31 Txawm lub ntuj lub teb yuav ploj mus los kuv tej lus yeej yuav tsis ploj ib los li.

32 “Hais txog hnub ntawd thiab teev ntawd, tsis muaj leej twg paub. Txawm cov tub txib saum ntuj thiab Leej Tub los yeej tsis paub, tsuas yog Leej Txiv thiaj paub xwb. 33 Ceev faj zov tos, txhob tsaug zog, rau qhov nej tsis paub lub sij hawm uas Vajtswv teem cia. 34 Ib yam li tus yawg uas mus ncig teb ncig chaw. Nws txib nws cov tub qhe saib xyuas nws lub vaj lub tsev. Nws cob lawv nyias ua nyias hauj lwm thiab nws kom tus tub qhe uas zov qhov rooj ceev faj zov tos. 35 Cia li ceev faj zov tos, rau qhov nej tsis paub tias tus tswv tsev yuav rov los rau thaum twg. Xyov nws yuav rov los thaum tsaus ntuj, thaum ib tag hmo, thaum qaib qua, thaum kaj ntug, nej yeej tsis paub. 36 Nyob tsam nws ho los rau thaum nej tsaug zog ncaws nruj nris. 37 Tej uas kuv hais rau nej no, kuv yeej hais rau sawv daws ib yam nkaus tias, cia li ceev faj zov tos.”

14 Tshuav ob hnub xwb yuav ua Kev Cai Hla Dhau thiab ua Kev Cai Noj Ncuav Tsis Xyaw Keeb. Cov pov thawj hlob thiab cov xib hwb* tuav tswv yim* ntes Yexus coj mus tua pov tseg. 2 Lawv hais tias, “Peb txhob ntes nws rau lub sij hawm uas tab tom ua kev cai tsam ua rau cov tib neeg ntxhov.”

3 Thaum Yexus nyob hauv Npethanis, nws mus noj mov hauv Ximoos tsev. Ximoos yog tus uas yav nram ntej mob ruas. Lub sij hawm ntawd ib tug poj niam txawm nqa ib hwj* roj tsw qab uas kim heev tuaj txog ntawd. Nws muab hwj roj lov kiag coj mus hliv rau saum Yexus taub hau. 4 Lawv ib txhia tsis zoo siab, lawv thiaj yws tias, “Ua cas tseem muab hwj roj tsw qab no nkim pov tseg thiab? 5 Yog muab hwj roj tsw qab no muag tseem tau 300 denalias* coj mus pub rau cov pluag!” Mas lawv meem txom heev* rau tus poj niam ntawd. 6 Tiam sis Yexus hais tias, “Cia nws ua nws. Txhob ua rau nws ntxhov siab. Tsim nyog qhuas tej uas nws ua rau kuv no. 7 Cov pluag yeej yuav nrog nej nyob. Nej yuav pab lawv thaum twg los tau tiam sis kuv yuav tsis nrog nej nyob mus li. 8 Nws ua tau zoo kawg. Nws hliv roj tsw qab rau kuv lub cev npaj rau hnub uas faus kuv. 9 Kuv hais ncaj qha rau nej tias, txoj xov zoo nrov ncha mus txog qhov twg, tus poj niam no tes hauj lwm yuav nrov ncha mus txog qhov ntawd.”

10 Yudas Ikhali-aus uas yog ib tug ntawm 12 tug tub txib, txawm mus cuag cov pov thawj hlob es yuav muab Yexus cob rau lawv. 11 Thaum lawv hnov li ntawd mas lawv zoo siab kawg li. Lawv cog lus tias lawv yuav them nyiaj rau nws. Yudas thiaj nrhiav seb lub sij hawm twg zoo muab Yexus cob rau lawv.

12 Thawj hnub* ua Kev Cai Noj Ncuav Tsis Xyaw Keeb, yog hnub sawv daws tua tsiaj ua Kev Cai Hla Dhau. Thaum ntawd cov thwj tim los nug Yexus tias, “Koj xav kom peb mus npaj pluas hmo Kev Cai Hla Dhau rau koj noj qhov twg?” 13 Yexus thiaj txib nws ob tug thwj tim thiab hais rau nkawd tias, “Mus rau hauv nroog, muaj ib tug yawg kwv ib hub dej yuav tuaj ntsib neb. Cia li raws nws qab mus. 14 Nws nkag rau lub tsev twg ces hais rau tus tswv tsev tias, ‘Xib Hwb hais tias, “Chav tos txais qhua nyob qhov twg? Kuv yuav nrog kuv cov thwj tim noj pluas hmo Kev Cai Hla Dhau.”’ 15 Nws yuav coj neb mus rau ib cha uas dav heev nyob txheej saud, muaj rooj muaj tog txhij txhua. Neb cia li npaj rau qhov ntawd.” 16 Ob tug thwj tim thiaj mus rau hauv lub nroog. Nkawd txawm pom muaj raws li Yexus hais ntawd ces nkawd thiaj npaj ua Kev Cai Hla Dhau.

