TXOJ XOV ZOO MATHAIS SAU

1 Phau ntawv no piav txog Yexus Khetos* lub neej.* Yexus Khetos yog Daviv xeeb ntxwv, Daviv yog Anplahas xeeb ntxwv.

17 Yog li ntawd, suav txij Anplahas los txog rau Daviv muaj 14 tiam. Suav txij Daviv los txog thaum cov Yudais raug kuav mus rau Npanpiloos muaj 14 tiam. Suav txij thaum raug kuav mus rau Npanpiloos los txog tus Khetos muaj 14 tiam.

18 Yexus Khetos los yug hauv ntiaj teb li no. Lub sij hawm uas Yauxej tseem qhaib Maivliag mas lub hwj huam dawb huv* ua rau Maivliag xeeb tub. 19 Tiam sis Yauxej* yog ib tug neeg ncaj ncees nws tsis xav kom Maivliag poob ntsej muag. Nws thiaj npaj siab muab Maivliag tso* twj ywm tseg. 20 Tom qab Yauxej muab tej no xav tas lawm, nws ua npau suav pom Vajtswv Yehauvas* ib tug tub txib saum ntuj los hais rau nws tias, “Yauxej,* tsis txhob poob siab, cia li mus coj Maivliag los tsev los ua koj tus poj niam.* Yog lub hwj huam dawb huv ua rau nws xeeb tub xwb. 21 Nws yuav yug ib tug tub. Koj yuav tsum muab tus tub ntawd hu ua Yexus* rau qhov nws yuav cawm tib neeg dim lawv lub txim.” 22 Tag nrho tej no muaj tiav raws nkaus li Vajtswv Yehauvas* tau hais rau tus uas cev Nws lus lawm tias, 23 “Saib maj! Ib tug nkauj xwb yuav xeeb tub. Nws yuav yug ib tug tub thiab luag yuav muab nws hu ua Emanu-ees.” Lub npe ntawd txhais tias “Vajtswv nrog nraim peb.”

24 Thaum Yauxej tsim dheev los nws txawm mus coj Maivliag los tsev los ua nws tus poj niam* raws li Vajtswv Yehauvas* tus tub txib saum ntuj tau hais lawd. 25 Tiam sis Yauxej tsis nrog Maivliag pw ua niam txiv mus txog thaum yug tau tus me tub ntawd. Thaum yug tau lawd, Yauxej muab nws tis npe hu ua Yexus.

2 Yexus los yug hauv lub zos Npelehees uas nyob teb chaws Yudias rau lub caij uas Helauj* ua vaj ntxwv kav. Muaj ib co neeg txawj saib hnub qub txawm tuaj txog hauv lub nroog Yeluxalees. 2 Lawv nug tias, “Cov Yudais tus vaj ntxwv uas nyuam qhuav yug, nyob qhov twg? Thaum peb nyob puag tim sab hnub tuaj, peb pom nws lub hnub qub, peb thiaj tuaj hawm nws.” 3 Thaum Vaj Ntxwv Helauj hnov li no, nws ntxhov siab heev. Tag nrho cov neeg hauv Yeluxalees kuj nrog nws ntxhov siab thiab. 4 Helauj thiaj hu cov pov thawj hlob thiab cov xib hwb* tuaj ua ke. Nws nug lawv tias tus Khetos* yuav yug rau qhov twg. 5 Lawv hais rau nws tias, “Yuav yug hauv lub zos Npelehees uas nyob teb chaws Yudias rau qhov tus cev Vajtswv lus twb sau tseg lawm tias, 6 ‘Npelehees uas nyob hauv Yudas’e, tsim nyog cov thawj coj Yudas hwm koj vim yuav muaj ib tug thawj tawm hauv koj los kav kuv haiv neeg Ixayees, ib yam li tus tswv yug yaj.’”

7 Helauj txawm hu cov neeg txawj saib hnub qub los cuag nws twj ywm. Nws ua tib zoo nug seb lawv twb pom lub hnub qub tshwm rau thaum twg lawm. 8 Thaum nws tso lawv mus rau Npelehees, nws hais rau lawv tias, “Cia li ua tib zoo mus nrhiav seb tus me nyuam nyob qhov twg. Thaum nej nrhiav tau nws lawm rov los qhia kuv paub, kuv yuav mus hawm nws thiab.” 9 Thaum vaj ntxwv hais li ntawd tas, lawv mam sawv kev mus. Ua ciav lub hnub qub uas lawv pom tim sab hnub tuaj txawm rov coj lawv kev thiab mus nres ncaj rau saum lub tsev uas tus me nyuam nyob. 10 Thaum lub hnub qub nres lawm mas lawv zoo siab kawg li. 11 Lawv thiaj mus rau hauv tsev thiab pom tus me nyuam nrog Maivliag uas yog nws niam nyob hauv. Lawv txhos caug ntua hawm nws. Lawv thau tej nyiaj, tej kub, thiab tej hmoov tshuaj tsw qab* los pub nws. 12 Tiam sis lawv ua npau suav pom Vajtswv ceeb toom lawv kom txhob rov mus qhia Helauj. Lawv thiaj mus lwm txoj kev mus rau lawv lub teb chaws lawm.

13 Thaum lawv mus dhau lawd, ua ciav Yauxej txawm ua npau suav pom Vajtswv Yehauvas* ib tug tub txib saum ntuj los hais rau nws tias, “Cia li sawv tsees, coj koj ob niam tub khiav mus nram teb chaws Iyiv. Nyob twj ywm nrad mus txog thaum kuv hu koj rov los. Helauj yuav nrhiav tus me nyuam tua pov tseg sai sai no.” 14 Yauxej thiaj sawv tsees coj nws ob niam tub maub hmo ntuj mus rau nram teb chaws Iyiv. 15 Lawv nyob nrad mus txog thaum Helauj tuag. Tej no muaj tiav raws li Vajtswv Yehauvas* tau hais rau tus uas cev Nws lus tias, “Kuv hu kuv tus tub tawm hauv Iyiv teb los.”

16 Helauj pom tias cov neeg txawj saib hnub qub dag nws lawm, nws thiaj npau taws heev. Nws txawm txib neeg mus hauv Npelehees thiab ib cheeb tsam ntawd mus muab cov me nyuam tub uas muaj ob xyoos rov hauv tua pov tseg tib si. Raws li cov neeg txawj saib hnub qub qhia rau Helauj mas tus me tub yuav tsum muaj hnub nyoog li ntawd. 17 Tej no muaj tiav raws li Vajtswv tau hais rau Yelemis tus uas cev Nws lus tias, 18 “Hnov suab quaj suab nyiav hauv lub zos Lamas. Yog Laxees quaj ntsuag nws tej me nyuam. Tsis muaj leej twg nplig tau nws vim tsis muaj lawv lawm.”

19 Thaum Helauj tuag lawd, Yauxej tseem nyob hauv teb chaws Iyiv. Nws txawm ua npau suav pom Vajtswv Yehauvas* tus tub txib saum ntuj 20 hais rau nws tias, “Cia li sawv tsees, coj koj ob niam tub rov mus rau teb chaws Ixayees rau qhov cov uas nrhiav tus me nyuam tua twb tuag tas lawm.” 21 Yauxej thiaj sawv tsees coj nws ob niam tub rov mus pem teb chaws Ixayees. 22 Thaum Yauxej hnov tias Akhilaus nyob nws txiv Helauj chaw kav lawd, Yauxej thiaj ntshai mus nyob rau hauv Yudias. Tsis tas li ntawd xwb, Yauxej kuj ua npau suav pom Vajtswv ceeb toom kom txhob mus thiab. Nws thiaj mus nyob pem cheeb tsam Kalilais lawm. 23 Nws mus nyob hauv lub nroog Naxales kom muaj tiav raws li Vajtswv tau hais rau cov uas cev Nws lus lawm tias, “Luag yuav muab nws* hu ua neeg Naxales.”*

3 Tom qab no, Yauhas txawm pib tshaj tawm tom roob moj sab qhua Yudias. Nws yog tus muab neeg ua kev cai raus dej. 2 Nws tshaj tawm tias, “Cia li hloov dua siab tshiab rau qhov Vajtswv txoj kev kav* twb los ze lawm.” 3 Tus cev Vajtswv lus Yaxayas twb hais txog tus no lawm tias, “Yuav muaj ib tug hu tom roob moj sab qhua tuaj tias, ‘Cia li kho kev tos Vajtswv Yehauvas!* Kho nws txoj kev kom tiaj tus.’” 4 Yauhas hnav ib ce tsoos plaub nees us* thiab sia ib txoj siv tawv. Nws tej zaub mov yog kooj thiab zib ntab. 5 Cov neeg uas nyob hauv lub nroog Yeluxalees thiab thoob plaws teb chaws Yudias thiab tej zej zog ib ncig tus Dej Yaladees thiaj mus cuag Yauhas. 6 Lawv lees txim tab meeg sawv daws thiab Yauhas muab lawv ua kev cai raus dej hauv tus Dej Yaladees.

7 Thaum Yauhas pom cov Falixais thiab cov Xadukais tuaj txog ntawd, nws hais rau lawv tias, “Cov niag noob nab, leej twg hais rau nej tias nej yuav tsis raug Vajtswv rhuav tshem no? 8 Nej yuav tsum hloov nej lub neej thiaj yog nej hloov dua siab tshiab. 9 Nej tsis txhob khav tias Anplahas yog nej yawg koob. Kuv qhia rau nej tias Vajtswv muaj peev xwm muab tej pob zeb no tsa tau los ua Anplahas tej xeeb ntxwv. 10 Saib maj, twb muab rab taus cuab rau ntawm hauv paus ntoo lawm. Txhua tsob ntoo uas tsis txi cov txiv zoo yuav raug muab ntov pov hlawv. 11 Kuv yog tus muab nej ua kev cai raus dej vim nej hloov dua siab tshiab, tiam sis tus uas lawv kuv qab los muaj hwj chim dua kuv mas kuv twb tsis tsim nyog hle nws txhais khau li. Tus ntawd yuav muab nej ua kev cai raus lub hwj huam dawb huv thiab raus hluav taws.* 12 Nws tuav rawv rab hlau rawg yuav muab cov mog rheeb kom tej npluag ya huv si mus. Nws yuav muab cov mog sau rau hauv nws lub txhab tiam sis cov npluag nws yuav muab hlawv rau hauv lub cub tawg uas cig mus ib txhis.”

13 Thaum ntawd Yexus tuaj pem Kalilais tuaj cuag Yauhas ntawm tus Dej Yaladees. Nws kom Yauhas muab nws ua kev cai raus dej. 14 Tiam sis Yauhas tav nws tias, “Twb tsim nyog koj muab kuv ua kev cai raus dej, cas koj ho tuaj cuag kuv?” 15 Yexus teb tias, “Yuav tsum ua li no thiaj mus raws li Vajtswv lub siab nyiam.” Yauhas thiaj tsis tav Yexus lawm. 16 Nws thiaj muab Yexus ua kev cai raus dej. Thaum Yexus tawm plaws hauv dej los, rooj ntug txawm qhib plho. Yauhas pom Vajtswv lub hwj huam zoo li tus nquab los rau saum Yexus. 17 Tam sim ntawd, txawm muaj ib lub suab hais saum ntuj tuaj tias, “Tus no yog kuv tus Tub. Kuv hlub nws heev. Nws ua haum kuv siab.”

4 Thaum Yexus ua kev cai raus dej tas, Vajtswv lub hwj huam coj nws mus tom roob moj sab qhua. Lub sij hawm ntawd Ntxwg Nyoog thiaj los ntxias nws. 2 Nws twb yoo mov tau 40 hnub 40 hmo lawm mas nws tshaib plab heev. 3 Ntxwg Nyoog hais rau nws tias, “Koj twb yog Vajtswv tus tub ne, koj kuj muab cov pob zeb no hloov ua ncuav noj.” 4 Yexus teb tias, “Vajtswv Txoj Lus twb hais tias, ‘Tsis yog zaub mov xwb thiaj cawm tau neeg txoj sia, tiam sis neeg yuav tsum coj raws li txhua lo uas Vajtswv Yehauvas* hais thiaj cawm tau.’”

5 Ces Ntxwg Nyoog coj Yexus mus rau hauv lub nroog Yeluxalees* mus sawv saum lub tuam tsev, txheej tsev las tshav uas siab tshaj plaws 6 thiab hais rau nws tias, “Koj twb yog Vajtswv tus tub ne, koj kuj tso cev plhuav lawm hauv. Vajtswv Txoj Lus twb hais tias, ‘Nws yuav kom cov tub txib saum ntuj los pab koj. Lawv yuav txais nkaus koj tsis pub koj txhais ko taw chwv av* li.’” 7 Yexus teb tias, “Vajtswv Txoj Lus twb hais tias, ‘Koj yuav tsum tsis txhob twv Yehauvas* uas yog koj tus Vajtswv.’”

8 Ntxwg Nyoog ho coj Yexus mus saum ib lub roob siab siab. Nws muab tag nrho tej teb chaws hauv qab ntuj thiab lawv tej kev vam meej rau Yexus saib. 9 Ntxwg Nyoog hais rau Yexus tias, “Yog koj txhos caug pe kuv ib pes, kuv yuav muab tag nrho tej no rau koj tib si.” 10 Yexus hais rau nws tias, “Xatas, khiav mus! Vajtswv Txoj Lus twb hais tias, ‘Koj yuav tsum pe hawm Yehauvas* uas yog koj tus Vajtswv thiab teev tiam nws tib leeg xwb.’” 11 Ntxwg Nyoog thiaj khiav mus lawm. Ces cov tub txib saum ntuj txawm los pab Yexus.

12 Thaum Yexus hnov tias Yauhas raug ntes, nws thiaj mus rau pem Kalilais lawm. 13 Tom qab ntawd, nws tawm hauv Naxales mus nyob rau hauv Khapena-us, ntawm ntug hiav txwv* hauv cheeb tsam Xenpuloos thiab Nathalis. 14 Nws ua li no kom muaj tiav raws li Vajtswv tau hais rau Yaxayas tus uas cev Nws lus tias, 15 “Cov neeg hauv Xenpuloos thiab Nathalis’e, cov uas nyob npuas txoj kev mus rau dej hiav txwv ntawm tus Dej Yaladees sab hnub poob, hauv cheeb tsam Kalilais uas muaj lwm haiv neeg nyob. 16 Cov neeg nyob hauv qhov tsaus ntuj twb pom qhov kaj lawm. Cov uas nyob hauv txoj kev tuag tus duab roos, qhov kaj twb ci tuaj txog nej lawm.” 17 Txij thaum ntawd los, Yexus txawm pib tshaj tawm tias, “Cia li hloov dua siab tshiab, Vajtswv txoj kev kav* twb los ze lawm.”

18 Thaum Yexus taug ntug Hiav Txwv Kalilais, nws pom ob kwv tij tab tom ntaus ntses. Ib tug yog Ximoos uas hu ua Petus thiab ib tug yog Anrus.* Nkawd yog neeg ntaus ntses. 19 Yexus hais rau nkawd tias, “Cia li nrog kuv mus, kuv yuav qhia kom neb txawj nrhiav neeg ib yam li neb txawj ntaus ntses.” 20 Nkawd txawm tso plhuav vas tseg nrog Yexus mus. 21 Dhau ntawd, Yexus ho mus pom Yakaunpaus thiab Yauhas nkawd ob kwv tij nrog nkawd txiv Xenpedis tab tom ntxiv vas hauv nkoj. Yexus kuj yaum nkawd nrog nws mus thiab. 22 Nkawd txawm tso plhuav leej txiv thiab lub nkoj tseg nrog Yexus mus lawm.

23 Ces nws mus thoob plaws Kalilais, mus qhia hauv cov Yudais tej tsev pe hawm thiab tshaj tawm txoj xov zoo txog Vajtswv txoj kev kav.* Nws kho txhua yam kab mob kev nkeeg uas tib neeg muaj huv si. 24 Thaum nws lub moo nrov ncha mus thoob plaws Xilias lawd, tib neeg txawm coj cov raug dab, cov qaug dab peg, cov tuag tes tuag taw, thiab txhua tus uas muaj kab mob kev nkeeg txom nyem ntsuav tuaj cuag Yexus mas nws kho lawv zoo huv si. 25 Twb yog li ntawd, thiaj muaj neeg coob coob caum Yexus. Lawv tuaj hauv Kalilais, Dekapaulis,* Yeluxalees, Yudias, thiab tus Dej Yaladees sab tim ub tuaj.*

5 Thaum Yexus pom muaj tib neeg coob heev, nws thiaj mus zaum saum roob ces nws cov thwj tim txawm los cuag nws. 2 Nws pib qhia lawv tias,

3 “Cov uas pom tias lawv yuav tsum vam khom Vajtswv* yog cov uas zoo siab rau qhov lawv yuav tau lub Nceeg Vaj* saum ntuj ua lawv tug.

4 “Cov uas nyuaj siab ntxhov plawv yog cov uas zoo siab rau qhov lwm tus* yuav nplig lawv.

5 “Cov uas txo hwj chim yog cov uas zoo siab rau qhov lawv yuav tau lub ntiaj teb ua lawv tug.

6 “Cov uas ntshaw kev ncaj ncees* yog cov uas zoo siab rau qhov lawv yuav tau raws li lawv lub siab ntshaw.

7 “Cov uas hlub* lwm tus yog cov uas zoo siab rau qhov lwm tus* yuav hlub* lawv.

8 “Cov uas muaj siab dawb siab zoo yog cov uas zoo siab rau qhov lawv yuav pom* Vajtswv.

9 “Cov uas txhawb kom muaj kev sib haum xeeb yog cov uas zoo siab rau qhov lawv yuav yog Vajtswv cov me nyuam.*

10 “Cov uas raug tsim txom vim ua ncaj ua ncees yog cov uas zoo siab rau qhov lawv yuav tau lub Nceeg Vaj* saum ntuj ua lawv tug.

11 “Cov uas raug thuam, raug tsim txom, thiab raug iab hiam ntau yam vim lawv yog kuv cov thwj tim, yog cov uas zoo siab. 12 Txij thaum ub los luag twb tsim txom cov cev Vajtswv lus ib yam li ntawd lawm thiab. Cia li zoo siab xyiv fab rau qhov Vajtswv yuav foom koob hmoov nplua mias rau nej.*

13 “Nej zoo li cov ntsev hauv ntiaj teb. Yog ntsev tsuag lawm, yuav rov daw tau li cas? Yeej tsis tau li, tsuas yuav muab pov nraum zoov rau neeg tsuj xwb.

14 “Nej zoo li qhov kaj uas ci rau neeg ntiaj teb* pom kev. Ib yam li lub nroog nyob saum roob uas txhua leej txhua tus pom, tsis muaj dab tsi yuav thaiv tau. 15 Yeej tsis muaj leej twg taws teeb es muab tawb* khwb rau, tsuas muab tso rau saum tus ncej txawb teeb kom ci lam lug rau txhua tus hauv tsev pom kev xwb. 16 Yog li ntawd, nej cia li ci rau sawv daws pom. Tib neeg thiaj pom nej tes hauj lwm zoo thiab qhuas nej Leej Txiv uas nyob saum ntuj ceeb tsheej.

17 “Txhob xav tias kuv los rhuav Mauxes Txoj Kev Cai thiab cov cev Vajtswv lus tej lus qhia. Kuv tsis yog los rhuav tiam sis yog los ua kom tiav xwb. 18 Kuv hais ncaj qha rau nej tias, yog lub ntuj lub teb tseem muaj nyob ces yeej yuav muaj tiav raws li txoj Kev Cai txhua lo. Txawm tus tsiaj ntawv thiab teev nyuag ntawv me dua ntais los yeej yuav tsis poob li. 19 Yog leej twg hla ib txoj kev cai twg, tsis hais txoj uas neeg xav tias tsis tseem ceeb, thiab tseem txw kom lwm tus hla ces tus ntawd tsis tsim nyog nkag rau hauv lub Nceeg Vaj* saum ntuj. Tiam sis tus uas coj raws li Vajtswv tej kev cai thiab qhia kom lwm tus coj tej kev cai ntawd, yuav nkag tau rau hauv lub Nceeg Vaj* saum ntuj. 20 Kuv qhia tseeb rau nej tias yog nej tsuas coj ncaj li cov xib hwb* thiab cov Falixais xwb ces nej yeej yuav nkag tsis tau rau hauv lub Nceeg Vaj* saum ntuj.

21 “Nej twb hnov luag qhia rau nej tej poj koob yawm txwv lawm tias, ‘Tsis txhob tua neeg. Yog leej twg tua neeg ces yuav coj nws mus cuag lub rooj txiav txim.’ 22 Tiam sis kuv qhia tseeb rau nej tias yog leej twg pheej chim rau nws tus kwv tij, nws kuj yuav raug coj mus hais ntawm lub rooj txiav txim thiab. Hos tus uas hais lus ntsw nws tus kwv tij los yuav raug coj mus hais ntawm lub rooj txiav txim qib siab. Dua li ntawd, yog leej twg lam foom nws tus kwv tij tias, ‘Niag ruam ntxim ntxub!’* ces tus ntawd yuav raug puas tsuaj.”*

23 “Yog koj tab tom yuav muab khoom fij rau Vajtswv ntawm lub thaj es koj nco dheev tias koj tus kwv tij muaj chaw tu siab rau koj lawm, 24 cia li muab koj qhov khoom fij tso plhuav rau ib cag. Mus nrhiav koj tus kwv tij es kho kom neb sib haum xeeb tso, koj mam rov los muab fij rau Vajtswv.

25 “Yog koj tshuav ib tug twg nqi es nws yuav coj koj mus kom tom tsev tu plaub, kav tsij nrog nws hais kom sib haum ua ntej neb mus txog tod. Nws thiaj tsis muab koj cob rau tus txiav txim, tsam tus txiav txim ho muab koj cob rau tus ceev xwm coj mus kaw. 26 Kuv hais ncaj rau koj tias koj yuav tsis tau tawm hauv tsev loj cuj mus txog thaum koj khee hlo koj lub nyuag nyiaj qab nas* los them.

27 “Nej twb hnov lawm tias, ‘Nej cov uas muaj txij nkawm lawd, tsis txhob mus deev lwm tus.’ 28 Tiam sis kuv qhia rau nej tias tus uas ntsia ib tug poj niam twg thiab xav deev tus poj niam ntawd twb ua txhaum hauv nws lub siab lawm.* 29 Yog koj sab qhov muag xis coj koj mus ua txhaum,* cia li muab kaus pov tseg. Txawm tsis muaj ib sab qhov muag los zoo dua li tag nrho lub cev raug puas tsuaj.* 30 Yog koj sab tes xis coj koj mus ua txhaum,* cia li muab txiav pov tseg. Txawm tsis muaj sab tes xis los zoo dua li tag nrho lub cev raug puas tsuaj.*

31 “Tsis tas li ntawd xwb, nej twb hnov lawm tias, ‘Yog leej twg yuav nrauj nws tus poj niam, nws yuav tsum ua ntawv nrauj tso.’ 32 Tiam sis kuv qhia rau nej tias yog leej twg tus poj niam tsis tau mus ua plees ua yi* es nws cia li muab nrauj ces twb yog nws qhib kev rau nws tus poj niam mus ua txhaum kev nkauj kev nraug* ntag. Tsis tas li ntawd, yog leej twg yuav ib tug poj nrauj zoo li no ces twb yog nws deev luag poj luag sev lawm.

33 “Nej twb hnov luag qhia rau nej tej poj koob yawm txwv lawm tias, ‘Nej twv li cas lawm nej yuav tsum ua li ntawd. Nej yuav tsum ua raws li nej tau cog lus rau Vajtswv Yehauvas.’* 34 Tiam sis kuv qhia rau nej tias, tsis txhob lam tau lam twv li ub li no. Tsis txhob twv ntuj, rau qhov lub ntuj yog Vajtswv lub rooj zaum. 35 Tsis txhob twv teb, rau qhov lub ntiaj teb yog Vajtswv lub rooj tiag taw. Tsis txhob twv lub nroog Yeluxalees, rau qhov Yeluxalees yog tus Vaj Ntxwv* uas loj kawg lub nroog. 36 Tsis txhob twv txog koj lub taub hau,* rau qhov koj twb ua tsis tau kom koj ib txoj plaub hau dawb los sis dub li. 37 Yog koj hais tias koj yuav ua yam twg ces cia li ua xwb. Yog koj hais tias koj tsis ua ces txhob ua li. Tus uas hais tshaj no yog ua raws li Ntxwg Nyoog* lub tswv yim xwb.

38 “Nej twb hnov lawm tias, ‘Qhov muag pauj qhov muag, hniav pauj hniav.’ 39 Tiam sis kuv qhia rau nej tias, tsis txhob tawm tsam tus neeg lim hiam. Yog nws ntaus koj sab plhu xis,* cia li tig sab laug rau nws ntaus thiab. 40 Yog muaj leej twg coj koj mus kom hauv tsev tu plaub es txeeb koj lub tsho sab hauv,* cia li hle lub sab nraud rau nws thiab. 41 Yog leej twg muaj hwj chim quab koj ev nra mus ib kilumev,* cia li ev mus ob kilumev. 42 Yog leej twg thov koj ib yam dab tsi, cia li muab rau nws. Yog leej twg thov txais* koj ib yam dab tsi, tsis txhob fee plhu rau nws.

43 “Nej twb hnov lawm tias, ‘Koj yuav tsum hlub kwv tij zej zog es ntxub koj tus yeeb ncuab.’ 44 Tiam sis kuv qhia rau nej tias, cia li hlub nej cov yeeb ncuab, thiab thov Vajtswv rau cov uas tsim txom nej. 45 Yog nej ua li no nej thiaj yog Leej Txiv saum ntuj cov me nyuam, vim nws ua lub hnub ci rau cov neeg zoo cov neeg phem huv si. Thiab nws tso nag los rau cov neeg ncaj cov neeg nkhaus huv si. 46 Yog nej tsuas hlub cov uas hlub nej xwb, nej xav tias nej yuav tau koob hmoov no lod? Txawm cov neeg sau se los kuj txawj ua li ntawd thiab. 47 Yog nej tsuas hu nej cov kwv tij xwb, nej ho zoo npaum li cas? Lwm haiv neeg kuj txawj ua li ntawd thiab. 48 Yog li, nej yuav tsum hlub lwm tus tiag tiag* ib yam li nej Leej Txiv saum ntuj uas zoo kawg nkaus.

