Orhegere Akamaro k’Obubatizo

1. Bichi biyerekene okw’enyigirizo z’obubatizo zili nyigirizo z’omusinji ze Bibliya?

RHUNAGWARHA busime bunene amango abantu bamabatizwa! Abakristu barhanzi b’okuli baligwerhe obusime buli nk’obola amango babonaga bantu banene babatizwa oku Pentekoste y’omu mwaka gwa 33 N.K.Y. Mw’agola mango, entumwa Petro aligezeze ejambo ly’alifasiriye oku bili by’akamaro bwenene oku batizwa. (Mdo. 2:38, 40, 41) Enyuma waho, entumwa Paulo aliyandikire okw’enyigirizo ‘z’omusinji oku bilolere Kristu’ ziheberwe mu ‘n’enyigirizo oku bilolere obubatizo.’ (Ebr. 6:1, 2) Bobola, obubatizo zili nyigirizo z’omusinji rhunayiga, binarhuhemere okuziyunva bwinja. Bulagurhe?

2. Bulagurhe bili by’akamaro okuyunva bwinja-bwinja enyigirizo ze Bibliya oku bilolere obubatizo?

² Akaba omuntu alonzeze kugwarha enju ekomere, akwanene kuyi yumbakira oku musinji gukomere. Intyo nkon’okola, nk’omuntu alonzeze kugwarha obwemere bukomere, akwanene kuchizera okw’ayunvirhe obukweri bwe Bibliya obwemere bwage buyumangireko. Ebyola bihebere m’okuyunva obukweri oku bilolere obubatizo. Che chirhumire, obe wamamala myaka minene obatizwe changwa obe orhaza kubatizwa, kuli kw’akamaro okumenya bulagurhe obubatizo buli bw’akamaro bwenene. Che chirhumire mu gunola mwazi, rhwashubiza ku binola bibazo: Okubatizwa k’okuderha gurhe? Obubatizo bw’Echikristu buheberwe mu bichi na bichi? Na bulagurhe rhunabatiza omu zino lya Darha, ely’Omugala n’ely’eroho lichesibwa?

EBY’OBUBATIZO BWAWE BUYEREKENE

3. Bichi okubatizwa kuyerekene?

³ Okubatizwa embere z’abantu banene kuyerekene oku wayemerere obukweri boshi wayigire oku bilolere Yehova Mungu na Yesu Kristu; oku wahugamire ebyaha byawe n’oku wahindamwire akalamo kawe yokolera Yehova; oku wayemerere oku Yesu y’enjira Yehova akoleseze y’okukuyokola n’oku wa bwirire Mungu omu sala oku bilolere enyorha yawe y’okukola obulonza bwage omu buguma haguma n’olubaga lwage. Amango wamahana echola chilagane changwa amango wamachihana n’okubatizwa, wanaba eyi wamarhondera olugezi luyerekeze oku kalamo k’esiku n’amango.

4. Bichi okukuyubiza weshi-weshi omu menji kuyerekene? (Olole n’efoto.)

⁴ Amango bamakubatiza, banakuyubiza weshi-weshi omu menji, n’okushuba kukuyubulusa,a anaba nka bali bakuhambire bamashuba kukufula. (Huzanya na Wakolosai 2:12.) Okubatizwa kuhuzenywe n’ebintu bisomeze wahidamwire omu kalamo kawe. Nka gurhe? Amango bamakuyubiza omu menji, wanaba eyi wamayerekana oku walekene n’akalamo kawe ka mira. Amango bamakuyubulusa omu menji, wanahwanza kulama akalamo kahyahya k’okuchiseza kujira obulonza bwa Mungu.