17 Thaum tsaus ntuj lawd, Yexus nrog 12 tug thwj tim tuaj txog. 18 Thaum lawv tab tom noj mov ntawm rooj, Yexus hais tias, “Kuv hais ncaj qha rau nej tias, nej cov uas nrog kuv koom tsum no, ib tug yuav ntxeev siab rau kuv.” 19 Ces lawv ntxhov siab heev. Lawv thiaj nug Yexus ib tug zuj zus tias, “Puas yog kuv?” 20 Nws hais rau lawv tias, “Yog nej 12 tug no ib tug. Yog tus uas nrog kuv tib txhij ntsw hauv lub tais. 21 Vajtswv Txoj Lus yeej sau tseg lawm tias neeg Leej Tub yuav tuag. Tiam sis tus uas ntxeev siab rau neeg Leej Tub yuav txom nyem lauj! Kheev nws tsis txhob yug los zoo dua.”

22 Thaum lawv tab tom noj mov, Yexus muab ib lub ncuav los. Nws ua Vajtswv tsaug tas thiab muab ntais cev rau nws cov thwj tim hais tias, “Cia li txais mus, lub ncuav no piv txog kuv lub cev.” 23 Yexus kuj muab ib khob cawv txiv hmab los thiab ua Vajtswv tsaug. Nws mam li muab cev rau lawv txhua tus haus. 24 Yexus hais rau lawv tias, “Khob cawv no piv txog kuv cov ntshav uas ua hom thawj nias rau Vajtswv lo lus cog tseg uas yuav muab nchuav los cawm coob leej. 25 Kuv hais ncaj qha rau nej tias, kuv yuav tsis haus cawv txiv hmab mus txog hnub kuv tau haus tej cawv txiv hmab tshiab hauv Vajtswv lub Nceeg Vaj.”* 26 Tom qab lawv hu nkauj tas, lawv txawm nce mus rau saum lub Roob Txiv Aulib lawm.

27 Yexus hais rau lawv tias, “Nej yuav tso kuv tseg rau qhov Vajtswv Txoj Lus twb hais lawm tias, ‘Kuv yuav tua tus tswv yug yaj mas pab yaj yuav tawg ua sab ua sua.’ 28 Thaum kuv sawv hauv qhov tuag rov los lawd, kuv yuav ua nej ntej mus rau Kalilais.” 29 Tiam sis Petus hais rau Yexus tias, “Txawm lawv txhua tus tso koj tseg los kuv yeej yuav tsis tso li.” 30 Yexus thiaj hais rau Petus tias, “Kuv hais ncaj qha rau koj tias hnub no, hmo no ntag, thaum qaib tsis tau qua ob tsig, koj yuav tsis lees paub kuv peb zaug.” 31 Tiam sis Petus teb tawv qhawv tias, “Txawm kuv yuav nrog koj tuag los kuv yeej yuav tsis hais ib zaug tias kuv tsis paub koj li.” Cov thwj tim puav leej hais ib yam nkaus thiab.

