Amaereso Y’omoerio
1 YEHOVA
Nyasae nigo akorokwa Yehova na engencho yaye “Ere Okogera Biaba.” Yehova nere Nyasae omobui-bionsi, nere otongete kera egento. Nigo are n’okobua gokora kende gionsi agotaka gokora.
Ase Ekeibirania, erieta ria Nyasae nigo riare korikwa ase chinuguta inye. Ase Ekegusii chinuguta echio, YHWH gose YHVH. Erieta ria Nyasae, nigo rire ase amariko amatang’ani y’Ebibilia ase Ekeibirania ang’e mara 7,000. Abanto ense engima, nigo bare ne chinchera ao ao chi’ogwatora erieta Yehova buna banarete koriatora ase omonwa obo.
2 EBIBILIA NIGO ‘EUTIRE NOMOIKA O NYASAE’
Nyasae nere Omoriki-Omonyene Ebibilia, korende agatumia abanto koyerika. Nigo enga buna omogaka aratebie omochokoro oye amorikere rirube rire n’ebirengererio biaye. Nyasae nigo atumiete omoika oye omochenu koraa abariki b’Ebibilia korika ebirengererio biaye. Omoika o Nyasae nigo obaraete ase chinchera ao ao, chingaki chinde kobaa amaroro gose kobaa chindoto echio barigete inse naende.
3 EBIRENGO
Aya namorokererio ase Ebibilia agokwanera omosingi bw’ekeene. Ase omobwekano, “omonto ogotaara nabanto abang’aini nigo arabe omong’aini,” ekerengo ekio nigo kogotorokereria ng’a nabo omonto araonchorwe ase obuya gose ase obobe n’abasani baye. (Emereng’anio 13:20) Naende, “kende gionsi omonto agosimeka, nakio arache kogesa” ekerengo eke nigo kegotorokereria ng’a titogotama korwa ase eng’eria ekoretwa nebikora biaito.—Abagalatia 6:7.
4 OBOBANI
Aya n’amang’ana korwa ase Nyasae. Nabo arabe igoro y’ogwancha kwa Nyasae, amorokererio igoro y’amaya na amabe, ogochika, gose okonacha ekina. Gose nabo erabe igoro y’egento kerache gokorekana ase engaki ere bosio. Obobani nobonge ase Ebibilia bwaikeranire.
5 OBOBANI IGORO YA MASIHI
Obobani obonge ase Ebibilia igoro ya Masihi nigo bwaikeranete ase Yeso. Rora ase esanduki “Obobani igoro ya Masihi..”
▸ Eges. 2, ekeb. 17, amaereso ainse.
6 EKIAGERETE YEHOVA AKAYETONGA ENSE
Yehova nigo ayetongete ense ebe obomenyo bw’eparadiso ase mwanyabanto bamwanchete. Okogania kwaye tikorachenchia. Bwango iga Nyasae nakoore obobe bwensi na kobaa mwanyabanto obogima bwa kare na kare.
7 SAITANI NYACHIENI
Saitani nere omomalaika ochagete oboenenu gochia ase Nyasae. Nigo akorokwa Saitani, engencho yaye “Omoengereria,” ase engencho akomorwania Yehova. Naende nigo akorokwa Nyachieni, engencho yaye “Omogenki.” Nigo aetwe erieta erio ase engencho agokwana oborimo igoro ya Nyasae na kobang’aina abanto.
8 ABAMALAIKA
Yehova nigo abatongete abamalaika kare mono ataratonga ense. Nigo batongetwe bamenye igoro. Mbareo abamalaika goetania chimilioni rigana erimo. (Danieli 7:10) Abamalaika abwo nigo bare n’amarieta ne chimbwa ao ao, na abamalaika abegenwa ase ogwekeyia tibatageti gosasimwa na mwanyabanto. Nigo bare n’obonene ao ao na kobagerwa emeremo ao ao. Emeremo ende yabo n’obokoreri bosio bw’ekerogo ki’obonene kia Yehova, gotomwa, kobarenda na kobaraa abasomba baye ase ense, koimokia egetambokero kiaye na gokoonya egasi y’okorandia. (Zaburi 34:7; Okomaanoka 14:6; 22:8, 9) Ase engaki ere bosio, mbarwane bare na Yeso ase esegi ya Arimagedon.—Okomaanoka 16:14, 16; 19:14, 15.
