EGESIERI GIA KABERE
Ebibilia—Egetabu Korwa Ase Nyasae
1, 2. Nase ki Ebibilia ere ekeegwa gekogokia korwa ase Nyasae?
INEE, inaki aye okoigwa ekero omosani agokoretera ekeegwa mobosokano? Nigo okogoka ng’a omosani oo nakoinyorete, na kogesansora bwango. Na komoakera mbuya mono ase ekeegwa ekio.
2 Ebibilia n’ekeegwa korwa ase Nyasae. Nigo egototebia amang’ana totanyore ande onsi. Ase omobwekano, nigo egototebia buna Nyasae ayetongete igoro, ense, amo nomosacha n’omokungu omotang’ani. Nigo egotoa ebirengo biratokoonye ekero tobwate emechando. Ase Ebibilia, nigo tokwegera buna Nyasae araikeranie ogwancha kwaye ase okoyekora ense koba engiya mono. Ebibilia n’ekeegwa gekogokia!
3. Ninki aye oramanye ekero okweorokereria Ebibilia?
3 Buna aye orabe gokwegera Ebibilia, nonyore ng’a, Nyasae natagete obe omosani oye. Buna okwegera amange igoro ya Nyasae, buna obosani bwao nere bokoba obwa ang’e.
4.. Ninki kegokogokia igoro y’Ebibilia?
4 Ebibilia yabasirigwe ase emenwa ang’e 2,600, na chibilioni chi’Ebibilia chiarosigwe. Abanto goetania 90 ase 100 ense engima nabo bagosoma Ebibilia ase omonwa obo abanyene. Na kera egwiki, abanto goetania emilioni eyemo nkonyora bare Ebibilia! Getabu tikeiyo kenga Ebibilia.
5. Nase ki totebe ng’a Ebibilia nigo ‘eutire nomoika o Nyasae’?
5 Ebibilia nigo ‘eutire nomoika o Nyasae.’ (Soma 2 Timotheo 3:16.) Korende abanto bande nabo bararengererie ng’a, ‘Ebibilia nigo yarigetwe na mwanyabanto, inaki erarwe ase Nyasae?’ Ebibilia nigo ekoiraneria iga: “Abanto abachenu ba Nyasae nigo baare gokwana batang’anire n’omoika omochenu.” (2 Petero 1:21) Nigo enga buna ekero omogaaka ogotebia omochokoro oye amokoonye korika rirube. Inee, ning’o omoriki-omonyene rirube? N’omogaaka, tari omochokoro. Ase enchera buna eyio, Omoriki-omonyene Ebibilia, Nyasae, na tari abanto baria atumiete koyerika. Nyasae nigo abaraete barike ebirengererio biaye. Ase igo Ebibilia ne “ring’ana ria Nyasae.”—1 Abatesaloniki 2:13; rora Amaereso y’omoerio 2..
Biblia
EBIBILIA NENG’IKERANU
6, 7. Nase ki totebe ng’a Ebibilia nigo egosoanana?
6 Nigo yairete emiaka goetania 1,600 korika Ebibilia. Abariki baye nigo bamenyete chingaki ao ao. Abande babo nigo basomete buya na bande tibasomete. Ase omobwekano, oyomo obo nigo arenge omonyagitari. Abande nigo barenge abaremi, abarubi be chinswe, abarisia be ching’ondi, ababani, abagambi, na abaruoti. Nonya abariki barenge ao ao, chinsemo chionsi chi’Ebibilia nigo chikobwatana. Teri gokwana egento ekemo ase egesieri ekemo nase egesieri kende yakwana manincha.a
7 Ebisieri ebitang’ani bi’Ebibilia nigo bigokwanera buna emechando yense yachagete, n’ebisieri bi’omoeri bi’Ebibilia nigo bigototebia buna Nyasae arakoore emechando eyio, ase ogokora ense koba eparadiso. Ebibilia nigo egokwanera histori ya mwanyabanto ase chilifu chi’emiaka na koorokia ng’a ogwancha kwa Nyasae botambe nigo kogoikeranigwa.
8. Karue emebwekano ekoorokia oboikeranu bw’Ebibilia egesayansi.
8 Ebibilia tiyarigetwe korokereria sayansi gose koba egetabu gi’esukuru, korende ayegokwana igoro ya sayansi botambe nigo are y’oboikeranu. Egetabu gekorwa ase Nyasae nabo gesemeirie koba igo. Ase omobwekano, egetabu ki’Abalawi nigo kere n’ogochika kwa Nyasae igoro ye chinchera Abaisraeli baagwenerete gotanga amarwaire tambokera. Nigo kiarigetwe kare mono konyora abanto bataramanya buna ebinyinyi bikoreta amarwaire. Naende Ebibilia nkorokereria ere buya ng’a ense nigo esungire etabwaterereti kende. (Ayubu 26:7) Naende ekero abanto abange beegenete ng’a ense nigo yarenge risabebe, Ebibilia nigo yatebete ng’a nigo ere orosinga gose, raondi buna omobira.—Isaya 40:22.