6 “Ceev faj tsis txhob lam coj ncaj rau luag qhuas xwb. Yog nej ua li ntawd ces nej Leej Txiv saum ntuj yuav tsis foom koob hmoov rau nej. 2 Yog li ntawd, thaum koj pub rau cov txom nyem, txhob muab khav rau tus ub tus no. Txhob ua li cov neeg siab nkhaus* uas ua txuj pub rau luag hauv tej tsev pe hawm thiab tom tej kev kom neeg qhuas. Kuv hais ncaj qha rau nej tias, lawv tsuas tau tej lus qhuas ntawd nkaus xwb.* 3 Tiam sis thaum koj pub rau cov txom nyem, tsis txhob cia koj sab tes laug paub tej uas koj sab tes xis muab. 4 Cia li muab twj ywm rau cov txom nyem. Koj Leej Txiv yeej pom txhua yam.* Nws mam pauj rov rau koj.

5 “Thaum nej thov Vajtswv, tsis txhob ua li cov neeg siab nkhaus uas sawv ntsug thov Vajtswv hauv tej tsev pe hawm thiab ntawm tej kev tshuam kom tib neeg pom thiab qhuas. Kuv hais ncaj qha rau nej tias, lawv tsuas tau tej lus qhuas ntawd nkaus xwb.* 6 Tiam sis thaum koj thov, cia li mus hauv txaj* thiab kaw rooj txag es mam li thov koj Leej Txiv uas nyob saum ntuj.* Koj Leej Txiv uas pom txhua yam mam li foom koob hmoov rau koj. 7 Thaum koj thov Vajtswv, tsis txhob hais mus hais los tib co qub lus zoo li cov neeg tsis paub Vajtswv* hais. Lawv xav tias lawv thov ntev thov ntau ces Vajtswv yuav hnov lawv tej lus thov. 8 Tsis txhob thov Vajtswv li lawv, rau qhov koj Leej Txiv yeej paub tej uas koj cheem tsum ua ntej koj thov nws.

9 “Nej yuav tsum thov Vajtswv li no,

“‘Peb Leej Txiv tus uas nyob saum ntuj ceeb tsheej, thov kom sawv daws hwm koj lub npe. 10 Thov koj lub Nceeg Vaj* los kav. Thov kom txhua yam hauv ntiaj teb muaj tiav raws li koj lub siab nyiam ib yam li saum ntuj. 11 Thov koj pub kom peb muaj txaus noj* rau hnub no, 12 thiab thov koj zam peb lub txim* ib yam li peb tau zam lwm tus lub. 13 Thov tsis txhob cia peb qaug rau tej kev sim siab tiam sis thov cawm peb dim ntawm Xatas* txhais tes.’

14 “Yog nej zam tej uas lwm tus ua txhaum rau nej ces nej Leej Txiv saum ntuj yuav zam rau nej thiab. 15 Tiam sis yog nej tsis zam tej uas lwm tus ua txhaum rau nej ces nej Leej Txiv yuav tsis zam nej ib yam nkaus.

16 “Thaum nej yoo mov, tsis txhob* ua ntsej muag mluas mlob li cov neeg siab nkhaus ua. Lawv txhob txwm tsis tu cev kom luag pom thiab qhuas tias lawv yoo mov. Kuv hais ncaj qha rau nej tias, lawv tsuas tau tej lus qhuas ntawd nkaus xwb.* 17 Tiam sis thaum koj yoo mov, cia li muab tshuaj tsw qab pleev taub hau thiab ntxuav muag, 18 luag thiaj tsis paub tias koj yoo mov. Cia koj Leej Txiv uas nyob saum ntuj* tib leeg paub xwb. Yog koj ua li ntawd ces koj Leej Txiv uas pom txhua yam* yuav foom koob hmoov rau koj.

19 “Tseg tsis txhob khaws nyiaj txiag thiab tej yam muaj nqis rau hauv ntiaj teb no, vim muaj kab muaj xeb noj thiab muaj tub sab nyiag. 20 Tiam sis cia li khaws yam uas muaj nqis rau saum ntuj ceeb tsheej thiaj tsis muaj kab muaj xeb noj thiab tsis muaj tub sab nyiag. 21 Nco ntsoov tias yog koj saib yam twg muaj nqis ces koj lub siab yuav nyob rau yam ntawd.

22 “Lub qhov muag yog lub teeb rau lub cev. Yog koj lub qhov muag ntsia ntsoov rau ib yam xwb* ces koj lub cev yuav ci kaj nrig. 23 Tiam sis yog koj lub qhov muag phem* ces koj lub cev yuav tsaus nti. Yog koj lub qhov muag tseem ua rau koj lub cev tsaus nti thiab ces koj yeej nyob dub nciab xwb!

24 “Tsis muaj leej twg yuav ua qhev tau rau ob tug los pav. Yog nws ua li ntawd, nws yuav nyiam ib tug ntxub ib tug los sis nws yuav muab siab npuab ib tug saib tsis taus ib tug. Nej yuav ua qhev rau Vajtswv thiab nyiaj txiag yeej tsis tau!

25 “Vim li no, kuv thiaj qhia nej tias, cia li tseg tsis txhob txhawj tias nej yuav muab dab tsi los noj los hnav. Txoj sia tseem ceeb dua tej ntawd los tsis yog? 26 Tsa muag ntsia tej noog uas ya saum nruab ntug. Tej noog twb tsis txawj cog tsis txawj sau qoob los cia hauv txhab. Txawm li ntawd los, nej Leej Txiv saum ntuj tseem pub tej noog tau noj. Nej yeej muaj nqis tshaj tej noog ntawd los tsis yog? 27 Nej cov uas niaj hnub txhawj, puas yuav tsav tau nej txoj sia nyob ib hnub* ntxiv? 28 Ua cas nej yuav niaj hnub txhawj tias yuav muab dab tsi los hnav? Saib tej paj hmab paj ntoos tawg li cas. Tej ntawd tsis txawj khwv tsis txawj ntos ntaub 29 tiam sis kuv qhia rau nej tias Vaj Ntxwv Xalaumoos tej tsoos zoo nkauj kawg li, los twb tsis muaj ib ce zoo nkauj cuag li lub nyuag paj ntawd. 30 Xav seb tej paj hmab paj ntoos uas tawg tshiab tshiab hnub no, tag kis twb ntsws tas yuav muab txiav pov hauv cub tawg, los Vajtswv tseem tsim tej paj ntawd zoo nkauj ua luaj. Yog li, Vajtswv yeej yuav pub kom nej muaj hnav thiab. Ua cas nej tseem tsis tso siab? 31 Yog li ntawd txhob txhawj tias, ‘Peb yuav muab dab tsi los noj los hnav?’ 32 Cov neeg tsis paub Vajtswv* niaj hnub txhawj thiab khwv kom lawv tau noj tau hnav. Nej Leej Txiv saum ntuj yeej paub tias nej cheem tsum tej no lawm.

33 “Kav tsij txhawb Vajtswv txoj kev kav* thiab coj raws li nws tej kev cai ncaj ncees ua ntej tso ces Vajtswv mam li muab tej uas nej cheem tsum tsav ntxiv rau nej. 34 Yog li ntawd, txhob txhawj txog tag kis, rau qhov tag kis tseem yuav muaj lwm yam kev nyuaj siab. Hnub no twb muaj kev txhawj txaus lawm.

7 “Cia li tseg tsis txhob txiav txim rau luag, Vajtswv thiaj yuav tsis txiav txim rau nej. 2 Rau qhov nej txiav txim rau luag li cas, luag yuav txiav txim rau nej ib yam li ntawd. Nej muab lub luaj li cas luj rau luag, luag yuav muab lub luaj li ntawd luj rov rau nej. 3 Ua cas koj ho pom qhov nyuag hmoov ntoo* hauv koj tus kwv tij lub qhov muag, tiam sis koj ho tsis pom tog niag ntoo* hauv koj lub? 4 Koj yuav ua li cas hais rau koj tus kwv tij tias, ‘Cia kuv pab so qhov nyuag hmoov ntoo hauv koj lub qhov muag,’ tiam sis ib tog niag ntoo tseem nyob hauv koj lub? 5 Niag neeg siab nkhaus!* Koj yuav tsum xub tshem tog niag ntoo hauv koj lub qhov muag tso, koj thiaj pom kev so qhov nyuag hmoov ntoo hauv koj tus kwv tij lub.

6 “Nej tsis txhob muab yam uas dawb huv pov rau dev thiab tsis txhob muab tej hlaws muaj nqis pov rau npua. Tej tsiaj ntawd tsuas muab tsuj thiab tig los dua nej xwb.

7 “Yeej meem thov mas nej yuav tau. Yeej meem nrhiav mas nej yuav ntsib. Yeej meem khob mas yuav qhib rau nej. 8 Rau qhov txhua tus uas thov yeej yuav tau. Txhua tus uas nrhiav yeej yuav ntsib. Txhua tus uas khob yeej yuav qhib rau nws. 9 Nej cov yog leej twg tus tub taij ncuav es yuav cev pob zeb rau 10 thiab yog nws tus tub taij ntses es yuav cev nab rau lod? 11 Txawm nej yog neeg txhaum los nej twb paub muab tej yam zoo rau nej cov me nyuam. Yog li ntawd, nej Leej Txiv saum ntuj yim huab paub muab tej yam zoo rau cov uas thov nws!

12 “Yog li ntawd, txhua yam uas nej xav kom lwm tus ua rau nej, nej yuav tsum ua ib yam li ntawd rau lawv thiab. Qhov no thiaj raws li Mauxes Txoj Kev Cai thiab cov cev Vajtswv lus tej lus qhia.

13 “Cia li mus lub qhov rooj nqaim rau qhov lub qhov rooj dav thiab txoj niag kev loj coj mus raug kev puas tsuaj mas coob tus mus lub qhov rooj ntawd. 14 Tiam sis lub qhov rooj nqaim thiab txoj kev me coj mus tau txoj sia, tsuas yog tsawg tus thiaj nrhiav tau xwb.

15 “Ceev faj cov ua txuj cev Vajtswv lus uas sab nraud zoo li yaj, tiam sis sab hauv zoo li tej hma tuag tshaib uas xav muab nej dua noj. 16 Thaum nej pom lawv tes hauj lwm,* nej yuav paub lawv. Tib neeg yeej de tsis tau txiv hmab ntawm tsob pos los sis txiv cev ntawm tsob nrhab ib zaug li. 17 Ib yam li ntawd, txhua tsob ntoo zoo yeej txi cov txiv zoo, txhua tsob ntoo phem yeej txi cov txiv phem. 18 Tsob ntoo zoo yeej txi tsis tau cov txiv phem thiab tsob ntoo phem yeej txi tsis tau cov txiv zoo. 19 Txhua tsob ntoo uas txi tsis tau tej txiv zoo yeej raug muab ntov pov hlawv. 20 Yog li ntawd, thaum nej pom lawv tes hauj lwm* nej yuav paub tias lawv yog cov uas ua txuj cev Vajtswv lus xwb.

21 “Tsis yog txhua tus uas hu kuv tias, ‘Tus Tswv, tus Tswv,’ yuav tau nkag rau hauv lub Nceeg Vaj* saum ntuj. Tsuas yog tus uas ua raws li kuv Leej Txiv uas nyob saum ntuj lub siab nyiam thiaj tau xwb. 22 Thaum txog hnub ntawd coob tus yuav hais rau kuv tias, ‘Tus Tswv, tus Tswv, peb twb tuav koj lub npe cev lus, tuav koj lub npe ntiab dab, thiab tuav koj lub npe ua ntau yam txuj ci tseem ceeb los sad?’ 23 Thaum ntawd kuv yuav teb lawv tias, ‘Kuv tsis paub nej! Cia li khiav mus, cov niag neeg lim hiam!’

24 “Yog li ntawd, txhua tus uas hnov kuv tej lus thiab coj raws nraim li ntawd yuav zoo ib yam li tus neeg muaj tswv yim ua tsev. Nws txhos nws lub tsev rau saum daim lag zeb. 25 Thaum nag xob nag cua los ntsawj thiab dej los nyab lub tsev los tsis vau rau qhov lub tsev twb txhos ruaj rau saum daim lag zeb lawm. 26 Tiam sis txhua tus uas hnov kuv tej lus no es tsis ua raws li ntawd, zoo ib yam li tus neeg tsis muaj tswv yim uas txhos nws lub tsev rau saum cov xuab zeb. 27 Thaum nag xob nag cua los ntsawj thiab dej los nyab lub tsev, lub tsev txawm vau hlo puas tsuaj tag.”

28 Thaum Yexus hais tej lus no tas, cov neeg coob coob ntawd xav tsis thoob rau nws lub tswv yim, 29 rau qhov nws muaj hwj chim qhia* tsis thooj li lawv cov xib hwb.*

8 Thaum Yexus nqes saum roob los, txawm muaj ib pab neeg coob heev raws nws qab. 2 Muaj ib tug yawg mob ruas txawm los khwb nkaus* ntawm Yexus ko taw thiab thov nws tias, “Tus Tswv, yog koj xav kho, koj yeej kho tau kuv zoo.” 3 Yexus cev loo tes mus tuav nkaus nws thiab hais tias, “Kuv xav los mas, cia li zoo hlo.” Tam sim ntawd, nws tej ruas txawm zoo hlo lawm tiag. 4 Ces Yexus hais rau nws tias, “Tsis txhob qhia leej twg paub li, cia li mus cuag cov pov thawj kom lawv tshuaj koj tus mob thiab muab khoom fij raws li Mauxes Txoj Kev Cai. Ua li no cov pov thawj thiaj pom tias koj zoo lawm tiag.”

5 Thaum Yexus mus rau hauv Khapena-us, muaj ib tug tub rog* txawm los thov nws. 6 Nws thov tias, “Yawg hlob, kuv tus tub txib mob hnyav heev tom tsev. Nws tuag tes tuag taw tas txom nyem ntsuav.” 7 Yexus thiaj teb nws tias, “Kuv mam mus kho nws.” 8 Tiam sis tus tub rog hais rau nws tias, “Yawg hlob, tus neeg zoo li kuv tsis tsim nyog koj mus rau hauv kuv tsev. Koj tsuas hais tib los xwb, kuv tus tub txib yeej yuav zoo. 9 Rau qhov kuv los yeej muaj lwm tus tswj kav, thiab kuv kuj tswj kav ib pab tub rog. Kuv txib tus no mus, nws yeej mus, kuv txib tus tod los, nws yeej los. Kuv txib kuv tus tub qhe ua dab tsi, nws yeej ua.” 10 Thaum Yexus hnov tus tub rog hais li ntawd, nws qhuas heev. Nws thiaj hais rau cov uas raws nws qab tias, “Kuv qhia tseeb rau nej tias, kuv yeej tsis tau pom cov Ixayees ib tug muaj kev ntseeg npaum li no. 11 Kuv qhia rau nej tias yuav muaj neeg coob heev nyob sab hnub tuaj sab hnub poob tuaj nrog Anplahas, Ixaj, thiab Yakhauj lawv koom tsum* hauv lub Nceeg Vaj* saum ntuj. 12 Tiam sis cov uas Vajtswv xub hu los rau hauv nws lub Nceeg Vaj* yuav raug muab pov rau sab nraud uas tsaus ntuj nti, mas lawv yuav quaj tom hniav qawv.” 13 Ces Yexus hais rau tus tub rog tias, “Cia li rov mus. Koj yeej yuav tau raws li koj ntseeg.” Tam sim ntawd tus tub txib txawm zoo hlo lawm.

14 Thaum Yexus mus txog hauv Petus tsev, nws pom Petus niam tais ua npaws pw saum txaj. 15 Yexus mus tuav nkaus nws txhais tes ces nws tus npaws tu nrho. Nws txawm sawv tsees los ua zaub ua mov rau Yexus lawv noj. 16 Thaum tsaus ntuj lawd, coob tus coj cov neeg raug dab tuaj cuag Yexus mas nws hais tib los xwb dab twb tawm plaws lawm thiab nws kuj kho cov muaj mob zoo huv si. 17 Tej no muaj tiav raws li Vajtswv tau hais rau Nws tus cev lus Yaxayas lawm tias, “Nws ris peb tej kab mob kev nkeeg.”

18 Thaum Yexus pom tias muaj neeg coob heev los ntsauv nws, Yexus thiaj kom lawv caij nkoj hla mus rau sab tid. 19 Ib tug xib hwb* txawm los cuag Yexus thiab hais tias, “Xib hwb, koj mus qhov twg los kuv yuav nrog koj mus.” 20 Tiam sis Yexus teb nws tias, “Tej hma los muaj qhov nkaum thiab tej noog saum nruab ntug los muaj zes tiam sis neeg Leej Tub tsis muaj lub chaw so li.” 21 Ces ho muaj dua ib tug thwj tim hais rau Yexus tias, “Tus Tswv, tos kuv txiv dua tso,* kuv mam nrog koj mus.” 22 Yexus teb nws tias, “Cia li nrog kuv mus. Cia cov tuag mam faus cov tuag.”

23 Thaum Yexus mus hauv nkoj, nws cov thwj tim kuj nrog nws mus thiab. 24 Ua ciav muaj cua daj cua dub hlob heev. Dej txawm nphau tej niag nthwv los nyab lub nkoj tiam sis Yexus pw tsaug zog ntsiag to. 25 Lawv quaj qw los tsa Yexus tias, “Tus Tswv, thov cawm peb, peb twb yuav tuag tam sim no!” 26 Tiam sis Yexus hais rau lawv tias, “Ua cas nej siab me ua luaj, tsis tso siab li?” Nws thiaj sawv tsees los txwv nag xob nag cua ces txawm tu nrho tam sid. 27 Nws cov thwj tim xav tsis thoob li, lawv thiaj hais tias, “Tus no yog leej twg tiag? Ua cas nws ho txwv tau nag xob nag cua thiab hiav txwv tib si?”

28 Thaum Yexus caij nkoj hla hiav txwv mus txog tim cheeb tsam Kadalees, muaj ob tug yawg raug dab tawm tom toj ntxas los ntsib nws. Nkawd tsiv heev, tib neeg thiaj tsis kav taug txoj kev ntawd li. 29 Nkawd txawm qw nrov nrov rau Yexus tias, “Vajtswv tus Tub, koj tuaj ua dab tsi ntawm no? Tsis yog koj tuaj rau txim rau peb ua ntej hnub uas Vajtswv teem tseg lod?” 30 Nyob tsis deb ntawd, muaj ib pab npua coob heev tab tom nrhiav noj. 31 Cov dab txawm thov Yexus tias, “Yog koj yuav ntiab peb tawm, cia peb mus rau hauv pab npua.” 32 Yexus thiaj hais rau lawv tias, “Cia li mus!” Cov dab thiaj tawm plaws mus rau hauv pab npua mas pab npua txawm dhia nrov ntwg mus poob tsag tsua tuag tas rau hauv hiav txwv lawm. 33 Cov neeg yug npua thiaj dhia loo mus hauv nroog mus qhia txhua yam uas lawv tau pom thiab qhov uas Yexus kho tau ob tug yawg raug dab. 34 Tag nrho lub nroog txawm tuaj saib Yexus. Thaum lawv pom Yexus, lawv hais kom nws tawm hauv lawv cheeb tsam mus.

9 Yexus thiaj nce nkoj thiab hla rov mus rau tim nws lub nroog. 2 Txawm muaj tib neeg kwv ib tug tuag tes tuag taw saum txaj tuaj cuag Yexus. Yexus pom tias lawv muaj kev ntseeg heev, nws thiaj hais rau tus tuag tes tuag taw tias, “Tub’e, txhob txhawj! Kuv twb zam koj lub txim lawm.” 3 Cov xib hwb* xav twj ywm tias, “Tus yawg no hais lus tuam mom Vajtswv lawm.” 4 Yexus paub tej uas lawv xav ntawd nws thiaj hais tias, “Ua cas nej xav phem ua luaj? 5 Leej twg los yeej hais tau tias, ‘Kuv zam koj lub txim lawm.’ Tiam sis leej twg yuav hais tau tias, ‘Cia li sawv tsees mus,’ es nws yuav sawv taus? 6 Kuv xav kom nej paub tias neeg Leej Tub muaj hwj chim zam tau neeg lub txim hauv ntiaj teb no.” Ces Yexus tig mus saib tus yawg tuag tes tuag taw thiab hais tias, “Cia li sawv tsees, nqa koj lub txaj mus tsev.” 7 Tus yawg ntawd txawm sawv tsees nqa hlo nws lub txaj mus tsev. 8 Thaum sawv daws pom tej no lawv xav tsis thoob li. Lawv thiaj qhuas Vajtswv, tus uas pub hwj chim rau neeg ua tau li ntawd.

9 Tom qab ntawd, Yexus mus pom ib tug txiv neej hu ua Mathais tom lub tsev sau se. Yexus hais rau nws tias, “Cia li nrog kuv mus.” Ces Mathais txawm sawv tsees nrog Yexus mus lawm. 10 Tom qab ntawd, thaum Yexus tseem noj mov hauv Mathais tsev, ua ciav txawm muaj cov neeg sau se thiab cov neeg txhaum coob tus tuaj nrog Yexus thiab nws cov thwj tim noj mov. 11 Thaum cov Falixais pom li ntawd, lawv hais rau Yexus cov thwj tim tias, “Ua cas nej tus xib hwb tseem nrog cov neeg sau se thiab cov neeg muaj txim koom tsum thiab?” 12 Thaum Yexus hnov cov Falixais hais li ntawd, nws teb tias, “Cov neeg tsis muaj mob yeej tsis mus cuag kws kho mob, cov uas muaj mob thiaj mus xwb. 13 Mus ua tib zoo nyeem nqe uas hais tias, ‘Kuv tsis xav kom nej tua tsiaj fij rau kuv xwb, tiam sis kuv xav kom nej muaj lub siab hlub* luag thiab.’ Yog li, kuv tsis yog los nrhiav cov neeg ncaj ncees* tiam sis kuv los nrhiav cov neeg muaj txim.”

14 Tom qab ntawd, Yauhas cov thwj tim kuj nug Yexus tias, “Ua cas peb cov thiab cov Falixais ua kev cai yoo mov es koj cov thwj tim ho tsis ua?” 15 Yexus teb lawv tias, “Thaum tus nraug vauv tseem nrog nws cov kwv luag noj tshoob ua ke, lawv yeej tsis nyuaj siab li, puas yog? Tiam sis muaj ib hnub luag yuav coj tus nraug vauv mus, thaum ntawd lawv mam yoo mov. 16 Tsis muaj leej twg yuav muab daim ntaub tshiab los ntxiv lub tsho qub, vim daim ntaub tshiab yuav rub lub tsho qub ces haj yam yuav ntuag loj. 17 Ib yam li ntawd, tsis muaj leej twg yuav muab cov cawv txiv hmab tshiab tsau rau hauv lub hnab tawv qub. Yog ua li ntawd, lub hnab tawv qub yuav tawg ces cov cawv yuav txeej tas. Lub hnab tawv kuj puas tsuaj lawm thiab. Tsuas muab cov cawv txiv hmab tshiab tsau rau hauv lub hnab tawv tshiab xwb, thiaj tsis tawg.”

18 Thaum Yexus tab tom hais tej no, muaj ib tug nom txawm los khwb nkaus* ntawm Yexus ko taw thiab thov nws tias, “Kuv tus ntxhais mob hnyav heev, ntshe tsam no nws twb tu siav lawm. Tiam sis yog koj mus cev tes npuab nws, nws yeej yuav ciaj rov los.”

19 Yexus thiaj sawv tsees mus, nws cov thwj tim kuj nrog nws mus thiab. 20 Txawm muaj ib tug poj niam uas nchuav cev tau 12 lub xyoos nam zog los kov Yexus lub tw tsho. 21 Tus poj niam ntawd pheej xav tias, “Yog kuv ib nyuag kov nws lub tw tsho mas kuv yeej yuav zoo xwb.” 22 Thaum Yexus tig loo mus pom nws, Yexus hais tias, “Me ntxhais’e, tsis txhob ntshai! Twb yog koj ntseeg, koj thiaj zoo.” Tam sim ntawd tus poj niam txawm zoo hlo lawm.

23 Thaum Yexus mus txog hauv tus nom lub tsev, nws pom muaj neeg tab tom tshuab raj thiab quaj ntsoog qees. 24 Yexus thiaj hais tias, “Tawm mus sab nraud. Tus me ntxhais tsis tau tuag, nws tsaug zog lawm xwb.” Lawv txawm luag Yexus zom zaws. 25 Thaum cov tib neeg tawm mus sab nraud lawm, Yexus mus rau ntawm tus me ntxhais thiab tuav nkaus nws txhais tes ces nws txawm sawv tsees. 26 Mas zaj no thiaj nrov ncha mus thoob plaws cheeb tsam ntawd.

27 Thaum Yexus sawv kev mus rau lwm qhov, muaj ob tug yawg dig muag caum Yexus thiab hu nrov nrov tias, “Daviv tus Xeeb Ntxwv’e, thov hlub* wb thiab lauj!” 28 Thaum Yexus mus rau hauv tsev los nkawd kuj raws nws qab mus thiab. Yexus thiaj nug nkawd tias, “Neb puas ntseeg tias kuv kho tau neb?” Nkawd teb tias, “Tus Tswv, wb yeej ntseeg.” 29 Ces Yexus txawm kov nkawd qhov muag thiab hais tias, “Vim neb ntseeg, neb yeej yuav pom kev.” 30 Ces nkawd txawm pom kev tam sid. Yexus txwv nkawd tias, “Tsis txhob qhia tej no rau leej twg paub li.” 31 Tiam sis thaum nkawd tawm mus, nkawd muab qhia thoob zej thoob zos lawm.

