Ana Du’a Du’a La Yehowa Ho San Yeti Ho Keŋɛ Sukuu Pa’asɛ

1-2. (a) Ho san kɔ’ɛ ho puti’irɛ ti ho keŋɛ sukuu pa’asɛ, bem ti la nara ti ho kelum ita? (b) Baabule la n yeti to “kpeŋe to mɛhe bɔna wo ton boe se’em wa la” vuurɛ dela bem? (Filipi 3:16)

MABIISI basɛba san ni keŋɛ sukuu paɛ beense’ere ti gɔmɛt la pa’alɛ ti la nari ti nɛra woo keŋɛ paɛ la, ba ta’an ni kɔ’ɛ ba puti’irɛ ti ba keŋɛ sukuu pa’asɛ. Ba ta’an ti’isa ti ba san keŋɛ sukuu pa’asɛ, la wan soŋɛ ba ti ba nyɛ tuunɛ n wan basɛ ti ba ta’an bisa bamea ge me pu’usa Yehowa soŋa. Ho san kɔ’ɛ la ho puti’irɛ ti ho keŋɛ sukuu pa’asɛ, bem n wan soŋɛ hɔ ti ho ta’an kelum ana du’a du’a la Yehowa? (Yam. 4:8a) Hon yuun boi sukuu la, daanse’ere ba yuun giiseri ho mɛ ge ti ho nyaŋɛ ŋmibe pu’usa Yehowa. Nananawa, la wan nara ti ho kelum “kpeŋe [homea] bɔna wo [hon] boe se’em wa la.” Bala pa’alɛ ti ho tara yelemɛŋɛrɛ bɔ’ɔra Yehowa wuu hon puɣum ita se’em la.—Kaalɛ Filipi 3:16.

² Greek yelesum la ti ba lerege yeti to “kpeŋe to mɛhe bɔna wo ton boe se’em wa la” pa’alɛ la soogɛpa n naɛ taaba tɔ tontɔɔ kena ge ka ŋmɛregera. Ho san kɔ’ɛ ho puti’irɛ ti ho keŋɛ sukuu pa’asɛ, la wan nara ti ho ana wuu soogɛpa n tɔ tontɔɔ kena ge ka ŋmɛregera la. La me nari ti ho naɛ la mabiisi la pu’usa Yehowa soŋa soŋa ge da lɛbera pooren. Zaseŋɔ wa poan, to wan sɔsɛ Baabule naresum yɛla anaasi n wan ta’an soŋɛ hɔ. Ho puɣum mina naresum yɛla wa mɛ. Naresum yɛla wa tabelɛ soŋɛ ho mɛ ti ho kɔ’ɛ ho puti’irɛ soŋa ge me wan kelum soŋɛ hɔ sukuu poan. Hali ho san ta ba’asɛ sukuu, la wan kelum soŋɛ hɔ.

KELUM ITA YELESE’A N WAN BASƐ TI HO ANA DU’A DU’A LA YEHOWA

3. Ho san keŋɛ sukuu pa’asɛ, bem daaŋɔ n ta’an paɛ hɔ?

³ Sɛla n wan ta’an basɛ ti la kpe’em. Ho san kena sukuu la, ho wan tara yɛla zo’e zo’e ti ho eŋɛ. Bala wan ta’an basɛ ti ho kan tara nɛŋa. Hon boti ho mɔɔra sukuu poan la zuo, bala ta’an basɛ ti ho kɔ’ɔn mu’ɛ nini ho sukuu yɛla poan gana Yehowa pu’usegɔ. Ho ta’an pɔsɛ vi’ira zamesegɔ, na’am mɔɔlegɔ, la homea zamesegɔ ge me kan le nyɛta nɛŋa zusera soŋa.—Lil. 2:4.