5. Gurhe akasi oli wajira y’ochirheganya kubatizwa, kahuzenywe n’akasi Nowa ajiraga y’ayumbaka e safina? (1 Petro 3:18-21)

⁵ Osome 1 Petro 3:18-21. Mu njira nguma, rhwakahuzanya akasi wajirire y’ohikira kubatizwa n’akasi Nowa ajiraga y’ayumbaka e safina. Akaba yi wanaja wahwanza kuyiga kumenya Yehova, akasi kali kakulindira kakashusha nkakakomere bwenene. Nkabaga chiro kakaba kasi kanene bwenene kulusha oku yumbaka e safina ya Nowa. Aliko si, okenere kukola akola kasi koshi? Intyo ku byaliri omu hali ya Nowa. Mungu yenyine yi wapangaga gurhe esafina ya yumbakwa na Nowa akulikira obola bwerekezi bwinja-bwinja omukulanga akalamo k’abantu amango m’echihozi. Kugerera obwemere n’oburhabale bwa Mungu, Nowa akenga n’okuyumbaka esafina. Kuguma na Nowa, wakagala kujira ‘byoshi Mungu akuhemere.’​—Mwa. 6:22.

6. Bichi Petro alonzaga kuderha amango aderha ok’obubatizo ‘bwarhuyokala’?

⁶ Omu mustari gwa 21, entuma Petro aliyandikire ok’obubatizo ‘bwabayokola.’ Aliko, arhali k’okuderha ok’okubatizwa ch’echitu chonyi okwanene kujira y’ebyaha byawe bibabalirwa. Enterekero ya Yesu yonyine yeyakarhuma byahashikana kubabalirwa ebyaha byawe. (1 Yo. 1:7) Aliko, kuli kw’akamaro bwenene okubatizwa bulala Yehova arhuhemere rhujire ntyo. N’amango rhwamajira ntyo ‘rhunahema Mungu arhuhe ezamiri echere.’ Yehova agwarha obusime b’okubabalira ebyaha byawe kugerera enterekero ya Yesu Kristu. Bulala Yehova anajira ntyo obubatizo ‘bunarhuyokola,’ k’okuderha k’okubatizwa kwakarhuma byahashikana rhulame esiku n’amango.

EBINAJIRWA AMANGO M’OBUBATIZO

7. Gurhe obubatizo bukwanene kujirwa?

⁷ E Bibliya erhubwirire okw’eyibabatiza omuntu anayubizwa yeshi-yeshi omu menji, aliko erhaderhere bindi bintu binene oku bilolere obubatizo. Chiro akaba ntyo, amandiko marhurhabere kumenya bichi bikwanene ku jirwa amango m’obubatizo. Omufano, amakanuni me Bibliya manarhabala ababatizwa bamenye gurhe bakwanene kuyambala, n’okurhabala balala baba bali oku bubatizo bamenye gurhe bachigendesa. (1 Ko. 14:40; 1 Ti. 2:9) Ahanene, omushamuka w’echibaga yenabatiza. Rhurha mubona nk’amava aba w’akamaro bwenene. (1 Ko. 1:14, 15) Kandi, arhali abantu kuba banene changwa bageke oku bubatizo k’okwakamaro.​—Mdo. 8:36.

8. Bibazo bihe banabaza ababatizwa na bulagurhe? (Matendo 2:38-42) (Olole n’efoto.)

⁸ E Bibliya eyerekene oku rhukwanene ‘kujira etangazo embere z’abantu banene yi rhuyokolwa,’ k’okuderha okuyerekana obwemere bwerhu. (Ro. 10:9, 10.) Rhunajira elyola tangazo lyakarhuma rhwayokolwa embere z’abantu banene arhali amango rhuli rhwahubiri abandi konyine, s’ahanene olusiku l’obubatizo bwerhu! Eju y’eyola mpanvu banabaza ababatizwa bibazo bibiri. Ech’oburhanzi: “Wahungamire ebyaha byawe n’okuchihana emwa Yehova, onayemerere obuchunguke Yehova anahaana kugerera Yesu Kristu si?” Echola chibazo chinachiseza oku kuntu omuntu achirheganyize y’abatizwa. Petro aliderhere echintu chili nk’echola oku Pentekoste amango abwira abantu oku bahugame n’okubatizwa. Echa kabiri: “Oyemerere k’omu kubatizwa kwawe, oyerekene oku wamaba Muhamirizi wa Yehova n’ok’okala oli muguma w’omu lubaga lwage si?” Echola chibazo chinachiseza oku by’omuntu ajira, k’okuderha, anaba ey’amalaganya kukulikira obwerekezi b’olubaga lwa Yehova n’okukolera Yehova haguma na bene-babo na bali-babo. Ebyola bili kuguma n’eby’abantu babatizwaga oku Pentekoste bajiraga enyuma y’okubatizwa. (Osome Matendo 2:38-42.) Abanashubiza nechi kw’ebyola bibazo banabatizwa.