32 Thaum ob tug yawg dig muag yuav sawv kev mus, tib neeg txawm coj ib tug yawg raug dab uas hais tsis tau lus tuaj cuag Yexus. 33 Tom qab Yexus ntiab tus dab ntawd tawm, tus txiv neej txawm hais tau lus lawm. Cov neeg coob coob xav tsis thoob li, lawv thiaj hais tias, “Peb tsis tau pom dua tej no hauv teb chaws Ixayees ib zaug li.” 34 Tiam sis cov Falixais hais tias, “Twb yog tus thawj kav cov dab pub hwj chim rau nws ntiab dab ntag.”

35 Ces Yexus ncig mus thoob plaws tej zej zos, mus qhia hauv tej tsev pe hawm thiab tshaj tawm txoj xov zoo txog Vajtswv txoj kev kav* thiab kho txhua yam kab mob kev nkeeg uas tib neeg muaj huv si. 36 Thaum Yexus pom cov neeg coob coob ntawd, nws hlub lawv heev vim lawv zoo li pab yaj uas tshaib tshaib* tsis muaj tus tswv yug. 37 Ces nws hais rau nws cov thwj tim tias, “Tej qoob twb siav zoo hlais lawm, tiam sis cov tub zog tsis muaj coob. 38 Cia li thov tus Tswv teb txib neeg mus sau nws tej qoob loo.”

10 Yexus txawm txib nws 12 tug thwj tim mus thiab pub hwj chim rau lawv ntiab tau dab thiab kho tau txhua yam kab mob kev nkeeg.

2 Yexus 12 tug tub txib npe hu li no, Ximoos uas hu ua Petus thiab nws tus kwv Anrus. Yakaunpaus thiab Yauhas uas yog Xenpedis ob tug tub. 3 Filis thiab Npathaulaumais. Mathais tus uas yog neeg sau se thiab Thaumas. Yakaunpaus uas yog Afe-as tus tub thiab Thade-as. 4 Ximoos tus uas kub siab* thiab Yudas Ikhali-aus tus uas tom qab no tau ntxeev siab rau Yexus.

5 Yexus txib lawv 12 leeg mus tshaj tawm li no, “Tsis txhob mus rau tej koog uas lwm haiv neeg nyob los sis mus rau tej nroog uas cov Xamalis nyob. 6 Tiam sis tau hau ntsoov mus qhia haiv neeg Ixayees uas zoo li pab yaj poob zoo lawd. 7 Thaum nej mus tshaj tawm, cia li qhia tias, ‘Vajtswv txoj kev kav* twb los ze lawm.’ 8 Kho cov neeg muaj mob, tsa cov tuag sawv, kho cov neeg mob ruas, thiab ntiab dab tawm. Vajtswv pub dawb dawb rau nej mas nej cia li pub dawb dawb rau lwm tus. 9 Tsis txhob npaj nyiaj npaj kub los sis txiaj toog liab rau hauv nej tej hnab nyiaj. 10 Tsis txhob ntim su los sis npaj khaub ncaws hloov.* Tsis txhob npaj khau los sis pas nrig. Yeej tsim nyog tus uas siv zog ua hauj lwm tau noj tau haus.

11 “Txawm nej mus rau lub nroog twg thiab lub zos twg los cia li nrhiav cov uas zoo siab tos txais nej thiab nrog lawv nyob mus txog thaum nej tawm mus rau lwm qhov. 12 Thaum nej mus txog hauv tsev, cia li foom koob hmoov* rau tsev neeg ntawd. 13 Yog lawv zoo siab tos txais nej ces lawv yuav tau koob hmoov. Tiam sis yog lawv tsis kam tos txais nej ces tej koob hmoov yuav rov qab los rau nej tib si. 14 Yog leej twg tsis kam tos txais nej los sis tsis kam mloog nej qhia ces thaum nej tawm hauv lub tsev thiab lub nroog ntawd mus, cia li nchos tej hmoov av uas lo nej ko taw tseg.* 15 Ntshe thaum txog Hnub Txiav Txim mas lub nroog ntawd tseem yuav raug sab tshaj lub nroog Xaudoos thiab Kaumaulas.

16 “Saib nawd! Kuv txib nej tawm mus ib yam li pab yaj mus rau hauv cov hma. Cia li xyuam xim li nab thiab dawb huv li nquab. 17 Ceev faj, vim luag yuav ntes nej mus kom hauv tej tsev tu plaub thiab yuav muab nej nplawm hauv lawv tej tsev pe hawm. 18 Lawv yuav coj nej mus kom ntawm tej tswv xeev thiab tej vaj ntxwv vim nej yog kuv cov thwj tim. Thaum ntawd nej yuav ua tim khawv rau tej nom tswv thiab lwm haiv neeg. 19 Thaum lawv ntes nej mus hais plaub, tsis txhob txhawj tias nej yuav teb li cas. Thaum txog lub sij hawm ntawd, Vajtswv yuav pab nej teb lawv. 20 Tsis yog nej hais nej xwb, tiam sis nej Leej Txiv lub hwj huam dawb huv yuav pab kom nej txawj hais. 21 Tsis tas li ntawd xwb, txawm yog ob kwv tij los, ib tug yuav muab ib tug cob rau luag tua. Ob txiv tub los leej txiv yuav muab me nyuam cob rau luag tua. Me nyuam los yuav sawv tawm tsam niam txiv thiab muab nkawd cob rau luag tua. 22 Tib neeg yuav ntxub nej vim nej yog kuv cov thwj tim. Tiam sis tus uas thev mus txog thaum kawg yuav dim. 23 Thaum luag tsim txom nej hauv ib lub nroog twg, cia li khiav mus rau lwm lub. Kuv hais ncaj qha rau nej tias, thaum nej tshaj tawm tsis tau thoob tej nroog hauv Ixayees teb ces neeg Leej Tub twb los lawm.

24 “Tib neeg yeej hwm tus xib hwb dua tus tub kawm, thiab yeej hwm tus los pav* dua tus tub qhe. 25 Tsim nyog tus tub kawm zoo siab raug tej uas tus xib hwb raug, thiab tsim nyog tus tub qhe zoo siab raug tej uas tus los pav raug. Yog luag twb muab tus tswv tsev hu ua Npexenpus lawm ces luag yeej yuav muab nws tsev neeg hu phem tshaj ntawd thiab. 26 Yog li, tsis txhob ntshai lawv vim tej uas muab npog cia lawd yuav muab nthuav rau sawv daws pom, thiab tej uas muab zais cia lawd yuav muab qhia rau sawv daws paub. 27 Tej uas kuv hais twj ywm rau nej, cia li muab qhia rau sawv daws. Tej uas kuv ntxhi rau nej, cia li muab tshaj tawm rau ib zej tsoom hnov. 28 Tsis txhob ntshai cov uas tua tau lub cev tiam sis tua tsis tau txoj sia. Tsim nyog ntshai Vajtswv tus uas ua tau rau lub cev thiab txoj sia puas tsuaj huv si.* 29 Ob tug noog tsev tsuas muag tau ib lub txiaj toog xwb los tsis yog? Txawm li ntawd los, yog ib tug poob* rau hauv av, nej Leej Txiv yeej paub tib si. 30 Txawm nej cov plaub hau los Vajtswv yeej paub tias muaj pes tsawg txoj. 31 Yog li ntawd, tsis txhob poob siab, nej tseem muaj nqis dua tej noog tsev huv si.

32 “Yog leej twg lees paub kuv tab meeg sawv daws ces kuv yuav lees paub tus ntawd tab meeg kuv Leej Txiv uas nyob saum ntuj ceeb tsheej thiab. 33 Tiam sis yog leej twg tsis lees paub kuv tab meeg sawv daws ces kuv yuav tsis lees paub tus ntawd tab meeg kuv Leej Txiv uas nyob saum ntuj ceeb tsheej thiab. 34 Tsis txhob xav tias kuv los ua kom ntiaj teb sib haum xeeb tiam sis kuv los ua kom ntiaj teb sib cais.* 35 Kuv los cais lub cuab lub yig, kom tub tawm tsam txiv, ntxhais tawm tsam niam, thiab nyab tawm tsam pog. 36 Yus tsev neeg yuav yog yus cov yeeb ncuab ntag. 37 Tus uas hlub nws niam nws txiv heev dua hlub kuv, tsis tsim nyog ua kuv tus thwj tim. Thiab tus uas hlub nws tub nws ntxhais heev dua hlub kuv, tsis tsim nyog ua kuv tus thwj tim. 38 Tus uas tsis kam kwv nws tus ncej ntoo* raws kuv qab tsis tsim nyog ua kuv tus thwj tim. 39 Tus uas khuv xim nws txoj sia yuav tsis tau txoj sia tiam sis tus uas yeem tuag rau kuv yuav rov tau txoj sia.

40 “Tus uas tos txais nej kuj yog tos txais kuv, thiab tus uas tos txais kuv kuj yog tos txais tus uas txib kuv los. 41 Vajtswv foom koob hmoov rau cov cev Vajtswv lus thiab cov neeg ncaj ncees. Tus uas tos txais lawv vim lawv yog Vajtswv cov tub qhe yuav tau koob hmoov ib yam li lawv. 42 Thiab yog leej twg muab ib khob dej txiag rau cov uas yau dua ntais no ib tug haus vim tus ntawd yog kuv tus thwj tim, kuv qhia tseeb rau nej tias tus ntawd yeej yuav tau koob hmoov xwb xwb li.”

11 Thaum Yexus cob qhia nws 12 tug thwj tim tas lawd, nws txawm sawv kev mus tshaj tawm thiab qhia txoj xov zoo hauv tej nroog uas nyob ib ncig ntawd.

2 Thaum Yauhas nyob hauv tsev loj cuj, nws hnov txog tej uas tus Khetos tau ua. Nws thiaj txib nws ob tug thwj tim 3 mus nug Yexus tias, “Koj puas yog tus uas peb niaj hnub tos, los tseem tshuav lwm tus?” 4 Yexus teb nkawd tias, “Cia li mus qhia tej uas neb pom thiab hnov rau Yauhas, 5 cov dig muag pom kev, cov lag ntseg hnov lus, cov ceg tawv mus taus kev, cov mob ruas zoo huv, cov tuag ciaj sawv rov los, thiab cov txom nyem twb hnov txoj xov zoo lawm. 6 Tus uas tso siab rau kuv es tsis ua xyem xyav yuav zoo siab.”

7 Thaum nkawd rov mus lawm, Yexus txawm pib qhia txog Yauhas rau cov neeg coob coob ntawd tias, “Nej mus tom roob moj sab qhua, nej pom dab tsi? Puas yog tus tauj deg uas cua ntsawj rawv mus rawv los? Tsis yog. 8 Yog li, nej pom leej twg? Puas yog ib tug hnav tsuj hnav npuag? Cov uas hnav tsuj hnav npuag tsuas nyob hauv vaj ntxwv tsev xwb los sav. 9 Nws yog leej twg tiag? Puas yog ib tug cev Vajtswv lus? Kuv qhia rau nej tias, Yauhas yeej yog ib tug cev Vajtswv lus tiag. Nws tseem loj dua tus cev Vajtswv lus lawm thiab. 10 Twb muaj lus sau cia txog Yauhas tias, ‘Kuv yuav txib kuv tus tub xa xov ua koj ntej. Nws yuav kho kev tos koj!’ 11 Kuv hais ncaj qha rau nej tias, tej neeg uas yug los lawd tsis muaj ib tug loj dua Yauhas tus uas muab neeg ua kev cai raus dej. Txawm li ntawd los, tus uas me tshaj hauv lub Nceeg Vaj* saum ntuj tseem loj dua Yauhas. 12 Txij thaum Yauhas tus uas muab neeg ua kev cai raus dej pib ua nws tes hauj lwm los, tib neeg siv zog ntsos peem kom tau lub Nceeg Vaj* saum ntuj. Tsuas yog cov uas peem tiag tiag thiaj tau xwb. 13 Tag nrho cov cev Vajtswv lus thiab Mauxes Txoj Kev Cai puav leej hais txog tej no los txog ntua Yauhas lub caij. 14 Txawm nej ntseeg los tsis ntseeg, Yauhas yeej yog tus ‘Eliyas uas cov cev Vajtswv lus tau hais tseg tias yuav los.’ 15 Leej twg muaj pob ntseg, cia li mloog.

16 “Kuv yuav muab tiam no piv li cas? Lawv zoo li tej me nyuam yaus uas zaum tom tshav puam uas hu rau lawv cov npoj. 17 Lawv hu tias, ‘Peb twb tshuab raj rau nej los nej tsis kam seev cev. Peb twb tsa suab hlo quaj los nej tsis mob siab.’* 18 Ib yam li ntawd, thaum Yauhas los nws tsis noj tsis haus li sawv daws los tib neeg hais tias, ‘Nws raug dab.’ 19 Thaum neeg Leej Tub los nws ho nrog sawv daws noj thiab haus los tib neeg tseem hais tias, ‘Ntsia seb! Tus yawg no noj loj haus loj, nws tseem nrog tej neeg sau se thiab tej neeg txhaum ntaus phooj ywg thiab.’ Tiam sis yus tes hauj lwm ua pov thawj tias yus yog tus neeg muaj tswv yim.”*

20 Muaj cov nroog uas tau pom Yexus ua txuj ci tseem ceeb ntau tshaj los lawv tseem tsis kam hloov dua siab tshiab. Yexus thiaj cem lawv tias, 21 “Cov neeg hauv Khaulaxis thiab Npexedas’e, nej yuav txom nyem lauj! Yog cov neeg hauv Thailab thiab Xaidoos pom kuv ua txuj ci, ntshe lawv twb hnav ntaub tsaj tsau qhov tshauv thiab hloov dua siab tshiab ntxov lawm. 22 Ntshe thaum txog Hnub Txiav Txim, nej tseem yuav raug sab tshaj lub nroog Thailab thiab Xaidoos. 23 Nej cov uas nyob hauv Khapena-us’e, yuav muab nej tsa kom nto ntuj lod? Tsuas yuav muab nej txo mus rau hauv lub qhov tuag* xwb. Yog cov neeg hauv Xaudoos pom tej txuj ci uas kuv ua hauv nej lub nroog, ntshe lub nroog ntawd tseem nyob los txog tav no. 24 Kuv qhia rau nej tias, thaum txog Hnub Txiav Txim nej tseem yuav raug sab tshaj lub nroog Xaudoos.”

25 Lub sij hawm ntawd Yexus txawm hais tias, “Kuv Leej Txiv uas yog tus Tswv ntuj Tswv teb, kuv qhuas koj tab meeg sawv daws rau qhov koj muab tej no zais ntawm cov neeg muaj tswv yim thiab txawj ntse. Koj ho muab qhia rau cov neeg uas txo hwj chim li tej me nyuam yaus. 26 Kuv Leej Txiv, kuv qhuas koj rau qhov koj yeej pom zoo kom muaj li no.” 27 Ces Yexus txawm hais tias, “Kuv Leej Txiv twb qhia tej no huv si rau kuv lawm. Tsis muaj leej twg paub Leej Tub zoo npaum li Leej Txiv, kuj tsis muaj leej twg paub Leej Txiv zoo npaum li Leej Tub. Leej Tub qhia Leej Txiv rau tus twg, tus ntawd thiaj paub xwb. 28 Nej cov uas khwv iab khwv daw thiab ris nra hnyav hnyav, cia li los cuag kuv. Kuv yuav cia nej so. 29 Nrog kuv ris kuv lub nra es cia kuv qhia nej. Kuv txo hwj chim thiab muaj siab mos siab muag. Yog nej ua li no, nej yuav tau so los siav. 30 Rau qhov kuv lub nra yooj yim ris thiab sib heev.”

12 Muaj ib hnub Xanpataus, Yexus thiab nws cov thwj tim hla ib daim teb mog.* Cov thwj tim tshaib plab, lawv thiaj zaws hnab mog los tev noj. 2 Thaum cov Falixais pom li ntawd, lawv hais rau Yexus tias, “Saib maj! Koj cov thwj tim ua tej uas txwv tsis pub ua rau hnub Xanpataus.” 3 Yexus teb lawv tias, “Nej tsis tau nyeem txog Daviv lod? Muaj ib zaug Daviv thiab nws cov kwv luag tshaib plab. 4 Nws thiaj mus rau hauv Vajtswv lub tsev* thiab muab cov ncuav uas fij rau Vajtswv lawd los rau lawv noj. Yog yam uas cov pov thawj thiaj muaj cai noj xwb los sad? 5 Nej tsis tau nyeem Mauxes Txoj Kev Cai lod? Hnub Xanpataus cov pov thawj hauv lub tuam tsev yeej ua hauj lwm tas zog los twb tsis txhaum. 6 Kuv qhia rau nej tias muaj ib tug uas tseem ceeb dua lub tuam tsev nyob ntawm no. 7 Vajtswv Txoj Lus twb hais tias, ‘Kuv tsis xav kom nej tua tsiaj fij rau kuv tiam sis kuv xav kom nej muaj lub siab hlub* luag.’ Yog nej to taub nqe no ces nej twb tsis liam txim rau cov uas tsis tau ua txhaum. 8 Vim neeg Leej Tub yog tus Tswv uas kav hnub Xanpataus.”

9 Tom qab ntawd, Yexus mus rau hauv lub tsev pe hawm. 10 Muaj ib tug yawg qhuav tes kuj tuaj rau hauv thiab. Cov Falixais thiaj nug Yexus tias, “Kho mob rau hnub Xanpataus puas txhaum?” Lawv txhob txwm nug Yexus kom tau kev liam nws. 11 Nws thiaj teb lawv tias, “Hnub Xanpataus yog nej leej twg muaj ib tug yaj poob hauv qhov, nws tseem yuav tsis mus muab rho tawm thiab lod? 12 Tib neeg tseem muaj nqis dua tej yaj! Yog leej twg ua ib yam zoo rau hnub Xanpataus yeej tsis txhaum.” 13 Ces Yexus hais rau tus yawg qhuav tes tias, “Cia li xyab hlo koj txhais npab.” Thaum nws xyab hlo, nws txhais tes txawm zoo kiag li sab tod lawm. 14 Cov Falixais txawm tawm mus tuav tswv yim seb yuav ua li cas thiaj tua tau Yexus. 15 Thaum Yexus paub li no, nws cia li sawv kev mus rau lwm qhov lawm. Muaj neeg coob coob raws nws qab, nws kho lawv tej mob zoo huv si. 16 Tiam sis nws txwv tsis pub lawv qhia rau leej twg paub txog nws li, 17 kom muaj tiav raws li Vajtswv tau hais rau Yaxayas tus uas cev Nws lus tias,

18 “Tus no yog kuv tus tub txib uas kuv xaiv tseg. Kuv hlub nws heev. Nws ua haum kuv siab. Kuv yuav pub kuv lub hwj huam rau nws thiab nws yuav qhia ib tsoom neeg kom coj ncaj raws li kuv lub siab nyiam. 19 Nws yuav tsis tsa ncauj nrog luag sib cav sib ceg thiab yuav tsis muaj leej twg hnov nws lub suab nrov tom tej tshav puam. 20 Tus tauj deg uas lov lawm los nws yuav tsis muab tu, thiab tus teeb xeeb uas cig pluj pliv los nws yuav tsis muab tua mus txog thaum nws coj kev ncaj ncees los rau txhua qhov. 21 Txhua haiv neeg yuav vam khom nws.”*

22 Muaj neeg coj ib tug yawg raug dab uas dig muag thiab hais tsis tau lus tuaj cuag Yexus mas Yexus kho nws zoo, nws thiaj pom kev thiab hais tau lus lawm. 23 Cov neeg coob coob ntawd xav tsis thoob li. Lawv txawm hais zom zaws tias, “Ntshe tus no yog Daviv tus Xeeb Ntxwv kaj?” 24 Thaum cov Falixais hnov li ntawd lawv hais tias, “Yuav tsum yog Npexenpus* uas yog dab tus thawj pub hwj chim rau nws ntiab dab xwb.” 25 Yexus paub tej uas lawv hais ntawd, nws thiaj hais rau lawv tias, “Txhua lub teb chaws uas rov sib tawm tsam yuav puas tsuaj mus, txhua lub nroog thiab txhua tsev neeg uas tsis koom siab yuav tawg ri sua. 26 Ib yam li ntawd, yog Xatas rov ntiab Xatas ces kuj yog nws rov rhuav nws tes hauj lwm. Nws txoj kev kav puas yuav ruaj khov? 27 Tsis tas li ntawd, yog Npexenpus pub hwj chim rau kuv ntiab dab ces leej twg ho pub hwj chim rau nej cov thwj tim ntiab dab thiab? Nej cov thwj tim tes hauj lwm twb qhia tias nej hais tsis yog lawm. 28 Yog Vajtswv lub hwj huam ua rau kuv ntiab tau dab ces qhia tias Vajtswv txoj kev kav* twb los txog lawm, tiam sis nej tsis paub. 29 Yog tus tswv tsev muaj zog heev, leej twg yuav txeem tau mus rau hauv nws lub tsev mus lws nws tej cuab txhiaj cuab tam? Yuav tsum muab nws khi ua ntej tso mam txeem tau mus rau hauv. 30 Tus uas tsis kam tuaj kuv tog yeej tawm tsam kuv thiab tus uas tsis kam mus coj neeg los cuag kuv, tseem yuav ua rau neeg khiav ntawm kuv mus.

31 “Twb yog vim li ntawd, kuv thiaj hais rau nej tias, Vajtswv yeej zam tau txhua yam kev txhaum uas neeg ua. Txawm yog thuam tej yam dawb huv los nws kuj zam tau thiab. Tiam sis tus uas txhob txwm thuam lub hwj huam dawb huv, Vajtswv yeej yuav zam tsis tau. 32 Piv txwv tias, tus uas thuam neeg Leej Tub los Vajtswv zam tau. Tiam sis tus uas txhob txwm thuam lub hwj huam dawb huv, Vajtswv yeej zam tsis tau li, tsis hais tiam no los sis tiam tom ntej.

33 “Yog koj ua zoo tu tsob ntoo ces yuav txi tau cov txiv zoo, yog koj tsis ua zoo tu ces yuav txi tau cov txiv phem. Yog koj saib cov txiv koj yeej paub tias tsob ntoo zoo li cas. 34 Cov niag noob nab, nej lub niag siab phem es nej yuav ua li cas hais tau lus zoo? Vim lub siab xav li cas, lub ncauj hais tawm li ntawd. 35 Tus neeg zoo xav ntsoov txog yam zoo hauv nruab siab, nws thiaj hais tawm yam zoo xwb. Tiam sis tus neeg phem xav ntsoov txog yam phem hauv nruab siab, nws thiaj hais tawm tej yam phem. 36 Kuv qhia rau nej tias thaum txog Hnub Txiav Txim, txhua tus uas hais lus tsis muaj qab hau yuav tau ris tej uas lawv hais. 37 Yog li ntawd, yog nej hais lus zoo ces Vajtswv yuav suav tias nej yog neeg ncaj ncees. Tiam sis yog nej hais lus phem ces Vajtswv yuav txiav txim rau nej.”

38 Cov xib hwb* thiab cov Falixais thiaj teb Yexus tias, “Xib Hwb, peb xav pom koj ua txuj ci peb thiaj paub tias Vajtswv txib koj los tiag.” 39 Yexus teb lawv tias, “Tiam neeg lim hiam uas tsis muab siab npuab Vajtswv, nej xav pom txuj ci kawg tiam sis nej yuav pom qhov txuj ci uas tau muaj rau Yaunas tus uas cev Vajtswv lus xwb. 40 Yaunas nyob hauv ntses lub plab peb hnub peb hmos li cas, neeg Leej Tub yuav nyob hauv nruab a peb hnub peb hmos ib yam li ntawd. 41 Thaum txog Hnub Txiav Txim, cov Ninaves yuav nrog tiam neeg no sawv hauv qhov tuag rov los. Cov Ninaves yuav phua cai rau tiam neeg no. Tos lawv phua cai los twb yog thaum lawv hnov Yaunas qhia, lawv txawm hloov dua siab tshiab. Kuv qhia rau nej tias tseem muaj ib tug loj dua Yaunas nyob ntawm no. 42 Thaum txog Hnub Txiav Txim, tus poj vaj uas nyob nram qab teb yuav nrog tiam neeg no sawv hauv qhov tuag rov los. Nws yuav phua cai rau tiam neeg no. Tos nws phua cai los, nws tuaj puag nram qab teb tuaj mloog Xalaumoos tej tswv yim. Kuv qhia rau nej tias tseem muaj ib tug loj dua Xalaumoos nyob ntawm no thiab.

43 “Thaum dab* tawm hauv ib tug neeg mus, tus dab ncig mus ncig los tom teb chaws moj sab qhua tiam sis nrhiav tsis tau chaw nyob. 44 Tus dab txawm hais tias, ‘Kuv mam rov mus rau tus neeg uas kuv tawm tuaj.’ Thaum nws rov los txog, ua ciav tus neeg ntawd zoo li lub tsev uas twb muab cheb tu du lug tiam sis khoob ntshuv cia xwb. 45 Tus dab thiaj mus coj tau xya tus dab uas tseem tsiv tshaj nws los nyob hauv tus neeg ntawd. Thaum kawg, tus neeg ntawd lub neej haj yam phem tshaj thaum chiv thawj. Tiam neeg no zoo li tus neeg ntawd ntag.”