4. Beni n wan soŋɛ hɔ ti ho ta’an ‘mɔ’ɛ nini daarɛ woo tona to Daana Na’ayenɛ tooma’ la? (1 Korint 15:58)

⁴ Kaalɛ 1 Korint 15:58. Wuu nɛra n ni nɛɛra keekee ti la zɔta se’em la, bala mea ti to san mu’ɛ nini tuna Yehowa tuuma, la wan basɛ ti to tara bɔnsoŋa la en. Bala n sɔi ti Baabule la yeti, “mɔ’ɛ ya nini daarɛ woo la ya tona to Daana Na’ayenɛ tooma” la. Bala ka pa’alɛ ti ho yeen nyɛta nɛŋa tuna Yehowa tuuma ge la dela ho basɛ ti Yehowa tuuma yele pakɛ hɔ. Basɛ ti Yehowa pu’usegɔ deŋɛ nɛŋa ho vom poan ge daɣɛ ho sukuu la. (Mt. 22:37) Mabipɔka Samantha yeti, “Mam yuun yele n mea yeti, sukuu kenɛ la san ta basɛ ti n ka ta’an pu’usa Yehowa soŋa, mam wan basɛ sukuu la kenɛ.”

5. Ho wan eŋɛ la wani ta’an mu’ɛ nini tuna Yehowa tuuma?

⁵ Hon wan ta’an eŋɛ sɛla ge nyaa pɔsɛ sukuu la kenɛ. Mina yelese’a n de ninmu’urɛ bɔ’ɔra hɔ. Soke homea yeti, ‘Mam wan eŋɛ la wani nyɛta nɛŋa saŋa woo kena zamesegɔ la na’am mɔɔlegɔ ge me ita n mea Baabule zamesegɔ?’ (Yos. 1:8; Mt. 28:​19, 20; Heb. 10:25) Le soke homea yeti: Yuun se’a n tole la ti mam yuun kena sukuu la, bem n yuun soŋɛ mam ti n yuun ta’an tuna Yehowa tuuma? Ho san bisɛ ti la yuun nari ti ho eŋɛ teere ase’a, bem teere ti ho wan ta’an eŋɛ nananawa? Ho san yeti ho keŋɛ sukuu pa’asɛ, kɔ’ɔn lu ho suure ti ho wan mu’ɛ nini tuna Yehowa tuuma. Ho ta’an mu’ɛ nini ho sukuu yɛla poan ge da basɛ ti sukuu la basɛ ti ho kan nyɛta nɛŋa pu’usa Yehowa soŋa.a—Mt. 6:24.

6. Ho wan ta’an soke homea la bem sokere? (Bisɛ foote la.)

⁶ Ho san pɔsɛ sukuu la, la wan ana soŋa ti ŋmarega woo ho ni viisɛ homea bisɛ. Soke homea yeti, ‘Mam kelum basɛ ti Yehowa pu’usegɔ deŋɛ nɛŋa n vom poan? Mam ni vi’ira la zamesegɔ bii mam ni paɛ zamesegɔ zɛ’an ti ba puɣum pɔsɛ mɛ? Mam ni zĩ’a la zamesegɔ zɛ’an ge ti’isa sukuu yɛla? Mam nɔŋɛ la n ni dekɛ fon connect zamesegɔ ge ka kena Na’am Pu’usegɔ Deo la poan?’ Ho ta’an le soke homea yeti, ‘Mam zuseri bii kaala Baabule la wuu mam n yuun iti se’em la? Mam bisɛ ti la ni dɛna la pɛ̃regerɛ bɔ’ɔra mam ti n keŋɛ na’am mɔɔlegɔ ge me ni bɔta ti n pɔŋɛ kalam?’ Ho san bisɛ ti la nari ti ho eŋɛ teere, eŋɛ dɛ kalam. Da basɛ ti ho sukuu kenɛ la gu’ura hɔ ti ho kan nyɛta nɛŋa pu’usa Yehowa soŋa.

