ERESENI 44
Inee, Emeyega Yonsi Nkomogokia Ere Nyasae?
Yehova nigo aganetie togokere obogima na ngaki chinde gochengera emeyega. Inee, emeyega yonsi na amatuko amanene y’emetimoko komogokia are Yehova? Inaki toraorokie obwanchani bwaito ase Yehova ase ring’ana eri?
1. Naseki emeyega emenge etari komogokia Yehova?
Nabo orakumie komanya ng’a emeyega emenge boroso bwaye tibori bw’amariko na nigo bokorwa ase abanto abatarenge komosasima Yehova. Emeyega buna eyio nigo ekobwateranigwa n’edini y’oborimo. Naende boigo emeyega eyio nigo ekobwateranigwa n’oborogi, ebirecha na okwegena kw’oborimo ng’a moika torigokwa. Emeyega yende oboroso bwaye nigo bore ase okwegena kw’oborimo gose okwegena chinyasae. (Isaya 65:11) Yehova nigo agokurera abasasimi baye: “Mweatanane . . . timokuna egento getachenegeti.”—2 Abakorinto 6:17.a
2. Inaki Yehova akorora emeyega eyio ekoa mwanyabanto ogosika gotabwenereti?
Yehova nigo agotokurera titogwa ase omotego ‘bw’ogosemeria mwanyabanto.’ (Soma Yeremia 17:5.) Amatuko ande amanene nigo akobaa ogosika abagambi gose ababui bechisegi. Abande nigo bagochengera rituko ri’okonyora obosibore bw’ense gose emegwekano yense buna chibendera. (1 Yohana 5:21) Emeya yende boigo nigo egosiira siasa na ebisaku. Inaki Yehova ararore oise koa omonto gose ekeombe amasikani atabwenereti, kobua mono omonto oyio gose ekeombe gekogendereria ebirengererio bire mamincha n’ogwancha Kwaye?
3. Imbwa ki eragere emeyega tiyancheranwa?
Ebibilia terigwanchera “emeyega y’okoria bobe na gotinda.” (1 Petero 4:3) Ase emeyega yende abanto tibari kwerita naende bakora obonyaka. Erio togenderere koba abasani ba Yehova, nigo tobwenerete koba aare mono n’echingendo echio ching’undo.
EGERA AMANGE
Manya buna oramogokie Yehova goetera gokora ogochora okuya igoro y’emetimoko na emeyega.
4. Anga emeyega eyio etari komosika Yehova
Soma Abaefeso 5:10, na mokwanere amaborio aya:
Ninki tobwenerete koenekia ekero togochora gochengera gose gotachengera omotimoko?
Aase omenyete matuko ki amanene gose y’emetimoko agochengerwa?
Inee, okorengereria amatuko ayio amanene y’omotimoko komogwenera are Yehova?
Ase omobwekano, kwanya kweboria naki Nyasae akorengereria igoro y’ogochengera emeyega y’amatuko y’okoiborwa? Ebibilia tiyanyagokwana igoro y’omosasimi o Yehova ogochengera rituko riaye ri’okoiborwa, korende nekwanete ara kabere igoro y’ogochengera rituko ri’okoiborwa kw’abanto batarenge abasasimi ba Nyasae. Soma Omochakano 40:20-22 na Matayo 14:6-10. Na mokwanere amaborio aya:
Mang’ana ki abwekaine ayabete ase emeyega eyio y’okoinyora rituko ri’okoiborwa?
Koreng’ana na amariko aya, naki okorengereria Yehova akoigwa igoro y’okoinyora amatuko y’okoiborwa?
Korende nabo oreborie, ‘Inee, bori n’egento kere ki’engencho ase Yehova ng’ise gochengera emeyega y’erituko ri’okoiborwa gose emeyega yende etari kobwatana n’amariko?’ Soma Okong’anya 32:1-8. Naende, orokia EVIDIO na mokwanere amaborio akobwatia.
Naseki tobwenerete koenekia gokora aria Yehova agwancherana?
Inaki torakore bo?