46 Thaum Yexus tseem qhia cov neeg coob coob, nws niam thiab nws cov kwv tuaj sawv sab nraud xav nrog nws tham. 47 Ib tug thiaj los hais rau Yexus tias, “Koj niam thiab koj cov kwv nyob sab nraud xav nrog koj tham.” 48 Yexus thiaj teb nws tias, “Leej twg yog kuv niam? Leej twg yog kuv cov kwv?” 49 Ces nws txawm taw tes rau nws cov thwj tim thiab hais tias, “Cov no yog kuv niam thiab kuv cov kwv ntag. 50 Tus uas coj raws li kuv Leej Txiv saum ntuj lub siab nyiam thiaj yog kuv tus kwv tij, kuv tus muam, thiab kuv niam.”

13 Hnub ntawd Yexus tawm hauv lub tsev ntawd mus zaum ntawm ntug hiav txwv. 2 Muaj neeg coob coob tuaj cuag nws, nws thiaj nce mus zaum hauv ib lub nkoj. Sawv daws nyob tim ntug hiav txwv. 3 Ces Yexus txawm ua lus piv txwv qhia lawv txog ntau yam. Nws qhia tias, “Muaj ib tug yawg tawm mus tseb noob. 4 Thaum nws tseb, muaj ib co poob rau hauv txoj kev ces noog txawm los khaws noj lawm. 5 Muaj ib co poob rau saum cov av uas muaj pob zeb tiv. Av tsis tob cov noob thiaj nthaw kaus sai heev. 6 Tiam sis vim cov cag ntsia av tsis tob, thaum tshav ntuj tuaj ziab cov kaus thiaj ntsws tas lawm. 7 Muaj ib co ho poob rau hauv cov pos ces pos hlob tuaj laum tuag tas lawm. 8 Muaj dua ib co poob rau hauv thaj av zoo thiaj loj hlob txhawv taus. Tej hnab ntsu tau 100 npaug, tej hnab ntsu tau 60 npaug, tej hnab ntsu tau 30 npaug. 9 Leej twg muaj pob ntseg, cia li mloog.”

10 Cov thwj tim thiaj los nug Yexus tias, “Ua li cas koj pheej ua lus piv txwv qhia lawv xwb?” 11 Yexus thiaj teb tias, “Vajtswv pub nej paub txog nws txoj kev kav* uas tau muab npog cia lawm tiam sis nws tsis pub lawv paub. 12 Tus uas twb paub lawd, Vajtswv tseem yuav pub kom nws paub ntau tshaj ntxiv. Tiam sis tus uas tsis paub, txawm nws paub me ntsis xwb los, Vajtswv tseem yuav muab tshem ntawm nws mus thiab. 13 Cov neeg no saib tas saib thiab los lawv tsis pom. Lawv mloog tas mloog thiab los lawv tsis to taub. Twb yog li ntawd, kuv thiaj ua lus piv txwv qhia lawv xwb. 14 Tej uas lawv ua no muaj tiav raws li Yaxayas tus uas cev Vajtswv lus tau hais tseg tias, ‘Txawm nej hnov los nej yuav tsis to taub, txawm nej saib los nej yuav tsis pom. 15 Cov neeg no lub siab tawv heev. Lawv hnov tiam sis lawv tsis quav ntsej. Lawv tsis xav pom lawv thiaj qi qhov muag, lawv tsis xav hnov lawv thiaj ntsaws qhov ntsej. Twb yog vim li ntawd, lawv thiaj tsis to taub tej uas kuv qhia. Lawv tsis kam hloov dua siab tshiab kom kuv tau kho lawv.’

16 “Zoo siab kawg li uas nej qhov muag tau pom thiab nej pob ntseg tau hnov. 17 Kuv hais ncaj qha rau nej tias, cov cev Vajtswv lus thiab cov neeg ncaj ncees thaum ub xav pom tej uas nej pom thiab xav hnov tej uas nej hnov, tiam sis lawv tsis tau pom thiab tsis tau hnov.

18 “Zaum no ua tib zoo mloog kuv txhais zaj lus piv txwv txog tus yawg tseb noob. 19 Lub noob uas poob rau hauv txoj kev yog tus uas hnov txoj lus txog Vajtswv txoj kev kav* tiam sis nws tsis to taub, Xatas* thiaj los txeeb txoj lus ntawd hauv nws lub siab mus lawm. 20 Lub noob uas poob rau saum cov av uas muaj pob zeb tiv yog tus uas hnov dheev txog txoj lus es zoo siab hlo ntseeg tam sid. 21 Tiam sis txoj lus ntawd ntsia tsis ruaj rau hauv nws lub siab, nws thiaj ntseeg ib ntus xwb. Thaum nws raug kev txom nyem thiab kev tsim txom ces nws txawm tso tseg lawm. 22 Lub noob uas poob rau hauv cov pos yog tus uas hnov Vajtswv txoj lus tiam sis tej kev txhawj xeeb hauv lub neej* thiab kev ntshaw nyiaj txiag muab nws laum lawm thiaj txi tsis taus txiv. 23 Lub noob uas poob rau hauv thaj av zoo yog tus uas hnov txoj lus thiab to taub tej lus ntawd. Nws thiaj loj hlob txhawv taus. Tej tug thiaj ntsu tau 100 npaug, tej tug ntsu tau 60 npaug, tej tug ntsu tau 30 npaug.”

24 Nws rov qhia dua ib zaj lus piv txwv rau cov neeg coob coob tias, “Vajtswv txoj kev kav* zoo li ib tug yawg uas mus tseb noob mog* rau hauv nws daim teb. 25 Thaum ib tag hmo sawv daws tsaug zog tas, nws tus yeeb ncuab nyiag kev mus tseb noob txhauv xyaw rau ces txawm mus lawm. 26 Thaum cov mog loj hlob thiab txhawv lawd, kuj muaj txhauv tuaj xyaw thiab. 27 Cov tub qhe thiaj mus nug tus tswv teb tias, ‘Yawg hlob, thaum koj tseb noob, koj tseb noob mog xwb los sad? Ua cas ho muaj txhauv tuaj xyaw thiab?’ 28 Tus tswv teb hais rau lawv tias, ‘Yeeb ncuab ua xwb lauj.’ Cov tub qhe thiaj hais tias, ‘Koj puas xav kom peb mus dob cov txhauv pov tseg?’ 29 Nws teb tias, ‘Txhob maj dob, tsam nej dob tau cov mog lawm thiab. 30 Cia cov txhauv thiab cov mog tuaj ua ke mus txog caij hlais tso. Thaum ntawd kuv mam qhia kom cov uas hlais qoob xub hlais cov txhauv muab pav ua tej tes coj mus pov hlawv tso ces mam hlais cov mog coj mus rau hauv kuv lub txhab.’”

31 Yexus rov qhia dua ib zaj lus piv txwv rau lawv tias, “Vajtswv txoj kev kav* piv ib yam li lub noob me me* uas ib tug yawg coj mus cog rau hauv nws daim teb. 32 Lub noob ntawd yeej me dua ntais tiam sis thaum loj hlob lawd, yog ib tsob ntoo uas loj dua tej zaub huv si. Tej noog saum nruab ntug thiaj ya los nkaum hauv tej ceg.”

33 Yexus rov qhia dua ib zaj lus piv txwv rau lawv tias, “Vajtswv txoj kev kav* piv ib yam li tej keeb* uas ib tug poj niam muab xyaw peb maum taig* hmoov mog, ua rau tej hmoov ntawd su tuaj.”

34 Tag nrho tej no Yexus ua lus piv txwv qhia cov neeg coob coob ntawd. Tsis muaj ib zaj uas nws tsis ua lus piv txwv qhia li, 35 kom muaj tiav raws li tus cev Vajtswv lus tau hais tseg no, “Kuv yuav ua lus piv txwv qhia. Kuv yuav tshaj tawm tej uas tau muab npog cia txij thaum ntuj tsim teb raug* los.”

36 Tom qab Yexus tso cov neeg coob coob mus lawd, nws txawm mus rau hauv tsev. Nws cov thwj tim thiaj los nug nws tias, “Thov txhais zaj lus piv txwv txog tej txhauv uas tuaj xyaw tej mog rau peb.” 37 Yexus teb lawv tias, “Tus yawg uas tseb noob mog piv txog neeg Leej Tub. 38 Daim teb piv txog lub qab ntuj. Cov noob mog piv txog cov uas yuav nrog Vajtswv nyob nws lub Nceeg Vaj.* Tiam sis cov txhauv piv txog cov uas coj raws li Ntxwg Nyoog* lub siab nyiam. 39 Tus yeeb ncuab uas tseb cov noob txhauv piv txog Ntxwg Nyoog. Lub caij hlais piv txog lub caij kawg rau lub sim ceeb* no. Cov hlais qoob piv txog cov tub txib saum ntuj. 40 Cov hlais qoob muab tej txhauv pav ua tej tes coj mus hlawv li cas ces lub sim ceeb* no yuav kawg ib yam li ntawd. 41 Neeg Leej Tub yuav txib nws cov tub txib saum ntuj mus muab txhua tus uas txw kom tib neeg ua txhaum thiab ua lim hiam tshem tawm hauv nws lub Nceeg Vaj* mus. 42 Cov tub txib saum ntuj yuav muab cov ntawd pov rau hauv lub cub tawg uas cig ntswj pes yos ces lawv yuav quaj tom hniav qawv nyob qhov ntawd. 43 Thaum ntawd cov ncaj ncees yuav ci ntsa iab ib yam li lub hnub hauv Leej Txiv lub Nceeg Vaj.* Leej twg muaj pob ntseg, cia li mloog.

44 “Vajtswv txoj kev kav* piv ib yam li hub nyiaj hub kub uas luag muab faus rau hauv ib daim teb. Muaj ib tug yawg mus pom ces nws txawm muab zais twj ywm cia. Nws zoo siab heev nws thiaj muab nws tej cuab txhiaj cuab tam muag huv si coj mus yuav daim teb ntawd.

45 “Vajtswv txoj kev kav* kuj piv ib yam li tej hlaws muaj nqis uas ib tug tub luam nrhiav ib qho rau ib qho. 46 Thaum nws nrhiav tau ib lub uas muaj nqis heev, nws maj nroos muab nws tej cuab txhiaj cuab tam muag huv si coj mus yuav.

47 “Vajtswv txoj kev kav* kuj piv ib yam li lub vas uas luag muab cuab rau hauv hiav txwv es mag tau ntau yam ntses, tus zoo li cas los muaj. 48 Thaum lub vas puv lawd, luag muab rub los rau tim ntug. Luag mam zaum tsaws xaiv cov zoo rau hauv tawb tiam sis cov tsis zoo, luag muab pov tseg. 49 Thaum lub sim ceeb* no kawg ces yuav zoo ib yam li ntawd ntag. Cov tub txib saum ntuj yuav muab cov lim hiam cais ntawm cov ncaj ncees mus. 50 Cov tub txib mam li muab cov lim hiam pov rau lub cub tawg uas cig ntswj pes yos. Lawv yuav quaj tom hniav qawv nyob qhov ntawd.

51 “Nej puas to taub tej uas kuv qhia no?” Lawv teb nws tias, “To taub lawm.” 52 Ces Yexus hais rau lawv tias, “Yog li ntawd, nej yog cov uas yuav mus cob qhia lwm tus, nej twb paub zoo txog Vajtswv txoj kev kav* lawm. Nej zoo ib yam li tus tswv tsev uas thau tej yam muaj nqis hauv txhab los siv, tsis hais qub los tshiab.”

53 Thaum Yexus qhia tej lus piv txwv ntawd tas, nws txawm tawm mus rau lwm qhov lawm. 54 Thaum nws rov los txog hauv nws lub qub zej qub zos, nws txawm mus qhia hauv lawv lub tsev pe hawm. Thaum lawv hnov nws qhia, lawv xav tsis thoob li. Lawv thiaj hais tias, “Ua cas tus txiv neej no muaj tswv yim ua luaj li? Ua cas nws muaj hwj chim ua txuj ci thiab? 55 Nws twb yog tus kws ntoo tus tub los sad? Nws niam yog Maivliag thiab nws cov kwv twb yog Yakaunpaus, Yauxej, Ximoos, thiab Yudas lawv sad? 56 Nws cov muam twb nyob hauv no ne, ua cas nws ho ua tau tej no?” 57 Lawv tib li ntawd, lawv thiaj tsis kam ntseeg Yexus. Nws thiaj hais rau lawv tias, “Luag zej luag zos yeej hwm tus cev Vajtswv lus, tsuas yog nws lub zej lub zos thiaj tsis hwm xwb.” 58 Vim lawv tsis muaj kev ntseeg, Yexus thiaj ua qho yam txuj ci rau lawv pom xwb.

14 Lub sij hawm ntawd Helauj* yog tus kav cheeb tsam Kalilais. Nws hnov txog tej txuj ci uas Yexus tau ua. 2 Nws hais rau nws cov tub txib tias, “Tus no yuav tsum yog Yauhas tus uas muab neeg ua kev cai raus dej xwb lauj. Ntshe nws sawv rov los lawm, nws thiaj ua tau tej txuj ci ntawd.” 3 Helauj hais li no rau qhov ua ntej ntawd, nws twb ntes Yauhas coj mus kaw hauv tsev loj cuj lawm. Yauhas raug ntes yog tim Helaudias uas yog Helauj tus niam tij Filis. 4 Yauhas pheej hais Helauj tias, “Koj tsis muaj cai yuav nws.” 5 Helauj twb xav muab Yauhas tua tiam sis nws ntshai cov pej xeem rau qhov lawv ntseeg tias Yauhas yog ib tug cev Vajtswv lus. 6 Thaum txog Helauj hnub yug, lawv ua ib roog noj. Helaudias tus ntxhais los dhia seev cev rau cov qhua saib, ua rau Helauj zoo siab heev. 7 Nws thiaj cog lus tias tus ntxhais thov yam twg, nws yeej yuav muab rau. 8 Tus ntxhais thiaj thov raws li nws niam qhia rau nws tias, “Cia li muab Yauhas* lub taub hau tso hauv ib lub phaj nqa los rau kuv.” 9 Cov lus no ua rau Helauj ntxhov siab tiam sis nws twb cog lus tab meeg rau sawv daws lawm, nws thiaj ua raws li tus ntxhais thov. 10 Helauj thiaj txib neeg mus hauv tsev loj cuj mus txiav Yauhas caj dab. 11 Lawv muab Yauhas lub taub hau tso hauv ib lub phaj nqa los rau tus ntxhais ces nws coj mus rau nws niam. 12 Tom qab ntawd, Yauhas cov thwj tim coj nws lub cev mus zais. Lawv mam mus qhia tej no rau Yexus paub. 13 Thaum Yexus hnov txog tej no, nws cia li caij nkoj mus nyob ib leeg rau lwm qhov. Tiam sis thaum cov neeg coob coob hnov li ntawd, lawv tawm hauv tej nroog taug kev mus caum Yexus.

14 Thaum Yexus tawm hauv nkoj los, nws pom cov neeg coob coob tuaj tos nws. Nws hlub lawv kawg li, nws kho cov uas muaj mob zoo huv si. 15 Thaum yuav tsaus ntuj, nws cov thwj tim los cuag nws thiab hais tias, “Peb nyob deb zos heev thiab twb lig lig lawm. Cia li tso lawv mus nrhiav noj tom tej zej zos.” 16 Tiam sis Yexus teb tias, “Cia lawv nyob lawv, nej kuj muab rau lawv noj.” 17 Lawv hais rau Yexus tias, “Peb tsuas muaj tsib lub ncuav thiab ob tug ntses xwb.” 18 Yexus hais tias, “Muab los rau kuv.” 19 Nws hais kom cov tib neeg zaum saum tej nyom. Nws mam li txais tsib lub ncuav thiab ob tug ntses ntawd thiab tsa muag ntsia saum ntuj ua Vajtswv tsaug. Thaum nws thov tas, nws muab cov ncuav ntais cev rau cov thwj tim coj mus faib rau sawv daws noj. 20 Sawv daws puav leej noj tsau tib si. Cov thwj tim mam mus khaws cov uas seem tau 12 tawb puv nkaus. 21 Cov neeg uas noj ntawd, suav cov txiv neej muaj li 5,000 leej, tsis suav poj niam me nyuam. 22 Yexus txawm hais kom nws cov thwj tim caij nkoj hla hiav txwv ua ntej mus rau sab tid. Thaum lawv mus lawd, nws mam tso cov neeg coob coob mus tsev.

23 Thaum Yexus tso cov neeg coob coob mus lawd, nws txawm mus thov Vajtswv ib leeg saum roob. Twb tsaus ntuj lawm los nws tseem nyob nws ib leeg saud. 24 Thaum ntawd cov thwj tim twb caij nkoj mus deb heev* ntawm ntug hiav txwv lawm. Cua ntsawj hlob heev tom hau nkoj tuaj mas dej nphau tej niag nthwv los ntaus lub nkoj. 25 Thaum tsis tau kaj ntug,* Yexus txawm los ko taw saum nplaim dej los rau ntawm lawv. 26 Thaum cov thwj tim pom Yexus los saum nplaim dej los mas lawv ntshai kawg li. Lawv thiaj qw zom zaws tias, “Dab tsi los txog tod!”* 27 Yexus hu kiag tias, “Txhob ntshai, yog kuv xwb!” 28 Petus thiaj teb Yexus tias, “Tus Tswv, yog koj tiag no thov cia kuv tuaj ko taw saum nplaim dej tuaj ntawm ko.” 29 Yexus teb Petus tias, “Tuaj maj!” Petus thiaj tawm plaws hauv nkoj mus ko taw saum nplaim dej mus rau ntawm Yexus. 30 Tiam sis thaum Petus pom cua daj cua dub hlob heev, nws txawm ntshai. Nws pib tog rau hauv dej nws thiaj qw ib suab tias, “Tus Tswv, pab kuv!” 31 Tam sim ntawd Yexus cev loo tes mus rub nws. Yexus ntsiab nkaus Petus thiab hais tias, “Ua cas koj tsis tso siab li, koj tsis ntseeg tias kuv muaj peev xwm ua tej no lod?” 32 Thaum nkawd mus rau hauv nkoj ces cua daj cua dub txawm tu nrho. 33 Cov uas nyob hauv nkoj thiaj txhos caug ntua hawm Yexus thiab hais tias, “Koj yeej yog Vajtswv tus Tub tiag.” 34 Lawv thiaj caij nkoj hla mus rau sab tid thiab mus nres ntawm qhov chaw hu ua Kenexales.

35 Thaum cov tib neeg paub tias yog Yexus, lawv txawm xa xov mus rau ib cheeb tsam tias Yexus tuaj txog ntawm lawv lawm. Cov tib neeg thiaj coj txhua tus uas muaj mob tuaj cuag Yexus. 36 Lawv thov Yexus kom nws cia lawv kov nws lub tw tsho xwb. Txhua tus uas tau kov puav leej zoo tib si.

15 Ces cov Falixais thiab cov xib hwb* tuaj nram Yeluxalees tuaj ntsib Yexus. Lawv nug Yexus tias, 2 “Ua cas koj cov thwj tim hla peb cov yawg koob tej kev cai?* Lawv tsis ntxuav tes* tso mam noj mov.”

3 Yexus teb lawv tias, “Ua cas nej ho hla Vajtswv tej kev cai mus coj nej tej kev cai? 4 Vajtswv twb qhia tias, ‘Hwm koj niam koj txiv,’ thiab, ‘Cia li muab tus uas foom nws niam nws txiv tua pov tseg.’ 5 Tiam sis nej ho qhia dua ib zaj tias, ‘Yog leej twg twb muab nws tej qhov txhia chaw pub rau Vajtswv lawm, tsis tas nws muab tej ntawd los pab nws niam nws txiv. 6 Nws tsis tas hwm nws niam nws txiv.’ Tej kev cai uas nej qhia no ua saib tsis taus Vajtswv tej kev cai lawm. 7 Cov niag neeg siab nkhaus,* yeej tsim nyog rau Yaxayas hais txog nej lawm tias, 8 ‘Cov neeg no hwm kuv ntawm lub ncauj tiam sis lawv lub siab tsis npuab kuv kiag li. 9 Qhov uas lawv pe hawm kuv tsis muaj qab hau, rau qhov lawv muab neeg tej kev cai los qhia ib yam li yog kuv tej.’” 10 Yexus txawm hais kom cov neeg coob coob txav los ze nws thiab hais tias, “Ua tib zoo mloog, nej thiaj to taub lub ntsiab no. 11 Tsis yog tej yam uas neeg noj ua rau neeg tsis huv, tiam sis yog tej lus uas tawm hauv neeg lub qhov ncauj los thiaj ua rau neeg tsis huv.”

12 Thaum ntawd Yexus cov thwj tim txawm los hais rau nws tias, “Koj puas paub tias cov Falixais tsis txaus siab rau tej uas koj hais?” 13 Yexus teb tias, “Txhua tsob ntoo uas tsis yog kuv Leej Txiv saum ntuj cog, yuav raug muab dob pov tseg. 14 Puam chawj lawv. Lawv yog neeg dig muag. Yog ib tug dig muag coj ib tug dig muag kev ces nkawd yeej yuav poob qhov xwb.” 15 Petus txawm hais tias, “Thov txhais zaj lus piv txwv puag ta rau peb.” 16 Yexus thiaj hais tias, “Nej tseem tsis to taub thiab lod? 17 Nej tsis paub tias yam uas noj ntawm qhov ncauj mus rau hauv plab ces tawm lawm xwb lod? 18 Tiam sis tej lus uas tawm hauv qhov ncauj los yog tawm hauv lub siab tuaj. Tej ntawd thiaj ua rau neeg tsis huv. 19 Tej uas tawm hauv lub siab tuaj ua rau neeg xav phem, tua neeg, ua txhua yam kev plees kev yi,* ua tub sab, ua cuav tim khawv, thiab thuam tej yam dawb huv. 20 Tej no thiaj ua rau neeg tsis huv, tiam sis qhov uas tsis ntxuav tes* ua ntej noj mov xwb, yeej tsis ua rau neeg qias.”

21 Yexus tawm qhov ntawd mus rau cheeb tsam Thailab thiab Xaidoos. 22 Ua ciav, txawm muaj ib tug poj niam Finixias hauv cheeb tsam ntawd tuaj cuag Yexus. Nws quaj thov tias, “Tus Tswv, Daviv tus Xeeb Ntxwv’e, thov hlub* kuv lauj! Kuv tus ntxhais raug dab txom nyem kawg li.” 23 Tiam sis Yexus tsis teb nws ib los li. Yexus cov thwj tim thiaj hais rau Yexus tias, “Hais kom nws khiav mus, rau qhov nws pheej quaj raws peb qab.” 24 Yexus teb tias, “Vajtswv tsuas txib kuv los pab cov Ixayees xwb. Lawv zoo li pab yaj uas poob zoo lawm.” 25 Tiam sis tus poj niam txawm los txhos caug ntua thov Yexus tias, “Tus Tswv, thov pab kuv!” 26 Yexus thiaj teb tias, “Tsis tsim nyog muab me nyuam tej mov pov rau me nyuam aub noj.” 27 Tus poj niam teb tias, “Tus Tswv, yeej yog li koj hais, tiam sis tej me nyuam aub los yeej tau noj tej mov uas poob saum tus tswv lub rooj los thiab.” 28 Yexus teb nws tias, “Koj muaj kev ntseeg kawg li. Cia koj tau raws li koj ntshaw.” Ces tam sim ntawd, nws tus ntxhais txawm zoo hlo lawm.

29 Yexus rov los ze rau ntawm Hiav Txwv Kalilais ces nws nce mus zaum saum roob. 30 Txawm muaj ib pab neeg coob coob tuaj cuag Yexus. Lawv coj cov ceg tawv, cov qhuav tes qhuav taw, cov dig muag, cov hais tsis tau lus, thiab cov uas muaj lwm yam mob tuaj tso ntawm Yexus xub ntiag. Nws kho lawv zoo huv si. 31 Thaum pab neeg coob coob pom cov hais tsis tau lus hais tau lawm, cov qhuav tes qhuav taw zoo lawm, cov ceg tawv mus taus kev lawm, thiab cov dig muag pom kev lawm, lawv xav tsis thoob li. Lawv thiaj qhuas cov Ixayees tus Vajtswv.

32 Yexus hu nws cov thwj tim los thiab hais rau lawv tias, “Kuv hlub pab neeg no heev rau qhov lawv twb nrog kuv nyob tau peb hnub lawm, tsis tau noj dab tsi li. Kuv tsis xav cia lawv mus tsam lawv ho qaug tshaib tom tej kev.” 33 Tiam sis cov thwj tim hais rau nws tias, “Peb nyob deb nroog heev thiab tib neeg coob ua luaj, peb yuav mus nrhiav mov qhov twg thiaj txaus sawv daws noj?” 34 Yexus thiaj hais rau lawv tias, “Nej muaj pes tsawg lub ncuav?” Lawv teb tias, “Xya lub thiab ob peb tug ntses me me.” 35 Tom qab Yexus hais kom cov tib neeg zaum hauv pem teb, 36 nws txawm muab xya lub ncuav thiab cov ntses los ua Vajtswv tsaug. Nws mam muab ntais cev rau nws cov thwj tim coj mus faib rau sawv daws noj. 37 Txhua tus puav leej noj tsau tib si. Cov uas seem, lawv khaws tau xya maum tawb puv nkaus. 38 Cov uas noj mov, suav cov txiv neej muaj 4,000 leej, tsis suav poj niam me nyuam. 39 Thaum Yexus tso pab neeg coob coob mus lawd, nws txawm nce nkoj mus rau cheeb tsam Makadas lawm.

16 Thaum ntawd, cov Falixais thiab cov Xadukais tuaj thom Yexus. Lawv hais kom nws tuav Vajtswv lub npe ua txuj ci rau lawv saib. 2 Yexus teb lawv tias, “Thaum hnub yuav poob qho, nej pom qab ntug liab ploog, nej hais tias, ‘Tag kis lub ntuj yuav tshav.’ 3 Thaum hnub yuav tawm, nej pom hauv ntuj liab ploog thiab tsaus nti, nej hais tias, ‘Hnub no yuav los nag xob nag cua.’ Nej paub lub ntuj yuav tshav yuav los nag li cas, tiam sis nej tsis paub tej uas muaj tshwm sim niaj hnub no. 4 Tiam neeg lim hiam tsis muab siab npuab Vajtswv no, xav pom txuj ci kawg tiam sis lawv yuav tsis pom. Lawv tsuas pom qhov txuj ci uas tau muaj rau Yaunas xwb.” Ces Yexus txawm tso lawv tseg mus lawm.