32 Lawv thiaj los txog hauv ib lub vaj hu ua Kexemanes. Yexus hais rau nws cov thwj tim tias, “Nej nyob ntawm no kuv yuav mus thov Vajtswv.” 33 Yexus coj Petus, Yakaunpaus, thiab Yauhas nrog nws mus. Nws txawm nyuaj siab heev* thiab ntxhov siab kawg li. 34 Nws thiaj hais rau lawv tias, “Kuv nyuaj siab kawg li, tshuav tuag xwb. Nej nyob ntawm no zov tos tsis txhob tsaug zog.” 35 Yexus thiaj mus tom ntej me ntsis, nws txhos caug ntua thov tias, yog ua tau, tsis txhob cia tej xwm phem los raug nws. 36 Yexus thov tias, “Anpas,* kuv Txiv, koj ua tau txhua yam. Thov tshem lub khob no mus. Txawm li cas los, thov kom muaj raws li koj xav, tsis yog raws li kuv xav.” 37 Thaum Yexus rov los ntawm cov thwj tim, lawv tsaug zog tas. Nws thiaj hais rau Petus tias, “Ximoos’e, koj tsaug zog lawm lod? Cas nej yuav yoo tsis taus dab ntub zov ib nyuag txoos teev li? 38 Nej yuav tsum zov tos thiab thov Vajtswv tsis tseg, nej thiaj tsis qaug rau kev txhaum. Lub siab mas kub lug tiam sis lub cev* qaug zog zis.” 39 Yexus rov mus thov Vajtswv dua thiab nws thov ib yam li qub. 40 Thaum Yexus rov los, nws pom cov thwj tim tsaug zog tas. Lawv rua tsis taus qhov muag li, lawv thiaj tsis pom qab teb Yexus. 41 Thaum Yexus rov los zaum peb nws hais rau lawv tias, “Tam sim no tsis yog lub caij uas nej yuav tsaug zog ncaws nruj nris li ko! Cia li sawv! Twb txog lub sij hawm uas neeg Leej Tub yuav raug muab cob rau cov neeg lim hiam txhais tes lawm. 42 Cia li sawv peb mus. Saib maj! Tus uas ntxeev siab rau kuv twb tuaj yuav txog.”

43 Thaum Yexus tseem hais lus, Yudas uas yog ib tug ntawm 12 tug tub txib txawm tuaj txog kiag. Cov pov thawj, cov xib hwb, thiab cov txwj laus txib ib pab neeg coob coob nqa ntaj nqa qws nrog nws tuaj thiab. 44 Yudas tus uas ntxeev siab rau Yexus twb qhia cov tib neeg lawm tias, “Yog kuv nwj tus twg ces ntes kiag tus ntawd, tsis txhob pub nws dim li.” 45 Yudas txawm ncaj qha mus rau ntawm Yexus thiab hais tias, “Xib Hwb!”* ces nws nwj kiag Yexus sab plhu. 46 Cov tib neeg txawm los ntes kiag Yexus. 47 Tiam sis ib tug uas nyob ntawd txawm rho hlo ntaj los tib ntag tus tuam pov thawj hlob tus tub qhe ib sab pob ntseg tu nrho. 48 Yexus hais rau cov tib neeg tias, “Nej nqa ntaj nqa qws tuaj ntes tub sab lod? 49 Nej twb niaj hnub pom kuv qhia hauv lub tuam tsev, ua cas nej ho tsis ntes kuv? Txawm li ntawd los, yuav tsum muaj li no kom muaj tiav raws li Vajtswv Txoj Lus tau hais tseg lawd.”

50 Thaum ntawd cov thwj tim tso Yexus tseg khiav tas lawm. 51 Muaj ib tug tub hluas raws Yexus qab. Nws tsuas npua ib daim ntaub mag xwb. Cov tib neeg txawm yuav ntes nws, 52 tiam sis nws muab daim ntaub mag hle hlo rau lawv, khiav liab qab* mus lawm.

53 Lawv txawm coj Yexus mus rau hauv tus tuam pov thawj hlob tsev. Cov pov thawj hlob, cov txwj laus, thiab cov xib hwb sawv daws tuaj ua ke ntawd thiab. 54 Tiam sis Petus tuaj deb deb raws Yexus qab mus txog ntawm tus tuam pov thawj hlob tsev. Nws txawm mus sab hauv lub loog, nrog cov tub teg tub taws zaum nte taws. 55 Cov pov thawj hlob thiab pab Xahenrees nrhiav neeg los nkaug Yexus kom lawv tau kev muab nws tua, tiam sis nrhiav tsis tau li. 56 Yeej muaj coob tus dag txog Yexus, tiam sis lawv tej lus tsis sib tim. 57 Kuj muaj tej tug sawv tsees ua cuav tim khawv nkaug Yexus tias, 58 “Peb hnov nws hais tias, ‘Lub tuam tsev uas yog neeg txhais tes ua no, kuv yuav muab lauj tseg mas peb hnub xwb kuv yuav ua dua ib lub tshiab uas tsis yog neeg txhais tes ua.’” 59 Txawm lawv nkaug li no los lawv tej lus twb tsis sib tim li.