9. Ntambu zihe buli muntu akwanene kurhola y’ayemerwa na Mungu?

⁹ Chiro n’embere ohwanze kuyiga e Bibliya, byakahashikana obe eyi walilamire akalamo karhavire kabiha, na nkabaga orhachigeraga wakola echaha chikomere. Changwa nkabaga wakaba eyi walilemberwe n’abazere b’Abakristu balikurhabere kuzigira Yehova. Wakachiba ey’okenere kuhungama n’okubatizwa y’oyemerwa na Mungu si? Nechi. Rhweshi rhwaburhirwe omu chaha, n’echola chinarhuma rhurhaba bera ba Mungu. (Zb. 51:5) Aliko amango rhwamayiga binene oku bilolere Yehova, rhunachishoga kulama okuntu yewe alonzeze s’arhachili okuntu rhwewe rhulonzeze. Rhunachiyunva kubi bwenene eju y’ebyaha byoshi rhwachigerere kukola n’okuleka kujira ebintu birhasimisa Mungu, rhwanahwanza kulama akalamo kerhu omu kuntu kusimisize Darha w’omu mbingu. Na ntyo, rhwanaja rhwabatizwa.​—Mdo. 3:19.

10. Bichi okwanene kujira akaba wali wabatizwe omu lindi dini?

¹⁰ Akaba wali wabatizwe omu lindi dini, ochikenere kubatizwa nka Muhamirizi wa Yehova. Bulagurhe? Bulala orhayunvaga bwinja-bwinja obukweri oku bilolere Yehova Mungu na Yesu. Na chiro wakaba walichihanire omu sala wenyine emwa Mungu, wahanaga echilagane chawe ey’orhaza kuyunva bwinja obulonza bwage. Amango entumwa Paulo abugananaga n’abalume bali babatizwe omu Efeso, aliko barhaliza kuyunva obukweri oku bilolere Yesu, barhegera oku bibahemere bashube babatizwe.b (Mdo. 19:1-5) Zene naho, Yehova yenyine yena yemera obubatizo b’omuntu amango oyola muntu ayunvirhe bwinja-bwinja enyigirizo za Yehova n’obulonza bwage.

‘OMU ZINO LYA DARHA, ELY’OMUGALA N’ELY’EROHO LICHESIBWA’

11. Okubatizwa ‘omu zino lya Darha, ely’Omugala n’ely’eroho lichesibwa’ k’okuderha gurhe? (Matayo 28:18-20)

¹¹ Yesu alihere abanafunzi bage bahyahya erhegeko ly’okubatizwa ‘omu zino lya Darha, ely’Omugala n’ely’eroho lichesibwa.’ (Osome Matayo 28:18-20.) K’okuderha gurhe? Omu Bibliya, echinwa ‘omu zino’ ahanene chinaderhera erenge lya muntu mulebe. Kandi lyakaderhera engabane n’obuhashe b’oyola muntu. Che chirhumire amango rhwamajira chintu chilebe ‘omu zino lya muntu mulebe,’ changwa lya chintu chilebe, rhwanaba eyi rhurhegerere oburhwali buli enyuma w’elyola zino. (Huzanya na Matayo 10:41) Waza okuntu wakarhegera engabane n’oburhwali bwa Darha n’ob’Omugala n’akasi k’eroho lichesibwa lya Mungu.