5 Thaum cov thwj tim caij nkoj hla mus rau sab tim ub, lawv tsis nco qab ntim mov. 6 Yexus hais rau lawv tias, “Ceev faj cov Falixais thiab cov Xadukais tej keeb.”* 7 Ces lawv txawm sib ntxhi zom zaws tias, “Ntshe peb tsis nco qab ntim ncuav tuaj es nws thiaj hais li ntawd.” 8 Yexus paub tej uas lawv ntxhi nws thiaj hais tias, “Ua cas nej tsis tso siab es pheej sib ntxhi tias nej tsis nco qab ntim mov? 9 Nej tseem tsis to taub thiab lod? Nej tsis nco qab thaum muab 5 lub ncuav faib rau 5,000 leej noj, nej khaws tau pes tsawg tawb? 10 Thiab thaum muab xya lub ncuav faib rau 4,000 leej noj, nej khaws tau pes tsawg maum tawb? 11 Ua cas nej tseem tsis to taub tias kuv tsis yog hais txog mov? Kuv kom nej ceev faj txog cov Falixais thiab cov Xadukais tej keeb xwb.” 12 Ces lawv mam to taub tias tsis yog Yexus hais kom ceev faj tej keeb ua ncuav tiam sis yog hais kom ceev faj cov Falixais thiab cov Xadukais tej lus qhia.

13 Thaum Yexus mus txog hauv cheeb tsam Xixalias Filipis, nws txawm nug nws cov thwj tim tias, “Luag tej hais tias neeg Leej Tub yog leej twg?” 14 Lawv teb tias, “Ib txhia hais tias yog Yauhas tus uas muab neeg ua kev cai raus dej, lwm cov hais tias yog Eliyas, thiab kuj muaj qee leej hais tias yog Yelemis los sis cov cev Vajtswv lus ib tug.” 15 Yexus hais rau lawv tias, “Nej ne, nej ho hais tias kuv yog leej twg?” 16 Ximoos Petus teb ntua tias, “Koj yog tus Khetos uas yog Vajtswv tus uas muaj sia zees nyob Leej Tub.” 17 Yexus hais rau Petus tias, “Yaunas tus tub Ximoos, cia li zoo siab rau qhov kuv Leej Txiv uas nyob saum ntuj yog tus qhia koj, tsis yog neeg* qhia koj. 18 Thiab kuv hais rau koj tias, koj yog Petus uas txhais tias pob zeb. Koj cav paub tias kuv yog tus Khetos uas yog lub pob zeb yuav txheem kuv lub koom txoos. Txawm txoj kev tuag* los yuav tsis muaj hwj chim kov yeej lub koom txoos ntawd. 19 Kuv yuav muab cov yuam sij rau lub Nceeg Vaj* saum ntuj rau koj. Yog koj txwv yam twg hauv ntiaj teb ces twb txwv yam ntawd saum ntuj lawm. Yog koj tso cai rau yam twg hauv ntiaj teb ces twb tso cai rau yam ntawd saum ntuj lawm thiab.” 20 Ces Yexus txwv tsis pub cov thwj tim qhia rau leej twg paub tias nws yog tus Khetos.

21 Txij thaum ntawd los, Yexus txawm pib qhia cov thwj tim tias nws yuav tsum mus rau Yeluxalees mas nws yuav raug cov txwj laus, cov pov thawj hlob, thiab cov xib hwb* tsim txom ntau yam thiab raug tua. Tiam sis peb hnub tom qab nws yuav ciaj sawv rov los. 22 Petus txawm coj Yexus mus rau ib cag thiab cheem tias, “Tus Tswv, txhob hais li ko, koj yeej yuav tsis raug tej ntawd ib zaug li.” 23 Yexus txawm tig hlo nrob qaum rau Petus thiab hais tias, “Xatas, khiav mus!* Txhob tav kuv kev, koj xav li neeg xav xwb, tsis xav li Vajtswv xav.”

24 Ces Yexus txawm hais rau nws cov thwj tim tias, “Yog leej twg xav nrog kuv mus, tus ntawd yuav tsum tsis txhob ua raws li nws lub siab nyiam thiab nws yuav tsum kwv nws tus ncej ntoo* raws kuv qab. 25 Rau qhov tus uas xav cawm nws txoj sia yuav tsis tau txoj sia tiam sis tus uas tso nws txoj sia tseg rau kuv yuav rov tau txoj sia. 26 Yog leej twg tau txhua yam hauv lub qab ntuj no tiam sis tsis tau txoj sia ces yuav muaj qab hau dab tsi? Los sis neeg yuav muab dab tsi los pauv nws txoj sia? 27 Leej Txiv yuav pub hwj chim rau neeg Leej Tub mas nws yuav nrog cov tub txib saum ntuj los ua pauj rau txhua tus raws li tej uas lawv tau ua lawd. 28 Kuv hais ncaj qha rau nej tias, qee tus ntawm no yuav pom neeg Leej Tub ua vaj ntxwv muaj hwj chim ci ntsa iab* ua ntej lawv lub neej dua mus.”

17 Tau rau hnub tom qab ntawd, Yexus coj Petus, Yakaunpaus, thiab Yakaunpaus tus kwv Yauhas nrog nws nce mus rau saum ib lub roob siab siab. 2 Thaum ntawd lawv pom Yexus lub cev hloov hlo. Nws lub ntsej muag ci cuag li lub hnub thiab nws cev tsoos ci dawb paug. 3 Ua ciav, lawv pom Mauxes thiab Eliyas nkawd tshwm los nrog Yexus tham. 4 Petus txawm hais rau Yexus tias, “Tus Tswv, zoo siab kawg li uas peb tuaj ntawm no! Yog koj pom zoo, kuv yuav tsa peb lub tsev pheeb suab, ib lub rau koj, ib lub rau Mauxes, thiab ib lub rau Eliyas.” 5 Thaum Petus tab tom hais li ntawd, ua ciav muaj ib tauv huab dawb paug los roos nkaus lawv ces txawm muaj ib lub suab hais hauv tauv huab tuaj tias, “Tus no yog kuv tus Tub. Kuv hlub nws heev. Nws ua haum kuv siab. Cia li mloog nws lus.” 6 Thaum cov thwj tim hnov li no, lawv ntshai kawg li. Lawv txhos caug ntua khwb nkaus hauv pem teb. 7 Yexus thiaj los rau ntawm lawv thiab hais tias, “Cia li sawv. Tsis txhob ntshai.” 8 Thaum lawv tsa muag ntsia, tsis pom leej twg tsuas pom Yexus xwb. 9 Thaum lawv nqes saum roob los, Yexus sam hwm rau lawv tias, “Tsis txhob qhia zaj yog toog no rau leej twg mus txog thaum neeg Leej Tub sawv hauv qhov tuag rov los.”

10 Ces cov thwj tim nug Yexus tias, “Ua cas cov xib hwb* ho hais tias Eliyas yuav tsum xub los ua ntej tso?” 11 Yexus teb tias, “Eliyas yuav tsum xub los tiag thiab nws yuav npaj txhua yam kom tiav. 12 Kuv qhia rau nej tias Eliyas twb los lawm tiam sis lawv tsis paub nws thiab tib neeg ua phem rau nws ywj siab. Neeg Leej Tub los kuj yuav raug txom nyem ib yam li ntawd thiab.” 13 Cov thwj tim mam to taub tias Yexus hais txog Yauhas tus uas muab neeg ua kev cai raus dej.

14 Thaum lawv los txog ntawm pab neeg coob coob, muaj ib tug yawg txawm los txhos caug ntua ntawm Yexus ko taw thov tias, 15 “Tus Tswv, thov hlub* kuv tus tub, rau qhov nws mob hnyav heev. Nws qaug dab peg, tej thaud nws vau rau hauv qhov cub thiab rau hauv dej. 16 Kuv twb coj nws tuaj cuag koj cov thwj tim tiam sis lawv kho tsis tau.” 17 Yexus thiaj teb tias, “Tiam neeg siab phem tsis muaj kev ntseeg, kuv yuav nrog nej nyob mus txog tav twg? Kuv yuav ua siab ntev rau nej mus txog thaum twg? Cia li coj nws los rau kuv.” 18 Yexus thiaj ntiab niag dab tawm plaws. Tus me tub txawm zoo hlo tam sim ntawd. 19 Ces cov thwj tim txawm los hais rau Yexus twj ywm tias, “Ua cas peb ho ntiab tsis tau tus dab no?” 20 Yexus teb lawv tias, “Rau qhov nej kev ntseeg me dhau lawm. Kuv hais ncaj qha rau nej tias, yog nej muaj kev ntseeg luaj li ib lub noob me me* xwb ces nej yuav hais rau lub roob no tias, ‘Txav mus rau tod,’ los yeej yuav txav, tsis muaj ib yam dab tsi uas nej yuav ua tsis tau li.” 21 *——

22 Thaum Yexus thiab nws cov thwj tim tuaj ua ke rau hauv lub xeev Kalilais, Yexus hais rau lawv tias, “Luag yuav ntxeev siab rau neeg Leej Tub thiab yuav muab nws cob rau nws cov yeeb ncuab txhais tes, 23 thiab lawv yuav muab nws tua tiam sis peb hnub xwb, nws yuav ciaj sawv rov los.” Thaum cov thwj tim hnov li no, lawv ntxhov siab kawg li.

24 Thaum lawv los txog hauv Khapena-us, cov neeg uas sau se* rau lub tuam tsev los nug Petus tias, “Nej tus xib hwb them se los tsis them?” 25 Petus teb tias, “Them hos.” Tiam sis thaum Petus mus rau hauv tsev, Yexus nug nws tias, “Ximoos koj xav li cas? Tej vaj ntxwv hauv ntiaj teb sau se* ntawm leej twg? Ntawm nws cov tub los ntawm luag tej?” 26 Thaum Petus teb tias, “Ntawm luag tej,” Yexus hais rau nws tias, “Yog li ntawd, cov tub tsis tas them se li. 27 Tiam sis peb tsis xav kom luag xav yuam kev, cia li mus nuv ntses nram hiav txwv. Thawj tug ntses uas koj nuv tau, koj rua lub qhov ncauj ces yuav pom ib lub nyiaj.* Nqa lub nyiaj ntawd mus them wb li se.”

18 Lub sij hawm ntawd, Yexus cov thwj tim los nug nws tias, “Hauv lub Nceeg Vaj* saum ntuj, leej twg yuav ua tus loj dua ntais?” 2 Ces Yexus txawm hu ib tug me nyuam los sawv ntawm lawv xub ntiag 3 thiab hais tias, “Kuv hais ncaj qha rau nej tias, yog nej tsis hloov thiab txo hwj chim li tus me nyuam no ces nej yuav nkag tsis tau hauv lub Nceeg Vaj* saum ntuj. 4 Tus uas txo hwj chim li tus me nyuam yaus no yuav yog tus loj dua ntais hauv lub Nceeg Vaj* saum ntuj, 5 thiab tus uas tos txais ib tug me nyuam zoo li no vim yog hwm kuv lub npe kuj yog tos txais kuv thiab. 6 Tiam sis yog leej twg ua rau cov me nyuam uas ntseeg kuv no ib tug twg tso kev ntseeg tseg, cia li muab ib txhib zeb dai nws caj dab pov hauv hiav txwv kuj zoo dua.

7 “Ntiaj teb neeg yuav raug kev txom nyem lauj, vim lawv ua rau lwm tus ua txhaum! Yeej yuav muaj cov uas ua rau lwm tus ua txhaum, tiam sis cov ntawd yuav txom nyem lauj! 8 Yog koj txhais tes txhais taw ua rau koj ua txhaum, cia li muab txiav pov tseg. Koj tshuav ib txhais tes ib txhais taw xwb tiam sis tseem tau txoj sia, kuj zoo dua li koj muaj ob txhais tes ob txhais taw es raug pov rau hauv cov hluav taws uas cig tsis txawj tuag. 9 Thiab yog koj lub qhov muag ua rau koj ua txhaum, cia li muab kaus pov tseg. Koj tshuav ib sab qhov muag xwb tiam sis tseem tau txoj sia, kuj zoo dua li koj muaj ob lub qhov muag es raug kev puas tsuaj.* 10 Txhob lam saib tsis taus cov uas txo hwj chim li tus me nyuam no ib tug twg li. Kuv hais rau nej tias, cov tub txib saum ntuj uas nrog nraim kuv Leej Txiv tsom kwm cov me nyuam no zoo heev. 11 * ——

12 “Nej xav li cas? Yog ib tug yawg muaj 100 tus yaj es ib tug poob zoo lawm, nws yuav tsis muab 99 tug tso tseg saum roob mus nrhiav kom tau tus uas poob zoo tso lod? 13 Kuv qhia tseeb rau nej tias thaum nws nrhiav tau tus uas poob zoo lawd, nws yuav zoo siab tshaj li nws tau 99 tug uas tsis poob zoo. 14 Ib yam li ntawd, kuv* Leej Txiv uas nyob saum ntuj yeej tsis xav kom cov me nyuam no ib tug puas tsuaj li.

15 “Tsis tas li ntawd, yog koj tus kwv tij ua txhaum rau koj, cia li mus qhia nws qhov txhaum rau nws* thaum neb ob leeg xwb. Yog nws mloog koj hais ces koj twb pab nws los ua qhov yog lawm. 16 Tiam sis yog nws tsis mloog koj hais ces coj ib los ob tug nrog koj mus. Thaum muaj ob los peb tug ua tim khawv* thiaj paub tseeb tias tau muaj li cas. 17 Tiam sis yog nws tsis mloog lawv hais ces mus qhia rau lub koom txoos. Yog nws tseem tsis mloog lub koom txoos hais thiab ces suav tias nws yog lwm haiv neeg los sis yog neeg sau se.

18 “Kuv hais ncaj qha rau nej tias, yog nej txwv yam twg hauv ntiaj teb ces twb txwv yam ntawd saum ntuj lawm, thiab nej tso cai rau yam twg hauv ntiaj teb ces twb tso cai rau yam ntawd saum ntuj lawm thiab. 19 Thiab kuv hais ncaj qha rau nej tias, yog muaj ob leeg koom siab thov txog ib yam tseem ceeb twg ces kuv Leej Txiv saum ntuj yuav pub rau nkawd. 20 Yog muaj ob los peb leeg tuaj txoos ua ke qhov twg tuav txog kuv lub npe ces kuv yuav nrog lawv nyob qhov ntawd.”

21 Ces Petus txawm los nug Yexus tias, “Tus Tswv, yog kuv tus kwv tij pheej ua txhaum rau kuv, kuv yuav zam txim rau nws pes tsawg zaus? Txog xya zaus lod?” 22 Yexus hais rau Petus tias, “Kuv hais rau koj tias, tsis yog txog 7 zaus xwb tiam sis txog 77 zaus.

23 “Twb yog vim li no Vajtswv txoj kev kav* thiaj piv ib yam li tus vaj ntxwv uas mus txheeb nws cov tub qhe seb leej twg tshuav nws nqi. 24 Thaum nws pib txheeb, txawm muaj neeg coj ib tug tub qhe uas tshuav vaj ntxwv nqi 10,000 talas.* 25 Tiam sis vim tus tub qhe them tsis taus, vaj ntxwv thiaj hais kom luag muab nws thiab nws poj niam me nyuam thiab nws lub cuab tam huv si coj mus muag los them tej nuj nqis ntawd. 26 Tus tub qhe thiaj txhos caug ntua thov vaj ntxwv tias, ‘Vaj ntxwv, thov ua siab ntev rau kuv. Kuv mam nrhiav los them koj.’ 27 Thaum vaj ntxwv pom li no, vaj ntxwv hlub nws kawg li. Vaj ntxwv thiaj zam nws tej nuj nqis huv si thiab tso nws mus. 28 Tiam sis thaum tus tub qhe mus lawm, nws mus nrhiav tau ib tug tub qhe uas tshuav nws 100 denalias.* Nws txawm ntsiab nkaus tus ntawd caj pas thiab hais tias, ‘Koj cia li them kuv tej nuj nqis rau kuv.’ 29 Tus tub qhe ntawd thiaj txhos caug ntua thov nws tias, ‘Thov ua siab ntev rau kuv. Kuv mam nrhiav los them koj.’ 30 Tiam sis nws tsis yib li. Nws kom luag muab tus tub qhe ntawd coj mus kaw hauv tsev loj cuj mus txog thaum nws them tej nuj nqis tas. 31 Thaum nws tib pab tub qhe pom nws ua li ntawd, lawv tsis zoo siab. Lawv thiaj mus qhia rau vaj ntxwv. 32 Ces vaj ntxwv thiaj hu tus tub qhe ntawd mus cuag vaj ntxwv thiab hais rau nws tias, ‘Tus niag qhev lim hiam, thaum koj thov kuv, kuv twb zam koj tej nuj nqis tib si los sad. 33 Kuv twb zam* koj, tsim nyog koj zam tus qhev ntawd los tsis yog?’ 34 Vaj ntxwv npau taws heev, nws thiaj muab tus tub qhe rau lawv coj mus kaw kiag hauv tsev loj cuj. Nws yuav tsum nyob hauv mus txog thaum nws them tej nuj nqis tas. 35 Yog leej twg tsis kam zam txim rau nws tus kwv tij tiag tiag ces kuv Leej Txiv saum ntuj yuav ua ib yam nkaus li ntawd rau nws thiab.”

19 Thaum Yexus qhia tej ntawd tas, nws tawm hauv Kalilais hla tus Dej Yaladees mus rau nram ciam teb Yudias lawm. 2 Muaj ib pab neeg coob coob raws nws qab. Ces nws kho lawv tej mob zoo huv si rau qhov chaw ntawd.

3 Cov Falixais txhob txwm tuaj thom Yexus tias, “Tus txiv puas muaj cai nrauj nws tus poj niam raws li nws siab nyiam?” 4 Yexus teb tias, “Nej tsis tau nyeem lod? Thaum chiv keeb, Vajtswv twb yog tus tsim kom muaj txiv neej thiab poj niam. 5 Nws thiaj hais tias, ‘Vim li no tus txiv neej thiaj tso nws niam nws txiv tseg mus nrog nws tus poj niam nyob,* nkawd yuav koom ua ib lub cev.’ 6 Nkawd tsis yog ob lub cev tiam sis yog ib lub lawm xwb. Vajtswv twb muab nkawd txis ua txij ua nkawm lawm, tsis pub leej twg muab nkawd cais.” 7 Lawv thiaj hais rau Yexus tias, “Ua cas Mauxes ho tso cai rau tus txiv ua ntawv nrauj?” 8 Yexus teb tias, “Tos Mauxes tso cai rau nej nrauj poj niam los twb yog nej tawv ncauj tsis muaj leej twg hais tau tiam sis thaum chiv keeb yeej tsis muaj li ntawd. 9 Kuv qhia rau nej tias, yog leej twg tus poj niam tsis tau ua plees ua yi* es nws cia li muab nrauj tseg mus yuav dua lwm tus ces twb yog nws ua kev nkauj kev nraug* ntag.”

10 Cov thwj tim txawm teb tias, “Yog yuav poj niam zoo li ntawd ces txhob yuav zoo dua.” 11 Yexus hais rau lawv tias, “Tsis yog txhua tus yuav ua tau li ntawd, tsuas yog cov uas cia Vajtswv pab* thiaj ua tau xwb. 12 Ib txhia tsis yuav poj niam vim raug muab sam lawm. Qee tus tsis yuav rau qhov lawv yeej yug los li ntawd. Muaj dua lwm cov tsis yuav vim lawv xav txhawb Vajtswv txoj kev kav.* Tus uas nyob taus ib leeg li no haj yam zoo.”

13 Tom qab ntawd, cov niam txiv txawm coj lawv tej me nyuam los cuag Yexus kom nws foom koob hmoov* thiab thov Vajtswv rau lawv. Tiam sis cov thwj tim cem tsis pub lawv ua li ntawd. 14 Yexus thiaj hais tias, “Cia lawv los ntawm no, txhob tav lawv. Rau qhov cov muaj lub siab uas zoo li tej me nyuam yaus no thiaj tau lub Nceeg Vaj* saum ntuj.” 15 Ces Yexus thiaj foom koob hmoov* rau lawv. Tom qab ntawd, nws txawm mus rau lwm qhov lawm.

16 Muaj ib tug txiv neej txawm los nug Yexus tias, “Xib Hwb, kuv yuav tsum ua zoo npaum li cas, kuv thiaj tau txoj sia ib txhis tsis kawg?” 17 Yexus teb tias, “Ua cas koj ho nug li ko? Tsuas yog Vajtswv thiaj zoo xwb. Tiam sis yog koj xav tau txoj sia ces koj yuav tsum coj raws nraim li Vajtswv tej kev cai.” 18 Nws thiaj nug tias, “Tej kev cai twg?” Yexus teb tias, “Tsis txhob tua neeg, tsis txhob deev luag poj luag txiv,* tsis txhob ua tub sab tub nyiag, tsis txhob ua cuav tim khawv, 19 hwm koj niam koj txiv, thiab hlub tej kwv tij zej zog li koj hlub koj tus kheej.” 20 Tus txiv neej thiaj hais tias, “Kuv twb coj li ko lawm, tseem tshuav dab tsi thiab?” 21 Yexus hais rau nws tias, “Yog koj xav ua zoo kawg nkaus, muab koj tej cuab txhiaj cuab tam muag es coj mus pub rau cov txom nyem, koj thiaj khaws tau yam uas muaj nqis rau saum ntuj ceeb tsheej ces los ua kuv ib tug thwj tim.” 22 Thaum tus txiv neej hnov li no, nws thiaj ncaim Yexus mus lawm. Nws nyuaj siab kawg li, vim nws muaj ntau tsav ntau yam uas nws tsis xav tso tseg. 23 Yexus thiaj hais rau nws cov thwj tim tias, “Kuv hais ncaj qha rau nej tias, tsis yooj yim rau ib tug neeg nplua nuj nkag rau hauv lub Nceeg Vaj* saum ntuj. 24 Kuv rov hais rau nej tias, ib tug nees us* nkag lub qhov koob tseem yooj yim dua ib tug neeg nplua nuj nkag rau hauv Vajtswv lub Nceeg Vaj.”*

25 Thaum cov thwj tim hnov li ntawd, lawv tsis pom qab xav li. Lawv thiaj nug tias, “Yog li ntawd es leej twg thiaj yuav dim tau?” 26 Yexus tsa muag ntsia lawv thiab hais tias, “Neeg cawm tsis tau neeg dim tiam sis Vajtswv cawm tau. Vajtswv ua tau txhua yam.”

27 Petus thiaj hais tias, “Peb twb tso ib puas tsav yam tseg raws koj qab es peb yuav tau dab tsi?” 28 Yexus teb tias, “Kuv hais ncaj qha rau nej tias, thaum Vajtswv rov tsim dua ib puas tsav yam tshiab ces neeg Leej Tub yuav muaj hwj chim ci ntsa iab zaum saum nws lub rooj vaj ntxwv.* Ces nej cov uas raws kuv qab yuav tau zaum saum 12 lub rooj vaj ntxwv, txiav txim rau 12 xeem Ixayees. 29 Txhua tus uas tso niam tso txiv, tso tub tso kiv, tso kwv tso tij, tso nkauj tso muam, tso vaj tso tsev, tso liaj tso teb tseg los ua kuv tus thwj tim yuav tau 100 npaug tej ntawd thiab tseem yuav tau txoj sia ib txhis tsis kawg.

30 “Tiam sis coob tus uas ua qab yuav tau ua ntej thiab coob tus uas ua ntej yuav tau ua qab.”

20 “Vajtswv txoj kev kav* piv ib yam li tus tswv teb uas sawv ntxov mus nrhiav zog los ua nws daim teb txiv hmab. 2 Thaum lawv hais haum yuav them ib hnub ib denalias,* tus tswv teb txawm txib lawv mus ua nws daim teb txiv hmab. 3 Thaum cuaj teev sawv ntxov, tus tswv teb rov qab mus nrhiav tub zog tom tshav puam. Nws pom ib co neeg tsis muaj hauj lwm ua, 4 nws thiaj hais rau lawv tias, ‘Nej cia li mus ua kuv daim teb txiv hmab. Kuv yuav muab tus nqi zog uas tsim nyog rau nej.’ 5 Lawv thiaj sawv tsees mus ua hauj lwm. Thaum 12 teev thiab thaum 3 teev, tus tswv teb rov mus nrhiav zog dua. 6 Ces thaum tsib teev tus tswv teb thiaj mus nrhiav zog rau zaum kawg. Nws rov pom ib co nyob dawb xwb nws thiaj nug tias, ‘Ua cas nej sawv ib hnub ntawm no tsis muaj hauj lwm ua li?’ 7 Lawv teb tias, ‘Tsis muaj leej twg ntiav peb ua hauj lwm.’ Nws thiaj hais rau lawv tias, ‘Nej cia li mus ua kuv daim teb txiv hmab thiab.’

8 “Thaum yuav tsaus ntuj, tus tswv teb thiaj hais rau tus uas saib xyuas cov tub zog tias, ‘Hu cov tub zog los es them nqi rau lawv. Koj xub them cov uas tuaj ua qab mam li them cov uas tuaj ua ntej.’ 9 Cov uas tuaj thaum tsib teev, lawv ib leeg tau ib denalias.* 10 Thaum cov xub tuaj los txog, lawv vam tias lawv yuav tau ntau dua tiam sis lawv kuj tau ib denalias* thiab xwb. 11 Thaum them rau lawv tas, lawv thiaj yws rau tus tswv teb 12 tias, ‘Peb twb tiv tshav khwv ib hnub nkaus tiam sis cov uas tuaj ua qab no tsuas ua ib nyuag teev xwb los koj tseem them lawv npaum li peb thiab!’ 13 Tiam sis tus tswv teb hais rau lawv ib tug tias, ‘Npawg, kuv tsis tau ua txhaum koj. Koj twb yeem ib hnub ib denalias* los sad? 14 Cia li khaws koj qhov nyiaj mus. Kuv xav them tus ua qab no npaum li them koj thiab. 15 Kuv tsis muaj cai siv kuv tej nyiaj txiag ywj siab lod? Los puas yog koj khib* vim kuv siab zoo?’* 16 Ib yam li zaj no, cov uas ua qab yuav tau ua ntej thiab cov uas ua ntej yuav tau ua qab.”