9. Ninki obonyakeene bw’abariki b’Ebibilia bogotokoonya komanya?
9 Ekero Ebibilia egokwana igoro ya histori, botambe nigo ere eng’ikeranu. Korende ebitabu ebinge bia histori tibiri ebikeranu ase engencho baria babirigete tibarenge abanyakeene. Ase omobwekano, chingaki chinyinge tibarenge korika ekero ebisaku biabo biarenge kobugwa esegi. Ribaga erio, abariki b’Ebibilia nigo barenge abanyakeene nonya ekero Israeli yabuetwe. Naende nigo barigete igoro ya amamocho abo abanyene. Ase omobwekano, ase egetabu kia Omobaro, Musa nigo agototebia ng’a nakorete amamocho amabe mono ekagera Nyasae akamorongeyia. (Omobaro 20:2-12) Obonyakeene bw’abariki b’Ebibilia nigo bokoorokia ng’a Ebibilia nigo ekorwa ase Nyasae. Aya nigo aminetie ng’a nabo tokwegena Ebibilia.
EGETABU GEICHIRE OBOSEMIA OBUYA
10. Nase ki obosemi bw’Ebibilia bore ogokoonya asetore rero?
10 Ebibilia nigo ‘eutire nomoika o Nyasae, nero eranyare gotworokereria, na gotokurera, na gotorongeyia, na gototang’ana ase oboronge.’ (2 Timotheo 3:16) Obosemia bw’Ebibilia nigo bogotokoonya mono rero. Yehova nigo amanyete buna totongire, ase igo namanyete buna tokorengereria na koigwa. Nigo atomanyete buya mono kobua buna twemanyete intwe abanyene, na nigo atagete tobe nomogoko. Namanyete ekere ekiya asetore nekere ekebe asetore.
11, 12. (a) Mbosemi ki obuya Yeso aruete ase Matayo ebisieri bia 5 goika 7? (b) Ninki naende toregere korwa ase Ebibilia?
11 Ase Matayo ebisieri bia 5 goika 7, nigo togosoma obosemia obuya mono Yeso aruete igoro yokoba nomogoko, buna togwenerete komenya nabanto bande, buna togwenerete gosaba, na buna togwenerete korora chibesa. Nonya oruete obosemia obwo emiaka 2,000 yaetire, nigo bore ne ching’uru amo n’ogokoonya mono rero.
12 Ase Ebibilia, Yehova naende ngotorokereria are ebirengo bigotokoonya koba n’obogima obuya bw’enka, koba abakori emeremo abaya, na komenya ase omorembe n’abanto bande. Ebirengo bi’Ebibilia nigo biratokoonye botambe, neba mbanto ki tore, ng’ai tomenyete, gose mechando ki tobwate.—Soma Isaya 48:17; rora Amaereso y’omoerio 3.
NABO OKWEGENA OBOBANI BW’EBIBILIA
Omoriki bw’Ebibilia Isaya nigo abanete ng’a Babeli nebugwe
13. Ninki Isaya atebete kiare gocha gokorekanera omochie o Babeli?
13 Obobani obonge bw’Ebibilia bwaikeranire. Ase omobwekano, Isaya nabanete ng’a Babeli nesarigwe. (Isaya 13:19) Akaeresa ase oboikeranu kegima, buna omochie oyio orenge gocha kobugwa. Omochie oyio nigo orendire n’ebiita ebinene amo n’orooche. Korende Isaya akabana ng’a orooche ndokamoke n’ebiita gotigwa gwasi. Abarwani mbayoire omochie batarwaneti. Isaya nigo atebete ng’a omonto okorokwa Koresi nabue Babeli.—Soma Isaya 44:27–45:2; rora Amaereso y’omoerio 4.
14, 15. Inaki obobani bwa Isaya bwaikeranete?
14 Emiaka amagana abere nyuma y’obobani obwo korikwa, abarwani bagaika bare ang’e gosagana Babeli. Ning’o orenge koraa abarwani abwo? Buna obobani bwatebete, Koresi, omoruoti bwa Abaayemi. Inee, abarwani ba Koresi mbayoire omochie o Babeli buna yabanetwe na Isaya?