DA BASƐ TI NƐREBA TEE HO PUTI’IRƐ

7. Ho san keŋɛ sukuu pa’asɛ, la wan ta’an tee ho puti’irɛ la wani?

⁷ Sɛla n wan ta’an basɛ ti la kpe’em. Hon loe sɛla zamesa sukuu la ta’an dɛna “asaala yam yoo” n wan ta’an pã’asɛ hɔ. Makerɛ, ba ta’an pa’alɛ hɔ ti Naayinɛ ka boi bii asaala doose la lebege lebege poan na bɔna. (Kol. 2:8) Hon me n zamesɛ sɛla la ta’an basɛ ti ho ba’ɛ bisɛ nam homea. Mabia ayima n de bunbilipaalega yeti: “Ba yuun ka kumesɛ tɔ ti to yeen mina la tuuma ma’a ge ba yuun pa’alɛ to la ton wan ti’isa se’em. Ban yuun ni pa’ala to sɛla la me ka makɛ la Yehowa puti’irɛ. Makerɛ, ba yuun pa’alɛ tɔ ti tomea n wan ta’an basɛ ti to vom ana soŋa. Bala yuun basɛ ti mam pɔsɛ ti’isa ti mam ka eeri Yehowa ti n ta’an tara pupeelum. Yele wa yuun basɛ ti la kpe’em bo mam mɛ ti n dekɛ n mea delum Yehowa.”

8. Beni n sɔi ti la yele pakɛ ti to “tana [to] mɛŋa tara” bii to gu’ura to puti’irɛ? (Magaha 5:​1, 2)

⁸ Kaalɛ Magaha 5:​1, 2. Baabule la kaɣɛ tɔ ti to “tana [to] mɛŋa tara” bii to gu’ura to puti’irɛ. To ni gu’ura lɔkɔ mɛ to san mina ti nɛra wan sa’am ka bii dekɛ ka. Sitaana la a tingɔnbe’o wa me kɔ’ɔn tiregera ti ba sa’am la to puti’irɛ. (1 Pe. 5:8) Nɛreba ka tari sarensoŋɔ. Ba me ka sakɛ ti Naayinɛ boi bii eŋa n naam vom. Yele aŋa ta’an basɛ ti ho tara puti’ira ayi ayi la Baabule la n pa’alɛ Yehowa yele se’em la. Tikiyadoma la nɛreba basɛba ta’an basɛ ti ho ti’isa ti bamam n pa’alɛ ho sɛla la n kɔ’ɔn gana za’a ge la daɣɛ yelemɛŋɛrɛ. La tuɣum dɛna la “gɔɔnɛ Na’ayenɛ nɛŋan.”—1 Ko. 3:​18-20.

9. Ho wan eŋɛ la wani ta’an gu ho puti’irɛ?

⁹ Hon wan ta’an eŋɛ sɛla ge nyaa pɔsɛ sukuu la kenɛ. Sɛla n wan soŋɛ hɔ ti ho ta’an gu ho puti’irɛ dela, ho sakɛ ti Baabule la n pa’alɛ yelese’a la dela yelemɛŋɛrɛ. La nari ti ho eŋɛ bala ge nyaa keŋɛ sukuu pa’asɛ. Ho ta’an soke homea yeti: ‘Beni n sɔi ti la nara ti n sakɛ ti Naayinɛ boi? N wan eŋɛ la wani baŋɛ ti Baabule la sirum dela Naayinɛ Yelesum? Beni n sɔi ti mam sakɛ ti la nari ti n dɔla Baabule la n pa’alɛ sareŋɔ yɛla se’em la ge daɣɛ nɛreba n pa’alɛ sɛla la?’ La me wan ana soŋa ti ho ti’isɛ bisɛ hon yuun keni sukuu ti la ana se’em la ge soke homea yeti, ‘Sukuu kɔma basɛba n yuun sakɛ bo lebege lebege pa’alegɔ la yuun basɛ ti mam sakerɛ miina mɛ? Mam yuun boti la n ita yelese’a ti sukuu kɔma la ita ti la ka ana soŋa la? Ho san bisɛ ti la yuun nari ti ho eŋɛ teere, ho wan eŋɛ la bem ti ho sakerɛ kpe’em nananawa? Da bo yɔ’ɔ ti nɛreba n pa’ali ho sɛla la basɛ ti ho tara puti’ira ayi ayi la hon sakɛ bo sɛla la.—2 Tim. 2:​16-18.b

10. Ho wan eŋɛ la wani ta’an kɔ’ɔn gu’ura ho puti’irɛ?

¹⁰ Ho san kena sukuu la, ni makɛ viisɛ homea bisɛ. Soke homea yeti: ‘Nɛreba n vɔi ba vom se’em la teeri la mam puti’irɛ? Mam wan ta’an baŋɛ ti sɛla ti nɛreba pa’ala la dela yelemɛŋɛrɛ bii pumpɔreŋɔ? Mam sakɛ ti Naayinɛ Na’am la ma’a n wan ta’an maalɛ to yeledaaŋɔ la woo?’ Sɛla n wan ta’an le soŋɛ hɔ ti ho gu’ura ho puti’irɛ dela, ho zamesa Baabule la soŋa soŋa. Ho san zamesa Baabule la ge ti’isa taɣesa de poan, bala wan soŋɛ hɔ ti ho sakerɛ kpe’em yelemɛŋɛrɛ la poan.—1 Tim. 4:15.