▸ Eges. 3, ekeb. 5; Eges. 10, ekeb. 1
9 EBIBE
Okoigwa konde gwensi gw’enkoro yaito, okorengereria n’ogokora gwaito kore mamincha ya Yehova gose mamincha yogwancha kwaye n’ebibe. Ase engencho ebibe bigosaria obosani bwaito na Nyasae, otoire amachiko amo n’ebirengo bigotokoonya gwetanga korwa ase ebibe bia moeneno. Abwo omochakano, Yehova nigo atongete kera egento egeikeranu, korende ekero Adamu na Hawa bachorete gotamoigwera Yehova, bagakora ebibe na tibagendererete koba abaikeranu. Bakagota na gokwa, na ase engencho twairete omwando bw’ebibe korwa ase Adamu, naintwe nigo tokogota na gokwa.
▸ Eges. 3, ekeb. 7; Eges. 5, ekeb. 3
10 ARIMAGEDON
Eye n’esegi ya Nyasae y’ogosaria ense ya Saitani amo n’obobe bwensi.
▸ Eges. 3, ekeb. 13; Eges. 8, ekeb. 18
11 OBORUOTI BWA NYASAE
Oboruoti bwa Nyasae n’eserekari ya Yehova achagete igoro. Yeso Kristo nere Omoruoti bw’eserekari eyio. Ase engaki ere bosio, Yehova natumie Oboruoti obwo gosiria obobe bwonsi. Oboruoti bwa Nyasae mborae igoro y’ense.
12 YESO KRISTO
Nyasae nigo amotongete Yeso ataratonga kende gionsi. Yehova nigo amotomete Yeso gocha ase ense akwe, ase engencho ya mwanyabanto bonsi. Nyuma y’ogoitwa kwa Yeso, Yehova akamobokia korwa ase abakure. Bono iga Yeso nigo akoraa igoro buna Omoruoti bw’Oboruoti bwa Nyasae.
13 OBOBANI BWE CHIGWIKI 70
Ebibilia ekabana, gose korora engaki ya bosio, ekero Masihi araoroke. Eye nigo erabe ekero ki’omerio bw’engaki ekorokwa chigwiki 69, yachagete ase omwaka 455 Kristo Ataraiborwa na koera ase omwaka 29 Nyuma Kristo Koiborwa.
Inaki tomanyete ng’a nigo yaerete omwaka 29 Nyuma Kristo Koiborwa? Chigwiki echio 69 nigo chiachagete ase omwaka 455 Kristo Ataraiborwa, ekero Nehemiaaigete ime ya Yeresalemu na gochaka koagacha boyia omochie oyio. (Danieli 9:25; Nehemia 2:1, 5-8) Buna ring’ana “edasani” rigotoinyoria omobaro bw’ebinto 12, naboigo ne ring’ana “egwiki” rigotoinyoria omobaro bw’amatuko 7. Chigwiki ase obobani obo, tichiri chigwiki chi’amatuko atano na abere korende nigo chire chigwiki chi’emiaka etano na ebere, koreng’ana ne richiko ri’obobani bwa “omwaka oyomo ase kera rituko.” (Omobaro 14:34; Ezekieli 4:6) Eye nigo eminetie ng’a kera egwiki nigo ere n’obotambe bw’emiaka etano na ebere naende ng’a chigwiki 69 ekero chikomentwa nigo chikoba emiaka 483 yaani (69 x 7). Toise kobara emiaka 483 korwa omwaka 455 Kristo Ataraiborwa nigo togoika ase omwaka 29 Nyuma Kristo Koiborwa. Oyio noro omwaka oria oria Yeso abatisetwe na koba Masihi!—Luka 3:1, 2, 21, 22.
Obobani obwo naende bokarora gochia bosio egwiki ende, eyio ere emiaka etano na ebere. Ekero ki’engaki eyio, ase omwaka 33 Nyuma Kristo Koiborwa, Masihi naitwe akwe, na gochakera omwaka 36 Nyuma Kristo Koiborwa, amang’ana amaya y’Oboruoti bwa Nyasae narandigwe ase ebisaku bionsi, tari ase Abayahudi boka.—Danieli 9:24-27.
14 OKOROKERERIA KW’OBOTATO NOBORIMO
Ebibilia nigo ekorokereria ng’a Yehova Nyasae nere Omotongi naende ng’a nigo amotongete Yeso konyora ataratonga kende gionsi. (Abakolosai 1:15, 16) Yeso tari ere Nyasae Omobui-bionsi. Taatebete nonya ndimo ng’a, mbareng’aine na Nyasae. Agateba iga: “Tata nomonene kombua.” (Yohana 14:28; 1 Abakorinto 15:28) Korende chidini chinde nigo chikorokereria Obotato obwo ng’a, Nyasae nabanto batato ase oyomo: Tata, Omwana, na omoika omochenu. Ring’ana “obotato” ndiri ase Ebibilia. Okorokereria okwo, nokw’oborimo.