17 Thaum lawv tab tom mus pem lub nroog Yeluxalees, Yexus coj nws 12 tug thwj tim mus rau ib cag thiab hais rau lawv tias, 18 “Ua tib zoo mloog nawb, peb yuav mus rau pem lub nroog Yeluxalees. Luag yuav muab neeg Leej Tub cob rau cov pov thawj hlob thiab cov xib hwb.* Lawv yuav muab lub txim tuag rau nws 19 thiab yuav muab nws cob rau lwm haiv neeg txhais tes. Lwm haiv neeg yuav thuam thiab nplawm nws thiab yuav muab nws tua rau saum tus ncej ntoo. Peb hnub tom qab ntawd, nws yuav ciaj sawv rov los.”

20 Thaum ntawd, Xenpedis tus poj niam coj nws ob tug tub tuaj cuag Yexus. Nws txawm txhos caug ntua thov Yexus. 21 Yexus hais rau nws tias, “Koj xav tau dab tsi?” Nws teb Yexus tias, “Thov koj cog lus rau kuv tias kuv ob tug tub yuav tau zaum ntawm koj sab xis thiab sab laug hauv koj lub Nceeg Vaj.”* 22 Yexus teb tias, “Yam uas neb thov, neb yeej tsis paub txog. Neb haus puas taus lub khob uas kuv tab tom yuav haus?” Nkawd teb hlo tias, “Haus tau kawg.” 23 Yexus hais rau nkawd tias, “Neb yeej yuav tau haus kuv lub khob. Tiam sis kuv tsis muaj cai xaiv tus uas yuav zaum ntawm kuv sab xis thiab sab laug, Leej Txiv yog tus xaiv.”

24 Thaum kaum tus thwj tim hnov txog tej uas nkawd hais ntawd, lawv txawm npau taws heev rau nkawd ob kwv tij. 25 Yexus thiaj hu lawv los rau ntawm nws thiab hais tias, “Nej twb paub lawm tias lub qab ntuj* no tej vaj ntxwv yeej kav ywj siab xwb. Thiab tej neeg muaj meej mom siab yeej caij tsuj pej xeem. 26 Tiam sis nej tsis txhob coj li ntawd. Yog nej leej twg xav ua tus loj, tus ntawd yuav tsum ua nej tus tub txib. 27 Thiab tus uas xav ua nej tus thawj, tus ntawd yuav tsum ua nej tus qhev. 28 Ib yam li neeg Leej Tub, nws los nws tsis tau kom leej twg tiam nws tiam sis nws los tiam sawv daws thiab muab nws txoj sia txhiv coob leej.”

29 Thaum lawv tawm hauv Yelikaus mus, muaj ib pab neeg coob coob raws Yexus qab. 30 Muaj ob tug yawg dig muag zaum ntawm ntug kev hnov Yexus dua kev. Nkawd txawm qw nrov nrov tias, “Tus Tswv! Daviv tus Xeeb Ntxwv’e! Thov hlub* wb thiab lauj!” 31 Cov neeg coob coob txawm cem kom nkawd ua twj ywm. Tiam sis nkawd yim huab qw nrov tias, “Tus Tswv! Daviv tus Xeeb Ntxwv’e! Thov hlub* wb thiab lauj!” 32 Yexus thiaj nres thiab hu nkawd los. Ces nws nug nkawd tias, “Neb xav kom kuv ua dab tsi?” 33 Nkawd thiaj teb tias, “Tus Tswv, thov kho kom wb pom kev.” 34 Yexus hlub nkawd heev, nws thiaj kov nkawd qhov muag ces nkawd txawm pom kev tam sid. Nkawd thiaj raws Yexus qab mus.

21 Thaum lawv mus yuav txog Yeluxalees thiab Npefantsis ntawm Roob Txiv Aulib, Yexus txawm txib nws ob tug thwj tim mus, 2 thiab hais rau nkawd tias, “Cia li mus rau hauv lub zos tom neb hauv ntej. Thaum mus txog, neb yuav pom ob niam tub nees luav khi cia ntawd. Cia li muab daws cab los rau kuv. 3 Yog leej twg nug, neb cia li teb tias, ‘Tus Tswv yuav siv.’ Ces nws yuav cia rau neb cab los tam sid.”

4 Tej no muaj tiav raws nkaus li Vajtswv tau hais rau tus cev Nws lus tias, 5 “Qhia cov uas nyob hauv Xi-oos* tias, ‘Saib maj! Koj tus vaj ntxwv tab tom los rau hauv koj. Nws muaj siab mos siab muag thiab caij tus me nyuam nees luav los, yog tus maum nees luav tus me nyuam.’”

6 Ob tug thwj tim thiaj mus ua raws nkaus li Yexus tau txib nkawd. 7 Nkawd thiaj cab ob niam tub nees luav los. Cov thwj tim txawm muab lawv cov tsho sab nraud pua rau saum ob tug nees luav ces Yexus mam li caij tus me nyuam. 8 Coob tus uas caum Yexus txawm hle lawv tej tsho sab nraud los pua kev. Ib txhia kuj mus txiav nplooj ntoos los pua thiab. 9 Tsis tas li ntawd xwb, cov neeg coob coob uas ua nws ntej thiab ua nws qab qw nrov nrov tias, “Thov tsom kwm* Daviv tus Xeeb Ntxwv! Tus uas sawv cev rau Vajtswv Yehauvas* lub npe tau koob hmoov nplua mias! Thov kom tus uas nyob saum ntuj tsom kwm* Daviv tus Xeeb Ntxwv!”

10 Thaum nws mus rau hauv Yeluxalees, cov neeg hauv lub nroog qw ntshu nrooj tias, “Tus no yog leej twg?” 11 Cov neeg coob coob uas nrog Yexus los thiaj teb zom zaws tias, “Yog Yexus tus uas cev Vajtswv lus! Nws tuaj Naxales hauv Kalilais tuaj!”

12 Yexus txawm mus rau hauv lub tuam tsev. Nws muab cov tub lag tub luam thiab cov neeg uas tuaj yuav khoom ntiab tawm huv si mus. Nws muab cov neeg pauv nyiaj tej rooj thiab cov neeg muag nquab tej rooj zaum ntxeev pes hlo tseg. 13 Nws hais rau lawv tias, “Vajtswv Txoj Lus twb hais tias, ‘Kuv lub tsev yuav yog lub tsev thov Vajtswv,’ tiam sis nej muab ua lub tsev rau tub sab nkaum.” 14 Cov neeg dig muag thiab cov neeg ceg tawv kuj tuaj cuag Yexus hauv lub tuam tsev. Nws kho lawv txhua tus zoo huv si.

15 Thaum cov pov thawj hlob thiab cov xib hwb* pom tej txuj ci uas Yexus ua thiab hnov tej me nyuam tub qw zom zaws hauv lub tuam tsev tias, “Thov tsom kwm Daviv tus Xeeb Ntxwv!” mas lawv chim kawg li. 16 Lawv thiaj hais rau Yexus tias, “Koj puas hnov tej uas lawv hais?” Yexus teb tias, “Hnov mas. Nej tsis tau nyeem lod? Vajtswv Txoj Lus twb hais tias, ‘Txawm tej me nyuam yaus* los yuav qhuas txog koj.’” 17 Yexus txawm ncaim lawv mus rau lub nroog Npethanis thiab so ib hmos rau qhov ntawd.

18 Thaum sawv ntxov, Yexus rov los rau hauv lub nroog Yeluxalees, nws hnov plab tshaib. 19 Nws pom ib tsob txiv cev ntawm ntug kev tiam sis thaum nws mus txog ntawd, ua ciav tsuas pom nplooj xwb. Nws thiaj hais rau tsob txiv tias, “Koj yuav tsis txi txiv rau leej twg noj ib zaug ntxiv lawm.” Tsob txiv cev txawm ntsws kiag tam sid. 20 Thaum cov thwj tim pom li no, lawv xav tsis thoob li. Lawv thiaj hais tias, “Ua cas tsob txiv cev cia li ntsws kiag lawm?” 21 Yexus thiaj teb lawv tias, “Kuv hais ncaj qha rau nej tias, yog nej ntseeg Vajtswv tiag es txhob ua xyem xyav, tsis yog nej yuav muaj hwj chim ua rau ib tsob ntoo ntsws xwb, tiam sis nej yuav hais tau rau lub roob no tias, ‘Cia li tsaws hlo mus rau hauv dej hiav txwv’ ces yuav muaj raws li ntawd. 22 Nej yuav tsum ntseeg tias Vajtswv yeej ua tau raws li nej thov, nej thiaj tau tej ntawd.”

23 Yexus txawm mus rau hauv lub tuam tsev thiab pib qhia sawv daws. Cov pov thawj hlob thiab cov txwj laus thiaj los nug nws tias, “Koj puas muaj cai ua tej no? Thiab leej twg tso cai rau koj ua tej no?” 24 Yexus thiaj teb lawv tias, “Kuv yuav nug nej ib los thiab. Yog nej teb tau ces kuv mam li qhia nej tias leej twg tso cai rau kuv ua tej no. 25 Leej twg tso cai rau Yauhas muab neeg ua kev cai raus dej? Yog Vajtswv* los yog tib neeg?” Lawv txawm sab laj tias, “Yog peb teb tias yog Vajtswv ces nws yuav nug peb tias vim li cas peb ho tsis ntseeg Yauhas. 26 Tiam sis yog peb teb tias yog tib neeg, nyob tsam pab neeg ntawd ho ua li cas rau peb, vim lawv ntseeg tias Yauhas yog ib tug cev Vajtswv lus.” 27 Lawv thiaj teb Yexus tias, “Peb tsis paub.” Yexus thiaj hais rau lawv tias, “Ces kuv yuav tsis qhia nej tias leej twg tso cai rau kuv ua tej no thiab.

28 “Nej xav li cas? Ib tug yawg muaj ob tug tub. Nws hais rau tus hlob tias, ‘Tub, hnub no koj mus tu txiv hmab tom teb.’ 29 Tus tub hlob teb tias, ‘Kuv tsis mus.’ Tiam sis tom qab ntawd, nws ho thim xav nws thiaj mus lawm. 30 Leej txiv ho mus txib tus yau. Tus yau teb tias, ‘Txiv, kuv mam mus,’ tiam sis nws ho tsis mus. 31 Ob tug tub no, tus twg mloog leej txiv lus?” Lawv teb tias, “Tus hlob.” Yexus thiaj hais rau lawv tias, “Kuv hais ncaj qha rau nej tias, cov neeg sau se thiab cov niam ntiav yuav ua nej ntej mus rau hauv Vajtswv lub Nceeg Vaj.* 32 Thaum Yauhas los, nws ua ncaj ua ncees rau nej xyaum los nej tsis ntseeg nws. Tiam sis cov neeg sau se thiab cov niam ntiav ho ntseeg. Txawm nej pom tej no los nej twb tsis muaj lub siab thim xav los ntseeg nws.

33 “Cia kuv piav ib zaj lus piv txwv ntxiv. Muaj ib tug yawg uas yog ib tug tswv teb. Nws txawm cog txiv hmab rau nws daim teb. Nws xov laj kab ncig thiab khawb tau ib lub qhov tsuam txiv hmab rau hauv. Nws kuj ua tau ib lub tsev tsom faj zov daim teb ntawd thiab. Nws cia neeg los tu* daim teb ntawd ces nws txawm tawm mus ncig teb chaws lawm. 34 Thaum txog caij de txiv hmab, nws thiaj txib nws cov tub qhe mus sau nws feem txiv hmab ntawm cov neeg uas tu daim teb. 35 Tiam sis cov neeg uas tu daim teb txawm muab cov tub qhe ntes. Lawv muab ib tug ntaus, muab ib tug tua, thiab ho muab pob zeb ntaus ib tug. 36 Tus tswv teb thiaj txib ib co tub qhe coob dua qub mus. Tiam sis cov neeg tu daim teb ua phem rau lawv ib yam nkaus thiab. 37 Thaum kawg tus tswv teb thiaj txib nws tus tub mus. Nws vam tias lawv yuav hwm nws tus tub. 38 Thaum cov neeg tu daim teb pom dheev tus tub, lawv txawm tuav tswv yim tias, ‘Tus no yog tus uas yuav tau daim teb los ua qub txeeg qub teg ntag. Cia peb muab nws tua pov tseg, peb thiaj tau nws daim teb!’ 39 Lawv thiaj muab nws ntes kiag cab mus tua sab nraum daim teb txiv hmab. 40 Nej sim xav seb, thaum tus tswv teb rov los, nws yuav ua li cas rau cov neeg uas tu nws daim teb?” 41 Lawv thiaj teb Yexus tias, “Vim lawv yog neeg lim hiam, tus tswv teb yuav muab lawv rhuav tshem thiab yuav muab daim teb rau lwm cov tu. Thaum txog caij de txiv, lawv thiaj yuav faib nws feem rau nws.”

42 Yexus hais rau lawv tias, “Nej tsis tau nyeem lod? Vajtswv Txoj Lus twb hais tias, ‘Lub pob zeb uas cov kws ua tsev muab xyeeb tseg, twb muab teeb rau saum kaum tsev uas siab tshaj* lawm. Vajtswv Yehauvas* yog tus ua tej no thiab yog ib yam uas raug qhov muag kawg li.’ 43 Kuv thiaj hais rau nej tias, Vajtswv yuav muab nws lub Nceeg Vaj* tshem ntawm nej mus thiab yuav muab pub rau ib haiv neeg uas ua raws li nws lub siab nyiam.* 44 Yog leej twg dawm lub pob zeb no, tus ntawd yuav ntog tsoo nws sab heev. Yog lub pob zeb poob los ntaus leej twg, tus ntawd yuav tawg ntsoog ntxaws.”

45 Thaum cov pov thawj hlob thiab cov Falixais hnov ob zaj lus piv txwv no, lawv paub tias Yexus hais txog lawv. 46 Lawv xav muab Yexus ntes tiam sis lawv ho ntshai, rau qhov pab neeg coob coob ntseeg tias nws yog ib tug cev Vajtswv lus.

22 Yexus rov ua lus piv txwv qhia lawv tias, 2 “Vajtswv txoj kev kav* piv ib yam li ib tug vaj ntxwv uas npaj tshoob rau nws tus tub. 3 Vaj ntxwv txib nws cov tub qhe mus hu cov uas nws twb caw lawd tuaj noj tshoob tiam sis lawv tsis kam tuaj. 4 Nws rov txib dua ib co tub qhe mus hais rau cov neeg uas nws twb caw lawd tias, ‘Cia li tuaj! Kuv twb tua tej heev nyuj thiab tej tsiaj rog rog ua nqaij ua hno siav lawm. Cia li tuaj noj tshoob.’ 5 Tiam sis cov tib neeg tsis quav ntsej li, ib co mus ua liaj ua teb, ib co mus ua lag ua luam, 6 muaj dua lwm cov muab nws tej tub qhe ntaus ua lwj ua liam tua pov tseg.

7 “Vaj ntxwv thiaj npau taws heev. Nws txawm txib nws cov tub rog mus muab cov neeg phem* ntawd tua thiab muab lawv lub nroog hlawv kub hnyiab tag. 8 Ces vaj ntxwv hais rau nws cov tub qhe tias, ‘Rooj tshoob twb npaj txhij lawm tiam sis cov neeg uas kuv caw lawd tsis tsim nyog noj. 9 Yog li ntawd, cia li mus rau ntawm tej kev loj es caw txhua tus uas nej ntsib tuaj noj tshoob.’ 10 Cov tub qhe thiaj hu txhua tus uas lawv ntsib tom kev, tsis hais tus zoo tus phem tuaj puv nkaus chav tsev ua tshoob.

11 “Thaum vaj ntxwv los saib cov qhua, ua ciav nws pom ib tug hnav tsoos tsis phim rooj tshoob. 12 Vaj ntxwv nug nws tias, ‘Yawg, koj hnav li ko xwb, ua cas koj ho tuaj tau hauv no?’ Nws teb tsis taus ib los li. 13 Vaj ntxwv thiaj hais rau nws cov tub txib tias, ‘Cia li muab nws pav tes pav taw coj mus pov nraum zoov uas tsaus ntuj nti. Nws yuav quaj tom hniav qawv* sab nraud.’

14 “Yog li, coob tus raug caw tiam sis qee tus thiaj raug xaiv xwb.”

15 Cov Falixais txawm tuav tswv yim thom Yexus seb nws puas teb yuam kev. 16 Lawv thiaj txib lawv cov thwj tim nrog Helauj cov neeg* mus nug Yexus tias, “Xib Hwb, peb paub tias koj nyiam ua qhov ncaj thiab qhia qhov tseeb txog Vajtswv xwb. Koj tsis tuaj leej twg tog li rau qhov koj tsis xaiv leej twg ntsej muag. 17 Koj sim qhia seb, puas tsim nyog peb them se rau Xixas los tsis tsim nyog?” 18 Yexus twb paub lawv lub siab phem tas lawm, nws thiaj hais tias, “Cov niag neeg siab nkhaus,* ua cas nej lam thom kuv? 19 Muab ib lub nyiaj denalias* los.” Lawv thiaj muab ib lub rau Yexus. 20 Nws nug lawv tias, “Lub ntsej muag thiab lub npe txaug rau lub nyiaj no yog leej twg li?” 21 Lawv teb tias, “Xixas li.” Yexus thiaj hais rau lawv tias, “Ces them Xixas li rau Xixas thiab them Vajtswv li rau Vajtswv.” 22 Thaum lawv hnov Yexus hais li ntawd, lawv xav tsis thoob li. Lawv txawm tso nws tseg mus lawm.

23 Hnub ntawd cov Xadukais tuaj thom Yexus. Lawv tsis ntseeg tias cov tuag yuav sawv ciaj rov los, lawv thiaj nug tias, 24 “Xib Hwb, Mauxes hais tias, ‘Yog ib tug txiv neej twg tuag lawd es tsis tau muaj tub ki ces yuav tsum muab nws tus poj niam txis rau ib tug kwv tij kom tus tuag muaj xeeb ntxwv cia.’ 25 Thaud muaj xya leej kwv tij, tus tij laug yuav poj niam tsis tau muaj me nyuam ces txawm tuag lawm, thiaj muab nws tus poj niam txis rau tus kwv. 26 Tus kwv kuj tuag lawm thiab. Tau muaj li ntawd rau tus kwv ob mus txog tus kwv ntxawg tib si. 27 Thaum kawg tus poj niam kuj tuag lawm thiab. 28 Yog li ntawd, lawv xya leej kwv tij tau yuav nws ua poj niam lawm. Thaum lawv ciaj sawv rov los, tus poj niam ntawd yuav yog leej twg tus?”

29 Yexus teb lawv tias, “Nej xav yuam kev lawm. Nej tsis paub Vajtswv Txoj Lus thiab nws lub hwj chim. 30 Thaum Vajtswv tsa cov tuag ciaj sawv rov los, lawv tsis sib yuav ua txij ua nkawm lawm. Lawv yuav nyob li cov tub txib saum ntuj lawm xwb. 31 Nej tsis tau nyeem lod? Vajtswv twb qhia tias nws yuav tsa cov tuag sawv rov los. Vajtswv hais tias, 32 ‘Kuv yog Anplahas tus Vajtswv, yog Ixaj tus Vajtswv, thiab yog Yakhauj tus Vajtswv.’ Yog li, nws yog cov neeg ciaj tus Vajtswv, tsis yog cov neeg tuag tus Vajtswv.” 33 Thaum cov tib neeg hnov tej uas Yexus qhia mas lawv xav tsis thoob li.

34 Thaum cov Falixais hnov tias Yexus ua rau cov Xadukais tws kev lawm, cov Falixais txawm los rau ntawm Yexus. 35 Muaj ib tug uas paub Mauxes Txoj Kev Cai zoo thiaj thom Yexus tias, 36 “Xib Hwb, Mauxes Txoj Kev Cai nqe twg tseem ceeb tshaj plaws?” 37 Yexus teb nws tias, “‘Koj yuav tsum hlub Yehauvas* uas yog koj tus Vajtswv kawg siab kawg ntsws, kawg koj txoj sia,* kawg laj lim tswv yim.’ 38 Nqe no yog thawj nqes uas tseem ceeb tshaj plaws. 39 Ib yam li ntawd, nqe ob kuj qhia tias, ‘Hlub kwv tij zej zog ib yam li koj hlub koj tus kheej.’ 40 Tag nrho Mauxes Txoj Kev Cai thiab cov cev Vajtswv lus tej lus qhia puav leej cog rau ob nqes no.”

41 Thaum cov Falixais tab tom nrog Yexus tham, nws nug lawv tias, 42 “Nej xav li cas txog tus Khetos? Nws yog leej twg tus xeeb ntxwv?” Lawv teb tias, “Yog Daviv tus.” 43 Yexus thiaj nug tias, “Ua cas Vajtswv ho tshoov kom Daviv muab tus Khetos hu ua tus Tswv? Daviv twb hais tias, 44 ‘Vajtswv Yehauvas* hais rau kuv tus Tswv tias, “Los zaum ntawm kuv sab xis mus txog thaum kuv muab koj tej yeeb ncuab rau koj tsuj.”’ 45 Yog Daviv twb muab tus Khetos hu ua tus Tswv, yuav ua li cas hais tau tias Khetos yog Daviv tus xeeb ntxwv?” 46 Tsis muaj ib tug teb tau Yexus li. Txij hnub ntawd los, tsis muaj leej twg muaj cuab kav thom Yexus lawm.

23 Yexus hais rau cov neeg coob coob thiab nws cov thwj tim tias, 2 “Cov xib hwb* thiab cov Falixais tsa lawv tus kheej nyob Mauxes chaw cev Vajtswv lus. 3 Yog li ntawd, ua raws li lawv qhia tiam sis txhob coj li lawv, rau qhov lawv tsis ua raws li lawv qhia. 4 Lawv nog nra rau sawv daws ris,* tiam sis lawv yeej tsis cev tes thiab ib nyuag qhov li. 5 Lawv ua txhua yam rau luag qhuas xwb. Lawv muab tej txws* ntim Vajtswv Txoj Lus ua loj heev los coj saum hauv pliaj thiab khi ntawm caj npab. Lawv muab tej tsho ntxhoo tw kab lws ua ntev dhau lawm. 6 Thaum muaj noj muaj haus, lawv xav zaum tej chaw siab. Thiab hauv tsev pe hawm los lawv xav zaum tom hauv ntej* xwb. 7 Tom tej tshav puam lawv xav kom tib neeg hawm lawv thiab hu lawv ua Xib Hwb.* 8 Tiam sis tsis txhob cia leej twg hu nej ua Xib Hwb,* rau qhov nej tsuas muaj tib tug Xib Hwb thiab nej puav leej yog kwv tij xwb. 9 Tsis tas li ntawd, tsis txhob muab ib tug twg hauv ntiaj teb no hu ua leej txiv,* rau qhov nej tsuas muaj tib leeg Txiv uas nyob saum ntuj xwb. 10 Tsis txhob pub leej twg muab nej hu ua tus thawj coj, rau qhov Khetos tib leeg thiaj yog nej tus Thawj Coj xwb. 11 Tiam sis tus uas loj dua ntais hauv nej cov yuav tsum yog nej tus qhev. 12 Tus uas tsab hwj chim yuav muab txo kom qis. Thiab tus uas txo hwj chim yuav muab tsa kom siab.

13 “Cov xib hwb thiab cov Falixais siab nkhaus’e!* Nej yuav raug txom nyem rau qhov nej kaw kev tsis pub leej twg mus rau hauv lub Nceeg Vaj* saum ntuj. Nej twb tsis kam mus los nej ho txwv tsis pub lwm tus mus thiab. 14 *——

15 “Cov xib hwb thiab cov Falixais siab nkhaus’e! Nej yuav raug txom nyem rau qhov nej hla hiav txwv hla roob hla hav mus pab kom tau ib tug los coj Yudais txoj kev cai. Tiam sis thaum nej pab tau ib tug lawd, nej tseem ua rau nws muaj txim loj tshaj nej ob npaug kom nws raug kev puas tsuaj.*

16 “Cov niag thawj coj dig muag, nej yuav raug txom nyem lauj! Nej hais tias, ‘Yog leej twg tuav lub tuam tsev cog lus, nws tsis tas ua raws li cov lus ntawd. Tiam sis yog leej twg tuav tej kub hauv lub tuam tsev cog lus, nws yuav tsum ua raws li nws tau cog tseg.’ 17 Cov niag dig muag, ua cas nej ruam ua luaj! Dab tsi ua rau tej kub ntawd tseem ceeb, twb yog lub tuam tsev los sad? 18 Thiab nej hais tias, ‘Yog leej twg tuav lub thaj cog lus, nws tsis tas ua raws li cov lus ntawd. Tiam sis yog leej twg tuav tej khoom fij saum lub thaj cog lus, nws yuav tsum ua raws li nws tau cog tseg.’ 19 Cov niag dig muag’e! Dab tsi ua rau tej khoom fij ntawd tseem ceeb, twb yog lub thaj los sad? 20 Yog li ntawd, leej twg tuav lub thaj cog lus ces twb yog nws tuav tej khoom fij saum lub thaj cog lus lawm thiab! 21 Thiab yog leej twg tuav lub tuam tsev cog lus ces twb yog nws tuav Vajtswv lub npe cog lus ntag! Rau qhov lub tuam tsev ntawd twb yog Vajtswv lub. 22 Thiab yog leej twg tuav lub ntuj cog lus ces twb yog nws tuav Vajtswv lub npe thiab tuav Nws lub rooj zaum cog lus lawm ntag.