TARA HO SAŊA LA TUNA SOŊA

11. Ho san keŋɛ sukuu pa’asɛ, beni n wan ta’an basɛ ti la kpe’em bo ho ti ho tara ho saŋa la tuna soŋa?

¹¹ Sɛla n wan ta’an basɛ ti la kpe’em. Ho san kena sukuu, la wan dekɛ ho saŋa zo’e zo’e yele yele wuu ho san zamesa ti ho gulesɛ exams bii ho san tara sukuu tuunɛ ti ho tum. Ho san ka maasum ho saŋa la soŋa, bala ta’an basɛ ti tɔregɔ kɛ̃ hɔ ge ti la me wuŋɛ hɔ. Bala la, la nari ti ho nyɛta nɛŋa bɔ’ɔra homea.

12. La wan nara ti ho nyɛta nɛŋa ita la bem yɛla? (Epesus 5:​15, 16)

¹² Kaalɛ Epesus 5:​15, 16. La ta’an kpe’em bo ho ti ho tara ho ‘saŋa la tuna soŋa soŋa.’ Sɛla n sɔi la, ho tari la yɛla zo’e zo’e ti ho eŋɛ. Makerɛ, ho mi ti la nari ti ho nyɛta nɛŋa zamesa sukuu yɛla ge sɛla n pakɛ gana dela ho nyɛta nɛŋa bɔ’ɔra ho deodoma, la mabiisi. (Ym. 133:1; Mag. 18:1) Sɛla yele n pakɛ paa dela, ho ita yelese’a n wan basɛ ti ho ana du’a du’a la Yehowa. (Mt. 6:33) Ho me ta’an tara zugbere tuunɛ yire bii tunse’ere ti la nara ti ho tuna. La me nari ti ho nyɛta nɛŋa vɔ’ɔsa ge ita exercise ge me bisera ho imma’asum soŋa. (Pa. 4:6; 1 Tim. 4:8) La dela ho maasum ho saŋa soŋa ta’an ita yele ana wa.

13. Ho wan eŋɛ la wani ta’an tara ho saŋa la tuna soŋa soŋa?

¹³ Hon wan ta’an eŋɛ sɛla ge nyaa pɔsɛ sukuu la kenɛ. Baabule la yeti to san ni te’ele maasum, la wan soŋɛ tɔ ti to ta’an tum to tuuma soŋa. (Mag. 21:5) Bala la, te’ele maasum hon wan tara ho saŋa tuna soŋa se’em ge nyaa keŋɛ sukuu la. Ho ta’an ti’isɛ bisɛ hon yuun keni sukuu ti la ana se’em la ge nyaa soke homea yeti: ‘Mam n yuun boi sukuu la, mam yuun nyɛti nɛŋa tuna ninmu’urɛ tuuma la? Ho san bisɛ ti la yuun nari ti ho eŋɛ teere, bem teere ti la nara ti ho eŋɛ nananawa?’ La nari ti ho maasum ho saŋa la soŋac lan wan eŋɛ se’em ti ho yɛla ta’an kena soŋa.

14. Ho wan ta’an soke homea la bem sokere ta’an viisɛ homea bisɛ?

¹⁴ Ho san kena sukuu la, la nari ti ho ni makɛ viisɛ homea bisɛ. Soke homea yeti: ‘Mam nyɛti nɛŋa vɔ’ɔsa ge me ita exercise? Mam nyɛti nɛŋa sɔsera la mabiisi la? Mam ni ta’an tum n sukuu tuuma la ba’asɛ sansɛka n nari poan? N san ka ta’an ita bala, la dela n tuuma n zo’e zuo bii n ni gu’una mɛ? Mam yidoma, la mam zɔdoma ti’isɛ ti n nari ti n eŋɛ teere?’ Ho san bisɛ ti la nari ti ho eŋɛ teere ta’an tara ho saŋa la tuna soŋa, eŋɛ dɛ kalam. Hali ho ta’an tɔɣɛ bo sɛba n tari ba saŋa tuna soŋa ti ba laɣum soŋɛ hɔ.—Mag. 11:14.