Omoika omochenu ne chinguru chia Nyasae chi’ogokora, chinguru chiaye chitari kororekana chigendererete emeremo agotumia gokora ogwancha kwaye. Tichiri omonto. Ase omobwekano, Abakristo be ring’ani “bagaichorwa n’omoika omochenu,” na Yehova agateba iga: “Nimbaiterere abanto bonsi omoika one.”—Ogokora 2:1-4, 17.
▸ Eges. 4, ekeb. 12; Eges. 15, ekeb. 17
15 OMOSARABA
Ekero Abakristo b’ekeene bagosasima Nyasae, tibari gotumia omosaraba. Nase ki?
Omosaraba otumekire ase chidini chi’oborimo ase engaki entambe. Ase engaki ya kare nigo orenge gotumeka ase ogosasima kw’ebitongwa nase chinyangi chi’okoibora chi’abanto batarenge Abakristo. Ekero ki’emiaka emetang’ani 300 nyuma ya Yeso gokwa, omosaraba torenge gotumeka ase ogosasima kw’Abakristo. Nyuma y’engaki gete, Omoruoti bw’Abaroma Konstantino agakora omosaraba koba ekemanyererio ki’Obokristo. Ekemanyererio ekio nigo kiare gotumeka goteema gokora Obokristo bomanyekane mono. Korende omosaraba torenge na ngencho ase Yeso Kristo. Egetabu The New Catholic Encyclopedia nigo gekoeresa iga: “Omosaraba nigo ogotoka ase ebimira bia abanto batarenge Abakristo na baria b’engaki Obokristo botarengeo.”
Yeso takwete ase omosaraba. Amang’ana y’Ekegiriki akobasirigwa “omosaraba” nigo aminetie “egesigisa geteneine,” “ebao,” gose “omote.” Egetabu The Companion Bible nigo gekoeresa iga: “Ing’ana tiriyo ase Ekegiriki kie [Emuma Enyia] nonya nokoorokia ebing’ese bibere bi’ebao.” Yeso nigo akwete ase egesigisa geteneine.
Yehova tatageti totumie emegwekano gose ebimanyererio ase ogosasima gwaito.—Okong’anya 20:4, 5; 1 Abakorinto 10:14.
16 OKOINYORA
Yeso akabachika aborokigwa baye barende Okoinyora kw’ogokwa kwaye. Kera omwaka chitariki 14 Omotienyi o Nisan, chitariki buna chiria Abaisraeli bagokerete Epasaka, nario bakoinyora. Omogati na edivai, nigo bitenenerete omobere na amanyinga a Yeso, nigo bigoetigwa ase kera oyomo ore ase Okoinyora. Baria bararae amo na Yeso igoro nkoria bare omogati na konywa edivai. Baria bare n’ogosemeria gw’okomenya kare na kare ase ense, nigo bagoikerana ase Okoinyora erio koorokia amasikani korende tibari koria omogati na konywa edivai.
17 OMOYO
Ring’ana “omoyo” gose “obomoyo” nigo rigotumeka gokwanera igoro ya (1) omonto, (2) eng’iti, gose (3) obogima bw’omonto gose obw’eng’iti. Eye ekobwatia, n’emebwekano meke:
Omonto. Omochakano 2:7 nigo egototebia ng’a ekero Nyasae amotongete Adamu, omonto oyio akaba “nobomoyo.”
Eng’iti. Koreng’ana n’etoigo eria enene, Ebibilia nigo egototebia ng’a, “na chionsi echiare moyo, chiare gotaara ase ense, chigakwa; chinyoni, ne ching’iti chiatugire, ne ching’iti chi’orosana.”—Omochakano 1:20, 24..
Obogima bw’omonto gose obw’eng’iti. Yehova akamotebia Musa iga: “baria bonsi barigetie kogoita [gose gokorusia obomoyo] bakure.”—Okong’anya 4:19.
Komenta nayio, ekero omonto agokora egento gete “na omoyo,” oye bwonsi nigo eminetie ng’a nigo akogekora ase ogwancha n’okobua kwaye gwonsi.—Matayo 22:37; Okoiranerera 6:5.
