Samweli Akagenderera Gokorera Oboronge

Korwa ekero Samweli arenge omoke, nigo amenyete na gokora emeremo ase etabanako, ase abanto bare gocha komosasima Yehova. Aye nomanyete buna Samweli achete gotoka ore ase etabanako? Tiga ritang’ani twegere igoro ya ng’ina, ore korokwa, Hana.

Ase engaki entambe Hana nigo arenge omogomba, nonya otagete konyora omwana. Ase igo akamosaba Yehova na komosorora amokonye. Nere akamoriera eira ng’a aise konyora omwana omomura, nigo aramotome kogenda komenya na gokora emeremo ase etabanako. Yehova akaigwa ogosaba kwaye, nere akonyora omwana omomura. Akamoroka Samweli. Na buna Hana ariete eira, ekero Samweli arenge n’emiaka etato gose ene, akamoira ase etabanako komokorera Nyasae aroro.

Eli nere orenge omokuani omonene ase etabanako. Abamura ba Eli babere na barabwo nao bare gokora emeremo. Inyora ng’a etabanako nigo yarenge enyomba ya Nyasae y’ogosasima, na abanto nigo batakeire gokora ebinto bire ebiya aroro. Korende abamura ba Eli nigo barenge gokora ebinto ebibe mono. Samweli naroche ebinto barenge gokora. Inee, Samweli nakorete ebinto ebibe buna abamura ba Eli bare gokora?— Yaya, nigo agendererete gokorera oboronge buna abaibori baye bamoegeretie.

Aye okorengereria ninki kiagwenerete Eli abakorere abamura baye babere?— Nigo agwenerete kobaa egesusuro. Naende abakanie tibakora emeremo ende yonsi ase enyomba ya Nyasae. Korende Eli takorete igo, ase igo Yehova akagechigwa nere mono amo na abamura baye babere. Yehova akanacha kobaa egesusuro.

Obotuko obomo ekero Samweli araire, akaigwa omonto okomorangeria iga: ‘Samweli!’ Akaboka na kominyoka gochia ase Eli, korende Eli akamotebia iga: “Inche tinkorangereti.” Naende akarangerigwa chintunda chinde ibere. Nyuma y’entunda ya gatato, Eli akamotebia Samweli ng’a aise koigwa eriogi rikomorangeria naende, rirorio atebe iga: ‘Omonene, gaki kwana inche omosomba oo ninyigwete.’ Na Samweli agakora boigo. Erio Yehova akamotebia Samweli iga: ‘Motebie Eli ng’a, nabeire ang’e koa eamate yaye egesusuro ase engencho y’ebibe biabo.’ Aye okorengereria ndaisi yarenge Samweli komotebia Eli buna atometwe?— Yaya, tiyarenge raisi. Korende nonya Samweli orenge n’obwoba, nigo akorete buna Yehova amotebetie. Eki Yehova atebete ngiaikeranete. Abamura ba Eli babere bagaitwa, na Eli nere agakwa boigo.

Samweli n’ekiorokererio ekiya ase tore. Nigo akorete ase oboronge nonya n’ekero aroche abanto bande bagokora ebinto ebibe. Aye rende? Inee nobe buna Samweli na kogenderera gokora ase oboronge? Oise gokora igo, nigo oramogokie Yehova amo na abaibori bao.