60 Tus tuam pov thawj hlob thiaj sawv tsees nug Yexus tab meeg sawv daws tias, “Koj txawm yuav tsis teb ib los li lod? Koj tsis hnov tej lus lawv nkaug koj ntawd lod?” 61 Tiam sis Yexus nyob twj ywm tsis teb ib los li. Tus tuam pov thawj hlob thiaj rov nug Yexus tias, “Koj puas yog tus Khetos uas yog Vajtswv tus Dawb Huv tus Tub?” 62 Yexus thiaj teb tias, “Yog mas. Kuv hais rau nej tias nej yuav pom neeg Leej Tub zaum ntawm tus uas muaj hwj chim loj kawg nkaus sab xis thiab yuav pom nws nrog huab nrog cua saum ntuj los.” 63 Tam sim ntawd, tus tuam pov thawj hlob txawm dua rhe nws lub tsho thiab hais tias, “Peb tseem yuav tos pes tsawg tus tim khawv ntxiv? 64 Nej twb hnov nws tej lus tuam mom Vajtswv lawm. Nej pom zoo li cas?” Lawv puav leej pom zoo muab nws tua pov tseg. 65 Ib txhia txawm nto qaub ncaug rau Yexus thiab npog nws ntsej muag. Lawv xuas nrig ntaus nws thiab hais rau nws tias, “Koj txawj cev Vajtswv lus diam, sim twv seb leej twg ntaus koj?” Cov tub ceev xwm thiaj xuas tawg ncuav rau Yexus thiab coj nws mus lawm.

66 Thaum Petus tseem nyob hauv lub loog, tus tuam pov thawj hlob ib tug ntxhais qhev txawm los rau ntawd. 67 Thaum nws pom Petus nte taws, nws ntsia ntsoov Petus thiab hais tias, “Koj twb nrog Yexus tus neeg Naxales ntawd thiab los sad?” 68 Tiam sis Petus tsis kam lees li. Nws hais tias, “Kuv tsis paub nws. Xyov koj hais koj dab tsi.” Ces Petus txawm sawv mus ze zog ntawm lub rooj loog. 69 Tus ntxhais qhev ho los pom Petus nyob ntawd thiab rov hais rau cov neeg uas sawv ntawd tias, “Nws yog lawv ib tug tiag.” 70 Petus rov tsis lees dua thiab. Ib me ntsis tom qab, cov neeg sawv ib ncig ntawd ho los hais Petus tias, “Koj yeej yog lawv ib tug kawg! Koj yog neeg Kalilais tiag.” 71 Tiam sis Petus twv ntuj twv teb tias, “Kuv yeej tsis paub tus neeg uas nej hais ko!” 72 Tam sim ntawd, qaib txawm qua ob tsig. Petus thiaj nco dheev txog Yexus cov lus hais tias, “Ua ntej qaib qua ob tsig, koj yuav tsis lees paub kuv peb zaug.” Ces Petus txawm quaj tu siab nrho.

15 Thaum kaj ntug, cov pov thawj hlob, cov txwj laus, cov xib hwb,* thiab pab Xahenrees txawm sab laj ua ke. Lawv thiaj muab Yexus khi coj mus cob rau Philaj. 2 Thaum ntawd Philaj nug Yexus tias, “Koj puas yog cov Yudais tus vaj ntxwv?” Yexus teb tias, “Yog li koj hais.”* 3 Tiam sis cov pov thawj hlob nkaug Yexus txog ntau yam. 4 Philaj rov nug Yexus tias, “Koj txawm tsis muaj lus teb li lod? Koj tsis hnov lawv nkaug koj txog ntau yam lod?” 5 Tiam sis Yexus tsis teb ib los li mas ua rau Philaj xav tsis thoob.