12. Okubatizwa omu zino lya Darha k’okuderha gurhe? (Ufunuo 4:11) (Olole n’amafoto.)

¹² Okubatizwa omu zino lya Darha. K’okuderha oku rhuli sire oku Yehova ye Darha oli omu mbingu wanarhuhaga akalamo. Ali Mungu ogala byoshi na Mulemi w’ebintu byoshi. (Osome Ufunuo 4:11.) Rhuba rhumenyere oku ye Munviriza w’esala, rhunakolesa ezino lyage n’obukenge n’okuchiyunva rhuli huru amango rhuli rhwamusalira n’okubwira abandi oku bimulolere. (Zb. 65:2) Aliko, hali echindi chintu birhuhemere okuchizera. Oku Pentekoste, abaliri bayunviriza Petro bali bamenyenyere Yehova; aliko balikenere kumenya oku Yehova anahana akalamo k’esiku n’amango kugerera Yesu Kristu.​—Ro. 5:8.

13. Okubatizwa omu zino ly’Omugala k’okuderha gurhe? (Olole n’amafoto.)

¹³ Okubatizwa omu zino ly’Omugala. K’okuderha oku rhuli sire oku Yesu ye Mugala wa Mungu. Yesu ye ‘njira,’ kugerera yewe yenyine yi rhwakagwarha obwira bukwirire haguma na Yehova. (Yoh. 14:6) Rhuchizerere kandi, oku Yesu yi warhufiraga yi rhushuba kugwarha akalamo. Okumenya ntyo kunarhushunika rhukulikire omufano gwage esiku zoshi omu kalamo kerhu, arhali amango m’obubatizo monyine. (1 Yo. 2:6) Che chirhumire rhunahubiri n’obushiru nk’oku Yesu aliri ajira, buzira kuleka chintu choshi-choshi charhuvuna omurhima. (Lu. 4:43) Na chiro rhuli tayari kulembera amalibuko yi rhukolera Mungu oku bwimana. (2 Ti. 3:12) Rhunakenga Yesu nka ‘rhwe ly’echibaga,’ che chirhumire rhunakenga oku bulonza balala ahere engabane y’okuyerekeza n’okushishikala abanafunzi bage.​—Efe. 4:8, 11, 12; 5:23.

14. a) Okubatizwa kugerera eroho lichesibwa k’okuderha gurhe? (Olole n’amafoto.) b) Bwindi bubatizo buhe abashigwa banapata? (Olole echisanduku “Obubatizo Abashigwa Banapata.”)

¹⁴ Okubatizwa kugerera eroho lichesibwa. Rhuna yemera obukweri oku bilolere eroho lichesibwa. Eroho lichesibwa arhali muntu changwa chigabi chaba mungu basharhu, s’aliko eli misi Mungu anakolesa. Rhumenyere okw’eroho lichesibwa lyaliyerekeze abalebi kuyandika e Bibliya, che chirhumire rhunasoma e Bibliya oku kahunda n’okukulikira enyigirizo zilimo. (2 Pe. 1:20, 21) Rhunayaka okukola ebyaha bikomere, bulala okujira ntyo kwakarhuma rhwewe n’echibaga rhurhapata eroho lichesibwa lya Mungu.​—Efe. 4:30.

15. Bichi rhukwanene kuhigirira kujira?

¹⁵ Akaba wabatizwe,c oyibuke bulagurhe obubatizo buli bw’akamaro bwenene ona genderere kulanga echilagane chawe wahaga Yehova kugerera obubatizo bwawe. Aliko si, gurhe akaba orhasaga kubatizwa? Hali chintu chilebe chikufarhire? Omwazi gwakulikiraho gwafasiriya gurhe wakarhola omuhigo g’okubatizwa.