23 “Cov xib hwb thiab cov Falixais siab nkhaus’e! Nej yuav raug txom nyem rau qhov nej pub ib feem kaum pum hub, zaub txhwb nyug, thiab lwm yam txuj lom. Tiam sis nej ho tsis quav ntsej tej yam tseem ceeb hauv Mauxes Txoj Kev Cai kom ua siab ncaj, muaj siab hlub,* thiab muab siab npuab Vajtswv. Tsim nyog pub ib feem kaum tiam sis tsis txhob muab qhov tseem ceeb dua ntais tso tseg. 24 Cov niag thawj coj dig muag, ib tug yoov qaib poob rau hauv khob dej nej twb muab lim tawm tiam sis nej ho nqos kiag tus nees us!*

25 “Cov xib hwb thiab cov Falixais siab nkhaus’e! Nej yuav raug txom nyem rau qhov nej zoo li lub khob lub tais uas ntxuav du lug sab nraud tiam sis sab hauv khub khawv tej yam qias vuab tsuab. Nej yog neeg siab hlob ua ywj siab ywj ntsws. 26 Cov niag Falixais dig muag’e, yog nej xub ntxuav lub khob lub tais sab hauv ces sab nraud kuj huv lawm thiab.

27 “Cov xib hwb thiab cov Falixais siab nkhaus’e! Nej yuav raug txom nyem rau qhov nej zoo li tej ntxa uas luag muab pleev kob dawb paug. Tiam sis sab hauv puv nkaus tej pob txha neeg tuag thiab txhua yam Vajtswv suav tias qias tsis huv. 28 Ib yam li ntawd, nej ua txuj coj ncaj rau luag qhuas, tiam sis hauv nej lub siab puv nkaus kev dag ntxias thiab nej yeej tsis coj cai li.

29 “Cov xib hwb thiab cov Falixais siab nkhaus’e! Nej yuav raug txom nyem rau qhov nej txhim cov cev Vajtswv lus tej ntxa thiab kho cov neeg ncaj ncees tej ntxa kom zoo nkauj. 30 Thiab nej tseem hais tias, ‘Kheev lam peb nyob tiam uas peb cov yawg koob nyob mas peb yeej tsis nrog lawv tua cov cev Vajtswv lus li.’ 31 Nej hais li no twb yog nej lees tias nej yog cov uas tua cov cev Vajtswv lus ntawd tej xeeb ntxwv ntag. 32 Kav tsij ua phem li nej tej yawg koob kom txaus nkaus.

33 “Cov niag noob nab, nej yuav ua li cas khiav dim lub txim uas yog kev puas tsuaj?* 34 Twb yog vim nej phem li no, kuv thiaj txib cov cev Vajtswv lus, cov neeg muaj tswv yim, thiab cov uas cob qhia lwm tus tuaj hais nej. Nej yuav muab ib txhia tua, muab ib txhia ntsia saum ncej ntoo, muab ib txhia nplawm hauv tej tsev pe hawm, thiab muab ib txhia tsim txom ib lub nroog rau ib lub. 35 Yog li ntawd, nej yuav tau ris tag nrho cov neeg ncaj ncees hauv ntiaj teb no tej ntshav, suav txij Anpees los txog Npalakhiyas tus tub Xekhaliyas. Nws yog tus uas nej muab tua ntawm lub tuam tsev thiab lub thaj kis nruab nrab. 36 Kuv hais ncaj qha rau nej tias, tiam neeg no yuav tau ris lub txim ntawd.

37 “Yeluxalees os, Yeluxalees’e! Koj yog tus uas tua cov cev Vajtswv lus thiab xuas pob zeb ntaus cov uas Vajtswv txib tuaj rau koj. Ntau zaus kuv twb hu koj cov me nyuam ib yam li tus poj qaib cuab nws cov me nyuam los puag hauv phab tis tiam sis koj tsis kam los. 38 Yog li ntawd, Vajtswv yuav muab koj lub tuam tsev tso nyob qhuav nquas cia. 39 Kuv hais rau koj tias koj yuav tsis pom kuv mus txog thaum koj hais tias, ‘Tus uas sawv cev rau Vajtswv Yehauvas* lub npe tau koob hmoov nplua mias!’”

24 Thaum Yexus tawm hauv lub tuam tsev mus, nws cov thwj tim txawm taw tes kom Yexus saib lub tuam tsev. 2 Yexus hais rau lawv tias, “Nej yeej pom tej tsev no puas yog? Kuv hais ncaj qha rau nej tias, muaj ib hnub tej pob zeb no yuav pluam tas tib si nyias nyob nyias.”

3 Thaum Yexus zaum saum lub Roob Txiv Aulib, cov thwj tim txawm los nug nws twj ywm tias, “Thov qhia rau peb seb thaum twg mam li muaj tej ntawd, thiab yuav muaj pov thawj dab tsi qhia tias twb txog lub sij hawm uas koj rov los* thiab lub sim ceeb* yuav kawg?”

4 Yexus teb lawv tias, “Ceev faj tsis txhob cia leej twg ntxias tau nej yuam kev, 5 rau qhov yuav muaj coob leej tuav kuv lub npe dag tias, ‘Kuv yog tus Khetos,’ mas lawv yuav ntxias tau coob tus yuam kev. 6 Nej yuav hnov suab ntaj suab riam thiab yuav hnov txog kev tsov kev rog. Txawm li ntawd los tsis txhob poob siab, rau qhov yeej yuav muaj tej no, tiam sis lub sim ceeb* tseem tsis tau kawg.

7 “Yuav muaj ib haiv neeg sawv tawm tsam ib haiv neeg thiab ib lub teb chaws sawv tawm tsam ib lub teb chaws. Yuav muaj kev tshaib kev nqhis thiab av qeeg ib qho rau ib qho. 8 Tag nrho tej no zoo yam li tus poj niam uas pib mob plab yuav yug me nyuam.

9 “Thaum ntawd tib neeg yuav muab nej cob rau luag tsim txom thiab yuav muab nej tua, thiab txhua haiv neeg yuav ntxub nej vim nej yog kuv cov thwj tim. 10 Thaum ntawd coob leej kuj yuav tso kev ntseeg tseg thiab ib leeg yuav ntxeev siab rau ib leeg thiab ib leeg yuav ntxub ib leeg. 11 Yuav muaj coob tus uas ua txuj cev Vajtswv lus sawv los ntxias ntau leej yuam kev 12 thiab vim kev phem* loj zuj zus tuaj, coob tus txoj kev hlub yuav tsuag zuj zus mus. 13 Tiam sis tus uas thev mus txog thaum kawg yuav dim. 14 Thiab txoj xov zoo txog Vajtswv txoj kev kav* yuav raug muab tshaj tawm mus thoob plaws lub ntiaj teb ua tim khawv rau txhua haiv neeg ces lub sim ceeb* no mam li kawg.

15 “Yog li ntawd, thaum nej pom yam uas qias vuab tsuab uas ua rau txhua yam puas tsuaj nyob hauv qhov chaw dawb huv li Daniyees tus uas cev Vajtswv lus tau hais (tus nyeem yuav tau ua tib zoo xav, nws thiaj to taub tej no) 16 ces cov nyob hauv Yudias yuav tsum khiav mus rau saum tej roob. 17 Tus uas nyob saum txheej tsev las tshav tsis txhob nqes los vuag nws tej khoom hauv tsev 18 thiab tus uas nyob tom teb tsis txhob rov los nqa nws lub tsho. 19 Cov poj niam uas suab me nyuam thiab cov uas muaj me nyuam mos noj mis yuav txom nyem lauj! 20 Yeej meem thov Vajtswv kom nej tsis txhob tau khiav rau lub caij ntuj no los sis rau hnub Xanpataus, 21 rau qhov lub sij hawm ntawd yuav muaj kev txom nyem loj kawg nkaus li. Txij thaum tsim neeg los txog niaj hnub nim no yeej tsis tau muaj dua thiab yav tom ntej los yuav tsis muaj ntxiv lawm. 22 Tiam sis vim muaj cov uas xaiv tseg, Vajtswv yuav txiav hnub txiav nyoog kom luv. Yog Vajtswv tsis ua li ntawd ces yuav tsis muaj leej twg dim li.

23 “Thaum ntawd yog muaj leej twg hais rau nej tias, ‘Saib maj! Tus Khetos nyob ntawm no,’ los sis hais tias, ‘Nws nyob tod!’ los nej tsis txhob ntseeg. 24 Rau qhov yuav muaj cov Khetos cuav thiab cov uas ua txuj cev Vajtswv lus sawv los ua ntau yam txuj ci tseem ceeb ntxias tib neeg yuam kev, tsis hais cov uas xaiv tseg tib si. 25 Saib nawb! Kuv twb ceeb toom nej lawm. 26 Yog li ntawd, thaum tib neeg hais rau nej tias, ‘Saib maj! Nws nyob tom tiaj suab puam,’ tsis txhob mus saib, los sis, ‘Saib maj! Nws nyob hauv tsev,’ tsis txhob ntseeg. 27 Thaum txog lub caij lub nyoog uas neeg Leej Tub rov los,* yuav zoo ib yam li xob laim sab hnub tuaj mus txog sab hnub poob. 28 Tej cev tuag* nyob qhov twg ces dav* yeej yuav yuj qhov ntawd.

29 “Thaum lub caij muaj kev txom nyem loj kawg nkaus dhau plaws, lub hnub yuav tsaus, lub hli yuav tsis ci, thiab tej hnub qub yuav poob saum ntuj los. Tej yam uas muaj hwj chim saum nruab ntug yuav ua zog koog. 30 Ces yuav muaj pov thawj saum ntuj qhia tias neeg Leej Tub los lawm. Txhua xeem hauv ntiaj teb yuav ntaus hauv siab quaj ntsoog qees thiab lawv yuav pom neeg Leej Tub muaj hwj chim ci ntsa iab nrog huab nrog cua saum ntuj los. 31 Nws yuav tshuab raj tshuab xyu txhib nws cov tub txib saum ntuj mus qaws cov uas Vajtswv xaiv tseg uas nyob plaub ceg kaum ntuj* los ua ke, sab ntuj no mus txog sab ntuj tim ub.

32 “Cia li saib tsob txiv cev. Thaum tej ceg mos pib hlav nplooj ces koj yeej paub tias yuav txog caij ntuj so. 33 Ib yam li ntawd, thaum nej pom tej no ces nej yeej paub tias neeg Leej Tub los ze lawm, twb txog ntawm taw rooj lawm. 34 Kuv hais ncaj qha rau nej tias yuav tsum muaj tiav raws li tej no ua ntej tiam no dua mus. 35 Txawm lub ntuj lub teb yuav ploj mus los, kuv tej lus yeej yuav tsis ploj ib los li.

36 “Ntsig txog hnub ntawd thiab teev ntawd, tsis muaj leej twg paub. Txawm cov tub txib saum ntuj thiab Leej Tub los yeej tsis paub, tsuas yog Leej Txiv thiaj paub xwb. 37 Lub caij lub nyoog uas neeg Leej Tub rov los* yuav zoo ib yam li Nau-as tiam. 38 Ua ntej dej dag nyab ntiaj teb, tib neeg niaj hnub ua noj ua haus, qua tub qua ntxhais mus txog ntua thaum Nau-as nce rau hauv lub nkoj. 39 Lawv yeej tsis quav ntsej li mus txog thaum dej dag muab lawv kuav kiag mus. Lub caij lub nyoog uas neeg Leej Tub rov los,* tib neeg yuav coj ib yam li ntawd ntag. 40 Thaum ntawd txawm yog ob tug txiv neej nyob tom teb los yuav coj ib tug tseg ib tug. 41 Txawm yog ob tug poj niam tab tom zom zeb los yuav coj ib tug tseg ib tug. 42 Cia li ceev faj zov tos rau qhov nej tsis paub tias nej tus Tswv yuav los rau hnub twg.

43 “Nco ntsoov tias, yog tus tswv tsev paub tias tub sab yuav tuaj rau lub sij hawm twg thaum hmo ntuj ces nws yeej yuav zov tos tsis pub tub sab nkag los. 44 Ib yam li ntawd, nej yuav tsum nyob zov tos rau qhov neeg Leej Tub yuav los rau lub sij hawm* uas nej tsis nco ceev faj.

45 “Tus qhev ncaj thiab ntse* uas tus tswv tsev tsa los saib xyuas nws tej tub teg tub taws thiab faib zaub faib mov rau lawv raws caij raws nyoog yog leej twg tiag? 46 Thaum tus tswv rov los pom tus qhev ntawd rau siab ntso ua hauj lwm, tus qhev yuav tau ntsej muag. 47 Kuv hais ncaj qha rau nej tias, tus tswv yuav tsa tus qhev ntawd los saib xyuas tag nrho nws tej cuab txhiaj cuab tam.

48 “Tiam sis yog tus qhev ntawd lim hiam es xav hauv nruab siab tias, ‘Tshuav ntev kuv tus tswv mam rov los,’ 49 es nws txawm muab lwm cov qhev ntaus thiab mus nrog tej neeg quav dej quav cawv noj haus ua ke 50 ces nws tus tswv yuav los rau hnub uas nws tsis nco ceev faj thiab teev uas nws tsis paub. 51 Thaum ntawd, tus tswv yuav muab nws rau txim hnyav heev thiab yuav muab nws txo hauj lwm nrog cov neeg siab nkhaus* ua ke. Thaum ntawd, nws yuav quaj tom hniav qawv rau qhov chaw ntawd.

25 “Vajtswv txoj kev kav* piv ib yam li kaum tus hluas nkauj* uas taws teeb mus tos tus nraug vauv. 2 Tsib tug muaj tswv yim, tsib tug tsis muaj. 3 Tsib tug uas tsis muaj tswv yim taws teeb mus tiam sis tsis npaj roj. 4 Hos tsib tug uas muaj tswv yim taws teeb mus thiab ib leeg npaj ib hwj roj nrog lawv. 5 Lawv nyob tos tsis pom tus nraug vauv tuaj li, lawv txawm tsaug zog ncaws nruj nris. 6 Thaum ib tag hmo, muaj neeg hu tias, ‘Tus nraug vauv tuaj txog lawm lauj! Cia li tawm mus tos nws.’ 7 Cov hluas nkauj thiaj sawv pes tsees los txhab roj rau lawv tej teeb. 8 Cov tsis muaj tswv yim txawm thov cov uas muaj tias, ‘Peb cov teeb yuav tuag, qee me ntsis roj rau peb thiab.’ 9 Cov muaj tswv yim thiaj teb lawv tias, ‘Roj tsis txaus peb sawv daws. Nej mam mus yuav tom khw rau nej.’ 10 Thaum cov tsis muaj tswv yim mus yuav roj lawm, tus nraug vauv txawm tuaj txog. Cov uas npaj txhij lawd thiaj tau nrog tus nraug vauv mus rau hauv tsev mus noj tshoob. Tom qab ntawd, luag txawm muab lub qhov rooj kaw kiag lawm. 11 Thaum cov tsis muaj tswv yim los txog lawv hu tias, ‘Yawg hlob, yawg hlob, thov qhib qhov rooj rau peb!’ 12 Tus nraug vauv teb lawv tias, ‘Kuv hais ncaj rau nej tias, kuv yeej tsis paub nej.’

13 “Yog li ntawd, ceev faj zov tos rau qhov nej tsis paub tias neeg Leej Tub yuav los rau hnub twg thiab teev twg.

14 “Vajtswv txoj kev kav* kuj zoo ib yam li tus yawg uas yuav mus ncig teb chaws. Nws thiaj txib nws cov tub qhe saib xyuas nws tej cuab txhiaj cuab tam. 15 Nws muab tsib talas* rau ib tug, muab ob talas rau ib tug, thiab muab ib talas rau ib tug. Nws muab rau lawv raws li lawv lub peev xwm ces nws mam li sawv kev. 16 Tus uas tau tsib talas txawm coj mus ua luam tam sid, nws thiaj tsam tsib talas ntxiv. 17 Tus uas tau ob talas kuj coj mus ua luam thiab, nws thiaj tsam ob talas ntxiv. 18 Tiam sis tus tub qhe uas tau ib talas txawm coj nws tus los pav talas nyiaj mus faus cia xwb.

19 “Tau ntev loo, tus los pav mam rov los txheeb seb nws cov tub qhe ib leeg tsam pes tsawg. 20 Tus uas tau tsib talas thiaj nqa tsib talas uas nws tsam mus cuag nws tus los pav thiab hais tias, ‘Yawg hlob, koj muab tsib talas rau kuv coj mus ua luam. Saib, kuv tsam tsib talas ntxiv.’ 21 Tus los pav thiaj hais rau nws tias, ‘Zoo heev, tus qhev siab zoo! Koj ua ncaj rau tej yam me. Yog li ntawd, kuv yuav tsa koj saib xyuas ntau yam. Cia li nrog koj tus los pav zoo siab xyiv fab.’ 22 Tus uas tau ob talas thiaj mus cuag nws tus los pav thiab hais tias, ‘Yawg hlob, koj muab ob talas rau kuv coj mus ua luam. Saib, kuv tsam ob talas ntxiv.’ 23 Tus los pav thiaj hais rau nws tias, ‘Zoo heev, tus qhev siab zoo! Koj ua ncaj rau tej yam me. Yog li ntawd, kuv yuav tsa koj saib xyuas ntau yam. Cia li nrog koj tus los pav zoo siab xyiv fab.’

24 “Thaum kawg, tus tub qhe uas tau ib talas los cuag nws tus los pav thiab hais tias, ‘Yawg hlob, kuv paub tias koj yog ib tug neeg tsiv tsaim. Koj hlais tej uas tsis yog koj cog thiab koj sau tej uas tsis yog koj tseb. 25 Kuv ntshai koj, kuv thiaj coj koj talas nyiaj mus faus cia. Koj talas nyiaj nyob ntawm no.’ 26 Tus los pav thiaj teb nws tias, ‘Niag qhev tub nkeeg tsis tsim txiaj.* Koj paub tias kuv hlais tej uas tsis yog kuv cog thiab sau tej uas tsis yog kuv tseb lod? 27 Ua cas koj ho tsis muab kuv talas nyiaj coj mus tso hauv txhab kom kuv ho tau paj?

28 “‘Yog li ntawd, cia li muab nws talas nyiaj coj mus pub rau tus tub qhe uas muaj kaum talas. 29 Rau qhov txhua tus uas muaj yim huab yuav pub rau nws ntxiv kom nws muaj nplua mias. Tiam sis tus uas tsis muaj, txawm nws muaj me ntsis xwb los yuav muab rho ntawm nws mus. 30 Cia li muab tus niag qhev tsis tsim txiaj ntawd pov rhees nraum zoov uas tsaus ntuj nti kom nws quaj tom hniav qawv sab nraud.’

31 “Thaum neeg Leej Tub nrog nws cov tub txib saum ntuj los, nws yuav muaj hwj chim ci ntsa iab zaum saum nws lub rooj vaj ntxwv. 32 Txhua haiv neeg yuav los sawv ntawm nws xub ntiag. Nws yuav muab cov tib neeg cais ib yam li tus tswv yug yaj cais cov yaj ntawm cov tshis. 33 Nws yuav muab cov yaj tso ntawm nws sab xis, muab cov tshis tso ntawm nws sab laug.

34 “Thaum ntawd, vaj ntxwv yuav hais rau cov uas nyob ntawm nws sab xis tias, ‘Cia li los, nej yog cov uas kuv Txiv twb foom koob hmoov rau lawm. Txij thaum ntuj tsim teb raug* los, kuv Txiv twb npaj lub Nceeg Vaj* rau nej lawm. 35 Thaum kuv tshaib, nej pub rau kuv noj. Thaum kuv nqhis, nej pub rau kuv haus. Thaum kuv ua qhua, nej zoo siab tos txais kuv. 36 Thaum kuv tsis muaj hnav, nej muab rau kuv hnav. Thaum kuv mob, nej tu kuv. Thaum kuv raug kaw, nej tuaj xyuas kuv.’ 37 Cov ncaj ncees yuav teb nws tias, ‘Tus Tswv, thaum twg peb pom koj tshaib es pub rau koj noj, los sis pom koj nqhis es pub rau koj haus? 38 Thaum twg peb pom koj ua qhua es peb tos txais koj, los sis pom koj tsis muaj hnav es muab rau koj hnav? 39 Thaum twg peb pom koj mob los sis raug kaw es peb tuaj xyuas koj?’ 40 Ces vaj ntxwv yuav teb lawv tias, ‘Kuv hais ncaj qha rau nej tias, thaum nej ua rau kuv cov kwv tij ib tug, txawm yog tus uas qis tshaj, twb yog nej ua rau kuv lawm ntag.’

41 “Thaum ntawd, vaj ntxwv yuav hais rau cov uas nyob ntawm nws sab laug tias, ‘Cia li khiav mus! Nej yog cov uas raug Vajtswv foom tsis zoo. Cia li mus rau hauv lub cub tawg uas cig tsis txawj tuag uas twb npaj tseg rau Ntxwg Nyoog thiab nws cov tub txib lawm. 42 Thaum kuv tshaib los nej tsis pub rau kuv noj. Thaum kuv nqhis los nej tsis pub rau kuv haus. 43 Thaum kuv ua qhua los nej tsis tos txais kuv. Thaum kuv tsis muaj hnav los nej tsis muab rau kuv hnav. Thaum kuv mob thiab raug kaw los nej tsis tuaj tu kuv.’ 44 Ces lawv kuj yuav teb vaj ntxwv tias, ‘Tus Tswv, thaum twg peb pom koj tshaib nqhis, pom koj ua qhua, pom koj tsis muaj hnav, pom koj muaj mob, thiab pom koj raug kaw es peb tsis tu koj?’ 45 Ces nws yuav teb lawv tias, ‘Kuv hais ncaj qha rau nej tias, qhov uas nej tsis ua rau kuv cov kwv tij ib tug, txawm yog tus uas qis tshaj, twb yog nej tsis ua rau kuv lawm thiab ntag.’ 46 Cov no yog cov uas yuav raug rhuav tshem mus ib txhis tiam sis cov ncaj ncees yuav tau txoj sia ib txhis tsis kawg.”

26 Thaum Yexus hais tej no tas, nws hais rau nws cov thwj tim tias, 2 “Tshuav ob hnub xwb, yuav ua Kev Cai Hla Dhau ces luag yuav ntes neeg Leej Tub coj mus ntsia rau saum tus ncej ntoo.”

3 Lub sij hawm ntawd, cov pov thawj hlob thiab cov txwj laus tuaj sab laj ua ke rau hauv tus tuam pov thawj hlob Khayafas tsev. 4 Lawv tuav hauv ntes Yexus coj mus tua pov tseg.* 5 Tiam sis lawv hais tias, “Txhob ntes rau thaum tab tom ua kev cai, tsam muaj kev kub ntxhov.”

6 Muaj ib zaug Yexus nyob hauv Ximoos tsev, hauv lub zos Npethanis. Ximoos yog tus uas yav nram ntej mob ruas. 7 Thaum lawv tab tom noj mov, txawm muaj ib tug poj niam nqa ib hwj* roj tsw qab kim heev tuaj hliv rau saum Yexus taub hau. 8 Cov thwj tim pom li ntawd, lawv tsis zoo siab. Lawv thiaj hais tias, “Ua cas yuav muab nkim pov tseg li ntawd? 9 Yog muab muag ntshe tau nyiaj ntau heev coj mus pub rau cov pluag.” 10 Yexus paub tej uas lawv tham ntawd, nws thiaj hais tias, “Txhob ua rau tus poj niam no ntxhov siab. Tsim nyog qhuas tej uas nws ua ntawd. 11 Cov pluag yuav nrog nej nyob mus li, tiam sis kuv yuav tsis nrog. 12 Tus poj niam no muab roj tsw qab hliv rau kuv, twb yog nws tu kuv lub cev rau hnub uas faus kuv xwb. 13 Kuv hais ncaj qha rau nej tias, txoj xov zoo nrov ncha mus txog qhov twg, tus poj niam no tes hauj lwm yuav nrov ncha mus txog qhov ntawd.”

14 Yexus 12 tug tub txib, tus hu ua Yudas Ikhali-aus txawm mus cuag cov pov thawj hlob 15 thiab hais rau lawv tias, “Yog kuv muab Yexus cob rau nej no, nej yuav muab dab tsi rau kuv?” Lawv cog lus tias lawv yuav muab 30 lub nyiaj rau nws. 16 Txij hnub ntawd los, Yudas thiaj nrhiav nrhw kev muab Yexus cob rau lawv.

17 Thawj hnub* ua Kev Cai Noj Ncuav Tsis Xyaw Keeb, cov thwj tim txawm los nug Yexus tias, “Koj xav kom peb mus npaj pluas hmo ua Kev Cai Hla Dhau qhov twg?” 18 Yexus teb tias, “Mus rau hauv nroog, mus cuag ib tug txiv neej thiab hais rau nws li no, ‘Xib Hwb hais tias, “Kuv lub sij hawm los ze lawm, kuv yuav nrog kuv cov thwj tim ua Kev Cai Hla Dhau hauv koj tsev.”’” 19 Cov thwj tim thiaj mus npaj ua Kev Cai Hla Dhau li Yexus tau hais.