▸ Eges. 6, ekeb. 5; Eges. 15, ekeb. 17
18 OMOIKA
Amang’ana y’Ekeibiriania amo naye Ekegiriki abasiririe “omoika” ase Ebibilia y’Ekegusii EBIBILIA ENCHENU nabo akominia ebinto ao ao. Nonya nigo, onsi nigo agokwanera egento getari kororekana ase mwanyabanto, buna embeo ekogusa gose eria mwanyabanto amo neching’iti chikoeyana. Amang’ana aya naende nabo araminie ebitongwa bi’ekemoika, na omoika omochenu, oyio ore chinguru chia Nyasae chi’ogokora. Ebibilia teri korokereria ng’a ensemo y’omonto nkogenderera ere komenya nyuma ekero akure.—Okong’anya 35:21; Zaburi 104:29; Matayo 12:43; Luka 11:13.
▸ Eges. 6, ekeb. 5; Eges. 15, ekeb. 17
19 GEHENA
Gehena nerieta rie rikura ang’e na Yerusalemu ase eubi yarenge gosamberwa na gosarigwa. Borori mboiyo bokorokia ng’a ekero ki’engaki ya Yeso ching’iti gose mwanyabanto ngochandwa barenge gose gosambwa bare moyo ase rikura erio. Ase igo Gehena teminetie aase atari kororekana ase abanto bakure bagochandwa na gosambwa goika kare na kare. Ekero Yeso akwanete igoro ya baria bakorutwa gochia Gehena, nigo arenge gokwanera igoro y’ogosarigwa pi.—Matayo 5:22; 10:28.
20 ESARA Y’OMONENE
Eye n’esara Yeso aruete ekero arenge korokereria aborokigwa baye buna bagwenerete gosaba. Naende nigo ekorokwa esara ya Tata Oito gose esara y’okoorokereria. Ase omobwekano, Yeso nigo atorokereretie gosaba ase enchera eye:
“Erieta riao risikwe”
Nigo togosaba Yehova arichene erieta riaye korwa ase oborimo bwensi. Erio kera oyomo ore igoro na ase ense asike na koiroka erieta ria Nyasae.
“Oboruoti bwao boche”
Nigo togosaba eserekari ya Nyasae esarie ense ya Saitani embe, na koraa igoro y’ense, na koyekora koba eparadiso.
“Ogwancha kwao gokoreke ense”
Nigo togosaba okogania kwa Nyasae ase ense goikerane, erio mwanyabanto abaigweri na abaikeranu bamenye ase Eparadiso goika kare na kare, buna Yehova atagete ekero mwanyabanto batongetwe.
21 EMBOORIA
Yehova nigo aruete embooria kobatooria mwanyabanto korwa ase ebibe na amakweri. Embooria nigo yarenge rigori riaganeirie kogora-naende obogima oboikeranu bwa mwanyabanto boria omonto omotang’ani, Adamu, asiretie na kogorora obosani bwa mwanyabanto na Yehova bwasaregete. Nyasae akamotoma Yeso gocha ase ense erio akwere abanya bibe bonsi. Ase engencho y’amakweri a Yeso, mwanyabanto bonsi mbare ne ribaga komenya kare na kare na koba abaikeranu.
▸ Eges. 8, ekeb. 21; Eges. 9, ekeb. 13
22 NASE KI OMWAKA 1914 ORE BW’ENGENCHO MONO?
Obobani ase Danieli egesieri gia 4 nigo bogotorokereria ng’a Nyasae natenenie Oboruoti bwaye ase omwaka 1914.
Obobani: Yehova akamoa Omoruoti Nebukadinesaro endoto y’obobani igoro y’omote omonene ogechetwe. Ase endoto, omochibi bw’echuma n’etai ogasibwa ase ritina ri’omote oyio, erio koyotanga toseboka ase “ebiro bitano na bibere.” Nyuma yayio, omote oyio noseboke naende.—Danieli 4:1, 10-16.