KƆ’ƆN SƆSERA LA “YAMDOMA”

15. Ho san keŋɛ sukuu pa’asɛ, bem yeledaaŋɔ n wan ta’an paɛ hɔ?

¹⁵ Sɛla n wan ta’an basɛ ti la kpe’em. Ho san pɔsɛ kena sukuu la, sukuu kɔma la ta’an bɔta ti ho ni naɛ la ba ti ya sɔsa. Daanse’ere, ho me ta’an bɔta ti ho naɛ la ba sɔsa. Sɛla n sɔi la, ba dela ho tadaandoma ge ti ya me laɣum bɔna sukuu. Daanse’ere, ho me ta’an bɔta yelese’a ti ba ita la. Ho ta’an puɣum pɔsɛ ti’isa ti sukuu kɔma la bɔkeri ho gana mabiisi basɛba. Ge la nari ti ho bisɛ homea soŋa. La boi bim ti hon la bamam laɣum zamesa mɛ ge ba ka pu’useri Yehowa. Ho san nɔŋɛ ti ho naɛ la ba sɔsa, ho ta’an ta pɔsɛ ti’isa wuu bamam n ti’iseri se’em la. (1 Ko. 15:33) Bala n yuun paɛ to mabia ayima yu’urɛ n de Michael. A yuun dekɛ la yuuma anaasi zamesɛ elɛtrisian tuuma. A yeti, “Bakwai woo mam yuun ni dekɛ la awa n gaŋɛ 40 naɛ la n tuntuneba tadaandoma la sɔsera. Ba yuun ni tɔɣera la yetɔɣegaasa, kɛlesa yuuma n ka ani soŋa ge me ka tara gilema bɔ’ɔra pɔɣesi. Mam yuun nyaa pɔsɛ ti’isa ti bamam n tɔɣeri ge ita sɛla la ka ba’ɛ dɛna be’em.”

16. Magaha 13:20 pa’alɛ to la bem?

¹⁶ Kaalɛ Magaha 13:20. Baabule la ka’am tɔ ti zɔtɔ be’ero nyɔka tari la dɛŋa. Ge “se’em n sonhere la yamdoma wan nyɛ yam.” La niɛ peelumi ti, ton naɛ la nɛresɛba sɔsera la ta’an basɛ ti to tara yɛm bii ba sa’am tɔ. Nyɔɣɛ zɔtɔ la sɛba n pu’useri Yehowa, sɛla n sɔi la bamam n boti ho som.—Ym. 101:​6, 7; 119:63.

17. Ho wan eŋɛ la wani kan nyɔɣɛ zɔtɔ be’ero?

¹⁷ Hon wan ta’an eŋɛ sɛla ge nyaa pɔsɛ sukuu la kenɛ. Mina hon wan dekɛ saŋa se’em naɛ la sukuu kɔma la sɔsera. Mabia ayima yu’urɛ n de Trenton yeti: “Mam tari la bɔnsoŋa la sukuu kɔma la ge to san pɔŋɛ sukuu, mam ni ka le naɛ la ba sɔsera. Mam geele ba ti ba dela sukuu kɔma ge daɣɛ n zɔdoma.” Ho wan eŋɛ la wani kan ba’ɛ ana du’a du’a la sukuu kɔma la? Sɛla n wan soŋɛ hɔ ti ho ta’an lebese sokere wa dela, ho ti’isɛ bisɛ hon yuun bo sukuu poan ti la ana ho se’em. Ho ta’an soke homea yeti, ‘Mam yuun eŋɛ la wani ka ba’ɛ ana du’a du’a la sukuu kɔma la?’ Ho san bisɛ ti la yuun nari ti ho eŋɛ teere, bem teere ti ho wan ta’an eŋɛ nananawa? Lu ho suure ti ho wan sɔsera la “yamdoma” ge kan ana du’a du’a la sɛba n ka nɔŋɛ Yehowa.d