6 Txhua xyoo ua Kev Cai Hla Dhau, Philaj yeej tso ib tug neeg raug txim tawm raws li cov tib neeg thov. 7 Thaum ntawd muaj ib pab neeg sawv tawm tsam nom tswv uas tua tib neeg, lawv thiaj raug kaw. Npalanpas yog ib tug hauv pab ntawd. 8 Cov tib neeg tuaj thov Philaj kom ua raws li nws ib txwm ua rau lawv lawd. 9 Philaj thiaj nug lawv tias, “Nej puas xav kom kuv tso cov Yudais tus Vaj Ntxwv los rau nej?” 10 Philaj paub tias twb yog cov pov thawj hlob khib khib es lawv thiaj muab Yexus cob rau nws. 11 Cov pov thawj hlob thiaj tshum cov tib neeg kom thov tso Npalanpas es txhob tso Yexus. 12 Philaj thiaj rov nug lawv tias, “Tus uas nej hu ua cov Yudais tus vaj ntxwv ne? Nej yuav kom kuv ua li cas rau nws?” 13 Lawv rov qw nrov nrov tias, “Muab ntsia saum ntoo!”* 14 Philaj thiaj hais rau lawv tias, “Nws tau ua txhaum dab tsi?” Tiam sis lawv haj yam qw nrov tias, “Muab ntsia saum ntoo!”* 15 Philaj xav ua haum cov tib neeg siab, nws thiaj tso Npalanpas rau lawv. Tom qab ntawd, nws kom cov tub rog muab Yexus nplawm thiab coj mus ntsia rau saum tus ncej ntoo.*

16 Philaj cov tub rog thiaj coj Yexus mus rau hauv lub loog sab nraum tus tswv xeev lub tsev. Lawv hu cov tub rog sawv daws los ua ke. 17 Lawv txawm muab ib ce ntaub tsam xem los looj Yexus thiab muab hmab pos qhaib ua ib lub kauj rau nws ntoo. 18 Lawv txawm qw rau nws tias, “Hawm cov Yudais tus vaj ntxwv lauj!” 19 Thiab lawv muab ib tug tauj ntaus nws taub hau thiab nto qaub ncaug rau nws. Lawv ua txuj txhos caug pe hawm nws thiab. 20 Thaum lawv thuam luag nws tas, lawv txawm muab cev ntaub tsam xem hle thiab rov muab nws lub tsho rau nws hnav ces lawv coj nws tawm mus ntsia rau saum tus ncej ntoo.* 21 Thaum ntawd Ximoos uas yog neeg Xailinis tab tom tuaj pem ntug zos tuaj ncaj ntawd ces lawv txawm yuam kom Ximoos kwv Yexus tus ncej ntoo* mus. Nws muaj ob tug tub hu ua Alexadaws thiab Lufas.

22 Lawv coj Yexus mus rau qhov chaw hu ua Kaukauthas uas txhais tias, “Txha Taub Hau.” 23 Thaum txog ntawd, lawv muab cawv txiv hmab xyaw tshuaj loog* rau Yexus haus tiam sis nws tsis kam haus. 24 Lawv muab Yexus ntsia rau saum tus ncej ntoo* ces lawv mam muab nws lub tsho* dua coj los twv seb leej twg tau daim twg. 25 Thaum muab Yexus ntsia rau saum tus ncej ntoo* yog cuaj teev sawv ntxov. 26 Lawv muab ib daig ntoo sau cov lus nkaug Yexus, ntsia saum tus hau ncej hais tias, “Cov Yudais Tus Vaj Ntxwv.” 27 Tsis tas li ntawd, lawv kuj muab ob tug tub sab dai saum ob tug ncej ntoo* nrog Yexus thiab, ib tug nyob rau nws sab xis, ib tug nyob rau nws sab laug. 28 *—— 29 Cov neeg dua kev co hau nto thuam Yexus tias, “Nev! Koj nim khav tias koj yuav rhuav Vajtswv lub tuam tsev es peb hnub xwb koj yuav tsa dua ib lub tshiab no, 30 cawm koj tus kheej seb, cas tsis nqes los!”* 31 Cov pov thawj hlob thiab cov xib hwb kuj thuam Yexus ib yam nkaus thiab. Lawv hais tias, “Nws cawm tau lwm tus tiam sis nws ho cawm tsis tau nws tus kheej! 32 Nws twb yog tus Khetos thiab yog cov Ixayees tus vaj ntxwv ne! Yog nws nqes tau los rau peb pom kiag mas peb mam li ntseeg nws.” Txawm ob tug uas raug dai nrog Yexus los tseem thuam nws thiab.