Eki obobani obwo bominetie asetore: Omote nigo otenenerete oborai bwa Nyasae. Ase emiaka emenge, Yehova natumiete abaruoti ase Yerusalemu koraa egesaku kia Israeli. (1 Amang’ana ’Ebiro 29:23) Korende abaruoti baria bakaba batari n’okwegena, na oborai bwabo bokaera. Yerusalemu egasarigwa ase omwaka 607 Kristo Ataraiborwa. Nario “ebiro bitano na bibere” biachagete (2 Abaruoti 25:1, 8-10; Ezekieli 21:25-27) Yeso nigo arenge gokwanera “ebiro bitano na bibere” ekero atebete ng’a, “Yerusalemu notachwe nabanto b’Ebisaku, goika ebiro biabo biikeranigwe.” (Luka 21:24) Ase igo “ebiro bitano na bibere” tibiaerete ekero Yeso arenge ase ense. Yehova nariete eira kobeka Omoruoti ekero “ebiro bitano na bibere” biaerire. Oborai bw’Omoruoti oyio omoyia, Yeso, mborete ogosesenia okonene ase abanto ba Nyasae ase ense yonsi, goika kare na kare.—Luka 1:30-33.
Obotambe bwe “ebiro bitano na bibere”: “Ebiro bitano na bibere” ebio, nigo biagendererete ase emiaka 2,520. Toise kobara emiaka 2,520 gochakera omwaka 607 Kristo Ataraiborwa, nigo togoika ase omwaka 1914. Erio nario Yehova amokorete Yeso, Masihi, koba Omoruoti bw’Oboruoti bwa Nyasae igoro.
Inee, inaki tokonyora enamba 2,520? Ebibilia nigo egoteba ng’a engaki y’emiaka etato n’ekeng’ese, gose ebiro, nigo bireng’aine na amatuko 1,260. (Okomaanoka 12:6, 14) Ase igo “ebiro bitano na bibere” nara kabere enamba eyio, gose amatuko 2,520. Amatuko 2,520 nigo areng’aine n’emiaka 2,520 ase engencho ye richiko ri’obobani “omwaka oyomo ase kera rituko.”—Omobaro 14:34; Ezekieli 4:6.
23 MIKAELI OMOMALAIKA ORIA OMONENE
Ring’ana “omomalaika omonene” nigo riminetie “omonene bw’abamalaika.” Ebibilia nigo egokwanera omomalaika omonene oyomo, n’erieta riaye Mikaeli.—Danieli 12:1; Yuda 9.
Mikaeli nere Omorai bw’emeganda ya abamalaika ba Nyasae abegenwa. Okomaanoka 12:7 nigo egoteba iga: “Mikaeli na abamalaika baye bakarwania enchoka . . . na abamaraika baye.” Egetabu gi’Okomaanoka nigo kegoteba ng’a Yeso nere Omorai bw’emeganda y’esegi ya Nyasae, ase igo, Mikaeli n’erieta rinde ria Yeso.—Okomaanoka 19:14-16.
24 AMATUKO Y’OMOERIO
Amang’ana aya nigo aminetie engaki ekero ogokorekana okonene korabe ase ense, Oboruoti bwa Nyasae botarasaria ense ya Saitani. Amang’ana ande, buna “omoerio bwe chingaki” na “okobao kw’Omwana o mwanyabanto,” ngotumeka are ase obobani bw’Ebibilia gokwanera igoro y’engaki eyio eyio. (Matayo 24:3, 27, 37) “Amatuko ’omoerio” nigo achagete omwaka 1914 ekero Oboruoti bwa Nyasae bwachagete koraa igoro, na amatuko ayio naere ekero ense ya Saitani erasarigwe ase Arimagedon.—2 Timotheo 3:1; 2 Petero 3:3.
25 OKOBOKIGWA
Ekero Nyasae akomoreta moyo omonto oria okure, nigo ekorokwa okobokigwa. Okobokigwa ara kianda ngwatoire ase Ebibilia. Elija, Elisha, Yeso, Petero, na Paulo bonsi mbabogetie. Ebikone ebi nigo bianyarekanete rioka, ase engencho ye chinguru chia Nyasae. Yehova nigo akoria eira kobokia “abanyene oboronge, na ase a abatari abanyene oboronge” komenya ase ense. (Ogokora 24:15) Naende Ebibilia ngokwanera ere okobokigwa gochia igoro. Nigo kogokorekana ekero abaria bachorire, gose goakwa amaguta, na Nyasae bakobokigwa komenya igoro amo na Yeso.—Yohana 5:28, 29; 11:25; Abafilipi 3:11; Okomaanoka 20:5, 6.
