SASHE NA 2

Mene ne Cikakken Imani?

Wani mutum ya rike kudi yana kallo — Kamar kuɗi, ya kamata imani ya zama na ainihi idan ana so ya kasance da tamani

KASANCEWA da cikakken imani ya wuce gaskata cewa akwai Allah kawai. Akwai miliyoyin mutane da suka yarda cewa akwai Allah amma duk da haka suna yin miyagun ayyuka da gangan. Irin wannan “imanin” yana kama ne da jabun kuɗi. Ya yi kama da na gaske amma na banza ne. Amma, mene ne cikakken imani?

Cikakken imani ya dogara ne ga cikakken sani na Nassosi Masu Tsarki. Waɗannan hurarrun kalaman sun gaya mana gaskiya game da Allah kuma sun taimaka mana mu san shi. Sun bayyana dokokinsa, manufofinsa, da koyarwarsa. Waɗannan koyarwar sun haɗa da:

Allah ɗaya ne. Ba shi da na biyu.
Yesu (Isah) ba Allah Maɗaukaki ba ne. Shi annabin Allah ne.
Allah ya haramta kowanne irin bautar gumaka.
Ranar da za a hukunta ’yan Adam tana tafe.
Matattu masu ɗimbin yawa za su tashi daga matattu su shiga Aljanna.

Cikakken imani yana motsa mu mu yi ayyuka masu kyau. Irin waɗannan ayyukan suna daraja Allah kuma suna sa mu da wasu mu amfana. Waɗannan ayyuka masu kyau sun ƙunshi abubuwan nan kamar

bauta wa Allah.
kasancewa da halayen da Allah yake so, musamman ƙauna.
yin watsi da tunani da kuma muradi marar kyau.
kasancewa da imani ga Allah duk da matsaloli.
koya wa wasu game da Allah.

Wata iyali ta kawo ma wata tsohuwa abinci — Cikakken imani yana haifar da ayyuka masu kyau

Ta Yaya Za Ka Iya Samun Cikakken Imani?

Wani mutum yana watsa jiki don ya karfafa jijiyoyin jikinsa — Imani, kamar jijiyar ƙarfi yake, yana ƙara girma idan ana amfani da shi

Ka roƙi Allah ya taimaka maka. Annabi Musa ya yi addu’a ga Allah: “Ka koya mani tafarkunka, don in san ka, domin in sami tagomashi a gare ka.”a Allah ya ji addu’arsa kuma ya amsa ta. Musa ya zama fitaccen misali na mutum mai imani. Allah zai kuma taimaka maka ka samu cikakken imani.

Ka keɓe lokaci don yin nazarin Nassosi Masu Tsarki. Za a iya samun hurarrun Nassosi, har da Attaura, Zabura, da Linjila, a cikin Littafi Mai Tsarki, littafin da aka fi fassarawa da kuma rarrabawa a duniya. Shin kana da waɗannan hurarrun rubutun kuwa?

Ka yi amfani da shawarar da ke cikin Rubutu Masu Tsarki a rayuwarka ta yau da kullum. Imani, kamar tsoka yake, yana ƙara girma idan ana amfani da shi. Yayin da kake amfani da imaninka, shi ma zai yi girma. Za ka ga cewa shawarar Allah tana da amfani. Hakika, shawara mai amfani da ke cikin Nassosi Masu Tsarki ta kyautata rayukan mutane da yawa. Ka ci gaba da wannan karatun don ka ga wasu misalai.

a Attaura, Fitowa 33:13.