Buna oramanye gose omoyega torikomogokia Nyasae
Inee, oboroso bwaye nkorwa ase amaorokererio atari y’amariko? Erio komanya, tuka omochakano bw’omoyega oyio.
Inee, nigo okoa abanto, ebiombe gose ebimanyererio bi’ense ogosika gotabwenereti? Nigo tomosigete Yehova mono kobua kende gionsi na komosemeria akoore emechando y’ense.
Inee, chinaro n’ogokora kwaye nkore mamincha y’ebirengo bi’Ebibilia? Nigo tobwenerete kogenderera koba abachenu ase chingendo chiaito.
5. Koonya abande gosika okwegena kwao
Nabo erabe akong’u gokana ekero abande bagokobetereria gosanga nabarabwo ase emeyega eyetari komogokia Yehova. Baerese ogochora kwao ase oboremereria naende n’obong’aini. Erio korora omobwekano buna orakore bo, orokia EVIDIO.
Soma Matayo 7:12, na mokwanere amaborio aya:
Koreng’ana n’ekebungo eke, inee, nobwenerete kobatebia abanto b’enka yao abwo batari abegeni ng’a tibabwenereti gochengera omotimoko?
Ninki orakore erio kobaenekeria abanto benka yao, ng’a nobanchete nonya torigochengera nabarabwo emeyega?
6. Yehova nigo aganetie tobe nomogoko
Yehova nigo aganetie togokere chingaki chingiya amo n’enka na abasani baito. Soma Omorandia 8:15, na mokwanere riborio eri:
Naki ekebungo eke gekworokia ng’a Yehova nigo aganetie tobe n’omogoko?
Yehova nigo aganetie abanto baye begokie na kogokera amo chingaki chingiya. Orokia EVIDIO erio korora buna abaminto bakogokera na kwegokia ekero ki’emesangererekano emenene y’ense engima.
Soma Abagalatia 6:10, na mokwanere amaborio aya:
Inee, ntoganeirie gochengera amatuko amanene y’emetimoko erio “tokorere abanto bonsi amaya?”
Nkorua ki gokorenta omogoko—nekero obetereirie korua ase engencho yerituko rinene, gose nekero okorua ase ogwancha kwao?
Abange ba Birori ba Yehova nkoroberia bare omoyega o beene ase abana babo na kero kende babarentera ebieegwa mobosokano. Onye kobwate abana, mbinto ki bia beene orabakorere?
ABANTO BANDE NIGO BAGOTEBA: “Tikeri egento ki’engencho naki rituko rinene ri’omotimoko riachagete. Egento ki’engencho n’okogokera koba amo n’enka na abasani.”
Aye naki oratebe?
ASE OBWENG’E
Yehova nigo aganetie togokere chingaki chingiya n’enka amo na abasani. Korende boigo nigo aganetie twetange n’emeyega etari komogokia.
Einyorie
Maborio ki toreborie koenekia gose omoyega nkomogokia ore Yehova?
Inaki torabakoonye abanto b’enka gose abasani baito erio komanya ogochora gwaito igoro y’amatuko amanene y’emetimoko?
Inaki omanyete ng’a Yehova nigo aganetie tobe n’omogoko na kwegokia?
TUKA MONO
Rora emeyega beene eyio Abakristo batabwenereti gochengera.
Rora chisababu inye naseki twegenete ng’a emeyega y’okoinyora rituko ri’okoiborwa nigo ekomogechia Nyasae.
“Naseki Birori ba Yehova Batari Gochengera Amatuko y’Okoiborwa?” (Erikire ase omotandao)
Rora buna omomura oyomo akorete ase obong’aini ekero abande ase esukuru bamochecheretie ng’a ere tarigochengera Ekrisimasi.
Chimilioni chia Abakristo bachorire gotachengera Ekrisimasi. Naki bakoigwa igoro y’ogochora kwabo?
“Bakanyora Egento Ekiya Mono” (Mnawa wa Mlinzi, Disemba 1, 2012)
a Rora Amaereso y’Omoerio 5 erio kwegera buna orakore ogochora igoro y’amatuko amanene y’emetimoko.