15 Ase obotuko boria bw’ogosagana, Abababeli nigo barenge n’omoyega. Tibaigwete bare na bwoba ase engencho omochie orendire ne chinyasi chinene amo n’orooche. Isiko y’omochie, Koresi amo na abarwani baye bakarema omotaro gokeyia amache y’orooche. Amache agakea buya abarwani b’Abaayemi bakaamboka. Korende, inaki abarwani barasoe Babeli ere ne chinyasi chinkong’u? Buna obobani bwatebete, ebiita bi’omochie nigo biatigetwe gwasi, ase igo abarwani bakabua omochie oria batarwaneti.
16. (a) Ninki Isaya abanete igoro y’engaki ere bosio ya Babeli? (b) Inaki tomanyete ng’a obobani bwa Isaya mbwaikeranete?
16 Isaya nigo abanete ng’a omoerio monto taiyo oramenye ime ya Babeli naende. Akarika iga: “Babeli tokomenywa nonya ng’ake nebiaare binde bionsi.” (Isaya 13:20) Inee, ayio naikeranete? Ase Babeli yarenge, ang’e chikiromita 80 irianyi ya Baghdad, ime yense ya Iraki, rero neritombe. Nonya ndero, monto tamenyeti aroro. Yehova nigo ayiabusete Babeli ne “ekiabuso ki’ogosiria [gose, ogosaria].”—Isaya 14:22, 23.b
Ritombe ria Babeli
17. Nase ki tosemerie chiira chionsi chia Nyasae?
17 Nabo tokwegena Ebibilia ekero egokwanera engaki ere bosio, egekogera obobani bwaye obonge bwaikeranire. Nabo tokorema ng’a Yehova goika aikeranie eira yaye yokoyekora ense koba eparadiso. (Soma Omobaro 23:19.) Ee, nigo tobwate ogosemeria “kw’obogima bwa kare na kare. Obogima obwo Nyasae ariete eira korwa karee na kare; ere tagokwana oborimo.”—Tito 1:2.c
EBIBILIA NABO EGOCHENCHIA OBOGIMA BWAO
18. Inaki Paulo agokwana igoro ye “ring’ana ria Nyasae”?
18 Tweegeire ng’a getabu kende tikeiyo kenga buna Ebibilia. Nigo egosoanana, na ekero egokwana igoro ya amang’ana y’obosayansi gose histori, botambe nigo ere eng’ikeranu. Naende nigo egotoa obosemi obuya na nigo ere n’obobani obonge bwaikeranire. Korende Ebibilia nigo ebwate amange goetania ayio. Omotomwa Paulo nigo arigete iga: “Ring’ana ria Nyasae nigo rire moyo, naende ndire ne chinguru.” Ninki amang’ana aya aminetie?—Soma Abaibirania 4:12.
19, 20. (a) Inaki Ebibilia eragokoonye bwemanye eki ore? (b) Inaki ororokie ng’a goakire mbuya mono ase ekeegwa ki’Ebibilia?
19 Ebibilia nabo egochenchia obogima bwao. Nabo ekogokoonya bwemanye bori eki ore. Nabo ekogokoonya omanye ebirengererio biao n’okoigwa kwao kwa ime mono. Ase omobwekano, nabo torakage ng’a nigo tomwanchete Nyasae. Korende koenekia ng’a ntomwanchete, goika tokore ay’Ebibilia egoteba.
20 Amaene Ebibilia negetabu korwa ase Nyasae. Nigo atagete oyesome, oyeegere, na koyiancha. Aka mbuya mono ase ekeegwa eke, na genderera koyeegera. Erio nario oramanye okogania kwa Nyasae ase mwanyabanto. Ase egesieri gekobwatia ntoegere amange igoro y’okogania kwa Nyasae.
a Abanto bande nigo bagoteba ng’a Ebibilia teri gosoanana, korende obwo n’oborimo. Rora egesieri gia 7 ki’egetabu Biblia—Neno la Mungu au la Binadamu? kerosirie na Birori ba Yehova.
b Onye gotagete kwegera amange igoro y’obobani bw’Ebibilia, nabo ogosoma chikaratasi 27-29 chi’eburoshua Kitabu kwa Ajili ya Watu Wote, erosirie na Birori ba Yehova.
c Ogosarigwa gwa Babeli n’obobani obomo bw’Ebibilia bwaikeranete. Nabo okonyora amange igoro y’obobani bwa Yeso Kristo ase chikaratasi ase Amaereso y’omoerio 5.