18. Ho wan ta’an soke homea la bem sokere ti la soŋɛ hɔ? (Bisɛ foote la.)

¹⁸ Ho san kena sukuu la, la nari ti ho ni makɛ viisɛ homea bisɛ. Soke homea yeti: ‘Mam ba’ɛ ana la du’a du’a la sukuu kɔma la? Mam nyaa tɔɣeri ge ita wuu bamam n iti se’em la? La ani Yehowa la wani la mam n boi la ba se’em la?’ (Ym. 1:1) Ho san bisɛ ti la nari ti ho eŋɛ teere, eŋɛ dɛ kalam. Nyɔɣɛ sɛba n nɔŋɛ Yehowa zɔtɔ. Leyɛ’ɛsa, da zɔta dabeem ti ho mɔɔlɛ bo sukuu kɔma la. Hon naɛ la ba bɔna sukuu la zuo, ho tari la yɔ’ɔ ti ho mɔɔlɛ bo ba.

MAASUM SOŊA

19. Ho san bɔta ti ho keŋɛ sukuu pa’asɛ, ho wan te’ele maasum homea la wani gura yeledaaŋɔ se’a n wan ta’an paɛ hɔ? Bo makerɛ.

¹⁹ Geele makerɛ wa bisɛ. Nɛra san bɔta ti a keŋɛ goo poan, la nari ti a maasum soŋa ge nyaa keŋɛ. La boi bim ti a ka mi yeledaaŋɔ la za’a n wan ta’an paɛ en sore la zuo ge a mi eŋa n ye zɛ’an mɛ ge me mina lɔɣese’a n nari ti a tara ti la soŋɛ en. To ta’an dekɛ wana makɛ la nɛra n boti a keŋɛ sukuu pa’asɛ. Ho san yeti ho keŋɛ sukuu pa’asɛ, basɛ ti ho sakerɛ kpe’em ge me dekɛ “Yenɛ zaberɛ lɔgɔrɔ la” yɛ. Tɛ̃ra sɛla n sɔi ti ho bɔta ti ho keŋɛ sukuu pa’asɛ. La daɣɛ ti ho boti la ho tara ligeri zo’e zo’e bii ho nyɛ yu’urɛ ge ho ta’an bisa homea ge pu’usa Yehowa soŋa.—Ep. 6:​11-13; 1 Ko. 9:​26, 27; 10:31.

20. Ho wan eŋɛ la wani ta’an ‘magahɛ homea behɛ nyaa ho sɛ ze’ele soŋa soŋa Yesu sore dɔlɔga la poan’?

²⁰ Baabule la yeti, “Magahɛ ya, ya mɛhe behɛ nya ya sɛ ze’ele soŋa soŋa ya bɔŋa Yesu sore dɔlɔga la poan. Gankɛ ya, ya mɛhe de zuo behɛ yan ane se’em.” (2 Ko. 13:5) Ho ta’an eŋɛ bala ho san yeti ho keŋɛ sukuu pa’asɛ. Ni makɛ dekɛ yelese’a ti to sɔsɛ zaseŋɔ wa poan la viisɛ homea bisɛ. Tɛ̃ra soke ana wa: Hon iti yelese’a n wan basɛ ti ho ana du’a du’a la Yehowa? Ho wan eŋɛ la wani kan basɛ ti nɛreba tee ho puti’irɛ? Hon tari ho saŋa la tuna soŋa? Hon nyɔɣɛ sɛba n nɔŋɛ Yehowa zɔtɔ ge me zaɣesɛ zɔtɔ be’ero? La nari ti ho soke homea soke ana wa ho san kena sukuu bii ho boi la tuuma zɛ’an bii zɛ̃sɛka deeni. Ho bɔŋa zɛ’an n yeen ana se’em, kɔ’ɔn lu ho suure ti ho basɛ ti ho sakerɛ kpe’em. Tara sakerɛ ti Yehowa wan kã bo ho la hon mɔɔri ti ho ta’an ana du’a du’a la en la.—Mag. 3:​5, 6.