33 Thaum 12 teev lub ntuj cia li tsaus dub nciab thoob plaws teb chaws mus txog 3 teev. 34 Kwv lam li peb teev, Yexus txawm tsa suab hlo quaj tias, “Elis, Elis, lamas xanpathanis?” Cov lus no txhais tias, “Kuv tus Vajtswv, kuv tus Vajtswv’e, ua cas koj tso kuv tseg lawm?” 35 Thaum lawv hnov Yexus quaj li ntawd, ib txhia uas sawv ze ntawd txawm hais tias, “Saib seb! Nws hu Eliyas.” 36 Muaj ib tug thiaj dhia loo mus muab ib lub xwb kuab raus cawv txiv hmab qaub. Nws muab chob ib tug tauj cev mus rau Yexus haus thiab hais rau sawv daws tias, “Tos od, cia seb Eliyas puas los cawm nws.” 37 Tiam sis Yexus rov quaj ib suab nrov nrov ces nws txawm tu siav nrho. 38 Tam sim ntawd daim ntaub hauv lub tuam tsev* cia li ntuag rhe saud los ti nkaus hauv taw ua ob daig. 39 Thaum tus thawj tub rog* uas sawv ntawd pom Yexus tu siav thiab pom tej xwm no, nws txawm hais tias, “Tus no yuav tsum yog Vajtswv tus Tub tiag.”

40 Muaj coob tus poj niam sawv deb deb ntsia Yexus. Maivliag Madalas, Maivliag uas yog Yakaunpaus* thiab Yauxes niam, thiab Xalaumes kuj nyob ntawd thiab. 41 Lawv yog cov uas nrog nraim Yexus thiab tu nws thaum nws nyob pem Kalilais. Kuj muaj lwm cov poj niam uas nrog Yexus tuaj hauv Yeluxalees sawv ntawd thiab.

42 Hnub ntawd yog hnub sawv daws npaj rau hnub Xanpataus. Thaum yuav tsaus ntuj, 43 Yauxej uas nyob hauv lub nroog Alimathias thiaj ua siab tawv qhawv mus cuag Philaj. Nws thov coj Yexus lub cev mus zais. Yauxej yog ib tug hauv lub Rooj Sab Laj* uas sawv daws hwm thiab nws tos ntsoov Vajtswv txoj kev kav.* 44 Philaj xav paub seb Yexus puas tseem ciaj, nws thiaj hu tus thawj tub rog los nug seb Yexus puas tau tuag. 45 Thaum tus thawj tub rog qhia meej tias Yexus tuag lawm ces Philaj mam li cia Yauxej mus coj Yexus lub cev. 46 Yauxej mus yuav tau ib chaws ntaub mag zoo zoo los. Nws muab Yexus lub cev txo los thiab muab qhwv coj mus tso rau hauv lub qhov ntxa uas txaug hauv phab tsua. Nws mam li muab daim lag zeb dov los npog lub rooj ntxas. 47 Thaum ntawd Maivliag Madalas thiab Maivliag uas yog Yauxes niam tseem nyob ntawd saib Yexus lub ntxa.

16 Thaum dhau hnub Xanpataus, Maivliag Madalas, Maivliag uas yog Yakaunpaus niam, thiab Xalaumes lawv txawm mus yuav tshuaj tsw qab los pleev Yexus lub cev. 2 Hnub tom qab* thaum kaj ntug txoog, lawv sawv ntxov tsees mus rau ntawm Yexus lub ntxa. 3 Lawv tham tias, “Leej twg yuav pab peb muab daim lag zeb uas thaiv lub rooj ntxas dov tawm?” 4 Tiam sis thaum lawv tsa muag ntsia ua ciav daim lag zeb loj loj ntawd twb muab dov tawm lawm. 5 Thaum lawv nkag mus rau hauv lub qhov ntxa ua cas muaj ib tug tub hluas hnav khaub ncaws dawb paug zaum ntawm sab xis, ua rau lawv poob siab nthav. 6 Nws hais rau lawv tias, “Txhob poob siab. Kuv paub tias nej tuaj nrhiav Yexus tus neeg Naxales uas raug tua saum tus ncej ntoo.* Nws twb ciaj sawv rov los lawm. Nws tsis nyob ntawm no lawm. Los saib, lawv twb muab nws lub cev tso rau ntawm qhov chaw no ne. 7 Cia li mus qhia rau nws cov thwj tim thiab Petus tias, ‘Nws yuav ua nej ntej mus rau pem Kalilais. Nej yuav ntsib nws ped ib yam li nws twb qhia rau nej lawd.’” 8 Lawv ntshai tshee na tawm plaws hauv lub qhov ntxa mus. Tej no ua rau lawv ceeb loj kawg thiab xav tsis thoob li. Lawv tsis kav hais rau leej twg li, vim lawv ntshai heev.