20 Thaum tsaus ntuj, Yexus nrog nws 12 tug thwj tim zaum ua ke ntawm rooj mov. 21 Thaum lawv tab tom noj mov, Yexus hais tias, “Kuv hais ncaj qha rau nej tias, nej cov no ib tug yuav ntxeev siab rau kuv.” 22 Yexus hais li no, ua rau lawv nyuaj siab heev, lawv txhua tus thiaj nug zom zaws tias, “Tus Tswv, puas yog kuv?” 23 Yexus teb lawv tias, “Tus uas nrog kuv ntsw ib lub tais yog tus yuav ntxeev siab rau kuv. 24 Vajtswv Txoj Lus yeej hais tseg lawm tias neeg Leej Tub yuav tuag. Tiam sis tus uas ntxeev siab rau neeg Leej Tub yuav txom nyem lauj! Kheev nws tsis txhob yug los zoo dua.” 25 Yudas twb yuav ntxeev siab rau Yexus los nws tseem nug tias, “Xib Hwb,* puas yog koj hais kuv?” Yexus teb nws tias, “Koj yog tus paub.”

26 Thaum lawv tseem noj mov, Yexus txawm muab ib lub ncuav los thiab ua Vajtswv tsaug. Nws mam li muab ntais cev rau cov thwj tim thiab hais tias, “Cia li noj. Lub ncuav no piv txog kuv lub cev.” 27 Yexus kuj muab ib khob cawv txiv hmab los thiab ua Vajtswv tsaug. Nws mam li muab cev rau nws cov thwj tim thiab hais tias, “Nej cia li haus. 28 Khob cawv no piv txog kuv cov ntshav uas ua lub hom thawj nias rau Vajtswv lo lus cog tseg. Kuv yuav pub kuv cov ntshav los ntxuav coob leej tej kev txhaum. 29 Tiam sis kuv hais rau nej tias, kuv yuav tsis haus cov cawv txiv hmab no mus txog hnub uas kuv nrog nej haus tej cawv txiv hmab tshiab hauv kuv Txiv lub Nceeg Vaj.”* 30 Tom qab lawv hu nkauj tas ces lawv txawm tawm mus rau pem Roob Txiv Aulib lawm.

31 Yexus txawm hais rau lawv tias, “Hmo no ntag, nej txhua tus yuav tso kuv tseg.* Vajtswv Txoj Lus twb hais tias, ‘Kuv yuav tua tus tswv yug yaj mas pab yaj yuav tawg ua sab ua sua.’ 32 Thaum kuv sawv hauv qhov tuag rov los lawd, kuv yuav ua nej ntej mus rau Kalilais.” 33 Petus teb Yexus tias, “Txawm lawv txhua tus tso koj tseg los kuv yeej yuav tsis tso koj tseg ib zaug li!”* 34 Yexus hais rau Petus tias, “Kuv hais ncaj qha rau koj tias, hmo no ua ntej qaib qua, koj yuav tsis lees paub kuv peb zaug.” 35 Petus hais rau Yexus tias, “Txawm kuv yuav nrog koj tuag los tsis muaj ib zaug uas kuv yuav tsis lees paub koj li.” Cov thwj tim puav leej hais ib yam li Petus thiab.

36 Thaum Yexus thiab nws cov thwj tim los txog hauv lub vaj Kexemanes, nws hais rau nws cov thwj tim tias, “Nej nyob ntawm no, kuv yuav mus thov Vajtswv lawm tod.” 37 Yexus coj Petus thiab Xenpedis ob tug tub nrog nws mus. Nws txawm nyuaj siab thiab ntxhov siab kawg li. 38 Yexus thiaj hais rau lawv tias, “Kuv nyuaj siab kawg li, tshuav tuag xwb. Nej nyob ntawm no zov tos, tsis txhob tsaug zog.” 39 Yexus thiaj mus tom ntej me ntsis, nws txhos caug ntua thov Vajtswv tias, “Kuv Txiv, yog koj pom zoo thov tshem lub khob* no mus. Txawm li cas los xij, thov kom muaj raws li koj lub siab nyiam, tsis yog raws li kuv lub.”

40 Thaum Yexus rov los ntawm nws cov thwj tim, lawv tsaug zog tas. Nws thiaj hais rau Petus tias, “Nej zov ib nyuag txoos teev xwb tsis tau li lod? 41 Nej yuav tsum zov tos thiab thov Vajtswv tsis tseg, kev txhaum thiaj ntxias tsis tau nej. Lub siab mas kub lug tiam sis lub cev* qaug zog zis.” 42 Yexus rov mus thov Vajtswv ib zaug ntxiv tias, “Kuv Txiv, yog tsis muaj lwm txoj kev lawm es yuav tsum haus lub khob no xwb, los thov kom muaj raws li koj lub siab nyiam.” 43 Thaum Yexus rov los dua, nws pom cov thwj tim tsaug zog heev rua tsis taus qhov muag li. 44 Nws thiaj rov mus thov Vajtswv zaum peb ib yam li qub. 45 Thaum Yexus rov los rau ntawm nws cov thwj tim, nws hais rau lawv tias, “Tam sim no tsis yog lub caij uas nej yuav tsaug zog ncaws nruj nris li ko! Twb txog lub sij hawm uas neeg Leej Tub yuav raug muab cob rau cov neeg lim hiam txhais tes. 46 Cia li sawv peb mus. Saib maj! Tus uas ntxeev siab rau kuv twb tuaj yuav txog.” 47 Thaum Yexus tab tom hais li ntawd, Yudas uas yog ib tug ntawm 12 tug tub txib txawm tuaj txog. Cov pov thawj thiab cov txwj laus txib ib pab neeg coob coob nqa ntaj nqa qws nrog nws tuaj thiab.

48 Yudas uas ntxeev siab rau Yexus, twb qhia rau cov tib neeg lawm tias, “Yog kuv nwj tus twg ces ntes kiag tus ntawd.” 49 Thaum Yudas mus txog ntawd, nws ncaj qha mus rau ntawm Yexus thiab hais tias, “Xib Hwb,* koj nyob li cas?” Ces nws txawm nwj kiag Yexus sab plhu. 50 Yexus hais rau Yudas tias, “Koj tuaj ua dab tsi?” Ces cov tib neeg nrov ntwg los ntes Yexus. 51 Muaj ib tug uas nrog Yexus txawm rho hlo ntaj los tib ntag tus tuam pov thawj hlob tus tub qhe ib sab nplooj ntseg tu nrho. 52 Yexus hais rau nws tias, “Cia li muab koj rab ntaj ntxig rau hauv hnab. Txhua tus uas siv ntaj yuav tuag rau hniav ntaj. 53 Koj tsis paub tias kuv yeej thov tau kom kuv Txiv tso coob tshaj li 12 pab* tub txib saum ntuj los pab kuv lod? 54 Tiam sis yog kuv ua li ntawd, yuav ua cas muaj tiav raws li Vajtswv Txoj Lus?” 55 Yexus txawm hais rau pab neeg ntawd tias, “Nej nqa ntaj nqa qws tuaj ntes tub sab lod? Kuv niaj hnub qhia hauv lub tuam tsev, ua cas nej ho tsis ntes? 56 Tiam sis yuav tsum muaj li no thiaj raws li cov cev Vajtswv lus tau sau tseg.” Ces cov thwj tim txawm tso Yexus tseg khiav tas lawm.

57 Lawv txawm coj Yexus mus rau ntawm tus tuam pov thawj hlob Khayafas tsev. Cov xib hwb* thiab cov txwj laus twb tuaj ua ntej rau ntawd lawm. 58 Tiam sis Petus tuaj deb deb raws Yexus qab mus txog ntawm tus tuam pov thawj hlob tsev. Thaum nws mus rau sab hauv, nws txawm mus nrog cov tub teg tub taws zaum ua ke saib seb lawv yuav ua li cas rau Yexus.

59 Cov pov thawj hlob thiab pab Xahenrees nrhiav neeg los dag txog Yexus kom lawv tau kev muab nws tua. 60 Muaj coob tus los nkaug Yexus tiam sis lawv tej lus tsis muaj hauv paus hauv ntsis li. Thaum kawg, thiaj muaj ob tug los ua tim khawv 61 tias, “Tus yawg no hais tias, ‘Kuv yeej rhuav tau Vajtswv lub tuam tsev pov tseg mas peb hnub xwb, kuv yuav ua tau ib lub tshiab.’” 62 Tus tuam pov thawj hlob txawm sawv tsees nug Yexus tias, “Koj txawm yuav tsis teb nkawd ib los li lod? Koj tsis hnov tej uas nkawd nkaug koj lod?” 63 Tiam sis Yexus nyob twj ywm xwb. Tus tuam pov thawj hlob thiaj hais rau Yexus tias, “Koj cia li tuav Vajtswv tus muaj sia zees nyob lub npe qhia ncaj rau peb seb koj puas yog tus Khetos uas yog Vajtswv Leej Tub?” 64 Yexus teb nws tias, “Yog li koj hais.* Kuv hais rau nej tias, txij no mus nej yuav pom neeg Leej Tub zaum ntawm tus uas muaj hwj chim loj kawg nkaus sab xis thiab yuav pom nws nrog huab nrog cua saum ntuj los.” 65 Tus tuam pov thawj hlob txawm dua rhe nws lub tsho* thiab hais tias, “Nws hais lus tuam mom Vajtswv lawm! Peb tseem yuav tos pes tsawg tus tim khawv ntxiv? Nej twb hnov tej uas nws hais ntawd. 66 Nej pom li cas?” Lawv teb tias, “Tsim nyog nws tuag.” 67 Lawv txawm nto qaub ncaug rau Yexus ntsej muag thiab xuas nrig ntaus nws. Ib txhia kuj xuas tawg ncuav rau nws sab plhu 68 thiab hais tias, “Niag Khetos, koj txawj cev Vajtswv lus no lod, twv seb leej twg ntaus koj?”

69 Thaum Petus tseem nyob nraum zoov ntawm lub loog, ib tug ntxhais qhev txawm los nug nws tias, “Koj twb nrog Yexus tus neeg Kalilais thiab sad?” 70 Tiam sis Petus tsis kam lees li. Nws hais tias, “Kuv tsis paub xyov koj hais koj dab tsi.” 71 Petus ho tawm mus rau ntawm rooj loog. Txawm muaj dua ib tug ntxhais los hais rau cov neeg nyob ntawd tias, “Tus no twb nrog Yexus tus neeg Naxales ua ke thiab.” 72 Ces Petus tsis kam lees Yexus dua tias, “Muaj Vajtswv nyob saum ntuj, kuv yeej tsis paub tus neeg ntawd li!” 73 Tom qab ntawd cov neeg sawv ib ncig txawm los hais Petus tias, “Koj yeej yog lawv ib tug kawg! Koj hais lus zoo li cov neeg Kalilais ntag.” 74 Ces Petus rov twv dua tias, “Kuv tsis paub tus neeg ntawd na has!” Ua ciav qaib txawm qua kiag tam sid. 75 Petus thiaj nco dheev txog Yexus cov lus hais tias, “Hmo no ua ntej qaib qua, koj yuav tsis lees paub kuv peb zaug.” Petus thiaj tawm mus quaj tu siab nrho rau sab nraud.

27 Thaum kaj ntug cov pov thawj hlob thiab cov txwj laus sawv daws tuaj sab laj muab Yexus tua. 2 Lawv thiaj muab Yexus khi coj mus cob rau tus tswv xeev Philaj.

3 Thaum Yudas tus uas ntxeev siab rau Yexus pom tias luag teem lub txim tuag rau Yexus, nws tu siab kawg li. Nws thiaj coj 30 lub nyiaj rov mus rau cov pov thawj hlob thiab cov txwj laus. 4 Nws hais tias, “Kuv ua txhaum lawm, kuv ntxeev siab rau tus neeg ncaj ncees.” Lawv teb tias, “Peb tsis paub txog tej ko, yog koj teeb meem xwb.” 5 Nws thiaj muab cov nyiaj pov rhees hauv lub tuam tsev thiab mus lawm. Ces nws txawm mus dai caj dab tuag. 6 Cov pov thawj hlob thiaj khaws cov nyiaj thiab hais tias, “Tej nyiaj no yog nyiaj ntshav xwb, tsis zoo muab tso rau lub txhab hauv lub tuam tsev.” 7 Thaum lawv hais haum lawd, lawv txawm coj mus yuav tus kws puab lauj kaub av daim teb. Lawv cia daim teb ntawd log cov uas tuaj lwm teb chaws tuaj. 8 Luag thiaj li muab daim teb ntawd hu ua daim Teb Ntshav los txog niaj hnub nim no. 9 Tej no muaj tiav raws li Vajtswv tau hais rau Yelemis tus uas cev Vajtswv lus tias, “Lawv khaws 30 lub nyiaj lawm. Cov Ixayees suav tias nws tus nqi taub hau tsuas raug li ntawd xwb. 10 Lawv thiaj coj cov nyiaj ntawd mus yuav tus kws puab lauj kaub av daim teb raws li Vajtswv Yehauvas* tau sam hwm rau kuv.”

11 Thaum Yexus sawv ntawm Philaj xub ntiag, Philaj nug nws tias, “Koj puas yog cov neeg Yudais tus Vaj Ntxwv?” Yexus teb tias, “Yog li koj hais.”* 12 Tiam sis thaum cov pov thawj hlob thiab cov txwj laus nkaug Yexus, nws tsis teb ib los li. 13 Philaj thiaj hais Yexus tias, “Koj tsis hnov lawv nkaug koj lod?” 14 Tiam sis Yexus tsis teb ib los li mas Philaj xav tsis thoob.

15 Txhua xyoo ua Kev Cai Hla Dhau, tus tswv xeev yeej tso ib tug neeg raug txim raws li cov pej xeem thov. 16 Thaum ntawd, muaj ib tug yawg hu ua Npalanpas raug txim loj heev uas teb chaws yeej hnov txog nws lawm. 17 Thaum cov pej xeem tuaj ua ke, Philaj thiaj nug lawv tias, “Nej xav kom kuv tso leej twg los rau nej? Tso Npalanpas los tso Yexus tus uas luag hu ua Khetos?” 18 Philaj paub tias twb yog lawv khib khib lawv thiaj muab Yexus cob rau nws. 19 Thaum Philaj tab tom tu plaub, nws tus poj niam txib neeg tuaj hais rau nws tias, “Tus txiv neej no tsis muaj txim, tsis txhob ua li cas rau nws. Nag hmo kuv ua npau suav txog nws mas ua rau kuv ntxhov siab heev.” 20 Txawm li ntawd los cov pov thawj hlob thiab cov txwj laus txw cov pej xeem kom tso Npalanpas es muab Yexus tua pov tseg. 21 Philaj thiaj nug lawv tias, “Nej xav kom kuv tso tus twg los rau nej no?” Lawv tib tsaug teb tias, “Npalanpas.” 22 Philaj ho nug lawv tias, “Nej yuav kom kuv ua li cas rau Yexus tus uas luag hu ua Khetos maj?” Lawv tib tsaug teb tias, “Muab ntsia saum ntoo!” 23 Philaj thiaj nug tias, “Nws tau ua txhaum dab tsi?” Tiam sis cov pej xeem yim huab qw nrov tias, “Muab ntsia saum ntoo!”

24 Philaj ua tsis tau li cas, cov pej xeem yim huab ua heev tuaj xwb, nws thiaj muab dej los ntxuav tes tab meeg sawv daws thiab hais tias, “Kuv tsis ris tus neeg no cov ntshav, nej mam ris nawb.” 25 Cov pej xeem sawv daws tib tsaug teb tias, “Peb thiab peb cov me nyuam mam li ris kiag lub txim no.” 26 Philaj thiaj tso Npalanpas rau lawv, tiam sis nws kom muab Yexus nplawm thiab coj mus ntsia rau saum ntoo.

27 Philaj cov tub rog txawm coj Yexus mus rau hauv Philaj lub tsev ces cov tub rog sawv daws los vij vog Yexus. 28 Lawv muab nws cev khaub ncaws hle thiab muab ib ce ntaub liab los looj nws. 29 Lawv muab hmab pos qhaib ua ib lub kauj rau Yexus ntoo thiab muab ib tug tauj rau nws tuav ntawm sab tes xis. Lawv ua txuj txhos caug ntawm nws xub ntiag hais tias, “Hawm cov Yudais tus Vaj Ntxwv lauj!” 30 Ces lawv nto qaub ncaug rau Yexus thiab muab tus tauj ntaus nws taub hau. 31 Thaum lawv thuam luag nws tas, lawv txawm muab cev ntaub liab hle thiab rov muab nws lub tsho* rau nws hnav ces lawv mam coj nws mus ntsia rau saum tus ncej ntoo.

32 Thaum lawv tab tom mus, lawv ntsib ib tug neeg Xailinis hu ua Ximoos. Lawv thiaj yuam kom nws kwv Yexus tus ncej ntoo.* 33 Thaum lawv mus txog qhov chaw hu ua Kaukauthas uas txhais tias Txha Taub Hau, 34 lawv txawm muab cawv txiv hmab xyaw kua iab rau Yexus haus. Tiam sis thaum nws saj lawd, nws tsis kam haus. 35 Tom qab lawv muab nws ntsia rau saum tus ncej ntoo lawd, lawv txawm muab nws lub tsho* dua thiab muab twv seb leej twg yuav tau daim twg. 36 Lawv ua li ntawd tas ces lawv zaum zov Yexus. 37 Lawv kuj muab ib daig ntoo ntsia saum tus hau ncej uas sau cov lus nkaug tias, “Tus no yog Yexus, cov Yudais tus Vaj Ntxwv.”

38 Lawv kuj muab ob tug tub sab dai saum ob tug ncej ntoo nrog Yexus ua ke, ib tug nyob rau nws sab xis, ib tug nyob rau nws sab laug. 39 Cov neeg dua kev co hau nto thuam 40 Yexus tias, “Koj nim khav tias koj yuav rhuav tau Vajtswv lub tuam tsev es peb hnub xwb koj yuav tsa tau ib lub tshiab no, cawm koj tus kheej seb! Koj twb yog Vajtswv tus tub ne, cas tsis nqes los!” 41 Cov pov thawj hlob thiab cov xib hwb* nrog rau cov txwj laus kuj thuam Yexus ib yam li ntawd tias, 42 “Nws cawm tau lwm tus tiam sis nws ho cawm tsis tau nws tus kheej! Nws twb yog cov Ixayees tus Vaj Ntxwv ne! Yog nws nqes tau los, peb mam li ntseeg nws. 43 Nws nim ntseeg ntseeg Vajtswv thiab hais tias nws yog Vajtswv tus Tub, yog Vajtswv txaus siab rau nws, Vajtswv mam li cawm nws.” 44 Txawm ob tug tub sab uas dai nrog Yexus los tseem thuam nws ib yam nkaus thiab.

45 Thaum 12 teev, lub ntuj txawm tsaus dub nciab thoob plaws teb chaws mus txog 3 teev. 46 Kwv lam li peb teev ntawd, Yexus txawm tsa suab hlo quaj tias, “Elis, Elis, lamas xanpathanis?” uas txhais tias, “Kuv tus Vajtswv, kuv tus Vajtswv’e, ua cas koj tso kuv tseg lawm?” 47 Thaum lawv hnov Yexus qw li ntawd, ib txhia txawm hais tias, “Ntshe nws hu Eliyas.” 48 Ib tug thiaj dhia loo mus muab lub xwb kuab raus cawv txiv hmab qaub thiab muab chob ib tug tauj cev rau Yexus haus. 49 Tiam sis dua li cov hais tias, “Txhob thab nws! Cia seb Eliyas puas los cawm nws.” 50 Yexus rov qw ib suab nrov nrov ces nws txawm tu siav nrho.

51 Tam sim ntawd, daim ntaub hauv lub tuam tsev* txawm ntuag rhe saud los ti nkaus hauv taw ua ob daig thiab av qeeg ua zog koog mas tej pob zeb pob tsuas tawg pes rhe. 52 Tej qhov ntxa thiaj qhib pes plho ua rau cov neeg dawb huv tej cev tuag tawm pawg lug los. 53 Muaj coob tus tau pom li ntawd. (Tom qab Yexus sawv rov los, cov neeg uas tau pom tej ntawd mam mus rau hauv lub nroog Yeluxalees.)* 54 Thaum tus tub rog* thiab cov uas nrog nws zov Yexus pom av qeeg thiab pom tej xwm no, lawv ntshai kawg li. Lawv thiaj hais tias, “Tus no yuav tsum yog Vajtswv tus Tub tiag.”

55 Muaj coob tus poj niam nrog Yexus tuaj pem Kalilais tuaj. Lawv yog cov uas niaj hnub tu Yexus. Lawv sawv deb deb ntsia nws. 56 Maivliag Madalas, Maivliag uas yog Yakaunpaus thiab Yauxes niam, thiab Xenpedis tus poj niam* kuj nrog cov poj niam ntawd ua ke thiab.

57 Thaum yuav tsaus ntuj, txawm muaj ib tug yawg nplua nuj hu ua Yauxej tuaj txog. Nws tuaj lub nroog Alimathias tuaj thiab nws kuj yog Yexus ib tug thwj tim. 58 Tus yawg no txawm mus thov Philaj kom muab Yexus lub cev rau nws coj mus zais. Philaj thiaj kom cov tub rog muab rau nws. 59 Yauxej coj Yexus lub cev mus thiab muab cov ntaub mag zoo zoo los qhwv. 60 Nws mam li muab Yexus lub cev coj mus tso rau hauv lub qhov ntxa uas nws nyuam qhuav txaug tau ntawm phab tsua. Nws muab ib daim lag zeb dov los npog lub rooj ntxas ces nws txawm mus lawm. 61 Maivliag Madalas thiab tus Maivliag i, nkawd tseem zaum ntawm lub ntxa.

62 Hnub ntawd yog hnub sawv daws npaj rau hnub Xanpataus. Hnub tom qab, cov pov thawj hlob thiab cov Falixais thiaj mus thov Philaj 63 tias, “Yawg hlob, thaum niag dag ntawd tseem nyob nws hais tias, ‘Peb hnub xwb kuv yuav ciaj sawv rov los.’ 64 Thov koj tso tub rog mus zov nws lub ntxa kom txwm peb hnub. Nws cov thwj tim thiaj mus nyiag tsis tau nws lub cev, tsam lawv ho dag rau tej pej xeem tias, ‘Nws twb ciaj sawv rov los lawm!’ Zaj dag no tseem yuav ua rau tib neeg ntseeg tshaj tej uas nws tau hais lawm thiab.” 65 Philaj teb lawv tias, “Cia li coj pab tub rog no mus zov kom zoo.” 66 Lawv thiaj mus muab daim lag zeb kaw ruaj ruaj thiab tso tub rog zov nruj nruj.

28 Hnub* tom qab hnub Xanpataus, thaum kaj ntug txoog, Maivliag Madalas thiab tus Maivliag i txawm mus saib Yexus lub qhov ntxa.

2 Thaum Vajtswv Yehauvas* tus tub txib saum ntuj nqes los, av txawm qeeg loj heev. Nws muab daim lag zeb uas npog lub rooj ntxas dov rau ib cag ces nws txawm zaum kiag saud. 3 Nws ci cuag xob laim thiab nws cev tsoos dawb paug li daus. 4 Thaum cov neeg uas zov ntxa pom li no, lawv ntshai tshee hnyo ib ce txhav tag.

5 Tus tub txib saum ntuj thiaj hais rau ob tug poj niam tias, “Txhob ntshai, kuv paub tias neb tuaj nrhiav Yexus tus uas raug tua saum ncej ntoo. 6 Yexus twb ciaj sawv rov los li nws hais tseg lawm. Los saib nws lub chaw seb! Nws tsis nyob no lawm. 7 Cia li mus qhia nws cov thwj tim tias nws twb ciaj sawv rov los lawm tiag! Nws yuav ua nej ntej mus rau pem Kalilais. Nej yuav ntsib nws ped. Nco ntsoov kuv tej lus no.”

8 Ob tug poj niam ntawd thiaj tawm nrawm nroos ntawm lub qhov ntxa mus qhia Yexus cov thwj tim. Nkawd ntshai los ntshai, zoo los zoo siab! 9 Ua ciav Yexus txawm ntsib nkawd thiab hais tias, “Neb nyob li cas?” Nkawd thiaj los txhos caug ntua ntawm Yexus thiab tuav nkaus nws ko taw hawm nws. 10 Yexus hais rau nkawd tias, “Txhob ntshai! Cia li mus qhia tej no rau kuv cov kwv tij paub, kom lawv mus rau pem Kalilais ces lawv yuav ntsib kuv ped.”

11 Thaum nkawd mus lawd, cov uas zov ntxa ib txhia txawm mus rau hauv nroog mus qhia txhua yam uas lawv pom rau cov pov thawj hlob. 12 Tom qab ntawd, cov pov thawj hlob thiaj mus nrog cov txwj laus sab laj. Thaum lawv hais haum, lawv thiaj muab nyiaj xiab cov tub rog 13 hais tias, “Hais li no, ‘Thaum ib tag hmo peb tsaug zog tas, nws cov thwj tim tuaj nyiag nws lub cev mus lawm.’ 14 Nej tsis tas txhawj. Yog tus tswv xeev hnov txog tej no ces peb mam li nrog nws hais.” 15 Cov tub rog thiaj txais tej nyiaj ntawd thiab ua raws li lawv hais. Zaj no txawm nrov ncha mus rau cov neeg Yudais los txog niaj hnub nim no.

16 Ces 11 tug thwj tim txawm mus pem Kalilais mus ntsib Yexus saum lub roob uas nws tau teem tseg lawd. 17 Thaum lawv pom dheev Yexus, lawv txhos caug ntua hawm nws. Tiam sis tej tug tseem ua xyem xyav. 18 Yexus thiaj hais rau lawv tias, “Vajtswv twb pub hwj chim rau kuv saib xyuas ib puas tsav yam saum ntuj thiab hauv ntiaj teb no lawm. 19 Yog li ntawd, cia li mus coj txhua haiv neeg los ua kuv cov thwj tim. Muab cov uas txais yuav* Leej Txiv, Leej Tub, thiab lub hwj huam dawb huv ua kev cai raus dej. 20 Qhia kom lawv coj raws li tej uas kuv twb sam hwm rau nej lawd. Nco ntsoov, kuv yuav nrog nraim nej mus txog thaum lub sim ceeb* no kawg.”