Yeremia Tatigeti Gokwana Igoro ya Yehova

Chingaki chinde abanto ngotochecheria bare gose gotoigwera obororo ekero tokobatebia igoro ya Yehova. Eke negento keragere totige gokwana igoro ya Nyasae. Aye kwana koigwa igo?— Ebibilia nigo egototebia igoro y’omomura oyomo omosae, omwanchete Yehova korende otigaretie ake atige gokwana igoro ya Yehova. Nigo are korokwa Yeremia. Tiga twegere amange igoro yaye.

Ekero Yeremia arenge omomura omosae, Yehova akamotebia ng’a goika abakurere abanto batige gokora ebinto ebibe. Eke nigo kiarenge egento egekong’u mono ase Yeremia, naende nigo arenge n’obwoba. Akamotebia Yehova: ‘Inche tinkomanya gokwana. Inche n’omwana omoke.’ Korende Yehova akomotebia: ‘Tobaisa kwoboa Inche ningokonye.’

Ase igo Yeremia agachaka kobakurera abanto ng’a mbanyore egesusuro onye barabwo tibagonchoreria. Aye okorengereria abanto mbakorete eki Yeremia atebete?— Yaya. Nigo bare komochecheria gose komoigwera obororo mono. Abande nigo batagete komoita akwe! Inaki aye okorengereria Yeremia aigwete?— Nigo arenge n’obwoba na goteba ng’a: ‘bono tingokwana igoro y’Omonene nonya ng’ake.’ Inee, bori ere natigete gokwana?— Yaya, tatigeti. Nigo amwanchete Yehova mono tare konyara gotiga gokwana igoro yaye. Naende ase engencho Yeremia atatigete gokwana igoro ya Yehova, Yehova nigo amorendete.

Ase omobwekano, engaki eyemo abanto gete ababe bakamoruta Yeremia gochia engoro entambe ime yaichire etente. Tabwate endagera gose amache. Abanto abwo nigo batagete komotiga Yeremia aroro akwe. Korende ase ogokonya kwa Yehova agatama!

Ninki aye okwegera korwa ase Yeremia?— Nonya chingaki chinde orenge n’obwoba tatigeti gokwana igoro ya Yehova. Ekero aye ogokwana igoro ya Yehova, abanto nabo baragochecherie gose bakoigwere obororo. Nabo oraigwe obosoku gose nonya n’obwoba. Korende totiga gokwana igoro ya Yehova. Botambe nagokonye, buna amokonyete Yeremia.