Botambe Yeso Nigo Arenge Omoigweri

Inee, nere raisi botambe koigwera abaibori bao?— Chingaki chinde nakong’u. Aye nomanyete ng’a Yeso nomoigweri orenge ase Yehova nase abaibori baye?— Omobwekano oye nigo oragokonye kobaigwera abaibori bao nonya nekero ere akong’u. Tiga twegere amange igoro ya amang’ana ayio.

Konya Yeso ataracha ase ense, nigo amenyete igoro amo na Ise, Yehova. Yeso naende nabwate abaibori ase ense. Nigo bare korokwa Yosefu (gose Yusufu) na Maria (gose, Mariamu). Inee, aye nomanyete buna bachete koba abaibori baye?—

Yehova nigo ang’anyetie obogima bwa Yeso korwa igoro na kobobeka ime ya Maria, erio Yeso aiborwe na komenya ase ense. Eke nigo kiarenge egekone! Yeso agakina ime ya Maria buna mwana onde bwensi agokina ime y’enda ya ng’ina. Nyuma y’emetienyi kianda, Yeso akaiborwa. Ngoetera ase enchera eyio, Maria n’omosacha oye, Yosefu, babete abaibori ba Yeso igaa ase ense.

Ekero Yeso arenge n’emiaka 12, agakora egento gete kiorogetie buna amwanchete Ise, Yehova. Egento ekio nigo kiabete ekero Yeso amo n’enka yaye, bachiete esabari y’orogendo orotambe, gochia Yerusalemu ase engencho y’epasaka. Ekero bare koirana gochia sobo, Maria na Yosefu tibamoroche Yeso ande. Aye nomanyete ase arenge?—

Yosefu na Maria bakaayerera koirana gochia Yerusalemu na komorigia Yeso kera ase. Ase engencho batamonyorete, nigo barenge n’omondoko omonene. Korende nyuma ya amatuko atato bakamonyora ore ase hekalu ime! Aye nomanyete ekiagerete Yeso arenge ase hekalu ime?— Ekiagera, ase hekalu nkoegera arenge igoro ya Ise, Yehova. Nigo amwanchete Yehova, ase igo nigo atagete kwegera buna aramogokie. Nonya nekero akinete akaba omonto omonene, Yeso nigo amoigwerete Yehova botambe. Ere nigo aigwerete nonya nekero yarenge akong’u, gose komoretera emechando. Inee, Yeso nabaigwerete Yosefu na Maria?— Ee, nabo Ebibilia egoteba ng’a nabaigwerete.

Ninki okwegera korwa ase Yeso?— Nonya ere akong’u, baigwere abaibori bao. Nokore bo?—