Omonyaroka Omogogetie Yehova amo na Ise

Aye nomoroche omoiseke ore ase ebicha?— Ere n’enyaroka y’omonto ore korokwa Yefta. Ebibilia teri gototebia erieta riaye, korende ntomanyete ng’a nigo amogogetie Yehova amo na ise. Tiga twegere igoro yaye amo na ise, Yefta.

Yefta nigo arenge omonto omuya, orekoira chingaki chinyinge komwegeria omonyaroka oye igoro ya Yehova. Naende nigo arenge omonto omokong’u na omorai omuya. Ase igo, Abaisraeli bakamoboria abarae kobarwani ababisa babo.

Yefta agasaba Nyasae amokonye abue esegi. Yefta akamoriera Yehova eira ng’a aise komokonya abue esegi, omonto onde bwensi oratang’ane gosoka korwa mwaye gocha komorotota, omonto oyio narwegwe komenya na gokora emeremo ase etabanako, (gose enyomba y’ogosasima ya Nyasae) ase obogima bwaye bwensi. Etabanako nase abanto bare kogenda komosasima Nyasae, engaki eyio. Na Yefta, akabua esegi! Aye nomanyete ning’o osogete korwa mwaye ritang’ani komorotota ekero are koirana korwa ase esegi?—

N’omonyaroka oye! Omonyaroka oyio nere omwana bweka Yefta abwate, na bono goika amorwe. Egento ekio nigo kiamoichanetie mono. Korende inyora ng’a nariete eira. Abwo abwo, omonyaroka oye agateba iga: ‘Tata, onye kwarierete Omonene eira, yeikeranie.’

Enyaroka ya Yefta nonya nere, naichanete. Ase etabanako, tare konyuomwa na konyora abana. Korende nigo atagete goikerania eira ya ise na komogokia Yehova. Ase ere ekio nakio kiarenge egento ki’engencho mono kobua konyuomwa na konyora abana. Ase igo akarwa sobo na kogenda komenya ase etabanako ase obogima bwaye bwensi.

Inee, aye okorengereria egento ekio akorete nkiamogogetie ise amo na Yehova?— Ee bono! Oise koba omoigweri na komwancha Yehova, nabo okoba buna omonyaroka o Yefta. Naye nobagokie mono abaibori bao amo na Yehova.