26 OBOSAITANI (OGOKWANA N’EMEIKA)
Obosaitani gose ogokwana n’emeika n’okonara okobe kw’ogotema gokwana n’emeika, neba ng’a, nase enchera y’eyemo ase eyemo gose goetera ase omonto onde, buna omonyamosira, gose omoragori. Abanto banarete gokwana n’emeika nigo bagokora igo ase engencho begenete amorokererio y’oborimo ng’a, emioyo ya abanto teri gokwa ekero ki’amakweri na nigo ekoba emeika ere ne chinguru chinyinge. Ebirecha nigo bigosegeta mwanyabanto tibamoigwera Nyasae. Okorigia komanya ayare bosio ase okoringoria ching’enang’eni, oboragori, oborogi, obonyamesira, amo ne chinguru chinde chietanetie echia botambe n’ensemo y’obosaitani. Ebitabu ebinge, amangaseti, ogotuka ayare bosio ase okoringoria ching’enang’eni, chisenema, amasakara are ne chibicha agosungwa nyomba, nonya n’amateera ngokora are ebirecha, oborogi, ne chinguru chietanetie echia botambe kororekana koba ebinto bitari nobobe gose bikogokia. Ebimira ebinge bi’amatanga, buna okong’wansera abakure, emeyega y’amatanga, okoinyora abakure kera omwaka, amatati, na okogesa ekero omonto akure, n’enchera ende y’ogokwana n’ebirecha. Botambe abanto nigo bagotumia amariogo agotindia ekero batagete chinguru chi’ebirecha.—Abagalatia 5:20; Okomaanoka 21:8.
▸ Eges. 10, ekeb. 10; Eges. 16, ekeb. 4
27 OBONENE BWA YEHOVA
Yehova nere Nyasae Omobui-bionsi, naende nigo atongete eaanga yonsi. (Okomaanoka 15:3) Ekio nakio gekogera are Omonyene ebinto bionsi naende are n’obonene, gose okobua gwensi pi, koraa igoro y’obotongi bwaye. (Zaburi 24:1; Isaya 40:21-23; Okomaanoka 4:11) Nigo abekerete kera egento atongete, amachiko. Naende Yehova nare n’okobua gw’okobeka abande koba abarai. Nigo tokwegerera obonene bwa Nyasae ekero tomwanchete na komoigwera.—1 Amang’ana ’Ebiro 29:11.
28 OKORUSIA OBORITO
Okorusia oborito nigo kogokorwa kemweno erio goita omwana otaraiborwa. Tikori mobosokano gose gokorekana korwa ase ogochenchia kw’omobere o mwanyabanto buna otongire. Korwa engaki y’okoimokia oborito, omwana tari ensemo y’ekimo ki’omobere o ng’ina. Omwana n’omonto kobwaye.
29 OKOBEKERWA AMANYINGA
Eye nenchera y’okorwaria ekero amanyinga amagima gose eyemo ye chisemo chiaye inye chinene ekong’anyigwa korwa ase omobere bw’omonto oyomo gochia ase oyonde gose korwa ase amanyinga agachire ekegancha. Chinsemo inye chinene chi’amanyinga nigo chire eplasma, chiseri chimbariri, chiseri chindabu ne chiplatileti.
30 OKORONGEYIA
Ring’ana ria “okorongeyia” ase Ebibilia tiriri ring’ana rinde ri’ogosusura. Ekero tokorongeigwa, nigo tokorokererigwa, gosomigwa, na kogororwa. Yehova tari omotindi gose otari namabera ase baria akorongeyia. (Emereng’anio 4:1, 2) Yehova nigo akobeka ekeorokererio ekiya ase abaibori. Okorongeyia ere akorua nigo gokogwenera yagera omonto ochaka gwancha okorongeigwa. (Emereng’anio 12:1) Yehova nigo abanchete abanto baye, na nigo akobegeria. Nigo akobaa ogochika koria gokogorora ebirengererio ebibe amo na koria gokobakoonya kwegera korengereria na gokora ase enchera ekomogokia. Ase abaibori, okorongeyia nigo kobwatete ogokoonya abana babo komanya eki gekogera bagwenerete koigwera. Naende nigo kominetie koborokereria komwancha Yehova, gwancha ring’ana riaye, Ebibilia, na komanya ebirengo biaye.
31 EBIRECHA
Ebitongwa bia kemoika ebisareku bitari kororekana bire ne chinguru kobua mwanyabanto. Ebirecha nabamalaika abasareku. Nigo babete abasareku ekero bekorete ababisa ba Nyasae ase ogotamoigwera. (Omochakano 6:2; Yuda 6) Nigo bamobwatisetie Saitani komomwenera Yehova.—Okoiranerera 32:17; Luka 8:30; Ogokora 16:16; Yakobo 2:19.